السبت، 18 أبريل 2009

فيلم تسجيلى بلسان جنود امريكان فى العراق

تحديث هااااااااااام هذه المدونه سايقه الرخامه عليا ومش راضيه تفتح على الاكسبلورر العادي 
فتحت باوبرا او فاير فوكس 
مش عارفه ليه الرخامه دي
الى يعرف ليه يقولي ومن قدم شيء بيداه التقاااااااه
اهيء اهيء اهيء
سلام عليكم ايهاالمدونين الى عنيهم مدووووور
ايوووووه هاقولكم ليه فى الاخر
المهم ندخل فى الكلام المفيد قبل ما الفجر ياذن وابيعكم واقوم اصلي وانام
من فتره كده شوفت فيلم على قناة show cinma 3
ما عنديش الشو تايم ده مسروق بلا فخر من اولها عشان انتوا عالم عنكم مدوره انا عارفه
المهم الفيلم ده كان عباره عن فيلم تسجيلى عن حرب العراق والمصايب السوده الى حصلت فيها
وعلى لسان جنود امريكان فعلا
شوفت تقريبا اغلب الفيلم ما اثار اندهاشي بقى
ان الفيلم ده عباره عن سلسله من جرائم الحرب الي ارتكبت فى العراق على ايد الجيش الامريكاني طبعا
هاقولكم بعض الى انا فاكراه
اولا: تسجيل من داخل طياره حربيه بعدسة التنشين بتاعة الطياره نفسها والمفروض ان الاصوات الى موجوده اصوات الجنود الى راكبين الطياره وهما بيضحكوا وبيلعبوا انهم ينشنوا على مجموعه مدنيين ماشيين مابيعملوش اي حاجه وفى حالهم هما حوالي 15 واحد وفعلا نشنوا عليهم وضربوهم خلوهم اشلاء
ثانيا: واحد بيحكي انه قتل واحده ست بامر من القائد بتاعه لانها كانت جايه نحاية الدبابه بتاعته ولما قلها اقفي ما وقفتش فموتها (وبيعقب بدموع تجري على وجنتيه الحمر ا لحلوين انا مش هاقدر اكفر عن ذنبي ده ابدا حتى لو قريت القرآن كله كل يوم او اعلنت اسلامي )
ثالثا : انهم ببساطه ما كانوش عارفين من الى معاهم ومني الى مش معاهم وعليه كان كل الى بيجى ناحيتهم بيضربوه معقب الاخ ده ويقول هناك الانتحاري ممكن يكون ست او بنت او شاب او شيخ او حتى طفل فى ال12 عشر من عمره
رابعا : ان فى اعداد مهوله من الجنود الامريكان (الغلابه الى يقطعوا قلبك من الغلب ) ماتوا منتحرين سواء فى العراق ولا لما رجعوا امريكا
خامسا : واحد بيقول انه قال للقائد بتاعه ان اعصابه تعبانه لانهم النهارده موتوا ناس كتير اوي ما لهمش ذنب
فالقائد بتاعه قاله طب زعلان ليه ما هو ده يبقى يوم كويس
وكلام تاني كتير اوي خاص بالجيش الامريكى و القيادات فيه هاقولكم مغزاه ايه من وجهة نظري
بس بعد ما احكيلكم على الفيلم التاني
انا لما شوفت الفيلم الاولاني ده قعدت افكر واكلم نفسي أو رضا واقوله طب ايه ؟؟ يعنى هما عايزين ايه ؟؟
الفيلم ده فيه تسجيلات من داخل الطيارات الحربيه
يعنى خارج بمزاجهم اكيد يعنى مش مولد هو
طيب يعنى اوباما الى عايز الفيلم ده يطلع كده ؟؟ طب ايه ؟؟ ده المفروض هما الى كده الى مجرمين حرب مش الترابي
وقعدت بقى اقلب الافكار فى دماغي بمعلقه خشب عشان ما تجرحش الطاسه
بس بعد اسبوع جابو فيلم جديد على نفس ذات القناه
والفيلم بقى كان على معتقلات ابو غريب والمصاااااااايب السووووووووودا الى كانت هناك
اولا الجنود الى جابوهم ستات ورجاله اغلبهم ناس مهزوزين نفسيا فعلا ومش تمام خالص
والستات والله هما بيقولوا انهم ستات بس مش عارفه ما كانش باين عليهم
المهم يا حضرات
بكل بجاحه بتقولك البت ايوه ما احنا لازم نعمل كده عشان يعترفوا
لازم نهزأهم ونهين كرامتهم وانسانيتهم وننتهك حرماتهم كده عشان اعصابهم تتعب ويعترفوا
وفعلا كانوا بيعترفوا
وبعدين ما هو كل المعتقلات كده
والى اتصور ده ليس اكتر من عشره فى الميه من الى بيحصل فى المعتقل الى كنا فيه او اي معتقل لكن الفرق ان الى انا عملته اتصور
وفى واحد تاني
قالك انا بانفذ اوامر عسكريه حتى لو كانت شفهيه
والقاده بتوعنا عارفين ان ده بيحصل فعلا لكن ما بيدوش به اوام مكتوبه لو ما نفذتش هايحصلي متاعب كتير لكن واضح برضه انى لما نفذت برضه تعرض للاذى
بس يعنى ده مش مبرر برضه انه يوافق على وضع زي ده
كل الناس بتأكد ان مافيش حد اتجازى ولا اتسجن رتبته اكبر من رقيب
كلهم الى اتحبسوا واتطردوا من لجيش حاسين بالظلم وبانهم كانوا كبش فدا
(وتشوف برائتهم والدموع هاتفر من عنيهم يقطعوا القلب )
بعد برضا ما اتفرجت على الفيلم ده كله المره دي وعرفت هما كانوا بيعملوا ايه فى الناس هناك ولاد ال ..........(كل واحد يختار اللقب المناسب بس فى سره مش عايزه قلة ادب هنا )
جمعت الافكار بقى فى دماغي الا وهي :
اولا واضح ان مش احنا بس المقصودين بالفيلم ده لا ده بالمقامل الاول للامريكان توجيه الراي العام الامريكى والعالمي بالمره الى ان تدخل امريكا العسكري فى العراق كانت غلطه
مش عشان العراقيين طلعوا ناس طيبين لا عشان امريكا الغلبانه المسكينه اتبهدلت فيها يا اخويا
وكمان الجنود دول راجعيين بلدهم عايزين الناس تتعاطف معاهم مش يضربوهم بالبرطوشه لاجرامهم الى الكلام عنه بقى منتشر
واعطوا فعلا صوره للجنود انهم غلابه غلب يا جودعان
طب وربنا قطعوا قلبي وصدقتهم فعلا ( بس لانه ممكن يكون حقيقى فعلا كلامهم انهم برضه كجنود صغيرين يكونا مظلومين
ثانيا : لما سألت نفسي (طب ولنفرض ان الحكايه كده طب ده الكلام ده يدينهم اكترررررر ويخليهم مجرمين حرب ويتحاكموا)
قوم نطلت الكلمه فى ودني
وقلت ايه ده يتحاكموا ؟؟؟؟!!!
طب وهو مين يقدر يحاكمهم وعشان مين ؟؟؟ العرب
طب ما طزززززززز
ايوه صحيح هو مين ان شاء الله يقدر يقول لماما امريكا تعالى لما احاكمك ؟؟
يعنى خلاصة ثانيا ان امريكا بتقول للعالم كله انا عملت اهو الجدع فيكم وواكل ريرى كويس وهو صغير يجى يورينى نفسه
ثالثا : ااااااااه ماهو اساسا هى كده اول ما رئيس نظام بتبدأ تظهر فى الافق فضايح ما سبقه الى الفساد فى الحكم وغيره
اه بالنسبه لموضوع عنيكم مدوره
احب اقولكم ان اليمامتين الصغيرين الله يرحمهم بقى ويحسن اليهم ادبحوا مبارح
ده لاننا اكتشفنا ان فيهم فاش
ودخل من شباك المطبخ وحيث ان انا الوحيده الى مرزعوه فى المطبخ ليل نهار
انا الى اتنيلت اتقرصت لما قلت بس
وكان قدام رضا حلين من اقتراحي يا اما يرميهم بالعش فى الشارع بس ده لو كانوا بيعرفوا يطيروا
يااما يدبحهم هو وينضفهم برضه نشيل العش ونرميه وكده بقى
طبعا اختارنا الاول عشان لقيناهم ما بيعرفوش لسه يطيروا ولو حدفناهم هايقوا ويموتوا فلنا يموتوا فى بؤنا احسن
وطبعا انا شايفه ان الفاش ده نتيجه لقركم البتنجاني اللون
ومش هاقولكم حاجه تاني ابدا
وما تحاولوش توقعوني اقولكم انى كنا بنصطاد النهارده سمك وما لقناش الحمد لله يظهر جاتله اعاره السمك
ملحوظه : مشغوله مشغوله مشغوله الايام دي والله غصب عني عندي كميات اشياء مختلفه
مش عارفه اتابعكم اسفه اوي يا مدونينا الاعزاء
البوست نازل من غير الوان اهو مش قادره الون
المهم عايزه اسمع رايكم على الفيلم ده ونتكلم فى الموضوع ده
خصوصا لو حد شافه برضه زيي
يلا بقى الفجر اذن بلاش رغي

هناك 38 تعليقًا:

MaNoOoSh يقول...

ايه دة
اول تعلييييييييييييق
اولا هم الامريكان كدة عايزين الوقتى يصعبوا على الدنيا كلها.. كتهم القرف
ثانيا بقى.. انا مفهمتش يعنى ايه فاش اصلا.. يعنى ايه بقى؟؟؟

لجين أبو الدهب يقول...

النقطة الاخيرة تمام التمام ياصبرنى ..

كنت بتفرج على برنامج أوبرا أيام الانتخابات بقى وطبعا اكمنهم لونهم زى بعض فامش عايزة اقولك اوبرا كانت بتنفخ فيه اد ايه ..

وكانت شغالة على ودنه من الافلام دى بقى ..


وتجيبلك الولية بنت عم خال مرات الجندى واهئ اهئ ابننا راح ابننا راح ..

وهى شكلها ما شوفتهاش طول حياتها أصلا ..

وكل ده علشان يبينوا ان الرئيس اللى فات الشرير الوحش عمل فيكم ايه انما الرئيس الجديد هايبقى مية مية ويسحب القوات ..

ولو شوفتى خطاب أوباما فى حفلة التنصيب والخطبة اللى بعدها هاتلاحظى كلامه كله فيه تلميح لكده ..

والنقطتين التانين اكيد طبعا ان ده إنذار صغنون للعالم عن قوتهم ..
بس الغريب فين بقى حقوق الانسان لما بيشوفوا افلام زى دى .. ولا هم ما بيفوقش غير على الخروف اللى بيدبحه المسلمين فى العيد ياحرام وانه عمل غير انسانى !!..

ووالله زعلت على الحمامتين المرة الجاية الواحد عايز يبطل قر ونق بقى D:

بس هو ايه البتاع اللى قرصك كده انا اول مرة اسمع عنه ..

بس ياترى دول كان ممكن يجيلهم انفلونزا الطيور ؟؟

دمتِ بخير ..

reem يقول...

صبرنى وحشانى جدا جدا جدا

خلاص اتعودت عليكى وعلى رغينا مع بعض ومفتقدة دا جدا بس معلش ربنا معاكى
المهم تكونى بخير انتى وجوزك والعسولين ولادك

الواضح جدا ان الحكومة الامريكية الجديدة عاوزه تعرف العالم ان حكم بوش كان غلط في غلط وان اوباما هو المنقذ الجديد لامريكا

اما اليمامتين صعبو عليا بجد مع والله برئ يا بيه ومش قريت عليهم ولا حسدتهم خالص خالص لانى اصلا بخاف من الحاجات دى

ممكن لو كنتى اصدتى سمك كنت هاقر بصراحة لانى نفسي اوي اصطاد سمك فياريت لما تصطادي ما تقوليش ادامي عشان هاقر بجد

خلى بالك من نفسك وهاتوحشينى ووحشتينى

بنت الغربة يقول...

صيرنى ياحبيبتى
واضح اننا شبه بعض فى حاجات كتييرة قوى..
منها الشوتايم المسروووق برضه..
ههههههههههههههه
انت عندك الرسيفر اياه اللى بيدخل على النت زى ..؟؟؟؟؟
انا عندى الشوتايم والART والاوربت كمان..
بس الحمد لله مانزلتش الاوروبى خااالص...مش ناقصه ..البلد فيها اللى مكفيها..
انا شفت البرنامج ده ..بس بصراحه ماكملتووش لان نفسيتى تعبت قوى ..
وخصوصا لما تتفرجى على ناس بتمووت وبتتعذب من غير ذنب كانهم حيوانات ..
ده حتى الحيوانات مابنعملش فيهم كده ..حسبى الله ونعم الوكيل فى اللى وصلنا لنظرة العالم لينا كده ..
واللى اداهم الفرصه انهم يعملوا فى الناس كده..
ابقى زورينى ياقمر ..بقالك كتيير ماطلتيش علي...
سلااام ياعسل

صبرني يارب يقول...

لجين

ايوه الاعلام بتاعهم مش عارفه ليه مصرين يصوروا اوباما على انه المنقذ

مع ان انا مش مطمناله كده وحاسه انها مجرد مقدمات لما هو ابشع

صبرني يارب يقول...

مانوش

الفاش ده حشرات بتعيش على جلد الحمام واليمام وبتقرص
رفيعه جداااااااااااا يعنى لو حد نظره ضعيف شويه مش هايشوفها

تحياتي ليكى يا قمر ونورتي

صبرني يارب يقول...

ريم

والله وانتى كمان يا جميل
بس مش عارفه ايه الحكايه الناس متفقين عليا ليه الايام دي

ان شاء الله بعد شم النسيم يعدي يمكن الحكايه تروق شويه

والسمك والله يا اختي كانت حته علقه سفر ساعتين رايح جاي فى الادغال مع قلة نوم لمدة 48 ساعه
ورجعنا بكيلو سمك من الى بيعيط على مامته يا اختي

وحشاااااني موت

صبرني يارب يقول...

بنت الغربه

اييييييينعم هو نفس الرسيفر

بس انا لما عرفت الية العمل به اعترضت وقلت لرضا دي سرقه وأنا مش موافقه

قالي مالكيش دعوه انا حرامي
فلان مشترك هناك مطلعين عينه وبيجوا وقت الماتش كمان يقطعوا
ومقلبينه كل شويه وهما الى حراميه

قلتله برضه مش مبرر اننا نسرقهم الماتشات والقنوات مش اكل وشرب يعنى عشان نقول عليهم محتكرينهم

المهم يعنى انا سجلت اعتراضي وهو حر بقىىىىىىىىىىى
انا اصلا ماليش فى التلفزيون اوي

المهم
لا حيوانات ايه احنا بندور على حقوق الحيوانات وبنادي بانهاء المجازر الى بنعملها احنا المسلمين المتوتحشين للخرفان

والله يا داليا اكتر ما يغيظك الدم الباااااارد الى بيتكملوا به الظباط ا لى بيقولوا عادي ماهو معتقل امال نخليهم يعترفوا ازاي

وبالنسبه للزياره

والله والله يا داليا شايفه موضوععندك جديد من امبارح وقلت هاروح اقراه
بس مش عارفه فى ايه المدونه عندي الصفحه الرئيسيه مش شغاله معايا انا دخلت التعليقات من الدرافت والله

طبعا مش عارفه اجيب الوصله بتاعتك من القايمه
غير انى كنت باكتبا الموضوع بتاعي امبارح وانا نايمه والله

عموما اكيد مش هايفوتنى بوست انشاء الله
تحياتي يا جميل

صبرني يارب يقول...

يا جماعه انا عندي مشكله مش عارفه هى ايه

كل لما ادخل المدونه ما ترضاش تفتح

انا فتحت الردود بالعافيه من الدرافت

وكمان دخلت مدونات تانيه بعضها فتح والتاني لا بنفس الطريقه

الى يعرف ايه الموضوع يقولي

وكمان المدونه بتعمل كده معاكم برضه ولا ايه ؟

reem يقول...

صبرنى مش عارفه بصراحة اصلى عارفانى زيرو في حكاية الفهم في المدونات دى ومشاكلها بس انا عندى بردو في مشكلة عندى كل حاجة واقفة من كم يوم حتى موضوعك النهارده مش ظهر عندى في الريدر انا دخلت عندك اشوف ايه الجديد ولقيت البوست

طبعا مش افدتك باى حاجة

وخلاص مش هاقر على السمك تانى مش كنت اعرف انه فيه تعب اوي كدا

انتى وحشانى اكتر بجد

شمس النهار يقول...

امريكان ايه بس ياصبرني دعي الخلق للخالق
فيتنام عراق كله فيلم انتاج امريكاني
المهم خالينا في اليمام الله يرحمه
اتنظر ياصبرني مش حطيتي صوره علي النت اشربي بقا
انا كمان مشغوله جدا عندي دربكه كده في القبيله
اظاهر اخدنا عين انت وانا بعد ماكنا مقيمين في البلوجر مش عارفين حتي نرد علي حد
افضي كده هنواصل العمل ان شاء الله غدا ونزل البوست الجديد بعد نجاح الاستفتاء

Ahmed يقول...

لا بقولك ايه؟ ده مش قر ولا حاجه
الفاش ده موجود في كل حته

انما بأه لو على الأر بجد, كان زمانك بتحكيلنا على الماسوره اللي عليها العش مثلا وقعت ولا حاجه
ايوه
احنا قرنا مبيجبش الحاجات الفافي ديه
هههههههه

بالنسبه للبرنامج اللي بتقولي عليه, للأسف لأن مفيش عداله تحاكم الناس ديه الواحد بقى مش عارف يحس بأيه؟ بالقرف ولا الزهق ولا الخوف ولا ايه بالظبط

مفيش غير الدعاء
وربنا موجود

جنّي يقول...

السلام عليكم

هؤلاء القتلة الارهابيين قال عنهم القرآن :

{كَيْفَ وَإِن يَظْهَرُوا عَلَيْكُمْ لاَ يَرْقُبُواْ فِيكُمْ إِلاًّ وَلاَ ذِمَّةً يُرْضُونَكُم بِأَفْوَاهِهِمْ وَتَأْبَى قُلُوبُهُمْ وَأَكْثَرُهُمْ فَاسِقُونَ }التوبة8

وقال تعالى :

لاَ يَرْقُبُونَ فِي مُؤْمِنٍ إِلاًّ وَلاَ ذِمَّةً وَأُوْلَـئِكَ هُمُ الْمُعْتَدُونَ }التوبة10

صبرني يارب يقول...

ريم

عاشقه الرومانسيه
بعتتلي اكسبلورر جديد اسمه اوبرا وفتح منه مش عارفه الناس بقى عاملين ايه وبيفتح معاهم ولا ايه

شكرااااااااااا

صبرني يارب يقول...

شمس النهار

تمام كده برافو عليكى

بالظبط نفس الى عملوه ايام حرب فيتنام

وكويس انى ما حطيتش صورتي بقى كنت جالي فاش انا
هههههههههههههههههههههههههه

وايوه يا اختي اتنظرنا وبقينا مشغولين
ويارب تكون الدربكه خير يارب
وتسلمى يا شموسه ونورتي

صبرني يارب يقول...

ابو العلا


لا والنبى بلاش المواسير اصل انا باكره السباكين

والعداله واضح اننا لسه ما نستحقاش

صبرني يارب يقول...

جني

والله يا استاذنا جبت من الاخر

فاسقون معتدون

حسبنا الله ونعم الوكيل

احساس طفلة محبة للرومانسية بس واقعية يقول...

انا متأخرة النهاردة انا
سبت وحد بقى ويك اند معلش

كدا يا صبرنى تكلى اليمام
كدا برضو وهان عليك
تأكلية لوحدك ومش تعزمى علينا
الا هو بيتاكل صحيح انا معرفش عنة حاجة غير شكلة

نيجى للموضوع بصى انا رأيي انهم بشر زيهم زينا وعندهم مشاعر
وبيحزنوا لما يفقدوا حد منهم
وبرضو منظر القتل والدماء مش سهل عليهم اكيد

انا بتكلم على الجنود الصغيرين اللى بينفذوا بس

عامة وبعد كل دا ارجع اقول ما هم بيرحوا يحاربوا بيرحوا بمزاجهم برضو
وفى اعتقادهم دفاعا عن بلدهم

محدش بيكونوا عارفين الحقيقة وفكرين ان الديموقراطية بتتنفذ على كل الناس مش هم بس وبيجوا يشوفوا الحقيقة فينا

تصدقى كلمهم عصبنى وكئبنى على الصبح كدا
:(
ربنا يصلح حالنا ويزيحهم من على قلوبنا

تقبلى مرورى

hasona يقول...

السلام عليكم
كنت قرأت هذه القصص والرويات في الصحف

الجنود كانوا بيتمتعو بحالة من الجبن والخوف - جعله يفعلون كل شئ ممكن في التنكيل والتعذيب
ويمكن اللعب والهزار كمان
بارواح الناس والبشر

والمصيبة الكبيرة لن يستطيع أحد ان يقاضيهم أو يحاسبهم علي أفعالهم المخزية

صبرني يارب يقول...

حسونه

ماهو ده الى عصبني بقى انهم بعد الي اعترفوا به ده

كانهم بيقولوا للعالم اعلى ما خيلكم اركبوه

نورت

صبرني يارب يقول...

طفله محبه للرومانسيه

يا حياتي كل وقت وقتك يا قمر

انا برضه فى ويك اند مش راضي يخلص لحم مع شم النسيم

وانا عارفه انهم برضه مضحوك عليهم بس مش بالبراءه الى اتكلموا بها خصوصا بتوع المعتقل

نورتي يا جميل

المعلم محمد صاحب المطعم - طعمية سخنة يقول...

سلامو عليكم
المدونة شغالة عادي باكسبلورر !
بالنسبة للأمريكان و الافلام كل ده ميهمناش لأن حقنا ضايع ضايع
و بالنسبة لليمامتين زعلتيني اوي ! مفتكرتنيش حتي براس بس الفيديو كان جميل اوي و بدون قر !

KHALED يقول...

عارفة يا أم خالد ..
إحنا طبعنا كدة بنادى بأسم أول مولود ذكر .. ( عنصرية بقة )

أنا شفت فيديو على اليوتيوب حقيقى عن إغتصاب عراقية ..
عارفة على الرغم من إنى راجل بس الليلة دى أنا ماجنيش نوم ..
عارفة لية .. ؟؟
لإنى حسيت بالقهر و الغضب ..
البنت كانت بتصرخ و الجندى بيغتصبها و زميلة بيصور الواقعة بكاميرا رؤية ليلية ..
ماشفتش أبشع من كدة ..
الفيديوهات دى بتتسرب رغما عنهم

صبرني يارب يقول...

طعميه سخنه

ضايع ضايع ؟؟

لا انا ما اقولش ضايع ضايع

عشان احنا الى مضيعينه ولو فضلنا كده هايفضل حقنا ضايع

وبعدين راس ايهما قابلتنيش دي خالص مش عارفه رضا وداها فين
هههههههههههههه

صبرني يارب يقول...

خالد

سمعت عنه الفيديو ده فعلا

حسبنا الله ونعم الوكيل
وعندك حق طبعا تحس كده

نورت

المعلم محمد صاحب المطعم - طعمية سخنة يقول...

ماشي ماشي
براحتكم خالص
دانتو هتاخدوا قرررررررررررررررر
كلتم يماااااااااااااام

شمس النهار يقول...

اناجيت اشجب واعترض واندد
عشان انت غايبه بدون اذن
ولازم تجيبي ولي امرك
وانت راجعه

صبرني يارب يقول...

المعلم محمد صاحب المطعم

طيب انا عايزه سندوتش طعميه بقى مادام صاحب المطعم


غيرت اسمك برضه لبتاع اكل

فكرتني بحسن فايق لما كان اسمه بنجر
ههههههههههههههههه

صبرني يارب يقول...

شموسه يا حياتي والله لسه كنت عندك

والله يا شمس لو حكيتلك انا حصلي ايه فى الكام يوم الى فاتوا

كنت تجبيلى كوباية لبن وتغطينى فالسرير وتلعبيبى فى شعر وتطبطبي عليا
واناااااااااام بقى


معلش على عينى والله

تسلمى يا قمر

المعلم محمد صاحب المطعم - طعمية سخنة يقول...

انا غيرت الاسم عشان في ناس فاكرني بنت
و بدأوا يشغلوا اسطوانات غزل
و بداية تثبيت و تظبيط مزة
فبعرفهم اني مش بتاع الكلام ده !

صبرني يارب يقول...

المعلم

يا رااااااااجل

طب اشمعن هو اي تاء تانيث تبقى مزه ؟؟

ههههههههههههههه

طيب ياعم مش كنت تستنى يمكن كنت تلاقي عدلك وتقعد فى البيت
ههههههههههههههه

نووووووورت

اسيره الاحزان يقول...

دى اول مره احط كومنت عندك بس بجد البلوج بتاعتك حلوه اوى


اما بالنسبه للفلمين

من راى ان امريكا عايزه توصل للعالم كله انها بتعمل اللى هى عايزاه وبتفضح نفسها كمان مش مستنيه حد يفضحها وان محدش يقدر يقولها ربع الاربعه كام حتى لو كانت غلطانه

يعنى بمزاجها تقول دول ارهابيين وبمزاجها يبقوا عندهم ننوى وبمزاجها تقتل وتدبح اى حد ومحدش يتنفس

صبرني يارب يقول...

اسيرة الاحزان

يا حبيبتى لوحة التعليقات نورت بيكى

ويارب دايما منوراني يا جميل ومتشكره ليكى اوي

صبرني يارب يقول...

بيبرس

انت فين ؟؟

مختفي كده ليه

يارب يكون خير

والله ما عملت فيها حاجه ده طلع من البلوج وخلاص اتصلح الحمد لله

نوووووورت

ابوزيد يقول...

التعليق ده لطابخين ايه النهارده بس معرفتش اوديه هناك بيقولى لازم تملى الحقول حقول ايه بس ربنا يهدينا يبقى ابعتيها هناك بقى
بتكلمى كده زى ما يكون كيلو اللحمه بسبعه جنيه وساعات تلاقيها بسته ههههه ابوزيد راق من تانى وعملنا مكرونه بشاميل تانى بس البنيه بقت ايه استاذه من مرتيين نجرب ونقولك بس لو طلعت وحشه فى رقبتك حق اللحمه ليوم الدين دى لحمه..... لحمه يا عالم افهموها بقى وعاوزين افتكاسات كتير على طول وبعدين مدونه رؤيه اسلاميه حاسك مقصره فيها وقاعده فى المطبخ ذودى حبتين فيها عشان حسناتك يا ناصحه وهاتى بقى قصص الصحبيات والحاجات الجميله دى انا هعلمك يا استاذه ولا ايه على فكره انا باخد كوبى من حاجاتك ولما بروح بخلى المودام تشوفها من على اللاب توب بتاعى عشان بعيد عنك مش عندنا نت فى البيت بس عندنا TV ويجعله عامر

صبرني يارب يقول...

ابو زيد

وبعدين معاك بقى

ايه حكايتك مع البلوج

طب حد يطوع يا شباب يديله حصه فى البلوج

يعنى ايه مش عارف تعلق هناك
ههههههههههههههه

المهم ما علينا الحمد لله ان المكرونه طلعت حلوه

ومالها اللحمه دي طلعت يا راجل انا شوفتها قريب

ورؤيه اسلاميه دي حبيبتى مش مقصره فيها ولا حاجه
بس كل الحكايه انى كنت باجهز موضوع بس اتاخرت فيه شويه عشان كنت مشغوله ولسه ما خلصش والله
فقلت انزلكم حاجه من الى جاهز عندي

ونزلت النهارده موضوع من زوجات الرسول اهو قبل ما اشوف تعليقك حتى ابن حلال انت

وبالنسبه للمدام يافندم انا اجيبلها انا النت لحد عندها
هههههههههههههههههه

انا ليا الشرف والله ربنا يكرمك ويكرمها ويهدي سركم

نورت

ذو الوجه المبتسم يقول...

السلام عليكم
اعتقد ان العالم الامريكى الدول الاخرى هى اللى عملته بخوفها وضعفها
ولكن التساؤلات بجد
امتى هنقول لا
امتى نكون احنا مش حد تانى
ااااااااااه
يا بلدى

نفسي ارجعلك
واحقك فيكى حلمى
امتى ؟؟؟؟
تحياتى

Retal ahmed يقول...

ان النظافه ليست مجرد كلمة فقط بل انها كلمه ذات معنى وذات اهميه قصوي في حياة الفرد والمجتمع فان المحافظة على النظافة تعنى الاستمتاع بصحة جيدة بدون الاصابة بالامراض ولهذا جئنا لكم بمجموعه من افضل شركات تقديم الخدمات المنزليه
شركة كشف تسربات المياه بالاحساء


شركة مكافحة النمل الابيض بالاحساء


شركة تنظيف بالاحساء



شركة تنظيف كنب بالاحساء



شركة تنظيف مجالس بالاحساء


شركة مكافحة حشرات بالاحساء

شركة تنظيف فلل بالاحساء



شركة تنظيف شقق بالاحساء

شركة رش مبيدات بالاحساء