الأربعاء، 12 أغسطس، 2009

الامهات من النوع ده هاعملهم مقصله .. والابهات كمان


سلاااااااام عليكم

الاول قبل ما ننصب المقصه ونشتغل واحشني يا جماعه بشكل مش معقول

وزعلانه اوي عشان مش عارفه اتابعكم واتابع مدوناتكم

انا كنت الاول فاتحه المدونه بتاعتي اووووول ذا تايم دلوقتي من كل يومين بافتح كده ابص عليها يا لحقت يا ملحقتش

حتى لما ربنا يفتحها عليا كده واقعد اقرالكم شويه عشان اعرف اخباركم ساعات مش باكمل الموضوع او مش اعلق

معلش بجد يا جماعه اعذروني الايام دي انا باخد كورس كمبيوتر وباودي العيال تدريب باسكت وشويه مناسبات عائليه لطيفه بالاضافه الى الاستعداد لرمضان


يلا بقى ننصب المقصله ونشتغل


شوفوا يا جماعه انا ملاحظه ان الناس خلاص بجملة الهبل الى بقى موجود بقوا خلاص مش بيفكروا فى صحة العيال

صحة العيال دي مش بس نوديهم اكبر مستشفى لما يسخنوا ولا نكيل لهم ادويه وحقن ولا نحاسب عليهم من الجراثيم القاتله ونغسل اديهم عشر مرات فى اليوم

لا لا اهم حاجه لصحة العيال فعلا الغداء المتوازن السليم النضيف المفيد الي فيه كل حاجه

والخضار الخضار الخضار
واللبن الحليب والكالسيوم عموما حط تحتها ميييييت خط
والعسل الابيض الصبح على الريق

انا ليه باقول الكلام ده ؟؟

عشان بقيت اشوف عند دكتور الاطفال عيال عندهم انيميا فظيعه وما عندهمش اي مشاكل الدكتور بيقول سوء تغذيه

ومره لقيت واحده صاحبتي ولادها كلهم مكسورين ومتجبسين وورا بعض

وهى كمان حصلتهم ؟؟؟!!!!

ايه يا بنتى مالكم ؟ قالتلي مش عارفه والله نصيب

ماشي يا ستى ما قلناش حاجه قدر الله وما شاء فعل

انا اقول الموضوع عادي لو الواد وقع مثلا من على ارتفاع مترين ثلاثه فاتكسر

انما مش عارف بيشاور بايده لفوق ايده خبطت فى الحيطه فاتكسرت ؟؟؟!!!

انتى بتشربيهم لبن ؟؟
قالت لا والله انا فعلا بعد كده هاهتم بالموضوع ده ؟؟؟!!!!

بعد ايه ؟؟ ده قربوا يبقوا مراهقين يا امي

اعرفوا يا جماعه ان عمر ا لبيت ما يكون قوي الا لو كان اساسه قوي

وانت بتربي طفل لازم تطلعه قوي

ارجوكم زي ما بتهتموا انكم تعلموهم فى احسن مدارس وتجبوا احسن مدرسين وتخنقوا فى العيال عشان يجيبوا فول مارك

لازم تهتموا ببناء جسمهم

كل حاجه ممكن نعوضها بعد ما يكبروا نعلمهم الى احنا عايزين نعلمه ليهم

الا الصحه وبناء الجسم لو ما اتاسسش وهما صغيرين انسوا بقى الاساس بيبقى بايظ

انا دايما اقول لولادي عشان اقنعهم يشربوا لبن وياكلوا بيض

الجاموسه بنحلبها مرتين فى اليوم
والبيضه بتبيض بيضه واحده فى اليوم

ربنا خلقهم كده سبحانه وتعالى عشان نشرب الصبح كوباية حليب وبالليل ناكل كوباية زبادي وناكل بيضه واحده في اليوم

والخضار يا ناس

انا مره قابلت ولاد صغيرين مش عارفين الكوسه والبسله

ليه عشان مامتهم مش بتحب الكوسه وباباهم مش بيحب البسله فهى مش بتطبخهم بقى بتكسل تعمل صنفين

طيب العيال دي ذنبها ايييييه ما ياكلوش الخضار وماي عرفهوش وعشان ما اتعودوش عليه هايطلعوا ما ياكلوهوش

والاقي العيال فى المدرسه عند مريم معاهم سندوتشات سوسيس ولنشون وبلا ازرق ما نعرف حاطين فيه ايه

لييييييييه بس

الطفل يفطر قرف من ده ليييييييييه

وياكله اصلاااااااااا لييييييييييه

ما حدش يقولي العيال بيطلبوه العيال اصلا ما كانوش يعرفوه انتم الى جبتوه واكلتوه للعيال وعودتوهم عليه

انا عندي العيال مش بيحبوه عشان مش متعودين عليه

مالها الكوفته بتاعة امي وامك ؟؟

مش الام بس الى مسؤله هنا لا طبعا

لكن بالنسبه لموضوع الاكل هى المسؤل الاول انما كمان الاب مسؤل عن الكل بقى عن الام وعن الاطفال لازم هو كمان يوجهها

ولا التقليد السخيف البايخ المقرف بتاع البيبسي على الاكل
ارجووووووكم لو حبيتوا تبوظوا معدتكم وجسمكم مش لازم تعملوا كده فى اولادكم كماااااااان

العيل من دول بقى عنده 15 سنه وعنده التهاب فى المعده ؟؟!!!!

ارجوكم يا امهات اطبخوا فى بيوتكم وبلاش الدليفري ابوس اديكم

خلوها مره واحده فى الاسبوع ولو بلاش يكون احسن

اطبخوا خضاااااار واكلوا العيال خضار

بالذوق بالعافيه يشرب كل يوم كوباية حليب وبيضه

حليب والنبى حليب طبيعى طازه

مش لبن مجفف وياريت كمان ما يبقاش معلب ومبستر وملعوب فى اصوله

لكن لو مافيش غيره مااااااشي

بس مش لبن بودره ارجوكم


ولو ولادك صغيرين اوي ولسه مش عاجبهم طعم الحليب

اعمليه بالكاكاو او نسكافيه وشربيه منه وقلليل الكاكاو شويه شويه لحد ما هايتعود على طعم الحليب

ولو ما اتعودتش لما يشربه كل يوم بالكاكاو احسن من انه ما يشربوش اصلا

واكليهم زبادي

واعملي كاسرت ومهلبيه ورز باللبن وام علي وكله بالحليب الطبيعى والنبى عشان خاطري بلاش استسهال

والبيض طبعا كل يوم بيضه لازم

والخضار

وحاولي تعوديه ياكل سلطه من هو صغير

وياكل جرجير وبقدونس وخس وخيار على طول اعطيله فى ايده

من وهو صغير ومن اول ما يعرف ياكل


يارب تكونوا فهمتوا


وعليه قررت نحن صبرني يارب

ان لو لقيت واحده فيكم ولا واحد فيكم ولادهم عندهم نقص فيتامينات او حديد او كالسيوم او اي حاجه


يبقى ان شاء الله هناخده نفسحه فى المقصله الشيك الى فوق دي


هناك 46 تعليقًا:

adel يقول...

هو الموضوع مهم قوي بس انا مش هارد لسبيبين

1- انا مش متجوز ولا ناوي :)

2-انا لو قالتلك نظام اكلي هتعملي زي ماما و تصوتي
ههههههههههههه

انا اساسا اكلي اغلب (اكل سريع)
fast food
ومش بشرب لبن خالص اساسا و مش بكل خضار الا ملوخية و بسلة و مش دايما كمان
ههههههههههههههه

كفاية كده

و انت كلامك كله صح بس مين يسمع بقي

مسدس صغير يقول...

ايه يا عادل
هو انا كل مروح مدونة الاقيك اول تعليق؟؟
بلد بتاعة تعليقات صحيح
هههههههه
فعلا البهبهات والمهمهات مش واخدين بالهم من الحاجات دى
وهيه دى فعلا صحة الاطفال بجد
عشان يحاربو
امال هيحاربو ازاى؟
بجد بوست مفيد وهايل
بس يركزو ع الخضار
والعيال هتبقى عال العال
احييكى على البوست يا اختى الفاضلة

ستيته حسب الله الحمش يقول...

كلام حوكم وكله عوبر
بس مين يسمع
سامع يا واد يا عفرتو لو قلت مش بحب اللبن ها اضربك
ولو قلت بيض نو ها اسحلك
ولو قلت عاوز تليفري يا ماما ها ارميك من الشوباك

والله يا صبصب كلام حقيقي فعلا والجيل بقى مسوس زي الخشب المجوف بالضبط

انت وحشتي المدونين والمدونات
خلصي الكورس
وادي العيال لحد يوديهم التدريب
وخلصي ع الضيوف
وتعالي بقى

القدر و انا يقول...

صبرنى
وحشانى يا قمر
والله انا معاك
عودت ابنى يشرب الحليب دائما ولم يعرف للمياه الغازية طعم الا بعد ان تجاوز السادسة ويحب الخضار والفاكهه
لكن اه من اعلانات التلفزيون
احيانا بتلخبط حالنا
بس لازلنا نجاهد لبناء جسمه صح والحمد لله
يعنى انا برة المقصلة تماما
تصفيق حاد

وانا مالى يقول...

صبرنى كلامك مظبوط جدا
و انا شخصيا ماشيه على جزء كبير منه
بس مرات بفوتها عشان الولاد متزهأش
بس المهم عايزه اقولك موضوع كسر العظام عند صاحبتك واولادها ده غير طبيعى لو قدرتى تنبيهيها تعمل فحوصات اكبر لأن فى مرض وراثى بيسبب الموضوع ده و بتختلف شدته من فرد لفرد فى العيله أو حسب قوته عند مورث المرض
يا ريت يكرمك ربنا تقوليلها
انا متابعه مدونتك من زمان ودى اول مره اعلق ارجو مكونش تقلت عليكى
تحياتى

مصري جدا يقول...

مبروك المحل بتاع الخضار واللبن

يا ترى بتوصلوا الطلبات للقاهرة

لو بتوصلوها اشترك وأطلق الولية

ولكم جزيل الشكر


مقصلة يا مفترية
امال لو بقيتي في لجنة السياسات هتعملي فينا اية

فاتيما يقول...

وحشتينااااا يا ام القمرين
الحمدلله أنا براءة من المقصلة دى
الواد يسوفة بيموت ف اللبن و البيض
و مبيقولش لأ على الاكل الصحى كمان ..
صحيح كنا ساعات كتير بنعك فى الأكل الجاهز من سدة نفسى ..
بس لازم كل يوم كوبيتين لبن و بيض و خيار و كدا
أمى كانت بتعمل معانا نفس الفيلم دا و احنا عيال ..
اصلى مكنتش بطيق اللبن خالص فكانت بتضحوك عليا و تعمل كريم كراميل و كستر و رز بلبن أروح واكلاهم زى الشاطرة ..
بس على فكرة
أنا مهددة بالمقصلة دى ..
آه ... أصلى تبنيت الواد عادل رسميا خلاويص و البيه عكس الكلام اللى بتقوليه طب لما أشوفه ليا معاه كلام تانى
دى رقاب هتطير يا امى و مفيهاش فصال
حمدلله على سلامتك
و يا رب بالنجاح إنتى و العيااااال

صبرني يارب يقول...

عادل

ياه ياه ياه

حالا هاغير الحكم ونخليه للامهات والابهات

والبالغين الراشدين الى مش بيعملوا الصح
هههههههههههههههههه

حقيقى يا عادل انت بتبوظ فى جسمك

وستندم حيث لا ينفع الندم

وبعدين ايه ملوخيه وبسله دي زمان عنيك اخضرت يا ابنى
هههههههههههههه

صبرني يارب يقول...

مسدس صغير

شكرا يا صلاح ربنا يكرمك

انت ايه ظروف الحرب معاك

ههههههههههههه

فكرتنى بواحده كانت بتقول لابنها كل يا حبيبى عشان لما تكبر تبقى قوي وتعرف تحارب الكفار

اه يا ماميا من الادمغه

صبرني يارب يقول...

ستيته

نفسي نفسي يا ستيته والله

زهههههههههههقت والله

هاااااانت فاضل رمضان والعيد

نورتي يا جميل

صبرني يارب يقول...

القدر وانا

فعلا فعلا فعلا تصفيق حاد للبنيه دي يا ولاد

استمري اهم حاجه مع الاطفال الى بعد كده بيبقى اصعب عشان بيبقى فى بقى واحد كبير عارف كل حاجه بيفتح عنيهم يا اختي

وانتى كمان وحشاني يا جميل

صبرني يارب يقول...

وأنا مالي

وانا مالي برضه انا كمان اشمعن انتى

بالنسبه لصاحبتي هى اول مره يحصلهم كده

وعموما انا نبهتتها على فكره على الاقل عشان الهشاشه وكده

وقالتلى انه الدكاتره قالولها ما فيش حاجه


ومتشكره اوي على متابعتك وتتقلي عليا فى ايه

كل يوم تعالي علقي عندنا يا باشا على نفس الموضوع ميت مره ولا يهمك

انا اتشرف

صبرني يارب يقول...

مصري جدا

استاذنا انت ما بتصدق ولا ايه

ايه الى جاب للبن والخضار للطلاق ياعم

انت فاكر ان دخول الحمام زي خروجه ولا ايه
هههههههههههههه


لو مسكت الحكم بقى مش لجنة السياسات
هانيمكم من المغرب

وده بجد موضوع البوست الجاي

صبرني يارب يقول...

فاتيما

روح قلبي انا

تمام الله ينور عليكى يا جميل

بالنوسبه لعادل بقى فكويس اوي يلا جو اون عايزاكي تجبيه لمس اكتاف

نورتي يا جميل

Ahmed يقول...

المسؤليه مشتركه طبعا

عندك الموضه دايما ان الأب يدلع الأولاد ويزعق في أمهم عشان متغصبش عليهم في الأكل, ياسلاااااااام على التربيه

اذا كان بيرضيهم النهارده, بكره هيدعوا عليه

مامة مازن يقول...

السلام عليكم
شوفى انا فى جهاد يومى مع العيال ولادى
اللبن اللبن اللبن كان مشكلتى مع مريم بقت اعمله زبادى علشانها ودلوقتى بقى مكن بالشاى والكاكاو كده يعنى من كتر المحاولات جت نتيجة والحمد لله
انا البيض بياكلوه عادى والخضار ده على طول حتى كنت بغسل لهم طماطم وخيار وجزر وخس وحتى مش بعمله سلاطة وازوقه فى طبق كانه طبق فواكه يعنى وبياكلو منه ولما ميبقاش فى خس البقدونس يشتغل على طول فوائده كتير جدا جدا لحد هما دلوقتى ما بيطلبوا ويروحوا يغسلوا لنفسهم بس بغسل لهم انا بخاف ميغسلوش كويس الخضار
بس هو جهاد يومى بس بيجيب نتيجة بالوقت بس مريم رفيعة نفسى تملى شوية كشفت عليها وحللت لها ومفيش مشاكل الحمد لله الدكتور كتب لها فيتامين بس انما قالى عادى تفتكرى عادى واللا ايه اكشف عند حد تانى معصعصة مش عايزاها كلبوظة بس يعنى تملى شوية

شكرا على النصايح الغالية وبيتهيئلى انا اعفاء من المقصلة دى هههههه

حنين القلب يقول...

صبرنى باذن الله انا هعمل كده مع بنتى
انا شاطرة كده ؟؟

من غير مقصه ولا غيره

وحشاااااااااااااااانى والله
وجايبه ليكى سلام مخصوص من عبده الرايق وبيقولك كل سنه وانتى طيبه

ربنا يقويكى يا حبيبتى

رمضان كريم

مواطن مصرى نايم يقول...

لا يبقى انا الحق اجرى لان انا اكلى فظيع
يعنى كام نوع و خلاص
و مليش فالخضار خالص و لا اللحمه
هو الجيل ده اغلبه مش بيفهم فالاكل زيى كده
و الديلفرى و الحاجات اللى بتخن دى هى اللى عملت كده

كل سنة و انتى طيبة يا رب

محمد يقول...

ما رايك فى تحديد التحميل

كيــــــــــــارا يقول...

الاهتمام بالتغذية مهم

بس لو طفله بترمي الاكل اول اما مامتها تغيب ولو لثواني

بسنت صلاح الدين يقول...

فعلا والله عندك حق اطفال اليومين دول تعصريهم يطلعوا بيبسى وشيبسى و شكولاته ،و بعدين طبعا ده كله بيأثر على المناعه ان شاء الله اول ماتجوز واجيب ولاد هاعمل كل اللى بتقولى عليه

ঔღঔ نـــوارة ঔღঔ يقول...

ازييييييك ياعسسسسسل

وحشاني موووت مووت

ايه الغيبة دي كلها

هاتي بوسة الاول وابعدي المقصلة من ايدك :]

بس هي ايه المقصلة دي :) معرفهاش بس شكلها مش مريحني

المووووووهم كلامك والله في الجوووون

خدي جوزي وعذبيه بالبتاعة دي بس بالراحة عليه (بحبو يا بابا )
الحمد لله انه كبير و متأسس صح طبعا كان بياكل كل حاجة وهو صغير

لكن دلوقتي مجنني بالاكل الجاهز مش بيحب الطبيخ وعليه عفريت اسمه شاورما ومش بيرضي يشتريلي خضار بس الحمد لله بنشرب حليب وبنحب البيض :]

انا براءة مليش دعوة خديه هو :]

ولا يهمك لو ربنا اكرمني وخلفت هطبق نصائحك طبعا حتى انا دايما بقوول

انه لو عودنا اطفالنا من صغرهم انهم يشربوا كوب حليب مع بيضة نية هنفيدهم اوي بالمستقبل وهيكونوا اتعودوا ومش هيقرفوا متقلقيش انا شطورة وابعدي عني المقصلة دي ]:

تحياتي ياعسل ومتغبيش عننا تاني

اموووووووووووووواه

صبرني يارب يقول...

احمد ابو العلا

كده يبقى عايزين نربي الاب كمان بقى
هههههههههههه

ولا نشغل المقصه وخلاص

صبرني يارب يقول...

مامة مازن

لا يا باشا انتى تكسبي معانا النهارده كوباية لبن وخسايه

وبالنسبه لعصعصة بنتك خليها تلعب رياضه عشان تكون عضلاتها اهم حاجه

وسيبك من موضوع العصعصه المهم صحتها تبقى كويسه

بكره تعمل رجيم اهيء اهيء اهيء

صبرني يارب يقول...

حنين

وانتى كمان وربنا وحشااااااااااااااااني موت
والله يا جميل مش فاضيه خالص

ابقى طمنينى على البيبي بتاعك عامل اهي والنبى

والف سلام لعبده الرايق وسلميلي عليه والنبى يا حنين وقوليله متشكره اوي لسؤاله

صبرني يارب يقول...

مواطن مصري نايم

ااااااااااه طيب اقفش هنا الاخ ده وعلى المقصله مع عادل

حاااااااول تصلح اكلك بليييييز

وانت طيب وبخير وسعاده يارب

صبرني يارب يقول...

محمد

والله انا باحاول افهم هما عايزين يعملوا ايه اصلا مش فاهمه

وحيث انى مش باعمل داونلود اصلااااااا

فمستنيه اشوف هاترسى على ايه

صبرني يارب يقول...

بسنت صلاح

اووووووووك هاجي اشوف بتعمليه ايه انتى حره والمقصله اهي

نورتي يا جميل

صبرني يارب يقول...

كيارا

كوكي دي لازم تتعاقب دي كده بتدلع

وحشاااااني يا بت

صبرني يارب يقول...

نواره


يا قلبي وحشاااااني والله

والمقصه دي يا حبيبتى مش اداة تعذيب

لا لا حرام عليكى انا مش قاسيه كده

دى اداة اعدااااااااام
ههههههههههههههه


وان شاء الله تعالى يرزقك ذريه صالحه دسته كده وتشري لهم يادوب جموسه بقى


نورتي يا جميل

كيــــــــــــارا يقول...

ايه تتعاقب دي لا مش موافقه
ال تتعاقب ال
الله بقي

وانتي كمان وحشاني ياقمر اممممممممممموه

صبرني يارب يقول...

كيارا

انتى الى بترمي الاكل ولا ايه
هههههههههههه

اه طبعا لازم تفهم انه حرام ترمي الاكل نعمة ربنا لازم نحافظ عليها حتى لو مش عايزنها

ولازم كمان تحترم كلام مامتها وتعبها فى انها عملت لها الاكل وجابته

وتتعلم تحترم كلام مامتها وحتى ان رفضت الاكل ترفضه بالادب مش ترميه من ورا مامتها

احنا لازم نربي الطفل مش نعمله الى هو عايزه وبس

الشده فى التربيه مطلوبه

الشده مش القسوه في فرق

كيــــــــــــارا يقول...

اه طبعا بس هي صغننه مش كانت فاهمه هههههههههههه بلاش فضايح يابت انتي

عمرو يقول...

أيوه يا أم خالد و الله كلامك صح ..
تشوفى العيل من دول تلاقيه هفتان كده و الشباب أوزعه أغلبهم و و مافهمش نفخه و البنات تكوينهم الجسدى مش مظبوط ده غير الأمراض و المشاكل الصحيه التنانيه و طبعا ده راجع للنظام الغذائى السيهلله المشهور لدى المصريين زى ما بتقول الدراسات ..
الحقيقه كل حاجه محتاجه وقفه و تقنين حتى مواعيد النوم متلخبطه و ده برضو بيعمل خلل فى الساعه البيولوجيه فى الجسم ..
برافو عليكى هذا البوست المهم و اللى جه فى وقته خاصة اٍن رمضان على الأبواب كل سنه و الجميع بخير ..
تقبلى تحياتى و تقديرى ..

Anonymous يقول...

أحييك على البوست الجميل دا .. أنا أول مرة أعرف المدونة بتاعتك وهي ظريفة بجد ..بس أنا لي ملحوظة على موضوع اللبن البودرة هو فيه كل الفوائد الغذائية للحليب وهو طبيعي وليس صناعيا فقط هو مجفف ودا كلام وموثوق من أطباء أطفال وحذروني جدا من الحليب الغير مبسترلانتشار الدرن والعياذ بالله .. وألف شكر لتوعيتك ويا ريت كل أم يكون عندها وعيك .. على الأقل علشان لو ألف بعد الشر حصل حاجة لحد من أولادها ما تحسش ان هي السبب ..وربنا يستر لأن كل أكل بقى فيه لكن من تلوث لأنفلونزا لجنن بقر..والواحد احتار .heba

صبرني يارب يقول...

كيارا

نيهاهاهاها قفشتك

صبرني يارب يقول...

استاذ عمرو

اه والله فعلا كل حاجه ملخبطه

الحقيقه انا باتغاظ اوي من الام والاب الى شخصيتهم ضعيفه مع ولادهم وما بيعرفوش ينظموا حياتهم

وكل سنه وحضرتك طيب وبخير يارب ومنورني دايما

صبرني يارب يقول...

الغير معرفه


حبيبتى انا عارفه والله انه لبن مجفف

او خلينا نقول المفروض انه كده

انما الحقيقه ايه ؟؟ الله اعلم

صدقينى مافيش اي حاجه من الحاجات دي مضمونه ابدا

ياما ايام يوقولوا لا الصنف ده بلاش ده فيه زرنيخ وموقوف

واحنا ولله الحمد مافيش عندنا اي رقابه على المستورد

لو تعرفوا كام كونتينر يوميا بيدخل من غير ما يعدي على اي جهة رقابه هاتذهلوا وهاتعرفوا اننا شعب بلا ثمن


وحتى لو كنتى بره انا ما اصدقش اي حد غير عنيه


وبالنسبه للبن المبستر مااااااااشي

ولو ان انا مش باحب اي حاجه ملعوب فيها فى المصانع

انا بنتى كانت بتشرب لبن مبستر على طول واحنا عايشين بره

وبعدين كان عندها امساك بشكل مستمر

وانا كل شويه اشربها حليب واقول عشان الامساك يروح

الدكتور قالنا حاجه بقى غريبه

قال لا الحليب هنا المبستر خارج من المصانع لايمكن يكون بدسمه الطبيعى فبيكون دسمه قليل
وهو فيه كالسيوم وفيتامينات وما الى ذلك ودي لواحدها من غير دهون كافيه بتعمل امساك ؟؟!!!


شوفي بقى اللعب فيما خلقه الله يعمل ايه

انا بعدها جبتها حليب نوع تاني مكتوب عليه مضاعف الدسم

بقت تمااااااام على طول


المهم انا باجيب حليب طبيعى بس الحمد لله تعالى انا ربنا ميسرلي واحده ثقه بتجبهولي من الارياف


لكن اعيش انا على حليب مجفف ليه ؟؟؟؟؟؟؟

اطلع ولادي شاربين حاجه مش عارفه مين عاملها ولا فيها ايه لييييييه

صدقينى مافيش حاجه تساوي كوباية حليب طبيعى من الجاموسه او البقره راسا اليكى

اعرفي مصدره كويس واغليه كويس يبقى انتى فى الامان

نورتينى يا هبه ومتشكره اوي على الاطراء ربنا يكرمك

أم مالك يقول...

والله البوست ده فى الصميم
ومتهيالى ان اللامهات الكسالى
حيخافوا من المقصلة وحينفذوا
التعليمات
ربنا يكرمك ياحبيبتى
ويقويكى على اللى انتى فيه
وكل سنة وانتى طيبة
وانى احبك فى الله

ذو الوجه المبتسم يقول...

السلام عليكم

حمدلله على السلام

كل سنة وانتى طيبة

صبرني يارب يقول...

ام مالك

الله يكرمك ونورتي

انا شكلي هاسيب المقصله دي هنا على طول فى ناس كتير محتاجينها

صبرني يارب يقول...

ذو الوجه المبتسم

الله يكرمك يارب
وكل سنه وانت بالف خير وسلام

تامر علي يقول...

المشكلة الأساسية إن كمان الخضار والفاكهة مبقاش أمان لكن الوجبات السريعة فعلاً مصيبة ... الواحد علشان يلاقي أكل كويس للعيال ممكن يعمل بحث ... احنا في زمن حتى الهوا ملوث فمابالك بالأكل والشرب

العملية خلاص بقت في الجبس والعيال خدوا على شرب الببس :)

تحياتي :)

إنـســـانـة يقول...

انا لسة مابقتش ماما .. بس كل اللى بتقوليه ده صح جدا ومش صعب ان شاء الله

واللبن والبيض سهل جدا انهم يدخلوا فى وجبات كتييييييير والولد ياكل منهم ويستفيد .. ولو مش بيحب اللبن كالكثيرين ممكن يشربه مع اى عصير تانى ونحط اللبن على الفاكهة اللى حنضربها بدل الماية


على فكرة مرة قالوا فى التليفزيون ان العنب الأحمر لما تجيبيه وتضربيه فى الخلاط وتعمليه عصير بيبقى مفيد جدااااااااااا للأطفال بالذات .. لأنه أقرب حاجة فى تركيبها من تركيب لبن الأم

خصوصا للأطفال اللى بيتعرضوا للشمس والحر كتير

:)

صبرني يارب يقول...

تامر علي

يعنى الخضار ملوث والاكل فى المطاعم هو الى حلو يعنى

يا سيدى ابقى خدلك قراطين ازرعهم بقى
هههههههههههههه

ابقى طمني على موني لما تقوم بالسلامه والنبى

وحلوه اوي

العملية خلاص بقت في الجبس والعيال خدوا على شرب الببس

صبرني يارب يقول...

انسانه

لا يا جميل من ناحية صعب هو صعب طبعا

خصوصا لما تكوني عايشه فى مجتمع كله بايظ من الناحيه دي

والعنب ده ما اعرفش عنه حاجه بس عادي ناكل العنب

نورتي يا جميل