الاثنين، 15 ديسمبر 2008

جزمه ....لكن اجدع من رصاصه !!!!

يعنى ما شوفتش قبل كده فى الاخبار ولا فى التلفزيون حاجه فرحتني ولا بردت قلبي زي جزمة منتظر بصراحه
يمكن لو كان ضربه رصاصه كانت تبقى نهايه خساره في البنى ادم ده
ومش بعيد كان يبقى شهيد الارهباب والحركات دي
هى كده حلوه اوي
جزمه فى خلقته بعد الى عمله فى العالم كله مش فى العراق بس ولا المسلمين بس
ولو حد خد باله هو ازاي اتغااااظ وجز على سنانه بعد اول جزمه
اد ايه كنت فرحانه بالمشهد ده يا جماعه
هايعيش بعاره طووووول عمره
وده راينا بقى
تقول ايه بقى بنعبر عن راينا بالجزم هممممممممممج
مش الى رمى الجزمه
لا الى اترمى فى وشه الجزمه والله هو الى همجي
ويستاهل شادر جزم قديمه بحالها فى دماغه
منتظر ربنا معاك ونشوفك منتصر ان شاء الله
ويردك لاهلك على خير
ملحووظه:
قلبي حاسس انهم عندنا بعد كده لو عملوا مؤتمرات صحفيه عندنا هايقلعوا الناس الجزم على الباب مافيش غير جزمه واحده الى هاتخدل هههههههههههههههههههه
ومش بعيد يحظروا التعامل فى الجزم فى السوق
ويمشوا الشعب حاااااااافي
اها ما هو احنا لو عملنا زي منتظر يبقى هانعمل خلل فى السوق
الجزم هاتخلص ومش هاتكفي الى عايزين يتضربوا بالجزم عندنا

هناك 52 تعليقًا:

أحمد (زوج مخنوق ). يقول...

بعد كده هيعملوا المؤتمرات في جامع
علشان يبقى متأكدين ان محدش داخل بالجزمة

تحياتي

صبرني يارب يقول...

هههههههههههههههههه

جامع ؟؟؟

لا يخافوا برضه انت عارف الحساسيه الى عندهم من الجوامه ومرتادي الجوامع

ما تسكت ياعمي سيب الجوامع نضيفه

أليس في بلاد العجائب يقول...

هيخافوا يتدعي عليهم و في بيت الله يعني نسبة الاستجابة هتخليهم يفكروا الف مرة :)

تخيلي جزمة منتظر دي بعد سنين هتتعرض في مزاد .. تفتكري هيوصل تمنها لكام مليون ايه ...

ربنا يكفيه شرهم ويرده لاهله سالم يارب

عمرو يقول...

شفتى أبن اللئيمه بوش وطى و أتفادى الفردتين ورا بعض بحرفنه فكرتنى بعبد السلام النابلسى لما كان بيتفادى الحاجات اللى بترميها عليه زينات صدقى
بس رغم روعة المشهد و بهائه و جماله اٍلا أنى تألمت فوق الوصف لأنين منتظر و الحراس العراقيين يضغطون على رقبته و صدره بأرجلهم و هو يا حبيبى بيأن من الألم
ربنا معاه اللى رد الأمل فى النفوس و بأيه ؟ بالجزمه !!

حاجات جوايا يقول...

كل جزمة وهو طيب
ههههههههههههههه
عقبال اللى عندنا

نهر الحب يقول...

ربنا يحفظ
منتظر من ايدى الخونة

DR.HAMAS يقول...

ربنا ينصرنا عليهم

و يعيننا نرجع لديننا

لأن ده أقوى من مليار جزمة

و اكثر وقعا





د.حماس

همس الاحباب يقول...

يستاهل مليون جزمة بصراحة
بس انا عايز اعرف مصير الجزمة ايه
هههه

جنّي يقول...

والله انا مستعد امشي حافي طول عمري بس اضرب اللي بالي بالك باقذر صرمة ( جزمة ) عندي ..

سلام

واحدة مفروسة يقول...

ههههههههههههههه
و الله يا صبرني يا اختى
انا كنت نايمة و جوزي جالى يزفلي الخبر بفرحة
انا افتكرته كسب حاجه و لا اترقى
ههههههههههههههههه
بيصحيني و يقولى قومي بوش انضرب بالجزمة
هههههههههههههههههههه
طبعا اختك ابتسمت و كملت الحلم
قلت لما اصحي ابقى اشوف الجزم اخبارها ايه
و ملاقيتشي فيكي يا نت و لا الفضائيات الا و ذايعة الموضوع
تقوليش الناس مبؤءة منه يا اختي و فرحانه فيه
يالله ختامه جزم هههههه مش مسك
بس الجزمة راحت فين؟؟؟؟؟؟؟
دلوقتي فى مصراوي بيقولوا الجزمة مطلوب فيها 100 الف دولار
يعنى الراجل حيغتنى يا اختى
هههههههههههههههههههههههههه
جتنا نيله فى حظناا الهباب

حته نق كده على ما قسم

واحدة مفروسة يقول...

رجعت تاني
تفتكري يا اوختى لو عملوه عندنا صحيح حيقلعو الناس الجزم و يمشوهم حافيين؟؟؟؟؟؟؟
ياسلام لو كان راح اليابان و لا الصين و اتحدف بقباب خشب يابانى معتبر
هههههههههههههههههههههههههههه
بس لعمك ده مش بيتكسف و لا بيجراله حاجه ده بقى لوح تلج مش بيحوء فيه
سلام

صبرني يارب يقول...

اليس فى بلاد العجائب

يا ماما ده عندك هناك فى بلاد العجائب اما الى هنا دول مش بيفكروا فىا لموضوع ده اصلا

والجزمه الشيعه هناك هايعملوها مقام ويطوفوا حواليها

صبرني يارب يقول...

عمرو

انا بقول برضه الواد منتظر ده نشانجي فل
بس ابن الهرمه التاني باينه متعود عليها

وربنا معاه منتظر سمعته وقلبي اتقطع عليه

صبرني يارب يقول...

نهر الحب

والله هو ده الى صعبان عليا يا بنتى انه هايتعذب يا عينى

صبرني يارب يقول...

حاجات جوايا

اه والله عقبال عندنا

صبرني يارب يقول...

همس الاحباب

زي ما قلت لاليس يا خالد هايعملولها مقام الشيعه ويلفواحواليها

صبرني يارب يقول...

د حماس

ماهو ما قلناش حاجه نرجع لدينا بس الجزمه كيفتنى برضه

صبرني يارب يقول...

مفروسه حبيبتى

والله العظيم انا عايزه اضرب واحد مش بقاقيب لا بميت برطوشه قديمه على راسه يمكن يحس

وبطلي نووووووووووووووم يا لهوي عليكى

صبرني يارب يقول...

جني

لا انا عندي جزمتين عشان لو احتجت واحده ما امشيش حافيه ههههههههههههههه

صبرني يارب يقول...

والله يا بيبرس ا نا كنت شايفاه متغاظ وده فرحني اوي اوي

نورتنا

mony يقول...

طبعا كلنا فرحانين باللي حصل يا صبرني


بس هل هم فهموا يعني ايه حد يحدف حد بالجزمة

لان ثقافتهم غير ثقافتنا

و الجزم عندهم معناها مش زي عندنا


يارب يكون وصلهم المعني


اما بخصوص الراجل
فالله يرحمه هو و اهله كلهم

عاشقه وغلبانه يقول...

الرصاص للي زي ده شرف مايستاهلوش
اما مقامه الجزمه الحقيقه
ياريت كان من منتصر 2 او 3 كمان بجزمهم يعرفوه قيمته
يعني لو واحد كمان من اللي قاعدين كان عنده دم وضرب الزفت ده بجزمته كانت بقت مهزله وانتفاضه لشعب داس بوش عليه في يوم بجزمته
الله يلعنه مكان ماهو
وينصر منتظر امين يارب العالمين

حاسوباتيه يقول...

اضم جزمتي لجزمته مع ان خساره فيه الجزم دي لانه اقل حتى من الجزم بجد مبسوطه قوي قوي بس ياريت كلنا ندعيله يفك كربه الانسان الجميل منتظر الزايدي وربنا معاه

:: Salma Emad :: يقول...

هههههههههههههههه

بجد بجد حتته لقطه تحفه

انا كل شويه اتفرج عليها و افضل اضحك

بجد يعني تسلم ايد منتظر
و يبارك فيه علي اللي عمله


و ربنا ينجيه منهم علي خير

صبرني يارب يقول...

موني

لا يا موني الا الجزم كلها ثقافه واحده وحياتك
انتى ما شوفتيش هو وشه بقى عامل ازاي بعد الجزمه

صبرني يارب يقول...

حاسوباتيه

والله لو جزم قديمه مش مشكله اهو نعمل احلال وتجديد برضه

صبرني يارب يقول...

عاشقه

رضا قالي نفس الكلمه شرف ما يستهلوش كان هايعمله بطل
تحياتي لكى ونورتي

صبرني يارب يقول...

ام يوسف

انا كل شويه اجيب قنوات الاخباراتفرج حبه استمخ من اللقطه وامشي
ههههههههههههههههههه

بس انتى نورتينى يا جميل ويارب دايما منوراني

Appy يقول...

هو عبر عن خنقه جواه بس بصراحه لو بوش لسه قاعد هيعمل كده برضه فيه ولا لا

صبرني يارب يقول...

آبي

مش عارفه يا آبي بس اعتقد انه الى عمل كده ما يهموش الحكايه دي

ويمكن انا باحكم بعقلي وطبعي

أنا حر يقول...

والله في غيره كتير يستحقوا يتضربوا بالجزمة
بس انا الحقيقة كنت هكون فرحان اكتر لو اللي حصل ده محصلش من صحفي وكمان لو كان حصل في مكان غير مخصص للحوار والتحاور
الصحفي المفروض بيمتلك اسلحة حقيقية غير الجزمة لو هو مش مقتنع بيها ميبقاش صحفي
تحياتي

صبرني يارب يقول...

أنا حر

بص حضرتك انا شايفه ان مش دايما الكلام ياثر في الناس

خصوصا لما ناس يكون لعبتهم الكلام

والجزمه الي اتحدفت دي مش ابدا معناها ان احنا كده خدنا حقنا

ولا ان احنا كان قصدنا نعوره بالجزمه

انا شايفه انه تصرف تعبيري جدا عن كرهنا للراجل ده واثبات لشعبه الى هو بيضحك عليه وبيقوله ان الشيعه كانوا من الفئات المظلومه المقهوره والى هو حررهم
ومنتظر شيعى

والصحفى مش كائن فضائي يا استاذنا

وانا عن نفسي رغم انى ضد قلة الادب وسوء التعبير الا انى احيانا وانا قاعده قدام التلفزيون باسمع واحد من الحكومه بتاعتنا بيتكلم عن الانجازات وبيقول كلام يفررررررررررررس

حقيقى باتمنى اكون واقفه قدامه واكون باعرف اقول كلام قليل الادب ويكون فى ايدى مرزبه واديله على دماغه

بجد مش هزار على فكره

بس انا مش باعرف اقول كلام قليل الادب بس باعرف اضرب بالمرزبه

تحياتي لحضرتك ونورت

من غير عنـــوان يقول...

أنا كمان
الجزمة دي أثلجت صدري زي الأيس كريم

تحياتي

صبرني يارب يقول...

من غير عنوان

نورتنا والله

ممكن ايس كريم شيكولاته عشان انا باحبه ؟؟؟

واحــ الفكر و القلم ــة يقول...

نسيت اقولك انى سالى
حاجات جوايا
بس دى المدونة التانية

واحــ الفكر و القلم ــة يقول...

نزلت اجابة التاج فى الكومينتس عندى يا جميل لو تحبى تشوفيه

صبرني يارب يقول...

واحة الفكر والقلم

سالي انا عارفه يا حبيبتى والمدونتين عندي على القايمه بتاعتي

وان شاء الله انا جايه اشوف التاج اهو

بنت الغربة يقول...

حبيبتى ياصبرنى انا بقالى كتير ماجتش عندك من البرد والله - وحشتينى - انا راى فى الموضوع انه لو كان عندنا كان انضرب بجزمه حريمى بكعب رفيع تخرم دماغه - او كعب دبابه يبطحه او حتى قبقاب خشب يكسر مناخيره -لان جزم الحريم اقوى استخدام من الرجالى - احنا نعمل اجتماع نسائى ونشرط على كل ست تلبس كعب عالى على ذوقها ونقعده فى النص ونديها ضرب - وهو عمره ماهيرفض اجتماع حريمى ابدااا - وحشتينى

SemSem يقول...

بصراحة اللى حصل ده حاجه هتتسجل فى التاريخ

والدنيا كلها مش هتنسى منتظر الزيدى

يارب فك كربه

تحياتى
اتمنى زيارتكم لمدونة حواديت

ahmed_k يقول...

هههههههههه
أنتي عارفه أنا بتسائل لما راح بوش أفغانستان بعد كده وعمل هناك مؤتمر صحفي كان الصحفيين لابسين أحذيتهم ولا حافيين ؟؟؟؟؟ ههههههه

صبرني يارب يقول...

بنت الغربه

عنيه يا جماعه اجيبلكم دفايه للبلوجر كله ولا يهمكم هههههههههههههههههههههه

والله انا كمان فى البرد مش باعرف اقعد كتير عشان البطانيه بتبقى احلى منكم بصراحه

صبرني يارب يقول...

استاذ احمد

والله هما مش لاقيين ياكلوا هناك فتقريبا كانوا حافيين هناك
ههههههههههههههههههههههههههه

صبرني يارب يقول...

سمسم

والله هو ربنا ارادله الوصمه دي فى تاريخه بصراحه

حضرتك نورت وعينيه حاضر هازورك ونتشرف بك

بس خلاص ... يقول...

دلوقتى بقا فى عقده جديده عند الامريكان اسمها عقده الجزمة ...وهيمشى بوش ويقول انا مانضربتش بالجزمة انا بس صديتها ...انا مانضربتش بالجزمة انا بسصديتها ياماناويلى يانا ياماناويلى يانا .....
ولما تشتد عليه الحاله ..هيرجع لاصله ويمشى حافى هو وعيلته

صبرني يارب يقول...

بس خلاص

ههههههههههههههههههه حلوه

بجد حلوه

عمرو يقول...

أيوه شكل بوش كده محترف تفادى جزم
عامل زى القرد أبن اللئيمه

صبرني يارب يقول...

عمرو

ايوه يا عمرو شوفته فى اللعبه عندك
هههههههههههههههه

صبرني يارب يقول...

من غير عنوان

ههههههههههههههههههههههههه

ايوه هو بوش هايخلص نكت مننا

شفـقــة و إحســــان يقول...

وحياتك ده يستاهل مليون جزمة مش جزمة واحدة
تحياتى

صبرني يارب يقول...

شفقه هانم واحسان بيه

تعيشي يارب

اها خساره حتى فيه الجزم

نورتي

سيف الدين اليزل يقول...

طب حد يقولي ياناس حدعندو اخت بالحلاوه ده زي اختي شوفو خفة الدم قالت ايه علي بوش متعرفش ان الجزمه الي طارت في الهوي ده مش جزمه داه بنص علشان الاتنين كانو لاحقين بعض بسرعه يعني اسرع من الصاروخ الي ايران هتضرب بيه اسرائيل قريب انشاء الله
والسلام علي من اتبع الهدي

صبرني يارب يقول...

سيييييييييييييف

ازيك عامل ايه حمد الله على سلامتك يارب تكون بالف خير كده انا اطمنت عليك بس مش فاتح الميل لييييييييييه

ربنا يكرمك يا سيف ونورت

المدونه وصاحبة المدونه نورت