الاثنين، 20 أكتوبر، 2008

زي النهارده فرحي يا جدعان


سلام عليكم


طبعا يا جماعه انا ما باعرفش اعمل اي حاجه فىا لدنيا من غير ما ارغي معاكم عنها


فجيت اقولكم ان النهارده عيد جوازي


عيد جوازي التاسع


شوف الصمود يا اخي


وعقبال كل الى ما اتجوزش يارب يتجوز والى اتجوز يحصل السنه التاسعه زي ويحصل الميه كمان فى سعاده يارب


اسمحولي احكيلكم عن يوم فرحي عشان انا مبسوطه النهارده


أنا اولا ما عملتش حفله وكده يعنى انا سافرت لرضا وهو كان فى الامارات

سافرتله وهو كان استلم الشغل بقاله اربعين يوم فقط

طبعا خيرني تيجلي ولا تستنى لما انزل بعد سنه ونعمل فرح وكل الحركات


شور انتم عارفني لااااازقه انجليزي قلتله لا وراك وراك يا نجم

وسافرت رغم اعتراضات وتسجيل تحذيرات من ناس كتير

بس الحمد لله عملت الصح


طبعا وانا باحجز الكوافير والاستوديو كان الناس بتصوت عشان المواعيد

صحيت الكوافير من الساعه 8 صباحا عشان كانت المفروض اتواجد فى المطار الساعه 4 عصرا

طبعا لازم اطلع من المنصوره على الساعه واحده مثلا

وصحيت بتاع الاستوديو برضه

ايوه اتصورت لوحدي خفت على ما اروح هناك اكون شكلي باظ بقى ولزق بس حصل خير

وخرجت من بيتنا الساعه 8 الصبح وانا باعيط وماما بتعيط والبيت كله بيعيط عشان مسافره بقى وكده


وقعدت اعيط عند الكوافير لحد ما زعقت فيا وقالتلى مش هاشتغل

ويهديكى يرضيكى وجابولي صاحب المحل عشان انا كنت فى قسم المحجبات المهم بقى سكتوني وعملولي ماسك وقعدوني فى مكاني هادي شويه نص ساعه

وبدأوا شغل

انا انشغلت بقى معاهم فى اختيار الالوان ورشق مناخيرى فى كل حاجه

وطلعت واتصورت

وما هانش عليا امشي الا لما ارجع بيت بابا تاني

طبعا الشعب المصري كله كان جاي عايز يجي معايا المطار بس الحمد لله خدت نص الشعب بس

وطبعا كان شكلي وانا ماشيه الساعه واحده الظهر بالعربيه وانا لابسه عروسه اهبل جدا ومثير للجدل


ولما روحت المطار وبعد الوداع والعياط وكل حاجه

طبعا من اول ما طلعت من العربيه وانا فرجه بقى

بس اول ما دخلت الصاله بقى لقيت حد بصوت عالي بيقول عروسة الخليج جت (طيران الخليج يعنى)


أنا استغربت وقلت ياربي هما عرفوا منين لكن عرفت بعد كده ان ماما قالت لهم فى التليفون


والست رخمت عليا فى الوزن عشان ماما كانت عطاني اكل كأني راحه مجاعه بالاضافه لهدومي كعروسه

وبعدين دخلت الطياره ولله الحمد

وعمو الطيار جه سلم عليا وباركلي

وكان قاعد جمبي واحده رخمه اوي وجوزها رخم برضه والله مش عارفه ليه


وعاملوني معامله خاصه بقى المضيفات دلوعني خالص

وانا بصراحه كنت هاموت من الجوع والتعب

اكلت اكلي كله ونمت كمان شويه


واخيرا وصلت

بصراحه هناك فى المطار كان ناقص يشلوني

ناس ذوق ذوق ذوق صراحه

فى خمس دقايق كنت بره المطار


لقيت رضا واقف ومعاه ناس كتير اوي ما اعرفهمش

والناس يا عينى كان عندهم كبت ما صدقوا شافوا عروسه ركبنا العربيه وورانا عربيات كتير بتوع اصحابه بقى وكده وهات يا كلكسات بس واحنا بره البلد عشان جوه البلد ممنوع عقبلنا ياااااارب .


ونظرا لظروف ماديه باحته الغيت الحفله الى كان مرتب لها على مركب فى ابو ظبي

واكتفينا اننا لفينا شويه بالعربيات وسمعنا شوية قر ونق حلوين من الناس فى الشارع ولله الحمد


ورجعنا البيت ومعانا ناس اصحابنا وقرايبنا هناك ونص ساعه والمولد انفض والعروسه للعريس ...
وضربنا الديك الرومي ولله الحمد
هههههههههههههههههههههههههه


بصراحه الوحش الوحيد فى حكاية الجواز بره اننا كنا حاسين اننا مقطوعين يا عينى الاسبوع الاولاني كله

كل الناس مكسوفين يجوا يزورونا مع ان حنفي قصدي ابو رياض يعنى ما تغلطونيش بقى
كان مطبق ورديتين ونزل الشغل رابع يوم الفرح .

هههههههههههههههههه


بس ومن يومها يا سيدى الفاضل وانا لابده فى رقبة رضا

وادين له بما يقرب من نص عمري معاه

ايوه محصلة الخطوبه والجواز 12 سنه يعنى نص عمري الا 3 سنين

كان فيهم نعم الرفيق والصديق والاب والاخ والزوج والحبيب

اتعلمت منه كتير واثر فيا كتير


تعبنى كتير وتعبته كتير

بس كمان اسعدني كتير واعتقد اسعدته كتير

واتمنى له كل خير وكل حاجه حلوه يارب


بس عايزين متبرعين بقى

حد ينزل يشترلنا تورته عشان مكسله اعمل

وحد يجبلنا ورد

ويا حبذا لو شمعتين لونهم احمر زي الي فى الصوره دول


عشان انا مش عارفه اخرج ماما رايحه لدكتور الاسنان

او حد يجى ياخد العيال بقى وخلاص

هههههههههههههههههههههههههه


تحياتي لكم وربنا يسعد الجميع يارب

هناك 52 تعليقًا:

mohamed ghalia يقول...

عيد جواز سعيد
وعقبال مليون سنة
تحياتى
دمتى بود وفى سعادة

الطائر الحزين يقول...

عقبال التسعين

بارك الله فيكم وجعلكما قرةعين لبعضكما

صبرني يارب يقول...

الاخ محمد

شكرا لك الله يكرمك يارب وادام الله عزك

صبرني يارب يقول...

طائر

الله يكرمك يارب ويسعدك

حسن حنفى يقول...

عيد سعيد

ويارب دايما بسعاده وخير

:)

وان شاء الله اهني حضرتك السنه الجايه برضه :) وكل سنه ان شاء الله

أحمد (زوج مخنوق ). يقول...

ضربنا الديك الرومي ههههههههههههههههه
تحفة بصراحة يا صبرني يا رب
عيد زواج سعيد و عقبال العمر كله مع بعض و ربنا يخليلك ابو رياض و تلبدي في رقبته كمان و كمان

ربنا يا رب يبارك فيكم و يبارك عليكم و يبارك لكم في ذريتكم

صبرني يارب يقول...

حسن حنفي
الله يخليك يارب وعقبالك ان شاء الله

صبرني يارب يقول...

زوج مخنوق

هههههههههههههههههههههه

ايوه حقيقى ضربنا يعنى كنا ميتين من الجوع
اصلا الديك الرومي ده لوحده له قصه طوييييييله جدا عايزه بوست

بدءا من ازاي راح الامارات قبلي الى فلوس المطعم الى سواه ادفعت ازاي
هههههههههههههه
ومش عايزنا نضربه ياعم

تحياتي لك وربنا يسعدك يارب ويباركلك فى بنتك ويصلح ما بين اديك

nody يقول...

كل سنه وعقبال عيد الجواز المليون
وتفضلوا فى سعاده العمر كله
وبما اننا من المنصوره
فا استنيت تقولى تفاصيل
يعنى الكوافير كان مين
والاستديو
زالفستان كده يعنى
انتى عارفه بقى رغى البنات

Sweet Violet يقول...

كل عيد جواز وانتى طيبه و هو طيب

و دايما يارب ايامكم كلها عيد جواز (:


بس انا شايفه بقى هروب من التورته لالالالالالالا

مش هاتنازل عن حقى انا عايزة تورته عااااااااااااااااااااااااااااااااااااااااااا

اعمليلى تورته و تكون بالشكولا كمان عااااااااااااااااااااااااااااااااااااااا

blue-wave يقول...

الف الف مبرووووووووووووك
وعقبالنا يارب

صبرني يارب يقول...

ضد التيار

والله يا جميل لسه حااااالا مخلصاها

فاضل اصب عليها الشيكولاته

ما هانش عليا بقى ما اعملش وقمت عملت بعد ما خلصت البوست

عنيه يلا اركبي اي جمل وتعالي

نكون خلصناها يعنى
هههههههههههههه

وانتى طيبه يا قمر

صبرني يارب يقول...

بلو ويف

الله يكرمك يارب وعقبالك لو مش متجوز

تحياتي لك

صبرني يارب يقول...

نودي

يااااااااه تصوري ان انا نفسي نسيت
ههههههههههه
بس انا فاكره ان الفستان كان من مصنع مش فاكره اسمه كان له محل فى السكه الجديده
وحضرتك كنت انا اشتريت منه لاصحابي بتاع خمس ست فساتين
مش عايزه اقولك طبعا انا عملت فيه ايه لما جيت اعمل فستاني
المصنع كله طلع عينه بصراحه من غير ما يشوفوني
هههههههههههه
والكوافير كان واحد فى توريل ورا حديقة الحيوانات باين كان اسمه تويست حاجه كده
والاستوديو كان فوتو شوب الى جمب المحطه الدوليه كان لسه فاتح جديد بشووووووكه
بس الى صورني فيه وليد الى هو كان عند حسام ربيع ودلوقتي له محل لوحده

نودي اي خدمه
بس زمان الناس دول ماتوا بقى انا عجوزه يا بنتى
هههههههههههههههههه

تحياتي ليكى يا قمر

كـــيــــــــارا يقول...

بسم الله ماشاء الله

ربنا يباركلك في جوزك وفي حياتك

كل سنه وانتي طيبه

وكل عيد جواز وانتي بخير وود وحب

موناليزا يقول...

ربنا يسعدكم ويباركلك فى بيتك وعقبال العيد المئوى

صبرني يارب يقول...

موناليزا

تعيشي يارب وتسلمى وكل سنه وانتى طيبه

صبرني يارب يقول...

كيارا

حبيبتى ربنا يكرمك وانتى طيبه وبخير يارب ونورتي

Anonymous يقول...

حبيبتى كل سنة وانت طيبة-بقالك 9سنين بس - انا بقالى 12سنة متجوزة -ولوحسبناهم بالخطوبه يبقوا 15-شفتى الصمود قد ايه-المهم الواحد بيسال نفسه كل عيد جواز لو رجعت بيك الايام تانى هل هتكررى نفس الى حصل ولا لا؟هل هتتجوزى نفس الانسان بعد ماعرفتيه بكل حسناته وعيوبه؟هل هتكررى نفس الاخطاء ولا لا؟احيانا انا باقول لا واحيانا باقول الحب بيعمل البدع وبينسيك كل حاجه وحشه حتى لو كانت واضحه زى الشمس-تحياتى ليك وربنا يهنيك- داليا من دبى-

صبرني يارب يقول...

داليا حبيبتى

ربنا يكرمك يارب واحشاني انتى فين
المره الى فاتت قولتي هاجي دايما وماشوفتكيش الا النهارده

اولا سلميلى على دبي عشان ليا فيها ايام حلوه اوي

اما بالنسبه للسؤال ده فأنا سألته لنفسي كتير
بس بصراحه عمري ما قلت لا
مش معنى كده ان حياتي بلا مصاعب والزواج بلا عيوب ورضا اجنحاته مرفرفه وانا كمان
لا
لكن يمكن لانى راضيه عن حياتي وباقول الحمد لله من قلبي
مش عارفه بصراحه بس انا دايما باقول لو رجع بيا الزمن كنت هاختار رضا
وكنت هازعل اوي لو مااخترتوش

تحياتي ليكى وربنا يكرمك

واحدة مفروسة يقول...

كل سنة و انتى طيبة و عقبال عيد جوازك الخمسين يا رب
و ربنا يسعدكم و يهنيكم ياربو بعدين انتى عامله رجيم بلاش تورته

صبرني يارب يقول...

مفروسه

وانتى طيبه يا جميل

والله يا مفروسه بطني تعبانه ومش قادره فعلا اكل منها

بس دي بالشيكولاته وعلى شكل قلب وحلوه اوي اعمل انا ايه دلوقتي
ههههههههههههههههه

نورتي يا مفروستي

جنّي يقول...

الف مبروك

ويابختك يا عم رضا

بس ايه حكاية حنفي ؟ اوعي ياعم رضا تكون بتقول :انا كلمتي ما تنزلش الارض ابدا .. خلاص تنزل المرة دي ..

ربنا يباركلكم ويجمعكم دايما على خير وسعادة ..

وبعذر الأخ رضا في غربته لأني زيه بالضبط انا في بلد وهما في بلد..

صبرني يارب يقول...

الاخ جني

لا يا سيدى مش حنفي ده هاتجيب لنا الكلام

حنفي بتاع سك على بناتك لما كان مطبق ورديتين

وبعدين رضا الحمد لله موجود مش متغرب

انت مش عارف مبدأي ولاايه
اللزقه الانجليزيييييييي

انا من يوم مااتجوزته وانا رجلي على رجله
بس راح فرنسا من غيري 4 شهور ومش مسمحااااااااه فهيم للاه

تحياتي لك يا جني ونورت

romansy يقول...

عيد جواز سعيد
عقبال ميت سنه
ويارب دايما تكونى سعيده
يارب

mahasen saber يقول...

والشمع والتورته والولاعه اليى هتولعى بيها الشمع عندى...
ولا تقلقى نفسك وده عشان خاطرك انتى بس
....

mahasen saber يقول...

بسم الله ما شاء الله ..
ربنا يباركلكم فى بعض وعبال ما تحتفلى باعياد جواز ولادكوا وانتوا متساندين على بعض ..يعنى قصدى واقفين جنب بعض عشان مش تفهمى غلط...
ربنا يباركلم فى بعض وتكونوا سبب لدخول بعض الجنه اللهم امين
....
بس على فكره انا مره شفت عروسه فى الطياره واحنا رايحين لبابا الامارات والكلام ده منزمان برضه
اوعى تكونى انتى ههههههههه
بس انا كنت عيله وهبله ومشلتش عينى من عليها ومبسوطه قوىبيها ....
ربنا يسعد الجميع ويهنيكوا ببعض ان شاء الله
وعبال ما احتفل انا بعيد جواز ابنى واحفادى
..قولوا امين...

mostafa rayan يقول...

وانا من منبري اتوجه للأستاذ رضا وللسيدة حرمه بأسمى ايات التهاني
الف مبروك يا نجم وعقبال عيد الجواز ال100
وعقبالنا احنا كمان قولوا يارب

صبرني يارب يقول...

رومانسي

الله يكرمك وكل سنه وانت بغير وسعاده يارب وجميع المسلمين

صبرني يارب يقول...

محاسن

هههههههههههههه تعيشي يارب

خلاص كلنا التورته باقي نصها تاخدي حته ؟

صبرني يارب يقول...

ماحسن

ربنا يكرمك يارب ويخليكى

ممكن يكون انا بس انا شوفت سنك فى البروفايل انتى ادي بالظبط

هو طبعا انا كنت عيله برضه انتى عارفه
الكلام ده كان من تسع سنين وانا دلوقتي عندي 18 يعنى كان عندي يادوب 9 سنين
ههههههههههههههههههههههههههههه
استهبال بقى

صبرني يارب يقول...

مصطفى ريان

وانت طيب وبخير يا مصطفى واكيد هاخلي النجم يقرا الموضوع بردوده ويوصل ان شاء الله
وعقباااااااالك يارب يا مصطفى

قوس قزح يقول...

كل سنة وانتم سعداء ببعض و باولادكم

بس انت جدعة انك قدرتى تعملى حركة السفر بالفستان دى :)

صبرني يارب يقول...

قوس قزح

يا بنتى احنا جامدين جامدين يعنى

اي نعم كنت هاموت يعنى من الاحراج بس سافرت برضه

كان هاتبقى رخمه اوي لو سافرت كده عادي من غير فستان كمان

مش كفايه المركب الى غرقت
هههههههههههههههه

سها السباعي يقول...

كل سنة وانتو طيبين
وعقبال 99 سنة

ضحكتيني قوي على

عروسة الخليج جت

وعلى

الناس ماصدقوا يشيوفوا عروسة

صبرني يارب يقول...

سها السباعي

الله يخليكى وانتى طيبه وبخير

اضحك الله سنك يا جميل

kochia يقول...

كل سنة وانتي طيبة
وعقبلا 100 سنة
وفعلا الخطوة اللي عملتيها صعبة

تحياتي

mayada يقول...

ههههههههههههههه
فرمتوا الديك كده مش تسيبي ليه حته
كل سنه وانت طيبيبين ومن ربنا قريبين

ahmed_k يقول...

كل سنه وانتم طيبين
وعقبال مليوووووووون سنه
بخير وسعاده وأفراح
بجد قصة زفافك جميله ومريحه
ربنا يسعد أيامكم دايما
وتفرحوا بولادكم وعقبال ما تجوزوهم
معلش أعذريني عالتأخير يا ام مريم
بس من حسن حظي جيت لقيت المناسبه
الجميله دي

وتقبلي خالص تحياتي

Soooo يقول...

والله العظيم انتي زي العسل

وعقبال يارب عيد الزواج المليون وانتو في صحه وسعادة دايما يارب

وربنا يبعد عنكم شياطين الانس والجن

وليكي علي ياستي .. والله العظيم والله العظيم والله العظيم تلاته
ان شاء الله لما تنزلو مصر اعملك حفلة معتبره واجبلك تورته ونعمللكم فرح من اول وجديد

وربنا يارب يهنيكم لبعض ويباركلكم في بعض






سلاموووووووووووووز

صبرني يارب يقول...

كوشيا

وانتى طيبه يا جميل ربنا يكرمك

صبرني يارب يقول...

استاذ احمد
انت تشرف فى اي وقت واحنا حاضرين يا فندم

وانت طيب وبخير وتحياتي لك

صبرني يارب يقول...

مياده

لا نسيبلك ايه بقى كلناه على يومين بقى احنا كنا لاقينه ولاايه
ههههههههههههههههه

صبرني يارب يقول...

سوووووووو نفذ يا حلو انا نزلت مصر من خمس سنين يا ابنى

يلا نفذ الحلفااااااااااان
هههههههههههههههههههههههه

بص انا هاقولك على حاجه فى فرح يا كبير بقى انا هاجي لابسه عروسه تاااااني وتبقى ليله واحده بقى

تحياتي لك يا سو والله انت الي دمك زي العسل

mony يقول...

كل سنة و لنتم طيبين يا جميل

معلش جت متأخرة بس ماعرفتش ارد لما البوست نزل


ربنا يباركلكم في بعض و يقر اعينكم ببعض و يرضيكم ببعض


و تدخلوا الجنة مع بعض
انشاء الله

صبرني يارب يقول...

وانتى طيبه يا موني حبيبتى ربنا يكرمك

أحلى حياة يقول...

كل سنه وانتي طيبه ياجميله وعقبال عيد الجواز ال90 يااارب.. مش عايزه اقول ال 900 عشان ماتبقاش واسعه ولا ال 9000 عشان مابقاش باخطرف
D:D:

ربنا يسعدكم ويوفقكم يارب ويخليكوا لبعض يااارب :)

صبرني يارب يقول...

احلى حياه

الله يخليكى يارب ويكرمك وكل سنه وانتى بخير وفى سعاده يارب

وشرفتينى

Sherif يقول...

كل سنة وانت فى اتم صحة واسعد حال انت والاسرة الكريمة

عقبال اليوبيل الماسى

مطلق يقول...

كل سنه و رضا طيب و صابر و مكافح و راضي و كل حاجه

بس هو الاستاذ رضا مكانش حسن السير والسلوك لانه مطلعش بعد نص المده

علي العموم ربنا يخليكوا لبعض و يسعدتكوا و تكملوا مدتين تلاته سوي انشاء الله

صبرني يارب يقول...

شريف

الله يكرمك يارب
وكل سنه وانت طيب

صبرني يارب يقول...

كريم

حسن السير والسلوك
مااااااشي
انت يظهر كان عندك فدانين سير وسلوك يااخويا

طلعت بعد عشر المده ههههههههههههههههه

تعيش يارب وربنا يهديلك العاصي يا كريم ويعوض عليك ياااااارب