السبت، 14 فبراير 2009

عيد الحب ...وعلاقته بالبتنجان المخلل

السلااااام عليكم

تفتكروا ايه هي علاقة عيد الحب بالبتنجان المخلل؟؟؟؟ مع انه مش احمر ولا على شكل قلب ؟؟؟

لا لا الاول كل سنه وانتم طيبين وكل الي بيحب والى مش بيحب وناوي يحب برضه طيب

يااااااااااااااااااااااااه وحشني الرغي موووووووووووت

طبعا بصرف النظر عن كون اليوم ده اسمه عيد الحب او الفلان طين داي وبصرف النظر فلان طين ده كان بيشتغل سباك ولا مبيض محاره المهم يعنى ان هذا العالم الرومانسي البريء اتفق على انه يعمل هذا اليوم عيد الحب

كل واحد بقى يحتفظ بطريقته فى الاحتفال لنففففففففففففففففففففففسه

انا بقى يا قوم بينى وبين اليوم ده مصانع الحداد قولولي ليييييه ؟؟؟

ده مصانع قديمه من ايام ما كنت فى الكليه . من يوم ما فجأه كده ماشيه فى الكليه وانا فى سنه رابعه يعنى قبل كده ما حصليش الشرف اصل انا كنت باروح الكليه اشراف بس 3 مرات فى الاسبوع هههههههههههههههههههههههه

المهم ماشيه كده لقيت عيال ماشيين ولابسين احمر بنات وولاد يعنى وماسكين هدايا فى اديهم لونها احمر برضه وورد وحركات من دي
قولت ايه ده فى ايه ؟؟؟!!! وبعدين قلت يلا مش مهم اهم شوية اطفال والاطفال احباب الله دعهم يلعبون .

روحت المحاضره لقيت المدرج مرشوش خلق لابسه احمر وفى بعض اشباح كده لابسين اسود وفى ناس مالهاش فى المواضيع برضه كتييييييير زيي انا كده والغريب ان المدرج مليان ناس مع اننا لسه اول اسبوع فى الدراسه ايه يا جودعان النشاط ده . واكتشفت بقى موضوع عيد الحب ده ومع انى كنت باحب ايامها برضه بس رجعت قلت لرضا فى التليفون انت ازااااااي يا حضرة ما تجبليش كتكوت احمر حتى فى عيد الحب قالي ااااااااه انا اسف فعلا عنيه ليكى اول قفص طماطم يقابلنى هاجبهولك .


المهم بقى كاااااااانت ايام وبيلبسوا احمر بس

تطور الامر بقى ان كل البلاوي دول ماشيين فى الشوارع تلاقي بنت عندها بالكتير 15 سنه وماشيه لابسه احمر وضبها طالع من بؤها 3 متر بتضحك يعنى وهى ماشيه لواحدها اه والله وماسكه فى ايدها بوكيه ورد او هديه .عااااااااادي وتقولك اصل النهارده عيد الحب . طب انتى يا مزغوده يا مسخوطه بتحبى مين؟؟؟!!!! اما بجاحه صحيح

المهم نفس ذات الموقف الى فات ده حصلي السنه الى فاتت يوم 11 نوفمبر وكنت داخله محل اشتري كريم شعر اه والله وكان لونه اخضر لقيت البنت الى فى المحل
بتقولي :اهلااااااااا تعالى ثواني وهافضالك شوفي بقى الهدايا الى هناك دي على ما اجيلك
قلت: هدايا ايه يا امي انا عايزه كريم شعر
قالتلي: عشان عيد الحب
أنا باستغراب : عيد حب ايه يا بنتى ؟؟؟!! مش ده بيبقى فى فبراير ؟؟؟
هى : اه لا ده واحد تاني .

افتكرت انا بقى عيد الحب بتاع مصطفى امين باين ولا هو كان مين مش فاكره وقلت فى عقل بالي يلا رزق الهبل على المجانين اهو بقوا يومين هبل متقع فى الشوراع
وبجاحه ووقاحه وعين واسعه من العيال

ونفسي اعرف شعور الاب لما يلاقي بنته او ابنه فى عيد الحب خارجه شايله هدايا وقلوب وراجعه شايله هدايا هدايا تانيه غيرها بيبقى موقفه ايه يعنى بيقولها ايه ؟؟؟ اها بنته او ابنه يعنى ما تفرقش بالنسبه لي


المهم قلتلها: يا سيتى احنا بنحب من غير اعياد اخلصي وتعالى هاتيلى الكريم

المهم قدام الحاح هذه البياعه الظريفه وانا احبها احبها يعنى عشان اول مره روحتلها قالتلى يا انسه هههههههههههههههههههههه
وطبعا انا قلتلها ربنا يجبر بخاطرك يا ضنايا
وقعدت بقى تنفخ فى شخصي وتقولي لا لا انتى شكلك صغير مش معقول متجوزه وعند 3 عيال

اقولها اه يا اختي سنوني وجوزوني هههههههههههههههههههههههه

المهم اشتريت بتاعه كده بتتعلق فى العربيه بسبعه جنيه ونص حته واحده . تقولي طب خدي العلبه دي بقى على شكل قلب قلتلها بكام دي
قالتلي بخماشر جنيه . قلتلها لا يا ضنايا اخلصييييييييي طلعي الفاتوره

وشوفت هناك مناظر بقى اجارك الله جالي مغص وحسيت بان المراره بتاعتي بدأت تطلعلي من جديد

والاكاده يعنى ان كان فى هناك بنت ملزقه كده قعدت تاخد رايي فى البرفان الى بتنقيه للشخص المعني الى مش عارفه وضعه ايه حيث انها لا مخطوبه ولا متجوزه حسب تقرير عنيا الى رشقت فى اديها

وقاتلى انا بقى جاااااالي قطه هاهاهاها قطه بصحيح مش لعبه لا لا قالت اوته

وانا عماله ارد عليها تخيلوا كان شكلي ايه هههههههههههه

وتقولي ايه رايك كفايه كده ولا يبقوا قوليلين

قلتلها لو قطه بلدي كفايه كده ولو قطه سيامي هاتيله مع البرفان جزمه نيهاهاهاهاها

وقلت فى بالي ياااااااااله رزق الهبل على المجانين يلا خلي الناس تاكل عيش

ومن خلال هاذين اليومين الى انا حكيت لكم عليهم تقدروا تستنجوا ايه علاقة عيد الحب بالبتنجان المخلل ؟؟؟؟

هما الاثنين بيظهروا نفس العلامات على الخلق فى الشوارع علامات الهوبا استنجلينا

هيه هيه رجعت ا رغي تاني

اه بالنسبه لمناقشة القصه ان شاااااااء الله تعالى بعد كام يوم كده نبدأ نناقشها

لكن بعد البوست الجاااااااي فبراير شهر العظمااااااء

هناك 39 تعليقًا:

Ahmed يقول...

سلامة مرارتك
هههههههه

اول مره اكتشف العلاقه بين عيد الحب والبتنجان المخلل

وبعدين انت بتسألي عن شعور الأب لما يشوف أولاده في عيد الحب شايلين ومحملين؟
عاااادي
تاك ات ازي يامااااان
كلو في الكلتش

ده كلام البهبهات المودرن

الأنأح بقى لما تشوفي واحده متجوزه وخارجه قدام جوزها بورد ورجعه بورد تاني
هههههه

يلا خلي الشعب يعييييييش

mony يقول...

عندك حق يا صبرني و الله

انا الحمد لله ماليش في العته المنغولي ده خالص

بحس اني لو عملت زي الناس دول
(مش ممكن طبعا)

هيبقس شكلي عبيطة خالص


الحمد لله علي عقلي كده
عجبني و الحمد لله


طيب مانعمل الايام كلها حب كده و حركات

مش مطلوب دباديب ولا قطط ولا اي حاجة

الكلمة الحلوة تغني عن كل شئ
و بدل بوكيه ورد
كفايا وردة قاطفينها من الجونينة اللي قصادنا

و لو اني مش بحب اقطف ورد لاني بعتبر ان ديه حاجة انانية
علشان استمتع ساعتين شم
اجني علي عمر امسكينة

ما علينا


حلوة العلاقة بين الفلان طين و البتنجان المخلل

صبرني يارب يقول...

احمد ابو العلا

لا لا بجد ؟؟؟

شوفتها دي طيب ولا ده مجرد امجينيشن ؟؟؟

عموما ياما هانشووووووووووف

حسبنا الله ونعم الوكيل

نوووووووووووووورت

صبرني يارب يقول...

موني

حياتي والله انا ما قلت ما منجيبش هدايا يا ستى نجيب

بس لما واحد يجيب لمراااته مااااااشي

واحده بتجيب لخطيبها ماااااااشي

حد بيجيب لامه برضه ماااااااشي ماهو انواع الحب كتير

انما يعنى المسخره والبجاحه دي ليه

وعلى فكره مافيش قدامنا جنيه اساساااااااا عشان نجيب منها ورده ههههههههههههههههههههه

انا قدامي موقف عربيات ميت علي

كان فى زماااااااان زرع فى وسط الشارع بس شالوه وعملوا رصيف مايك كده بيوقع الناس كلها عاااااااااادي

نورتي يا قمر

ستيته حسب الله الحمش يقول...

تصدقي بالله .. ها تصدقي ان شاء الله
انا جالي مغص في الجامعة النهاردة .. يعني ممكن اصدق ان فيه بنت عبيطة لكن دكر عبيط ومحمر من فوق لتحت .. خسئي والله وخسيء اللي رباه كماني

وبعدين سألت البت صحبتي نفس سؤالك: الا ياأوختشي هي البت من دول بتدخل عادي بالهدية كده بيت اهلها؟ بصيت لي نظرة "البعيدة عبيطة ولا ايه" قالت اه طبعا مصر بقت فري يا متخلفة حضاريا

وبعدين انا لو البياعة قالت لي ياآنسة اشيل المحل كله من الفرحة ويمكن كمان الزق عندها علشان تفكرني بزمان قبل ما اعيش ايام وسنين المرستان

ويالا هابي البتاع ده اللي بيقولوه
قال فلانتيني قال

احساس طفلة محبة للرومانسية بس واقعية يقول...

هما الاثنين بيظهروا نفس العلامات على الخلق فى الشوارع علامات الهوبا استنجلينا

هاهاهاهاهاها يسلام على استنتجاتك ورغيك يا صبرنى

وبعدين انا نفسى اعرف هو لية احمر يعنى
ما هو اى ورد ينفع واى هدية واى دبدوب
مش لازم كلو يبقى محمر كدا عشان نعبر عن الحب
مش عارفة الناس دى بتفكر ازاى ؟؟
وعقلها بيروح فين

يعنى الحب طول السنة ومش يوم واحد بس
وميكنش بالشكل الغريب الاوفر دا

مستنين رغيك واستنتجاتك على طول
تقبلى مرورى

صبرني يارب يقول...

ستيته

احب اقولك واعرفك ان مصر لسه بخير
ايووووه لسه فى بيوت البنت بتدخل بالهديه تستهبل على اهلها وتقولهم والبراءه والغلب فى عنيها دي عبطه صحبتي حبيبتى جابتلي دى وقالتلى اصلك غلبانه وما لكيش بوي فرند قلت اجيبلك انا


قوم بقى الام والاب ينشكحوا لادب واخلاق بنتهم وهما ما يعرفوش اصلا عبيطه دي تبقى مين

ولا هي فعلا الى جابت الهديه دي ولا لا

وبالنسبه لموضوع انسه والنبى يا اختي عملت فرح لجوزي لما رجعت بصلي كده وقالي ايه البت عديمة النظر دي هههههههههههههههههههههه

وحصلت مره قبل كده وهو معايا وقالي ده عشان انا معاكي بس فكروكي صغيره زيي ههههههههههههههه

باماره القرعه يعني


نورتي يا سيتيه

صبرني يارب يقول...

طفله رومانسيه

لا لا بصي انتى كده بتتكلمي فى حاجات اكبر من سنك ههههههههههههههههههههه

لا لا الورد لازما ولا بد يكون احمر فى اليوم ده

مش عارفه بجد ليه مع انى باحب الورد الروز اكترررررررر

ارزاااااق يا بنتى

رئـــــيسـة حزب الأحلام يقول...

ال كمان عيد الحب هم كل شوية يطلعوا لنا بالاعياد دى منين ياخوفى لا يعملوا كل يوم عيد ناس فاضيه ياختى يلا بلاش نقطع الارزاق على حد بس الاول مش يفهموا الشباب يعنى ايه حب ولا هما بيحتفلوا بالحب الوهمى يلا وكل باذنجان وانتى طيبة ياأختى

Sweet Violet يقول...

الصراحه موضوع يوم مخصوص للحب ده انا مش عارفه ابلعه اصلا

بس مافيهاش حاجه بردو لما نقولك كل سنه و انتى طيبه و ايامك كلها حب و سعاده ياقمر

بس المهم رضا جابلك القوطة ولا ايه ؟؟؟

ازعل لو كنتى عديتها كده و ماجتش D:

صحيح ياقمر طبعا بشكرك كتييير على رأيك عندى

على فكرة هما كانوا مخطوبين )):

و بجد نفسى يرجعوا لبعض تانى

المهم صدعتك عارفه

كل سنه و انتى طيبه (:

جعلوني مريض نفسيا يقول...

عيد الحب بيثبت ان احنا شعب سطحي وجاهل وينفع يطبق عليه نظرية سياسة القطيع بكل سهولة والحمد لله

في شيوخ وعلماء حرموا الأحتفال بيه والله أعلم

بلاش نقول بعد كده (رزق الهبل علي المجانين)علشان رزق كل حاجة علي الله ولو حبينا نقول نفس المثل يبقي(رزق الهبل والمجانين علي الله)

هي كلمة أنسة بتفرح الجنس الطيف كده طيب كويس الواحد لما يتجوز يهري مراته في الرايحة والجاية
يا انسة انا رايح الشغل
يا انسة انا جيت من الشغل
يا انسة الغدة اتحضر ولا لسة
يا انسة عايز اشرب شاي
يا انسة سكتي العيال مش عارف انام

صبرني يارب يقول...

رئيسه حزب ا لاحلام

ايه النور ده

اهو الناس بيسلوا وقتهم يا بنتى هانعمل ايه

صبرني يارب يقول...

ضد التيار

والله يااختي لحد الان ما جابليش مش عارفه جايز يفتكر والله اعلم

وبالنسبه لاصحابك رجعيهم لبضع ربنا يهديهم هما بس يمكن زهقوا من بعض شويه عادي بتحصل

صبرني يارب يقول...

جعلوني مريضا نفسيا

احنا خلاص ما عدناش محتاجين نثبت اننا شعب قطيع متساق

اما بالنسبه لتحريم عيد الحب وعيد الام ومولد سيدى الدكروري

انا غير مقتنعه بهذا الهبل المتقع

لان ببساطه انا ممكن اعمل عيد جوازي عيد حب انا حره بقى
والى عايز يشاركنى العيد يتفضل

وكل واحد يحتفل بطريقته

اما بالنسبه لكلمة رزق الهبل على المجانين

وحياة ابوك بطل تسمع الناس دي

المقصود هنا ان رزق الهبل يتسبب فيه المجانين

وطبعا الارزاق على الله مش محتاجه تفسير

النويا يا سيدى الفاضل

بلاش نيجى فى فسافيس الامور ونتحكم


وبلاش تقول لمراتك يا انسه
هههههههههههههههههههههههههههههههه

ايه ده اقوله ايه ده ؟؟؟
هههههههههههههههههههههههههه

nody يقول...

ياستى دى مناسبه وكل واحد يحتفل بيها بطريقته

يعنى المتجوزين مثلا زي حضرتك يخرجوا من روتين الحياه ويتغشوا باره وتبقى فرصه للتغير

ومافيش مانع من كلمه لطيفه ورده رقيقه كانوع من انواع الرومانسيه

صدقينى المشكله مش فى المناسبه المشكله فى طريقه الاحتفال بيها

صبرني يارب يقول...

نودي

هههههههههههههههههههههه

ضحكتينى وربنا

نتعشى بره ؟؟؟

طب بس احنا نتغدى جوه

وحياتك لسه قاعده استناه للغدا ؟

انا لا اعترض على اي شيء غير البجاحه والهبل الى بره فى الشوارع ده

nour shahen يقول...

اهم شيء انى هتمسكه جدا بكلمتك ان فبراير شهر العظماء
اصلى وخليها فى سرك من مواليد فبراير

بس انا قولت قعدت اقرى كل دا علي اساس انى هلاقى اي علاقه بين البتنجان وعيد الحب واخيرا كروتى الكلمه فى سطر وربع ههههههههه

بوست جميل وخفيف الدم كالعاده وزياده

تحياتى

صبرني يارب يقول...

اه صحيح وكل سنه وانتى طيبه يا جميل

صبرني يارب يقول...

نور

الله يخليكى يارب ونورتي

همس الاحباب يقول...

هما الاثنين بيظهروا نفس العلامات على الخلق فى الشوارع علامات الهوبا استنجلينا
هههههههه
ههههههه
مش قادر اكمل بصراحة
يخرب بيت الاستجلينا
هههههههه
كل سنة وحضرتك طيبة
وعيد بتنجان مخلل علينا
تحياتى

صبرني يارب يقول...

همس الاحباب

الله يكرمك يارب يا ابو همس

طب بزمتك مش في هبل فعلا ؟

حسن حنفى يقول...

ههههههههههههههههههههههه

والله مش عارف اقول ايه

الواحد بقي فعلا بيشوف مناظر غريبه والله وانا ماشي في الشارع الاقي كل واحد واقف علي عربيه او واحده مستنيه حبيبها ياعيني وهيو في ايديها هدايا كتير :d

بقول يارتني كنت بحب :d

كيــــــــــــارا يقول...

هههههههههههههههههههههههه

والله موتيني من الضحك

عارفه انا مش جب هديه الفرنتي الا مره واحده بس وكانت هي المره ياختي بعدها بشهر الخطوبه اتفشكلت

شكل البتاع دا نحس :)ههههههههههه

Che يقول...

مش عارف اقول ايه على هدايا عيد الحب دى اصلى ماليش فى الدباديب و الورد و كده لدرجه ان اصحابى بيقولوا عليا معقد نفسيا و ده شئ مش هانكره .. بس زى ما انتى قلتى الهدايا دى معموله عشان الناس تاكل عيش .. انا النهارده نزلت اشترى انسيال هديه عيد ميلاد و بعدين الراجل الجواهرجى لما سألته عن حاجات تانيه انقى منها قالى ما انت اللى جاى متأخر يا استاذ ، هو فى حد يشترى هديه الفلانتيم ( و الميم من عنده مش غلطه كى بورد ) دلوقتى ... بصتله و قلته عندك حق انا اللى غلطان
ملحوظه على جنب كده ينفع تسيحى لجوزك فى الرد بتاعك على ستيته يعنى الراجل قاعد لا بيه و لا عليه تجيبى سيره القرعه الكريمه ليه
تحياتى يا جميل

صبرني يارب يقول...

حسن حنفي

وهو ده حب يا ابنى دول هايعيشوا ويمووووووتوا من غير ما يشوفوا الحب

ده عكككككككككككككك

لو كان الهدايا احنا مستعدين نلملك ربع جنيه من كل مدون ونشوفك بشوية هدايا مراعاة لظروفك ا لقلبيه ههههههههههههههههههه

نورت

صبرني يارب يقول...

ايه ده استنى عندك

مين عيد ميلادها دي زي عيد ميلادي لا لا تبقى كويسه اتجوزها بكره
ههههههههههههههههههههههه

وبالنوسبه للقرعه مالها القرعه ؟؟؟

طب ده دي احلى حاجه فيه ههههههههههههههههههههههههه

صبرني يارب يقول...

كيارا

يلا خدت الشر ورااااااااحت هههههههههههههههههههههه

جعلوني مريض نفسيا يقول...

لألألألألألألألألألألألألألألألألألألأ

انا بقولها سكتي العيال يعني فيه عيال متفهمنيش غلط فيه عيال بتقلي يا بابا وبتقولها يا ماما ملقنهومش في الشارع العيال دي

هههههههههههههههه

صبرني يارب يقول...

جعلوني مريضا نفسيا

هههههههههههههههههههههههههههههههههههههههههههههههههههههههههههههههههههه

ماشي

MaNoOoSh يقول...

اهىء اهىء اهىء
هو انا كل ما افتح مدونة الاقى موضوع عن الفلان طين
عاااااااااااااااااااا
طب والله لاكتب موضوع انا كمان
بس كويس انى عرفت علامات البله المنغولى ظاهرة عليا ليه الايام دى.. كلة بسبب البرنجان المخلل
هههههههههههههه

حواء يقول...

انا دلوقتي عرفت ليه كنت متنحه من يويمن
هههههههههههه
ضحكتيني ياصبرني
بوست جميل زيك

بنت الغربة يقول...

حبيبتى ياصبرنى
كل سنه وانت طيبه ياجميييييل
بصى انا هنا مختلفه معاكى شويه
انا بحب عيد الحب لانى عامة يعنى كده بامووووت فى اللون الاحمر
وكل سنه من ساعة ماعرفت الباشا ..اجيبله هديه فى اليوم ده
بس مش هديه غاليه لانه بصراااحه رايه زى رأيك تماما وبيعتبره بدعه...
بيقولى خليها شيكولاته او اعملى محشى وخلاص...(رومانسى قوى ..مش كده )
لانه برضه استحاله يجيب لى هديه يومها ....ممكن قبلها او بعدها
علشان مايبقاش عمل بدعه....
اما بالنسبه للى باشوفه من الناس فى عيد الحب فدى طرااائف ماتتعدش ياصبرنى..انيل واحده كانت معايا فى الشغل ..وصورت نفسها ماسكه قلب احمر كبيييير قوى ..وهى كما ولدتهاامها
وطبعت الصورة وادتها ل...خطيبها؟؟؟؟
طبعا فرجتهالى انا الاول ..
متخيله الاسبهلاااال اللى جالى ..
وبرضه سالتنى (كفايه دى مع البرفيوم ولا لأ)...قلتلها ..دى كفايه قوى ومن غير برفيوم كمان...
كل سنه وانت طيبه ياجمييييل
تحياتى

فكرة من الزمن ده يقول...

سلامة مرارتك يا مش مطحونة يا اوختشي
بس الا هي العملية بتوجع يعني كانت منظار وفعادي شوفتي خدنا الكلام وما اتكلمناش على الظلانتين على راي شوقية والله انا ضحكت ضخك بالبوست بتاعك ده وفعلا واضح العلاقة الوثيقة بين البتنجان وعيد الحب
بس انا غبت وماشفتش القلب العاشر هاشوفه وابقى ارجعلك في المناقشة لما نشوف ايه اخرتها
شكرا اويي

صبرني يارب يقول...

زوجه

تسلمى يارب

وبعدين يا بنتى انتى متنحه على طول يظهر ان احمد زارع بتنجان قدام البيت عندكم وانتى شغاله الله ينور
هههههههههههههههههه

نورتي يا جميل

صبرني يارب يقول...

مانوش

ايه ده اكتبي يا اختي ولا يهمك

الا قوليلى هو فيه بتنجان مخلل عندكم ؟؟؟
انا كنت فاكره مافيش فى بلاد الاكاواويين

صبرني يارب يقول...

بنت الغربه

على فكره انتى شكلك شايله المراره ومركبه واحده كاوتش
هههههههههههههههههههههههه

ايه يا بنتى هاتموتينى على فكره

محشي ؟؟؟

طيب ماشي بعدين اقولك الكلمه برضه الى واقفه فى زوري
القصبه الهوائيه عندي اتملت منك يا بنتى

وصاحبتك دي يا اوختي طبعت الصوره ؟؟؟
طب ما تبعتهالي ا تفرج اشمعن انا

ههههههههههههههههههههه

وهو يبقى لها ايه بالظبط نقط .... ولا خطيبها ؟؟؟

ايه المصيبه دي ده بتقول خطيبها وربنا كنت فاكراه جوزها

ياااااااالا اهو توضيد علاقات برضه

انا مش معترضه على الاحتفال على فكره
ابدا مطلقا
بالعكس انا جالي ووووووورده حمرا ههههههههههههههههه

بس عادي يعنى انا مش معترضه على الهدايا انا معترضه على البجاحه وقلة الادب

صبرني يارب يقول...

اه يا اختي والله عاملاها منظار وبتوجع طبعا لمدة 3 شهور بعد العمليه والله
ههههههههيه يلا الله يرحمها بقى مرارتي

ومستنياكي فى المناقشه ان شاء الله

واحدة مفروسة يقول...

ههههههههههههههههههههههه
صبرني انتى مش برضه عيد ميلادك يوم 16 اللى هوه بكرة؟؟؟؟
متهيالى كده برضه و لا ايه؟؟؟؟؟
اما علاقى عيد الحب بالبتنجان المخلل
هههههههههههههههههههه
اللى اتنين بيعملو انتفاخ و لعبكة فى المصاريم
خخخخخخخخخخخخخخخخ

و لو عاوزاني اقولكالبتنجان المخلل بيعمل ابه تاني
ههههههههههههههههههههههه
انا على اتم الاستعداد
هههههههههههههههههه
ده انتى مصيبة

صبرني يارب يقول...

مفروسه بحالها عندنا يا مرحبا يا مرحبا

بت يا مفروسه كده تسبينى محتاسه
من المغرب قاعده عشان اعمل نيو لوك للمدونه عشان عيد ميلادها هى كمان بكره بس مافيش فايده مااااااااافيش فايده

نورتي يا جميل