السبت، 27 ديسمبر 2008

ليه نزرع فيكس لما ممكن نزرع لمون مثلا ؟؟


السلام عليكم
تكتب اليكم صبرني يارب فى نهاية ويك اند دمه تقيل والجو برد موووووووووت وانا لابسه شال سته متر فى سته متر وايشارب ملفوف كذا دور ولكلوك ومافيش فايده حاسه انى بدأت اتجمد بس بررررررضه باكتب البوست عشان تعرفوا انا باضحي فى سبيلكم اد ايه .

المهم النهارده جه على بالي يا جماعه موضوع كنت عايزه اتكلم فيه من زمان بس الاحداث متلاحقه بقالها فتره وهو اشجار الشوارع

ايوه مش اطفال الشوارع لا دول المسؤلين الله يعمر بيتهم خلاص كل واحد فيهم شايل واحد منهم على رجله وبيهشتكه . المهم انا دايما لما اسافر مع بابا طول عمري وانا صغيره بابا يفضل طول الطريق يشرحلي كل حاجه تقابلنا باله طويل اوي بابا بصراحه .

وطبعا انواع الشجر الى نقابله الى هو عارف اساميه برضه مش عارفه ليه مالهاش دعوه بتخصصه خالص . غير بقى المحاصيل الى مزروعه فى الاراضي على الجانبين حيث انى فى قلب الدلتا يعنى .

المهم بابا ربنا يديه الصحه يارب . من فتره كده اثار نقطه مهمه جدااااا .
قال باب: ليه بقوا يزرعوا شجر الفيكس ده اساسا ؟؟ طبعا انا ولا عارفه فيكس ولا بتاع
لمن لا يعرف ما هو شجر الفيكس هو الشجر المنتشر فى الشوارع
الى هو ده





المهم قلتله اشمعن يعنى يا بابا هو مزعلك ليه ؟

قالي لانه شجر عقيم . أينعم هو خضره دايمه بس يعنى ماهو فى شجر كتير خضره دايمه برضه

وخد عندك بقى اداني درس فى الشجر الى خضرته دايمه مثل ما يلي :


شجر الكافور : شجر خضره دايمه ونضيف وخشبه بيستعمل وجزوره وتديه يعنى لما تمد فى الارض تمد لتحت بشكل عمودي ما تتشعبش فى الارض وتبوظها وجامده جداااااا بيعملوها اسوار ومصدات للرياح والشجره نفسها بتستخدم فى العلاج وصناعة الادويه وزيت الكافور والكلام ده .






قالي كانوا بيزرعوها زمان على الطرق بين البلاد وجنب الترع الكبيره .بدأت تختفي للاسف


شجرة ام الشعور : او اسمها العلمي تقريبا التين البنغالي برضه دي صورتها





الشجره دي انا باحبها اوي مش عارفه ليه جماعه .


المهم هى شجره وارفة الظلال وخضرة دايمه ومش محتاجه رعايه فائقه بتعيش مع نفسها يعنى وكانوا بيزرعوها برضه على شط النيل وفروعه عشان تضلل وتمنع البخر وحاجات كده .



واسطرد بابا العزيز قائلا : ولا شجرة الجميز ياااااااااه الواحد ياما لعب تحت شجرة الجميز الى كانت جنب بيتنا واكل من عليها ووقع من عليها وقعد فى ضلها


وشجرة التووووووت الى كانت قدام بيتنا القديم ياما ماما صرخت من هدومنا المليانه بقع من التوت عشان كنا بنطلع الشجره ونحط التوت فى جيوبنا .


كل ده شجر دايم الخضره ومعمر ومثمر ومضلل ومفيد رااااااااح فين


انا بقى اضفت الى ذلك


شجرة الليمون لانى شوفتها فى ابو ظبي اي والله كده فى ابو ظبي الى كانت صحراء جرداء فى مطعم كده على شط البحر او قولوا جوه البحر وقدام المطعم كان فى حديقه مزروع فيها شجر لمون مش عايزه اقولكم على ريحة الحديقه دي جميله ازاي بسبب كام شجرة لمون وبرضه شجره دائمة الخضره ومثمره ومزهره كماااااان وزهرها ريحته تحففففه



كمان شجرة البرتقال نفففففففس الموقف تقريبا وبرضه كانوا مزروعين فى ابو ظبي فى اماكن كتير زي الشغل عند رضا مثلا وشجر فل كمان

والى طبعا منتشر فى ابو ظبي جداااااا النخل اها فين النخل عندنا ؟؟؟


فى ابو ظبي الزرع الى المفروض موجود عندنا ده فى وسط الطرق الى فى الغالب بيشلوه بعد كام شهر من زراعته عشان يوسعوا الطرق


اه هما بقى لااااااازم فيه فى النص كده نخيل ووورد وشجر حلو وهما يا عينى مستوردين التربه من باكستان وناقلينها من العين على قلبهم عشان يزرعوها يمينا ويسارا


طبعا كل ده كان ايام الشيخ زايد الله يرحمه احترم حاكم عربي شوفته لحد دلوقتي


وكان هناك القانون واضح وصريح ومنفذ بخصوص الشجر الى فى الشوارع وبأمر من الشيخ زايد ان الشجر فى الشوارع اي كانت ثمرته متاح للجميع استعمال ثماره لكن بدون الاضرار او اتلاف الشجر نفسه

احلى بلح كلته البلح الى بيستوى على نخلته والناس تطلع تاخده بايدها لانه اغلبه نخل صغير يعنى واحده زيي كده تطوله عادي ههههههههههه

اه والله بجد مش هزار


احنا بقى ولله الحمد شعبنا جعااااااان وقاعدين نصرف ملايين على شجر على راي بابا عقيم
طب ليه ما نزرعش شجر دائم الخضره وقابل للتقليم


وفى نفس ذات الوقت يكون مثمر ومفيد ؟؟؟


هااااااااااه حد يقولي انا لا بتاعة زراعه ولا ليا فيها

انا اخر عهدي بالزراعه كانت شوالي الزرع بتاعتي الى كنت مربياهم فى بلكونتنا فى بيتنا القديم على مر السنين والاخر لما جينا البيت هنا الله يسامحهم الى كانوا السبب جابو جدي اهبل كده وحطوه فوق السطح التهم مجهود السنون بتاعي كله حتى الصبار ابو شوك كله بشكوه المتوحش



المهم بلاش لك فاضي حد بقى يفتينا هل انا صح فى الكلام ده


ولا شجر الفيكس وامثاله من الاشجار العقيمه بريء ومفيد وحلو ومالوش زيي وانا الى جاهله ؟؟؟



هناك 39 تعليقًا:

سيف الدين اليزل يقول...

طبعا انتي غلطانه علشان مصر عدد سكانها 80 مليون يكلو الاخضر واليابس وعاوزا تزرعيلهم ليمون وبرتقال لو كونتو نيسيتو اللي جري هاتو الدفاتر تنقرا عازمتيني علي دكر بط وبسالك عليه قولتيلي بح كلناه يبقي عاوزه الحكومه تعزم الشعب علي ليمون وبرتقال ههههههههههه عنهم مازرعوا ولااتنيلو بس يروحوا يشوفو مين اللي قتل بنت ليلي غفران وحشتيني يا احلي اخت في الدنيا والسلام علي من اتبع الهدي

ahmed_k يقول...

هههههههه بقى المتوحش أكل الصبار بشوكه ,
بس والله معاكي حق ده اللي ممكن تطلقي عليه سوء التخطيط والتنظيم
لأن مصر طول عمرها زمان شوارعها مليانه بالخير والخيرات فأنقلبت بقدرة قادر لتصبح كلها فيكس
وثقافة التدمير والعبث اللي أنتشرت في كل الشعب يعني تفتكري يا أم مريم أولاد المدارس حيخلوا اي شجره مثمره تطرح أو تشوف طرح من أساسه دولا حينفضوها اول بأول قبل ما الثمر يكتمل كمان
فالموضوع كبير ثقافة شعب لازم تتغير
حكومه وحراميه لازم يطاح بيهم
والقصه كبيره
بس فعلا مظاهر سيئه وتبعث على الحزن على اللي أصابنا

دمتي بكل خير

جعلوني مريض نفسيا يقول...

معاكي حق الناس مبتفكرش وياريت مبيزرعوش بس لأ ده كمان بيشيلوا الي موجود
انا فاكر زمان كنا زارعين في الجنينة الي ورا العمارة اشجار فاكهة كزا صنف وكانت بدأت تطرح انا فاكر التفاح بتعها كويس هو كان صغير بس طعمة كان حلو جدا بس سكان العمارة بقي ربنا يسامحم معجبهمش الكلام ده شالو الشجر وقسموا الجنينة نصفين نصف زرعوه ملوخية وفجل وجرجير تقريبا كانوا ناويين يقفوا بيهم علي الناصية والنصف الثاني اشجار من الي بتقولي عليها اشجار عقيمة

حتي النخلة الي بقالها اكتر من 15 سنة قطعوها بحجة انا قطعها اوفر من تقليمها ربنا يسامحم ويهديهم

أحمد (زوج مخنوق ). يقول...

مش عارف ليه حاسس انك هتقدمي كلية الزراعة قريب
البوست اللي فات فول
و النهاردة لمون
و مقضياها خضرة
حاسس انك قريب هتقلبي شبت و بقدونس و ورور يا جرجير
عموما
نعلق بقى على البوست
كلامك نظريا حلو
بس زي ما احمد k قال
ثقافة الشعب عايزة تتغير
افتكر كان عندنا في الكلية شجرة رمان و كانت بتطرح الرمانة من وهي لسه قد اللمونة كانوا الطلبة بيقطعوها و يفتحوها و لما طبعا ما بيلاقوش حاجة تنفع تتاكل بيرموها
و انتهى الكلام على كده
يبقى الجنايني عمال بقاله سنة بحالهتا بيراعي الشجرة علشان يدوق طرحها لما تكبر
و المفروض ان طلبة كبار يجوا بكل غباء يقوم قاطعها و فاتحها و راميهاله على الارض
طب طول و اسمهم طلبة جامعة يعني المفروض اكتر طبقة مثقفة في البلد
فما بالك بطلبة المدارس
طب العمال و المهنيين
الموضوع نظريا حلو
بس تطبيقه محتاج تغيير فكر الناس

كفايان خضرة بقى على كده
شوفيلنا الوان تانية
تحياتي

عمرو يقول...

صباح الخير يا ست أم خالد أزيك و أزى الأستاذ رضا و العيال
حلو موضوعك ده أوى أوى
بصى بقى .. شجر الفيكس اللى هو أصلا من الهند له فايده كبيره أوى أن فروعه بتمتاز بأوراقها الخضراء الكثيفه فبتنتج كم هائل من الأوكسجين المفيد للناس و للبيئه و مسألة تقليمه دى جريمه فى حق الشجره لأن ربنا خالقها كده فروعها تمتد و تتكاثف و تتكاتف و تعمل مظله تقى البشر من حر الشمس و تمدهم نهارا بالأكسوجين .. يعنى لما بأبص على شجر الفيكس المشذب على شكل أسطوانه و لا شكل مدبب مضجك بتصعب عليا و بتفكرنى بقصات الشعر المضحكه اللى بيقولوا عليها موضه .. شجر الفيكس محتاج فقط تنظيف لأنه بيربى عنكبوت و حشرات تانيه ..
فكرتك بقى لزراعة أشجار مثمره فى الشوارع لا تصلح عندنا البته .. ليه ؟ لأننا شعب عنده جهل خضرى .. بنتلذذذ بسرقة و تدمير و قطع الأشجار ليه ؟؟ الله و رسوله أعلم ..
من كام سنه كده أم العيال ترأست حمله لزراعة و تشجير الحديقه التى تحوط عمارتنا فى 6 أكتوبر و جمعت من السكان حوالى 3000 جنيه لهذا الغرض و نزلت أشترت كم هائل من أشجار التفاح و الليمون و الخوخ و البرقوق و المانجو و المشمش و الورد البلدى و البرتقال و اليوسفى و الرمان و بصراحه عملت الجنينه حاجه رائعه .. أيه اللى حصل ؟ أولاد المدارس خلعوا الشجر و كسروه فى الرايحه و الجايه بدون سبب .. و شوية أشجار أتسرقت بالليل و أتزرعت فى الحدائق المجاوره .. فبقت أم العيال و حرم سيادة المستشار جارنا واقفين فى البلكونات طول النهار و الليل يزعقوا للمخربين و الحراميه و يدعوا عليهم تنشل أيديهم عقب كل صلاه
و آدى الجنينه النهارده أصبحت خراب يباب اٍلا ما غرسته بأيدى منذ سنوات طوال أيام ما كانت 6 أكتوبر فاضيه و بقت أشجار عملاقه ما ينفعش تتكسر أو تسرق
فى الجزائر يا أم خالد أشجار البرتقال و اليوسفى اللى بيسموه مندرين تملأ الشوارع و الطرقات و كمان أشجار اللوز و الصنوبر و الناس هناك محترمين و بيحترموا الشجر اللى بنقول عليهم مجانين و شرسين و هم فى الحقيقه من أحسن الشعوب تحضرا فى تعاملهم مع الأشجار ة تمشى كده فى الشوارع هناك تشمى رائحه الموالح و الزيتون و اللوز حاجه ترد الروح
أمشى بقى عندنا تشمى ريحة الخراب و السرقه و النفوس المريضه أعداء الخضره و الأشجار مش عارف ليه ؟؟!!

Appy يقول...

حرام عليكى انتى بتهزرى عاوزه يزرعوا ده فى الشارع لاااااااا
بصى كنت داخله ارص لكي موضوع طويل وتوقعت وجود عمرو بصيت على تعليقه قولت هو جاب من الاخر
على فكره انا بحب الزرع جدا وعندى بلكونه متر فى متر ملغماها

أميرة يقول...

اول ما دخلت قريتها فيكس (علشان عندي برد عاملة زي اللي بيحلم بسوق العيش معلش)

عارفة شجر الزيتون اللي مزروع في الصحراوي .. يشوف ناس نازلة تاخد منه .. مهو المفروض ملك الشعب زي الشجر اللي انتي حكيتي عليه

عارفة الناس مش بتراعيه ليه؟؟ علشان اتربوا ان الحاجات دي جماد

لو اتعلموا انها بتحس و بتتألم و بتبكي زيها زيهم .. لو اتعلموا الرحمة بينهم وبين بعضهم هيتعلموا يرحموا المخلوقات الاخري

الطفل اللي ماشي يقطع في الزرع دا .. زي المقهور اللي بيستقوي علي اللي اضعف منه .. بيظهر قوته علي الضعيف و لو فكرتي هتلاقي الكل كده من الكبير للصغير

كل واحد بيدور يستقوي علي اللي اضعف .. بقوته بفلوسه بحكم سنه بحكم منصبه بحكم انه اخ ولا اب ولا ام ولا خال ولا عم ولا زوج ولا صديق

بحكم اي لقب حاصل عليه

لما بشوف حد بيقطع ورقة شجر ولا حتي وردة من غصنها بقوله لو صغير .. تحب حد يجي يشدك من حضن مامتك كده و يخلع ايدك ولا رجلك من مكانها؟ ولو كبير لازم يفهم انها مش هتغير في موقفه حاجة لو صغيف هيفضل ضعيف ولو مقهور هيفضل كده

زرع حاجة خضرا محتاجة قلب نضيف من جواه علشان يعرف انه بيربي بذرة او شتلة صغيرة زي ما بيربي اولاده .. لازم يعرف يراعيها ويصونها والا هتموت



كام واحد في بلدك عنده قلب نضيف يعرف يربي ويصون؟؟؟

حسن حنفى يقول...

للاسف مش فيه استفاده من اي حاجه وبعدين حتي شجر الفيكس مش بقي موجود كتير واللي موجود بيتقطع سواء من العيال الصغير اللي بتلعب في الشارع او اما يعملوا تصليحات في اي مكان

بنت الغربة يقول...

انا مابفهمش قوى فى انواع الزرع والاشجار ده
بس انا عجبتنى قوى شجرة ام الشعور دى
تعرفى زمان كان بابا الله يرحمه عنده ارض فى البلد وكنا بنروح فى العيد بس (لو كنا فى مصر )او فى الصيف
المهم انها كانت كلها شجر برتقال ويوستفندى.. وكنت باحب اكل اليوستفندى من على الشجر دايما
بس للأسف بعناها - المهم انا مش عارفه ليه الحكزمه مابتزرعش الاشجار الحلوة دى ليه؟؟؟
وليه مصرة على نوع معين بس؟؟
وليه مابنزرعش حاجه مفيده؟؟
وليه لما الشجر بيكبر بدل مانظبطه ونديله شكل حلو بنقصه بطريقه وحشه؟؟؟
صدقينى مش عارفه؟
بس اشمعنى ده اللى هايبقى كويس فى مصر؟؟
ماكل حاجه فيها زى شجر الفيكس..عقيمه

صبرني يارب يقول...

سيف

ههههههههههههههه ماشي ياعم ما احنا ما عندناش شجر تفاح فى الشارع زيكم

وبالنسبه للبطه ياعم انا ماليش دعوه انا عملته وانت الاتوبيس النقل العام بتاعك اتعطل منك فى اوووووربا والدول المتقدمه هههههههههههههههه

كلنااااااه سبق السيف العزل
بس نجيبلك غيره يا اخويا بس تعالى انت

تسلم يارب

صبرني يارب يقول...

استاذ احمد
ايوه انا معاك انها مش بس سياسة حكومه انما اخلاق شعب بس برضه الشعب ده فى رقبة مين حضرتك ؟

شوف هى حملة واحده فى الاعلام والمسلسلات والمدارس وهاتبقى الناس كلها ماشيه تقول الشجر الشجر الشجر اخضر ولووووونه جميل

ههههههههههه

صبرني يارب يقول...

جعلوني مريضا نفسيا

عرفت دلوقتي ليه مين جعلوك مريضا نفسيا

شالو الشجر ؟؟؟ وزرعوا ملوخيه وجرجير ؟؟
طب الشجر كان مانعهم من الملوخيه ده انا كنت بازرعها فى شوالي الزرع بتاتي والله مش محتاجه يعنى مكان

عارف انا لو الامر بايدى وواحد يقطع نخله عمرها 15 سنه اسجنه او اغرمه تمن 5 نخلات كبار وطارحين ويزرعهم بايده ويراعيهم كمان
مسخرررررررره
عارفه ان بلدنا شعبا وحكومه عايزين اصلاح

romansy يقول...

ومين يسمع بس
والله فكره بس هل يا ترى
فى كم واحد فى بلدنا دى عاوز المصلحه
مش عارفين

صبرني يارب يقول...

احمد زوج مخنوق

والله تصور انا وانا باكتب البوست برضه ايه ده الناس هاتقول صبرني مسيطر على افكارها الزرع ليه ههههههههههههههه بس مش مقصوده يعنى

ماشي برضه مش عشان الناس فى منهم مؤذيين ومش محترمين نقول خلاص مش زارعين لكن لازم كمان نعلمهم الاحترام

صبرني يارب يقول...

عمرو

بالنسبه للفيكس انا معاك هى نموها سريع ومعاك انها خضره ومعاك انها حلوه بس كمان فى شجر كتير حلو برضه وله نفس المميزات ومثمر
بصرف النظر عن كون احنا شعب متخلف وعندنا امراض نفسييه الا ان الصح اننا نعمل كده

وبالنسبه لقص الشجر وحلقه الحلقه السووووووده دي انا بابقى عايزه اولع فيهم بصراحه
كان قدام بيتنا القديم شجره كده قدام محل كانت صاحبة المحل كل ماالشجره تشد حيلها شويه
تجيب واحد يخليها زلبطه علىا لاخر تقريبا يتفضل منها الفروع الخشب بس وتقول عشان مداريه على المحل وبتلم نموووس
اي والله العظيم
والجنيه الى حضرتك بتقول عليها بابا عملها قبل كده فى ارض كانت قدام المكتب بتاعه هو وعمي ارض كانت خرابه ومليانه قرررف وزباله وبتوع سوق الخضار الى جنب المنطقه دي مخلينها طبعا حدث ولا حرج
بابا وعمي برضه لموا مبلع متواضع جدا وقتها وعملوا منها حديقه جميله ما فيهاش اشجار فاكهه لانهم خافوا برضه من الناس يدخلوا بقى الجنينه عنوه ويعملوا ثورة الجياع
هههههههههههههههههههه

الا انهم زرعوا ريحان ونعناع عشان الريحه والنموس وجابوا زرعه مش فاكره اسمها بتطفش النموس كمان وكتروا منها عشان سكان المنطقه يتبسطوا يعنى
وطبعا كانوا بيعملوا زي المدام عندك ومرات المستشار هههههههههههههههههههه
وبقى شغل عمي الشاغل انه يهش الناس من على الحديقه الى بيكسر والى بيبوظ والى بيعمل حاجات تانيه ما علينا

المهم يعنى فى الاخر الحكومه جت شالت الشجر كلللللللله وعملت عماره كبيره فرقتها على الحبايب

قشطه ؟

صبرني يارب يقول...

يا اآبي يعنى حرام نحس اننا بني ادمين ما نربي عيالناانهم يبقوا محترمين ويحترموا الزرع اشمعن احنا طلعنا كده يعنى هو احنا عجبه ؟؟
وحياتك يا آبي انا كانت بلكونتي القديمه نص متر فى متر ونص كان فيها زرع يساوله يوم ما الجدي كله بتاع 300 جنيه الكلام ده من 12 سنه

بس ان شاء الله هازرع تااااااني

صبرني يارب يقول...

أميره

الف سلامه عليكى يا جميل مالك

ما شوفتش الشجر الى الصحراوي ده بس لو شوفته هانزل اخد منه برضه بس بادب

بس عارفه كمان باحس ايه ؟؟

ان انا ما عاندناش احساس ابدا ان الحاجه دي بتاعتنا عشان كده بنبوظها وبنقول تخرب ما تعمر

مش الناس بتقول هو كان الشارع بتاعك ده شارع الحكومه

مع انه مش شارع الحكومه ده شارعي انا وشارع الناس كلها والحكومه نفسها دي بتاعتنا

بس احنا مش ربينا العيال صح صدقينى

صبرني يارب يقول...

حسن حنفي

على رايك حتى الفيكس مش سايبينه فى حاله

وده الى حصل عندنا فى الشارع بين الطريقين عملوا مكان يتزرع وكان شكله حلو اوي
وكنت ناويه انى انزل ازرع فيه شجرة فعلا ولو شجرة لمون او اي حاجه واراعيها لانها هاتبقى قدام بيتى

وفجأأأأأاه نقلوا الشارع عندنا موقف ارياف

الناس بقى الى المترددين على الشارع سواء ارياف او غيره قضوا على الاخضر واليابس وشالوا الزرع وعملوا مكانه رصيف بادعي على الى عمله كل ما اعدي ليه وهاقولكم مره تانيه ليه
نورت

صبرني يارب يقول...

حتى الارياف بطلوا يزرعوا الشجل الحلو ده يا داليا

صدقينى كل حاجه بتفقد شكلها الحلو عشان مافيش بيج بوس

مافيش حد بيفكر فينا خااااااااالص

الى مربي فرختين بيفكر فيهم حتى عشان هايدبحهم وياكلهم فى يوم من الايام

انماا حنا مش هايعرفوا ياكلونا فبيمصوا دمنا بحيث نفضل عايشين ونعمل دم تاني يمصوه

صبرني يارب يقول...

رومانسي

كل مسؤل فى البلد دي اكتر من تحت رجليه مش بيبص

ولا حد بيفكر فيناااااا احنا ايه اساسا عشان يسألوا عننا

Anonymous يقول...

سلام عليكم
اولا: اكتر حاجه عجبتنى فى الموضوع وبجد والله ان سيف علق عليه (يارب يرجع لنا بالسلامه ).
ثانيا:انا لسه جاى من مدونة ( اه يا دنيا )يعنى ماتتوقعيش انى هاعرف اعلق على كلامك كتير .
ثالثا ودى الاهم انتى يا بنتى خريجة ايه اعلام قسم صحافه ولا خريجة زراعه قسم بساتين ولا تجاره شعبة الشجر .
بس للاسف من يقرا ومين يهتم ومين ينفذ ؟
ربنا يكرمك ويباركلك فى عيلتك الجميله دى .
مدحت

صبرني يارب يقول...

عمو مدحت

الله يكرمك يارب ويخليك يا عمو بتحرجني كده انت عارف ان انا على اد حالي يعنى

ربنا ما يحرمناش من طلتك علينا

عاشقه وغلبانه يقول...

اعتقد ماينفعش في مصر
احنا شعبنا ممكن ياكل الشجر في اي وقت تقومي عايزه تزرعي برتقال ولمون
كده لا هاتبقي زينه ولا خضره
كله للاكل

صبرني يارب يقول...

عاشقه وغلبانه

طيب يعنى لازم نفضل طول عمرنا متخلفين
ما نتعلم بقى

fashkool يقول...

والله برافو عليه ابوكى ده والموضوع ده عايز طرح من المدونين عشان الناس يحسوا بيه .. اصل فيه موضوعات مهمه ولا حد بيحس بيها وانا سألت نفسى نفس السؤال ده .. ليه ما بيزرعوش اشجار مفيده وسألت ناس كتير .. وآن الاوان عشان الكل يعرف ليه وايه السبب وعشان نغير ونزرع شجر مفيد الا شجر التوت اللى بيبهدل الهدوم
وبالنسبه لتعليقك عندى والله انت خفيفه قوى .. يعنى طبق سلطه وخلاص .. طب يا ستى ومن عندى حتة لحمه كبيره كمان .. ان شالله ما عن حد حوش وكمان قزازة سفن اب
ان شاء الله من هنا وجاى اعمل حسابك فى الغداء والعشاء كمان .. هيه ايه الغرامات دى يا ربى .. الامر لله تحياتى وارجو ان اكون عند حسن ظنك

جنّي يقول...

السلام عليكم

كان الله مع اهل غزة وليغفرالله لنا تقصيرنا معهم ..

لا للوقفات والاستنكارات ولكن اجمعوا المال والسلاح وليفعل كل منا ما يستطيع لايصال المال والسلاح لاهل غزة ..

ويارجال سيناء الشرفاء قوموا بايصال المال والسلاح لاخوانكم في غزة الصامدة..

ولعنة الله على الكلب الذي استقبل العاهرة اليهودية امس للتواطؤ لضرب غزة ..

وحسبنا الله ونعم الوكيل

kochia يقول...

صعب
الناس الجعانة والفاسدة مش هتسيب للشجرة حتي فرصة تقول السلام عليكم
ليمون وبرتقال اللي بيتباع بكذا حتي لو بشلن

الناس هتسيبه يكبر ويظلل ؟
لازم بقي نزرع علي الاقل 200 مليون شجرة عشان كل واحد يبقي له شجرتين يمكن ميبصش لشجرة اخوه

تحياتي لك .. ولابيكِ

صبرني يارب يقول...

استاذ فشكول

والله انابرضه على عكس راي الناس انها فكره فاشله ومش هاتنفع عشان احنا متخلفين

انا شايفه ان كتر الكلام فيها ممكن يجيب نتيجه على الاقل على مر السنون

وبالنسبه لحتة اللحمه الزياده ميه ميه كده يبقى فل اوي ههههههههههههههههه

حضرتك بتنورنا

صبرني يارب يقول...

كوشيا

لازم نتغير ونتعلم مش معقول هانفضل كده طول عمرنا ونقعد ننعي حالنا

صبرني يارب يقول...

جني

ياريت نعبر ان ارائنا من غير ما نشتم

ومن غير ما نتكلم عن شرف حد لما قلت عنها عاهره استفادت غزه بايه ؟؟؟

عزه واهلها على عينا وعلى راسنا اهلنا ودمنا كلنا ادينا مكتفه مش عارفين نعمل ايه لكن الى بنقدر عليه نعمله بنعمله لكن عن عجز

انما انا مش باحب الشتيمه خصوصا من نوع الكلمه دي من فضلكم بلاش كده

تحياتي وحضرتك نورت

mony يقول...

تصدقي انت وعتيني لحاجة مهمة جدا


و جميلة جدا في نفس الوقت

طيب ما في ناس كتير بتزرع قدام بيوتهم

مايزرعوا الانواع ديه

ده حتي هينوبهم من ريحتها

بس المشكلة ان معظم الناس عندهم جهل ولا قلة درايا
و لايكونوا بيسترخصوا


انا رأيي اننا مانستناش الحكومة اللي مش هتتحرك في يوم من الايام ديه

لو كل واحد زرع شجرة من ديه قدام بيته الشوارع هتتملي اشجار جميلة و بريحة اجمل


و نوفر علي الحكومة الشجر بتاعهم اللي حيرانين بيه
الي بيحطوه لما يكون في حد معدي ولا تشريفه و يقلعوه تاني يوم


مش كده ولا اييييه؟؟؟

عمرو يقول...

قشطه
مش غريبه طبعا
النبته اللى بتطفش الناموس اسمها نيم شجرة النيم و هى فعلا هايله لتطفيش الناموس
كمان زرعة الشيح بتطفش الابراص اللى هى جمع برص يعنى و لو انه مش مؤذى و لا حاجه زى ما الناس فاهمه بالعكس ده بيتغذى على الناموس و الصراصير يعنى مفيد للبيئه بس شكله بيخوف الناس مش عارف ليه !!
الشيح كمان بيطرد التعابين لو موجوده فى مكان و يخليها ما تعديش خط زراعتها أبدا
فيه كمان السمسم لو رمتيه فى الأركان لا يمكن يخش عندك النمل
وصفات حلوه أهى و الله

صبرني يارب يقول...

موني

والله يااختي لو كان قدامي مكان يتزرع ما كنتش اتردد ان ازرع لكن مافيش مكان فى شارعنا ولا حتى لعود ملوخيه

اعملوا انتم وانا اجي اشم عندكم هوا

صبرني يارب يقول...

عمرو

والله انت عليك حاجات

ايه الاسامي دي هههههههههههه

بس السمسم ده انا مش مصدقاه انا ليه قريب مموته نمله هبله فى عز البرد ماشيه على السجاده عندي وشايله سمسمايه عشان الواد خالد كان بياكل سميط بالسمسم يبقى ازاي بيطفشها

اوعى تكون بتشتغلني يا عمرو هههههههههههههههههه

أنا حر يقول...

طبعا لو زرعنا في الشارع اي حاجة ممكن تتاكل يبقى الشوارع مش هتخلى من الخناقات والمشاكل كمان الشجرة اللي انت بتحبيها دي فروعها بتغطيها ودي هنا في مصر مصيبة سودة لان كل يوم من جواها هيقبضوا على كام واحد بياخد مخدرات او ولاد وبنات في قضايا اداب علشان كده الحل الوحيد اننا نخلي الشجر الجميل اللي لونه اخضر وبس
المشكلة مش في الشجر على فكرة انما المشكلة في الشعب احنا عايزين شعب جديد متعرفيش حد شغال في النوع اللي موجود في الدول المحترمة نشتري منه؟؟؟
:)
تحياتي

صبرني يارب يقول...

أنا حر

تصدق انك زعلتني ؟؟؟

بقى الشجره الاموره الطيوبه الحلوه دي الى اسمهاام شعور هاتبطلوا تزرعوها عشان هاتلموا من تحتها ناس بتشرب مخدرات ؟؟؟

طب ما احنا نزلنا مره الصبح لقينا فى عيال قاعدين على سلم بيتنا بيشربوا بانجو

طردناهم ماهدناش السلم

منطق مش صح ابدا ابدا

وكمان خناقات ايه الى هانلاقيها على الشجر

طيب يا سيدى لما يتخانقوا على الشجر احسن ما يتخانقوا على البنات

مش منطق ابدا اننا ما نزرعش شجر الا الشجر العقيم احسن خايفين الناس تتخانق ولا تضرب بانجو تحتيه

والصنف موجود ومتوفر خارجالاراضي المصريه هههههههههههه

عمرو يقول...

يا أختنا أم خالد السمسم ده وصفه متجربه للنمل العادى الصغير ده لكن أكيد النمله اللى كانت شايله السمسمه دى تلاقيها نمله فارسى من الكبار اللى بنسميها فى البلد حرامى الحله و أسألى كده أى صاحب فرن أفرنجى حيأكد لك موضوع السمسم ده
معقول أشتغلك برضو فى حاجات اٍستراتيجيه زى كده ؟ هههههههه
طيب حأقول لك على وصفه تانيه ليها العجب تطفش لك الدبان و ما تخليهوش يهوب ناحية بيتك من غير لا رش و لا بيروسول و لا شعوذه
بصى يا ستى .. تجيبى كيس بلاستيك شفاف بشرط يكون شفاف من بتاع ساندوتشات المدارس ده و تمليه مياه و تربطيه كويس و تقومى معلقاه على الشباك من فوق بدوباره تيجى الدبانه من دخول داخله من الشباك تقوم تشوف نفسها كبيره جدا جدا حيث أن الكيس بقى زى العدسه المكبره لما عبتيه بالمياه فتروح خايفه و تظن أنه فيه وحش واقف لهاعلى الشباك فتبلغ فرار
لو جربتى الطريقه دى على كل شباك فى البيت لا يمكن دبانه تستجرى تدخله
و أبقى أدعى لى بقى

صبرني يارب يقول...

عمرو
ههههههههههههههههههههههههه

شوف يا عمر المخبز الافرنجي لازق في بيتنا وما تفكرنيش عشان انا لسه جايبه من عندهم سميط من اسبوع ولقيته مليان نمل من الرفيع اوي الاصفر ده وكان السميط عليه سمسم يا عمرو هانخسر بعض عشان النمل كده ههههههههههههههه

لا لا بس حكاية الدبان دي موتتنى من الضحك هههههههههههههههههههههه

انت عارف انا لو عملت كده الجيران هايطلبولي مستشفى المجانين
وخالد هايروج يجب اي حاجه ويخرم بهاا لكيس ويقف يستحمى ههههههههههههههههههههه

تعيش ياعمرو ونورتنا

Didi يقول...

و الله انتي من العنوان كده بتفكريني بالاعلان اللي بيقول " ليه تدفع أكتر لما ممكن تدفع اقل "
علشان نقعد نفكر و نسأل نفسنا ليه بندفع اكتر ليه ليه و نسأل اللي جنبنا و هو كمان يقعد يفكر يا تري ليه و طبعا كلنا مش هانلاقي اجابة و بعدين نفكر احنا ليه مش لاقيين اجابة ..... و هكذا و بكده يا حلوين نكون لاهينا الناس في سؤال من غير اجابة و قيسي علي كده بقي كل حاجه في حياتنا و خلي بالك ان كل ما تحاولي تقربي من الاجابة يطلعلك سؤال تاني اصعب .
حد فهم حاجه ؟؟؟