الخميس، 20 أغسطس، 2009

كل سنه وانتم طيبين .. تعالوا خدوا الفوانيس

كل سنه وانتم طيبين يا شعب البلوجر العظيم
اي والله عظيم فعلا
وما زلتم وحشينى جدا جدا ومش عارفه اتابعكم حق المتابعه برضه
ولسه مش عارفه هايجرالي ايه فى رمضان الحقيقه جايز اتلاشى
المهم كل سنه وانتم طيبين ويارب رمضان كريم ومبارك عليكم جميعا وعلى ولادكم واهلكم وحبايبكم والمسلمين والعالم كله ان شاء الله
انا جبتلكم فوانيس معايا شوفتوا الحلاوه بقى
مع ان احنا ما اشتغلناش فى الفوانيس السنه دي يعنى جايبالكم من بره شوفوا التضحيات بقى
ده فانوس مصري تقليدى شحط محط للناس الكباره بس الى هما يقدروا الفن الجميل
مدوا اديكم جبتلكم محل بحاله اهووووو
وعشان الاطفال برضه الى الصين لحست دماغهم جبتلهم شوية فوانيس بلاستيك بتقول حلو يا حلو باللغه الاكواويه اهو مش حارمااااااااااكم

وهذه مفجأة السيزون بقى يا رجاله عمك كرمبو وخالتك بايره عملوهم فوانيس الفانوس تمنه من تلاتين لستين جنيه حسب حجمه وزغرتي ياالى ما انتيش غرمانه
وشعب يستاهل الى يجراله


نفسي اعرف الملحق التجاري بتاعنا فى السفارات بيعملوا ايه ؟؟
البعثات الدبلوماسيه بررررررررره بيعملوا ايييييييييييه
الجماعه بتوع الصين اعتقد مركبين كاميرات علينا فى البيوت واحنا مرزوعين زي الهبل
نستاااااااهل ولا ما نستاهلش
حقها ولا مش حقها
ما علينا يا جدعان جايه اقولكم كل سنه وانتم طيبين ندخل فى كلام ملعبك
والياميش بقى اجازه السنه دي ما حدش يجيب ياميش
وانا ما عنديش ياميش ما تطمعوش فى الموسم الى ابويا جايبهولي
هههههههههههههههههههههههههههه
ارجوكم خلوا رمضان شهر كرم مش فى الماديات والاكل بس فى الاخلاق والتسامح من فضلكم من فضلكم
وكل خطوه كده تعملوها فى رمضان حاجه بس بسيطه باطلبها منكم قبل ما تخطوها اعقد النيه على انها فى سبيل الله تعالى
الى تعمل عزومه ما تقعدش تنفخ وتقول كان يوم اسود يوم ما وافقت على العزومه وهى مره وما عادتش هاتحصل تاني
لا ياا ختي انوي العزومه افطار صائم كده وخليكى حلوه
وابوس اديكم الستات الى راحه تصلي التراويح بلاش العبايات الى مليانه بربرق وميك اب وبرفانات فى الجاااااااااامع معلش يا اختي انتى وهي تعالوا على نفسكم حبه
وبس خلاص بقى سبوني انااااااااام
وكل سنه وانتم بالف خير ودايما يارب متجمعين على كل خير يا اهل البلوجر العظام

هناك 62 تعليقًا:

Mohamed Hamdy يقول...

كل سنه وانتى طيبه وعقبال كل رمضان

ستيته حسب الله الحمش يقول...

كل سنة وانت طيبة يا صبصب
حاسة ان روحك في طرطوفة مناخيرك
بس عادي بتحصل لكل الستات
هههههههههههههههههههه
وهاتي فانوس من الكبار اللي في الأول دول
امال احنا عندنا المخفي كرومبو ب 75 جنيه ليه؟
نهارهم ابيض بيسرقوا خماشاشر جنيه فوق السعر المنيل الغريب كمان
طيييييييييييييييييب يا بشر

حاضر مش ها نحط بروبرؤ
انا اصلا مليش في البروبرؤ
طب احطه وبعدين اشيله؟ والا ايه العمل؟

أم مالك يقول...

صبرنى الحبيبة
انا جاية علشان اقولك
كل سنة وانتى طيبة واسرتك الحبيبة
ويارب دايما تكونوا بالف خير
ومتنسيش تبعتى لى فانوس الواد مالك
دمتى بخير ياحبيبة

Appy يقول...

انا عاوزه فانوس بسنت والدياسطى ليه مش عملوه كل سنه وانتى طيبه ودورى ليه على الفانوس وهاتيه

دعاء يقول...

كل سنة و انتي طيبة يا صبرني الغالية.
يا ريت أحجز فانوس بشمعة ,معلش أصل أنا قديمة شوية.كفاية الولاد وفوانيسهم اللي ثمنهم لسة بيحرقني.

ربنا يتقبل منا الشهر الكريم و ينعاد علينا وعلى اهلنا بالخير يا رب.
سلام

عطش الصبار يقول...

كل سنه وانت طيبه
على العيد هنلاقى كعك وبسكوت صينى
ممكن تبعتيلى فانوس على هنا اصل دورت عليه مش لاقيه
كل سنه انت والاسره بخير

خالد فوده يقول...

كل سنه وحضرتك طيبه
ورمضان كريييييييييييم
وربنا يعوده علينا وعليكم بالخير والصحه والسعاده يااااااارب

adel يقول...

كل سنة و انتي طيبة
وانا هاخد فانوس من القدام دول لاني بحب شكلهم قوي :):)
و الحساب يجمع بقي :):)

صبرني يارب يقول...

محمد حمدي

متشكره اوي وكل سنه وانت بخير وسلام

nody يقول...

كل سنه وانتى بالف خير

وبجد ياريت الستات الى بيروحوا المسجد لتراويح
لو عندهم ولاد صغيرين ما يخدوهمش معاهم
او بلاش تروح وتضيع الصلاه على غيرها
بدوشه العيال

صبرني يارب يقول...

ستيته يا حياتي

اه والله يا ستيته روحي طالعه

والفانوس بتاع كرومبوا

لا يااختي التجار عندكم جشعين

ده نزل السوق هنا كمان منه انواع رخيصه خالص بس بدون حركه صوت بس

واغلى حاجه فى كرومبوا هنا 60
اصلا هو جملته 35

تعالي يا خالتي وانا اجيبلك كرتونه جمله
هههههههههه

صبرني يارب يقول...

ام مالك

تسلمى يارب وكل سنه وانتى بالف خير

انت وحبايبك كلهم وفانوس مالك يا باشا على راسي نجيبه لحد البيت

صبرني يارب يقول...

آآآبي

يا اختي عليها يا متميز انت

طيب بالتليفون بس وكلمي الملحق التجاري الصينى هاتلاقيه بيتكلم عربي لبلب

وفرجيه حلقه من بسنت والدياسطي واتفرجي كده على الى هايحصل

صبرني يارب يقول...

دعاء

قديمه ؟

قصدك ايه لا لا لا احنا كلنا هنا عندنا 18 سنه وانتى نازله

كل سنه وانتى طيبه وبخير يا جميل

صبرني يارب يقول...

خالد فوده

وانت طيب يا باشا ورمضان مبارك عليك يارب وحبايبك

صبرني يارب يقول...

عطش الصبار

وانتى طيبه يا جميل ابعتلك يا جميل والله

بس على فكره فى فعلا بسكوت صينى فى المحلات وشيكولاته ومصاصه وكده يعنى

يعنى جت على كحك وبسكوت العيد والله يعملوا عادي

صبرني يارب يقول...

عادل

لا لا بص انت شكلك داخل البلوج ده على طمع ياعم

دلوقتي انت عايز ت يجى معانا الفطار وتاخد فانوس

مع انا يوم حد الخوص فضلت واقفه فى البلكونه اتفرج على العيال قرايبك عامليه حاجات حلوه خالص ولا حد قالي اتفضلي ولا حااااااااجه

بس زي بعضه ياعم هانديلك فانوس

هههههههههههههههه

نورت

صبرني يارب يقول...

نودي

والنبى يا اختي طب سبيهم يبقوا يجوا يصلوا مره من نفسهم اصل انا كان عندي عقده نفسيه مركبه من الموضوع ده

والسوريات الله يصلح حالهم مره طردوني من المسجد يا اختي عااااااااا

وانا فى ابو ظبي مع انها كانت مريم بس

مره يا اختي من نفسهم وبعد كده يبقوا يصلوا فى البيت

نورتي يا جميل وكل سنه وانتى طيبه

همس الاحباب يقول...

كل سنة وانتى طيبة
ورمضان كريم
تحياتى

مامة مازن يقول...

كل سنة وكل رمضان وانتى بخير يارب

bos bos بسمه عبدالباسط يقول...

كل سنه وأنتى طيبة وبكل خير ورمضان كريم

عاشقه وغلبانه يقول...

كل سنه وانتي طيبه ياجميل
انا عايزه فانوس من بتاع زمان
سيبك من بتوع الايام دي

شـقـاوة مـراهـقـة يقول...

كل لحظة وانتي بالف خير وصحة وسلامة

وربنا يجعلها ايام خير وبركة وفرح وسعاده عليكي

وربنا يعود عليكي الايام بكل خييييير يااااااااااااارب

رمضاااااان كريم

وانا كمان عايزة فانوس بقى ؟؟؟

ঔღঔ نـــوارة ঔღঔ يقول...

هييييييييييه

وهيبقى عندي فانووس كرومبو

بس هو ايه الفانوس العجيب دا

هو كرومبو بقى فانوس ولا كل دا عشانه حامل فانوس

والله ناس فايقة ورايقة

معقوول يكون عندنا كرومبو !! يمكن كل شي جايز اصل كل بضاعة مصر عندنا بغزة :]

اكيد جابو كرمبو بقى واحتمال اقل عقلي واشتريه هههههههههههههههههه

كل سنة وانتي طيبة ياقمراية وربنا يقويكي ويعطيكي الصحة وتفطري الشعب كله ^ـ^

وبالنسبة للستات ياريت يحترموا نفسهم بس برمضان بالنهار كمان بيكونوا لابسين لبس وميك اب فظيع وبرفان وغيره

بيضيعوا صيامهم عشان حاجات تافهة

ربنا يهديهم

تحياتي ياقمر

مسدس صغير يقول...

صنع الصين الذى لم يتقن اى شئ
ههههههههههه
فانوس صينى بيقول حالو يا حالو؟؟
ما علينا
كمان عرفو ان فيه عندنا كرومبو؟؟
وبايرة كمان؟؟
دى حاجة تجنن
كل سنة وانتى طيبة
بعيدا عن الفوانيس
رمضان كريم

صبرني يارب يقول...

همس الاحباب

كل سنه وانت طيب يا باشا

صبرني يارب يقول...

بوس بوس

متشكره اوي ونورتي

صبرني يارب يقول...

مامة مازن

كل سنه وانتي بكل خير

صبرني يارب يقول...

شقاوه مراهقه

الله يكرمك يارب كل سنه وانتى بالف خير

ومن عنيه الفوانيس كتير يا اختي اهو

صبرني يارب يقول...

عاشقه وغلبانه

اوووووووك يا جميل امري انتى بس

عارفه الراجل الى فى شارع بورسعيد الى جنب عصارة القصب على ناصية سوق الحدادين
ههههههههههههههه
عنده تعالى نروح نجيب سوا

صبرني يارب يقول...

نواره

ماااااااااشي شوفي كده عشان ابعتلك ياعم كرتونه توزعها طيب

ههههههههههههههه

نورتي يا جميل

صبرني يارب يقول...

مسدس صغير

وانت طيب وبخير وسلام يارب

ربنا يكرمك

بعيدا عن الفوانيس كل سنه وانت طيب

ahmed_k يقول...

كل سنه وأنتي طيبه يا أم مريم
وكل سنه وأسرتك الجميله بخير وسعاده وأمان
وشكرا على الفانوس فرحتيني والله هههه


رمضان كريم

ذو الوجه المبتسم يقول...

كل سنة وانتى طيبة

كلى عيش فى البلد دى واسكتى احسن لك وبطلى كلام فى سياسة كرومبو

هههههههههههههههههه

رمضان كريم

بسنت صلاح الدين يقول...

كل سنه وانتى طيبه يا جميل ،انا والله فرحت لما عرفت ان فى فانوس لبسنت و دياسطى كمان قلت عملولى فانوس على اسمى ،بس بصراحه مفيش احلى من الفانوس الاصلى بلا كرومبو بلا كلام فاضى انا هاخد بعد اذنك واحد كبير من المصرى بتاعنا الحلو ده،رمضان كريم

أليس في بلاد العجائب يقول...

كل سنة وانتي طيبة واسرتك بخير والمسلمين في احسن حال ان شاء الله
حاولت اكلمك اعيد عليكي التليفون مقفول والرسالة معلقة
عيدي علي ماما وبابا واخواتك ان شاء الله يكونوا بخير
لا تنسينا من دعائك

سبهللة يقول...

كل سنة وانتى طيبة
بلغك الله الشهر
وعظم لك الاجر

صبرني يارب يقول...

احمد كيه


متشكره اوي يا استاذنا كل سنه وانت طيب وبخير يارب

صبرني يارب يقول...

بسنت

تصوري انا ما شوفتش بسنت ده يا اختي ما عداش عليا
ههههههههههههه
علموكي فانوس يا ضنايا

كل سنه وانتى طيبه

صبرني يارب يقول...

ذو الوجه المبتسم

هى فين السياسه دي ياعم

انا باتكلم فى الفوانيس اهو
ههههههههههههههه

كل سنه وانت طيب

صبرني يارب يقول...

سبهلله

متشكره يا جميل وكل سنه وانتى طيبه

صبرني يارب يقول...

أليس فى بلاد العجائب

انا كمان حاولت اكلمك من كام يوم كنتى غير متاح

عموما انا شوفت رسالتك من شويه بس الوقت متاخر بكره ان شاء الله اكلمك يا جميل

كل سنه وانتى طيبه رمضان كريم

أحمد سعيد بسيوني يقول...

بسم الله

كل عام وأنتم بخير

أسأل الله العظيم أن يبارك لكم في هذا الشهر الكريم ويرزقكم القول والعمل الصالح

اللهم سلمنا إلى رمضان وسلم رمضان لنا وتسلمه منا متقبلا

دمتم في طاعة

صبرني يارب يقول...

احمد سعيد بسيوني

متشكره اوي اوي وكل سنه وحضرتك طيب وبخير وسلام

عمرو يقول...

كل سنه و أنتى طيبه و ربنا يتقبل منا جميعا صالح الأعمال ..
بارك الله فيكى و تقبلى تحياتى و تقديرى ..

قوس قزح يقول...

غسل الله قلبك
بماء اليقين
و اثلج صدرك
بسكينة المؤمنين
و بلغك
شهر الصائمين

.. * * . * * .
.* . . * . . *
* . رمضان . *
. * .كريم. * .
. . * . * . .
. . . * . . .

شمس النهار يقول...

كل سنه وانت طيبه وبخير
وشكرا علي الرساله اللطيفه

hasona يقول...

السلام عليكم

كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله

صبرني يارب يقول...

استاذ عمرو

متشكره خالص ونورتنا يا استاذنا ربنا يكرمك

صبرني يارب يقول...

قوس قزح

متشكره اوي يا جميل كل سنه وانتى طيبه وحشاااااني

صبرني يارب يقول...

شموووووووسه

حياتي

متشكره خالص وكل سنه وانتى طيبه يا قمر

صبرني يارب يقول...

حسونه

الله يكرمك ان شاء الله

متشكره اوي وكل سنه وانت طيب

أحمد حسن البنا يقول...

رمضان كريم يام مريم وكل سنة وانتى طيبة واشكرك على فانوس كورومبو لان العيال وجعوا دماغى وكان نفسى اشوف شكله ايه الفانوس ابو ستين جنيه ده وعندك حق احنا اللى نستاهل اللى يجرالنا عذرا كنت مريض اليومين اللى فاتوا وماكنتش متابعك فى الردود
رمضااااااااااااااااااااااااااان كريم
احمد حسن

حلم بيعافر يقول...

شكل فلوسك كتيييييييييييييير
ههههههههههههههههههههه
فعلا مش حارمانا من حاجة
كل سنة وانت طيبة

صبرني يارب يقول...

حلم بيعافر

اه طبعا الفلوس كتير بس النفس يعنى

رمضان كريم

صبرني يارب يقول...

احمد حسن البنا

الف الف سلامه عليك طهور ان شاء الله

ابقى طمني عليك بقى


وكل سنه وانت طيب يعنى انت اتفقعت الستين جنيه الحمد لله ولا اهي
هههههههههههههههههه

akeed يقول...

كل سنة وانتى طيبة و رمضان كريم
و الموضوع اكثر من رائع

تحياتى و تقديرى

شموسة يقول...

كل سنه وأنتى طيبه
رمضــــ كــريم ـــان
أعاده الله عليكي باليمن والبركات

تقبلي مرورى

صبرني يارب يقول...

اكيد

متشكره اوي وكل سنه وانت طيب وبخير وسلام

صبرني يارب يقول...

شموسه

وانتى طيبه وبخير وسلام

نورتي يا بلدياتي

كيــــــــــــارا يقول...

كل سنة وانتي طيبه ياقمر

انتي وكل الاسره

رمضان كريم
وسيبي الصينين في حالهم :)

أبو كريم يقول...

اولا بسم الله
وثانيا كل سنه واحضرتك طيبه

الملحق بتاع السفاره تلاقى واحد صينى بيحلقله

دى بقى مفيش منها أخويا كلمنى مخصوص عشان يقولى ان فى قريتنا الصغيره الى تابعه لمكز ميت غمر فيها ناس صنيين بيبيعوا ملابس وكمان فيهم واحد بيحلق فى البيت وبعشره جنيه يابلاش

مش عاوزاهم يقلدوا الفوانيس

والله فى فيديو على اليوتيوب اسمه الزوجه الصينيه مش هستبعد انه يبقى حقيقه كمان شويه

ورمضان كريم