الأربعاء، 15 أبريل 2009

فعاليات الفرح بناءا على رغبة الجماهير

بصوا انا ماليش دعوه انتم الى اصريتم الحاحا انى اقولكم الفرح حصله فيه ايه
انا ما كنتش ناويه بصراحه كفايه عليه كده تامر اوي امال يوم فرح مريم هاعمل ايه بقى
ههههههههههههههههههه

المهم نخش فى الموضوع عشان ورايا حاجات كتير
وعندي موضوع مهم عايزه احكيلكم عليه بس بكره بقى لما نخلص الليله دي

الفـــــــــــرح

اول حاجه انا طلع عينى انا ورضا ايضا عشان اكتشفت قبل الفرح باسبوع ان كل فساتين البنات السواريه صغرت عليهم والاخ خالد طبعا بس ده كان معروف من قبلها
ااااااه يا نافوخي اكتر حاجه باكرهها اشتري هدوم وخصوصا للعيال عشان بيبقوا معايا فى الغالب .
بعد اللف على المحلات والاسعار بتاعة ملابس الاطفال الى تجيب شلل رباعي
المهم بعد ما انت انتهينا من اعداد الملابس
ندخل على طبيخ الفرح
اخت رضا اصرت اصرارا انها تطبخ
امها تقولها يا بنتى مالوش لازمه ما حدش عاد بيعمل الافلام دي
تقولك ابداااااااا انا عايزه افرح

يا ستى ما تفرحي هو لازم يعنى تاكلي نص الدقهليه عشان تفرحي

المهم طب هاتعملي ايه يا ستى اعمل معاكي
اه تعالى يوم الاربعاء اخر ا لنهار وتبعتيلى الصبح كل انواع الصواني والحلل الكبيييييره


طب انا عندي اقتراح بدل ما نتحشر خمسين روح فى شقه ستين متر باين ولا حاجه كده
ما تخليكى جدعه ونقيلى صنف ولا اثنين وانا اقوم بيهم
لا يا ستى كله يجى هنا ويطبخ هنا

هاتندمي يا حاجه لو جيتلك بالعيال

القصصصصصصد
روحت بس متأخر بعد ما نيمت البنات
ابو رياض روح وباعني والوقت اتاخرت كملت شغل معاهم للصبح
وروحت نمت ساعتين ورجعتلهم تاني
اه والله
والله كانت عامله كميات اكل بشششششعه لدرجة انها بعد ما غدت الشعب ده كله على دفعات كمان استمرت من 3 عصرا الى 11 مساءا
تاني يوم وزعت على كل بيت حله اكل وبرضه ما خلصش
ليييييييييييييه كده يا ناس

الحنه كانت عاجنه بتاع 3 كيلوا حنه

وما عرفتش ارسم بها كمان طلعت ما تنفعش رسم اصل حنة الرسم لها طريقه خاصه فى العجن

ايوه اصل انا بانقش حنه حلو ولا ستونه يعنى

نروح الفرح بقى
طبعا يوم الفرح ده الكوافير عندي بيبدأ من الساعه 2 كده الظهريادوب نخلص على الفرح
ايوه ماهو الى بتعمل سشوار (مريم) والى شعرها بيتعمل كيرلي (رحمه )
والى المانكير والشغل بتاع البنات الى ينقط ده

واسيب ليا فى الاخر بقى انا ساعه اجهز انا كمان
روحنا الفرح
اولا من الافراح القليله الى انا كنت فيها مرتاحه نفسيا وفرحانه جدا بجد
مش عارفه ليه يمكن عشان الواد تامر ده طيب اوي والبت مراته دي سكره اوي بجد

ندخل بقى على النقد اللاذع
اولا زفة العربيات
مسخره مسخره مسخره
بلد ما لها ش اصحاب
مجتمع عقله تعبان رسمي
طيب بتتهببوا تلفوا فى الشوارع مااااااشي
بتزمروا وتقرفوا الناس ودوشه ماااااااااااااشي
بتعملوا حركات هبله وخمسات وغرز وبتنجان لما يكون المكان فاضي برضه مااااااااااااااشي
انما تقفوا فى الشارع بالعرض وتوقفوا المرور ليييييييييييييييييييه
المهم بصراحه كنت متاذيه جدا من الموضوع ده
وكل شويه اقول لرضا قولهم يا عم انت ما يقفلوش الشارع
طبعا لا حياة لمن تنادي هانقول لمين ولا مين
وبعدين لمحت كده فى عربيه العروسه واحده راكبه قدام وشعر اصفر وحركات كده مش عندنا فى العيله يعنى
قلت لرضا انا شوفت حاجه اصفر فى اسود كده مشبح ابيض ايه ده؟؟ فى مزز فى الفرح ؟؟ هيه هيه
روحنا الفرح
خد عندك بقى
اصوات بعيد عنكم حاجه تجيب صمم كلي وجزئي دول المغنيين
اغاني اجاركم الله حاجه عذاب
التدخين فى قاعه مغلقه من حيث الغباوه الي حاطه على هذا الشعب
الولاد الى لابسين بترتر دول عايزه اولع فيه
الشباب الى بيرقصوا بوسطهم زي الحريم كان فى واد وربنا ما بطل رقص طول الفرح كنت عايزه اعمل معاه حوار الصراحه واقوله وسطك ده بلاستيك ولا ايه ياض وبيرقص زي الحريم بوسطه ويعمل حركات ........... مش عارفه اوصفها انا مؤدبه
المزه
ايوه ام شعر اصفر
انا شوفتها فى الفرح قلت الله ده صحيح اهو ما كانش بتهيئلي
سالت بقى مين دي يا عيال
قالولي دي خطيبة فلان (واحد من قرايب العريس بس مش طرفنا) وفى اقوال اخرى دي الجيرل فريند بتاعته وجايبها من القاهره معاه من امبارح عشان تحضر الفرح
الله يعنى مزه مستورده كمان
طيب كويس
شويه ولقيت رضا واقف قدام المزه دي تحديدا والى انضم اليها مزتين كده بس حاجه اوزي يعنى شمورت حلوين كده
بس شكلهم من فتشنا وكاويين شعرهم بمكوى رجل
بس ده ما يمنعش انهم مطلعين الحته البيضا يعنى
ابص لرضا ماله ده واقف كده ليه
يكونش واقف يعاكس المزه ؟؟؟؟!!!!
لا لا مش ا بو رياض الى يعمل كده غير كده ماله كده واقف محتاس وبيبص فى الفراغ وعنيه مغربه
شاورتله جالي
انت واقف قدام المزه المستورده ؟؟ ايييييييه تاخدها زواقه ولا عياقه ولا واحده يحتار فيها الاطبه ؟
قالي اسكتي انا محتاس
مش شايفه الشباب الى واقفين قدامها ادي ايه
انا خايف عيل منهم يكون ضارب زفت ولا حاجه ويمد ايده عليه تبقى مصيبه والواد خطيبها ده مجنون وهايعملنا مصيبه بقى
قلتله ماشي بس على الله يا معلم المحك عينك جايه على اي مزه من دول
قالي يا شيخه اقعدي انا ناااااااااقص ده عالم مفعصه (وقال حاجه تانيه كمان بس بلاش بقى انا برضه مؤدبه)
المهم هاتقولولي ايه ده انت من المنصوره يعنى وعندكم قشايط كتير
اقولكم اه بس احنا فرحنا بيبقى ناشف شويه يا جودعان كل البنات محجبين ومحترمين بالصلاة على النبي حتلى الى لابسين سواريهات برضه محترمين
فماكانش في اي مزز فى الفرح مزكيه عن صحتها كده الا هما المزه دي ويلحق بها اثنان شمورت تقريبا ده فريق الناشئين
فوق ان كل ما حد يسأل يقولوا دي صاحبة فلان
قشطه صاحبته
تبقى سبيل بقى يا جودعان ولا ايه
بس عدت يعنى الحمد لله من غير خسائر فى الارواح ولا ضحايا للمزز
وبعدين اتلطعنا فى الفرح لحد الساعه اثنين ونص تقريبا لحد لما العريس فرفر من الرقص شاور للفرقه وقالهم خلااااااااااااااص عايز اروووووووووووووح بقى
وتااااااااني زفة عربيات وهبل
وفى الاخر واخيرا مؤخراااااااااااااا روحنااااااااااا هيه هيه هيه
من ضمن ما احزني فى الامر ان العروسه كانت مرعووووووبه وعامله زي الى داخله للمشنقه ساعتها قلت الله يسامح مامتها اكيد مش طمنتها ولا ساعدتها كفايه
هو ده مجتمعنا ما بيواجهش
بث خلاص كل ده رغي مش معقول كده على فكره

هناك 48 تعليقًا:

احساس طفلة محبة للرومانسية بس واقعية يقول...

انما تقفوا فى الشارع بالعرض وتوقفوا المرور ليييييييييييييييييييه

هاهاهاهاهاهاهاهاهاها اصل يا صبرنى عملو كل دا محدش اعترض يكملوها بقى
هاهاهاهاهاها
لا والمرور كمان مشاء الله
توحفة توحفة فوق الوصف
خلى الناس تفرح يا صبرنى

كمان التحضير للفرح دا حاجة ممتعة والعائلة بتتجمع وبيبقى فى مواقف وطرائف وتعب بس تعب ممتع

ربنا يديم عليكم السعادة يارب
:)

تقبلى مرورى

احساس طفلة محبة للرومانسية بس واقعية يقول...

جميل المواعيد اللى بتنزلى فيها البوستات يا صبرنى عشااان بكون اول تعلييييييييييق
:)

مستنية الموضوع المهم
اللى عايزة تكلمينا فية

صبرني يارب يقول...

احساس طفله

تسلمى يارب

تعالى كملي الموضوع اصل كان نزل ناقص يا اختي خطأ فني

ومنوره انتى الصف الاول يا جميل

reem يقول...

صباح الخير ياصبرنى

بجد وصفك للفرح عسول خالص

بصي انا اصلا الزفة بخاف منها جدا وانا حامل في كنزي بنتى الكبيرة كنت حاضرة فرح بنت خالة جوزي وجوزي دا بيحب يعمل بالعربية حركات كتير في الزفة ويلف بيها دوائر كاملة وانا بترعب من الحاجات دى المهم انى قلتله بلاش تعمل كدا انا فاضلى اسبوع على الولادة لكن تقولى لمين خلانى سرحانة وراح عامل كم دائرة من بتوعه دول والاقي البنت في بطنى بتتحرك جامد جدا وجت في جنب ووقفت وبطنى بارزة جدا من الجنب اللى هى فيه تقريبا كانت بتضربنا برجايها احتجاجا على الاذى الدائري اللى اصابها وانا عيطت من الخوف ونزلت وقفت في الشارع ورتسي والف سيف مش هاركب معاه تانى وتانى يوم رحت للدكتور لقيته بيقولى انتى تجيى بكره ولادة
ومن يومها حرمته يعمل حاجة في الزفة

على فكره كويس اوى ان افراحكو البنات فيها محتشمين احنا افرحانا غير كدا خالص ولا البنات صحبات اخواتى مزز بجد يعنى عشان كدا بروح الافراح من غير جوزى اضمن بردو

ههههههههههههههههههه

ربنا يجعل كل ايامكو افراح يارب

وحشاااااااانى

احساس طفلة محبة للرومانسية بس واقعية يقول...

هاهاهاهاهاهاهاها يا صبرنى انا قلت برضو الفرح ناشف عدى ازاى كدا :) لازم شوية حركات
هاهاهاهاهاهاهاها

بالنسبة للرقص بنات اولاد مش فارقة الا قوليلى اصلا هو انتى بتعرفى تفرقى بينهم دلوقتى واللهى من ساعة ما البنات بقت بتلبس لبس اولاد ومن كتر ما الولاد بيلبسوا باديهات وسلاسل وترتر
واحيانا مكياج وشعر طويل
مبقتش عارفة هو اية فين
LOOOOOOOOOOOOL

العرسان بقى ربنا يسعدهم يارب ويوفقهم فى حياتهم ويباركلهم

اشكريلى استاذ رضا لو سمحتى على متابعتة للمدونة بجد سعيدة بأعجابكم بيها وتشجيعكم ليا

انا اخدت البوست دا رايح جى
تقبلى مرورى

لو بطـلـنا نـحـب نـمـووووت يقول...

مرحبا
مدونتك جميلة ولذيذة
واسلوبك ارتجالى وجميل قوووى
تقبلى تحياتى

ذو الوجه المبتسم يقول...

بجد انتى فظيعة
كل ده رغي
ياشيخة افصلى شوية
هههههههههههههههه
بس بجد شكل الفرح كان لذيذ
وياستى شئ طبيعى اللى حصل فى الفرح ده
الزحمة وقفل الشوارع والهيصة والليصة والطبخ
بس انا كان نفسي اتعزم
عاوزززززززز ااااااااكل

انتى بقي كنت بتبصي على المزز اللى فى الفرح
علشان تشوفى ابو الاولاد عينه على مين هههههههه بطلى بكش

الاولاد اللى بيرقصوا ووسطهم مخلوع دول مليين البلد دلوقتى
ناقص بس يتعمل لهم عمليات تحويل هههه

بالنسبة بقي ياستى لخوف العروسة
فده كمان شئ بيحصل لكل بنت قبل الدخلة وتعرفى الرجل كمان بيكون خايف
بس مش قوووى يعنى هههههه

بنت الغربة يقول...

ههههههههههههههههههه
حلوة حكاية المزز دى....
بس كل الافرااح شبه بعضها فى التهريج الرخم بتاع الشباب ده..خصوصا فى قفل الشارع والمشاكل اللى بيعملوها فى المعاكسااات...
بس ياصبرنى ماحدش بقى يعمل اكل دلوقتى فى الافراح...كله تبع القاعه بتاعة الفرح..
ليه وجع الدماغ من اصله..؟؟؟
ربنا يكون فى عونك...بس برضه اللمه حلوة وخصوصا مع العيله بتبقى جميله قوى....عقبال مريم ورحمه وخااالد ان شاء الله..
تحياتى ياقمر

حواء يقول...

ههههههههههههه
رغايه
عارفه بوستك ده جي في وقته
اتصل بينا واحد يبقي اخو مرات اخويا
هيتجوز لتاني مره بعد مطلق مراته أو الاصح انها اتبترت علي النعمه اللي كانت في ايدها وسمعت كلام امها اللي خرب البيت وخلعت الواد
المهم اتصل بينا وقال ايه عزمنا علي الفرح
وقال ايه ( ده اللي سمعته معرفش صحته من عدمه ) انه جايب ابن متقال وروبي
قولت بسسسس انا مكنتش هروح لاني مش فاضيه بس هعمل حسابي واروح ولازم اخلي فاطمه تتصور مع روبي وفوق عمت ابن متقال
ايه رايك بقي بذمتك اسيب فرح في روبي وهي بتتقصع وبتقول طب ليه بيدار كده واقعد في بيتنا
لا وايه هصور فاطمه وهي ماسكه في رجلها كمان
ههههههههههههههههههههههههههههههه
انا من ساعت معرفت وانا كل مفتكر اضحك لما هموت من الضحك
ههههههههههههههههههههههههههه

kochia يقول...

عقبال ولادك ان شاء الله
وتفرحي بيهم وربنا يسعدهم ويسعدك
امين

لجين أبو الدهب يقول...

مبارك ..

عقبال ولادك يارب ..

بس يكون الفرح من غير مزز D:

دمتِ بخير ..

MaNoOoSh يقول...

الف مبروك وربنا يتمم للعروسين بخير ويباركلهم فى بيتهم الجديد

بس موضوع الولاد اللى وسطهم بلاستيك دة بقى مستفز قوى الصراحة فى كل الافراح.. وللا الرقص الجديد اللى طالع بحركات المطاوى بقى والكلام الغريب دة.. الله يرحم رقص الرجالة الصعيدى الجميل اللى مبيبعزءش هيبتهم كدة فى هز الوسط.

قلب ارهقته الاحلام يقول...

هههههههههههههه

يلااااااااا يارغاااااية ايه دة

صدعتيني هههه لا بجد لذيذة الحكايه اوي

ودمك خفيف موووت صح الافراح عندنا

لما تلاقي مززة كده بتبقي غريبه ههههه

كلهم ملثمين بس صدفة جميله والله انك من

المنصورة :)


تحياتي ,,,

شمس النهار يقول...

الف مبروك عقبال اولادك
انت فين النهارده انا خرجت طول النهار ورجعت عملت شوية محسنات بديعيه ودخلت المدونات لاقيت الدنيا هس هس قلت البلوجر نام بدري ليه النهارده
-----
بالنسبه للبوست اللطيف ده
اولا لما تحبي تشتري ملابس او اكسسوارات اوي اي شئ يتعلق بالشياكه ماتتردديش انا في الخدمه ده غرامي اصلا
بالنسبه للزفه بتاعت العربيات دي بتنرفزني خالص لما بكون ماشيه والاقي زفه ويديقوني في السواقه
ومره كنت سايقه وكان في زفه رخمه جدا ومن كتر اللي عملوه عملوا حدثه كبيره في مطلع كبري الفنجري
واتقلبت الدنيا

القدر و انا يقول...

جميل ياصبرنى الاحساس بالفرح
مهما كانت متاعبه
عقبال ولادك يا ست الكل

صبرني يارب يقول...

ريم

جوزي لما جه يعمل غرز صوتله ولله الحمد
هههههههههههههههه

انا باعمل غرز طبيعى وانا سايقه ههههههههههههههههههههه

وطبعا وانتى حامل دي فعلا خطر

انا وانا حامل باتجنب اركب العربيه مع اي احد غير رضا عشان رضا بنقدر عليه بقى حااااااامل بقى وممكن اوديه القسم هههههههههههههه

وايوه ولله الحمد احنا عندنا البنات كلهم محجبين ولبسهم كويس
خلي واحده فيهم تفكر كده تقول يا قلع تلاقي الف ايد بتيدها على دماغها وانا اولهم
هههههههههههههههههه
ايوه انا اجدع واحده ادي ذنب واسخن الدنيا فى المواضيع دي

وعقبال ولادك يا جميل
ونوررررررتي ووحشااااااني موت والله

صبرني يارب يقول...

احساس طفله

يا قمر والله عن حق عاجباني المدونه بتاعة اليابان يمكن لانى باحب السفر واحب اسمع حكايات عن الثقافات التانيه

والولاد والبنات والله اخر مغني يا ياختي قلت لرضا هو فيها حاجه لو رحت لحد هناك عشان اتأكد من صنفه ؟
قالي لما نروح هابقى اقولك هو صنفه ايه
هههههههههههههههههه

صبرني يارب يقول...

لو بطلنا نحب نموت

مرحبتين فيك
وشكلا على الاطراء والمدونه وصاحبتها نورت يا فندم

صبرني يارب يقول...

ذو الوجه المبتسم

ايوه ما انا رغايه اساسا انتم لسه جايين تكتشفوا ولا ايه
ههههههههههههه

بس انا لو الواد ابنى رقص بوسطه كده ممكن اتبرى منه

وبعدين ابو الولاد ما يقدرش يبص على مزز فى وجودي انا باشيل موس فى بؤي ههههههههههههههه

الخوف للطرفين انا عارفه انه لازم يبقى موجود وده طبيعى
ولو ان مش المفروض يكون خوف خوف يعنى

انما البنت كانت بجد مرعوبه كانها راحه للشنق
وتمسك فينا انا وواحده قريبتها وتقول طب خليكى شويه والنبى
يا بت امشي
طب استنوا اصلهم هايصورونا فى الشقه يمكن احتاج حاجه
يا بت ما انتى معاكي فلق اهو زي الباب على جوزها هههههههههههههههه

فى خوف عادي وفى خوف مش عادي

احنا عندنا دور غايب فى المجتمع فى الناحيه دي وده غلط طبعا

نورتنا

صبرني يارب يقول...

بنت الغربه

ايوه يا اختي والنبى قلتلها كده
بس حماتي قالت كلااااا البت

اكل وعكعكه فى القاعات لا

مالها المحشي وهوووووب صفرت للقوه وعملت 8 حلل محشي من مقاس خمسه فى خمسه الى جانب الصواني حاجه كده تسليك زور

وعقبال ولادك يا قمر ان شاء الله

ستيته حسب الله الحمش يقول...

ايوه كده يا صبصب
هو ده الوصف اللي يروي القلب العطشان
ربنا يفرح ايامكم ولياليكم
بس قولي لأبو رياض خف تعوم
وخدليش بالك
دي صبصب اوعى تلعب في عداد العمر بتاع الأنت
خففففففففففففففف
قال مزز قال
ده كله صناعي ياخويا خليك في الطبيعي المصبصب
قال بيحمي المزة قال من الأوغاد الشوريرين
لازم يا صبرني نعمل اجتماع للجمعية علشان كل واحد يصحى للون هههههههههههههههههههههه

طبعا بهزر ربنا يبارك لك في ابو رياض ويبارك لك في اولادكما ويرزق العرسان الخلف الصالح

صبرني يارب يقول...

حواء

ايه ده روبي

طب مش يشوف حته طريه شويه يا اختي

طب ينفع اجي انا كمان ؟؟
هههههههههههههه

صبرني يارب يقول...

لجين

لا لا انا هابقى اعزم مزز عشان يطروا القاعده
هههههههههههههههههه

صبرني يارب يقول...

كوشيا

تسلمى يارب وربنا يكرمك وعقبالك

جنّي يقول...

السلام عليكم

هو لسه فيه حنة والكلام دا .. انا فاكر ان الحنة ويوم الحنة جاجات انقرضت ..

ربنا يكتر افراحكم

ঔღঔ نـــوارة ঔღঔ يقول...

ههههههههههههههه

الله بحب اجواء الافراح مووووت بس الافراح عندنا بتكون مش مختلط يعني لكن العريس بيكون موجود طول الوقت

ربنا يوفقهم ويفرحهم يارب

وعقبال ماتفرحي باولادك

بالتوفيق يالغلا

صبرني يارب يقول...

مانوش

يا حلوه والله انا شوفت بنات بيرقصوا رقص المطاوي تخيلى ؟؟؟

عجائب الدنيا بقوا كتير اصلهم

نورتي يا قمر

صبرني يارب يقول...

قلب ارهقته الاحلام


انا اسعد والله بيكى يا جميل

وتسلمى يارب ونورتي

صبرني يارب يقول...

شمس النهار


يا حياتي انا كمان باحب اشتري بس مش كل حاجه

باكره الشوبنج واللف فى الاسواق بدون هدف
وبعدين لما تلفي لوحدك او مع اصحابك حاجه
ولما تلفي ومعاكي ربع دستة اشرار موضوع تاني
هههههههههههههههههه

وعموما خلاص لما ننزل القاهره ممكن نعذبك ونخرج معاكي

وانا والله النهارده عندي ضيوف والحكايه ملخبطه شويه
وبكره كمان عندي ضيوف على الغدا
انسوني بقى لحد بعد شم النسيم

صبرني يارب يقول...

القدر وانا

الله يكرمك يارب وعقبال حبايبك يارب

صبرني يارب يقول...

جني

ايووووووه حماتي مستمسكه بالتراث
ههههههههههههههههه

نورتنا يا فندم

صبرني يارب يقول...

سوتيته حياتي


ما تخاااااااافيش عليا يا معلمي

ولا يقدر ده كانت اتعبى فى اكياس يا امي
مش بنلعب احنا هنا
هههههههههههههههههههه
تلميذتك يا ابله

وعقبال ولادك يا جميل

صبرني يارب يقول...

نواره
فى ناس هنا بيعملوا برضه الفرح مش مختلط

وعموما زي ما قلتلكم هومختلط بس محترم

ده ما يمنعش ان تلاقي عيله ضاله كده شبه البرص تقوم تشوف نفسها وترقص انما مش من عندنا يعنى بتبقى غريبه

ونورتي يا جميل

عاشقه الرومانسيه يقول...

واضح ان المزه المستورده
فلوسها ومكياجها مارحوش على الارض
لانها عرفت اتجذب الانتباه ليها
وانتى ست زيها
ربنا يكون فى عون الشيباب زمانه دخل فى الحيطه نوفوز من الناحيه التانيه
وبرضه اجمل مزز فى مصر كلها مزز المنصوره حتى لو لبسين خيش يااختشى
ياما نفسى اشوف المزه اللى بتكتب لنا دى شكلها ايه؟
تعرفيها؟
اه اللى مسميه نفسها صبرنى يارب

صبرني يارب يقول...

عاشقه الرومانسيه
هههههههههههههههههههههههه
يا راجل ده انا مشهوره
هههههههههههههههههههههههههه

طيب والله انا كنت هاحط صورتي فى صور الفرح

كنت انا ورضا قاعدين فى الكوشه
ههههههههههههههه

بعدين رجعت فى كلامي

احققلك الى نفسك يا اختشي

يا تيجى على الاميل ونقضيها صور

يا نتقابل فى او تجمع تدوينى ان شاء الله
اروحه يعنى
ما انا الى فاشله ومش باعرف اروح

نورتي يا جميل

عاشقه وغلبانه يقول...

اي مزز فى الفرح مزكيه عن صحتها
_______________________

اهم حاجه الفروض
كله الا الزكاه ياصبرني ياختي


صبـــــــــــــرني يـــــــارب

صبرني يارب يقول...

عاشقه وغلبانه

اي والنبى يا اوختشي هانعمل ايه

هههههههههههههههههه

صبرها يارب معايا

صبرني يارب يقول...

ميويه

حبيبتى والله انا سعيده بيكى ربنا يكرمك
وتنورينى دايما

وليه اول مره تكتبي ابقى ارمي السلام بس يا قمر انا باتونس بيكم يا جودعان والله

تحياتي يا جميله

ابو زيـــــــــــــــــــــــــــــد يقول...

مبروك مقدما للعروسين ويبقى طمنينا جابو عيال ولا لا ولا السلسله هتقف لحد هنا ههههه
معرفش انا ليه بقى فى الافراح بحب اعيط مع انى مش نكدى خالص حتى يوم فرحى هما كتبو الكتاب من هنا وخد عندك بقى هههههه كمان فى حاجه محشوره فى نفسى انتى بتجيبى وقت من فين للرغى انا عندى كفلين ورافع حاللة الطوارى فى البيت اهم خلاص طار منها برجين مع انها عندها برج واحد بس معرفش التانى ده جه من فين ادينا النصيحه منك نستفيد ويبقى ارقى ابو رياض عشان الحسد وكده
كمان المره دى انا زعلان نفسى اكون ولو لمره واحده اول تعليق بتدخلى تحطى المواضيع وانتى مختفيه ليه ممكن اعرف اقولك تليفونى اهو يبقى اتصلى قبل الموضوع ب3 دقائق هو 00 000 0000 00ويجعله عامر سلاموز

صبرني يارب يقول...

ابو زيد

لا انا عايزه تليفون المدام عشان اضمها للجمعيه
جمعية المراه المتوحشه

وبالنسبه للوقت مش عارفه والله ربنا مبارك فيه ولا انا مش لاقيه حاجه اعملها ولا ايه
هههههههههههههههههه

بس انا هوايتي الوحيده الى عارفه امارسها حاليا هى النت
وماليش فى التلفزيون والمسلسلات وهذا البتنجان

مره واحده قالتلى انها بتابع على الاقل 4 مسلسلات فى اليوم
ودي كان عندها عيال برضه وكل حاجه

بس فى مره بنت قالتلى انها متابعه فى رمضان 16 مسلسل
الصراحه كنت عايزه اكشف على قواها العقليه

عموما مش عارفه الله اعلم

بالنسبه لابراج المدام
انا بعت الابراج بتاعتي من زماااااااااااااان

وممنوع القر الله يرضى عليك كفايه عش اليمام والى جراله

هاحكيلكم بعدين

تحياتي لحضرتك ونورت

المعلم محمد صاحب المطعم - طعمية سخنة يقول...

سلامو عليكم
الفرح بقي كان في طلخا ولا في القاعة الماسية؟
و بعدين مش تقولي كنت جيت اتفرجت علي المزكيين عن صحتهم دول :D:D:D:D

لالالالالالا انا كده خلاص معنتش داخل هنا تاني !

عاشقه الرومانسيه يقول...

عايزه ايميلك بدل مااعيط
واصوت والم المدونين عليا دلوقتى
عاااااااااااااااااا

يااما تسيبى لى ايميلك يااما تاخدى ايميلى من البروفيل بتاعى

الرجاء سرعه التنفيذ
نياهاهاهاها

صبرني يارب يقول...

عاشقه يا حياتي

انتى خلاص نورتي الاميل عندي

صبرني يارب يقول...

طعميه سخنه
وعليكوا السلام يا اخويا

كنت تعالى اتفرج عادي ده عيال ياعمي سكه ما يعملوش شوربه

والفرح كان فى قاعة مش عارف ايه كده الى عند الهابيلاند دي
اه مش فاكره اسمها هههههههههههههههه

المعلم محمد صاحب المطعم - طعمية سخنة يقول...

ههههههههههههه
يعني جنبي
اسمها سوليتير !
انا بقي من شارع بنك مصر !
شوفتي ازاي
يدوب خطوتين و كنت اجي
سولتير دي اتسيطت اوي بقي فيها كام فرح من بتوع حبايبنا

صبرني يارب يقول...

ايه الى جاب القعه جنب البحر دلوقتي

هو شارع بنك مصر جنب الهابي لاند

جايز برضه

طب انا راحه شارع بنك مصر بالليل على الله اشوفك هناك

ههههههههههههههههههه

المعلم محمد صاحب المطعم - طعمية سخنة يقول...

الهابي لاند
و بعديها عمر افندي !
و بعديها شارع كده
و بعديها شارع فيه سينما اوبرا
و بعديها شارع بنك مصر !
كل الشوارع دي متفرعه من شارع البحر
بالنسبة لشارع بنك مصر هقفله عشان متجيش

Anonymous يقول...

لعلمك البت دى انا اعرفها كويس اوى اوى وبالاماره اسمها شوق العطار وساكنه فى ميت عقبه واسمها الحقيقى (شيماء)