الثلاثاء، 8 سبتمبر، 2009

الى افراد عائلتي الكرام واصدقائي واي حد تاني


سلام عليكم




عشان تصدقوني بس ان اسكار كان عنده حق




اليكم هذا الاعلان الهام جدا والى كل من يدخل هذه المدونه ان يعلقه حلق فى ودنه طول عمره






وعلى وجه الخصوص افراد عائلتي الكبيره الجميله على الاخر




انا باكتب فى مدونتي دي الى انا عايزاه مش الى اي حد تاني عايزه




باكتب كتير مواقف شخصيه حصلتلى انا شخصيا وتخصنى انا شخصيا وما دام انا طرف فيها من حقي اكتبها من غير ما ارجع لحد فيكم




وانا مسؤله عن كل كلمه على المدونه دي قدام ربنا وقدام القانون وقدام التخين فى البلد دي




الى فيكم شايف ان اي حاجه باكتبها بتمسه شخصيا وبتنتهك خصوصياته يتفضل يكلمنى وجها لوجه




او يتفضل يروح يرفع عليا قضيه ولو كان له حق عندي ياخده




عادي القضايا مش معناها ان احنا مجرمين ولا بلطجيه بالعكس ده اسلوب حضاري عشان كل واحد ياخد حقه




انا ما باغلطش فى حد وما باكتبش غير الحق




ده انا حتى كتير بازوقه عشان ما اجرحش حد وده مش عيب ولا نفاق وانما حفاظ على شعور الاخرين




صراحه بدون بجاحه




انا مش باقول كلمه وانكرها ولا امسحها ولا اقول لا ما قولتش




اي حد من عيلتى او اي حد يعرفنى كويس يعرف انى اقول الى انا عايزاه ولاي حد وما بيهمنيش




انا لا باخبي شخصيتى ولا مخبيه على اهلي وعيلتى ان ليا مدونه




ويظهر ان هى دي المشكله




بمعنى انى لو كنت شتمتكم حتى وانتم ما تعرفوش طريق المدونه كان هايبقى عادي




والى خايف من نشر موقف عمله معايا او مضايق او مكسوف او اي حاجه تانيه يبطل يكلمنى




يتبرى مني ويبعد عني وانا هابقى اغنيله




للمره التانيه الى له حق عندي يتفضل يجى ياخده




واعرفوا ان لو ليا حق عندكم هاخده ان شاء الله




ولو اتنازلت عنه فى الدنيا (بمزاااااجي )




هاخده منكم فى دار الحق يوم الحق بيد الحق




وحسبنا الله ونعم الوكيل










هناك 53 تعليقًا:

مصري جدا يقول...

اية يا صاصا بس ( كلهم بقولوا لك يا صبصب فحبيت أغير)

مين اللي مزعلك

يا حلاوة قضايا

حلو أوي

اتكلي عاللة

اعدام ان شاء اللة

ما تفهمنيش صح

للي يزعلك

صبرني يارب يقول...

مصري جدا

الدنيا كلها زعلاني

ممكن ترفعلي قضيه على الدنيا ؟؟

عاشقه الرومانسيه يقول...

مش تزعلى نفسك
يابنتى

كبرى دماغك من الدنيا كلها ياصبصب
وبلاش ترفعى قضيه
الاستاذ هانى عايز يشتغل ويسلى صيامه
احنا عايزينه من غير شغل
روووق ياقمرى

مصري جدا يقول...

عالدنيا كلها

ما عنديش كوريك يرفع كل دة

بالعند في دودو مش بشتغل في رمضان من اساسة

أصل اللي هيغلس وانا صايم هأطم زمارة رقبتة

والزمامير بتعمل ازعاج

والازعاج مش بيخلي الناس تعرف تنام

والنوم علينا حق

معايا ولا نمتي

Anonymous يقول...

مين بس اللى مضايق سيادتك

احنا ف شهر الصوم و الغفران
خليكي انتى الكابيره و روقى و تسامحى احنا يهمنا رواقانك يا استاذه علشان الابداع بس

صديق لدود قديم

مي يقول...

الله يخرب بيت اللى يزعلك
يالهوىىىىىىىى واحنا نقدر على زعل الجميل والله يا صبرنى احنا بنحبك اوىىىىىىىى انتى بقالك مده مضايقة ليه؟ معلش روقى كده وميهمكيش من حاجة
سلام يا قمر وربنا يزيل عنك الزعل والهم

صبرني يارب يقول...

مصري جدا

والله انا نفسي فى النوم الابدي خلينا نخلص

صبرني يارب يقول...

عاشقه الرومانسيه

انا عايزه ارفع قضيه على الدنيا كلها لو طاوعني استاذ هاني انا موافقه

صبرني يارب يقول...

غير معرف

صديق لدود قديم !!!!

اوك متشكره لك وكل سنه وانت طيب

الى مضايقنى كتير تاخد العنواين والاسماء ؟

صبرني يارب يقول...

مي

الله يكرمك يارب والله انا كمان باحبكم اوي ربنا العالم

متشكره ليكى

قوس قزح يقول...

انا لى حق عندك
و حق كبير كمان
اتصرفى بقى و هاتى حقى
هه

هااااتى
يا متحجرة القلب
يا معذبة قلوب المدونات

مش مسمحاااااااكى
ابدا ابدا


الا لما توفى بوعدك و تيجى و اخد حقى منك
بس خلاص

عاشقه وغلبانه يقول...

جيتي ع الجرح
بصي انا علي اخري
واي حد هايكون زعلان ولا متضايق ولا مخنوق هاعيط جانبه
لاني ببساطه بدور علي اي سبب يسمحلي اعيط قصد الناس من غير مايسألوني عن السبب الحقيقي
لاني اصلا ماعرفش ايه السبب الحقيقي
عموما تعالي اقعدي جنبي ونعيط سوا
تحبي اجي افوت عليكي بكره الصبح ونخرج نتمشي ع الكورنيش ونعيط سوا سوا
ااااااااااااااه ياغلبي يانا
صبرني يارب

بت خيخة وأي كلام يقول...

هو فيه ايه يا ام مريم؟

ستيته حسب الله الحمش يقول...

طيب انا عارفة قصدك
وفهماك
وحساك قوي والله
يعني لو حد من الاقارب او الاباعد شاف حاجة وحس انك بتفضحي سره
فأحب اقول له وشرف طنط ظاظا في الأيام المفترجة دي افهم فهيم فينا ما بيعمل اسقاطات مطلقا
نام وارتاح
وحط ميكريكروم ع البطحة

عارفة سر التعب اللي انتي فيه ايه؟
انك مستجدعة قوي بالعافية وده غلط
لازم تحملي نفسك اللي تطيقها
الجدعنة اني اخدم الناس
واحب الناس
واسمع الناس

بس عند لحظة فاصلة اقول استوب
انا فورا حالا امرأة مطحونة
ادوني فرصة اشم نفسي
وارجع امرأه غير مطحونة تاني
وربنا يصبرني على ما بلاني

روستخ يا ذكي يا روستخ

adel يقول...

ياصبر صبصب علي الصبايا المتصبصبين
بصي حضرتك
ربنا وحده بس اللي هيحاسبك
هو بس

اعملي و اكتبي اللي يعجبك
اللي مش عجبه ميدخلوش
بسيطة خالص

انت حر مالم تضر
وانت مش بتضري حد و لو حد بيتضر اسهل حاجة يقفل الصفحة

بسيطة خاااااااااالص

احساس طفلة محبة للرومانسية بس واقعية يقول...

لية كدا يا صبصب
دا انا جاية اقولك وحشانى
معرفش ان فى حد مزعلك
انتى بس زقية على ارض بلوجر وشوفى اللى هنعملوا فيه :)
اللى حاسس انه متضايق من حاجة انتى قلتيها اكيد حاسس بذنب او شاف نفسة من خلال كلامك غلطان وشكلة وحش وهو مكنش شايف الجانب دا قبل كدا دى مش غلطتك دى غلطتة هو اللى بيعامل الناس كلها على انهم خطائيين وهو لا حتى خطأه بيرمية علي الاخرين

روقى كدا دا انتى حوليكى مدونين يكلوا اى حاجة تعمليها فى مدونة طابخين إيه النهارده
:)

تقبلى مرورى

reem يقول...

ايه ياقمر مالك ؟

مين اللى يقدر يزعل الجميل ؟

يا ستى ولا يهمك دا عادى جدا جدا

عارفه احسن رد على اى حد يدايقك

ايه انه يحس انه عمره ما اثر فيكى ولا دايقك

خليكى زى ما انتى بوضوحك وجدعنتك واللى مش عاجبه اكيد عنده في بيته حيطان كتير
يختار كدا اى اوده بيرتاح فيها ويخبط راسه فيها براحته

فاتيما يقول...

إيه دا يا صبصوبتى ؟؟
إنتى لسه هتاخدى بالك من حشرية الناس فى تصرفاتك و إن كل واحد عاوز يمشيكى على كيف كيفه تكتبى اللى يعجبه و متكتبيش على مزاجه برضو ...
زى ما س س ست الكل ستيتة و عادل قالولك تمام ...نفضى و اعملى اللى يعجبك و اللى مش عاجبه يغير المحطة و مع ألف سلامة ...
إنتى بقالك مدة مش تمام و متزوديش على نفسك الزعل و الشلة المتخلفة دى تنفض أحسن
أنا بحبك قوى و بلاش عياط و نكد انشالله هما يا رب

صبرني يارب يقول...

قوس قزح

يا حبيتي انتى حقك على راسي يا جميل

والله اول ما انزل القاهره فى اي وقت هاكلمك ونتقابل ان شاء الله

نورتي يا جميل

صبرني يارب يقول...

عاشقه وغلبانه

ماشي انا موافقه بس الصبح فى الحر والصيام لا

بالليل ممكن اوي

نورتي

صبرني يارب يقول...

خيخه

والله يا خيخه انا لو عارفه في ايه كانت المشكلة اتحلت

انما انا مش عارفه الناس عايزين مني ايه

فى انى صريحه وقلت لاهلي انى عندي مدونه وباكتب بصراحه مع انها صراحه متزوقه لكن برضه الى على راسه بطحه بقى

صبرني يارب يقول...

ستيته

ياريت اسقاطات بس ده حتى مجرد انى جيبت سيرتهم الشريفه معتبرين ده اهانه

على اساس انى جبت سيرتهم فى كباريه الورده البيضا

حاجه تقرف

صبرني يارب يقول...

عادل

الحمد لله تعالى ان هو الى هيحاسبنى


وانا رديت عليهم قلتلهم كده الى مش عاجبه كلامي ما يقراهوش

والى شايف ان انتهكت خصوصياته يرجع عليا بالمحكمه وياخد حقه

نورت

صبرني يارب يقول...

ريم

لا انا الى هاخبطلهم راسهم فى اتخن حيطه ان شاء الله

صبرني يارب يقول...

احساس طفله

اه انا عارفه ان الحكايه كده بس برضه من حقي انشر اي موقف انا عشته من غير ما ارجع لحد

وحشاني انتى كمان والله

صبرني يارب يقول...

فاتيما

ما باسبش حقي يا فاتيما طال الزمن او قصر

والموضوع مش حشريه بس

لا ده استهبال جامد اوي

متشكره ليكى يا جميل

أم مالك يقول...

فعلا ياصبرنى الناس بتزعل
لما تيجى سيرتهاحتى وانتى بتكتبى عنهم
بالمتغلف ومش بطريقة مفضوحة
مع ان المدونة ديهعاملة زى كراسة
المذكرات نكتب فيها خواطر نكتب فيها
مواقف كل واحد حر
لكن الغير مش بيفهم كده وخصوصا الاهل
وخصوصا من واحدة زيك بعلو عندها
صوت الحق على صوت الباطل
وانا ليا نصيحة من اختك الكبيرة
انك فعلا فى كتابتك تحاولى الا تتطرقى
للى زعلوا وخصوصا ان فيه ناس حاسسة من الهوا
او تغيرى اسم المدونة ومن غير ماتقولى
لحد من الاهل حتى لايتتبعوا ماتكتبيه
لان للاسف المشاكل مع الاهل حتى وان كان لنا حق فيها لكن والله بتحرق الدم
وبنفضل قايمين نايمين بيها
ربنا مايجيب لك زعل ابدا ياحبيبتى
وطولى بالك والله المستعان
تحياتى

عاشقه وغلبانه يقول...

بعد العيد اوعدك بجد نتقابل ونتمشي سوي كتير وقت عصريه كده
لان الشغل في رمضان وميعاد الافطار مبوظ وقتي خالص
بس انا بجد حابه فرصه زي دي
وده شئ هايسعدني جدا

صبرني يارب يقول...

عاشقه وغلبانه

انا يا جميل الى اتشرف بيكى
ربنا يكرمك

ان شاء الله ربنا يسهل

صبرني يارب يقول...

ام مالك

لا طبعا مش هاغيرالمدونه ومش هاغير اسلوبي ومش هاستخبى

ومن حقي دايمااتكلم فى اي حاجه انا طرف فيها والى مش عاجبه ما يدخلش معايا فى اي مواقف

وما دام انا صح هما الى يستخبوا مش انا

معلش انا مقاتله شويه
شكرا ونورتي

أحمد حسن البنا يقول...

صبرنى يارب

مش غلط نكتب وننقد ورغم انى مش فاهم حقيقة اللى مزعلك لكن واضح من موضوعاتك اللى فاتت طبيعة المشكله ومن حرصى على نجاحك العملى اتمنى انك تتقبلى نقد الغير حتى ولو كان يجرحك لانك كتير بتنقدى تصرفات مقربين ليكى وبصراحة مالقتش حد منهم رد على موضوعاتك ودافع عن نفسه عشان كده ياريت توسعى صدرك للنقد وتحاولى توصلى وجهة نظرك بهدوء ومرح كعادتك وبلاش حكاية المحاكم دى لانك كده واضح انك خرجتى من جوك المرح ودخلتى فى مرحلة شد الشعر وتحديف الكراسى ....روقى وشوفى ايه اللى مزعل الناس اللى تهمك لانهم فى الاخر جزء من يومياتك ومش هتقدرى تحزفيهم من حياتك .... ومن حق الغير انه يدافع عن موقف هو طرف فيه زى مانتى من حقك تسردى الموقف اللى انتى برضو طرف فيه وبالعقل كل شىء يتحل انما اسلوبك ده بيدل انك فى حالة مش بتمثل طبيعتك ....وربنا يهدى النفوس
ورمضان كريم
وكل سنة وانتى طيبه

صبرني يارب يقول...

احمد حسن البنا

لا عادي انا ممكن احذفني انا شخصيا

حضرتك جبت مربط الفرس

ما حدش فيهم لا رد عليا لا فى والواقع ولا على المدونه

ولا حتى اصحاب الشأن هما الى قروا الموضوع دي اسافين داخليه بعيد عنك

متشكره لك ونورت

mimi يقول...

ايوة علي رأيك هوا ده الكلام ... محدش ليه حاجة عند حد

تحياتي

يــوم جــديد يقول...

مين دا اللي يجرؤ يزعل من صبرني
احنا كلنا وراك يا ريس
اللي مزعلك نزقه من فوق اللينك نعوره

روقي يا قمراية
(الذي يخالط الناس ويصبر على أذاهم خير من الذي لا يخالط الناس ولا يصبر على أذاهم) التعامل مع الناس لازم هيتعرض لأذى (وإن تطع أكثر من الأرض يضلوك عن سبيل الله )

لا تعبأي بهم

صبرني يارب يقول...

ميمي

انا متشكره اوي ربنا يكرمك
نورتي

صبرني يارب يقول...

يوم جديد

انا معاكي بس الصبر ده بيبقى له استوب برضه مش للابد ومش فى كل حاجه

واديكى قولتي يضلوك عن سبيل الله

مش هاسمح لحد يتحكم فى دماغي وفى كتابتي وفى حياتي

متشكره اوي ونورتي

Ahmed يقول...

مين بس اللي مزعلك

شاوري بس وانا اجيبلك مكروباص محمل نبابييت ورداله يكلوا الظلط
كل سنه وانتي طيبه ومتعكننيش عليكي فرحة رمضان والعيد

تامر علي يقول...

ما احنا قولنا من الاول خلي بالك علشان صورة الكرامة العربية ماتتحولش لشيء ملموس :))))

عموماً حصل خير والزمن بينسي حزن وفرح ياما :)

مفيش خلاف ان الصراحة هذه الايام مش راحه خالص واللف والدوران هو اللي بيجيب نتيجة لذلك أنصحك أن تتخفي في شكل تاني وتسمى مدونتك "صمت أمرأة مطحونة" ساعتها محدش هايعرفك وتقولي اللي في نفسك :)

تحياتي :)

Anonymous يقول...

متهيالى ان البوست بتاع المقصلة هو إلى وقف فى الزور

مع انى شايف انه ممكن لو كباية لبن كبيرة دافية يتبلع ويبقى زى الفل

بس تقول ايه

حصل خير

قضوها شيكو دودو

عباس الخامس عشر

حنعيش يعنى حنعيش يقول...

كبر الدال وريح الجيم وربنا يهبل اللى يزعلك المتخلفين كتير ياجدع وكل سنة وات طيبة المهم اية اخبار الكحك يارب يطلع ناعم

حنعيش يعنى حنعيش يقول...

فين البانر ولاهوة كلام وبس

Che يقول...

بصى يا ستى ... انتى قلتيها ... اللى مش عاجبه يقول ... بس محاكم و قضايا و كده ده كلام الناس الفاضيه ... انتى بس اتفقى معاه و عرفينا المعاد و ملكيش دعوه بحاجه تانى .... و بعون الله اللى مزعلك ده هيكون بيتعشى مع السمك على رأى الاب الروحى و المافيا بنماسبه جو حرب العصابات اللى انا عايش فيه على الفيس بوك
رمضان كريم

صبرني يارب يقول...

ابو العلا

تعيش يا بوي شايلينك للكبيره

كل سنه وانت طيب

صبرني يارب يقول...

تامر علي

كلا البت ولا حد يقدر ولا عاش ولا كان ولا هايكون باذن الله

وانا لا اصمت ان شاء الله

ولسه لحد الان مش خيار عندي انى انقل المدونه مكان تاني

نورت يا باشا

صبرني يارب يقول...

عباس الخامس عشر


ايه الاسامي دي يا رجاله

المهم لا مش البوست ده


اه انا باحب شوكو دودو انا والعيال اعمل حسابك معايا

mahasen saber يقول...

مالك بس فيه ايه ...تحذير وزعل وحد شكله مدايئك
مالك بس الف لا بئس عليكى
وربنا يصلحلك كل حال

معلش كتير من الاهل ساعات بيتقمصوا ان بنتهم بالذات غير ابنهم يبقا ليها مدونه وبتعبر عن رايها
يعنى نوع من انواع ازاى وليه وحاجات كدا

كل شئ هيتصلح يا صبرنى يا جميله

صبرني يارب يقول...

حنعيش يعنى حنعيش


طيب انا زهقت اعمل ايه طيب ما عدتش عارفه استحملهم


انت فين كده مختفي يا استاذنا


والبانر حاضر والله رمضاااااااااان بقى نعمل ايه

والكحك قيد التنفيذ ان شاء الله والله

صبرني يارب يقول...

che

ويعنى مالها المحاكم والقضايا ؟؟

عادي هى حاجه وحشه احنا بس الى رجعيين ومتخلفين

انت فين من زمان مختفي ليه

صبرني يارب يقول...

محاسن صابر

شكرا ليكى يا قمر

ان شاء الله خير

انا لها بعون الله

شمس النهار يقول...

صبرنيييييييييييييي يارب
انت اخترتي صبرني يارب يعني عارفه اللي هيجري
لما تضايقي قولي صبرني يارب

كلنا لها
وحدوه

صبرني يارب يقول...

تسلمى يا شموسه

ونعم بالله والله قلت كتير

بس معلش انى قلقتكم بالبوست ده بس كان لازم منه

kochia يقول...

روقي روقي
اكتر من كدة وبيزيح ربنا والله
وبترجع احلي من الاول

ما بين غمضة عين وانتباهتها يغير الله من حال الي حال

انا طبعا مش عارفة المشكلة .. بس يهمني انك تكوني كويسة

mahasen saber يقول...

ايوه كدا انا مبسوطه بنبرة القوه دى
انتى فعلا لها يا جميله