الاثنين، 29 ديسمبر 2008

غزه....... بدون جعجعه

سلام عليكم
حقيقى يا جماعه احنا ناس نجيد التسقيف والتطبيل فى الزفه مووووووت .
من غير ما نعرف اساسا هى زفة مين
دلوقتي فى كلام كتير اوي بيتقال فى موضوع غزه والى له والى مالوش بتكلم
فى ناس عندها استعداد تفكر وناس لا
السياسه للاسف لعبه قذره
ده فى عصرنا بس
انما الرسول علية الصلاة والسلام كان سياسي ناجح بدون قذاره
اه كان رسول ونبي الا انى ارسى قواعد دوله قويه سياسيه وعسكريا لقرون مضت بعده
لحد ما شرفنا احنا واسلافنا وبوظناها ولله الحمد
والحمد لله اصبحنا كما وصفنا الحبيب المصطفى كغثاء السيل
عارفين يعنى ايه غثاء السيل ؟؟
بعد ما السيول بتخلص مخلفات السيول بقى بتبقى ايه ؟؟؟
حاجات كده بايشه وضعيفه صح ؟
احنا كده بقى
وليس عن قله كما قال الحبيب المصطفى ولكن عن ضعف ايمانا
المهم كلام كتير عمال يتقال
مصر يجيلها ويتحط عليها قافله المعبر
مصر المفتريي عندهم جيش ومستخسرينه
مصر المفتريين عندهم 80 مليون شحط ما بيجوش يحاربوا ليه
مصر مصر مصر وكأن الدنيا كلها خلصت ما عادتش الا مصر
واحنا كشعب مش فاهم حاجه ومش واثق فى حكومته بنهلل وراهم ونقول ااااااااااه
عموما انا طبعا قلبا وقالبا مع اهل غزه ومع كل مسلم مقهور على الارض
والله وغير مسلم كمان
الا انى اخص المسلمين طبعا بشفقة قلبي اولا
نفتح المعبر اووووووك
انما تبقى الحدود ميييييغه لا طبعا .
دى مش حدود عربيه حتى خالصه
دى حدود مع دوله معاديه ومش اي عداوه
الى بيحصل ان بمجرد فتح الحدود الفلسطنين عايزين يدخلوا بعربياتهم وعيالهم وبيوتهم كمان
وكمان قوات حرس الحدود هناك ما تقدرش تفتح الحدود بالسلاسه دي يا جدعان لو في حرب
لازم تعزيزات توصلها
والى انا شايفاه انهم جابوا صور من الصبح للمعبر مفتوح
حتى ان فى واحد طلع اتحدى حماس انهم يصوروا معبرهم ان كان مفتوح اصلااااااااا وده حصل يوم الحج برضه
ارجوووووووووكم بلاش الجعجعه واحنا مش فاهمين حاجه
والى شايف نفسه جدع يروح يتفضل الطريق قدامه والمعبر مفتوح ويروح يحارب
لكن بصدورنا عريانه لو روحنا كلنا هانموت زيهم
وحكوماتنا حكومات كلها فاسده وضعيفه وامرها مش بايدها وكلنا عارفين كده
وبطلوا يا عرب تهبهبوا على بعض من فضلكم
يوما من الايم حطيت صباعي فى عين واحده فلسطينيه كانت معايا فى الكليه بتجعجع برضه وبتقول 70 مليون مصري مش عارفين يطلعوا اليهود من بلدنا
الصراحه البجاحه غاظتني وقلتلها 70 مليون مصري ربوك وآنوكى وعلموكى انتى وابوكى واخواتك وعيلتك كلها وعايزه تقعدي تبرطعي هنا انتى واهلك ونروح نحاربلك ورونا انتم الهمه الاول وبطلوا تهربوا من بلدكم .
مش باهاجم الفلسطنين يا جماعه دول مقطعين قلبي الا انى احق الحق برضه . ان كانوا هما اصحاب الارض نفسهم يدعوا انهم مكبلين الايدي ضعاف ما يقدروش يرجعوا بلدهم يحاربوا يبقى لسانهم في بؤهم بقى .
نفتح المعبر وناخد عندنا الفلسطنيين كلهم زي ما هما عايزين . ونكون نفذنا المخطط اليهودي بحاذفيره.
كل الناس كانت بتبارك للفلسطنيين على غزه
وانا كنت فى بالي باقوووووول مبروك عليكم الطحن عشان هما بيلموكم فى مكان واحد عشان يطحنوا على كيفهم يا حلوين .
عارفه ان كلامي مش هايجى على هوا ناس كتير لكن ده رايي
ولو سمحتم نعمل حاجه يمكن تكون اجابيه بدل النواح الى بتنوحوا ده
بادعوا كل مسلم او حتى اي دين انه يتضامن مع اهل غزه بالدعاء
ولانى طول عمري باتمنى من قلبي اني اشوف المصريين او العرب او المسلمين متجمعين على قلب رجل واحد
زي ما باشوفهم كده يوم كاس افريقيا ولا كاس اي حاجه تانيه من البتنجان المخلل ده .
واشوف كده اديهم مرفووووووعه لله فى وقت واحد وبيقولوا ياااااااااارب .
من فضلكم تدعوا بكل الطرق سواء هنا او على الفيس بوك للتضامن ده
ونختار وقت كلنا فى وقت واحد نرفع ادينا لله عز وجل وندعوا برفع الغمه عن اهل غزه وعن المسلمين جميعا
وليكن الوقت ده مثلا فى الثلث الاخير من ليلة الجمعه الجايه ولو حبيتوا نحدد ساعه معينه
وطبعا انا اخترت المعاد ه تحريا لاوقات الاجابه
ولو حبيتوا نوحد الدعاء كمان وانزلكم الدعاء هنا من بكررررررررررره
عايزه رايكم بسررررررررع عشان ما عادش فى وقت

هناك 27 تعليقًا:

صبرني يارب يقول...

رومانسي سوري انا ما كنتش لسه نزلت الموضوع بس نزل بالغلط
ياريت تيجى تاني تقراه

romansy يقول...

حسبنا الله ونعم الوكيل


ربنا معاهم
وينصرنا على اعدائنا


اللهم اامين


يارب العالمين

:: Salma Emad :: يقول...

صبرني ..زانا معاكي ان بعض لافلسطنين خونه
و بيتعاملوا مع ارائيل و بيبيعوا اهلم و ارضهم للاسرائيلين في سيبل .....لا شئ

لكن ده مش معناه اننا نفضل واقفين نتفرج عليهم و نقول انهم هما السبب انهم بيقتلوا في بعض و بيموتوا بعض يبقي خلاص يصطفلوا مع نفسهم

لا مش المفوض يحصل كده

يعني نتخيل ان الرسو في الوقت الحالي و بيحصل كده
هل كان هايقفل المعبر و لا هايفتحه بالقطاره زي مابيحصل
ولا هايستني ياخد اذن من اسرائيل فتحوه ولا لا

يا غاليتي
انا سمعت بنفسي في التليفزين
واحد من الحزب الوطني ..مش عارفه اسمه حاجه جهاد ...لما المذيعه سألتوه انتوا ليه مافتحتوش المعبر علشان تعدوا الامدادات و المعونات

كان رده غايه في العار و الذل و الاهانه لمصر
مستنين لما ينسقوا مع اسرائيل
!!!!!!!!!!!!!
مع العلم ان اسرائيل ماكنتش لسه ضربه رفح الفلسطينيه

يبقي الي اي مدي الحكومه خاينه و عميله

و ده مش ينفي خيانه الدول العربيه لااخري...و اكيد طبعا هما ماصدقوا ولقوا شماعه يستخبوا وراها
و زودوا من الهتافات ضد مصر
علشان يداروا علي عارهم هما كمان

الحكام العرب كلهم يتميزون بالجبن و موالتهم لاسرائيل

و مابيعملوش اي شئ غير انهم يدينوا و يشجبوا ..كانوع من اناوع المسكانت لضمايرهم
اذا كان لسه بالقي عندهم ضمير

حسبي الله و نعم الوكيل

احنا مش عايزين نحارب بس لو مافيش فر غير الحرب ...زي ما قال الملولي
....كتب عليكم القتال و هو كره لكم ...


لاننا بنحارب ..علشان ربنا امرنا بكده
امرنا اننا نعلي رايه الاسلام
امرنا اننا ننصر المسلمين

فمابال بأقرب جوار لنا
الفلسطنين

احنا مش هانحارب بدلهم ولا حاجه احنا نساعدهم و نمدهم بالسلاح و بكل الحتياجات
اها اكيد حماس كتير من الاسلحه اللي عندها متهربه عن طريق مصر
و لكن ليست الحكومه هي من تساعد
احنا عايزين الحكومه تعلن مساعدتها للشعب الفلسطيني
و كفايه جبن و ذل و خذي عار

حسبي الله و نعم الوكيل
معلش للاطاله بس فعلا انا قلبي بينزف و حاسه اني مشلوله و مش قادره اعمل شئ

بأما بخصوص الدعاء

ياريت ياجماعه اللي يلحق الصوم اليوم
و نوحد الدعاء لهم عن الفطار
و ربنا يستجيب لنا بأذنه و بأمره تعالي

romansy يقول...

بشكرك طبعا انك سمحتيلى انى اقرى الموضوع تانى انا فعلا كان سيفوتنى كتير برغم ان الموضوع سياسى
بس انتى بتنقشيه بطريق سلسه
دمها خفيف
احنا فعلا مش فى ايدينا حاجه غير التهليل والتنطيط والكلام اللى على الفاضى والمليان

بس انا كتبت تعليقى الاول
على اساس انى شوفت العنوان
وقولت اكيد مفيش كلام يتقال اكتر من كده
لان غزه دلوقتى بقت تعنى لينا الكتير

حسبنا الله ونعم الوكيل
وان شاءء الله ربنا هيستجيب دعاءنا

اللهم ااامين

صبرني يارب يقول...

حبيبتى ام يوسف

ابدااااااا مش معنى كلامي اننا نسيبهم
ولا معناه انهم وحشين بالاجماع

لا لا معنى كلامي ان ربنا قال نحارب اه
بس بالعقل
مش بالهبل

ولعلمك الخاص انا من اشد المؤدين للحرب بس مين يحارب

مصر لواحدها ما ينفعش لازم معانا العرب

لازم نتحد والا هانفضل نعض فى بعض

ما تنسيش العرب كلهم عندهم قواعد امريكيه
وكلهم حكومات ضعيفه

لو قلنا يا حرب امريكا هاتضربنا من ارض عربيه

واحنا اساسا هدفهم وانتى عارفه

انا قللللللللت عقققققققل من تهليل

صبرني يارب يقول...

رومانسي الله يخليك يارب ونورت

my dream يقول...

بصي انا بجد مش قادره اتكلم بس يمكن زيارتنا لبعض تحسسنا اننا عاملين جبهه
اهي حاجه نضحك بيها على نفسنا ونصبر رحنا
مروه

حاسوباتيه يقول...

اه طبعا موافقه حددي وقت ونزلي الدعاء
ده كمان دعاء جميل يايت كلنا ندعي ياجماعه:

اللهم عليك باليهود والمنافقين اللهم يا قادر يا قاهر يا قوي يا عزيز ، اللهم صلي وسلم وبارك على نبيك محمد . اللهم عبادك المستضعفين في غزة تجبر عليهم اليهود الملاعين والمنافقين الحاقدين اللهم فانصرهم على أعدائهم وفرج كربتهم وارحمهم ، اللهم من يجيرهم سواك ومن يرأف بهم إلاك اللهم بك نثق وبقوتك نؤمن اللهم شرد اليهود والمنافقين واشدد وطأتك عليهم اللهم شتت شملهم واجعل تدبيرهم تدميرهم يا الله يا الله يا ذا القوة والملكوت ليس لنا رب سواك

دكتور حر يقول...

عمتنا أم رحمة

متفق معاك في كل ما ذكرتيه الى حد كبير

بس أؤكد على معنى يا رب أكون فهمته صح

ان المعبر لازم يكون شغال طبيعي زي أي حدود بين أي بلدين
مش انه يكون ميغه زي ما انتي بتقولي
ده كلام مظبوط

لكن ان دوله تكون راعية للحوار بين الفلسطيين تقف بتمايز تختار ناس للدخول وناس لا
او تسمح لفئه بالعبور وفئه لا
لا بل وتقوم باعتقال مجموعات من الفلسطينيين داخل السجون المصرية

محدش طلب طلب كبير او غريب
لكن مجموعات ابواق الاعلام الفاسد اللي بيقولوا المعبر مفتوح يقدروا يسألوا الناس اللي هناك أو يشوفوا نشرات الدول التانيه

كمان يام رحمه
مصر مش زي أي بلد
مش بقول نروح نجري على المعبر ونموت نفسنا

لكن فعلا بس بالدبلوماسيه ممكن نغير كتير
لو خلصت النوايا وصدقت الهمم

بنت الغربة يقول...

حبيبتى ياصبرنى
انت كلامك صح انا كنت لسه باتكلم فى الموضوع ده مع الباشا وقلتله ان مصر مش ناقصه كمان اهل غزة
هى قادره تاكل الموجودين فيها اصلا
لما يجيلها اهل غزة كمان ؟؟؟
وبعدين ليه مصر بس فين الاردن - لبنان - سوريا؟؟
وليه احنا اللى مفروض نحارب لوحدنا كده ليه مش كل الدول العربيه؟؟؟
ليه مش السعوديه مثلا؟ او دول الخليج عموما؟؟؟؟؟؟
كلهم بيبعتوا فلوس بس ماحدش بيبعت ولاده علشان يموتوا
ولادهم غاليين عليهم قوى مش زينا البنى ادم فى مصر مالوش سعر
انا موافقه على موضوع الدعاء ده
ونزليه وانا متبعاكى
تحياتى ليك

Appy يقول...

نصيحه متدخليش فى السياسه تاني عارفه ليه لانك بجد مش عارفه ابعاد الموضوع كويس انتى عبرتى عن وجهه نظرك انما متكلمتيش مع حد من الجيش ولا تعرفى الوضع ولا اي حاجه خالص ولا بتشوفى ابو قردان وهو طالع يلخبط الدنيا
بالطبع فيه حاجات احنا مش عارفينها ومش هتقدر نعرفها علشان شويه معاتيه بيطلعوا يقولوا اي كلام فى اي كلام وخلو الكل يزايد على مصر الحكومه تتحرق بجاز وسخ شكلنا اللى بقى زباله
على فكره موضوع المعبر مشكله كبيره الفلسطنين عمرهم ما يقدروا يقعدوا فى سينا عارفه ليه علشان انتى متعرفيش اهل سينا عمرهم ما بيسيبوا بيوتهم دول يطلعوا العفريت منه
الخوف مش من وجودهم هناك ولا وجود اي فلسطينى الخوف من امتداد حماس وارتباطها بالاخوان وده السبب الوحيد اللى مخلينهم يقفلوا المعبر وبخلوه بحدود اثبت لكي كلامى ان كل اللى بيتوجهه للمعبر حماس لو بصيتى هتلاقى الفلسطنين بيسيبوا غزه ويروحوا بلاد تانيه داخل فلسطين
فاهمه يا حجه ولا افهمك اكتر
عموما انا فى النهايه فاهمه كلامك واول ما شوفت اسم البوست على الريدر توقعت انتى هتكتبى ايه وده متفق فيه معاكي مين كمان اقول ولا انتى عارفه ههههههههه

صبرني يارب يقول...

ماي دريم

على الاقل لسه قادرين نتكلم

صبرني يارب يقول...

حاسوباتيه

اوك ربنا يسهل ان شاء الله وشكرا على الدعاء

KHALED يقول...

على فكرة انا موافقك فى كل إللى قلتية و ذيادة كمان شوية

صبرني يارب يقول...

دكتور حر

شوف يا فندم ما حدش ينكر ابداااا الفساد الى موجود

ولا فساد النوايا ولا دور مصر المهم

بس كمان ما نبقاش مبالغين وبنتكلم وبس

وحتى لو كنا بنقي مين يدخل يا دكتور ده مش غلط فى فكره احنا دوله منفصله ما زلنا
فلسطين فيها تيارات مختلفه وكلهم على خلاف مع بعض
وفلسطين تحمل فى داخلها اسرائيل دولة العدو نفتح الحدود ازاي من غير ما نشوف مين داخل ؟؟؟

وعموما زي ما انت بتقول انا ما شوفتش بعينى لكن كمان ما حدش خالص فينا شاف بعينه

بس على الاقل نفكر بعقلنا مش بعواطفنا بس
ومش بعقول الاعلام العربي الموجه من قبل الحكام الفاسدين المواليين فعلا فى سياستهم لناس تانيه خالص غيرنا كعرب ومسلمين

تحياتي لك وشكرا على تلبية الدعوه

صبرني يارب يقول...

بنت الغربه

لا الفكره مش ان مصر مش ناقصه اهل غزه لا يا ستى على عينا وعلى راسنا وزي ما شلناهم قبل كده نشيلهم تاني وتالث ورابع ونقسم لقمتنا معاهم

وزي ما فتحنا دراعتنا للعراقيين ولا عشان العراقيين جايين بفلوسهم ؟

لكن انا سألت نفس السؤال بررررررررضه

اشممممممعن مصر ما سوريا عندها جيش

والسعوديه عندها جيش

والاردن ولبنان لهم حدود مع فلسطين اشمعن كل مصيبه على راسنا

وفلوس ايه الى بيدفعوها ؟؟؟

يا بنتى ده الواحد فيهم بيتمطع ويبعت مليون جنيه يقعد يغنى عليهم ويفضح الدنيا فى الفضائيات بهم لما يقول بس
مع ان انا شوفت بعينى ما حدش قالي المليون ده بيتصرف كده بييييييبس للعيال ويادوووب المليون درهم يجيب كيلو عوووووود

عووووووووود من الى بيحرقوه يتنيلوا يتبخروا به واكيد انتى عارفه

المهم الدعاء ماشي ان شاء الله اجهزه النهارده

صبرني يارب يقول...

خالد

اشكرك وياريت تتابع بقى عشان وقفة التضامن

صبرني يارب يقول...

آبي

اسمحيلى ما باحبش كلمة ما تدخليش فى السياسه

المفروض اننا فئة المثقفين يا آبي لو ما اتكلمناش احنا فى كل كبيره وصغيره مين يتكلم

انا عبرت عن وجهة نظري يجى الى من الجيش لو يقدر يتكلم يجي يكلمنى

وبالنسبه لقصة حماس والاخوان ارجوكي مليت فكر الاخوان بانهم مستهدفين وانهم حماة الحمى والعااااالم كله خايف منهم

الاخوان؟؟ فين هما الاخوان ؟؟؟ ارجوكي الاخوان حاليا وجوهم بتفكرني دايما الايام دي بتزاوج فاسد بينهم وبين ادين الحكومه

وعلى فكره مش عارفه تقصدي مين الى متفق معايا فى الكلام ياريت تقوليلى
انتى بتقولي الغاز ولا اييييه

اطلعيلى بره واستنينى على الاميل عشان هاعورك يا آبي ههههههههههههههههه

Appy يقول...

حبيبى على فكره انا ولا يهمنى الاخوان ولا حماس ولا فتح انا يهمنى الفلسطينى العادي ومضايقه من المزايده على مصر فى كل حاجه فهمتى قصدي موضوع مثقفين لا يا ستى انا ثقافتى الشارع الناس العلق مش الحكام ولا القرايه شوفتى بقى الخيبه اللى انا فيها يعنى انا عمري ما اقتنعت ببتوع الكتب ولا الشعارات اللى بقولك كلامها هي واحده تالته معانا عاقله هههههههه وبتقولى با خرفانى عارفاها خليها تقرا تعليقى وهى تعرف نفسها اصل انا عارفه كلامها العاقل وبعدين تعالى هنا بتوع جيش مين اللى يتكلموا معانا احنا هنستعبط ولا ايه هما بيكلموا الاشباح بس هههههههههههه وانتى كل شويه تهددينى وتقولى ليه المازنجر طيب هفجره علشان متستفرسيش بيه عليه ها بقى

صبرني يارب يقول...

ههههههههههه ماشي يا آبي قبل ما تفجريه ابقى قولي لبتوع الجيش ههههههههههههههههه

نورتي يا جميل يا مثقف الشوارع انت

سيف الدين اليزل يقول...

تعرفي يا اختي انا اول مره ادعي من قلبي ان الحكومه متفتحش المعبر علشان اسرائيل عاوزه كده تزق قطاع غزه علي سينا والضفه علي الاردن وتضرب كرسي في الكلوب وتخلص الليله تعرفي الفلسطينين عملوا ايه من سنه لما فتحنا المعبر دخلو سينا واشترو البضاعه من البدو الغلابه بفلوس مزوره غير اللاحداث اللي حصلت التفجيرات وتهريب السلاح وامخدرات وبعدين مين هما قاده حماس مرتزقه زنادقه كل واحد متجوز 4 وبعدين الصاوريخ اللي بيدربوها علي اسرائيل كل يوم مش بتعمل اي حاجه عارفه ليه علشان وخدين ثمنها يعني جيش مصر علشان مصر وبس والنساء والاطفال والشيوخ ليهم رب والسلام علي من اتبع الهدي

سيف الدين اليزل يقول...

الكلام ده علشان غير معروف اسمك بيقول غير معروف يعني عديم الاصل بس انا مش هتهم والدك علشان حرام ومش هشتم فيك هنا فالمدونه علشان في هنا ناس ولااد حلال والحدق يفهم واللي زيك تلقيه راح جاب 100 واسطه علشان ميدخلش الجيش لو انتا ابن حلال صحيح اقفل الكمبيوتر وخد بعضك وروح علي غزه حارب هناك ولو ربنا بيحبك تموت شهيد علشان خاطر عيون حماس الشيعه اللي هما بيشتمو الصحابه وانابطلب من الله ان ربنا يهديك والسلام علي من اتبع الهدي

سيف الدين اليزل يقول...

الكلام اللي فوق لغير هعرف حتي اسمك الناس بتكتو غط الظاهر انها صفه

صبرني يارب يقول...

غير معرف انت اساسا خساره ارد عليك يا جدع وربنا


اولا بعيدا عن قلة الادب والسفاله الى انت بتقولها

احنا يا سيدى سلبيين ومش بنعمل حاجه وبندعي ربنا بس ؟؟

بس ما بنشربش كاسات سبنهالك

انت بقى بتعمل ايه

اشك انك بتدعي اصلا

بتهيئلي الى يقدر يرفع ايده للسما ويناجي ربنا

ما يطلعش على لسانه الزباله الى جت على لسانك

صبرني يارب يقول...

سيف

معلش يا اخويا امسحها فى انا وحقك على راسي

بس هانعمل ايه ربنا ابتلانا بالناس دي

نورت

جنّي يقول...

السلام عليكم

مصر ليست ضعيفة وتستطيع الوقوف في وجه هذا العدو الجبان الرعديد ..

مصر كان لها دور على مر العصور في حماية الشرف العربي والاسلامي ..وسيستمر مهما حدث رغما عن انف الحكام المتخاذلين ..

وما يحدث اليوم في غزة الصامدة يعبر عنه الشعب المصري الحر الشريف بكل طوائفه وانتمائاته ..

ولكن الحزب الفاسد والحكومة التي تحكمنا ووزير خارجية ارعن هم من اساءوا لمصر وللمصريين .. ولكننا كمصريين وانا هنا مصري في خارج البلاد لا يستطيع احد ان يتكلم او يتفوه عن مصر ولا نسمح له ..فالكل يعرف دور مصر والمصريين على مر العصور

واخواننا في غزة يحتاجون منا العون ولو كانت في يدنا لقمة واحدة لاقتسمناها معهم .. لان هذه اخلاقياتنا ودورنا التاريخي تجاه المسلمين المستضعفين في كل مكان ..
لذلك كان فتح المعابر بضوابطه مهم جدا لايصال الغذاء والدواء وحتى لو السلاح ليدافعوا عن انفسهم ضد يهود ..

الفلسطينيون في غزة لو ارادو الخروج لفعلو بكل سهولة ولكنهم مستمسكون بترابهم وارضهم وعزتهم وكرامتهم ..التي زرعها فيهم الشيخ الشهيد احمد ياسين ..

واحنا مش بنجعجع ولا حاجة والله احنا مع اخوانا في غزة قلبا وقالبا مع المقاومة الحرة الشريفة ونساعدهم وسنساعدهم بالمال وبكل ما يعينهم على مقاومة المحتل الصهيوني ..

وماذا لو حدث لنا ما حدث لهم ؟
وقد حدث من قبل في 76 و73 .. ولا ننسى دور الشيخ زايد والرئيس هواري بومدين ..ان لم نكن جميعا يد واحدة لافترسنا اليهود .. وحينما تحارب مصر تحارب من اجل مصر اولا لاننا مستهدفون من يهود حاقدون على مر العصور ..
ولن يترك اليهود مصر الا بتحقيق حلمهم بتكوين دولة اسرائيل الكبرى وتصبح مساكن شيراتون المطار وعين شمس ارض يهودية .. ولكن هيهات هيهات .. لذلك لابد من الاتحاد والتضامن مع كل العرب والمسلمين .. فنحن اقوياء باخواننا .. اما ان كنت وحيدا فسأفترس كما افترست فلسطين والعراق بسب التشرذم العربي ..

في وقت الازمات والشدة يظهر المعدن المصري الاصيل وهذا ما يظهر في الشعب المصري الجميل بعيدا عن من يحكموننا ..

والمخطط الصهيوني ينفذه ويساعد في تنفيذه حكام ما بين عميل وخائن وليس الشعب الذي يريد ان يمد يد العون لاخوانه وهم يبادون بشكل همجي بربري ..

هل نتركهم في هذه الحالة ؟

للاسف المخطط الصهيوني هو ان يجعلنا نحس بالعجز وان نتفرق وننظر لما يحدث في غزة ولا يحمر وجهنا غضبا ولا حتى خجلا ..

اعرف معدنك الاصيل وقلبك المحترق على اهل غزة .. ولكن لا تصدقي ما تردده وسائل الاعلام فليس كل ما تطلقه وسائل اعلام الحزب الفاسد حقيقية ..

شكرا ولكي التحية

صبرني يارب يقول...

جني

يا جماعه هو انا قلت ما نساعدهمش ؟؟

انا قلت نساعدهم بس بالعقل مش بالهبل

يا جني احنا كلنا شعب للاسف متخلف وجاهل

بما فينا الفلسطنيين


ما نبقاش عاملين زي الى راح ينقذ غريق والغريق مسك فيه من حلاوة الروح وغرقوا هما الاثنين

فلسطين على عينا وراسنا واهل غزه غلابه ومغلوبين على امرهم

لكن انا ضد الهبل الاعلامي الي حاصل ضد مصر والكلام الغير مسؤل

وما زلت باقول فكروا لو حصل حرب هانبقى لواحدنا والله يا جني

الشيخ زايد مات والملك فيصل مات والسادات مااااااااات

واحنا نفوسنا بتحتضر

وعندنا قلاقل فى الحكم حاليا مش عارفه حاسين بكده ولا لا

الراجل بيموووت وكله بيخطف ويجري

صدقنى مش احساس بالضعف انما رحم امرء عرف قدر نفسه

احنا كمصر رغم كل شيء محتفظين بهويتنا وارضنا وقوتنا العسكريه

الباقيين لاااااا وما يقدروش يقولوا بم

المهم ربنا معاهم احسن من الكل
وصدقووووووووني انا مش باشوف التلفزيون خالص هو ملاحقه عليكم عشان اشوف التلفزيون