الجمعة، 2 يناير، 2009

أو لا اصلي وراء مالك؟؟؟

السلام عليكم
ازييييييييكم .
مبسوطين كده ؟؟؟ لازم تعصبوني وتخلوني اقول الحقيقه ههههههههههههههه
اهم قطعوا فى شعري لما قالوا بس فى البوست الى فات
والى قالي انا اتخميت فيكى والى اتصدم فيا على رايي العجيب الغريب المتعارض مع كوني عامله مدونه دينيه
مع ان الدين ما قالش ابدا انى اتاكل على قفايا ولا اسقف واطبل فى اي زفه معديه
المهم عشان مش عايزه اعيد الكلام
ياريت اي حد تسول له نفسه لشتيمتى ياريت يخليه راجل كده ويكتب اسمه او يقول هو مين خصوصا لما يكون بيتكلم بشكل يقول انه عارفني
وبعدين الخناقات دي فتحت نفسي على الخناق وانا بقى كنت مانعه نفسي بالعافيه وعندي مليون موضوع هانتخانق فيه ونشد فى شعور بعض لما نقول بس
خلي الصدمه تبقى عشره بقى
ههههههههههههههههههههههههههههههه
ندخل على الرغي الجامد جدا والى محوشاه على مدى كام يوم وكاتماه فى قلبي ما تخافوش مش كلام كتير وانما مهم .
هاحكيلكم حكايه حصلت ايام الامام ابن حنبل .
الامام بن حنبل كان رأيه ان اكل لحم الجمل يفسد الوضوء و الامام مالك كان رايه ان لا يفسد الوضوء
(بصرف النظر عن مين الى صح مش موضوعنا لان الاثنين صح اصلااااا)
واحد راح لابن حنبل وقاله : لو علمت ان رجلا يصلي واكل لحم جمل ولم يتوضا اتصلي ورائه؟؟
تفتكروا بن حنبل رد قال ايه ؟؟؟
قال : او لا اصلي وراء مالك ؟؟!!!!
مالك كان استاذه يا جماعه . وهو مختلف معاه فى راي . لكن مش معنى كده انه على خلاف معاه .
اوحتى مغلط مالك او مستأثر برايه فى مسأله دينيه يعنى مجاله اساسا وده امام يعنى مش اي حاجه
الا انه ممكن يعمل براي مالك وهو رايه العكس اصلا
فاهمين يا جماعه ؟؟؟
فاهمين يعنى ايه اختلاف فى الرأي ؟؟؟
حاسين اد ايه الاختلاف ده عاطي مرونه للدين الجميل بتاعنا .
الدين الكامل
تفتكروا اي مسأله من مسائل اختلاف الراي بين الائمه والمسلمين عموما للان الم يكن الله قادرا على حسمها بكلمه واحده فى كتابه ؟؟؟؟
مش ملاحظين يا ناااااس ان الاختلاف ده مقصود ؟؟؟
طبعا مش فى الثوابت الى فيه نص صريح مافيهوش كلام
نص صرييييييييييح ( مش حد يجبلى كتاب تفسير ويقولي فلان قال كذا يبقى كذا لان كتب التفاسير نفسها بتختلف )
ما علينااااااااااا مش موضوعنا
واختلاف الراي مش فى الدين بس فى كل حاجه
ولله الحمد احنا عندنا مافيش اي ثقافه لحرية الراي واحترام الراي الاخر
اي حد رايه مش زي رايي يبقى حمار ومش بيفهم حاجه دي القاعده
وتلاقي اثنين اساسا مش فاهمين اي حاجه فى السياسه وقاعدين مع ذلك يتخانقوا على حاجه وكل واحد ماسك فى رايه باديه وسنانه لا ومش بس ماسك لا كمان عايز يفرضه على كل الدنيا
يااااااااااااااااارب اعيش واشوف حوارات راقيه بين الناس مش شتيمه وقلة ادب وقلة قيمه
واحترام للراي الاخر مش استهزاء ورفض تام لاي دماغ تانيه
واعتزاز بالراي مش عند وفرض راي
اعتقد 50 فى الميه من مشاكلنا مع بعض ومع الدنيا هاتتحل لو كنا بس نحترم راي وعقول بعض
بس كفايه كده عشان الجو برد
اه ولو سمحتم ادعوا لرضا ربنا يشفيه عشان واخد دور برد جامد اوي
والى فيكم ما دعاليش امبارح الفجر هاعررررررفه وهاعلقه على باب المدونه
اه والى راحت عليه نومه وما صحاش وما صلاش
لا ده هاعلقه من رجليه على باب زويله
هههههههههههههههههههههههههههه

هناك 31 تعليقًا:

mony يقول...

فعلا يا صبني و الله عندك حق

كنت لسة بكلم تامر في الموضوع ده
(اختلاف وجهات النظر)

كنت بتكلم مع واحده علي مسألة فقهية والبنت يا صبرني متمسكة برأيها اللي عرفت بعد كده انه غلط و كأنه شرفها بتدافع عنه



ربنا يهدي الجميع يا رب


و الف سلامة لزوجك

ربنا يشفيه و يجعل تعبه في ميزان حسناته

صبرني يارب يقول...

موني يا حبيبتى واحشاااااني

طب انتى بتكلمى واحده انا ياما الزمن اكل على رقبتي وشرب فى الحكايه دي لما خلااااااااااص هايموتوني ياا ختي

نورتي يا جميل

mohamed يقول...

السلام عليكم ورحمة الله
أتفق معكى فى الرأى
هؤلاء هم المتنطعون
الذين تصوروا أن المعرفه هى كلمتين
ولم يعلموا مقصود الاحكام الشرعيه
الشرع معلوم ومحدد بالنص والكلمه والمعنى’ أما الرأى الفقيهى فهو أجتهاد
رجال أوتوا علما وحاولوا تحرى ما تطمئن اليه قلوبهم, أنها سعه وتوسعه
سيدتى
هناك حديث للرسول غليه الصلاة والسلام
فيما معناه
يأتى رجال من بعدى
تستصغرون صلاتكم بجوار صلانهم
وصيامكم بجوار صيامهم
وهم من أهل النار
سؤل من هم
قال
المتنطعون

هم أكثر ضرر من أعداء الاسلام
لأنهم تصوروا أنهم مرجعية الدين
ومن أحنكروا الحق
الاسلام لا تشدد فيه ولا تفريط

صبرني يارب يقول...

الاخ محمد

اول مره اسمع الحديث ده بس عجبني اوي هادور فيه كالعاده

وحضرت نورتنا وفعلا فى رايي هم اخطر على الدين من اعدائه

بل هم ادوات اعدائه احيانا سواء عن علم بذلك او جهل به

Che يقول...

عارفه المثل بتاع اللى بيدن فى مالطه اهو البوست ده اصدق مثال للى بيدن فى مالطه ... مشكلتنا اننا ما نعرف يعنى ايه حريه شخصيه و لو فهمنا يعنى ايه حريه شخصيه هنفهم يعنى ايه آخر و بعدين نفهم يعنى ايه احترام اخر و اللى بيتمسح بالدين اكيد ماقراش فى القرآن " من شاء فليؤمن و من شاء فلكفر " يعنى حتى الثوابت و اصل العقيده ربنا مدينا الاختيار فيها يا اما تؤمن يا اما تكفر قمه الديموقراطيه .... بس برده تقول لمين و تفهم مين احنا للاسف امه القطيع و اللى يخرج عن القطيع يبقى خارج عن الجماعه و عن المله و يستاهل ياخد بالجذمه لغايه مايموت و بجد انا دلوقتى باقول ... صبرنى يا رب

بنت الغربة يقول...

حبيبتى ياصبرنى
ايه اللى حصل علشان يزعلك قوى كده؟؟
هو انا اسافر يومين الاقيك زعلانه كده؟
عموما ماتزعليش من اللى بيشتم لانه بياخد من ذنوبك - وغير كده فى ناس بتفتكر انها لما تزعق وتشتم فده بيقنع الاخرين بوجهة نظرهم او هيخافوا منهم - بس ده بيدل على ضعف ايمانهم وضعف شخصيتهم وموقفهم لانهم مش عارفين يوصلوا اللى هم عايزين يقولوه من غير مايحترموا راى الطرف التانى -لان مخهم بيبقى قفل على حاجه واحده ومش عايز يشغله ويفكر شويه فى راى التانى -لان معنى ان التانى صح يبقى هو غلط -والناس المعقده نفسيا شايفه دايما ان رايها هو اللى صح والباقى كلهم غلط -فبيلاقى التصرف الوحيد قدامه انه يشتم - صدقينى النوعيه دى كتييير قوى والاحسن انك ماتحطهمش فى دماغك وتوجعى قلبك بالرد عليهم لان الكلام معاهم مالوش لازمه صدقينى -ولا الرد عليهم ليه هدف عندهم الا انهم وصلوا انهم يلفتوا نظرك وزعلوك بس - وده اللى هم عايزينه صدقينى النوعيه دى تجاهلها احسن حاجه
على رأى المثل (القافله تسير والكلاب تعوى )وصدقينى ماحدش بيبص على الكلاب وهى بتعوى -بيضربوها بالطوب بس
عموما انا كنت مسافره يومين البحرين
بس برضه دعيت تقريبا فى معادنا لان التوقيت بقى فارق ساعه واحده
وانا رجعت النهارده الفجر وقمت وانت اول واحده جيت اسلم عليا واعيد عليها بالسنه الجديده
والف سلامه على استاذ رضا وتحياتى للاولاد
وليك ياقمر كل سنه وانت طيبه على السنه الجديده
وبلاش زعل ياقمر - داليا-

عمرو يقول...

أولا سلامة الأستاذ رضا ألف سلامه و اٍن شاء يبقى كويس عن قريب بس بعد كده يبقى يتقل فى اللبس خاصة بالليل ..
على فكره عايز أقول لك يا ست أم خالد أن الخلاف فى الرأى و رفض فكر الآخر ليس حكرا علينا لوحدنا .. لأ
حتى بين الشعوب اللى بنقول عليهم راقيين و عندهم مساحه محترمه للخلاف برضو أحيانا بيوصل الحوار بينهم لنقطة تنتهى بالاٍشتباك بالأيدىن و الرجلين كمان
أعتقد أنها من طبيعة النفس البشريه رفض ما يخالفنا فى الرأى و لكن الرفض ده بيختلف فى درجاته و أشكاله
أرجو أنك ما تزعليش لو أصابك شىء من غلاسة البعض و لا تعتقدى أن عالم التدوين عالم خنيق و مزعج لأنه بيمثل جانب من الحياه بكل وقائعها و حلاوتها و مرارتها أحيانا
سيرى على بركة الله و كلنا أيد واحده يا بهجت :)

nody يقول...

الاختلاف رحمه
دى مقوله مؤمنه بيها
احنا للاسف وصلنا اننا بقينا بنكفر المختلفين معانا فى راى فى الدين
اما بقى فى السايسه او اى حاجه تاينيه
تلاقى بقى ابشع التصرفات
حاجه بجد غبيه اوىىىىىىىىىىى

الف سلامه على زوجك ان شاء الله القطه السوده الوحشه

وكبرى دماغك من اى حد ممكن يهاجمك
المهم انك تكونى مقنتعه بنفسك
والاهم تكونى راضيه با الى انتى بتعمليه
بس خلاص

ساره يقول...

يعني حتى على دعاء ماحنا قادرين نتفق عليه
يالله لحد فين وصلنا فعلا قلوبنا شتى... انا قريت تعليقات البوست تبع الدعاء يوم الجمعه
وستغربت كثير من الشخص اللي هاجمك
كل واحد حر فى ابداء رائيه عشان كذا كل واحد فاتح له مدونه يكتب فيها اللى يبيه.. هذه مسحتنا من الحريه

مش بس مدونتك اللي شفت فيها فرض رائي والله كذا مدونه فيها سب وشتم وقله ادب....

عيب علينا والله
ياريت يكون عندنا ثقافه احترام الرائي الاخر
مش شرط اقتنع .... لكن نقدر ننقد بأحترام من غير مانجرح بعض او نقلل من احترمنا لانفسنا
الحمد لله انا كنت معاك فى الصلاه الساعه 3 فجر الجمعه
الله يستجيب لنا امين

والف سلامه على زوجك والله يقومه بالسلامه

كيــــــــــــارا يقول...

الدنيا دواره والشتيمه بتلف تلف وترجع ل.....

ربنا يشفي رضا ياااااارب

اهو عشان يعرف قلبك عليه وهو مصمصم فاهمني طبعا :)

صبرني يارب يقول...

che

شوف يا اخي الفاضل هو الحاله مستعصيه بس الامل فى ربنا كبيييير

هانعمل ايه يعنى لنا الله

وصبرني يارب هههههههههههه

نورتنا يا فندم

صبرني يارب يقول...

بنت الغربه

يا حبيبتى الف حمد الله على السلام ويارب تكون اجازه سعيده

وأنا مش زعلانه والله عادي انا يا بنتى خدت على كده يوووووووووه

انا بس زعلت انه شتم الى ردوا عندي كمان قلة ادب يعنى

هما الى مش واخدين على قلة الادب دي

اما انا زي ماتقولي عارفه الغباوات دي مرت عليا

وان شاء الله تعالى انا هافضل زي ما انا وادعو ا لله دايما انى اكون علىالحق ولو كنت على الباطل ينورني بطريق الحق

صبرني يارب يقول...

عمرو

لا لا انا عارفه ان الغباوه مش حكر على العالم العربي هههههههههههههههههههه

صدقنى هما عندهم ناس متعصبين واغبيا اكتر مننا بكتير

وكمان مش زعلانه والله انا تقدر تقول انى مجاهده فى مجال النقاش والراي من الطراز الاول ههههههههههههههههههههه

شوفت كتير وعدى عليا من صنوف الهبل ياما

ونورت يا استاذنا

صبرني يارب يقول...

نودي

طبعا الاختلاف رحمه وحكمه من ربنا سبحانه وتعالى

والقصه السوده بلاش احسن تعدينا تاني هههههههههههههههه

الله يسلمك يا جميل ومنوره

والحمد لله انا ربنا راضينى ومقتنعه ا وي بفكري ونفسي وباحترم كذلك باقي الناس وافكارهم

صبرني يارب يقول...

كيارا

والله يا كوكي عادي ا دينا بناخد على حسهم حسنات

فاهمك يا جميل لا خلاص بقى خلصت الحدوته دي ده كان دلع ما انتى عارفه ههههههههههههههههه

صبرني يارب يقول...

ساره

يا حبيبتى تقولي لميييييين

حقيقي انا قلت كده حتى الدعاء ماعارفين نتفق على معاد فيه يا خيبتنا القويه

وشكرا لكى يا جميل الف شكر على تشريفك ليا هنا وعلى تلبية الدعوه وربنا يتقبلنا يارب

أنا حر يقول...

احلى كلام اتقال
احنا معندناش اي نوع من انواع الثقافة اصلا ولا نعرف يعني ايه اختلاف في الرأي من الاساس بنعرف نتخانق ونشتم بعض بس
ولا يهمك منهم انت صح
تحياتي

صبرني يارب يقول...

انا حر

الله يخليك يارب ونورتنا والله

ربنا يطمن قبلك يا اخويا هههههههههههههههههه

Anonymous يقول...

السلام عليكم

يا جماعة بشريات نصر اخواننا المقاومين في غزة ... الله اكبر ما شاء الله عليهم

مقتل 9 صهاينة باعتراف اليهوود والمقاومين اللي في أرض الحدث بيقولو انهم أكتر من كده بكتير و اصابة على الأقل 30 وفي هناك أسرى كمان ...

الناس كلها باتت تدعي للمقاومة بالليل بعد بدء العمليات البرية والحمدلله مفيش شهداء من المقاومة بس العدو بدأت خسائره تبان

اخواتنا فلسطين بيقولولنا مش عايزين مننا غير الدعاء المستمر و صلاة الحاجه وهما معاهم ربنا هينصرهم ان شاء الله ..

كبروا يا جماعه

الله أكبر الله أكبر الله أكبر

لمتابعة الأخبار العاجلة من فلسطين ألو بأول:http://www.paldfmedia.net/news.htm

http://www.paldf.net/forum/forumdisplay.php?f=27

أختكم

فشكووول يقول...

فعلا يا سيدتى .. الامام مالك رضى الله عنه وباقى الائمة كانوا علماء اجلاء وكل فى رأيه الى رسول الله ملتمس .. لكن احنا اليومين دول اصبحنا جدليين اكثر من اى وقت مضى نجادل فى الباطل ونجادل فى الحق ..من اراد ان يصلى وراء اكل لحم الجمل فليصلى على بعض المذاهب ومن اراد الا يصلى فلا يصلى على رأى بعض المذاهب ايضا .. اذا ما المشكله من اراد فله ومن لم يرد فله .. هو فيه ايه
وبعدين
يا سلااااام يا صبرنى يا رب
انا عملت لك ايه؟ دا احنا حبايب خالص يعنى
الله يخليك سيبك من ام اسامه ولا تاخدى تليفونا ولا حاجه اصل ايديها تقيله شويه وانا مش حملها .. اديكى ربع جنيه وتكفى على الخبر ماجور
تحياتى

صبرني يارب يقول...

اختنا

ربنا ينصرهم يارب وينصر المسلمين فى كل مكان

ويزلزل الارض تحت اقدام اعدائهم امين يارب

صبرني يارب يقول...

فشكووووول

ههههههههههههههههههههه

تقيله اوي ؟؟؟

طب خلاص زي بعضه المره عشان خاطرك بس هههههههههههه

نورت والله يا استاذنا

اصحى يا مصر : اسلام جاويش (ديو) يقول...

اختلاف وجهات النظر لايفسد عموماً فى الود قضية
الرجاء مراجعة الموضوع تانى

بجد تسلمى ايدك

صبرني يارب يقول...

ديو

تسلم وتعيش يارب

اراجعه حاضر ما تقولي انتى وخلاص هو فيه

نورت وانت فين من زمان

قعدت ادور على مدونتك فى وسط المولد الى عندي مره عشان اسأل عليك ما عرفتش اوصلها

Anonymous يقول...

السلام عليكم

يا جماااااااعه الدعااااء الدعاااء الدعاء ....

الأخبار من فلسطين بتقول ان محمد دحلان كان في مصر واتقابل مع مبارك وبيتعاونوا هما الاتنين عاوزين يحاصروا المقاومة من بره هيدخلوا قوة تابعة للعملاء عن طريق العريش ومعبر رفح ...

أختكم
ياجماعه ادعوا على الظالم ..
هدف مبارك القضاء على حماس أيا كانت النتائج لانه خايف من الحركة الاسلامية في مصر لو حماس انتصرت ... يا جماعه ده مش هامه مين يموت ومين يعيش ...

يا جماعه اخواننا بيقاوموا اليهود هناك وفي ناس بيفكروا بس ان المقاومين فيهم حماس ولازم القضاء عليهم و بيتعاون معاهم خونة من فلسطين هدفهم السلطة ...

يا جماعه اخواننا بيناشدونا الدعاء ليهم ربنا يحفظهم من العملاء ...

يا جماعه ادعوا ان ربنا مايخدناش بذنبهم .. يا جماعه تبرأوا لله في دعائكم من أي ظلم نتجر ليه واحنا لا بنفهم في السياسة ولا غيره بس حاكمنا عمل كده واحنا عاجزين نعمل لاخواتنا حاجه غير الدعاء ...

بس طالما ن مفيش في ايدينا دلوقتي غير الدعاء يبقى لااااااااااازم ندعي ..

لو تقدروا نوحد الدعاء و نصلي قيام و صلاة الحاجه ان ربنا يحمي المقاومين من اليهود والعملاء و ينصرهم ياااااااااارب!

صبرني يارب يقول...

اختنا احنا بندعي

بس بليز بلاش تحشري الاخوان فى الموضوع عشان الاسلوب ده بيضايقنى

وبما ان دي مدونتي من حقى اقول على الى بيضاقنى

مش كل مصيبه فى العالم مستهدفه الاخوان الى بقوا للاسف اقل من ان حد يستهدفهم

Anonymous يقول...

انا قلت كلمة الاخوان في اي كلمة من كلامي؟؟؟ ... هي فين ديه؟؟؟


الا لو انتي مبتعتبريش اللي بيموتوا هناك دلوقتي دول اخوانك ... انتي حرة !

كلام عجيب والله!!

انا بتكلم على اخواتناهناك يا أستاذه .. ياريت متشخصنيش كل حاجه لو سمحتي ومتهيألي ان كلامي كان واضح لما قلت انا ماليش بلعبة السياسة ...
انا بقول اخواتنا في غزة بيطالبونا بالدعاء ..!!!

حاجة غريبه والله

Anonymous يقول...

معلش انا اتنرفزت لانك سبتي الكلام كله وركزتي على معنى اخدتيه من كلامي انا مقصدتهوش ...

عشان مندخلش في حووارات جانبية واخد ورد انا مش هرد تاني يا ستي

سلامو عليكم

أختك

Anonymous يقول...

تيتة يا تيتة يا مصدعاني يالا نطلع علي غزة سوا وناخد 10 / 12 واحدة من بتوع بولاق هيدمروا الجيش الاسرائيلي وما يجيبها الا حريمها والحداد علي كل من كتب في بطاقته ذكر ولا عزاء للمسافرون وسمعني سلام خلي السلاح عاجز عاجز

صبرني يارب يقول...

يا اختنا

يا ست الكل انا مش فهمت غلط
انتى الي ما فهمتيش كلامي

ماهو الاخوان يا ست الكل ماشين فى الدنيا كلها يقولوا ا لحكومه مش عايزه تفتح المعبر عشان خايفين حماس تتحد مع الاخوان ماهو حماس امتداد للاخوان

وطبعا ده كلام تههيس وتهبيل واي كلام فارغ

بسسسسسسسسسس ده اعتراضي

والله اعلم يا ستى بما فى القلوب ان كنت بادعي لاخوتنا ولا لااااااااا

وبالنسبه للتعليق برررررضه هاقولك براحتك

ولكن تشرفي وقت ما تحبي وعلى راسنا كمان يا ستى

صبرني يارب يقول...

شااااااااااادو

حفيدى العزيز ههههههههههههههههههه

زمان كل الناس تقرا تقول مين تيته ومين حفيدها دول

مش مهم خليهم مش فاهمين هههههههههههههه

نورت يا باشا وطبعا الحريم اهم حاجه فى الدنيا دي يا ابنى هههههههههههههه