الأربعاء، 18 فبراير 2009

مناقشة قلب ايمان


السلام عليكم


قبل ما نقول اي حاجه احب بجد اقولكم كلكم الف شكر لكل الناس الى شرفوني فى البوست الى فات وقالولي كل سنه والمدونه بتاعتي طيبه وبخير وانا كمان برضه


اسعدني وجودي معاكم لمدة سنه فعلاااااا


ندخل بقى فى الموضوع لانه شكله هايطول


الى هو طبعا نقاش القصه الى جابتلي صداع كتير جدا فى دماغي بس مش مشكله انا باحب الصداع ده


انا الاول احب اقولكم ان انا ماليش فى الادب والقصص خالص مالص لا دارسه ولا اعرف عنه حاجه تقريبا

لكن انا فكرت اكتب القصه دي لان كان فى مواضيع كتيره ونقط كتيره عايزه ابرزها واتكلم عنها ومش عارفه ازاي


يمكن انا ساعات كنت باحس ان القصه خاويه تمام من الحبكه الدراميه الى بيقولوا عليها والاثاره والتشويق


بصراحه انا كنت باطنش الحته دي ساعات عن عمد عشان ما اطولش لانى مش

باكتب مسلسل


انما لانى كنت بابقى عايزه اوصل الكلمتين الى انا عايزه اقولهم وبس

يعنى زي ما تقولوا ساعات كنت باحس ان القصه عامله زي الفيلم الوثائقي او التسجيلى او التعليمى

لكن برضه زي ما قلتلكم اعتبروني مش قصاصه لكن انا بارغي بشكل تاني


بعد كده نيجى بقى للقصه فى نقط معينه انا حبيت ابرزها من القصه دي هاقولهم نقطه نقطه وعايزه اسمع رايكم فى كل فتفوته عشان عايزه اناقشكم كتير عشان فى ناس قالت كلام كتير محتاج نقاش فى التعليقات

*****************************************


اولا :الاستهوان بتصرفات صغيره تكون بذره لمشاكل كبيره وتعقيدات فى الحياه فعلا (زي قبول رساله من صديق او صديقه والسعاده بين الشخص ونفسه انه مرغوب وفي ناس بتحبه لسه غير الشريك الى من وجهة نظره لا يبالي )فى الجزء الاول شوفنا ده


ثانيا : الضغط النفسي والعصبي على الزوجه وخصوصا العامله وتحميلها كافة المسؤليات من عمل فى البيت ومسؤلية الاطفال عموما ولومها على اي تقصير وتسفيه من مهمتها داخل البيت وخارج البيت (وده كان فى الجزء التاني من القصه)

********************************

وده فعلا بيعمل نوع من الاحباط والخنقه وكل المشاعر السلبيه لانها لو كانت من النوع المسالم هاتحتار. فهي رغم بذل كل وقت وجهد تقدر عليه غير مرضي عنها .


ولو كانت من النوع المتمرد هاتقلب الحياه راسا على عقب وتعمل عواصف من شأنها فعلا هد البيت ده .


ولعلمكم الخاص فى حالة القاء المسؤليات دي على عاتق الزوجه على المدى البعيد

الزوج خسران اكتر منها بكتير


هايجى وقت يلاقي نفسه وحيد فى الدنيا دي

هى عندها عيالها ومشغوله بهم جدا ومهمه بالنسبه لهم جدا حتى لما يكبروا ويتجوزوا

وهو مافيش اي حاجه عنده وحياته فاضيه وجافه حتى لو كان مشغول بالعمل لانه فى الغالب بيكون كمان خسر زوجته نفسيا


لكن فى البدايه بيكون مستعذب الهروب من المسؤليه


ما تحرموش نفسكم من اسرتكم واولادكم هما محتاجين لكم وانتم كمان محتاجين لهم والله


ثالثا : الصديق مش الى نروح نشرب معاه قهوه وننزل نعمل معاها شوبنج

الصديق هو الى نلاقيه لما نحتاج له

والى يقولنا استوب لما يلاقينا غلط

والى يحاول يصلحنا مش يساعدنا على الخطا

والى يفتح لنا قلبه ويسمعنا ويرد علينا بامانه


رابعا : ممكن نغلط فى الطريق. لكن من الغباء اننا نغلط وما نعرفش نرجع قبل ما نتوه فى الطريق.

لما تحس الضعف فى وقت معين فى شريك لك فى الحياه حاول تلجأ له يمكن تلاقي الى انت بتدور عليه مش دايما الحل موجود بره البيت .(شوفنا الكلام ده لما ايمان فى الجزء الثالث رمت نفسها فى حضن اشرف وقالتله ما تسبنيش . وهو لما لقاها محتاجله فعلا كده كان حنين معاها واحتواها وحققوا هما الاثنين غايتهم )

***********************************************

خامسا : الاناينه هى دمار اي علاقه بين اثنين .

وعكسها الايثار .او تفضيل الاخر ومتطلباته على نفسك وده اساس وسر نجاح العلاقه بين اي اثنين وخصوصا المتجوزين

وده حصل فى الجزء الرابع (لما اشرف كان تمام اوي لحد ما الليله خلصت وتاني يوم الصبح خلاص خلصت المشاركه وخلصت التفاهم وبدأ بالقاء اللوم عليها تااااني فى كل غلطه )

المشاركه لو ما كنتش فى كل حاجه عمرها ما هاتكون فىحاجه واحده يا كله يا بلاش .

وربنا قال ايه موده ورحمه الاثنين لو سمحتم ودوا بعض وارحموا بعض من فضلكم .********************************


سادسا : الثوره الى عملتها ايمان بكل هدوء برضه على حياتها وقالت فى الجزء الخامس (أنا مش عايزه اعيش ميته )وقررت تغير حياتها وتعيشها بسعاده ولو بجزء يسير منها . كلنا محتاجين اللحظه دي على فكره ولو استسلمنا مش هانعيش ابدا بسعاده حقيقيه .


سابعا : الخوف من صد الطرف الاخر واعتباره اهانه له وكأن من المفروض ان الطرف الاخر بعد سنين الجفا طالت او قصرت طبعا المفروض انه يكون مستنى اشاااااره منك عشان يقولك شبيك لبيك

.

لا طبعا خدوا بالكم لما يكون بين الطرفين جدار من الجليد بيعلى ويكبر مع زيادة عدد سنين جوازكم . اوعوا تفكروا تهدوا او تذوبوا مره واحده هاتبقى كارثه .

هاتغرقوا فيه . الى اتبنى فى سنين ارجوكم حاولوا تذوبوا فى شهور على الاقل

الصبر الصبر الصبر


وفى هنا كمان حاجه مهم الراجل لو اتقابل بالرفض ممكن يجى على نفسه ويعتبره دلال من الست او تقل

انما الست لما بتتقابل بالرفض صعب تتقبله وممن تتخيله نفور منها . الا انها برضه لازم تاخد بالها من ننظرية جبل الجليد .



ثامنا : بلاش نهمل المناسبات الحلوه فى حياتنا بالعكس ده احنا نزودها ده احنا نتلكك على اي مناسبه حلوه وحتفل بها. الحاجات دي بتبقى النسمه البارده فى عز الصيف . واللمسة الدافيه فى عز الشتا . بتخلينا نقدر نكمل .

الحياه صعبه ارجوكم هونوها على نفسكم

احتفلوا بكل ذكرى حلوه فى حياتكم وهادوا بعض ولو بورده ولا صنية كيك كل واحد وطبعه بقى مش مهم المهم تهادوا تحبوا .


تاسعا: واعملوا مفجآت لبعض يا مملين . ما تجيش فى عيد جوازك وتديها 100 جنيه وتقوليها خدي اشتريلك جزمه .

حاول تفكر فيها وتفكر هى ممكن تكون محتاجه ايه .

مش عارف اسال اختها وامها ولا استدرجها في الكلام

معلش اشغل بالك بها شويه


وانتى كمان ما تقوليش ما بيهموش الحاجات دي لا بيهمه بس عامل نفسه ما بيهموش عبيط بقى تعملي ايه مش مشكله خديه على اد عقله

وده الى اتكلمت عنه القصه فى الجزء الخامس


واظن كفايه كده النهارده وخلينا نكمل المره الجايه نقاش اصل تهنجوا مني


انا كده ناقشت لحد الجزء الخامس اي حد عنده كلمه اتمنى اسمعها

هناك 49 تعليقًا:

قوس قزح يقول...

الله ينور عليكى

عجبنى اوى الجزء الخاص بهروب الرجل من المسئولية هيكون نتيجته انه لما يكبر يبقى وحيد وسط اسرته

فى انتظار البقية

احساس طفلة محبة للرومانسية بس واقعية يقول...

انتى مش بس كنتى بتكتبى قصة ليها هدف
انتى حللتيها تمام وبكل تفاصيلها
طبعا انا فى حاجات بختلف معا ابطال القصة فيها وحاجات بتفق فيها معاهم
وبعتب عليهم انهم فهموها متاخر
بس على الاقل حاولوا انهم يغيروا حياتهم للافضل

عجبنى تحليلك جدا بصراحة اكتر ما عجبتنى القصة نفسها ولو انها كانت ضرورية عشان تقولى بعدها التحليل دا :)

بجد تسلم ايدك
تقبلى مرورى

جعلوني مريض نفسيا يقول...

معلهش جيت متأخر شوية الكمبيوتر كان بعافية حبتين وكنت بعمله تنفس صناعي والحمد لله ردت فيه الروح

كل سنة وحضرتك طيبة ومدونتك ومدونتنا بخير وسلامة وعقبال 100 سنة

هشام توفيق

ستيته حسب الله الحمش يقول...

طبعا انا مش بتاعة كلمتين واقلب
انتي عارفاني رغاية

ها افصص ام البوست لما ارجع من الشغل

معلش كان عندي امبارح ظروف ما يعلم بيها الا المولى

ادعي لي ولنا عودة انا بس بصبح

يا استمورننج يا جميل
روح صبح على صبرني
وقولها اعملي النوسكافيه
انا بعد الشغل جاي بالتقيل

حاجات جوايا يقول...

ازيك يا جميل
أنا قريت القصة كلها
انتى بتفترى على نفسك ليه
انا شايفة انها جميلة وفيها حبكة واثارة وكل حاجة
انتى موهوبة بجد يا صبرنى ما شاء الله عليكى


تحليلك رائع بصراحة وعندك حق فى كل كلمة ولو انى شايفة الواقع مش بالسهولة دى خالص
الطرف اللى بيتنازل وييجى على نفسه بيفضل طول عمره يتنازل وييجى على نفسه


ايمان لما قررت متعيش ميتة وتقرب من جوزها نحجت فى تحقيق ده لان جوزها ساعدها وكان عنده استعداد انه يتغير معاها ويعيشلها وينسى مغامراته العاطفية الطيارى
لو كان عمل ودن من طين وودن من عجين و سخر منها لما عملتله قطة وقالها الحالة جت .. أو انتى لسه فاكره والكلام المحبط ده .. كان وقفها من اول الطريق وكان مسار حياتها اتغير للاسوأ وحتى المحاولة انها تقرب منه بعد كده كانت هتبقى بحساب .. مهو فيه ناس كده عدوة نفسها ولما بيجيلها الخير لحد عندها بتتكبر عليه


كمان اشرف كان نموذج جميل ومحترم واعتقد انه نادر خصوصا انه بعد ما رجع لمراته عاطفيا بعد عن نزواته وعقل .. كان ممكن جدا انه يفضل يكلمهم ويلعب عالحبلين


عجبنى اوى دور صاحبتها فى حياتها ونعم الصداقة بجد

أما عن المشاركة فى تحمل الاعباء فمعتقدش ان فيه حد بيحاول يتحمل الاعباء دى مع زوجته إلا من رحم ربى

الرجل ينفر دائما من اى مسئولية خارج نطاق الطلبات
تعود من صغره انه يعتمد على والدته فى كل كبيرة وصغيرة
ولما تزوج لم يغير من عاداته وحتى لو حاول يساعد مراته هيفضل يقولها انا ساعدتك فى كذا فى كل مناسبة هههههههه

القصة جميلة بجد يا صبرنى
يلا شدى حيلك فى قصة جديدة
الدنيا يا ما فيها

فى انتظار باقى التحليل
سالى

بنت الغربة يقول...

حبيبتى ياصبرنى
كلامك كله مظبوط ياحبيبتى بس صدقينى الراجل مالوش خلق للمناقشه او انك تتكلمى معاه كلمتين على بعض من غير مايعتبر ده انك بتشتكى من احوالك معاه..
انا ماقلتش نيأس من المناقشه ..بس انا باحاول بطرق كتيرة قوى انى اتناقش فى احوالنا ..خصوصا ان اليوم بيعدى ومابشوفوش غير ساعتين بس...وبقية اليوم يافى الشغل او فى القهوة او نااايم
وكل ماجى اتكلم معاه ...الاقيه مش عايز يتناقش من اصله...
حتى ايام المناسبات ..اقصى حاجه انه بيعزمنى بره ...وهديه ...وكل سنه وانت طيبه....
وتانى يوم نفس الدوامه تانى...ولو اتكلمت عن خروجه للقهوة مع اصحابه ...ابقى نكديه ومش عايزاه ينبسط شويه مع اصحابه بعد الشغل...
ولو اتكلمت عن النت اللى بيقعد عليه وهو معايا ...بابقى برضه نكديه علشان دى حاجه مهمه وهو لازم يتابع الايميل بتاعه....ولو انا سبته وقمت قعدت على النت انا كمان ..ابقى زوجه مقصرة وسايبه جوزها وقاعده تلعب على النت..
حتى ايام الاجازة ..الباشا مالوش خلق يفسح الاولاد....انا اللى باخدهم وافسحهم ..وهو على القهوة كالعاده...
صدقينى كلنا عايزين نعمل زى ايمان ...بس المشكله ان اللى قدامك مش زى اشرف...
صدقينى انا مش فاكره اخر مرة قالى فيها كلمه حلوة امتى؟؟؟؟؟
احيانا كتيرة باحس انى وحيده مع انى عندى اصحاب كتيير
عموما الصبر جميييل وانا مصرة انى مأيأسش بتاتا وهاحاول اكسر جبل الجليد اللى انا عايشه معاه ده ...
جايز ربنا يسهل على الصيف لما الجو يحرر...
معلش ياحبيبتى دايما باطول فى كلامى معاكى...انا رغايه قوى انا عارفه
استحملينى
تحياتى ياقمر

فشكووول يقول...

السلام عليكم
تحياتى
الراجل ضهره انحنى والست برضه كمان
الناس بقت فى حيص بيص ومش عارفه تعمل ايه
الاولاد بقى تايهين فى الدنيا واللى بيربيهم الفضئيات والشارع والكمبيوتر
والاصحاب
الدنيا بقت فشكله

Soul.o0o.Whisper يقول...

أولا : السلام عليكم و رحمة الله


ثانيا : انا لسه مش كملت القصة لحد الآخر
لكن كل اللى اقدر أقوله مؤقتا


إن فعلا لازم نفهم ان الحياة الزوجية
روح واحدة فى جسدين
عشان كدا لازم يكون فى ناقش من النقاش و تفهم الآخر و قبوله

و دايما نحط نفسنا مكانه عشان نعرف اد ايه هو بيتعب
و نقدر تعبه دا





تحياتى لقلمك
و لى عوددة لاستكمال القصة






دمتى بود

Sweet Violet يقول...

طبعا اتفق معاك فى كلامك و عجبنى قوى تصرف ايمان و انها ماقبلتش انها تعيش و خلاص و حاولت انها ترجع حياتها تانى وعجبنى تصرف اشرف انه ساعدها

لكن فى الواقع و اللى بشوفه حواليا صعب قوووى الاقى النماذج اللى زى اشرف و ايمان

بالعكس لما يكون مابينهم زى ماانتى قولتى جبل جليد ماحدش بيفكر انه يدوبه .. و كل واحد بيدورعلى مساحه خاصه ليه يعيش فيها و تبقى الحياه عندهم اكل و شرب و تربيه اولاد و بس .. ومدام مافيش تقصير فى ده يبقى خلاص

تحليلك للقصه عجبنى بجد و القصه كلها الصراحه اخدتها نصيحه ليا لبعد كده ان شاء الله (:

ستيته حسب الله الحمش يقول...

الحقيقة يا اوختي القصة فعلا حلوة جدا
ولما احمد نبهنبي ليها وكان فات منها خمس اجزاء فوجئت اني مش قادرة اقفل غير لما اقرأها كلها وكنتي نزلتي السادس كمان

هي قصة واقعية وتحليل لمشاعر كتير من النساء وسواء كانت حياتنا شبهها جدا او مشتركين في جزئيات وجزيئات لأ فبرضه شفنا كتير منها حوالينا

لو بس الرجالة تقرأها وتفهم ان ست بتحكي ليكم عن الستات اللي كلكم بتقولوا انهم غامضات وغير مفهومات .. طيب ادي ست بتقول ليكم جوا جوا معاميكنا بنبقى عاملين ازاي

وبرضه الستات تاخد امل في الأصلاح "وانا دايما اقول مفيش حاجة اسمها الوقت اتاخر على الأصلاح" طول ما فينا نفس وشوية ارادة ومودوحرة ان شاء الله نوصل لوضع إلى حد ما يشبه احلامنا اللي اتجوزنا علشانها واستحمالنا مرار السنين علشان شوية الحلو اللي جنبها

تسلم ايدك
ومستنين قلب حنان وامتنان وأشجان

صبرني يارب يقول...

بقى انا اغيب عليكم 48 ساعه يا وحشين ما حدش يقول الست دي راحت فين

اخس عليييييييييييييييكم

كنت تعبانه وهاموووووووووووووووووووووووت

بس رجعت بالغيظه فيكم

صبرني يارب يقول...

ٌقوس قزح

وينور عليكى يا قمر

عمرو يقول...

رغم اٍختلافى معاكى فى بعض النقاط اللى بتمس صلب الحياه الزوجيه و ده من زمان على فكره لو تفتكرى البوست بتاعى اللى نشرته من فتره كبيره و لكن بأحييكى بجد على القصه اللى أشبه ما تكون بيوميات تسجيليه سهلة الفهم و بسيطة الأحداث و عميقة المغزى
و لكن برضو سيظل السؤال الخالد يطرح نفسه اللى هو مين فيهم اللى بدأ بالأهمال و الغلط ؟؟
هى و لا هو ؟؟
خلاص بقى عارف أننا مش حنتفق فى النقطه دى أبدا :)
تحياتى و ننتظر منك المزيد ..

جعلوني مريض نفسيا يقول...

الف سلامة وإن شاء الله تكوني بخير

Sweet Violet يقول...

الف سلامه عليك ياجميلة

عامله ايه دلوقتى ؟؟؟

صبرني يارب يقول...

احساس طفله

مش مهم يفهموا امته يا بنتى المهم يفهموا اصلااااا الفهم عاد نادر ا يومين دول

وانا فعلا كتبت القصه عشان اقول التحليل مش العكس هههههههههههههههههههه

نورتي

صبرني يارب يقول...

جعلوني مريضا نفسيا

الف شكر لك على التهنئه بتاعة عيد الميلاد

على سؤالك عليا

والف حمد الله على سلامة الكمبيوتر بتاعك يا اخويا معلش كلنا لها

نورت يا هشام

صبرني يارب يقول...

ستيته ستوته الحبوبه

تسلمى يا جميل يارب

احمد مين الى نبهك للقصه تيب ؟؟

تب ما انا جيت لحد عنديييييكى وقولتلك تعالى يا ستوته اقرا القصه واقريها ههههههههههههههههههههههههههه

المهم انك نورتي القصه واشكريلي احمد انه جابك

وطبعا انا معاكي فى ان الاصلاح مابيفوتش عليه الوقت ابدا

يمكن بيبقى مع مرور الزمن صعب لكن هو بيبقى في امل برضه على الاقل فى تحسين الوضع مش لازم يبقى برفكت بس اهو نص العمى ولا العمى كله

والقصه الجايه بقى لازم تكون عن قلب آدم بقى يا بطه امال نسيبهم كده يااختي ههههههههههههههههههههههههههههههههههه

نورتي

صبرني يارب يقول...

حاجات جوايا

ميرسي ا وي لتعليق وتحليلك الى عاجبنى فعلا

انتى فاهماني اوي

بالنسبه لاستجابة اشرف

لها سببين الاول انه فعلا انسان كويس مش وحش ولا حاجه زيه زي ايمان عايز يعيش سعيد

وثانيا : وده مهم اوي انهم لسه صغيرين عمر جوازهم 6 سنين بس


المشكله بتاعة الاحباط دي هاتحصل لو كان عمر جوازهم مثلا تجاوز العشر سنين

لكن طبعا حالة الاحباط دي تحصل لو هما كانوا بقى يادوب اول اسبوع وبعد كده لبست الجلابيه الكاستور ههههههههههههههههههههههه

وبالنسبه للمساعده وان الراجل اتعود من صغره

انا والله شايفه انه لو ما ساعدهاش حتى يبقى متعاطف معاها ومع شغلها لو حس انه هو لازم اصلا يساعدها بس مستهبل ومش بيساعدها ههههههههههههههه

فى مثل بيقول ابنك على ما تربيه وجوزك على ما تعوديه والمثل ده صح بلاش خيابه ياعيال ههههههههههههههههههههههههه
ستات شلت صحيح هههههههههههههههه


وشكرا اوي على رايك في القصه يا جميل


ولسه القصه الجديده شويه بقى لما تستوي اصلها كندوز هههههههههههههه

نورتي يا سالي

Soooo يقول...

سلامو عليكو

معلش جاي متأخر انا عارف
ومالحقتش اقول كل سنه وانتي ومدونتك طيبين ويارب السنه الجايه تكون أحلى من اللي فات وتحققي كل اللي بتحلمي بيه يارب

وعارف انه خلاص مش فاضل لا تورتن ولا جاتون ولا حتى كابشتيمو

بس انا قلت ده واجب ولازم اعملو حتى لو جيت متأخر

---

على فكره .. بالنسبه للقصة اللي انتي واكلانا وواكله نافوخنا فيها معاكي .. هي واضحه وصريحه
وفي نوع من اساليب السرد القصصي بيقوم على كده .. مابيعتمدش على الحبكه الدراميه بشكل كبير .. بيعتمد على تصحيح وتوضيح اساسيات الحياه مابين البشر
هو صحيح النوع ده من السرد القصصي قلت متابعة الناس ليه نتيجة اختلاف الايقاع العام ونتيجة اننا بقينا بتململ من النصيحه والاصلاح لأننا عارفين الصح كويس بس بقى تقيل علينا
لكن ده مايمنعش ان الاسلوب القصصي ده موجود ومطلوب
وانا عن نفسي باستمتع باللي بتحكيه
وأوعدك أوعدك أوعدك
لو حصل واتجوزت بعد عمر طويل
وديني لاوريها
ولا حاجه من اللي قلتيها هطبقها
يالهوووووي
ده انا هنتقم منها انتقام
هضربها ضرب
هنتقم منها انتقام الكتكوت المفترس

شفتي انا رومانتيكي ازاي؟؟؟؟






سلامووووووووووووز

صبرني يارب يقول...

بنت الغربه

يا قلبي انتى هنا ترغي براحتك اوي اوي هنا موطن الرغي الاصلي ودي مدونتك وزياده

الى زي جوزك كان عايز واحده تلعبه على الشناكل

انا قلتلك من زمان الناس هاتشوفك من عينيكى انتى

ما تشوفيش نفسك تحت وبتحاولي تطلعيله

لا لا خالص شوفي نفسك انتى نجمه والناس كلها عايزه توصلك

اعجبي بنفسك عشان الى قدامك يعجب بيكى

واترسمي يا بت على جوزك حبه عيشي عليه حببببببببببببه فى ناس كده لما تترسمي عليهم يحبوكي اسمعي الكلام الناس اصناااااااف

والكلام الحلو اطلبيه منه بس بحنيه شويه وفى وقت مناسب لحد ما يتعود عليه ولسانه يبقى مسكر شويه

ومش كل ما يقولك انتى زوجه مقصره تصدقي يعنى لا خلي ردك جاهز شويه وقوليله وانت زوج ايه مطول ؟؟؟

وارزعيه شويه تقصير من ناحيته عشان بعد كده قبل ما يفكر فى قصرك يفكر فى طوله

ومافيش حاجه اسمها مالوش خلق يفسح الولاد
الاول بالحنيه كده قوليله الولاد نفسهم يتفسحوا مع بابي وخلي الولاد يطلبوا منه ده

ولو ما نفعتش قوليله ما تبقاش تزعل لما يبقى ولادك عمرهم 20 سنه وما حدش فيهم بيقولك صباح الخير يا بابا مش عايز حاجه ؟؟؟

هاتبقى لوحدك واحنا لواحدنا

حاوله تشركيه فى اي حاجه من اهتمامك
قصه تقروها سوا على النت

موضوع تتكلموا فيه على النت

وابقى ارشقي جنبه شويه بس بالراحه

وما تياسيش اه
بس ما تدلقيش كماااااااان

خليها مره حنيه ومره قساوه
نورتي يا جميل

صبرني يارب يقول...

فشكول

استاذنا الغالي

عندك حق والله الى بيربي العيال دلوقتي الفضائيات

صبرني يارب يقول...

سول وسباير

اوك انا برضه مستنيه تقري القصه كلها وتقوليلي رايك

شمس النهار يقول...

شوفي ياستي
بعد ماتسمحي يعني
عايزين نمسك نقطه نقطه عشان ماتتهش القضيه يعني كل بوست نقطه واحده بس نقتلها بحثا واللي ورا منها واللي ورا منها
واول حاجه نرد علي عمرو ونقول له مش كل الحالات زي بعض في بيكون الاهمال من الزوج وفي بيكون من الزوجه
المهم ندور مع بعض علي العلاج من غير تبادل الاتهامات عشان بكده هنسيب الموضوع الاساسي ونتفرغ للأتهامات

صبرني يارب يقول...

سويت

يا جميل الواقع الى بنشوفه ده احنا لازم نغيره

وفى زي اشرف وايمان واحسن منهم كمان

بس دايما البيض الفاسد بيطلع على الوش

والمتجوزين اتعودوا يقولوا الوحش بس مش عارفه ليه

تحياتي ليكى واتمنى فعلا القصه تنفعك وكلامي ياثر فعلا فى حياة اي حد فى الدنيا

صبرني يارب يقول...

بيبرس

الله يكرمك يارب

والله ما عكيت ولا حاجه ده ما تعرفش حصلي ايه كده

شكله كان تسممممممممممم

مين فيكم حطلي سم فى الاكل
ههههههههههههههههههههههههه

صبرني يارب يقول...

استناذنا عمرو

الى بقى بيدخل البلوج كل سنه مره

نورتنا يا فندم

الاول شكرا لك على الكلام الجميل عن القصه

بعد كده بقى اسألك عندك اي شك ان ربنا ما بيظلمش حد ؟؟

وما ربك بظلام للعبيد

اكيد ما عندكش شك

طيب مش الطيور بتقع على اشكالها ؟؟

اه بتقع على اشكالها طبعا

طيب هما الاثنين مقصرين بنفس المقدار وبنفس الخطأ وبنفس الاهمال

ايوووووووووووه هما الاثنين مقصرين وكل واحد يبص لنفسه قبل ما يبص حواليه

مع الاحتفاظ برايي دايما ان الرجل هو قبطان السفينه والمسؤل الاول عنها


تحياتي لحضرتك ونورت

الاختلاف رحمه

صبرني يارب يقول...

تسلم يا هشام على سؤالك

وتسلمي يا ضد انا بقيت كويسه الحمد لله خلاص

وهاكل دلوقتي كوسه وفراخ على الله حد يطلي سم تاني

هههههههههههههههههههههههه

صبرني يارب يقول...

سوووووووووو

زيارارتك قليله بس بانبسط انك متابعني والله

وان شاء الله انا الى هاجوزك وانت بؤ على فكره ومش هاتعمل اي حاجه شكلك ههههههههههههههههههه


ايه الكلام الكبير الى قلته على القصه دي يا ابنى ولا بافهم حاجه فى الحاجات دي بس بافكر احاول افهم بقى هههههههههههههههه

كل الى باتمناه ان مغزى القصه وهدفها يكون اتحقق بس


تحياتي لك ونووووووووووووورت

وما تحرمناش الزياره يا سيدى

صبرني يارب يقول...

وبعدين اسمح بايه بس

ده انا اقطعلك اطفش حتت لو تحبي براحتك يا جميل هههههههههههههههههههههههههه

صبرني يارب يقول...

شموووووووووسه جيتى امته

ازيك يا جميل عامله ايه

وماما عامله ايه يارب يكون كله تمام

وبالنسبه لعمرو انا متفقه معاكي فى الراي ده برضه

وبالنسبه للنقط انا قاعده اهو مستنيه التفنيطه الجامده

معاكي يا جميل

حاجات جوايا يقول...

سلامتك يا جميل ألف سلامة
انا كنت كل شوية أدخل اشوفك رديتى ولا لسه مش بلاقيكى
فكرتك خارجة او عندك ضيوف او مشغولة فى التنضيف يعنى
ألف سلامة عليكى يا حبيبتى

صبرني يارب يقول...

الله يسلمك يارب

يارب تسلمى

الحمد لله عدت على خير

شمس النهار يقول...

ربنا يكرمك
ماما الحمد لله ورايحين بكره نعمل العمليه التانيه ادعيلنا
طيب اكتبي بوست بكل نقطه ونبتدي الحوار

صبرني يارب يقول...

شموسه

ربنا يطمنك عليها يارب

وازاي بس بوست لكل نقطه ده الناس يقتلوني يا شمس

فى الاخير يقلولي دماغنا وجعتنا ما حدش غيرك كتب قصه ولا ايه

ههههههههههههههههه


وبعدين خلينا نفضى للقصه الجايه

ايه رايك فى اسم

ازمة كل العمر ؟؟؟؟؟؟؟؟؟؟

MaNoOoSh يقول...

هكمل قراءة البوستات وارجعلك تانى.. حتى لو اتاخرت شوية.. وراك وراك يا عثل

صبرني يارب يقول...

يا حياتي تنوري فى اي وقت

شمس النهار يقول...

ضحكتيني
قصدك ازمة العمر كله الجواز يعني وسنينه
هتتكلمي عليها عند الستات والاالرجاله
هتكون قصه لطيفه
بس بعد كل فصل خاللي وقت للمناقشه والمداوله
ماما الحمد لله عملتها النهارده ورجعنا البيت
بس عينها تعبانه المره دي

صبرني يارب يقول...

شموسه

هى ماما عامله مايه بيضا ولا ايه؟؟

معلش ربنا معاها ويشفيها يارب


ولا مش هاتبقى عن الجواز وسنينه هههههههههههههه

خليها مفجأه بقى

او هابقى اقولك بينى وبينك

شمس النهار يقول...

http://shams-elnahar-49.blogspot.com
***
صبرني يارب
ادي ياستي الوصله اي اللنك واللي فهمني ده عمرو انا بصراحه ماكنتش فاهمه حاجه ايه وصله دي وصلة دش والا ايه
وتسلم ايدك علي الزبده

صبرني يارب يقول...

شموسه

معلش يا جميل والله ما اعرف انك ما فهمتيش انا كنت لسه هاروح عندك ادور على انك سايباهالي هناك

وافضاله علينا الاستاذ عمرو نورتي يا جميل وحالا مدونتك هاتنور القايمه بتاعتي هناك

اصحى يا مصر : اسلام جاويش (ديو) يقول...

مش شرط ان الواحد مش عنده فكرة عن كتابة المسلسلات او غريها ويكتب
دى موهبة من الله ثم قدرة من الانسان

مهو احنا بندون...، حد كان يسمع عن التدوين

كنا بنجيب ورقة وقلم ونكتب
وهى دى البداية
الورقة والقلم
لكى تحياتى

صبرني يارب يقول...

اسلام

اها انا عارفه الكلام ده لكن عشان الواحد يكون محترف مش كفايه الموهبه ان وجدت يعنى

لكن انا كنت باوضح ان الهدف من كتابتى للقصه مش هدف ادبي او روائي بقدر ما هو ابراز لنقط معينه حبيت اتكلم فيها من خلال القصه


تحياتي لك ونورت

mahasen saber يقول...

صبرنى عايشتينا فى بيت اسره صغيره

وكنت حاسه اننا جوه البيت زى الكاميرا الخفيه شايفين وحاسين بكل حاجه حتى المشاعر كانت بتنعكس علينا
وده ان دل بيدل على موهبتك ونجاحك فى شدنا للقصه كده
تسلمى يا صبرنى ودايما مبدعه

صبرني يارب يقول...

محاسن حياتي

انتى فين يا جميل والله وحشاني

متشكره اوي على الكلام الجميل ده الى كتير عليا والله

بس انتى ذوق طول عمرك

اصحى يا مصر : اسلام جاويش (ديو) يقول...

انا هروح اتفرج بقى على بوستاتك الجديدة
سلااام

صبرني يارب يقول...

تشرفني يا اسلام

فشكووول يقول...

السلام عليكم صبرنى يا رب
مش حتناقش معاكى عن قلب ايمان لانى كنت كلما ادخل الاقى قلب ايمان افتكر ان البوست اللى فات واعلق من غير ما اقرأه .. وفاتنى 8 اجزاء حياخدوا وقت فى قرائتهم وربنا يسهل
المدونه عندك فيها مشكله كبيره وقفلت على مرتين وافتح النت من اول وجديد عشان اجى واعلق وكنت كتبت تعليق والمدونه قفلت على وبدأت افتح من اول وجديد
ارجو تدارك المشكله فى المدونه.. تقريبا تقيله قوى
تحياتى

صبرني يارب يقول...

استاذ فشكول


ايه فيها ايه المدونه
ما حدش قالي حاجه

وهى شغاله معايا كويس

يمكن النت عند حضرتك مش كويس

وعموما هاشوف

ويفوتك 8 اجزاء يا استاذنا ههههههههههههههههه
امال قريت ايه بقى

طيب يا فندم احنا نتشرف بك فى اي وقت تحب تقرا