العلاقه بين الرجل والمرأه الاجنبيين... على الرؤيه الاسلاميه

يا ترى هل ممكن وجود نوع من

العلاقه بين رجل وامرأه اجنبيين ؟؟

وهل العلاقه دي تكون حلال ولا حرام ؟؟

وتكون ازاي وشكلها ايه لو كانت حلال ؟؟

ياريت تيجوا تسمعوا وجهة نظري ورايي المتواضعين وتناقشوني فيه

على المدونه الاسلاميه

رؤية اسلاميه متواضعه

حكم ....بس الى يفهم وينفذ

هاقولكم شوية حكم يا جماعه تحطوها حلقه فى ودنكم

وعقبالي احطهم برضه بس تقريبا كده خلاص هاحطهم عشان انا خلاص وداني اتخرمت من كتر ما سمعت

اليكم خلاصة الحكم بقى عشان تعيشوا فى هدوء

ما ينوب المخلص الا تقطيع هدومه

اخرة خدمة الغز علقه

يا داخل بين البصله وقشرتها ما ينوبك الا تشم ريحتها

ما دام انت عارف الى فيها ليه تحط ايدك فيهاااااااااااا ليييييييييييييييييه؟؟؟؟؟؟؟!!

من تعبه عقله تعبته رجليه

اصحاب العقول في راااااااااحه ..أه بس المجانين فى نعيم.

واعمل الخير ارميه البحر

وطنش تعش

وهاكونا ما تاتاااااااا على راي تيمون وبمبه

على فكره انا كانت لازمه فى كلامي دايما اقول صبرني يارب

بقالي فتره بقى غيرت باقول اللهم افرغ علينا صبراااااااا

اي خدمه ان ما كنتش اديلكم خلاصة تجاربي ادي لمين يا ولاد

يعنى ايه تربيه جنسيه ؟؟

سلام عليكم

وحشتوني ووحشني اكل دماغكم رغي اوي .

النهارده ان شاء الله نرغي بخصوص موضوع مهم اوي قد يكون كل الناس تقريبا اتكلموا فيه ولكن من وجهة نظري اتكلموا فيه من ناحية واحده بس وهي التأييد والمعارضه لوجود التربيه الجنسيه فى المدارس .

وطبعا ياما اصوات علت فى الاتجاهين وبعصبيه اكتر من كونها بعقلانيه .

وخصوصا اننا فى مجتمع شرقى له طابع خاص بمجرد ذكر كلمة جنس فى اي موضوع يبقى قلة ادب وما يصحش وعيب وما الى ذلك كله.
حتى انه فى بعض المشاكل المتعلقه بالجانب ده من حياة البنى ادمين فاحنا بنفضل نترجها جانبا معلقه بلا حل بل ونتركها تتفاقم عشان عيب نتكلم فيها .

عموما وبصرف النظر عن حكاية عيب دي . فاحنا حاليا بصدد الكلام عن معنى التربيه الجنسيه اساسا.

التربيه الجنسيه هى امداد الشخص منذ طفولته بالمعلومات اللازمه حول جنسه اي نوعه وما يستدعيه ذلك من عادات سليمه يجب سلوكها واجراءات وقائيه لحماية الطفل والشخص حين يكبر ايضا.

على فكره ده انا الى مخترعه التعريف ده من خلال فهمي للموضوع .

المهم يعنى ايه الكلام ده

أنا هاديلكم امثله : يعنى لما الاب او الام يقول للولد وهو مثلا عمره سنتين ولا اقل حتى لا ما تلبسش توكه انت ولد التوكه بتاعة البنات . .... دي تربيه جنسيه

لما اقول للطفل عموما سواءا فى ذلك بنت وولد ما حدش يقلعك هدوم الا ماما وبابا وفلانه مثلا ولو حصل وحد عمل كده غصب عنك لازم تقول لماما .... دي تربيه جنسيه

لما اقول للطفل الى عمره 10 سنين خلي بالك من نفسك ما تروحش فى مكان مع حد انت ما تعرفوش ما تصاحبش ولاد اكبر منك كتير خلي بالك على نفسك ما تخليش حد يمد ايده عليك حتى لو كان بالهزار ..... دي تربيه جنسيه

لما اجي فى عمر 10 سنين للولد والبنت وجايز قبل كده كمان اديله التعريف التشريحى للاجهزه التناسليه للنوعين واعرفه هو جهازه بيشتغل ازاي وعلامات البلوغ وكل المعلومات المتعلقه بمرحله جديده من حياته .... دي تربيه جنسيه

لما يبقى عمره او عمرها 18 سنه وبيسمع ويشوف حواليه تعبيرات واحوال تثير فضوله واعياه الحصول على الصدق فيها حول الحياه الجنسيه للبشر من حقه ان يعرف كلام علمي يتناسب مع عمره وجسمه وظروفه كمان ...دي تربيه جنسيه

كل ده احنا لسه تقريبا ما وصلناش للعمليه الجنسيه نفسها صح ؟؟؟

والى احنا بنعتبرها عيب وما يصحش نتكلم فيها

رغم ان اساسا ده مش صح الا انه مش موضوعنا حاليا

العمليه الجنسيه فى حد ذاتها اخر فصل من فصول التربيه الجنسيه الى احنا بنتكلم عنها .

وحكاية اننا نحطها فى المدارس .
هو مافيهاش مشكله ابدا لكن بالنسبه لكونا دوله متخلفه ومجتمع معلش برضه متخلف
وعندنا نظام تعليمى فاسد ومتخلف برضه (الشله كلها تخلف يعنى ههههههههه)

يبقى لو حصل والتربيه الجنسيه نزلت فىا لمدارس هاتبقى مصيبه سوده ومهازل وبلاوي هاتحصل .

فضلا عن المناهج الغبيه الى هاتنزل والى يمكن يستوردوها عن غير فهم .

لكن من وجهة نظري ان موضوع حساس زي ده يكون الافضل فيه التعامل معاه بشكل خاص وعلى نطاق ضيق داخل الاسره بين الام واولادها والاب واولاده برضه .

لكن عارفين ايه المشكله ؟؟؟

ان الام والاب نفسسسسسسهم محتاجين يعرفوا الاول ايه هى التربيه الجنسيه وتكون ازاي . اه والله العظيم

صدقوني زمان ايام الجدود كانت التوعيات متوارثه فعلا وكانت موجوده على بساطتها وفقدانها للطابع العلمي الى انها كانت موجوده

فجأه سقطت مش عارفه ليه .وبقوا الام والاب يستحوا يتكلموا اولادهم .

صدقوني دى مشكله كبيره لان غياب التربيه الجنسيه دي مسببه مشاكل كبيره اوي:

اولها واخطرها التحرشات بالاطفال لو كان عنده وعي ما كانتش على الاقل ممكن تتكرر

المشاكل النفسيه والصدمات الى بياخدها المراهقين بمجرد البلوغ وعدم قدرة الاهل على احتواء المشاكل دي .

شوفت الام الى بتستنى لما البنت تبدأ حيض اصلااااا ويمكن تتصدم وتفكر نفسها هاتموت وبعدين يقتصر الكلام عن كيفيه مواجهة دم الحيض فقططططط!!!!!!!!!!!!.

وشوفت الولد الى بلغ واحتلم وما عرفش ايه ده ولما قال لابوه رزعه قلم متين !!!!!!!!!

عشان كده باقول ان الاب والام هما الى محتاجين تربيه جنسيه الاول عشان يقدروا يدوها لاولادهم .
ياريت نبطل نهرب من مشاكلنا

الحياء شعبه من شعب الايمان

لكن الخجل المرضي قد يقضي على الشخص يوما ما

طوووووولت برضه عليكم وانا ما كنتش ناويه والله
بس يلا انتم واخدين على كده

مافيش معايا بنادول كل واحد يجيب لنفسه بقى

محتاجينكم يا جماعه

السلام عليكم يا جماعه

بصراحه انا من الصبح باحاول اكتب بس مش عارفه اكتب

دماغي مش جايب كلام

افكارى متركزه فى ناس باحبهم وناس مقطعين قلبي

ناس ربنا ابتلاهم فى صحتهم واختبرهم ايما اختبار

وعشان كده باطلب منكم كلكم يا جماعه انكم تدعوا للناس دي

يعنى انا عارفه انكم يمكن ما تعرفوهمش

لكن اكيد تعرفوني واكيد هاتحسوا بهم

الناس دول اسمحولي اعرفكم بهم

سيف اخويا الى مش من امي وابويا عرفته من سنه من خلال النت ومن كتر ما قلي يا اختي تقريبا انا صدقت او يمكن ما صدقت

ويمكن تكونوا تسمعوا عنه من اليس فى بلاد العجائب مدونة اه منك يا دنيا

عنده ورم فى المخ فى مكان صعب استئصاله ورحلة العلاج طولت عليه وصعبه الله يشفيه ويشيل عنه

ومحمد ابن اخو رضا حكيت لكم عنه قبل كده عنده لوكميا اه هو بدأ يتحسن لكن ما زال بياخد كورسات ا لكماوي لكن هو احسن كتير يارب يتم شفاه على خير

حمزه ابن اخو سوووووو الى وجع قلبي اوي لما شوفت صورته وعرفت انه تقريبا نفس حالة سيف يارب اشفيه لاهله يارب ونجيه لهم وصبره وصبر اهله

ملك بنت انا جعان انا ما اعرفش انا جعان ولا اعرف بنته لكن سمعت عنه عند قوس قزح يارب يشفيها وينجيها ياااارب

عائشه بنت اخو ابو فاطمه يااااااارب اشفيها ياااااااارب ونجيها

يارب اشفيهم كلهم وصبرهم وصبر اهلهم وخفف عنهم الم العلاج وتعبه

واملا قلبهم ايمان بربنا وعزيمه عشان يقدروا يهزموا مرضهم الجسام

هما واهاليهم

ويارب اشفي كل مرضى المسلمين وعافنا واياكم من المرض

معلش لو كنت ضايقتكم بس صدقوني دماغي مش جايب اكتب غير كده

سلام عليكم

زيارة القبور على الرؤية

شرفونا فى المدونه ا لاسلاميه

نشوف مع بعض حكم زيارة القبور

برؤية اسلامية متواضعة

الناس النضيفة ..مااااااااااااااتوا ..مااااااااااااااااااااااااتوا

السلام عليكم ايها البلوجاريه الكرام

شوفوا معايا كده الحديث ده

مزه ملزقه ومزه تانيه محزقه وقاعدين الاثنين قدام جهاز الكمبيوتر اسمعوا بقى

مزه ملزقه : عااااااااااااا ايه ده شوفتي الصوره دي ؟؟؟؟!!!!

مزه محزقه : ااااااااه يخربيته ابن الجزمه ده . يجنن واد مز جدا .

مزه ملزقه : اااااااااه مافيش واحد ابن ...(هوهو يعنى ) يكون شبه مهند ولا يحيى يجي تخبط على اهله ويتجوزني .

مزه محزقه: هههههههههه يظهر ما عادش في ولاد...(هوهو) بس فى ولاد .....(ما اعرفش اقولها)

مزه ملزقه: البرا الى انا لابساه ده بن.....(مش نضيفه ) مضايقنى اوي .

مزه محزقه : اقلعيه وخليكى فريييييي .هي هي هي

مزه ملزقه:بس يا ....(مش نضيفه) شوفتي يا بت الواد مهند بيبص لنور ازاي .عسل يخربيته

مزه محزقه : انا عايزه اشرب عصير.

مزه ملزقه : اعملك عصير جوافه

مزه محزقه : لا مش باحبه .

مزه ملزقه : طب ما عندناش الا هو . فى .....(يع ما اعرفش اقولها ) خلاط

مزه محزقه : ده تشربيه انتى يا ......(نفس اليع الى فوق)

مزه ملزقه: شوفتي البت تيتى كانت بتتكلم ازاي النهارده بيئه اوي البت دي

مزه محزقه : اها اشكال .....(مش نضيفه) انا عارفه محدوفين علينا من اي خرابه .

مزه ملزقه : احنا امبارح روحنا اتعشينا بره انا والمز بتاعي بس كلنا سندوتش جامد اوي

مزه محزقه :لوحدك اياك تطفحيه يا ....(low يا بنت ال....(ما اعرفش اوصفها حتى)

وهكذااااااااااااا.........................................

طبعا المزتين دول مثلا جامعيين محترمين وولاد ناس والله برضه

مش هاقولكم سمعته اجمالا لكن يعنى نقيته من الى سمعته واكتر من كده سمعت والله

ولو شوفتوهم وهما لابسين وماشيين فى الشارع تقول ايه البسكوتين دول يا ولاد

الواحد يفتكر انهم ما بيعملوش بيبى من كتر ما هما مزوقين ومسنتفين

اسمع بقى كلامهم يا مرييييييييي

حاجه تقرف زي ما شوفتم كده

بالاضافه الى خواااااااء فى ا لفكر والحديث

شوف اتكلموا عن ايه ؟؟؟؟

ولا اي حاجه اصلا

وعاملين فيها هاي وستايل والناس كلها بيئه وكلمتين انجليزى في النص وبعدين ينضحوا زباله

لييييييييييييه

والمصيبه السوده

انهم بيشتموا بعض باهاليهم

وحتى لو كانوا اخوات يعنى كل واحده تشتم اختها باهلها وتقولك هزار

طبعا انا لما بيجمعني قاعده بالعيال دي مش عايزه اقولكم باعمل فيهم ايه ضرب وعض

وبافتكر ايام زمان لما كنت ما فيش حد من صحباتي يتسجر يشتم التانيه مش انا كمان بالاهل

كنت علقتهم على بابا زويله

وافتكر بابا الله يديه الصحه

لما كان يلاقينى انا واختي الكبيره بنهزر واقولها يا حماره ولا حيوانه

كانت يبصلنا بقرف

ويقول ليييييييييه كده ليه تشتموا بعض

ولا لما سمعني مره باقولها يا جموسه

حسسنى ان انا رجعت فى وشهم من كتر ما بصلي بقرف

يجي يشووووووووووف

وربنا البت اختي بتقولي يا بنت الهبله قدام امي

وامي تقولها شوف الببببببببببت قلة ادب هيء هيء هيء

وانا شلت المراره انتم عارفين ومش باستحمل

والى بيشتم كده ماهو هايتشتم برضه

لما الناس الي فى الشارع الى هما الطبقه الدنيا من حيث الثقافه والعلم

ويشتموا كده ؟؟ نقوووووووول وحشين ويع

انما لما تيجى من ستات وبنات بيوت محترمين ؟؟؟

ولما واحده جوزها يلاقيها بتشتم كده فى اصحابها واخواتها

تفتكره ايه يمنعه ان هو كمان يلعن لها اهلها تاني يوم ؟؟

فين الكلام الجميل

فين رقة البنات

فين اللسان الى ينقط عسل

فين الناس الراقيه

ماااااااااااااااااااااااااتوا ماااااااااااااااااااااااااااااااااااااااتو

الناس النضيفه مااااااااااااااااااااااااتوا

ماااااااااااااااااااااااااااااااااتوا

اه ياااااااااااني

حد يعملى شوية تيليو وورق جوافه هاموت من الكحه

عيد ميلاد الليله مييييين ؟؟...........مفروسه الجميييييييله

كل سنه وانتى طيبه يا مفروستي يا حبيبتى وعقبال ميت سنه يارب صحه وسعاده وهنا

والسنه الجايه يارب ربنا يديلك الى نفسك فيه كله والى ما خطرش على بالك حتى

ودي التورته اي

واحده بالكريييييييييييمه

وواحده بالشيكولاته كمااااان مش حرمااااكموا من حاجه

وادي الهديه اهو بس مش هاقولك فيها ايه بقى بعدييييييييييين اقولك بلاش تصييييييح

ادي عصير كمان عشان تبلعوا التورتاااااات

ومش حرماااااااكوا من حاجه

ويلا بقى عايزه حفله هنا عظيمه

بس الدي جيه والرقاصه عليكم بقى ماليش دعوه

كل سنه وكلكم طيبين وكلنا مع بعض كده

بنت الاقاليم راحت مصر المحروسه يا ولاد

رضا والعيال عند الهرم

سلام عليكم

وحشتوني ومن ساعة ما جيت من القاهره امبارح وانا قاعده الف عليكوا ومش لاحقه اخلص قرايه انا هنا كل يوم على فكره حبك تكتبوا كلكم وانا مش هنا ولا ايه .

يلا بكره نخلصكم ان شاء الله

انا طبعا زي ما انتم عارفين لو ما حكيتش لكم على كل حاجه واكلت ودانكم مش بيجيلى نوم فأنا عايزه احكيلكم على الحدث الجلل الى حصلي يومي الخميس والجمعه تفصيييييلا .

انا كنت رايحه القاهره المفروض عشان ازور خالتي عشان الله يشفيها كانت عامله عمليه .وقلت هما 24 ساعه ونرجع على طول

المهم بعد ما قررت السفر اكتشفت ان التجمع بتاع خيخه هايكون يوم الجمعه فقمت طبعا مسكت فى زمارة رقبة رضا هههههههههههه برضه لحد ما قالي خلااااااااص هاوديكى بس مش متبرع مش تعلقوني بقى تصفوا دمي وتقعدي انتى مع اصحابك هههههههههههه.( لا بس هو حقيقى خاف احسن يتعب واحنا كنا مسافرين يومها وهو الى سايق )

المهم روحنا القاهره بعد تجيزات مضنيه والطريق كان حلو اوي والجو كان جميل والعيال ناموا والدنيا هاااااااديه وانا عماله ارغي انا ورضا وجبنا سيرتكم وقطعنا فى فروتكم كويس . لحد ما وصلنا الطريق الدائري قال رضا قالي هو احسن عشان البلد زمانها زحمه

قال زحمه قااااااال . وقفنا لما طلع عنينا يا سيدى الفاضل بتاع نص ساعه ولا اكتر فيييييييين لحد ما خرجنا ولله الحمد ومشينا مافيش عشر دقايق كده ودخلنا نفس المشكله تاااااااني فى شارع مش عارفه اسمه ايه بس كان فيه الهيئه العربيه للتصنيع . والواحد كان فى الاول بيقول عدي يا ليله وبندندن يعنى بدل الكاست عشان بايظ بالغيظه فى البت مريم ما كانش عاجبها اغنية عيون القلب .

بس جيت للاخر بقى والعيال صحيوا وقرفوني والحر اشتغل بتاع القاهره والمناظر فى العربيات الى حواليا تصد المنافس وانتم عارفين انا اقليميه بقى مش واخده على الهم ده . المهم وصلنا بعد العذاب والضنا مدينة نصر الساعه 8 مساءا .

كنت ناويه اروح مشوار ما قدرتش خلاص هنجت تماما ضربت سندوتش جمبري من كوك دور ونمت ما حطيتش منطق للصبح .ولا منبهات مأثره ولا اي حااااااااااجه .

وبعدين كان فى اقتراح بقى اتقال ان بما ان انا رايحه الدقي عشان التجمع بتاع خيخه يبقى نكمل بقى نودي العيال الاهرامات . وقلنا مااااااشي وصحينا ولبست العيال وهوب شدينا على الدقي

فى الدقي بقى بجد كنت فرحانه اوي رغم ان الناس كانوا قليلين جدا وانا كان نفسي اشوف كل الناس كل المدونين الى اعرفهم والى ما اعرفهمش لكن الى شوفتهم طبعا شرفوني وفرحت بهم اوي مش هاقول اسامي عشان ما انساش حد ويزعل لكن بجد كنت فرحانه اوي

طبعا ما اتبرعتش انتم عارفين انا دمي هربان ههههههههه عندي انيميا وخيخه بتقول كمان السنان لها علاقه ودي كمان ضاربه عندي تماما .

وقعدت معاهم شويه وبعدين مشيت بقى عشان نلحق وقتنا

وطلعنا الهرم

اه والله تخيلوا ان انا ما كنتش شوفت الهرم قبل كده ؟؟؟!!! اه والله طول عمري باروح القاهره فى الغالب مش باخرج بره مدينة نصر عشان بتبقى زيارات قصيره وكده يعنى .

طبعا ولادي كانوا هاتهبلوا خصوصا خالد لما شاف الجمال والحصان كان حاسس نفسه فى حديقة حيوانات ومش فاهم الهرم ولا الكلام ده .

انا كمان كان نفسي اركب الجمل بصراحه بس المشكله ان ما كنتش عامله حسابي على خروجه اساسا

المهم بيقولك ايه قليل البخت اييييييييه يلاقي خوفوا نايم وقافلين الهرم

قلنا نروح ندخل الهرم خصوصا ان انا ورضا مفتونين بالفراعنه اوي بس المشكله اننا كنا راكنين عند الهرم ا لاصغر

فرجعنا مشي بقى مشورا زي الفل وما اخبيش عليكم بقى رجلي باااااظت ما كنتش عامله حسابي فى الشوز على مشي خالص . وطلعت عند الباب لقيتهم بيقفلوا ويقولوا هانفتح بعد ساعه

طبعا هيهااااااات ده العيال انا سايباهم وهما مجنين ماما فى العربيه رجعنا نجر اذيال الخيبه

وكله بسبب البت السماويه مريم ما كانتش مسماحه فى المشوار وشيعتنا بنظرات الحقد والغل

جيت ابدل الشوز مع خالتي لقيت رجلي تقريبا طالعه من غير جلد قوم قعدت فى العربيه وقلتلهم خلااااااااص مش هاتحرك من مكاني ده اذهبوا انى شئتم

لفينا بقى بالعربيه شويه

ورجعنا مدينة نصر بس كانت فسحه حلو والله وما كنتش على البال .

وعلى الساعه 8 كنا فى المنصوره الحمد لله برحلة عودة هادئه جدا .

بس عارفين يا جماعه القاهره جميله اوي يوم الجمعه ا لصبح بس ما احزنني بجد وخلاني اشفقت على الناس الى عايشين فيها كمية الهباب الاسود الى على واجهات العمارات والشوارع فى المناطق الزحمه يعنى حاجه مش ممكن بجد

والبلد فاضيه تحس ان كان فى معركه من الحياه هنا وخلصت

يعنى الهباب الاسود ده انتم عايشين فيه يا جماعه كده ولا ايه ؟؟؟؟

كمان الواقفه بتاعة العربيات دي سخيييييييييفه وكنت حاسه ان انا الوحيده الى متذمره من الموضوع كان فى ناس عايشه حياتها يعنى ولا كأن فى حاجه

حقيقى القاهره دي لازم يكون لها حل

ما عادش ينفع تكبر اكتر من كده

ده فى لخفنه فى الكباري عجيبه الشوارع بقت خمس ادوار كده

ماهو احنا لو بنغير حكمنا

كنا نغير عواصمنا زي ما حصل فى كل دول العالم

وفى مصر نفسها زمان

ثانيا الصراحه قابلت ناس مفاضيح كتير فى مصر ام الدنيا ههههههههههههههههههه

بجد يعنى مش عارفه الواحد بقى يقول حلوه يا بلديييييييييي المنصوره يعنى .الا انا ضغطي بيعلى بسرعه

رضا بيبص فى المرايه واحنا فى احدى الوقفات الطويله لقيته بيقول : سجاير كمان طب عيب على الحجاب الى على دماغك

قلتله :ايه ده ؟

قالي واحده ورانا .

طبعا هو بيبص فى المرايه على طول لان العربيات عماله حوالينا يلطشوا فى بعض ميه ميه من كتر المشي والوقوف

شويه كده وقالي :اوبااااا ده في بوس ولا ايه ؟؟!!! ههههههههههه

انا مش واخده بالي وكنت بدأت اتخنق من الوقفه .

الاقيلك البت مريم بتقول :اه يا بابا فى هي باسته .

فوقتلهم بقى ايييييييييه ده هى باسته يا بابا يا حلاااااااااااوة المولد

مين ده فى ايه

أنا :

مرييييييم ما تبصيش على حد عيييييييب كده بصي قدامك عيب لما تتابعي الناس (تقولش هما فى بيت ابوهم )

رضا طبعا كاتم الضحك ويقولها: اه يا مريم عيب انا بابص فى المرايه عشان اشوف الطريق

طبعا وفى حد بيتقرص بقى وكده من تحت لتحت

=========================

المهم كانوا 24 ساعه ظراف جدا بصرف النظر عن رجلي الى بقت من غير جلد بس عادي هاتخف يعنى ههههههههههههههههه

حاليا كلنا مصابين مش عارفه ليه

انا رجليا بجد تعبانه اوي

ورحمه وقعت فى الحمام واخدتها زواقه تحت عينها

وخالد وقع برضه وعنده كوره فوق مناخيره

ورضا واخد دور برد عجب

اهو ده بقى المثل الى بيقول قلت للهم رايحه اتفسح قال وراك وراك هو انا مكسح

هههههههههههههههههههه

صدعتكم اكيد اكيد لكن انا فرحانه باليوم اوي وبلقائي بخيخه والناس هناك وكان نفسي اشوف ناس اكتر من كده لكن طبعا نصيب

وطبعا هاوريهم خالد همس الاحباب ومفروسه وقوس قزح وهما عارفين ليه

الحقودين القريبين من الارض دول ههههههههههههههههههه

يلا الى صدع بقى يجي ياخد بنادول

ام سلمه رضي الله عنها وارضاها على الرؤيه

نورونا على الرؤيه

ونشوف الموضوع الجديد

وزوجه جديده من زوجات الرسول

ام سلمه رضي الله عنها وارضاها

التبــــريــــر (الطبطبه على النفس )

التبرير(الطبطبه على النفس)

بعد السلام والتحيه على احلى بلوجريه

الواحد يا جماعه شايف الايام دي فى هبل بالاطنان بين الناس مش عارفه في ايه كل واحد بيغلط ويعلق غلطه على 300 شماعه غير ان هو نفسه غلطااااان ووحش

والحاجه الى تجنن ان كمان الى حواليه نفسهم بيدوروله على تبرير برضه وسبب مش عارفه ليه وفى نفس الوقت يمكن بتبريرهم ليه يكونوا بيدبحوا شخص تاني ويسلبوه حقوقه قدام االتبريرات دي .

ويفضلوا يطبطبوا عليه وهوكمان يصدق نفسه ويطبطب على نفسه

المهم ندخل على الرغي الجامد بقى

السؤال بقى على عايزين نعرف اجابته هو ليه احنا بنخلق تبريرات واسباب قد تكون وهميه للخطأ بصرف النظر ده عن كون الخطأ ده صادر من الشخص نفسه او من حد يهمه او حتى بيعبر عن وجهة نظره .

يعنى مثلا : واحد ضرب مراته وشتمها وبهدلها .

فيقول : اه انا مش غلطان ده انا كنت جاي من الشغل تعبان وما نمتش أو عندي مشاكل فى الشغل او اصلها عصبتنى . بصرف النظر عن وجو د الاسباب دي وعن قدر تأثيرها على تصرف الشخص فعلا الا انها مش مبرر للخطأ ولا تنفي ان الشخص ده غلط.

لان التبرير ده نقدر بقى كمان نحطه لكل مصيبه بحيث انك تطلع من كل حاجه وانت ملاك باجنحه ما تستاهلش الى بيجرالك . وكل الى حواليك غلطانين ووحشين وشياطين .

ندي امثله لحاجات يمكن بتحصل قدامنا كل يوم :

التحرشات الى فى الشارع : سببها ان البنات مش لابسين هدوم او ان دينا الرقاصه كانت بترقص فى الشارع او ان الشباب يا عينى مش لاقي جواز.

فى نظري انا سببها قلة ادب وقلة تربيه من العيال دي . وأي تبريرات غير كده يبقى احنا بنستهبل
مش صح تمشي البنات فى ا لشارع بهدوم غير لاقئه ومش صح دينا ترقص فى الشارع ومش صح الشباب يقعدوا من غير جواز . أو ان البنت دي اسرائليه ولا يهوديه ولا حتى ما لهاش مله خالص .

ألا ان ده ما يعطيش مبرر الخطيئه والانحراف الاخلاقي بالشكل ده.

الحرايق والمصايب والحوادث كلها سببها اهمال او اي حاجه من المسؤل الصغير أو حتى من المصابين الى ماتوا ولا اتحرقوا انما الكبير قاعد ومأنتخ وبيدى تصريحات فى الجرنال والفضائيات .

من وجهة نظري كلهم مسؤلين بما فيهم التخين بتاعهم .وكلهم مهملين وكلهم غلطانين مش عايزين استهبال .

اصحاب الجوازات الفاشله : سواء ان كانت استمرت الجوازه او انتهت الا انها الواقع الفعلي انها فاشله .

طبعاااااااا كل طرف شايف الطرف التاني عنده قرون حمرا وماسك شوكه فى ايده ااااه شيطان بقى . اما هو فالاجنحه بترفرف ورا ظهره .

وطول ما هما كده عمرهم ما هيعرفوا يوصلوا لحل لمشاكلهم .

واحد اولاده طلعوا بايظين : يقولك مش خطأي انا ربيتهم احسن تربيه بس هما الى ما تمرش فيهم .

ازاي يعنى ؟؟؟!!! مؤكد انت غلطان يا سيدى يا ربيت غلط يا صرفت عليهم من مال حرام ربنا ما باركش فيهم اي حاجه المهم انك لك دور انهم يطلعوا كده . فاقد الشيء لا يعطيه .

شوف انت كان نقصك ايه وانت بتربيهم يمكن تعرف تلحقهم .

اقصد ان الواحد ممكن يغلط لكن اوعى تدور على شماعه تعلق عليها غلطك .

حمل نفسك انت الجانب الاكبر دايما من السبب فى المشكله ودايما قول لنفسك انا الغلطان ودور الغلط جاي منين وليه وحاسب نفسك .

ومش معنى انك مش شايف الغلط منك فين يبقى مافيش غلط لا طبعا نادرا ما تلاقي حد ربنا ينعم عليه انه يعرف غلطه ويعرف الحق فين.

مش عارفه اسميها لكن ممكن نقول عليها جلد النفس . ربي نفسك انت بدل ما الايام تربيك .
ولتعلم خطأك اين وتسعى لاصلاحه قبل ان تبحث عن اخطاء الاخرين
وتحياتي لكم