الثلاثاء، 3 مارس 2009

الحاجات الانسانيه(تحديث ماسلو)

ابراهام ماسلو






السلام عليكم يا قوم




والاول انا اسفه خالص عن الكلام الى قلته فى البوست الى فات معلش كنت مضايقه شويه عاااااادي بتحصل فى احسن البلوجز سامحوني انتوا حبايبى ما اقدرش اولع فيكم .




المهم ندخل بقى على موضوع مهم جدا موت نفسي اتكلم فيه من زمان جدا جدا بس قلب ايمان بقى شغلتنا بالاضافه الى انها جابتلنا وجع الدماغ




المهم هرم ماسلو ده يا جماعه انا احبه احبه احبه . وشايفاه رااائع وعم ماسلو ده كان بيفهم ودماغه حلوه بالذات فى موضوع الهرم ده عجبني جدا.




انا من هواة علم النفس وشايفه انه علم مهم اوي اوي وجميل اوي اوي. بصرف النظر عن كون العلماء بتوعه فى منهم ناس لاسعه كتير ومخها مهوي وفيه شبابيك كتير فالحمد لله اني يادوب باقرا فيه كده على خفيف اهو الواحد يحافظ على الربع الى باقي .




خلينا فى موضوعنا :




هرم ماسلوا بيرتب الحاجات الانسانيه دي حسب اهميتها من قاعدة الهرم لراسه


ولو بصيت للهرم تلاقي انك كل ما بتطلع لفوق الحاجات بتبقى ارقى واعلى واسمى لكن كل ما بتنزل لتحت فى الهرم بتكون الحاجات الانسانيه اهم واكثر الحاحا.




الحاجات الانسانيه مرتبطه بالغرائز الانسانيه والى اتخلقنا احنا بها جاهزين لا نقدر نتحاشاها ولا نقدر نهرب منها ولا نلغيها


لكن نقدر نهذبها . نقدر نقننها ونقدر بشوية مجهود وجهاد نفس امرنا به ربنا سبحانه وتعالى نتحكم فيها بدرجات معينه حسب الظروف والفروق الفرديه بين الاشخاص .




وطبعا الحاجات الانسانيه الفسيولوجيه هى قاعده الهرم لانها اكثر الحاجات الحاحا على البشر . لانها زي ما وصفها ماسلو حاجات البقاء .




ايوه من غير ما نحقق اشباع للحاجات دي مش هانفضل عايشين .


وقسمها الى نوعين حاجات بقاء الفرد (زي الاكل والشرب ) وحاجات بقاء النوع البشريه يعنى (زي الحاجه الى الجنس والحاجه الامومه )




وانا شايفه ان ده اساسا كلام معقول اوي وكمان بيتجلى فيه من وجهة نظري الى على ادها اعجاز الخالق سبحانه وتعالى فى النفس البشريه .




تخيلوا لو واحد جعان وعطشان وبدأ يحس بخطر انه مش هايلاقي اكل ولا شرب تفتكروا هايفكر فى باقي حاجاته ؟؟؟




اعتقد لا خالص ولا حتى حاجات بقاء النوع لا هو هايركز انه يلاقي شرب واكل الاول . طيب حصل اشباع للحاجه الاولى وهى حاجات بقاء الفرد




يبدأ يدور على اشباع الحاجه الى بعدها وهى بقاء النوع طيب فرضا هو حقق اشباع لحاجه الجنس طيب ده لوحده ما يحافظش على النوع




لسببين لانه ممكن يشبع حاجته الجنسيه من غير ما يخلف خصوصا فى عصر ماما كريمه


وللسبب التاني انه لو خلف وما عندوش غريزة الامومه والابوه يبقى الي خلفه ده اساسا مش هايتربى ونسبة نجاته من الموت هاتقل جدا .


يبقى سبحان الله تعالى ما وضعش في خلقه غريزه الجنس من دون غريزة الامومه عشان تكتمل المنظومه




وفى نفس الوقت الغريزه الجنسيه دي مش وظيفتها التكاثر بس وده الى هانشوفه لسه فوق . لان لو كانت وظيفتها التكاثر بس كانت بقى لها شكل مختلف تماما مرتبط بالتكاثر بس زي ما هى موجوده عند بعض الحيوانات والطيور مثلا .




تاني درجه فى الهرم هى الحاجه للامان . اها ما هو لازم بعد ما اشبع حاجاته للبقاء يحافظ بقى عليها وعلى نفسه ويأمن نفسه وممتلكاته الى بتمثله يمكن فى المقام الاول سبب او وسيله لتحقيق حاجاته الانسانيه الاوليه .


واضحه اعتقد النقطه دي ؟




ثالث درجه هى الحاجات الاجتماعيه :


ودول طبعا كتير ومتشعبين وبيختلفوا من مجتمع للتاني ومن فرد للتاني ونبدأ هنا بقى نشعر برقي الحاجات واتجاها الى اتجاه بشري وعقلاني اكثر من كونها جسدي (مش عايزه اقول حيواني عشان مش باحب التعبير ده وانا باتكلم عن الحاجات الانسانيه وان كنا نرتبط بالجنس الحيواني فى حاجات كتير شئنا ام ابينا)




محتاج هنا الانسان الصديق ومحتاج اسره مستقره وسعيده ( مش مجرد اسره والسلام ) وتبدأ تظهر تاني الغريزه الجنسيه بس بشكل عالي المستوى هنا مش عايز بس اشباع جسدي عايز كمان اشباع نفسي من الغريزه دي عايز الفه جنسيه ورضا جنسي من الشريك




وهنا برضه سبحانه تتجلى حكمته فى ان الغريزه الجنسيه مش بس للتكاثر وانما هى ـ لما تكون ناجحه طبعا ـ وسيله للسعاده والاتصال بين الزوجين وخلق رابط ما بينهم جسدي ونفسي لا يضاهيه اي اتصال اخر بين اي شخصين وعليه بتتكون علاقه بين الزوجين ارتباطيه غير عاديه وغير متوفره الا بين الزوجين .






رابع درجه فى الهرم هي الحاجه الشعور بالذات :


وهى ان الفرد بيحب يحس بنفسه انه حاجه مهمه . لوحده حاجه مهمه . مش عشان هو ابن فلان او عشان هى زوجة فلان . لا بيحب يحس ان له انجازات شخصيه وانه محترم لكونه وشخصه هو . وطبعا عمره ما هاوصل لتحقيق الحاجه دي الى لو اشبع الرغبات الى فاتت او حتى شرع فى اشباعها .




وطبعا الحاجه الى الشعور بالذات دي من الحاجات من اهم دوافع النجاح والانتاج للبشر. يعنى الفرد عشان يشبعها لازم يكون فرد ناجح وعامل ومنتج عشان يقدر يحترم نفسه ويشعر بذاته اولا .




حد فاهم حاجه ؟؟؟




خامس درجه واخرهم هى الحاجه الى تقدير الذات او اثبات الذات :




وهنا بقى نيجى لاخر درجه والى بيكون فيها الانسان اشبع كل رغباته وبقى فعلا انسان محترم وعليه هومحتاج بقى يثبت نفسه للمجتمع ويحصل على تقدير المجتمع الى هو عايش فيه . ويحقق انتصارات وطموحات ونجاحات.


وطبعا طبعا دي بتختلف من شخص الى اخر . حسب مجاله وحسب درجة طموحه وشريحته الاجتماعيه وحاجات كتير اوي


يعنى اكيد اكيد لما يكون واحد معاه دكتوراه هايكون طموحه وحاجة اثبات الذات وتقدير الذات عنده تشبع لما مثلا مثلا يعمل بحث عالمي او يكتشف ا كتشاف عظيم فى مجاله او او ........




لكن اكيد كمان الى بيشتغل مثلا فران فى مخبز طموحه وحاجته الى اثبات ذاته تتحقق لما يكون صاحب مخبز مثلااااااا




مفهومه دي ولا ايه؟؟؟




وطبعا طبعا عشان الواحد يوصل لاشباع كل احتياجاته دي لازم يكون هو بقى كده انسان متوازن ناجح وميه ميه


يارب كل الناس ان شاء الله




وطبعا ماسلو هنا رايه ان ما يقدرش ينط درجات من الهرم ده وينفضلها . لا لازم يمشي فيهم كده كلهم بالترتيب وعشان يطلع درجه لازم تكون الى قبلها اشبعت فعلا




انا شايفه انه بعد اشباع حاجات البقاء ممكن اوي ان باقي الحاجات دي تمشي كلها مع بعضها انماااا لازم يكونوا ماشيين بنجاح يعنى ما يجيش واحد مش مؤمن بنفسه ومش واثق من نفسه ويحاول يخلى الناس يحترموه ويقدروه




كلا البت يراك الناس بعينيك فعليك ان ترى نفسك جميلا اولا .




او مثلا ما يجيش واحد فاشل اجتماعيا ويقول والله بس انا حصلت على تقدير الذات . ازاي يعنى المجتمع هايقدرك ازاي وانت ما لكش علاقات ناجحه فى المجتمع ده ؟؟




مش عارفه دي وجهة نظري ووجهة نظر عم ماسلو .




ومش عارفه قدرت اوصلكم الكلام ولا لا




اه وكنت قريت من فتره موضوع فى مدونة راجي عفو الله اسمه الحاجه الى الرضا حلو يا ريت تقروا




وطبعا رغيت وصدعتكم


طب وايه يعنى امال انا باجي البلوج ليييييييه




الى اللقاء فى الرغي القادم




ك ا

هناك 61 تعليقًا:

عاشقه وغلبانه يقول...

اول رد
هيييييييييييييه

عاشقه وغلبانه يقول...

انا بكره الفلسفه
بس الهرم ده عاجبني
ده احلي من هرم خوفو اللي في الجيزه
هههههههههههههههههههههه
لو حصل لخبطه لترتيب الهرم ده او تركيز علي درجه واهمال درجه تانيه هانحصل علي انسان مضطرب الي حد ما
او مش بيأدي دوره في الحياه كويس
في ناس بتنسي القاعده وبتفكر في القمه بس ودول عمرهم بيتخطف منهم

صبرني يارب يقول...

عاشقه وغلبانه

منوره يا جميل فى اول تعليق

دي مش فلسفه ده علم نفس هناك فرق

وتمام كده الى فهمتيه من خلال الهرم ده

وعجبني اوي كلمتك

في ناس بتنسي القاعده وبتفكر في القمه بس ودول عمرهم بيتخطف منهم

تحياتي ونورتي يا جميل

احساس طفلة محبة للرومانسية بس واقعية يقول...

صبرنى انا بحب جدا علم النفس
ومش قادرة اقولك فادنى قد اية فى حياتى رغم انى متعمقتش اوى فى دراستة
نيجى للهرم الجبار دا
اول مرة ممكن الواحد يشوفوا ممكن يلاقية بسيط وسهل انه يفهموا
بس تحليلك لية راح لنقط ومهمة و بتعمق اكبر

بس علم النفس علم تحليلى لازم بيدخل فية ظروف الحياة حولين الفرد وتأثيرها علية مش بيحلل شخصية الناس وتصرفاتهم بس

يعنى النظرية دى للاسف مش بتمشى على كل الناس
لان فى ناس كتير كل همهم فى الحياة انهم يكونوا اسرة ويجيبوا اطفال ويربوهم بعيدا تمام عن هيربوهم ازاى
او الاسرة هتكون سعيدة ولا لا
ومش بيطلعوا من الطبقة الاولى للهرم
وفى ناس العكس بتبقى عايزة تنط وتوصل للقمة وممكن دا يكون على حساب اى حاجة فى حياتهم

يعنى التوازن والصبر والمحاولة والفهم
هم اساس الوصول لقمة الهرم

بجد تسلم ايدك يا احلى صبرنى
تقبلى مرورى

صبرني يارب يقول...

طفله رومانسيه

حبيبتى ربنا يكرمك

وطبعا علم النفس تحليلى وطبعا بيدخل وياثر فيه الطروف والبيئه المحيطه للفرد

لكن بالنسبه للحاجات الانسانيه اعتقد هىواحده بتفاوتات بسيطه لكن القاعده واحده

وتحياتي لكي يا جميل ونورتي

اصحى يا مصر : اسلام جاويش (ديو) يقول...

بقولك ايه
الكلام دا المفروض ينزل فى كتاب
ايه دااااااااا

على فكرة رسمتك هبعتهالك بس قولى يارب بقى والاسكانر يتصلح

حواء يقول...

انا كمان بحب علم النفس وكنت بقرأ فيه قبل متجوز
لكن بعد متجوزت البيت والحياه شغلتني خلتني معرفش حتي اذاكر دروسي
لكن عند ماما هنا شويه كتب جميله كنت جيباهم ايام الحريه من معرض الكتاب
بوستك ده هيخليني افتحهم واقرأ فيهم تاني زي زماااااااان

صيدلانيه طالعه نازله يقول...

بصى يا ستى محدش حيقدر يوصل لارقى درجه فى الهرم غير اما يشبع كل الحاجات اللى تحته و محدش حيحس بالرض عن الذات غير اما يحس الاول بالامان و مش ممكن انسان معندوش اشباع لحاجاته الانسانيه الضروريه و الاساسيه و حيقدر يوصل لفوق
لازم الانسان الاول يحس انه انسااااااااان و بعد كده كله سهل
تحياتى

من غير عنـــوان يقول...

طبعا معلومات قيمة ..تشكري عليها...

والشيخ الغزالي.. رحمة الله عليه... عنده كتاب مهم اسمه... فقه الأولويات...

ياريت الناس ترتب احتياجاتها...

برافو عليك..

أمنياتي

حبيبه سى السيد يقول...

بصى يا جميل

هو فعلا راية حلو اوى ومنطقى

بس فى واحد ممكن يكون مش سعيد فى حياتة وبيتة بس ناجح جدا فى عملة

وناس كتير اوى ممكن تبقى كدة

يعنى مش شرط انه يشبع حاجاتة الاجتماعية الاول

بس زى ما قالت عاشقة وغلبانة عمرهم بيتخطف منهم من غير ما يعملوا حياة


تحياتى

حسام غانم يقول...

جاااااااااامد جدا

أنا بموت في علم النفس ده جدا

أعتقد المصريين مش بيدوروا على الحاجات اللي في قمة الهرم

عشان الحاجات اللي تحت مش موجودة

جعلوني مريض نفسيا يقول...

هرم اوسلو ده ميطبقش علي المصريين طالما التجربة والأختبارات دي اتعملت برة يبقي متمشيش معانا واكبر مثال علي كده كتير بنلاقي واحد مش لاقي ياكل هو ومراته وعياله ورايح يشتري موبايل وبكاميرا كمان

شمس النهار يقول...

انا جيت اهو مالاقيتش حد مزعلك خالص
شاوريلي عليه هو فين

صبرني يارب يقول...

اسلام ديو

اوك هانزله فى كتاب ابله نظيره ههههههههههههههههههههههه


ايه ده انت رسمتني ؟؟؟؟؟ يا للهووووول
طيب يلا بسررررررررعه هاتها بقى

صبرني يارب يقول...

صيدلانيه

اها هو ده فكرة الهرم اساسا

تحياتي ليكى ونورتي ياجميل

صبرني يارب يقول...

حواء

طيب الحمد لله ان انا شجعتك على كده

نصيحه مني

انتي اول ما تتجوزي الحياه هتاخدك وتسيبى مخك يعيش فى الحلل

بليز ما تخليش الحاله دي تطول بسرعه امسحي دخان الطبيخ ولمعي مخك كل فتره كده عشان ما يصديش ويقفش

صبرني يارب يقول...

من غير عنوان

يا خبر ايه النور ده

بس ايه دورت حوالين الرد الاقي كحكايه كده ولا اي حاجه من الصباحيه ما لقيتش هههههههههههههههه
يلا مش مهم انا عامله دايت
مبروووك تاني يا استاذنا

وكتاب الغزالي ايوه انا سمعت عنه وقريت عنه بعض اجزاء على النت بس ما قريتوش كله للاسف رغم انى من المحبين لكتابات الغزالي

شرفتنا يا فندم

صبرني يارب يقول...

زوجه عنيده

اه طبعا بس ما يكونش وصل للاشباع الكامل لحاجاته فعلا

ورغم كل شيء ورغم كل نجاح هو ما بيبقاش انسان ناجح ولا سعيد

قلوب الناس ياما مداريه يابنتى

صبرني يارب يقول...

حسام غانم

والله المصريين لو يعرفوا بوجود الهرم اده اساسا كان يمكن حالنا يختلف ههههههههههههه

وعموما فعلا احنا شعب متهان اداميا

صبرني يارب يقول...

جعلوني مريضا نفسيا

ماهو ده الى بنقول ايه خلل فى الهرم بقى

انه يكون بيدور على اثبات الذات وهو ااساسا ما عندوش تقدير لنفسه ولا احساس حقيقى انه حد مهم ومحترم

فطبعا مش هايحصل ابدا على احترام المجتمع بيحاول يعمل بقى تصرفاته هبله تعوض النقص الى عنده
زي انه يلبس غالي اوي او يجيب موبايل غالي اوي .........

تحياتي لك

صبرني يارب يقول...

شموسه يا حياتي

لا ابدا ما حدش مزعلني موضوع الزعل ده راح وانتهى

انا كنت باقولك تيجى على البوست الى فات
خلاص بقى حصل خير

تحياااااتي ليكى يا جميل

جنّي يقول...

السلام عليكم

بداية نأسف للتأخير في زيارتكم

ثانيا كل عام وانتي والمدونة بالف خير ودايما تمتعينا برغيك الهادف ( هي متأخرة شوية معلش سامحيني ) لكن من حسن الطالع اننا في نفس العمر التدويني )

ثالثا الموضوع رائع وطريقة تحليلك للموضوع ممتازة خاصة الامثلة التوضيحية ..

welwel يقول...

السلام عليكم..ايه ده ..اكل وعلم نفس كمان ..لا كده كتيير اوى..
عارفه ربنا سبحانه وتعالى قال فى كتابه العزيز فى اخر سورة قريش
بسم الله الرحمن الرحيم (فليعبودوا رب هذا البيت * الذى أطعمهم من جوع و آمنهم من خوف )صدق الله العظيم
و ده كان ترتيب الحاجات الانسانيه اللى امر بالايمان بعد الشبع الشعور بالامان.. و انا بيتهيالى ان مثلث او هرم ماسلو (اسمه كده )اتبنى على القاعده اللى ارسها المولى عز وجل...
وزى ما قولتى فيه فرق بين الفلسفه وعلم النفس اللى بيدرس السلوك الانسانى من الناحيه العقليه بقصد التوصل الى المفهيم اللى نقدر بيها نفهم دوافع هذا السلوك والتنبؤ بيه , وضبطه والتحكم فيه...
فيه كتب كتيييير اوى اتكلمت فى الموضيع دى
بس فيه الكتالوج الربانى للنفس البشريه .. كتاب الله .
فكرة جميله صحصحة العقول بعد امتلاء البطون..
تحياتى

ستيته حسب الله الحمش يقول...

ياختي الأجانب دول عقلهم نور بشكل

هرم فعلا حقيقي بس انا عندي نقص في الحتة اللي فوق بتاعة الاختراعات والأبتكارات
ياأما نابليون ضربها عندي زي مناخير ابو الهول
يا اما المدرسين استأصلوها وانا في مدارس التهييس القومية
ياأما انا عديمة إثبات الذات بوتيتا وعديمة النفع برضيك

تحياتي على بوست تحفة ويارب الناس وخاصة الصغيرين شوية يورونا اخر الهرم

صبرني يارب يقول...

جني

يا فندم حضرتك تنور فى اي وقت

وكل سنه وحضرتك طيب وبخير

وشرفتنا

صبرني يارب يقول...

ويل ويل

الله يكرمك يارب

وفعلا فعلا انا طبعا مؤمنه ان الكتالوج الرباني فيه كل حاجه ماشيه بالتمام

والى عاجبنى فى هرم اوسلو مش ماسلو

بيعبر عن الحقايق القرآنيه فى وصف نفوس البشر

تحياتي لحضرتك ونورت

صبرني يارب يقول...

ستيته يا حياتي

ده انت الاهرمات كلها يا باشا

وبعدين انتى لسه صغنونه يا اختي ورينا الهمه يلا ولا انتى عايزه تنطي الهرم كله فى خمس سنين

نورتي يا جميل

بنت الغربة يقول...

ايه ياصبرنى الموضوع الجامد قوى ده ..
انا ماليش فى الفسيولوجى قوى ياصبرنى ...بس الكلام ده كبيييير قوى ..
اللى عجبنى فيه انك فصصتى البنى ادم حته حته ياختى ...ووجعتى قلبى ..
وخلتينى افكر فى حاجات كتيرة عايزة اغيرها ..
وشكلها هتيجى على دماغ الباشا فى الاخر ...وهايقولى انت عرفتى الحاجات دى من مين ؟؟؟
هاجرب وأأولك ياحبيبتى ...بس لو بعتنى مصر وقالى مع السلامه ...هاقعد عندك ....
ههههههههههههههههههههه
انا جعت من الكلام فى الفسيولوجى وهادخل اشوفك طابخه ايه
تحياتى ياقمر

أحمد حسن البنا يقول...

صبرنى يارب

السلام عليكم يا ست الكل

قبل اى شىء انا جاى اشكرك لحرصك الدائم على التواجد فى مدونتى رغم غيابى لفتره واعتذر لنفسى قبل ماعتذر ليكى على التاخير فى الردود عليكى لانى نفسى انبتنى جدا انى حرمتها من مشاركتك حواراتك الممتعه ورغيك اللى غير عندى مفهوم الرغى عند السيدات اللى خرج من نطاق النم والتقطيع فى سيرة خلق الله ودخل فى نطاق الحوارات الواعية المثقفه للزوجة والام المتعلمة واد ايه انتى نموذج رائع التكوين للست الواعية المثقفه وغيابى كان بسبب نزولى اجازة لمصر لمدة شهر تقريبا وكنت بكتفى فى مصر بتصفح سريع لمحتوى المدونات دون التركيز اللى متعود عليه لان مصر كانت واحشانى اوى وكنت بلفها حته حته المهم انى بسجل حضور العودة لمحرابك الجميل واسمحيلى ابدا بالرد على الموضوع الجميل ده اللى عرضتيه بشكل مبسط وجميل وكويس جدا انك اتكلمتى على الهرم ده لانه بيمثل خطوط فاصلة بين دول العالم ومن خلاله نقدر نصنف او ناكد التصنيف اللى بيقسم دول العالم الى دول نامية او متقدمة ودول عالم تالت وتانى وده بتمثل فى مدى اندماج الدول دى اجتماعيا مع درجات الهرم ده بمعنى ان دول العالم النامية مثلا تلاقيها غرقانه فى الدرجة الاولى او التانية من الهرم وكل همهم الاكل والنوم ولا مؤاخزة الجنس وبعيد كل البعد عن باقى درجات الهرم وتلاقى دول العالم التالت والتانى بتتارجح بين الدرجة التانيه والتالته من الهرم واخرها دول العالم الاول اللى بتتمركز فى اعلى مدرج الهرم عشان كده الابتكار بيكون اللغه الاولى فى مجتمعاتهم ولاننا المصريين احسن ناس نعيش فى الدرجة الاولى من الهرم تلاقينا نحب الاكل والجنس والنوم وبيكون هو غاية مرادنا وبعضنا بيرتقى لباقى درجات الهرم فى نفس المجتمع النامى ده ونلاقى شخصيات لها القدرة على التعايش باسلوب دول العالم الاول المبتكر رغم التواجد داخل مجتمع عايش فى الدرجة الاولى من الهرم ودول اللى بنسميهم صفوة المجتمع من المثقفين والعلماء او المبدعين ولو تلاحظى اننا ممكن نطبق الهرم ده برضو على الحيوانات لانهم ممكن يوصلوا من خلال تركيبتهم اللى الدرجة الاولى من الهرم ومستحيل يتخطوها او صعب جدا يستوعبوا باقى الدرجات لانهم فى حياتهم الحيوانيه مستحيل يوصلوا للامان فى الموارد او الصحة او السلامة الجسدية عشان كده مستحيل يبتكروا الا اذا اخدنا عينات من الحيوانات وعيشناهم فى جو امن ووفرنا الامن والسلامة الجسدية وخلافه من الحجات اللى ممكن تخلى العقل الحيوانى يرتقى لدرجة من درجات الشعور بالنفس والتميز وعمل شىء ولو بسيط من الابتكار وده بنلاقيه فى حيوانات السيرك او الحيوانات الاليفه الى بتعيش فى بيوت المثقفين او المبدعين وبيتعلموا من سلوكهم سلوكيات انسانيه غير معهودة عن الحيوانات زى البوسه وقت الاشتياق او الرقص على انغام غنوة او تقليد حركات بشرية وبعدها تلاقى الحيوانات يبتكر حاجات نقف قدامها مستغربين وده لاننا وفرنا ليهم وسائل تخطت بيهم احد درجات الهرم واقتربت بيهم للابتكار

الكلام كتير ومش هيخلص لان الموضوع شيق جدا وكفاية كده ليقولوا عليا اتعديت من رغى الحريم هههههههه تحياتى ليكى ياجميلة ولى عودة لباقى ابداعاتك
احمد حسن البنا

Sweet Violet يقول...

تحليل للهرم حلو بجد

بس بردو ده مش ماشى مع كل الناس لان فى ناس بتبقى عايشه و خلاص اكل و شرب و اسره و انتهى على كده

اعتقد الهرم ده بيتكلم عن الانسان الطموح اما الحى الميت لا

و هيفضل لكل قاعده شواذ فى علم النفس .. مع انى دلوقتى اعتقد ان الشواذ اللى هما بيفكروا زى الهرم بالظبط (نظرة سوداوية باحته D: )

تحياتى ياقمر

welwel يقول...

اشكرك يا عزيزتى على الرد
وورد فى تعليقى تصحيح لاسم العالم أبراهام ماسلو والهرم بتاعه في ورقة نشرها في 1943 بعنوان "نظرية في التحفيز الإنساني"
Maslow's hierarchy of needs
انا بس كان قصدى مش انى اختلف معاكى كنت فاكر انك هتفرحى ان فيه حد نفسه المعلومه توصل كامله وصحيحه بس زى ماتحبى (نسميه أوسلو يا ستى علشان خاطرك) مع ان اوسلو دى مدينه و .. اتفاقيه بس اللى تقوليه مشى ..
و تحياتى مهما اختلفنا :)

صبرني يارب يقول...

بنت الغربه

حبيبتى انا ماليش بركه الا الباشا انتى عارفه ههههههههههههههههههه

وتعالي يا اختي وانا اخليه يقول حقي برقابتى

نورتي يا جميل وابقى طمنينى على عينك

صبرني يارب يقول...

احمد حسن البنا

يا خبر ايه الكلام الكبير اوي ده

حرام عليك انا على ادي بلاش كده

وحمد الله على سلامتك وعقبال ما ترجع بلدك ان شاء الله سالم غانم

وفعلا موضوع انطباق الهرم الى حد ما على الحيوان ده حقيقى

وكمان تطبيق الهرم على نطاق اوسع بالنسبه للدول تصنيف المجتمعات برضه تمام اصبت يا استاذنا

وكلامك تمام التمام

بس قولي اخبار كمال ايه ؟؟؟ قوله الى يتجوز كده ما يقولش لحد سلام عليكم
ههههههههههههههههه

صبرني يارب يقول...

سويت فيوليت

ليه يا ماما السوداويه دي

هو اساسا ما اعرفش ان حد عارف الهرم ده كتير

تحياتي لك يا جميل ونورتي

صبرني يارب يقول...

ويل ويل

يعنى مش عارفه اشكرك ازاي يا فندم انا تقريبا الى اصريت على خطأي وما تحققت منه

انا كنت فاكره ان حضرتك الى مش فاكر

اتضح ان انا الى مخي كالعاده مش بيشيل اسامي

معلش اصل انا كتبت الموضوع ده على ذاكره الدراسه فى ثانويه عامه

يعنى كويس اوي انه وصل اسلو مش حاجه تانيه

وحالا هاصلحها وانا فعلا روحت دورت دلوقتي لقيته فعلااسمه ماسلو مش اوسلو

المفروض كنت عملت كده قبل ما اكتب الموضوع مش اعتمدت على ذاكرتي
بس لما يكون فى تصحيح يا ريت تبقى تقوله صراحة انا مش بازعل ولا حاجه


نورتنا يا فندم

الشموع البيضاء يقول...

الموضوع حلو
الهرم ده حقيقى لان الدرجات دى اساسيه وبنفس الترتيب فى حياتنا
وفعلا لما الدرجات دى بتتلخبط بنلاقى نفسنا فى حاجه غلط ومش متظبطين وعصبيين او محبطين او مرهقين فكريا او جسمانيا او او حاجات كتير
انا بحترم جدا كتب علم النفس وتطوير الذات بشوف انه علم بجد ومهم نستفيد منه فى حياتنا رغم ان دراستى علميه بس افتكر انى خدت من واحده صاحبتى كتب الادبى اقرا فيها هههههه طبعا كتب المناهج مقلب لكن الكتب الى العلوم دى بجد فيها حلوه جدا وللاسف الغرب متقدمين فى المجالات دى جداااا ونفسى احنا كمان ندخل السبق ده ان شا الله اى مرتبه
تحياتى
وياريت تنورينا فى المدونه

عمرو يقول...

كلام قيم و مفيد
و لكن بعض العلماء شككوا فى صحة هذا الهرم و قالوا اٍن الرغبه الجنسيه أقوى لدى الاٍنسان الطبيعى من رغبته فى تناول الطعام و دللوا على ده بأن أجروا تجارب علميه لاقت معارضه شديده من المجتمع الدينى و لكنها تجارب أثبتت صحة ما يعتقدون
شكرا يا صبرنى يا رب على هذا البوست الثمين

صبرني يارب يقول...

الشموع البيضاء

على فكره احنا لنا علماء قدامى من العرب والمحدثين كمان فى الموضوع ده ولهم كتب لا يستهان بها

لكن دلوقتي احنا لنا فى الكفته والحمد لله

حتى الكفته بقينا نجيب شوام يعملولهالنا

تحياتي ليكى يا قمر ونورتي

صبرني يارب يقول...

استاذ عمرو

لا موضوع الغريزه الجنسيه ده انا كنت قريته فعلا

بس لقيت حاجه مهمه اوي ان التجارب الى عملوها دي ما بتاخدش فى الاعتبار درجات الجوع

بمعنى ان ممكن واحد يكون جعان لكن يقبل على اشباع الغريزه الجنسيه لانه جعان لكن لسه ما وصلش لمرحلة الخطر والخوف من الهلاك بسبب الجوع
وكمان ممكن يكون مش حاسس بقلق من الناحيه دي انه بعد ما يشبع غريزته الجنسيه هيالاقي اكل مافيش مشكله

وكمان ما وصلش لسه لمرحلة الاعياء او الضعف لان اساسا لو وصل للمرحله دي مش هايكون عنده مقدره على الاشباع حتى لو توفرت الحاجه
ولو ان اساسا الحاجه الجنسيه فى المقام الاول حاجه جسديه وفى المقام التاني نفسيه .

المهم يعنى ان طبعا فى فروق فرديه مع الاخذ فى الاعتبار كمان الظروف المحيطه للفرد

تحياتي لحضرتك يا استاذنا ونورت

ستيته حسب الله الحمش يقول...

والنبي ياختي
اما عليكم حاجات
تجيب الفسفس الهستيري
ماسلو
اوسلو
كلها بلاد ربنا
المهم استفادنا

باين عليكم من بتوع ادبي والرغي واكتب عشر صفحات يابني علشان تنجح

ايه ماسلو ماسلو
ربنا يخليه لأمه

صبرني يارب يقول...

ستيييته

هههههههههههههههههههههههههههههه

ايوه بس برضه عيب يعنى لما اتكلم عن الهرم وانا ناسيه اسم صاحبه

هههههههههههههههههه

اه انا كنت ادبي بس انا كنت باحب علم النفس فعلا

والدليل انى لسه فاكره الكلام ده من ايام ثانويه عامه يعنى من 14 سنه

احم احم اقصد من 4 سنين

لانى ما كنتش باحفظ واروح اكب على الورقه وانسى
كنت بافهم واذاكر واحفظ وانجح الحمد لله

الحفظ يروح انما الفهم كلا البت يبقى بقاء المخ فى الدماغ

وربنا يخليه لامه على قولك يا اختي
ههههههههههههههههههه

Ahmed يقول...

الله
بوست جميل أوي

فعلا الحاجات مرتبه ترتيب منطقي

والجميل أن الاحتياجات فعلا طبيعيه
الحاجات الغريزيه محتاجه تهذيب لكن مش صح الناس اللي بيحتقروها

بوست جميل

welwel يقول...

يااااه متعرفيش عاليتى فى نظرى اد ايه لما اعترفتى بكل بساطه وروح طيبه انك نسيتى او غلطتى ..
ده يدل على ان معدنك الطيب وفعلا عاوزة تفيدى اصدقائك .. و من كتر فرحتى مش عاوز اقولك انك غلطى فى اسمى انا لان اسمى د.وليد (مش وائل ) بس مش مهم المهم ماسلو بخير.. وافتكرى ماسلو على انه اختصار مسلوق (على رأى الفنان محمد رضا لما كان بياكل الكلا ...الكلام يعنى ) :)
و كمان نسيت اقولك ان ذوقك فى اختيار موسيقة حيران لفايزة احمد اختيار عبقرى
وكفايه كده..فى انتظار المزيد.
اشكرك جزيل الشكر.

صبرني يارب يقول...

احمد ابو العلا

طبعااااااااااا مش صح ان الناس يحتقروها دي حاجه خلقنا بها

وذكرت فى القرآن ونظمتها الشريعه بل واثنت على اشباعها فى حلال نثاب عليها

هانتكلم فى الموضوع ده باسهاب فى الرؤيه الاسلاميه ان شاء الله

وحضرتك نوووووورت

صبرني يارب يقول...

ويل ويل

يعنى اروح فين واودي وشك منى فين

اظن ده اثبات عالي ان انا مضيعه ذاكره هههههههههههههههههه

معلش انا اسفه اوي صلحته والله

متشكره على الكلام الجميل بس انا ما استحقش كل ده

انا عموما ما كنتش قلت لحد قبل كده انى عالمة يعنى ولا حاجه فعادي انى اغلط واشكر كل الى ينبهني لغلطي طبعا

وشكرا لحضرتك على كل شيء ونورت

ِِAdem El-Mahdy يقول...

حسبنا الله

بعد ما كتبت التعليق الصفحة عملت refresh و هاكتب التعليق تانى

امرنا لله

===
المهم
انا كتبت ان الموضوع كويس جدااو و عرض حضرتك للهرم جميل

لكنى اختلف مع الحاج واسلوا
فى ان الهرم ده مش إلزامى مع كل الناس

اضرب امثله

1- اهلا الابطال فى غزة أعدوا 3 سنين حصار و مفيش لا اكل ولا شرب و ايام الحرب طحن و قتل كل ده ليه
علشان يشعروا بالعزة و الفخر و ده نوع من إثبات الذات
قدموا هنا الاكل و الشرب عل غثبات الذات

2- موقف تانى : لو واحد اخدك فى الصحرة و قالك اشرب بق ميه و انت هتموت لكن اسجدلى
هتوافق ولا ...

3- موقف تالت حصل فى موقعة للمسلمن
لما كان المسلمين ميتين من العطش و كان فيه بق ميه و كل جندى اثر بق الميه على اخوه و لفت الميه و مات الجنود لانهم ماتوا فعلا من العطش لكن احيوا روح الايثار

و مواقف كتير

اعتقد ان الهرم ده معمول للناس العادية

لكن مش اصحاب الماهج السماوية و ااصحاب الافكار السامية و الدعوات

بس

صبرني يارب يقول...

ادم المهدي

يا فندم الهرم ده والحاجات الانسانيه دي قلنا بتتاثر بالظروف المحيطه للفرد وكمان الفروق الفرديه

وكمان حتى فى الحروب الى حضرتك بتتكلم عليها

ممكن فى ناس تستحمل وناس لا خلي بالك كويس ان حتى لو واحد قالك اسجد وحياتك فى ايده وسجدت له من ورا قلبك طبعا
فى الحاله دي مش هاتؤثم عليها

انت مهدد فى حياتك مثلا

ده اسمه اجبار

لكن طبعا ممكن تكون انت نفسك قويه وتقدر تتحكم فيها وتستحمل الموت او الالم او اي شيء

وغيرك ممكن لا

امال احنا بنقول تهذيب النفس وجهاد النفس على ايه ؟؟؟

وده تطويع وتهذيب الغرائز والحاجات الى اتكلمت انا عنه فى الموضوع

تحياتي لحضرتك ونورت

reem يقول...

صبرنى ازيك ياقمر
وحشااااانى والف سلامة عليكى معلش هى متأخرة بس انا كمان كنت تعبانة شوية ومش عرفت انك كنتى تعبانةغير دلوقتى .. يارب تكونى دايما بصحة وسلامة
البوست هايل بجد زى كل بوستاتك
عرضك رائع للهرم وبجد زى ماقال د/ وليد اعترافك انك نسيتى بطريقة جميلة وببساطة من غير ما تحورى الامور كان رأئع منك وكبرك اكتر في نظرى ( اقصد كبرتى طبعا في المقام مش في السن خاااااااالص لاننا كل الستات المتجوزين مش بنكبر طبعا في السن هههههه)وبعدين ياستى انتى تقولى اللى انتى عايزاه اوسلو ماسلو كله منك زى العسل

reem يقول...

صبرنى انتى طبعا بتقولى مين المجنونة اللى مش عارفنى دى وبتقولى واحشانى يا صبرنى جدا بس انا عارفاكى ومتابعة مدونتك جدا وبحبك في الله وعشان كدا اتكلمت ببساطة وكمان وهابقا اقولك بينى وبينك انا مين

فشكووول يقول...

العزيزه صبرنى يارب

فعلا ماسلوا من العباقره الذى استطاع تصنيف حاجات الانسان لكل شيئ .. والتصنيف هذا كان تبعا للحاجات التى خلقها الله فينا وبدأ بالاهم ثم المهم ثم الاقل اهميه

شكرا على تعليقك وعلى تشجيعك لى يا صبرنى العزيزه

تحياتى

ebn roshd 777 يقول...

دي اول زياره لمدونتك اللي دخلت عليها عن طريق مدونه الحاجه ستيته
طبعا الموضوع يهمني جدا علشان انا كمان
بحب الفلسفه وعلم النفس وكل ما يتعلق
بالعلوم الانسانيه
طبعا الهرم فعلا جميل اوي واهم ما يميزه انه مختصر ومنطقي جدا
لكن اسمحي لي ان استفسر منك عن معلومه
الم تقراي كثيرا في حياه العظماء
وتلاحظي ان معظمهم تولدت عبقريته من معاناته في الحياه وانا اطلق تلك القاعده ولكنها تنسف نظريه ماسلو تماما
ولا تنسي بيتهوفن او طه حسين علي سبيل المثال لا الحصر
بالنهايه تقبلي تقديري علي هذا البوست الرائع

صبرني يارب يقول...

ريم

والله يا اختي ما قلت المجنونه

انا بس شكيت فى ذاكرتي كالعاده وقعدت اقول مين دي ؟؟؟!!!!!

بس يعنى منوره يا جميل والف سلامه عليكى انشاله القطه السوده

ومستنيه اهو اعرف مين

صبرني يارب يقول...

استاذناالغالي فشكول


العفو يا استاذنا ده والله احقاقا للحق وحضرتك على راسنا

صبرني يارب يقول...

ابن رشد

اولا حضرتك شرفتنا يا فندم

وبالنسبه للنقطه الى حضرتك اتكلمت فيها

ماهو ده الى انا قلت عليه يا فندم

التحكم فى الشهوات والحاجات والغرائز

بتختلف من شخص للتاني

فى جهاد النفس هنا ؟؟

فين تهذيب الغرائز والتحكم فيها ؟؟

وخلي بالك ده برررررررضه له حدود

زي ما قلت قبل كده

هو ممكن يمارس الجنس وهو جعان

لكن لحد امته ؟؟؟
فى وقت هايجى مش هايقدر يعمل ده اصلا

نفس الحكايه

يقدر يكون مبدع
وهو بيتعرض للجوع مثلا لفترات طويله

لكن فى النهايه عنده اشباع ولو جزئي

اصل حاجات بقاء الفرد
مهمه للابقاءعلى حياته

يعنى حضرتك مش هايكون بيموت ويطلع فى الروح من الجوع ويقعد يالف مقطوعه موسيقيه


كمان فى حاجه تانيه مهمه

هو مين قال ان الفقير ما يقدرش يكمل الهرم بتاعه ؟؟

ماقلنا بقى اثبات الذات مثلا بيختلف اسبابه وادواته باختلاف ثقافة الفرد وبيئته المحيطه

وبالنسبه للابتكار والابداع فى حالات الحروب

مؤؤؤؤؤؤؤكد تولد حاجات ملحه للابداع ممكن يعمل كده
زي ما بنقول الحاجه ام الاختراع

غير ان حتى الشعوب الي فى حالة حرب

ممكن يكون عندهم تدرج الهرم ده ولو جزئي او نسبي

الهرم ده نسبي جدا فى رايي

مطاطي جداااا

يحكم على البشر بشكل عام جدا

مع الاحتفاظ بالمؤثرات البيئيه والخبرات الحياتيه للشخص

تحياتي لحضرتك ونوووووورتنا

سيف الدين اليزل يقول...

هوة في ايه يا ام مريم ومين الكتف دة اللي انتي حطة صورتة وهرم اية وقاعدة اية ومين اللي عاوز اصلا يتكلم في علم الانفاس العلم دة محتاج دراسة في البطنية وناس علي دراية تامة بالبانجو
وبعدين اللي عاوز يشبع رغبتة ويجيب عيال طب ما الموزز مليين الدنيا وبعدين حد يسيب المزة هيفاء وهبي ويتكلم علي ماسلو هما اليهود ورايا ورايا حتي في بيت اختي
والله العظيم حبوا يا ناس
والسلام علي من اتبع الهدي

صبرني يارب يقول...

سيف

ازيييييييييييييك

يا عم بس الراجل عامل هرم ما يخرش الميه
ههههههههههههههه

مالك بس مضايق منه ليه

ومزز ايه بقى ما تصيحش لنفسك بعدين تتعور انت عارفها يا ابنى

انت مستخبي فين بقالك كام يوم
ابقى قولي اخبارك

نووووووورت يا سيف

mahasen saber يقول...

يا فيلسوف انتا يا فيلسوف قلنا اديبه وتطلعى من هواة الفلاسفه كمان

لا لا يا صبرنى انتى شكلك لازملك صومعه للابداع ده والفكر العالى ده

وحشششششششششششتينى يا جميله

mahasen saber يقول...

بس كتبتى اسم العالم بالمشقلب ما علينا تعيشى وتلخبطى فى غيرها

عارفه انا النهارده كنت فى اجتماع لقاء التبرع تحفه تحفه روعه وكان نفسى تبقى منوره معانا ونرغى على ايمان وقلبها بس يا رب تتعوض

صبرني يارب يقول...

محاسن

ايه يا جميل النور ده

وحشاني اوي والله

والله يا محاسن كنت هاموت واجي يا اختي ما حدش عبرررررني ورضي يجيبنى

حتى كنت عايزه اتصل عليكم ما عرفتش ما فضيتش حتى اتصل

وانا كمان كان نفسي اشوفكم كلكم

تحياتي يا جميل ونورتي

حنين القلب يقول...

انا جيت يا جدعان
انا جيت يا صبرنى
وقريت كل اللى فاتنى
وعجبتنى اوى النهايه بتاعه القصه

بجد روعه
الصدق والحب لما ينتصروا فى الاخر بتبقى نهايه حلوة
بس تفتكرى فى الحقيقه بينتصروا ولا فى القصص والافلام بس؟؟؟

بت يا صبرنى وحشتينى
سلامى لمريوم ورحوم وخالود

صبرني يارب يقول...

حنيييييييييييين


يا لوليه والله انتى الى واحشاااااااني

والنبى يا كوتي تدخلي على ياهو الام اس ان مش بيشتغل معايا الا بالعافيه مش عارفه ليه على ما ابقى اغير وندوز واروق القاعده

وتسلمى يارب على الكلام الجميل ونورتي يا قمر