الأحد، 19 أكتوبر، 2008

انا مع ليلى فى حد معانا ؟



السلام عليكم


اول امبارح ياجماعه وانا بالف على مدونات الحبايب قابلني لوجوا عند فضفضه بعنوان


انا ما فهمتش اساسا مين ليلى ولا عايزين منها ايه


لكن لما روحت هنا وراسلتهم فهمت وعليه انا هافهمكم الى فهمته للي ما يعرفش


يوم كلنا ليلى يوم خصصه الناس المنظمين للموضع على البلوج هنا وعلى الفيس بوك عشان كل المجمتع يتكلم


عن او موضوعه ايه . موضوع مشابه لفيلم عملته فاتن حمامه عن روايه وكان اسمها فى ا لفيلم ليلى


وكان موضوع الفيلم ما تعانيه ليلى خلال حياتها لانها اختارت ان تكون نفسها انا ما شوفتش الفيلم لكن ده الى فهمته من كلامهم


المهم انا باعتباري احد المشاركين المفروض انى انزل بوست اقول فين انا من ليلى وعلى الموقع فى استطلاع راي اتمنى كلكم تتفضلوا تعملوه .


نتكلم بقى عن ليلى الى جوايا انا او امته انا باحس بالم ليلى :


انا والحمد لله ما عنديش مشكله شخصيه بعينها مع حد سواء من الاهل او الزوج او اي حد لانى مااسمحش لحد اساسا يعمل معايا اي حاجه تنتقص من حريتى المشروع او حقي الشرعي فى الحياه .


اما وانى احد اعضاء المجتمع الى انا شايفه انه مجتمع معوج وعايز تقويم واصلاح خصوصا فيما يختص بشون المرأه فيه .


ما حدش يقولي انتى تبع بتوع حقوق المراه الى بتجيبهم هاله سرحان.

لا خالص دول ناس اساسا ما عندهمش مخ . الى بيناقشوا ليه الستات يعملولهم يوم لواحدهم على البسين ؟؟؟!!! ويوم الرجاله يبقى مفتوح للكل؟؟؟

طبعا اخي عليهم ناس وحشين ما عندهمش دم


أما امته باشوف ليلى فى المجتمع عندنا شوفوا عندكم المواقف دي :


لما الراجل مراته تموت : ممكن يتجوز على الاربعين مثلا والمجتمع هنا يقول ومالوا راجل برضه وما ينفعش يعيش لوحده .

انما لو ليلى لو اتجوزت بعد سنه من موت جوزها : المجتمع يقولك يا سلام يعنى كانت مستنيه السنويه باليوم ؟؟ هى يعنى كانت عاينه العريس تحت السلم ؟؟(مافيش مانع يتهموها بقى انها كانت مرتبه معاه من قبل ما جوزها يموت بقى)

وتلاقي برضه فىناس رايهم لو كانت هي عندها عيال انها كانت المفروض تقعد تربي عيالها بلا جواز بلا بتاع .

================


الراجل لما بيطلق مراته : بيدور على واحده تكون انسه ما اتجوزتش قبل كده وتكون صغيره عشان يغيظ بها مراته الاولانيه ويرجع عقارب الساعه من الصفر تاني


انما المطلقه لو فكرت بس مجرد فكرت انها ترتبط بواحد ما اتجوزش قبل كده حتى لو كان مناسب لها فى السن وكل شيء تبقى امرأه لعوب وضحكت على الواد اكمنه يا عينى بريء وصغنن .

=================


لما الراجل سنه يتأخر فى الجواز : مافيش مشكله يفضل شباب وينفع يتجوز لحد ما يبقى عنده اربعين سنه ويقدر يتقدم لواحده عندها 20 عااااادي .

انما ليلى لو وصلت لما يبقى عندها 30 سنه تبقى عنست وبارت من وجهة نظر المجتمع والمفروض ترضى بشراب التوت .(الى ما يرضاش بالتوت يرضى بشرابه)

==================

لما الراجل يغلط قبل الجواز ولا حته بعده : المجتمع بما فيهم مراته بتغفرله بسهوله جدا ويقولوا راجل ومافيش حاجه تعيبه .

ليلى بقى لو غلطت ميت سكينه تحط على رقبتها وما حدش ممكن يسامحها ابدا حتى لو تابت وانابت .

مع ان الشرع بيقول الزانية والزاني الاثنين لهم نفس العقاب ونفس الاثم .


لما الراجل يكون ربنا موسعها عليه ويقول لمراته بصيغة من عليها بفلوسه انا معيشك احسن عيشه . عادي جدااااااا


لما تكون ليلى طالع عين اهلها فى الشغل وتشير ولو من بعيد الى انها تساهم فى ادارة البيت تقوم الدنيا ولا تقعدش ويقولك اهلها حتى برضه راجل والكلمه دي تضايقه


طب لما هو يعنى الرجوله واخدها بياخد منها فلوس ليه ؟؟؟ ما يسيبها بفلوسها على جنب ويورينا شنباته .

=============================


لما الولد يكلم صاحبته فى المدرسه او الجامعه وهى تتصل به على البيت عادي ده يعد مفخره من ناحية الام والاب .


أما ليلى ممكن لو ده حصل من طرفها يكسرولها ايد ولا رجل .

=================


الولد امه وابوه بيتباهوا انه مقطع لافف الدنيا وجريء وقوي وشاطر .


وليلى احلى ميزه ممكن يتغنوا بها انها ما تعرفش تروح لاخر الشارع لواحده وبتتكسف من خيالها .

==================


الراجل لما يتجوز يقول انا كده وان كان عاجبك


اما ليلى المفروض عليها تلغي شخصيتها وتبقى تابع وامعه لمجرد انها اتجوزت .

========================


الراجل لو ساب ولاده وبيته بالليل وراح قعد الكافيه مع اصحابه ولا حتى هلس فى اي مكان ولا لعب رياضه ما بيلاقيش عقاب يعنى من الجتمع ولا بيلوم عليه.


اما ليلى لو فكرت حتى انها تروح اي مكان لواحدها لمجرد الترويح عن نفسها او مارست اي نشاط اجتماعي او اي دور تاني غير كونها زوجه وام . المجتمع كله يقولها ولادك ا ولى بيكى


ولادهم هما الاثنين اولى بيهم . ومن حق الست انها تعيش حياتها كبنى ادمه من كل الجوانب ما تبقاش زوجه وام بس . والمسؤليه طبعا مشتركه .


الراجل لما يضحي يلاقي ميت واحد بيقوله يا اخي ما تعملش فى نفسك كده .


ليلى لما تضحي بحياتها وسعادتها وعمرها كلها تلاقي الناس بتسقفلها من كل الجوانب وبتشجعها تكمل لاخر الطريق وفى الاخر الطريق الكل بيدورلها وشه وما يسألش عنها وعما جنته . وما حدش ساعتها حتى بيفتكرلها تضحيه وبيقولوا وايه يعنى ما كل الناس كده .


ليلى نفسها بتظلم نفسها .


ليلى نفسها بتظلم اي ليلى تانيه تقابلها .


ليلى نفسها بتنسى نفسها .


ليلى نفسها تعامل نفسها كليلى.


يعنى ايه ؟؟


يعنى ليلى نفسها شايفه انها بشريه من الدرجه التانيه .

ليلى نفسها مش مؤمنه بنفسها كبشر متكامل له حقوق زي ما عليه واجبات .

ليلى نفسها اعطت الحق للمجتمع ككل انه يعاملها كده ويحطها فى المكان ده .

صدقوني ليلى نفسها محتاجه تغير فكرها


لان الناس يروك بعينيك اولا


لازم انت تشوف نفسك الاول صح عشان الناس يشفوك صح

اعتداد واعتزاز بالنفس وليس غرور



بادعوا كل ليلى عندها كلمه تقولها النهارده لنا تتفضل تقول

وبادعوا كمان نصفها الاخر على الارض انه يقول كمان ويناقشنا

احنا مش معتبرين الرجل هو جبهة الاعداء

لان زي ما قلنا المجتمع كله بنصفيه بيعامل ليلى غلط وبيظلم ليلى

عشان كده يا قيس ليلى محتاجلك فى اليوم ده تكون جنبها
خلينا كلنا مع ليلى ا لنهارده من فضلكم



وممكن اقعد من هنا للصبح اتكلم بس انا تعبانه وجيت اكتب بالعافيه

تحياتي لكم ولكل ليلى فى الدنيا

هناك 26 تعليقًا:

البحث عن أنا شىء جنونى يقول...

جميلتى ... جميل ما رسمتى عن ليلى

وما تواجهه من ظلم فى مجتمعنا الشرقى

وما اثرتى ما يبيحه المجتمع لادم .. فى نفس الوقت هو فعل منكر اذا افتعلته حواء

نعم نعلم جيدا حقها المسلوب والصورة المهينه التى يصورها البعض عنها فى بعض من الافعال التى تبدو طبيعية جدا اذا افتعلها ادم

ليلى هى كيان من الاحساس لا يطلب سوى حقه الشرعى فى الحياة .. كم سلبها ادم من قبل

اؤيد حواء بكل الصور .. فدون حواء لما اكتملنا .. ودون ادم ما اكتملنا

آدم الجميل بالله عليك رفقا على حواء

فهى تستحق ...

جميل ما اثرتى جميلتى
لك منى خالص الاحترام

و وردة لاجل ليلى

من بعيد .. بكتبلك

مطلق يقول...

ممكن تعديلي في كام ليلي في المجتمع

الحمد لله طلعت كل النساء غلابه و طيبين و احنا الي ولاد ستين في سبعين

طب خليكوا قاعدين مستنيين لما قيس يجيلكوا ياخد بيدكوا

صبرني يارب يقول...

البحث عن أنا

يعنى مش قادره اعبر عن رقتك فىالكلام يا استاذنا والله

بس بلاش جميلتى دي عشان مش عايزه اطلق النهارده
ههههههههههههههههههههه

وعلى فكره انا مش شايفه ابدا ان ادم هو فقط من سلبها حقها

انا شايفه ان المجتمع كله بما فيهم ليلى نفسها هم من سلبوها الحقوق

صبرني يارب يقول...

كريم

بص انا اول ما شوفت تعليقك ضحك ضحك
ههههههههههههههههههههههههههههههههههههههههههههههههههههههههههههههههههههه

عارف ليه
اول لما كتبت الموضوع وخلصت بقى ونشرته وبابص عليه كده

مش عارفه ليه انت نطيت فى دماغ
وقلت كريم دمه هايفور اول ما يقرا الموضوع ومش بعيد يفجر المدونه دي


ههههههههههههههههههههههههههه


شوف البحث عن انا فوق بيتكلم ازااااااااي
شوف الرقه يا نجم

اتعلللللللم اتعلللللللللم

بس ماتقولش زيه جميلتي زي ما قلتلك بقى هههههههههههههههههههههههههههههههه

البحث عن أنا شىء جنونى يقول...

خلاص بلاش جميلتى لو مزعلاكى اوى كده
ههههههههههههههههه

مش هقولها تانى

عموما نورتى مدوتنى يا قمر
ولا بلاش قمر كمان ههههههههههههههههه

فى امان الله

صبرني يارب يقول...

طبعا بلاش يا قمر كمان

مش جايبنها البر انتم

الراجل بيجى يقرا التعليقات

نطلق بقى ونقعد جمبكم ولا ايه

لماضة يقول...

والله عندك حق
للاسف جمل بنسمعها بشكل يومي
وللاسف اكتر من ستات قبل الرجاله

شكرا يا جميله على رابط تدوينتي
بجد شىء شرفني واسعدني جدا مش متخيله قد ايه

Sweet Violet يقول...

لازم انت تشوف نفسك الاول صح عشان الناس يشفوك صح

عندك حق فعلا فى كلامك ليلى نفسها هى اللى بتظلم نفسها و بتظلم ليلى اللى زيها

تعرفى من كام يوم بتكلم مع صديق ليا فى موضوعه و كان معترض ان حبيبته زعلانه من الصداقه اللى بيعملها

قولتله يعنى هى لو عملت صداقه قبل مااكمل كلامى قالى هاقطع رقبتها و دا اقل حاجه

قولتله ياسلااااام يعنى بتدى نفسك الحريه و بتمنعها على غيرك

قالى كلمه واحده و بالفعل كل الشباب بقى يقولها و المجتمع برضه

قالى هو دا الراجل الشرقى

للأسف المجتمع بيحلل للذكور اشياء محرمه من الدين نفسه

الام اللى بتدى الحق ان ابنها يعمل ويعمل و عادى جدااااا و مراته ولا حبيبتى مالهاش حق الاعتراض

تفتكرى لو زوجها نفسه عمل كدا هى هاتقول عادى؟؟؟

للأسف المجتمع فرض علينا عادات و فكر غلط و غير مقبول و مخالف للدين

صبرني يارب يقول...

لماضه

حبيتى ده انا الى اتشرفت بها والله

وكفايه انك انتى قلتي كلام فعلا مهم اوي وملى دماغي جدا

نورتي يا جميل

صبرني يارب يقول...

ضد التيار

على فكره صديقك ده هو الى عايز قطع رقبته
وياريت كان يقول هى دي انانية وتخلف الرجل الشرقي

تعرفي ان انا ياما قفشت مع ناس واديتهم بلوك ودليت لانهم بكل بساطه بيعترفوا انهم ما يقبلوش ان زوجاتهم او اخواتهم يكلموا حد ولو على النت ولا يكون لهم اصدقاء

طبعا اا من غيظي بسألهم حتى لما يكون الكلام والعلاقه بينهم على قدر من الاحترام والرقي زي ما انا كده باكلمك دلوقتي

يقولي ايوه

يبقى كلمه واحده انت كده ما بتحترمنيش انت كده تقصد ان انا كده مش محترمه بقى عشان باكلمك
وادينا بؤين ناشفين وبلوك ودليت

ما عادا واحد بس قالي المشكله فيا انا مش قادر اسيطر على نفسي فى الموضوع
وانا عارف انى باظلمها وعارف انى غلط بس مش قادر اتصرف

وعلى فكره كلمة حبيبته دي ما لهاش محل من الاعراب عندي

تحياتي لكي ونورتي

mony يقول...

غيرت فكرتي عن الموضوع يا ام مريم

انا كنت فاكرة ان الواحدة تيجي تكتب

ده عمل و سوا


بس تناولت الموضوع بطريقة كويسة

كده ممكن اشارك


اسلوب ممتاز في العرض


جزاك الله خيرا

انا حره يقول...

البوست جامد وجايب من الاخر يعنى

ومتتنى من الضحك جمله يورينا شنباته دى هههههههههه

تعتقدى لسه فى شنبات على حق؟

صبرني يارب يقول...

موني

الله يخليكى يارب

صدقينى انا مش من الى بيحبوا يولولوا

ولا انا تبع الى كانت بتجيبهم هاله سرحان وهما اساسا شكلهم مش تبع المرأه اصلا ويتكلموا عن حقوق المراه
وبيقولوا كلام تعبان جدا

لكن انا شايفه فعلا ان المجتمع غلطان ومش فى حق ليلى بس
لا في الراجل كمان لان المرأه هى نصه التاني فى حالة تضررها هو كمان بيتضرر بشكل غير مباشر يمكن لكن صدقينى بيطوله الالم

صبرني يارب يقول...

أنا حره

اهلا يا حبيبتى نورتي والله

وبالنسبه لحكاية الشنبات والله يا بنتى هو جاري البحث عنها
هههههههههههههههههههه
لا بس عشان احقاقا للحق طبعا فى شنبات يقف عليها الصقر

لكن للاسف مش الصفه الغالبه دلوقتي

تحياتي لكي ونورتي ودايما منوره يارب

Sweet Violet يقول...

وعلى فكره كلمة حبيبته دي ما لهاش محل من الاعراب عندي

اممممممممم بصى هو انا مافهمتش بالظبط الاقصد قوى

لكن عموما هرد على اللى فهمته حبيبته دى تبقى خطيبته لكن هو لما بيتكلم بيقول حبيبتى مش خطيبتى بالتالى احنا لما بنتكلم بنقوله حبيبتك مش خطيبتك

مش عارفه انا فهمت كلامك صح ولا لأ بس حبيت اوضح الكلمه على اساس فهمى للكلام

لو فهمت غلط يبقى محتاجه توضيح للكلمه بتاعتك (:

صبرني يارب يقول...

لا يا جميل تمام فهمتي كلامي صح

وانا بس باحب دايما اسجل وجهة نظري

بالذات فى الموضوع ده

لان انا ضد اي علاقه غير رسميه ومعلنه

تحياتي ليكى ونورتي

وصاحيه بدري ليه
هههههههههههههههه

Sweet Violet يقول...

الحمد لله ايوة كدا جبرتى بخاطرى

اصل انا بعيد عنك لما بشغل الفهامه بتلاقينى خربت الدنيا ههههههههههههههه

اشكرك على رفع معنوياتى (:


انا مانمتش اساسا لانى كنت مضايقه موووت من موقف حصل

بس الحمدلله هديت شويه لما رغيت فيه

و بعدين قولت اتابع الردود لقيتك قولتى كدا فقولت اشغل الفهامه و اوضح واستفسر لو فهمت غلط

معلش تعباكى معيا على الصبح (:

صبرني يارب يقول...

لا يا جميل ده انتى على راسي

المهم تكون المضايقه راحت
او قوليلى بس مين الى مضايق وانا جمع اعضاء جمعية المرأه المتوحشه بالغيظه فى كريم
واروح اقطعهولك

Sweet Violet يقول...

هههههههههههههههههههههههه

للأسف مش هايبقى غيظه لانها ليلى برضه

عاااااااااااااااااا

الحمد لله فكيت منها على خير

و الحمد لله الواحد كدا يطمن ان ليه ضهر فى الجمعيه هههههههههههههههههه

بجد اشكرك على سؤالك (:

صبرني يارب يقول...

العفو يا جميل ده

وربنا يبعد عنك كل شر ويكتبلك كل خير

norahaty يقول...

السلام عليكم ورحمة الله تعالى وبركاته
إختلاف نظرة المجتمع للرجل والمرأة لن يتغير لا بالكلام ولا بالمعلّقات حتى ولكن رتم الحياة نفسها والتطور سيفعلوا !!!
هل تريين الان نموذج الصارخ(لسى السيد )
كما كتبه وصوره كاتبنا نجيب محفوظ ؟إن وجدته فهو واحد او اثنين لا اكثر
أما ماذكرتيه من اختلاف ان الرجل يسعى للزواج بعد وفاة زوجته ولو بعد الاربعين او الارملة فلا ولو حتى بعد سنة أقول لك ان هناك فرق فى نفسية المرأة والرجل (ربنا عمل كده والا ما كان اباح له الزواج بأربع فى وقت واحد ).
كلام كتير عن الاختلافات بعضها اراه فروق فسيولوجية ونفسية بين الرجل والمرأة وبعضها اراه(مجتمعية )ظالمة فأنا معكى فيها .
عذرآ للاطالة
وتقبلى احتراماتى

صبرني يارب يقول...

نور حياتي

معاكي طبعا ان الاختلافات موجوده وده اصلا اصل كلامي

لكن الاختلاف مش معناه ان حد اكبر او احسن من حد

وفى ظلم مجتمعي واقع فعلا على الست

وانا باتكلم عن الظلم المجتمعي مش الفروق

وزي ما فى راجل يقدر يعيش من غير جواز
وراجل لا

فى كمان ست تقدر تعيش من غير جواز وست لا

تحياتي لكي ونورتي

mayada يقول...

امضي في الاخر ولا ايه طيب ههههههههه
مع اني شايفه اني مش ليه علاقه بليلي
بس شئنا او ابينا ليلي

صبرني يارب يقول...

مياده

هههههههههههههههه

عسل تصوري لاول وهله ما خدتش بالي من حكاية امضي فىالاخر ولا ايه

هههههههههههههههههههههههههه

مش باقولك خليفتى فى الملاعب
نورتي يا جميل

وزي ما انا قلت انا ما حدش في الدنيا يقدر يعملني ليلى على الاقل لحد الان

انا ما باسبش حقى واحط صباعي فىعين التخين
بس ما يمنعش ان المجتمع كله بياعملنا كلنا على اننا ليلى برضه

سها السباعي يقول...

اشكرك
انت في النصف الثاني من تدوينتك استفضت فيما اختصرته انا في نهاية تدوينتي
" الاهم ان تتوقف ليلى عن ظلم نفسها "

صبرني يارب يقول...

سها السباعي

نورتي يا اختي الفاضله
وفعلا ليلى هى المتسبب الرئيسي فى ضياع حقها