الاثنين، 1 ديسمبر 2008

قتييييييلة فى شارعنا ...... وانه حقا يوم عظيم شأنه

تحديث :::
ولله الحمد احب ابلغكم انهم مسكوا المجرم فى هذه القضيه وكانت واحده ست محترفه القصه دي ومسكوها وهى واخده بنت تااااانيه بس لحقوها ما ماتتش الحمد لله
وجابوها هنا الست الشارع ومثلوا الجريمه اه والله قدام بيتنا
وانا شوفتهم الصبح وانا بانشر وقعدت اقول مين الناس الى قاعدين قدام بيتنا دول على الصبح كده الساعه 7 صباحا اتاري كانوا مستنيين بقى الظباط عشان تمثيل الجريمه
طبعا الملخص الى فوق ده اورده لنا الفكاهاني الى كان اخر واحد شاف البنت وعم ابو بانوب الى قاعد بعربية كلينكس وما الى ذلك قدام بيتنا .
أي خدمه وقبل ما تيجى فى الجرايد يا جودعان
*************************************************************************************
ايوووه والله قتيله فى شارعنا

موضوع محزن جدا

اه قصدكم امال ايه هو الى يوم عظيم شأنه ؟؟؟

لا هاقولكم بعدين بقى فى الاخر لما نخلص موضوع القتيله

المهم فى بنت صغيره فى المنطقه عندنا تم العثور على جثتها مخنوقه فى مكان كده مقطوع قريب مننا

طبعا الدنيا اتقلبت هنا وخصوصا مخصاصا قدام بيتنا لان اخر مره شوهدت الضحيه كانت قدام بيتنا

طبعا البنت المسكينه الى امها يا عينى بتشوي سمك وابوها مبلط غلبان على اد حاله كانت لابسه حلق فى ودنها يجيله يجي ب 150 جنيه
وعشان المبلغ الطائل ده فقدت حياتها تمن لانها تلبس حلق من نفسها

طبعا دي قصه بتحصل كل يوم للاسف الشديد

لكن من يوم ما حصل كده والمباحث والامن ماليين الشارع عندنا وتمركزوا على رصيف بتنا تحديدا

وايه يا جودعان الشارع ماشي زي السااااااعه

لا في سواقين بيتخانقوا ولا بلطجيه عاملين فرده ولا ناس ملطعين على الارصفه

الشارع ماشي زي الفل

احنا الشارع بتاعنا موقف كبير للارياف يعنى على كل لون يا اورجانزا عشان البطسطه اتلغت خلاص

والسواقين مش عايزه اقولكم على ادبهم واخلاقهم العاليه والفاظهم الجميله واصواتهم الحلوه

والاخ مراقب الموقف هو واخواته الى عاملين بلطيه وفرده على الشارع كله

وانا طالعه فى مره انا ورضا لقيته بيركن العربيه فى الشارع من بره ومن غير غطا وكده

قلتله ايه ده مش هاتبيتها جوه وكده قالي لا ما احنا ساعتين ثلاثه ونازلين تاني (كنا رايحين نصطاد تاني ... أه اه بس ما لقيناش سمك غير فى كي جي وان )

المهم انا بصيت كده لقيت بتوع المباحث قاعدين على رصيف بيتنا ومستقرين يعنى وبيشربوا شاي ويأزأزوا لب
قلتله اه يلا اهو عمو بتاع المباحث واخد بحسنا.

ساعتها قلت يا حلاوه يا ولاد طيب ماهو ممكن اهو ؟؟؟

الامن والاحساس بان فى عيون ساهره على الامان ممكن اهو ؟؟

فيها ايه يعنى لما شله من المقاطيع دول يترزعوا هنا فى الشارع وفى كل شارع اصلا خصوصا لو زي شارعنا مليان قلق على طول زي شارعنا المبجل ؟؟!!

هو لازم تقع مصيبه وبلوى عشان تيجوا

طب ما تتهببوا تعملوا كده من الاول هو يعنى من قلتكم ؟؟؟

ده نص الشعب بقى امن دوله ومباحث وبيراقب النص التاني من الشعب ؟؟؟

طبعا احنا لو سبنا العربيه كده كل يوم هانصحى نلاقيها متأزأزه وواخدالها كام خبطه شمال ويمين (متأزأزه دي يعنى مسروق منها كل حاجه ينفع تتسرق )

وحصلت قبل كده مع ان فيها انذار ..........عااااااااااادي

وبابا اتقلب قبل كده فى الكاوتش الاستبن......... عااااااااااادي

وفى حرامي وربنا قعد اسبوعين كل يوم بالليل يلف على البيوت الى في الشارع يقلبها من على السلالم والاسطح ويسرق اي حاجه يلاقيها

انابيب بوتجاز او اي حاجه يلاقيها قدامه على السلالم

والناس كانوا بيشفوه ويجروا وراه وهو بيهرب من على الاسطح بتاعة البيوت

قلت مره لرضا طيب نكلم البوليس

قالي هايقولك امسكوه واحنا نيجى ههههههههههههههههههههههههه

قلتله طب ما الواحد يجيبله كلبشين ونأجر اوضه نعملها زنزانه بقى ونستقل وخلاص
ههههههههههههههههههههههه

تمام يا فندم الامن مستتب

مستتب خالص اوي جدا

بس خلاص خلص موضوع القتيله


اه صحيح يوم عظيم ليه بقى ؟؟؟

عشان فى مثل هذا اليوم العظيم من 29 سنه يعنى سنه 69 جاء الى العالم شخصيه فاذه وعظيمه

الا وهي شخصية رضا ابو رياض جوزي المبجل

اه اه النهارده عيد ميلاده وعملنا التورته وكالناها ما تطمعوش

ومشوها بقى 29 اها اوعوا تفكروا انه 39 عشان هو رايه انه عنده 29 اه.... فاااااااااهمين

يلا بقى سلام كفايه كده عليكم

هناك 67 تعليقًا:

msafa يقول...

كل سنه وهو طيب قوليله : عقبل الاربعين قصدى التلاتين
ربنا يكتر علينا الامن
علشان مش نخاف من الضلمه
البوست رائع

AHMED SAMIR يقول...

انتي عايزة رجال المباحث والشرطة المبجلين ينزلوا من برجهم العاجي ويتواجدوا في الشوارع كدة من غير سبب؟
لااااااااااااااااااااااااا
دة كتير قوي
ناقص كمان تقولي ان الشرطة في خدمة الشعب
ماهي باظت بقى
يا ساااااااااااتر على دة شعب

صبرني يارب يقول...

msafa
وانت طيب وبخير وامان الضلمه ما تخوفش لو كان مافيش بنى ادمين
انا باخاف من البنى ادمين بس والله

نورتني

صبرني يارب يقول...

A.SAMIR

والله فعلا شعب طماع بقى تقول ايه

اتشرفت بك يا اخي الكريم

صبرني يارب يقول...

الاستاذ رضا يستاهل مدونه بحالها يا بيبرس لا وصاحبة المدونات كلها كمان

شكرا لك يا بيبرس

والتورته فاضل حته فى التلاجه والله

والبسبوسه واحد بن حلال قاصدني فى صنية بسبوسه بكره ممكن نشيلك حته برضه عادي

وعيد ميلادي ان شاء الله يوم 16 فبراير

وانتم الى تجبولي بقى هو انا هاعمل تورتات لكل الناس وكمان اعمل لنفسي

حاجــ عيال ــات يقول...

السلام عليكم
كل سنة وانتم طيبين
والسنة الجاية كده نشوفكم على جبل عتاقة
أو اي حتة المهم نشوفكم
على فكرة موضوع واقعي وانت متناولاه بشكل ظريف
تدوينتك جميلة يابنت ....المنصورة
بلدياتي يعني
سلام مؤقت
جهاد مشالي

عبدالله يقول...

كل سنه و الاستاذ رضا بخير ربنا يخليكوا لبعض علشان كل سنه تعملوا تورته :)

وموضوع الشارع ده بقي للاسف الطبيعي ان الناس تخاف متختشيش لازم سلطه علشان يتعلموا الادب مفيش دافع داخلي للاحترام دي مشكله البشر للاسف


تحياتي

محمد عبد الغفار يقول...

عانيت من كل القصه بحزافيرها بما فى ذلك القتيلة والمباحث قبل وبعد عندما كنت اقطن فى المزبله المدعوه كفر طهرمس بس
فكرتينى بالنكد الله يسامحك انا نسيت وربنا تاب علينا خلاص وبسيب العربيه مفتوحه والناس تيجى تقلى اقفلها يا عمو

كل سنه وانت وجوزك طيبين

الطائر الحزين يقول...

هما مش عاوزين استقرار ولا أمان لانهم لو عاوزين هما 2 عساكر على 10 شوارع الموضوع هيبقى زى الفل

كل عام انت بخير يا رضا باشا
29 سنه يعنى سنه 69 يعنى باقى لى 4 سنين واحصل لك

أحمد (زوج مخنوق ). يقول...

كل عام و ابو رياض بخير
و ان شاء الرحمن السنة الجاية يبقى في عرفات انا و هو بمشيئة الله

و الأمن و الأمان نعمة الحمد لله عليها

فكرتيني بالحوادث
كان عندنا واحد جه سكن في الشقة اللي تحتنا و بعد كده اكتشفنا انه بيبيع بودرة
عادي يعني مفيهاش حاجة
يلا ربنا يرحمه و يغفرله بقى

بوست جميل بتناول ممتع

تحياتي

حواء يقول...

السلام عليكم
كل سنه وهو بخير وسعاده يارب وانتي كمان معه
وربنا يرحمنا بقي من القتل والقتله اللي منتشر في كل حته ده

Appy يقول...

لا مش عادى يعنى طفله تموت مش عادى بقى حرام واحنا دخلين على عيد
وايه الشرطه تقعد تحت بيتككوا ليه هو انتى وزير ولا هما فاضين انتى هتتهزرى لما تبقى لواء هيجوا يقعدوا عندكم

كل سنه وانتى وجوزك طيبين

بنت الغربة يقول...

حبيبتى ياصبرنى - اولا كل سنه وجوزك طيب وعلى فكره ده قد جوزى بس انا جوزى اصغر منه ب3 شهور-وبرضه الباشا جوزى مصر انه هيكمل 29 مش 39 - قولتله ماشى وانا كمان هاكمل 22 (هو حد بيعد ورانا)والعيال الى عندنا جم امتى انا مش عارفه؟؟؟اما بالنسبه للأمن فانا شفت بلاوى اكتر من كده لأن(للأسف)معظم قرايبى ظباط وفى مناصب فى امن الدوله-والامن بيستتب بس فى الشارع الى بيجيوا فيه-اولما يزورونى بتلاقى الشارع اتقلب تقوليش جايين يحاربوا-(بلا نيله)ولما يمشوا تلاقى القلق اشتغل عادى تانى والله انا بخاف انزل بنتى تشترى من البقال واحنا فى مصر وببقى مطمنه عليها فى دبى -مع انى ساكنه فى شقة فى عمارة العيله فى مصر وفى حى كويس بس برضه حصل حالة اغتصاب لطفله وكان الى عمل كده ولد ابن ناس مش مربينه وبيتعاطى مخدرات - وعادى برضه اتحبس شويه وخرج تانى - وماتسأليش ازاى؟فى بلدنا دى كل حاجه ممكنه - ربايجازى الى كان السبب-تحياتى ليك -داليا-

KHALED يقول...

كل عام و الأخ رضا بخير و كل أسرتكم الكريمة بالخير و السعادة
أنا جيت أهنى .... لقيتكم كلتوا التورتة كلها .. ههههه
عموما بالهنا

مودتى

kochia يقول...

كل سنة وانتوا طيبين
وعقبال 100 سنة

وفعلا موضوع القتل ده الذنب 150 جنيه حلق ؟؟
امسكوه واحنا نيجي ؟؟ تفتكري صحيح هيقولوا كدة ؟؟

جنّي يقول...

السلام عليكم ورحمة الله وبركاته

والله فكرة يرافو عليكي كل اسرة تعمل لها كراكون وتقبض على المشبوهين ..

بس انا ها انفذ فكرة احسن الا وهي اني اخد حقي في البلد حجز قسم الشرطة اللي عندنا وفوقه اتنين عساكر هدية وها اشغل كريه العادلي عندي مخبر حرامية ما هو عارف الحكومة كويس ..

مش كدا احسن من الصكوك اللي ها يسكونا فيها ..

وكل سنة ياعم رضا وانت طيب
وعقبال 39 بعد المائة

وكل عام وانتم بخير بحلول عيد الأضحى المبارك
كل عام وانتم على صعيد عرفات
كل عام وانتم من الحجيج
كل عام وانتم من الملبين
كل عام وانتم من المكبرين
كل عام وانتم من المهللين
كل عام وانتم مغفور لكم
كل عام وأنتي حرة يا أمتي

......أخوكم سعيد

كيــــــــــــارا يقول...

حبيبتي صبصب

اول كل سنه ورضا طيب وربنا مش يحرمكم من بعض


ثانيا البقاء لله في الطفله الحمد لله مش بحب الدهب اصلا

ثالثا مش عارفه ماما لسة كانت بتكلم بابا في الموضوع ده وبتقوله فين العسكري اللي كان بيقا ها مين هناك بصوته الاجش ده

مش عارفه اقولك ايه حبيبتي

ربنا يصبر ابو وام البنوته

صبرني يارب يقول...

حاجات عيال

نورتينى يا جميل ومتشكره لكى يا بلدياتي ودايما تنورينى ان شاء الله

صبرني يارب يقول...

محمد عبد الغفار

خطوه عزيزه يا استاذنا

كفر طهرمس ده تبع ايه

وعندك حق احنا بقينا عاملين زي الهند لما كنا بنسمع عنها انك لازم تخبي فلوسك فى الشراب عشان هاتتسرق هاتتسرق

صبرني يارب يقول...

عبد الله

انا معاك فعلا ان الاخلاق غائبه والرقيب النفسي انتحر من زمان

لكن كمان كل الدنيا فيها شرطه

عل الاقل شرطه يا جماعه

صبرني يارب يقول...

الطائر الحزين

طيب يعنى انت 25 سنه هههههههههههههه

وانت طيب وبخير يا طائر

والله العظيم باقول كده يا طائر

فين هاااااااااع مين هناك كانت زي الفل والله

صبرني يارب يقول...

احمد زوج مخنوق

انت وهو وانا وزوجه نقعد نعمل ايه طيب ؟؟؟

وراكم وراكم انا عن نفسي خلاص الخمس سنين عدوا على تاشيرة الحج الى فاتت ناطه فيها انا على طول

ويااااااارب انشاله عمره انا مش طماعه بس اروح الحرم عشان وحشني

وبتاع البودره ده طيب ما كانش بيبعتلكم زياره ولا حاجه ؟

صبرني يارب يقول...

آبي

للاسف انه بقى عادي كل يوم كارثه وكل يوم مصيبه

والامن مش فاااااااضي الامن اصبح امن سياسي بيحمي السلطه

صبرني يارب يقول...

زوجه

وانتى طيبه يارب وبخير وانا وانتى نبقى في عرفه السنه الجايه وناخد ابويا وابوكي محارم هههههههههههههههههههههه

صبرني يارب يقول...

بنت الغربه

والله فكره يا داليا يبقى انا برضه هاكمل عشرين سنه بقى يا حلاوه
امال العيال الى ورايا دول ايه يلا مش مهم

وقرايبك دول عرفينى عليهم اجوزهم من حدانا عشان نبقى ناسبنا الحكومه
هههههههههههههههه

صبرني يارب يقول...

خالد

اها والله وكانت بالشيكولاته يعنى بنغيظك اهو
وانت طيب وبخير

صبرني يارب يقول...

كوشيا

اه والله يا كوشيا توقعي كده

انا كلمت مره الظابط وباقوله تعالوا شوفوا الاخ البلطجي الى هنا ده عامل قلق في الشارع

وده حولني عليه النباتشي المهم الظابط قالي طب لما هو بلطجي سايبينه ليه فى شارعكم
ههههههههههههههههههه

قلتله احنا برضه الى سايبينه البركه فيكم يا فندم
ده مراقب الموقف مستوظف الحكومه حضرتك

حسيت انه اتلم شويه لما لقاني بارد عليه لكن برضه ما عملش حاجه

صبرني يارب يقول...

بيبرس

الله يكرمك يارب ويخليك

واه طبعا اكيد شهر العظماء طالما رضا فيه

صبرني يارب يقول...

جني

ربنا يكرمك يا اخ سعيد وابقى شوفلنا شغلانه طيب فى القسم بتاعك هههههههههههههههههههه

وصكوك صكوك اهو كله صك على قفاا لشعب

صبرني يارب يقول...

مولان

والله يا كوكي انا برضه دايما باقول كده

اهو كان عسكري وكان بيقول هاااااع مين هناك لكن كان الامن مستتب فعلا

وربنا يصبر اهلها يارب ويبرد قلبهم

رومانسى مشاكس يقول...

ايه البوست الجامد ده


بسجل كل اعجابى اهو


وتسلم الايادى


ومع السلامة بقا


تحياتى


رومانسى مشاكس

صبرني يارب يقول...

رومانسي مشاكس

الله يكرمك ونورت

mony يقول...

الاول طبعا نقول كل سنة و انت و جوزك طيبين بمناسبة عيد ميلاده



حلو موضوع كل واحد يجيب كلابشان و يعمل اوضه في البيت زنزانة

فكرة برضه

ماهو الشعب في خدمة الشرطة

مش كيدة ولا ايييييييه؟

حاسوباتيه يقول...

كل سنه وانتم طيبين يارب بس انا كنت عايزه حته من التورته يلا سماح المرادي بسسسسسسسس
البنت الي بتكلمي عنها لو انتي من المنصوره يبقى نفس البنت الي سمعت عنها فعلا عندنا وربنا مع اهلها يارب وبجد حرام الواحد بقى خايف يمشي في الشارع والله

نور الملايكة يقول...

اولا كل سنة وهو طيب ..وعقبال مليون سنة
نيجي بئي للامن بتاعنا ..حاجة فعلا غريبة بتحصل في بلادنا وهو ان لما تحصل نصيبة او كارثة
يبدأ رجال الامن يفوقوااا ..ويعلنوا حالة الطواريء ..لو تفتكري برضوا حادثة المقطم..ما الناس كانت عايشة من زمان في المقطم ..شوفي بئي لما وقع المقطم علي الناس ايه اللي حصل..الكل ظهر ..وزير الاسكان والداخلية حتي الرئيس كمان ..طيب ليه كل ده من الاول ..ليه نستني وقوع ضحايا علشان نفوووق ..
يلا كفاية كده انا همشي بئي .قبل ما ادخل في الغميق ..ههههههههههههههههههههههه
وربنا يصلح الاحوال يارب
تحياتي ليكي ...

همس الاحباب يقول...

لا حول ولا قوة الا بالله
انا حاسس انكم عايشين فى شيكاغوا يا ام مريم
ليه الرعب والقلق ده
ربنا يسترها معاكم
ثانيا كل سنة والاخ رياض بصحة وسعادة
وعقبال 100 سنة
وكل سنة وانتم بخير
تحياتى

صبرني يارب يقول...

حسوباتيه


ايوه انا من المنصوره فعلا واكيد هى نفس البنت

وكل سنه وانتى بخير يا جميل

صبرني يارب يقول...

موني

وانتى طيبه يا جميل

طبعا طبعا احنا فى خدمة الشرطه والحكم واي عيل معدي من قدامهم كمان

صبرني يارب يقول...

طرئعة دماغ

وانت طيب وبخير وسعاده

ايوه احنا كده فعلا بنستنى المصيبه تيجى عشان نقوم على حيلنا

هو اعلان احالة الطواريء اوك ده عادي
انما الى مش عادي ما يكونش فى اساسا جهاز امني محترم

صبرني يارب يقول...

همس الاحباب

اها ماهى مصر كلهاهاتبقى شيكاغوا باين

وانت طيب وبخير يا استاذنا

عمرو يقول...

كل سنه و أنت طيب يا أستاذ رضا و كل سنه و أنتى و العيال طيبين يا أم خالد و ربنا يديم عليكم نعمة الرضا و السرور يا رب
أيوه طبعا وجود رجال الأمن مهم جدا و ممكن أوى يتراجع المجرم عن اٍرتكاب جريمته لو شعر بتواجد أمنى حقيقى فى المنطقه

صبرني يارب يقول...

عمرو

وانت طيب وبخير يا استاذنا

واها لما يبقى فى امن بقى

ahmed_k يقول...

كل سنه وأستاذ رضا بخير
وعقبال مليووووون سنه
وما دمتم أكلتوا التورته يبقى ماشي موافق أخد حاجه ساقعه بالمناسبه دي
ومش حعترض ولا حاجه,
وبالنسبه للأمن فده العادي للأسف الغالبيه العظمى من الشعب ناس
تخاف متختشيش وربنا يصلح حالنا,
أيه المانع أن السلوكيات تكون أفضل بدون وجود العصا الغليظه بالجوار
لكن تقول أيه ,
وأيه أخبار قرايبكم بتوع الغردقه
مش تمام برضو

سلااااااام

صبرني يارب يقول...

استاذ احمد

والله يا أستاذنا انا شايفه ان اه المفروض نكون محترمين من غير عصايه

بس كمان لازم يبقى فى شرطه

وكل سنه وانت بالف خير ونعملك تورته بحالها لوحدك ونبعتهالك عن قرايبنا ههههههههههههههه


على فكره هما مش قرايبى معرفه بس وهما تمام شاور بس وانا تحت امرك

عاشقه وغلبانه يقول...

رحم الله البنت الصغيره
وللاسف احنا اهم مايميزنا كشعب مصري ان ماحدش بيشوف شغله غير لما يتزنق
وهكذا المباحث والامن
بيتحركوا مشاء الله عليهم بعد المصايف
موضوع انهم يمنعوا حدوث الحادثه دي عندهم موضه قديمه
ههههههههههههههههه

اقصوصه يقول...

قتيله عاد!!

الله يرحمها برحمته

طل عام وانتي بخير :)

جنّي يقول...

السلام عليكم

ما شاء الله سبق صحفي كبير

عيد سعيد

صبرني يارب يقول...

عاشقه وغلبانه

والله الشعب المصري بقى ينقصه حاجات كتير

نورتي

صبرني يارب يقول...

جني

الله يكرمك نورتنا

وكل سنه وانت بالف خير

صبرني يارب يقول...

اقصوصه

يارب ويصبر اهلها

وكل سنه وانتى طيبه يا جميل

مواطن مصرى نايم يقول...

كل سنة و باباكوا طيب يا ام مريم
و عقبال مليون سنة يا رب
و ربنا يخليهولكم
ازاى تطالبى بحاجة زى ان المبجلين ينزلوا فالشارع
لييييييييييييييييييييه
هو احنا حننهب
ههههههههه
كفاية انهم بيجروا اى حد من قفاه على مزاجهم و خلاص

طب انا مرة مسكت حرامى
و العمارة كلها كانت بتضرب فيه
صعب عليا اوى
قلت لهم لو حد مد ايده علية حخلية يمشى

احنا شعب طيب و الله
عشان كده بيحصل فينا كل ده

كل سنة و انتوا طيبين يا رب
و السنة الجاية تبقوا فالحج جميعا

جعلوني مريض نفسيا يقول...

كل عام وأنت والأسرة والأمة الأسلامية بخير

همس الاحباب يقول...

عيد سعيدعليكى وعلى اسرتك
وكل سنة وانتى بخير
وكفاية ارحمى الخروف هيعيط فى ايديكى يا ام مريم
ههههههه

Ahmed Al-Sabbagh يقول...

كل سنة وانتم والاسرة بخير

صبرني يارب يقول...

مواطن مصري نايم


يا سلام صعب عليك ؟؟؟

والناس الى سرقهم وروعهم دول ما صعبوا عليك

عموما انا الى يسرق مش المفروض يضرب كده المفروض يروح القسم والسلطه الي المفروض تكون حقانيه تقتص منه حق المجتمع
انما الغوغايه دي مش صح طبعا

ما علينا

كل سنه وانت طيب وبخير يا اسلام ويارب تسمع الكلام

صبرني يارب يقول...

جعلوني مريضا نفسيا

وانت طيب وبخير يا رب ومنورنا دايما

صبرني يارب يقول...

آدم المهدي

شكرا لك ونورت وانا روحت وشوفت فعلا

صبرني يارب يقول...

ًصباغ

كل سنه وانت طيب وبخير

صبرني يارب يقول...

همس الاحباب

وانت طيب وبخير يارب

والله مافيش خروف

فى نص عجل يمشي معاك ولا ايه ؟

ahmed_k يقول...

رفع الحجيج أكفهم
يرجون رحمة ربهم
ورفعت كفي أدعوه
يجعل ثوابك مثلهم
وكل عام وأنتم بخير

حاجات جوايا يقول...

السلام عليكم

ازيك يا جميل
كل سنة وانتى طيبة وبخير
عيد سعيد عليكى وعلى اسرتك الكريمة بإذن الله

مررت لك تاج العيد .. انتظر قدومك لاستلامه

سالى

mahasen saber يقول...

طب ايه البوست اليى اوله غير اخره ده

يعنى اوله نكدا نكدا نكدا حزنا دفين

ربنا يصبر اهلها
ويجازيهم عن صبرهم خير
والحمد لله انا مبلبسش دهب عشان مش حيلتى اصلا

اما اخر البوست فحاجه حلوه يا شيخه فين الجاتوه ولاا حتة من التورته ولاا اى حاجه حلوه

كل سنه وانتى وهو واولادكم طيبيين وبالف خير وسلام وصحه وستر وربنا ما يحرمكم من بعض ابدا

وتفرحوا باولادكم وباحفادكم وانتوا شابطين فى ايد بعض

صبرني يارب يقول...

استاذنا الغالي احمد

كل سنه وانت طيب وبخير وسلامه وشكرا لك

صبرني يارب يقول...

حاجات جوايا

يارب ما اتحرمش منك عنيه هاروح اخده ان شاء الله اول ما اعرف اوصل هناك الا انا محتاسه لسه فى اللحمه

نورتي ووحشتينى ومش فاكره مين الى كان بيدور عليكى وبيسألنى افتكر كانت اليس فى بلاد العجائب

challenger يقول...

كل سنة واستاذ رضا طيب وبكل صحة وعافية وسعادة
وعقبال عمر طويل كله خير وهنا وقرب من الله

وان شاء الله تكون سنة سعيدة عليه ويحقق كل اللي بيحلم بيه
اما موضوع القتيلة والامن فدول يجوا مليون موضوع في بعض نبقى نعلق عليهم بعدين

كل سنة وانتم طيبين

صبرني يارب يقول...

تشااااااااالنجر

يا لهوي

ايه النور ده

محمد والله لك وحشه المدونه نورت والله ايه ده اخيرا يا اخي

كل سنه وانت طيب يا محمد وربنا يكرمك يارب

كررها يا محمد كده خلينا نشوفك بجد انا فرحانه اوي ربنا يكرمك يارب

Anonymous يقول...

طبعا شدتنى مدوناتك اللى من القلب دى وانا قاعد وابتسم وأتخيلك فى منظر الفلاحه اللى ماسكه لاب توب وباليد التانيه بتسقى الزرع لغاية ما توقفت عند يوم 1 ديسمبر كل سنه وانتوا كلكم بخير يارب .. اما حكاية البنت دى بصراحه آلمتنى جدااا صحيح طول عمرى من وانا يمكن فى 6 ابتدائى ممكن اشوف حد قتيل وبسهوله كان متوفر واتعودت على المنظر ده لكن طفل او طفله لاحول ولاقوة الا بالله ربنا يحفظ اولادنا جميعا ياااااارب .. وعلى فكره جالى شغل عندكم فى المنصوره رابع يوم العيد واعتذرت اظهارخلاص مافيش هروب من الصعيد .. يلا الحمد الله .. دايما بقولك خليكى جنب اليس يارب يكرمها واشوفها زيك كده ياااارب ويارب يدوم عليكم نعمة راحة البال وكل سنه ورضا طيب يارب .. وتصبحوا على خير .. هاكمل بكره اذا كان فيه لسه عمر باقى .
عمووو مدحت