الخميس، 18 ديسمبر 2008

beans seed........بذرة فول


رغي رغي رغي مش معقول كده يا جماعه صدعتوني



ازيكم يا جماعة الخير منورين القاعده



هاحكيلكم النهارده مشهد من حياتي حصل امبارح بس اولا مشهد مأثر فيا اوي ولعب فى نغاشيش افكاري جامد وكمان ضحكت لما فككت من بعضي وقعدوا يربطوا فيا لتاني يوم .



امبارح وانا قاعده انا ورضا بنشرب الشاي بعد الغدا وهربنا كده بعيد عشان الشاي ما يدلقش علينا المهم . بعد حديث ممتع على الاخر عن الشغل ومشاكله الرخمه . دار الحديث الآتي :



رضا : ما تيجى يا بت نفض الليله ونروح ناخد ارض ونزرعها ونعيش فى الشمس والهوا ولا تجاره ولا سوق ولا وجع قلب البنى ادمين



انا :اووووك ما انت عارف ده اقتراحي من زمان . ناخد فدانين كده ونبني بيت حلو ونزرع وناكل مما صنعت ايدينا .

بس ياريت ينفع . ومدارس العيال والتزامات الحياه يعنى احنا هناكل بس مافيش مصاريف تانيه محتاجه فلوس.



رضا : وليه اثنين بقى ما احنا نخليهم خمسه ويبقى هو ده الشغل والبيت والاكل وكله على كله .ومدارس العيال يا ستى انا اجيبهم المنصوره كل يوم وارجعهم .ما انا هابقى فاضي شويه بقى



أنا :فااااااااالح هاتصحى الفجر كل يوم ؟؟؟ وبعدين لا انا ولا انت عمرنا كنا فلاحين ولا نعرف نزرع ولا نربي مواشي ولا الكلام ده .

ماهو لو كان فى كده اثنين شباب صغنن واحد ومراته مثلا نبنيلهم اوضتين فى الارض ويعيشوا هو يزرع وهى تربي الحيوانات كلها عشان انا ماليش فى الليله دي



(ملحوظه هامه انا مش بامسك اي حاجه صاحيه بايدى اطلااااااقا ولا فرخه ولا حمامه ولا حمار ولا اي حااااااجه جسمي بيقشعر وباصوت واطلع اجري . ورضا كان واحنا مخطوبين يقولي مش هاتجوزك الا لما تجيبى فرخه قدامي وتمسكيها وتدبحيها لكن هيهاااااااات . نزللللللللللت المره دي عشان احنا اتجوزنا فى الامارات مافيش هنا ك فراخ )



رضا: يا سلام يا اختي ما تتعلمي الله ده يبقى شكلك حلو وانتى بتحلبي الجموسه هههههههههههههههههههه



أنا : يا سلام يا اخويا لا طبعا كلا البت هههههههههههههههه انا احلب جموسه انا ناقصه وجع قلب مش لما اربي العيال ابقى اربي مواشي ودواجن .



رضا : امال هاتحلمي ببلاش انتى ولا ايه . ده بافكر اوديكى مكان مافيش فيه كهربا ومايه بقى عشان نعيش على الطبيعه القديمه .



أنا : نعم يا ضنايااااا . لا كهربا ومايه وتليفون ونت يا معلمي يا مش لاعبه ههههههههههههههههههه



رضا : نت كمان قشطه ماااااااااشي نتصرف فيها دي عادي



مريم دخلت علينا بقى



رضا : تعالي ناخد راي مريم ايه رايك يا مريم ؟؟



مريم : فى ايه يا بابا ؟



رضا : ايه رايك اننا نسيب هنا ونروح ناخد ارض مزرعه يعنى ونبنى فيها بيت ونعيش فيها ونربي حاجات بقى هاتي كل الحيوانات الى انتى عايزاها .



مريم : يا سلام طب والمدرسه وتيته وجدو هانسيبهم ؟؟؟



رضا : يا ستى المدرسه هاجيبك انا كل يوم وتيته وجدو لو شافوا هناك هايجوا يقعدوا معانا وبعدين احنا هانيجى نزورهم بقى عادي .



مريم : مش عارفه بقى يا بابا. بس كده هايقولوا علينا فلاحين بقى ونبقى فلاحين ؟؟؟



أنا : ايه يا مريم مالهم الفلاحين وبعدين احنا نعمل الصح من غير ما نفكر الناس هاتقول ايه المهم ا حنا عايزين ايه والى احنا عايزينه ده حرام ولا حلال صح ولا غلط .



رضا : وبعدين هايبقى فى جنب الارض ترعه كده زي الى كنا بنصطاد فيها تقعدي فى اي وقت تصطادي .



مريم : بابا بقى ايه انت كده هاتخلينى اوافق . بس هانبقى نشتري منين الحاجات



رضا : ماهو فى هناك محلات يا بنتى امال الناس الى هناك عايشين ازاي ؟؟



أنا : ايه ده بجد فى محلات ؟؟



رضا: اه الحته الى انا باحكيلك عليها فى زيان فيها محلات وجمبها قرية شباب الخريجين وهى اساسا بلد ارياف يعنى فيها محلات على اد حالها كده .



أنا باهزر بقى : طب فى هنا مول حلو كده يعنى ولا ايه ؟؟؟ هههههههههههههههههههههههههه



مريم : طب فى هناك مطاعم يا بابا ؟؟؟



رضا : يا خراااااااااااابي مطاعم ايه يا بنتى ابقى تعالى المنصوره فيها مطاعم ماهو البلد دي نص ساعه من المنصوره يعنى مش مشكله .



أنا : اه يا مريم وتبقي تزرعي هناك بقى فى الارض على طول مش فى علبة حلاوه هههههههههههههههههههههه



(التجربه بتاعة القطن بقى عاملاها الايام دي واخدتها فى المدرسه الى صورتها فوق دي )



مريم وهى مندمجه: اه والله يا ماما احنا نجيب beans seed ونحطها فى الارض .



رضا : نعمممممممممم بين ايه يا اختي ؟؟؟؟ بين سيد ده ايه يا حلاوه . بنقولك جموسه ونحلبها تقوليلى بين سيد ؟؟؟؟؟!!!!



انا طبعا هاموت من الضحك خلاص باطالع فى الروح: ههههههههههههههههههههههههههه



مريم باستغراب : ايه فى ايه يا بابا ؟؟!! مش هى اسمها كده يا ماما ؟؟؟



انا وانا فطسانه : اه يا حبيبتى هى كده فعلا احنا بس بنهزر ههههههههههههههههه بس بالعربي اسمها بذرة فول



مريم : خلاص يا بابا مزرعه ماشي بس حيوانات لا انا باخاف منهم .



رضا : ما ينفعش يا مريم الحيوانات بيشتغلوا فى الغيط كمان .



مريم : هو يعنى ايه غيط يا بابا ؟؟؟!!!!



رضا : يا خراااااااااااابي اقولها ايه دي هههههههههههههههههههههههههه



***************************************************



ايه رايكم فى الحلم ؟؟ على فكره نفسي فيه هاموت عليه بس عشان نعمل كده لازم نصفي الشغل هنا بتاع رضا خاااااالص ونروح هناك ومش عارفه هايعجبنا ولا لا وهانقدر نعيش هناك ولا لا مش عارفه محتاره على فكره بجد



ولو ان انا عارفه ان رضا لما بيتخنق من الشغل بس بيقول كده وبعد كده بيرجع فى كلامه هيييييييييييييه اهي احلام يلا بقى لو ما حققتهاش فى الدنيا ابقى احققها فىالاخره



او نبقى نروح الويك اند عند عمرو بقى وخلاص فى وادي الملوك


هناك 45 تعليقًا:

mony يقول...

هههههههههههههههههه


تامر كان بيقول نفس الكلام و الله بيقول ناخد ارض في السودان
و يوديني ومعايا جموستين و بقرتين
و يبقي يجي ياخد الانتاج و يطل عليا

و لما بقوله لا يا خويا ماليش فيه يقولي دانا هجيبلك عشة علي النيل اللي في السودان


ايه رأيك في الاغراء بأه

my dream يقول...

ابويا لو سمع الكلام بتاعك ده هيقولك ايوه كده هي خي الناس الي بتفكر صح
اما سي الاستاذ احمد جووووووززي هيقولك ايه ؟ !! واسيب القاهره قاهرة المعز بدين الله الفاطمي
هههههههههههههههههه تقوليش هيسيب الجنه
انا بجد نفسي في حاجه زي كده حلم برضه بس انا بحلم بجزيره فاضيه معلهاش غيري انا والناس الي بحبهم جوزي وابويا واصحابي الي بجد وربنا يرزقني عليها بأولاد مش مشكله بقى لو جم كتير ماهي الدنيا واسعه اعلمهم انا ومش هيبقى في مشاكل عارفه حياة وردي كده بمبي يعني
احلااااااااااااااااااام هيييييييه دونيا
مع حبي
مروه

عاشقه وغلبانه يقول...

لو علي قد الحلم يبقي فل اوي وتغمضي عنيكي وتسرحي
اما لو تنفيذ فصعب جدا تسيبي المدينه وتعيشي في قريه
اختلاف تام بينهم
وخصوصا الاولاد مش يقدرا يعيشوا فيه
بس احلمي هو يعني بفلوس
وشويه ضح فكوا ضغط الحياه شويه
ربنا يكرمك

كيــــــــــــارا يقول...

عارف انه حلم جميل اوي ويمكن اكون بحلمه من زمان خاصه لما رحت بلد واحده صاحبه ماما اد ايه الطبيعه جميله

لكن صعب تتعاملي مع حيوانات وتزرعي وتعملي حاجات مش اتعلمتيها من زمان

انا زيك جباااانه موت من الحيوانات

احلمي ياحبيبتي

جنّي يقول...

والله فكرة جميلة جدا

بيئة نضيفة وهواء نقي وتاكلو من غير مبيدات مسرطنة ولا قمح من بتاع علف الحيوانات ..

بس ها تزرعوا الخمس فدادين ايه ..
فلفل وشطيطه ؟!!

ربنا يوفقكم

تحيتي

حاسوباتيه يقول...

هههههههههههههه فكره حلوه مره قالي خطيبي كده بس كان هزار برضو زيكم كده لاننا مش هنعرف نتاقلم

ahmed_k يقول...

ههههههههههه
هو في عندكم كمان وادي ملوك
بس والله فكره
بس متنسيش لما تروحي تبعتيلنا
فطرتين مشلتت من حداكم ههههههه
أصل أرض وجاموس وترعه من غير فطير مشلتت متنفعش

بنت الغربة يقول...

حبيبتى ياصبرنى انا حلمى زى حلمك بالضبط ونفسى قوى فيه - بس جوزى رافض بتاتا البته - ويقولى اعمل ايه هناك واعيش ازاى وسط الحشرات والحيوانات اللى هناك - بس مريم بنتك زى العسل - ربنا يخليهالك - صعب قوى تغيرى حياة الاولاد من عيشهم فى المنصورة وتنقليهم بلد ارياف
دول لما بيغيروا المدرسه بتبقى مشكله كبيرة
امال لما يغيروا البلد هيعملوا ايه
سلامى لولادك وهاتى مريم تلعب مع بنتى دول هينسجموا قوى مع بعض
تحياتى ليك ياقمر - داليا -

صبرني يارب يقول...

موني
لا كده تامر كان بيبعتك بقى مش بيحلم هههههههههههههههههه

نورتي يا جميل

صبرني يارب يقول...

my dream

والله يا مروه انا بقى بابا ممكن يقول زي باباكي برضه بس تنفيذ ماتلاقيش

وحلمك جميل اوي بس حضرتك اول ما نادي فى البرلمان بجزيره لكل مواطن هانحققه ليكى على طووووووووول

نورتي يا جميل

صبرني يارب يقول...

عاشقه وغلبانه

على فكره انا ما عنديش مشكله بس المشكله حكاية تصفية شغل رضا هنا دي كده مش هايبقى فى خط رجعه وانا ما اضمنش بصراحه انى استريح هناك
خصوصا اني متأكده ان رضا هايرمينى فى وسط الصحرا وهايبقى برررررررضه مش موجود طول النهار عاااااادي

صبرني يارب يقول...

مولان

ماهو مش كل الى بيربوا الحيوانات بيحلبوها بنفسهم

بس المشكله انى احنا بنشوف الامرين عشان نلاقي حد يشتغل فى المحل الى هو بياع يعنى مش محتاج مهارات

طب هايحصلنا ايه بقى لو كنا عايزين حد فلاح بمواصفات خاصه ؟

صبرني يارب يقول...

جني

والله انا كمان فكرت زيك كده وقلت لرضا انا هاعمل مزرعة منتجات عضويه واعمل منفذ بيع كمان

وايووووه فضلت ماشيه اقوله فدادين خمسه خمس فداااااااديييييييييين ازرعها فلفل وشطيطه
ههههههههههههههههههههههه
نورت

صبرني يارب يقول...

حاسوباتيه

طيب بس انتم لسه هاتبدأوا يعنى ممكن تكملوا

اما انا فخايفه من فكرة اننا لتاني مره بعد الجواز بنغير حياتنا لاننا حاليا بعد التغير بخمس سنين

فعارفه ما لحقناش نستقر اساسا

صبرني يارب يقول...

استاذ احمد

عندنا فين ؟؟؟

هى وادي الملوك واحده انا باتكلم على ارض عمرو الى هو بيحكي عنها
عمر حبشتكنات فلسفيه

نورت يا استاذنا

صبرني يارب يقول...

اها والفطير ماااااشي بس جربت عمايله طلع صعب اوي مع انى كنت عماله فطيره كده صغيره يعنى قطرها ما يجيش عشرين سم
هههههههههههههههه

بس بنشتري يعنى وفلاحي والله اي خدمه امر بس

صبرني يارب يقول...

بنت الغربه

اها برضه مريم قالتلى على موضوع الحشرات ده

هههههههههههههه
وبعدين انتى عايزه الباشا يقعد مع الفلاحين

كلااا البت

وفعلا هو التغيير صعب بس مش مستحيل

وياريت ان شاء الله لما تنزلي مصر نتقابل
تحياتي ليكى

kochia يقول...

فكرة جميلة جدا
بس عاوزة شجاعة برده جامدة جدا

تقدروا عليها ؟؟

نهر الحب يقول...

هههههه
حلم حلو بس اللى يقدر يخرجة من مجرد الاحلام الى واقع التنفيذ عارفة محتاج لارادة قوية عشان تغيرى اسلوب حياتك وتتحملى دا حتى تتعودى وتتعلمى حاجات جديدة عليكى لاول مرة

صبرني يارب يقول...

كوشيا

اها فعلا

لسه مش عارفه هانقدر ولا لا لكن اوعدك لو ربنا كرمنا وقدرت فى يوم انى اعمل كده من غير ما نصفي الشغل كله هاعمل كده واروح اقعد هناك لوحدي وارمي العيال دي بقى هههههههههههههه

يكونوا كبروا يعنى

لا لا مش هاكون عجزت اوي ههههههههههههه

صبرني يارب يقول...

نهر الحب

انا باحب اتعلم اي حاجه وكل حاجه وفى اي وقت على الاقل من باب العلم بالشيء

وياريت نقدر ننفذه

Anonymous يقول...

مش عارف هاتعرفينى ولا لا لكن هتكلم معاكى انا دايما على مدونة بنتى الغاليه اوووى يا ام خالد حتى الميل بطلت افتحه بعرف اخبارها من المدونه لقيت عندها الرابط ده توقعته انه بتاعك .
انا معرفش فدان الارض عندكم بكام لكن فى اسيوط وصل 240 الف ده الارض الزراعيه اما الجنايين دى موال تانى قيرا ارض الرومان 25 الف .
المهم احلمواا هيه حلم جميل قوليله فى راجل صعيدى وكبير بيقولك يا رضا خير الارض للى يزرعها بايده من وهو 5 سنين بس اجمل حاجه عجبتنى تعليقات مريم حرام عليكم توهتوا البنت .
هتلاقينى متابع وهاعلق خلاص للاسف اللى كنت بدردش معاهم كلهم معرفش حاجه عنهم .
ياااااارب تبقوا دايما فى سعاده وهنا واحلام جميله كده على طوووول شدى حيلك وكبرىمريم عندى لها عريس صعيدى هايشيلها فى عنيه .
مش هاحيرك انا راجل صعيدى عموو مدحت

صبرني يارب يقول...

عمو مدحت

يا لهوي ايه النور ده ؟؟؟؟؟؟؟؟

انا فعلا ما عدتش باشوفك ا وف لاين خالص

بس عشان انا مش بادخل اصلا الاميل كتير وزحمه العيد كنت مبطله خالص نت قلت انا الى غايبه

يارب يكون المانع خير

وانا يشرفني ان حضرتك تنورنا دايما هنا

وبالنسبه للارض ايوه انا عارفه ان الارض فى الصعيد غاليه كده لان اساسا ما حدش بيبيع ارضه
الارض عرض يا بوووووي
هههههههههههههههه

لكن الارض الى احنا بنتكلم عنها الفدان فيها يعمله بتاع 70 الف كده

فدان بيزرع بقاله بتاع عشر سنين مش يعنى لسه اصفر

ارض استصلاح منطقه اسمها زيان عندنا وسط الدلتا

والفدان الى لسه ما استصلحش يعمله بتاع 40 الف

وانا معاك الارض عايزه حد بيفهم فيها

وتحياتي لحضرتك ونورت

:: Salma Emad :: يقول...

فكره جميله اووووووي ..بيني و بينك يابنتي علي طول بحلم بيها
و نفسي احققها

بس الصعوبه في ان الواحد اللي مش متعود علي كده علي الزراعه و تربيه الحيوانات صعب اووي
انه يعمل كده

بس اهم حاجه لازم تبقي هناك زي ماقلتي
و اهم حاجه بقي النت
هههههههههه ماينفعش من غيره خالص

و اجمل حاجه في البوست ..مريم العسل
سلميلي عليها
ربنا يخليهالكوا يارب

القلم السكندري يقول...

والله الظاهر ان الحلم ده عدوي

الانسان كتير بيبقي محتاج مكان بعيد عن دوشة الماديات وصخب الناس يسترخي فيه باعصابه


عموما جربو انتو بقي وابقو قولولنا النتيجة


تحياتي

سيف الدين اليزل يقول...

الله تعرفي يا اختي ان ده حلم جميل قوي بس يا خسارة احلي حاجه في الحلم ده انك معملتيش حساب اخوكي علشان عارفه ان هوة مش ممكن يحلم غير ببكرة بس لكن بعد بكرة مش موجود في حسباتو يارب تنولي كل الا في بالك وتشوفي كابتن مصر احسن طيار فالدنيا زي خالو والسلام امانه والسلام علي من اتبع الهدي

صبرني يارب يقول...

أم يوسف

انا عشان كده باقولك عايزين حد يكون بيعرف فى المواضيع دي يكون معانا بس مافيش مانع انى اعرف برضه ولو من باب العلم
تحياتي وهاسلملك على مريم
هو يوسف عنده كام سنه ؟؟؟ هههههههههههه
يعنى ما دام عاجباكي مريم

صبرني يارب يقول...

القلم السكندري

والله انا عشت فى الهدوء وعشت فى الصخب وبعد ما جربت الاثنين اختار الهدوء لانك ممكن تعمل صخب لحياتك وتغير ليوم

انما مش ممكن تعمل الهدوء لازم يبقى موجود

نورتنا ولو جربنا اكيد هاتعرفوا

صبرني يارب يقول...

سييييييييييييييف

اخس على كده مش عملت حسابك ايه بقى

امال يعنى البط الى هانربيه هناك يروح فين ؟؟؟

وما تقولش الكلام ده تااااااني

ومش عايزاه يطلع طيار يا اخويا انت عارف انى باتهم الطياره وأجهزة الطيران اتهام مباشر فى الى حصلك

وكفايه عليا كده طيارين ههههههههههههههههههه

ربنا ينجيك يارب ودايما منورني

عمرو يقول...

صباح الخير يا أم خالد
أزيك و أزاى الأستاذ رضا و العيال ؟ عسى الله كلكم بخير اٍن شاء الله
أولا يا ست ده أنتم تشرفونا و الله و لو ما شالتكوش الأرض نشيلكم على روسنا من فوق و يا ألف أهلا و سهلا و يا مرحبا بيكم فى أى وقت و ربنا ده أحنا تحصل لنا ألف بركه
الأرض يا ست أم خالد هى العزوه بجد يعنى لا قرايب و لا مال سايل و لا حاجه تساوى عزوة الأرض مهمن كانت
و اٍحنا كملاك أراضى و الملك لله أولا أولا و أخيرا ما بنحسبش فلان ساب كام لعياله بعج عمر طويل لكن بنقول ساب قد أيه طين لعياله لأن الأرض هى السند وقت الشده لكن المال مصيره للزوال
الأستاذ رضا صح و عنده حق ميه فى الميه فى فكرة المزرعه و موضوع المدارس ده مابقاش مشكله لأن المدارس أنتشرت فى كل مصر يعنى ده حتى أقرب مدرسه لوادى الملوك اللى بنقول عليها صحرا مثلا على بعد نص ساعه بالسياره يعنى خطوتين و كمان 6 أكتوبر بمحلاتها و مولاتها و مطتعمها و اللى فيها مما أدراكى
الحياه فى مزرعه يا أم خالد بتغنيكى عن الصرف و المصاريف اللى عمال على بطال ليل و نهار فى المدينه يعنى كفايه حتمدى اٍيدك كده تاخدى خيرها اللى مش حيكلفك حاجه من خضار لفاكهه لعسل نحل مش ملعوب فيه للبن طازه لشوية أرانب على حبة طيور على خروفين على كام جدى و أهو كله بيرعى فى خير المزرعه و بياكلوا من فضلة البيت
كده أحسن و لا العيشه الخنقه الزنقه فى المدن الزحمه الغاليه اللى السلامو عليكو فيها بفلوس ؟؟
يا سلام على الهوا النضيف فى المزارع و السما الصافيه و القلوب المطمئنه من غير هلع و لا خوف من بكره اٍن شاء الله و الحياه الهاديه الرائعه اللى كلها خير و فلوس و حاجات كده ما حدش يحسها اللى عاشها
أتوكلوا على الله و أدخلوا مشروع المزرعه بقلب جامد و يا حبذا لوانت أرض اٍستصلاح كده زى اللى فى وادى الملوك و أنا و الله على ما أقول شهيد معاكم بكل خبرتى و أى اٍستشاره أو مساعده حتلاقونى اٍن شاء الله جنبكم بس أنتم أنووا و ربنا كريم

صبرني يارب يقول...

عمرو

والله ده حلمي من زمااااان اوي واساسا رضا بيقول كده عشان عارف ان ده حلمي من زمان

واحنا كنا بدأنا ندور فيه على فكره وكنا بنشوف حته ارضا فى زيان
زيان دي ارض استصلاح برضه ومناسبه اوي

بس وقتها كانت المعوقات كتير وكسارين المقاديف كتير
والشغل الى رضا فيه حالا والله ما اخترناه قد ما دفعنا اليه دفعا

قدر الله وماشاء فعل
لكن هحاول جاهده ان الحلم ده يتحقق جنب شغل رضا حتى ولو زي ما انت بتقول على اد اننا ناكل من خيرها بس

ما اكل ابن آدم قط خيرا من عمل يده

فعلااااااا دي حقيقه مافيش زي الحاجه الى انا عارفه اصلها وفصلها وكل حاجه فيها

تحياتي لك ومتشكره اوي اوي على الترحيب بالزياره وعلى عرض المساعده واكيد اكيد لو حصل وخدنا ارض هانصدعك ان شاء الله
هههههههههههههههه

تسلم يا عمرو ونورت

فشكووول يقول...

ايه رأيك بقى دا كلام كويس فدانين او ثلاثه ارض وجاموسه وبقره وحمار .. وحليب الصبح وكمان الحليب يبقى لبن رايب وقشطه وسمنه زبده بلدى فلاحى ما حصلتش .. ويا سلام لو فى الصيف فى العصارى كدا تقعدوا تشووو دره اخضر على الراكيه وكباية شاى من شاى الراكيه .. والله يا ام مريم حياه فى منتهى الجمال والطبيعيه .. وانا عندى ارض زراعيه وياريت اقدر ازرع واقلع .. ياه .. والفول الاخضر الطازه من قلب شجرة الفول والبطاطس من قلب الطين ونحشها فى الراكيه (النار) ....
نخش بقى تعليق على تعليقك
والله يا بنتى انا لقيت البت الدكتوره الشقيه سـوووول ويزبر هى اللى جابت رجلى وحفرة لى الحفره دى .. انا قلت اليومين دول اسهم جيفارا مرتفعه قلت اقول فكره صغيره للشاب عنه .. وطبعا انا ما قلتش فى حقه حاجه لانه مات وهو ثورى قبل ان ينعم بالحياه المدنيه .. يعنى زى ما بيقولوا العسكريين .. مات دفاعا عن الواجب .. وعموما حالنا ايام الثوره وحالنا قريب وحالنا الان .. ماتفرقش كتير .. طول عمرك يا رضا وانت كدا.. والله ما اقصد رضا جوزك .. ده المثل هو اللى كدا.. تحياتى

صبرني يارب يقول...

استاذنا فشكول

والله انا نفسي فى كده ورضا بيقولك كلمت القاعده انت يا باشا

وياريت اقدر احققه وعلى فكره انا باعمل رايب وجبنه قريش وزبده وسمنه وكل حاجه واتعلمتها لوحدي لاننا فى الاساس ما كانش فلاحين ولا عندنا اراضي زراعيه وكده يعنى جدتى كان عندهم بس ورث مع اخواتها الى هما ولاد العمده لا بيفلحوا ولا بتاع

ما علينا

المهم بالنسبه لجيفارا انا مش معترضه على الكلام عنه ولا عن عبد الناصر ادوارهم لا تغفل وحضرتك فعلا اتكلمت عنهم كويس بصرف النظر عن اخطائهم الا ان ادوارهم لا تغفل

والمثل بتاع حضرتك اول مره اسمعه بس حلو هههههههههههههه

يعنى فى واحد هايتهري منه

Anonymous يقول...

تيتة يا تيتة يا تية ليكي وحشة يا تيتة ايه الرغي ده كله ده انتي وجدو رضا فاضييت بقا طبعاً عرقتي مين حفيدك الغتت اللي ممكين يقو الكلام ده علي العموم صدقيني هتبقي فعلاً تحفة وانتي بتحلبي البقرة وتطلعي بالصنية الفلاحي الصبح علي الغيط شكلك هيبقي تحفة يا تيتة يلا بقا كفاية رغي السلامو عليكم

صبرني يارب يقول...

شااااااااادو

والله العظيم انتم كمان وحشني بس معلش ما عدتش بالحق اجي الشات

انت شايف فضلة خيرك 3 مدونات و3 عيال يعنى كتر خير الدنيا انى لسه عايشه

بس والله فرحت بوجودك ربنا يكرمك يارب

وماش ماشي احلب الجموسه اه

ياااااريت كنت اعرف ما كنتش اقول لا

والصنيه برضه ووووووولا يهمنى ههههههههههههههههه

نورت يا شادو ربنا يكرمك يارب

zeroon يقول...

يا سلام احلى فكرة
بس هو فعلا حكاية النت دي هيا المشكله

صبرني يارب يقول...

زيرون

لا ولا مشكله ولا حاجه النت دلوقتي مافيش اسهل منه هانتصرف فيها يعنى


المهم نروح احنا هناك

نووووووووورت

حنين القلب يقول...

يا حبيبه قلبى
انتى مش تستحملى العيشه هناك
برضه احنا اخدنا على المدن صعب جدا نعيش فى قريه وزراعه وفلاحه
وبعدين مريم دمغها جامده ووافقت اهه

امانه عليكى يا شيخه لو روحتى ابعتى ليه 5 ك لبن
و4 ك سمنه فلاحى
ولا اقولك هاتى جاموسه من عندك وانا هعمل كله لوحدى
ماااااااااشى
وربنا انتى عسل

صبرني يارب يقول...

حنين يا حبيبتى والله انا برضه خايفه من كده

وعنيه من غير ما نروح هناك نجيبلك الحليب والسمنه عنيه يا قمر

والجموسه لو حبيتى

mostafa rayan يقول...

سلام عليكم
ازيك يا صبرني
متهيالي انه حلم
اللي اخد على عيشةالمدينة وانه يركب عربيةويروح مول ويقعد قدام الكمبيوتر والنت
ولما يجوع يطلب هوم دليفري
ويتفرج على الدش والفضائيات
صعب انه يتخلي عن كل دة ممكن يعيش الحياةالتانية يومين تلاتة على سبيل التجربة لكن تبقي دي حياته مش هيقدر
دة رأيي بصراحة وارجو انك تتقبليه
لك كل التحيةودمت بكل لخير

محمد يقول...

فى أنتظار زياره
محمد
مشاعر وأفكار
شوية كلام

صبرني يارب يقول...

استاذ محمد
ياخبر ده احنا الى نتمنى نزورك حالا هاكون عندك ان شاء الله

صبرني يارب يقول...

مصطفى ريان

طبعاااااا مقدره رايك جدا لانه صح

بس هو فى حاجه بسيطه احنا صحيح عايشين فى المدينه لكن احنا حياتنا مش كده

انا مش من هواة اللف فى المولات انا بانزل فى الضروره القصوى لم يكون البيت والولاد محتاجين حاجه

ولما بنجوع باقوم اعمل اكل فى البيت مش بتوع دليفري خااااااالص ومش بنحبه اوي ولا احنا ولاالعيال ما يمنعش اننا احيانا بناكل بره كتغيير لكن نادرا

انا عشت حياه مدنيه فى ظروف مختلفه وما عجبتنيش اوي

يظل البحر والارض اوالخضره هما حلم حياتي

تحياتي لك وثق تماما عمري ما ازعل من راي حد

lames يقول...

إذيك يا قمر طبعا عارفانى
بالنسبة للحلم الجميل دة اعتقد انة من الصعب تحقيقة فى الوقت الحاضر
كان ممكن ينفع زمان

مستنياكى عندى .. البدايات كانت صعبة المدونة الاولى اتمسحت بالغلط

تحياتى

صبرني يارب يقول...

لميس

اها عرفتك طيب شوفي احسن يكون الاستاذ خالد هو مسحها غييييره بقى تقولي ايه ههههههههههههه

والحلم ايه زمان ده

قصدك اننا عجزنا ؟؟؟ كلاااااا البت لسه فينا نغير هههههههههههههههههه

نورتي يا جميل وزورتك فعلا ورديت عليكى يجى 3 صفحات هههههههههه