الجمعة، 7 أغسطس، 2009

حفل توقيع كتاب الشاطر مفيش

السلام عليكم


انا روحت حفل التوقيع يا جودعااااااااااان


وزي ما حصلي المره الى فاتت فى تجمع خيخه للتبرع بالدم اليتيم الى انا حضرته ولقيت اقل عدد من المدونين حاضرين


حصلي كده برضه والنبى يا اخويا


احكيلكم الى حصل من اولها


اولا بما انى من المنصوره ابا عن جد فانا توهت وانا راحه المكتبه


مش عارفه على الوصف كانت راكبه معايا انى ادخل يمين مع ان الحقيقه انى ادخل شمال


المهم يعنى اتصلت على ابراهيم العدوي الى كل شويه يرنلي ويقوم داخل المكتبه يبقى خارج الخدمه واخيرا قفشته بيرنلي وكلمته طلعلي بره



وبعدين روحت هناك بقى شوفت صلاح مسدس صغير وعرفوني على المدونين الى موجودين هناك
رامز وخالد (يارب اكون افتكرت الاسامي صح )
معلش لو غلط يا شباب انتم عارفين السن


وقعدنا بقى سمعنا مصطفى حسان ومناقشة للديوان


وطول ما انا قاعده والتليفون بتاعي شغال بيستعجلوني اروح


طبعا ماما كنت سايبه لها العيال كانوا مطلعين مجانينها ومجانين الجيران كمان


وصلاح العميري هو الى كان دعينى للحفله دي قلتله طب هاتدوني نسخه من الكتاب طيب قالي عليا النسخه


طبعا انا نسيت انى قلت كده


بس صلاح ما نسيش وجابلي الكتاب اقنع فيا يا ابنى ما تعملش فى نفسك كده طب هات العشره جنيه ومالكش دعوه انت


متشكره اوي يا صلاح عقبال ما نحضر حفل كتابك انت كمان ان شاء الله او فرحك بقى اهم يا عم



وانا قريت الديوان كله على فكره وفعلا حاجات كتير عجبتنى مصطفى ربنا يوفقه ان شاء الله


وانا ماليش فى الشعر انتم عارفين لكن معنى الكلام عندي اهم حاجه فى كتابه شعر او غيره



المهم الحفل كان جميل ولو عايزين تشوفوا الصور


مصطفى منزل عنده صور انا ما صورتش للاسف اي حاجه


مدونة هرتله


ومتشكره لصلاح على الدعوه ولابراهيم انه جه ولكل الناس الى كانوا هناك ورحبوا بيا


بس خلاص


هناك 14 تعليقًا:

ستيته حسب الله الحمش يقول...

اولا البوست ظهر في الريدر متأخر قوي ولسه شايفاه
ثانيا ها نروح لمصطفى هيناهون في القاهرة يوم الخميس
ثالثا النهاردة فعلا كان نفسنا تكوني معانا كنتي ها تنشكحي
رابعا حاسة انك معتزلة ومش في المود مالك يا حبي شاوري لي ع اللي مغير مزاجك علشان اطخه
خامسا ها نشوفك امتى يا غايبة عن عينينا

بس خلاص
توقيع شعبولا

adel يقول...

كويس :9
انا هحاول اروح حفلة توقيع القاهرة بقي :):):)

خالد فوده يقول...

اها كده الاسماء صح بس ماله السن
دي حضرتك اصغر مني يجي ب10سنين ههههه
شرفت بالتعرف علي حضرتك

صبرني يارب يقول...

ستيته

والله يا جميل مافيش حاجه بس انا فى الصيف بابقى محتاسه كده دايما ورمضان جاي بقى والحوسه الكبيره

ان شاء الله نفضى بعد العيد بقى ودخول المدارس والفيلم ده الحكايه تهدى معايا

ولو ممكن تطخيلى نص البلد اوك عشان انا مخنوقه منهم


وانا والله والله كان نفسي اجي فعلا

بس اعمل ايه بقىىىىىىىى

ان شاء الله هاشوفكم باذن الله

هاجي ازوركم فى بيوتكم بقى واريح نفسي
هههههههههههههههه

نورتي يا جميل

صبرني يارب يقول...

خالد فوده

الحمد لله ان طلعت صح والنبى

هههههههههههههههه

عشر سنين حرام يا خالد تسعه ونص
ههههههههههههه

صبرني يارب يقول...

عادل

طب كنت تعالى حدانا فى المنصوره كنا هانسقيك شاي ياعم
ههههههههههههه

مامة مازن يقول...

الف مبروك للاستاذ مصطفى وعقبال كل اللى نفسه يعمل ديوان ربنا يوفق الكل
يارب
كل سنة وانتى طيبة واسرتك بخير

د. ياسر عمر عبد الفتاح يقول...

أنا شفت مصطفي في لقاء المدونين
وقالنا 3 قصايد بحالهم في اللقاء
هوه شاعر جميل ,, وليه مستقبل كبير إن شاء الله
ربنا يوفقه

رامز عباس يقول...

بجد وجود حضرتك اسعدني وروحك وخفة دمك


ياريت تكوني استمتعي باللقاء

سومه...مجنونه فى بلد عاقل يقول...

ازيك يا صبرنى ربنا يهنيكم ديما ورحلات سعيده:)) ان شاء الله

صبرني يارب يقول...

مامة مازن

الله يكرمك وانتى طيبه وبالف خير

صبرني يارب يقول...

د ياسر

ربنا يوفقه ويكرمه يارب

وانت كمان

صبرني يارب يقول...

سووووووومه

انتى فين يا بنتى وحشاااااني

ولا انا الى فين اصلا مش عارفه اروح لحد خااااالص فى البلوج

ربنا يكرمك نورتي

صبرني يارب يقول...

رامز عباس

الله يخليك يارب

والله انا فعلا كنت مبسوطه اوي

لانى ما اعرفش حد فعلا من مدونين المنصوره

ومتشكره اوي على ذوقك انت الاحسن ان شاء الله