السبت، 1 نوفمبر، 2008

التبــــريــــر (الطبطبه على النفس )


التبرير(الطبطبه على النفس)
بعد السلام والتحيه على احلى بلوجريه
الواحد يا جماعه شايف الايام دي فى هبل بالاطنان بين الناس مش عارفه في ايه كل واحد بيغلط ويعلق غلطه على 300 شماعه غير ان هو نفسه غلطااااان ووحش
والحاجه الى تجنن ان كمان الى حواليه نفسهم بيدوروله على تبرير برضه وسبب مش عارفه ليه وفى نفس الوقت يمكن بتبريرهم ليه يكونوا بيدبحوا شخص تاني ويسلبوه حقوقه قدام االتبريرات دي .
ويفضلوا يطبطبوا عليه وهوكمان يصدق نفسه ويطبطب على نفسه
المهم ندخل على الرغي الجامد بقى

السؤال بقى على عايزين نعرف اجابته هو ليه احنا بنخلق تبريرات واسباب قد تكون وهميه للخطأ بصرف النظر ده عن كون الخطأ ده صادر من الشخص نفسه او من حد يهمه او حتى بيعبر عن وجهة نظره .

يعنى مثلا : واحد ضرب مراته وشتمها وبهدلها .

فيقول : اه انا مش غلطان ده انا كنت جاي من الشغل تعبان وما نمتش أو عندي مشاكل فى الشغل او اصلها عصبتنى . بصرف النظر عن وجو د الاسباب دي وعن قدر تأثيرها على تصرف الشخص فعلا الا انها مش مبرر للخطأ ولا تنفي ان الشخص ده غلط.

لان التبرير ده نقدر بقى كمان نحطه لكل مصيبه بحيث انك تطلع من كل حاجه وانت ملاك باجنحه ما تستاهلش الى بيجرالك . وكل الى حواليك غلطانين ووحشين وشياطين .

ندي امثله لحاجات يمكن بتحصل قدامنا كل يوم :

التحرشات الى فى الشارع : سببها ان البنات مش لابسين هدوم او ان دينا الرقاصه كانت بترقص فى الشارع او ان الشباب يا عينى مش لاقي جواز.

فى نظري انا سببها قلة ادب وقلة تربيه من العيال دي . وأي تبريرات غير كده يبقى احنا بنستهبل
مش صح تمشي البنات فى ا لشارع بهدوم غير لاقئه ومش صح دينا ترقص فى الشارع ومش صح الشباب يقعدوا من غير جواز . أو ان البنت دي اسرائليه ولا يهوديه ولا حتى ما لهاش مله خالص .

ألا ان ده ما يعطيش مبرر الخطيئه والانحراف الاخلاقي بالشكل ده.

الحرايق والمصايب والحوادث كلها سببها اهمال او اي حاجه من المسؤل الصغير أو حتى من المصابين الى ماتوا ولا اتحرقوا انما الكبير قاعد ومأنتخ وبيدى تصريحات فى الجرنال والفضائيات .

من وجهة نظري كلهم مسؤلين بما فيهم التخين بتاعهم .وكلهم مهملين وكلهم غلطانين مش عايزين استهبال .

اصحاب الجوازات الفاشله : سواء ان كانت استمرت الجوازه او انتهت الا انها الواقع الفعلي انها فاشله .
طبعاااااااا كل طرف شايف الطرف التاني عنده قرون حمرا وماسك شوكه فى ايده ااااه شيطان بقى . اما هو فالاجنحه بترفرف ورا ظهره .

وطول ما هما كده عمرهم ما هيعرفوا يوصلوا لحل لمشاكلهم .

واحد اولاده طلعوا بايظين : يقولك مش خطأي انا ربيتهم احسن تربيه بس هما الى ما تمرش فيهم .

ازاي يعنى ؟؟؟!!! مؤكد انت غلطان يا سيدى يا ربيت غلط يا صرفت عليهم من مال حرام ربنا ما باركش فيهم اي حاجه المهم انك لك دور انهم يطلعوا كده . فاقد الشيء لا يعطيه .

شوف انت كان نقصك ايه وانت بتربيهم يمكن تعرف تلحقهم .

اقصد ان الواحد ممكن يغلط لكن اوعى تدور على شماعه تعلق عليها غلطك .
حمل نفسك انت الجانب الاكبر دايما من السبب فى المشكله ودايما قول لنفسك انا الغلطان ودور الغلط جاي منين وليه وحاسب نفسك .
ومش معنى انك مش شايف الغلط منك فين يبقى مافيش غلط لا طبعا نادرا ما تلاقي حد ربنا ينعم عليه انه يعرف غلطه ويعرف الحق فين.

مش عارفه اسميها لكن ممكن نقول عليها جلد النفس . ربي نفسك انت بدل ما الايام تربيك .
ولتعلم خطأك اين وتسعى لاصلاحه قبل ان تبحث عن اخطاء الاخرين
وتحياتي لكم


هناك 56 تعليقًا:

همس الاحباب يقول...

بسم الله ما شاء الله
بجد بوست تحفة
تسلم ايديكى يا ام مريم
يا ريت كل واحد يحاسب نفسه ويكتشف اخطائه لو حتى بينه وبين نفسه
ويحاول يصلح منها قدر المستطاع
نعم مش كلنا ملايكة ولا شياطين
بس ليه ما نوصلش لمرحلة من الرضا عن انفسنا
وبلاش نعلق اخطائنا على شماعات الاخرين
ونبررمواقف لا تحتاج تبرير
وخصوصا فى الدين لان الحلال بين والحرام بين
وتقوى الله هى خير طريق
تحياتى وتقديرى

mayada يقول...

الا الشماعه دي ياام مريم حكايه
بيقولك في مثل بيقول امي دايما تقلهولي
لو الجمل كان شاف صنمه كان وطي عليه
قطمه

mohamed ghalia يقول...

الواحد ممكن يغلط لكن اوعى تدور على شماعه تعلق عليها غلطك
جميل قوى البوست ده
رائع فعلا
مش لازم كل غلطة يكون ليها تبرير ولازم نتحمل المسئولية شوية
حقيقى محتاجين إعادة نظر فى أمور حياتنا
وإننا نلتزم بتعاليم دينا
هنرتاح كتير
تحياتى وإعجابى
دمتى بود

عمرو يقول...

أختلف معاكى يا أم مريم فى موضوع الجلد النفس .. هى الأصح تكون النفس اللوامه و ده التعبير اللى ربنا سبحانه أختاره ليعبر به عن محاسبة النفس و الضمير
لو كل واحد عود نفسه يحاسب نفسه و يحسب تصرفاته 5 دقايق بس قبل ما ينام و هو حاطط راسه على المخده أكيد الحال حاينصلح و مش حايعمل نفس الأخطاء اللى عملها تانى يوم

KHALED يقول...

بإختصار شديد ..
كلمة معلش .. هيا إللى موديانا فى داهية ..
واحد خبطلى العربية بالأتوبيس إللى هوا سايقة ..
نزل الناس كلهم يحوشوا و يقولولى معلش يا بية .. راجل كبير إستحمل أنت ..
و مشيت و غرمت 300 جنية بسبب كلمة معلش ..

مش حاجة تنقط بالذمة ..

ojg يقول...

الاعتراف بالغلط
محتاج شجاعه
بس هنجيبها منين
يبقى الأسهل
اننا نرميها على اي حد تاني او اي حاجه تانيه
زي مانتي قلتي
ياريت بدل ما ندور على أخطاء الآخرين
ندور على أخطاءنا ونعالجها

صبرني يارب يقول...

همس الاحباب

الله يكرمك يارب وفعلا تقوى الله هى خير طريق بس مين يفهم

صبرني يارب يقول...

محمد غاليه

تحياتي لك ومتشكره اوي على الاطرء يا استاذنا

صبرني يارب يقول...

مياااااااااده

هههههههههههههههههههه

يخرب عقلك اول مره اسمع المثل ده بس حلو اوي بوسيلى ماما وقوليلها ان انا سجلته عندي خلاص

صبرني يارب يقول...

عمرو

هو جلد النفس هنا مش معناه انك تمسك الكرباج يعنى لكن بمعنى انك تحاسب نفسك وتعاقب نفسك كمان اذا لزم الامر

واكيد لو كل واحد حاسب نفسه اولا هاينصلح بس يكون هو نفسه حقاني عشان يعرف يحسب نفسه بالحق

صبرني يارب يقول...

اوجي

فعلاالاعتراف بالخطأمحتاج شجاعه ومش كل الناس عندها شجاعه اكيد

صبرني يارب يقول...

خالد

ربنا يعوض عليك يا استاذ خالد ويشيل عنك كل شر يارب
وفعلا كلمة معلش مبوظه الدنيا ما حدش بيخاف العقاب

ojg يقول...

هتخليني اشد في شعري يا صبرني
:))
يا جميله القصه مش عن بنت ولا حاجه
الموضوع كله عن وردة
اي نعم القصه كلها بتتكلم زي ما يكون عن بنت
بس في الآخر بتكتشفي انها ورده
وانها كانت حلوة اوي بس اللي زارعها خباها عن الناس ومش رضي يوريها لحد ولما خلا حد يشوفها وعجبته خدها من جنب اخواتها الوردات وقطفها وطبعا عشان هي ورده ماتت بمجرد خروجها من الأرض
مع ان اللي قطفها قعد يحطلها مية بسكر ويحاول ينعشها بس خلاص
فهمااان ولا مو فهمنتش؟؟
:))

عمرو يقول...

أيوه أنا فاهم أن تعبير جلد النفس يعنى تأنيبها من غير كرباج
بس الحقيقه أنه تعبير غير اٍسلامى و حتى أصحاب التعبير ده بيتنصلوا منه دلوقت

صبرني يارب يقول...

هما مين اصحاب التعبير ده

ده انا فاكره انى اخترعته يا راجل

هههههههههههههههههه

حقيقى جه على بالي كده يعنى ما افتكرش عدى عليا قبل كده

صبرني يارب يقول...

ههههههههههههههههههههههههه

وززززززززه

وربنا ما فهمت تصوري ؟؟؟

اي ده شكلي وحش اوي مش باقولك بلييييييده

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونك والبنر موجود علي مدونتي

La RoSe يقول...

جميل جداً البوست ده وفي حل لمشاكل كتير جداً،لأن لو كل واحد أخطأ اعترف بالخطأ وحاول إنه يصلحه ويتجنبه بعد كده يبقى هنعيش في يوتوبيا ولأننا أكيد مش هينفع نعيش في يوتوبيا لأننا على الأرض مش في الجنة يبقى من الصعب إن الجميع يوصل للمرحلة دي من "تأديب النفس"...

الكلام جميل جداً لكن تنفيذه صعب جداً جداً

تحياتي

mony يقول...

ماكدبش القول اللي بيقول
(الاعتراف بالحق فضيلة)



ربنا يباركلك يا ام مريم

و كل واحد يغلط يكون عنده شجاعة انه يتحمل نتيجة غلطة و شجاعة لاصلاح الغلط ده

مش نستسلمله


جزاك الله خيرا يا جميل

مواطن مصرى نايم يقول...

لا فض فوكى يا ام مريم
بس بوست جاااااااااامد جدا
و انا كنت منزل بوست برضوا ان كل واحد يكون عنده وعى
لو الوعى ده موجود
كل حاجة تتحل
مش نرمى اخطأنا على الاخرين

تحياتى

اسلام

صبرني يارب يقول...

المهندس الحسينى

انا فعلا نفسي اعمل كده وفعلا نفسي نبطل سلبيه انشاء الله نشوف الموضوع ده ايه وتحياتي لك ونورت مع انك ما سلمتش علينا ياعم

صبرني يارب يقول...

موني
تسلمى يارب ربنا يكرمك ونورتي

صبرني يارب يقول...

لا روز

الاول تحياتي ليكى ونورتي

وبالنسبه للبوست
حضرتك بتقولي لو حصل ده نكون احنا فى يوتوبيا والى لحد علمي الى هى المدينه الفاضله والى حلم با افلاطون او المدينه الخياليه كمعنى حرفي مش عارفه ايه علاقتها بالجنه الى احنا نعرفها
وحضرتك بتقولي ان لو ده حصل نكون احنا فى الجنه
احب اوضح لحضرتك ان فى الجنه مافيش ا خطاء اساسا عشان نصلحها
ومش لازم ابدا ان الواحد يعرف يحاسب نفسه ويصحح اخطاؤه بنسبة 100%
يا ستى نخليهم حتى 70% احنا راضيين
وما يبقاش خيالي ولا تنفيذه صعب ولا حاجه
انما لازم لازم نحاسب نفسنا ونكون صرحاء مع نفسها وما نخدعش نفسنا ابدا
حتى لو ما عرفناش نصلح الغلط فى وقتها لكن نبقى واقفين على ارض الحقيقه والواقع وما نظلمش حد ولا حتى نظلم نفسنا
أنا لا ادعوا للمثاليه ولكن ادعوا للصدق مع النفس حتى يتأتى لنا اصلاحها يوما

تحياتي ليكى تاني ونورتي

صبرني يارب يقول...

مواطن مصري نايم

تسلم وتعيش يارب يا اسلام ونورت

Appy يقول...

يعنى بصراحه مش عارفه اقولك ايه والعجيبه انك هتلاقى ناس موافقه على كلامك ولو بصيتى لافعالهم هتلاقيهم بيعملوا العكس
يالا بقى معلش الشجاعه والاحترام مش بينفع نشتريهم
احنا بنعرف نجيب شماعات بس اجيبلك واحده

خواطر ليست عابرة يقول...

أولا أحييك علي اختيار الموضوع والأفكار التي طرحت
ثانيا حقيقي فعلا كثيرين هم الذين يجيدون اختراع المبررات لمواضيع لا يجب أن يكون لها أي مبرر مثل ما اشرت اليه فيما يتعلق بالتحرش الجنسي فلا العري في الفضائيات ولا لبس الضيق في الشوارع ولا أي سبب آخر يصلح مبررا لتحول انسان إلي ذئب.
ولكننا في النهاية سنبقي نحمل المسئولية للآخرين، ونادرا من الناس من يعترف بمسئوليته.

تحياتي لك سيدتي علي أفكارك الرائعة وعرضك الممتع للموضوع.

كـــيــــــــارا يقول...

صبصبتي حبيبتي

انتي ممتازه

فعلا بوست هايل

ياريت كل واحد يحاسب نفسه ساعتها كتير هيتغير

صبرني يارب يقول...

آبي

ما هو ده الصدق مع النفس الى انا اتكلمت عنه
يارب ما نكذبش على نفسنا

المستنصر بالله يقول...

فعلا مقاله رائعه لو كل واحد دور هو غلطان فى ايه اعتقد ممكن بعض الامور تتصلح وتسير فى مسارها الصحيح


تحياتى لحضرتك

مصطفي ريان يقول...

السلام عليكم
بصي طبعا انتي كلامك صح المفروض الأنسان يحاسب نفسه الأول
لكن في فرق بين محاسبة النفس وجلدها
مش معني اني غلطت اعلق المشانق لنفسي
ولا احملها اكتر مما تحتمل لاء اعترف بالغلط علشان ماكررهوش تاني
وبردو مايمنعش ان الأنسان ساعات بيحتاج يطبطب على نفسه علشان نقدر نتحمل كل الصعاب اللي في دنيتنا دي
تحياتي لك ودمت بخير

صبرني يارب يقول...

خواطر ليست عابره

الله يكرمك يااخي الفاضل ونورت

صبرني يارب يقول...

المستنصر بالله

الله يكرمك ونورت

صبرني يارب يقول...

كياااارا

ايه صبصبتي دي هههههههههههه

والله حلوه

تعيشي يا جميل ونورتينى

mahasen saber يقول...

احنا الشعب الاول فى العالم فى انتاج الشمعات ...حيث ان اى غلطه بنرميها بحالها وبما تتب عليها من كوارث على الشماعه لا والشيطان بس الشماعه سحبت البساط من تحت رجله
......
انا فاكره زمان كانت ماما تقولنا واحنا صغيرين فكروا عملتوا ايه صح وايه غلط النهارده وزعلتوا مين منكوا عشان تصالحوه بكره يعنى كانت بتخلينا نحاسب نفسنا اول باول
وزى ما سيدنا عمر قال حاسبوا انفسكم قبل ان تحاسبوا
يارب ربنا يقدرنا ونعمل كده وشعب تانى يسرق مننا المركز الاول فى انتاج الشماعات
.......
ولاا ايه يا قمر

صبرني يارب يقول...

والله يا محاسن انا ساعات بقيت احس اننا مش المركز الاول فى اي حااااااااااجه خالص
ولاحتى فى السوء
يعنى احنا زي الى رقصنا على السلم

Anonymous يقول...

حبيبتى ياصبصب البوست ده حلو قوى وياريت ناس كتيرة يقروه يمكن احوال كتيرة تتغير-كل الى قلتيه صحيح وفى د بالحاجات اكتر خطورة من كده-مثلا لما ابن صاحبتك يخبط حد بالعربيه وهو معندوش رخصه ومع ذلك والده يطلعه من الحجز عادى جدا لان اخوه فى امن الدوله وتيجى تفهمى صاحبتك ان ابنها غلطان تحلفلك ان الراجل الى كان ماشى هو الى مش شايف كويس ويستاهل العقاب-تفتكرى هى فعلا مقتنعه بكده ولا بتدور لابنها على مبررات علشان يدوس على الناس تانى-ولما واحد يدى ابنه الى فى اعداديه 3دروس فى كل ماده(مدرس يفهمه-مدرس يحفظه-ومدرس يراجعله)على اساس انه مش فاضى يدرسله وامه مش عايزه وجع دماغ وخير ربنا كتتتيير-تفتكرى الولد ده عمره هيعتمد على نفسه فى حاجه-حتى لو سقط بعد ده كله برضه فى مبرر-لما الزوج يبقى مخنوق من مراته زى الاستاذ بيبرس وصعبان عليه نفسه وبيدور على اى مبرر للجواز من واحده تانيه ليه مقعدش مع نفسه وفكر شويه ليه مراتى بتعمل كده-جايز انت بتكلمها بطريقه وحشه- جايز مهملها-جايز بتبص على ستات قدامها وفاكر انه مش واخده بالها-اوجايز دايما بتنقدها فى كل حاجه-افتكر اخر مرة قلتلها كلمه حلوة -صدقنى مفيش ست نكديه من غير سبب-صدقينى ياصبصب صعب قوى حد يقعد يحاكم نفسه ومحدش بيعمل كده الا الى ايمانه بالله قوى -لان ربنا لما قسم الارزاق محدش عجبه رزقه لكن لما وزع العقول الكل عجبه عقله-تحياتى ليك- داليا من دبى-

صبرني يارب يقول...

استاذ بيبرس

والله هو مش رضا بس الى بيفكر هو كل الرجاله بيفكروا
كلكم عندكم هاجس الجواز التاني والتعدد ويا حلاوه وعاش الرجال وكده يعنى
مافيش مشكله المهم يكون حد فيكم عنده الشجاعه انه يعمل يتجوز فعلا تاني
بس على شرط
طبعا غير انه يكفيهم ويوفرلهم حياه كريمه
انه يواجه مراته الاولى ويواجه المجتمع ككل مش يستخبى ويقول هعععععع مين هناك
ههههههههههههههههههههههههههه

ثانيا بقى
طول عمري هافضل اقول اي علاقه فاشله بيكون سببها الطرفين
حتى لو كانت بسلبية احدهم فى مواجهة اخطاء الطرف التاني

حضرتك بتقول انك مخنوق من مراتك
عشان بتحاول تنرفزك طب ما تقولنا كده انت عملت فيها قبل ما تحاول تنرفزك
مش يمكن هي كمان مخنوقه منك ؟؟؟
ماهو مش معقول لله فى الله وواخداها هوايه
وحضرتك ممكن تقولنا من الى بيعمل دوشه وانت نايم ؟؟؟
هى بتلم عيال العماره وتلعب معاهم ا لاولى ؟؟؟
ولا ولاد حضرتك الى مطلعين روحها ليلا نهارا ؟؟؟
وحضرتك لما بترجع البيت عايز جزيره بعيده تتكعور فيها على ما وقتك فى الاوتيل يخلص وتقوم تخرج ؟؟

وبعد عشرين سنه تبقى تقولها ولادي وانا حر فيهم ؟؟؟؟؟؟؟
قبل ما تدور على عيوب مراتك بص لنفسك وشوف اخطائك لو سمحت والا هاتفضل انت تعد عيوها وهى تعد عيوبك وتيتحيل العيشه بينكم
والجوازه التانيه مش هاتبقى اكتر من تكرار للفشل لو فضلت على نفس المنوال

تحياتي لك يا استاذ بيبرس ونورت

صبرني يارب يقول...

عندك الحق كله يا داليا

والحالات الى ذكرتيها فعلا صح
لان فعلا انا ممكن اتخيل تبرير الشخص لنفسه عشان كل واحج عاجبه عقله فعلا
انما الى يغيظ تبرير ا لاهل لابنائهم الغلط
والاخ بيبرس انا قمت معاه بالواجب خلاص قبل ما اشوف تعليقك
ههههههههههههههه

تحياتي يا جميل ونورتي

نهر الحب يقول...

يوم الجمعه 14/11بأذن الله
هنروح نزور دار ايتام فى بورسعيد اللى يحب يشرفنا
ياريت تنورنا ونحاول نرسم بسمه ونتعاون على البر والتقوى
وبعدها هنقعد مع بعض شوية طبعا لو تحبوا
التفاصيل عندى بالمدونة
اعتذر لكنه ليس اعلان لكنها دعوه للخير

نهر الحب يقول...

السلام عليكم ورحمة الله وبركاتة

ان حاسبت نفسك بما يرضى الله لكانت الدنيا افضل
ومن تق الله يجعل له مخرجا
بجد بوست حلو
وفقك الله الى ما يحبة ويرضاه

صبرني يارب يقول...

نهر الحب
تسلمى يارب
ونورتي المدونه وصاحبتها

وربنا يجازيكى خير على ما نويت
لو كنت انا من بورسعيد كنت هاجيلك اكيد

وحتى لو كان اعلان انا مش بامانع ده
رغم ان فى ناس ما بيرموش السلام حتى على صاحب المدونه وده بيخلينى استغلسهم بصراحه

نورتي يا جميل وربنا يوفقك وهازورك اكيد فى المدونه ان شاء الله

ahmed_k يقول...

السلام عليكم
إزيك يا أم مريم
طبعا بالنسبه لحالات التحرش
فهذا ناتج عن فراغ أخلاقي منتشر بشكل مرعب قد يكون بسبب إنتشار ملابس فتيات مثيره لا يراعون الله في أنفسهن
فكان ان جرى لهم ما جرى أو بسبب قلة القدره على الزواج عند الشباب ,
ولكنها كما ذكرتي ليست دوافع تبرر
هذا الفعل
لكنها ثقافه تم نشرها على مدار عقود لتبعد الناس عن قيمهم وأخلاقهم معتقدين أنهم يحاربون الدين وإنتشاره
فكانت الطامة الكبري وإن أستمر الوضع على ما هو عليه
فالعاقبه لا يعلمها إلا الله.
وبالنسبه للحرائق والمصايب فالتخين طبعا مسئول
ألم يقل عمر بن عبد العزيز
لو دابة تعثرت بالعراق لخشيت أن أسأل عنها لما لم تعبد لها الأرض
واحنا الحوادث ما شاء الله بالكوم وموت مش تعثر
ربنا موجود
ومش حطول اكتر من كده
بارك الله فيكي على بحثك القيم

تحياتي

صبرني يارب يقول...

استاذنا الغالي احمد
مازلت اصر وبشده على ان مش لبس البنات ولا قلة الزواج هما السبب
وانما قلة الدين وقلة التربيه هى السبب

وتحياتي لحضرتك ونورت

بت خيخة وأي كلام يقول...

اوكى يا ام مريم

انا هاعترف
انا اللى غلطانة

مش هاعلق اخطائى على شماعة الاخرين

بس برضه مش هاسمح لحد انه يعلق اخطائه عليا ويقول انى السبب

زى ما اعترفت انى غلطانة الكل يعترف انه غلطان
ماهو مش انا لوحدى اللى خيخة فى الدنيا دى
لو كل واحد فيكم بص جوة نفسه هيلاقى نفسه كان خيخة فى يوم من الايام
فى موقف من المواقف
فى فترة من فترات حياته


ومن كان منكم بلا خطيئة فليرجم غيره بحجر


سلام
اختك خيخة

صبرني يارب يقول...

خيخه

شوفي انا طبعا معاكي ان لازم الكل يعترف بغلطه
لكن النقطه الىانا باتكلم فيها هى انك الاول اعترفي بغلطك وبعدين فكري فىاخطاء الاخرين وحمليهم بيها
وطبعا ما تسمحيش لحد انه يعلق اخطاؤه عليكى
وطبعا كل حد فينا اكيد كان خيخه فى يوم من الايام حتى لوما شافش ده بعينه
نورتي يا قمر

صبرني يارب يقول...

استاذ بيبرس

شوف يا حاج انا لوسبت عليك اعضاء جمعية المراه المتوحشه مش عارفه هاتبقى على كام كيس

وبعدين والله العظيم حضرتك ظالم مراتك على الاخر
دلوقتي انت مش معاها طول النهار ولا شايف ان مسلسل الزعيق ده على طول
وان الصويت ده مرحله متقدمه من الانهيار العصبي قدام العيال

والسؤال بقى بتاع هو ماينفعش تأكلوا الولاد الا بالصريخ والعياط
ارجوك وعشان خاطري ووحياة الغاليين عندك
بكره لما تلاقي المدام بتأكل الولاد خد مكانها مره واحده بس
وفرجنا بقى امكانيات حضرتك فى تأكيل الولاد من غير صويت وصريخ

اه وبالنسبه للمصاريف حضرتك مش بتصرف عليها عشان تنول رضاها
اوبجيكششششششششن
انت بتصرف عليها وعلى ولادك لان ده امر مفروض عليك فرضااااااااا
مش عاجبك كنت تقدر ما تتجوزش يا فندم وتوفر فلوسك

على فكره
كان جوزي احيانا يدخل البيت يلاقين باصوت كالعاااااده زي كل واحده عندها عيال مافيش مشكله
يقولي اييييييه بس فى اييييييه بلاش العصبيه دي
صوووووتك شويه وبعدين العصبيه دي تتعبك انتى
كله بالراحه

ايه يا ولااااد مزعلين ماما ليييه تعالوا هنا معايا فى الانتريه على ما ماما تجيب الاكل
هما دقيقتى بالظبط
تلاقي فى ناس بتجري فى الصاله وفى شباشب بتتحدف وراهم
وزعيق بقى من الى قلبك يحبه وشتيمه جايز
قوم انا بقى خلاص كنت دخلت فى الحلل والكلمتين بتوعه هدوني
اروحله وانا مبتسمه على الااااااااااخر
ايه يا رضا ايه العصبيه
بالراااااااحه يااخي
ده الاطفال احباب الله تتعب كده يا بابا

طبعا احنا الاثنين بنفتح فى الضحك
ههههههههههههههههههههههههههههههههههه

عشان خاطري خد مكانه ساعه وجرب هى عندها حق تقول صبرني يارب ولا لاااااااااا

حاسوباتيه يقول...

نغلط ماشي بس على الاقل نضور احنا غلطنا فين ونعترف بالغلط بس طبعا الاغلاط الي انتي كاتبه عنها دي كبيره قوي يعني حتى لو عرفنا الغلط فين صعب يصحح لكن في اغلاط تانيه ممكن نلحقها ونعرف الغلط فين ده لو احنا اصلا اعترفنا بيه

صبرني يارب يقول...

يا استاذ بيبرس
يعنى هما العيال ملايكه والمدام هى الى غاويه تصوت
وبعدين الى بيصوت ده هو الى بيتعب والله
اسألني انا
وطالما كده ما تأكل انت العيال وتنيمهم طيب وكفى المؤمنين شر القتال
وعلى فكره رضا بيقولك قلبي معاك
واحمد ربنا انت بتتكلم وتقول يعنى
ههههههههههههههههههههههههههههههههه

وايه على راسه باطحه دي ؟؟؟
هو فى واحده مش بتصوت من عيالها ؟؟
ده انا اشك فى قواها العقليه

صبرني يارب يقول...

حاسوباتيه
الى ما يقدرش يصلح الغلط الى فات
يقدر حتى يتجنبه فى الى جاي
او على الاقل يعرف الى له والى عليه ما يعيش يتعذب ويعذب الى معاه
تحياتي ليكى ونورتي

أنا حر يقول...

بوست حلو قوي بس انا شايف المشكلة اساسها حاجتين
اول حاجة تحمل المسئولية اللي احنا متعودناش عليها ولا نعرفها
وتاني حاجة اننا برده مش متعودين على الاعتراف بالغلط خالص وكأن الاعتراف بالخطأ شيء يدمرنا ويمس كرامتنا
موضوع رائع
تحياتي

صبرني يارب يقول...

انا حر

الله يكرمك اتفق معاك تماما
ولسه جايه من عندك حالا ومفكرني بالمأساه الى عايشينها

تحياتي لك

صفــــــاء يقول...

والله يا صبرنى يا اختى انت بسم الله ما شاء الله كل أما ادخل مدونه الاقيكى شانه معركه فيها وغاسله فم صاحبها بالكلور وزنقاهم فى الزاويه وهاتك يا بستفه بس يعنى بمنطق والله ... شاطرة
نشاطك تحسدى عليه .. متخفيش مش بحسد
وكمان عندك حجه فى دفاعك بس خفى شويه على البلوجريه الغلابه وكمان الكلور طعمه وحش اوى

صبرني يارب يقول...

صفا جلال

ههههههههههههههه
بجد ضحكت ضحك على كلامك
كده ؟
يارب كريم ما يشوفش بقى كلامك يفكر نفسه مظلوم بقى
والله العظيم انا باقول الحق عشان انا لو جاملتهم وطبطبت بكلمتين زي باقي الناس من وجهة نظري تبقى كتم شهاده
وفى النهايه انا عايزلهم الخير والله
وبالنسبه للكلور ده جميل اوي
اصل فى ناس لسانها محتاجه جداااااا
وما تتعودوش على النشاط ده
كل الحكايه انى محبوسه فى البيت اليومين دول وقاعدالكم
تحياتي ليكى ونورتي

صبرني يارب يقول...

الاخ بيبرس

ماشي ماشي

ما حدش هاينفعكوا بقى
هههههههههههههههههههه

والله ده احنا غلابه ومساكين
بنتكلم بس
بلاش نتكلم
بلاش نصوت ؟
نطق يعنى

والله انا فى واحده يا عينى فى شارعنا جابت 3 عيال فى بطن واحده بعد سنتين كانت فى مستشفى امراض نفسيه وعصبيه
يوم ما عرفت جالي اكتئاب وقلت يارب ما اوصلش للدرجه دي
هههههههههههههههههههههههههههههه
نوريت يا استاذنا

صبرني يارب يقول...

استاذ بيبرس الله يكرمك يارب
الجديد نزل حالا فى الرؤيه الاسلاميه
وحضرتك شرفت التدوين وعالم التدوين
وليا الشرف اكون انا بوابتك لعالم التدوين
ومراتك فى عنيه هاظبطهاااااالك على ا لاخر
تحياتي لك يا فندم

صبرني يارب يقول...

ههههههههههههههههههههه

انا لسه ما كلمتهاش والله
أنا ضفتها وهى قبلت لسه ما اتكلمناش

الصبر يا اهل الصبر
صبرني يارب