الخميس، 16 أكتوبر، 2008

اذا صدقت النوايا يسر الله السبل

السلام عليكم :

استكمالا يا جماعه لموضوع الرغي الى فات والى كان اسمه الناس ما بيتجوزوش ليه

فى الحقيقه الموضوع والنقاش الى دار حوله فى الردود خلاني حبيت ابرز نقطه معينه واتكلم فيها اكتر .

وهي نقطه الخوف من الفشل . او الخوف من الخداع او الوقوع فى شرك .

وفى الحقيقه الطائر الحزين قال كلمه بليغه جدا جدا وانا عن نفسي واخداها قاعده

اذا صدقت النوايا يسر الله السبر

وحقيقى انا مقتنعه بده جدا

لكن طبعا مش معنى كده اننا ندخل بدماغنا كده فى اي جوازه من غير ما نفكر .

لا طبعا احنا لازم نحسبها كويس اوي وندور ونفكر ونبحث ونفحص وبعدين بعد كده نتوكل على الله بقى ونوافق

بالنسبه للخوف من الفشل :

دايما اسأل الى بيقولوا كده سؤال واحد ايه اقصى ما يمكن ان يحدث ؟؟

انكم تطلقوا ؟؟؟

طب وايه يعنى ؟؟
طبعا كأني باقول جريمه

وتلاقي البنت تقولك ويبقى اسمي مطلقه ؟؟!! المجتمع مش هايرحمني ؟؟؟
يا بنتى طزززززز فى المجتمع
هو خوفك من المجتمع يخليكى تخسري حياتك ؟؟
وهو المجتمع هايرحمك لما تتحولي لعانس ؟؟؟

وتلاقي الشاب يقولي بالبساطه دي ؟؟؟ اطلق ؟؟؟ وتبقى اتحسبت عليا جوازه ؟؟؟
واخسر الى ورايا والى قدامي ؟؟؟ ولو كنت خلفت منها عيال تاخد الشقه وافضل طول عمري بقى على مشاكل معاها ؟؟؟

طب ليه يا ابنى ؟؟؟
اولا ما تحسبهاش فلوس كده اوي يعنى الارزاق على الله يمكن ساعتها ما يكونش يهمك فلوس يا سيدى ماحدش عارف
ثانيا : مين بس الى قال انك لما تطلق واحده تبقى على مشاكل معاها سواء بينكم عيال ولا لا
هو ليه ما بنخرجش بالمعروف
ليه ما نبقاش مسلمين متحضرين زي ايام الرسول عليه الصلاة والسلام عادي جدا ؟؟

اذا كان المجتمع مش متقبل حالات الطلاق والله احنا جزء من المجتمع ده احنا لازم نغير فكرنا اولا

ليه بنخاف ونترعب كده من الفشل فى الجواز

الصحابه كلهم كانوا بيطلقوا ويتجوزوا عادي بدون كل الافلام دي .

وكان برضه عادي انه يتجوز واحده مطلقه مش كانت جربانه بيهربوا منها

حتى لو كانت عندها أولاد

زي ما قال الرسول عليه الصلاة والسلام لام سلمه لما عرض عليها الزواج وقالتله يا رسول الله انى امرأه طاعنه فى السن ومصبيه
فقال لها : اما السن فانى اكبر منك واما العيال فلله ورسوله .

يا جماعه الى عايزه اقوله ان اقصى ما يمكن حدوثه هو ايه ؟؟؟ الطلاق ؟؟؟ طيب يجي بعده جواز يا سيدى تاني ايه المشكله ؟؟

ومبدأي دائما وابدا طز فى اي مجتمع يخالف شرع الله

ولو احنا كنا نعمل زي ما الرسول قال عليه الصلاة والسلام ونكون ذوي دين واخلاق لما قال عن من يتقى الله انه ان احبها اكرمها وان لم يحبها لن يظلمها

وكل من شرع في طلاق احله الله ما يعاديش الطرف التاني لا عادي خلاص مافيش نصيب ولو فى اولاد اولى ان يكون فى ود ومعامله حسنه بينهم وبما يرضى الله .

ويفضل هو يربي ولاده وتفضل هي تهمه وهو يهمها طول ما بينهم اولاد
بس مش لازم تكون العلاقات بينهم يا متجوزين يا اعداء
ليه طيب ؟؟؟
وحتى لو كانت خطوبه مثلا وانتهت
برضه بالاقي الناس بتتعامل بحساسيه زياده جدا جدا

ده يا راجل لو كانوا اثنين مخطوبي وقرايب وما يحصلش نصيب ممكن تفضل العائلتين فى خصام الى الابد .
ليه كده ؟؟ ليه نصعب الدنيا على نفسنا كده ؟؟

فين امساك بمعروف او تسريح باحسان ؟؟؟


وبالنسبه للخوف من الخداع او الخيانه :

برضه من ضمن الحاجات الى انا مقتنعه بها تماما

ان الطيبون للطيبات يعنى لو انت كويس ان شاء الله ربنا يوقعك فى واحده كويسه والعكس طبعا

وصدقوني سواء الجواز عن حب ولا زفت صالونات زي ما بتقسموه هايفضل برضه الجواز ده زي البطيخه ومش هاتقدر ابدا تعرف حقيقى الطرف التاني على حقيقته الا وانتم تحت سقف واحد

خليك او خليكى انتى كويسه اولا وبعد كده اطمن بقى وثق ان ربنا هايديك شريك كويس برضه

بس طبعا لازم تتحرى انت الكلام ده لازم تصدق النيه انك تدور على نصك التاني يكون يتقى الله ويكون ذو دين

ونتك على الكلمه دي ذووو دين وذااااااات دين

مش ذو لحيه ولا ذات نقاب ولا اسدال

لا الدين الدين مش مظاهر الدين فقط دون قلبه .

الدين الاخلاق والمعامله والفرو ض والواجبات والمسؤليات وكل حاجه حلوه مش مقياسه اللبس ابدا
ما يمنعش ان من ضمن الفروض الالتزام باللبس الشرعي احسن حد يفكر انى باقول الحجاب مش مهم .

وفى النهايه الهدى هدى الله ولو كل واحد عمر ما بينه وبين ربنا عمره ما يخاف من بكره ولا فى فشل ولا ضيق رزق
خليى دايما ما بينكم وبين ربنا عمار وخلي دايما قلبك مليان ايمان بالله وامان من الله
وبعدها مش هاتخاف لا من فشل ولا من خيانه ولا من الجن الازرق حتى

وتحياتي لكم وكفايه كده احسن تقولوا عليا رغايه

هناك 26 تعليقًا:

Sweet Violet يقول...

الخوف من الفشل سببه الخوف من المجتمع و كلام الناس

للأسف اصبحنا نخاف من الناس و كلامها مع ان الكلام لا بيقدم ولا بيأخر و على طول بيتكلموا على الفاضى و المليان

بس مين بقى يسمع هاتلاقى كل واحد او واحده يقولك انا ميهمنيش الناس و يجى عند نقطه الفشل يعملهم ألف حساب و حساب

نيجى بقى للأهل مش الناس لما حد يتقدم لبنتهم و يكون مطلق تلاقى الخوف بدا عندهم هما و تبدأ المشاكل فى بعض الاهل ترفض من الاول وتريح دماغها و فى البعض تقسم ضهر الراجل عشان كان متجوز قبل كدا كأنه اجرم و دا سبب من اسباب برضه الخوف من الطلاق

لما يجى راجل عايز يتقدم لبنت يروح لاهله و يعرفوا انها مطلقه تقوم الدنيا ولا تقعد ازاى يابنى خد بنت بنوت و انت تاخد مطلقه ليه و..و..و.. ألخ و كانها اجرمت هى كمان

ماحدش بيبص للنصيب لا مدام طلاق يبقى الشخص اى كان نوعه فيه عيوب الدنيا كلها

Sweet Violet يقول...

اه صحيح نسيت اقولك

انت مارغتيش ولا حاجه

(:

mohamed يقول...

ممكن أقول رأيى
==============
بأختصار
1- الاهتمام بالشكل والقدره الماديه
2-تعقيدت الزواج من قائمه وشبكه بمبلغ
كبير
3-لايوجد فهم أو نضوج لمفهوم الزواج
4- الاهتمام برأيى الناس
5- الانانيه
6- التكلب على الغرائز والرغبات
قى كلمه واحده البنت عندما تشترى حذاء
تعمل لجنه أستشاريه لشراءه من الاصحاب
والولدكذالك
عند الزواج لافحص ولا دراسه
المهم الفلوس والشكل
أتعلمى
أن 60% من الزيجات الحديثه يتم الطلاق
فيها خلال السنه الاولى من الزواج
تحياتى لكى

romansy يقول...

مش عارف اقولك ايه
بس الاخ محمد اختصر الموضوع
المشكله الاساسيه مشكله اقتصاديه
وبعد كده مشكله الحبيبه كل واحد فينا يتمنى حبيبه خاصه من نوعها
ملاك وشئ يتمنى يكون موجود
ويتمنى انه يسعدها ويقضوا شهر العسل فى القمر دا ان امكن

mayada يقول...

لا فض فوك ياام مريم
معاكي كالمعتاد
بس مش معاكي في حته مش احسن ماتقول
عليكي عانس
يبقي احنا رجعنا للناس تاني

وزي ماقلت الناس تخبط دماغها في الحيط

يعني لاتستعجل في الجواز عشان خايفه او خايف من عانس او ربنا اعلم به
ولاتتاخر عشان خايفه من بعبع الطلاق
لان دي حاجه بايد ربنا مش مسائله رياضه وواحد + واحد بيساوي اتنين
او عشان بدور علي شكليات غرضها ارضاء الناس مش ارضائها هي او هو

اللي بيمشي ورا كلام ربنا عمره مايتوه ابدا

mohamed ghalia يقول...

الخوف ده فعلا مشكلة كبيرة
وكمان نظرات المجتمع مشكلة أكبر
لسه محتاجين وقت على ما نتقبل الوضع
بس طول ما فيه شباب زى المدونين دول إن شاء الله حالنا هينصلح كتير
تحياتى
دمتى بود
تناول رائع لمشكلة الزواج

mostafa rayan يقول...

بصي هي المشكلة مش في راي المجتمع بس لكن في اللي بيعقب الطلاق دة من مشاكل ممكن تحصل
مين يربي العيال ولو الست اصرت على انها تاخد العيال ممكن تحرم الراجل من انه يشوفهم ويحصل اللي بنسمع عنه
او لوراح اتجوزتفضل تبوظ عقل الواد ابوك طلقني وراح اتجوز زي مايكون المفروض ان حياته تنتهي بعدها ودةواقه وبنشوفه وللأسف من ناس متعلمين ومثقفين
المفروض اننا نتغير من جوانا ونغير الأفكار الغلط الليعندنا ويكون الأمر امساك بمعروف او تسريح باحسان
- ملحوظة : بصراحة انا مش مقتنع بحوار جواز الصالونات دة خالص ..
ماما تلكلم طنط منال صاحبتها علشان بنت اخوها نرمين
ويروح العريس وكانه في كشف هيئة بالظبط
صراحه بحسه شيئ خنيق جدا
دة رأيي وارجو انك تقبليه

صبرني يارب يقول...

ضد التيار

كلامك ما يختلفش عن كلامي

لكن انا هدفي ان المجتمع نفسه فكره يتغير
مش نسيبه على علاته ونمشي معاه وخلاص

والطلاق مش وصمة عار

زوجات الرسول كان منهم مطلقات

وتحياتي لكي

صبرني يارب يقول...

الاخ محمد


تحياتي لك اوجزت فى الكلام واصابت الحقيقه فعلا

وبرضه رايك متفق مع الى انا قلته فى اعتقادي

وللاسف عارفه الحقيقه المره دي

وعشان كده حاسه ان فى مشكله كبيره اكبر من كونها تكاليف الزواج بس

بدليل ان الى اتجوزوا كمان مش قادرين يكملوا .
تحياتي لك ونورت

صبرني يارب يقول...

رومانسي

انت مش معانا خالص شهر عسل ايه بس الى فى القمر صباح الخير يا فندم

وعاشر مره باقول انا ما لغيتش المشكله الاقتصاديه
ولكن لغيت انها تكون السبب الاساسي والوحيد
لا فى اسباب تانيه كتير ويمكن تكون جوهريه اكتر
تحياتي لك ونورت

صبرني يارب يقول...

محمد غاليا

تحياتي لك وانت نورت وان شاء الله طول مافي ناس بتدور على الاصلاح هانلاقيه

نورت

صبرني يارب يقول...

مياده حبيبتى

ارجعي لكلامي تاني كده

هاتلاقينى باقول :

انتى خايفه ان الناس يقولوا عليكى مطلقه ؟؟
فالبتالي بتأخري جوازك من الخوف ؟؟؟

طيب ما هما كمان لما تتأخري هايقولوا عليكى عانس

يعنى من الاخر ما تعبريش الناس دول
خليكى فى نفسك

مش باقول خليهم يقولوا مطلقه بدل ماي قولوا عانس كلا البت

على فكره انا اساسا ضد فكرة انا ما يهمنيش الناس وكلام الافلام

احنا كمسلمين بنهتم براي الجماعه والاعراف على فكره

بسسسسس

الجماعه الصالحين والاعراف التى لا تتعارض وقواعد وروح الدين

وعليه الجماعه الحاليه طززززز فى رايها

شكرا لكي يا جميل ونورتي

صبرني يارب يقول...

مصطفى ريان

أنا اتكلمت فى النقطه دي وفعلا اسوأ شيء سوء العلاقه بين الوالدين المنفصلين
لجميع الاطراف

ومش عارفه ليه احنا متخلفين بالشكل ده

اما جواز الصالونات

ارجع للبوستات القديمه هاتلاقي بوست عن الموضوع ده اسمه انت تقليدى ولا شواريعى .

حضرتك مع احترامي لرايك جدا جدا
الا انك متأثر بكلام الاعلام والافلام الى مخدرين الناس ومعيشينهم فى مكان مختلف عن الواقع

وما زلت بسأل كل الناس
ايه الفرق بين انك تتعرف على واحده وهى بين اهلها سواء فى بيتها او مكان عام
وبعدين اذا اعجبت بها تقدر تكمل كمان شويه وتدخل بيتهم بشكل برضه رسمي وشرعي واجتماعي لائق

واذا عجبك الامر تكمل

وهتكون شوفتها من اول مره للخطوبه بتاع خمس ست سبع عشر مرات

وتكون حددت موقفك هل فى بينكم قبول معقول ولا ايه ؟؟؟

هاتكمل ويمكن تحبها ويمكن لا

الخ الخ الخ

ايه الفرق بقى بين التعارف ده

والتعارف التاني فى الشوارع والكافيهات والجامعات

وطبعا كل الاحترام لرايك

اصحى يا مصر : اسلام جاويش (ديو) يقول...

ميس صبرنى
بطالة + مؤهل عالى + شقة مفروضة 5 اوض وحمام ومطبخ +شبكة لا تقل عن 30000 جنيه + مهر وتكتب ياريس شيك على بياض بنص مليون جنيه

هههههههههه وعهد الله دا لغز حليه بقى

انسى ان فى حد ف مصر هيتجوز
وكمان صحيح انتى عاملة كام مدونة علشان بس اعرف اعلق واتابع كويس لأنى توهت
سلامى

صبرني يارب يقول...

اسلام حرام عليك الحكايه مش أوي كده

انا متجوزه بقالي تسع سنين الا كام يوم

وما عنديش شقه خمس اوض
وما مضيتوش على شيكات
واساسا ما كانش عنده شقه
ما سألتوش لحد دلوقتي الشبكه بتاعتي كانت بكام
وما كانش بيشتغل فى حكومه ولا بتاع كان بيشتغل ميت شغلانه اه
وما كانش معاه حاجه اه
لكن ربنا كرمنا سوا

وصدقنى الى بتدور على شقه 5 اوض وشبكه 30 الف ومهر وشيكات للمؤخر
مش هي دي الى تفتح وتعمر بيوت

لكن كمان مش معقول تطلب من واحده انها توافق على واحد صايع وضايع وباطل وشحات

وعلى فكره ما حدش عاد يجيب سيرة متطلبات العروسه والمهور
عشان ده حقها والى مش عاجبه ما يتوزش

عمر بن الخطاب لما حب يحدد المهور وقفتله واحده وقالتله انه غلطان وهو قال اصابت امرأه واخطأ عمر

فروحوا اشتغلوا بقى واتجوزوا واحده على ادكم وما تقعدوش تندبوا حظكم


وبالنسبه للمدونات قصدك ايه ان انت تهت ان انا رغايه وعماله اكتب فى كل حته
هههههههههههههههههه

انا عندي 3 مدونات فضلة خيرك

رغي امرأه غير مطحونه
رؤيه اسلاميه متواضعه
طابخين ايه النهارده

وطبعا الضاحكون انت عارف انا مشاركه فيها

وتحياتي لك ونورت
وانا هاجوزك انا يا اسلام ما تقلقش
هههههههههههههه

kochia يقول...

اذا صدقت النوايا
هو ده المختصر المفيد فعلا
لان فيه ناس برده بتتجوز باقل القليل وبتعيش سعيدة
والخوف من الفشل هو الخوف من الاخر مش من الفشل نفسه
الاخرممكن يخون ممكن يكذب ممكن يتعامل بطريقة مش محترمة ممكن يتعدي حدود الحياةالكريمة المقبولة سواء رجل او امراة
وموضوع المادية اعتقد انها نتيجة للخيانة .. الناس فكرت انها حماية من الخداع وده مش حقيقي
لان ساعتها الماديات هتعمل ايه الشقة ولا الشبكة ولا غيره
صدق النوايا والتوكل علي لله
وفقط

تحياتي

nody يقول...

السلام عليكم ورحمه اله وبركاته

اولا الموضوع جميل جدا احيكى عليه
ثانيا بالنسبه لاول نقطه وهى الطلاق بجد ده اصبح شبح بيخيم على معظم العقول وخصوصا ان نسبته ارتفعت جدا افى الاونه الاخيره
وبجد المجتمع مجرم فى حق المطلقه
دى حقيقه الكل بيعاملها يا اما على انها رجس من عمل الشيطان او انها شىء مستباح يجب الخوض فى عرضه اما بالكلام او بالفعل
وصدقينى لو قلت لك ان نظره المجتمع للعانس احسن بكتير من نظرته للمطلقه
وده طبعا ان نم عن شىء ها ينم على جهل دينى عند الناس فى ان الطلاق ده شرع ربنا وفيه سوره كامله فى القراءن اسمها الطلاق
لكن ها نمل ايه
اضمحلال ووصلنا ليه
والمشكله فى موضوع الطلاق اننا ما بنعرفش نربى ولادنا وبنتانا على يعنى ايه جواز
الجواز عندهم شبكه وفستان وفرح وخروج
غير كده لا
البعد عن الدين والاخلاق هو السبب الرئيسى للطلاق
وكذلك نقطه الخيانه الى انتى اتكلمتى عنها
موضوع الخيانه ده اصلا مش ها يجى فى دماغ غير واحد غير ملتزم دينيا سواء ولد او بنت
وانا دا يما مع ان الطيور على اشكالها تقع
اذن غياب الدين والاخلاق هو سبب مهم ورئيسى
اسفه على الاطاله

sabrina يقول...

ان الطيبون للطيبات يعنى لو انت كويس ان شاء الله ربنا يوقعك فى واحده كويسه !
أنا كمان مؤمنة بده جدا ....بس عارفة المشكلة في اية ان كل رجل عمل اللي هو عايزه التصريح اللي ادوهول المجتمع ....:أنا رجل وعمل اللي انا عايزة" علشان كده بيقي خايف من الجواز علشان متأكد انه كما تدين .تدان والديان لايموت!
قلة هم من يتقو الله ويعرفوا كده
وعلشان كده الكل بيدور علي المظهر .......مظهرها ديني .تبقي متدينه!
مش عارفين ان في ناس بتلبس الاسدال ......كسل أو موضة

صبرني يارب يقول...

كوشيا

والله المشكله مش فى الطرف التاني بس

لان هو نفسه بيبقى منه اخطاء وعدم تحمل مسؤليه ورعونه احيانا

مش بس الفشل بيجى من الجانب التاني والخوف بيجى من الجانب التاني

رايي ان اي علاقه بتفشل سببها من الطرفين طبعا مش من طرف واحد ابدا

صبرني يارب يقول...

نودي

تمام معاكي اننا مش مربيين ولادنا وبناتنا

وفعلا البنت من دول بتعمل الفرح وتحط جمبها البوم الصور وسي دي الفرح وتقفل عليهم الدرج بعد شهرين

وتبقى عايزه بقى ترجع بيت ابوها بقى يدلعوا فيها تاني

وبالنسبه للخيانه تمام انا رايي كده تماما
ولان الانحلال مش هو بس ا لوقوع فىا لزنا مثلا
الانحلال انه كمان يعرف بنات من هنا ومن هنا حتى لو مجرد كلام وهيافه عيال

الا انه بقى بيبقى حاسس ان ما حدش مأمون
لان من وجهة نظره كل البنات كده
لانه قابل كتير كده
بس ما يعرفش انه قابل كتير كده لانه باعتباره فاسد فهو بيدور عليهم اصلا
ممكن يقابله فى السكه ناس نضيفه ما يشوفهمش

تحياتي لك ونورتي

صبرني يارب يقول...

صابرينا
الاول شرفتينى

اما بالنسبه للتصريح الى اداه المجتمع للراجل فهو من ضمن بلاوي وفساد المجتمع الى انا باتكلم عنه

وخوف الخيانه حقيقى من الهلاسين الى يعنى فاقوا لنفسهم شويه وحاسين فعلا ان ربنا هاقتص منهم

لكن فى منهم بقى بيبقوا لسه ما فاقوش لكن من كتر ما شافوا قرف حاسين انا الدنيا كلها قرف

عشان لو حسوا غير كده مش هايقدروا يعيشوا مع نفسهم بقذارتها

وهما بيدوروا على المظهر لانهم اساسا مايعرفوش حاجه عن الجوهر

تحياتي لكي حقيقى نورتي

mahasen saber يقول...

اهه الخوف من الطلاق ده وكانه بعبع هو اليى بيخلينا نفوق فى يوم على اب دبح مراته وولاده
انا شفت بنت طالبه ومتجوزه وام لولد ومن اول ما اتجوزت وهيا تروح بيت جوزها ياخد مبتغاه منها ويضربها ضرب مكسر مش مبرح ويطردها على بيت اهلها فضلت على الحال ده بنفس السيناريو الفاشل ده لحد ما خلفت وبرضه مرحمش ابنه وطردها وجالها السكر ومش نافع معاها الا الانسولين ولو ناقشتيها انها حتىترفع قضية نفقه للطفل اليى فى رقبتها تقولك ويطلقنى والناس تاكل وشى
....
انا بقه الناس تاكل وشى وقفايا بالشوكه والسكينه بس معش لحظة خوف انا وابنى....

صبرني يارب يقول...

محاسن صابر

عندك حق طبعا

دى واحده مخها تعبان ياامي ليس اكثر

وطبعا الطلاق فى حالات كتير بيكون حل سلمي للمشاكل

ويا ستي ربنا اعطانا رخصه نفرط فيها
ده النصارىروحهم هاطلع عليها

ما علينا

تحياتي ليكى محاسن وربنا يكتبلك كل خير انتى وابنك وبيعد عنك كل شر

mony يقول...

عنك حق و الله يا ام مريم في كل اللي قلتيه


بس المشكلة ان المجتمع اتعود علي حاجات و مش عارفين للاسف نغيرها

للاسف


حتي تلاقي في ازدواجية في الفكر

يعني اللي عندها بنت مطلقة بتزعل لو واحد لسة ما اتجوزش رفضها

و تزعل اكتر لو ابنها اللي لسة ما اتجوزش يحب يرتبط بواحدة مطلقة

علي رأي المثل :
حلال لينا و حرام ليهم

صبرني يارب يقول...

موني

تمام برافوا عليكى وده موضوع البوست الجديد تفاعلا مع ليلى

غير معرف يقول...

ششششششششششششششششششششكرآ ربي يسعدكك