الاثنين، 7 سبتمبر، 2009

قال الحكيم اسكار : انا محاط بشله متخلفه

سلام عليكم
اخبار الصيام معاكم ايه ؟
ولله الحمد البلوج كله بيصوم وهونايم ولما بيصحوا بيفطروا ويرجعوا ناموا تاني
انا عندي 3 بلوجات اكتر نسبة مشاهدات فى البلوج عندي بلوج المطبخ حاجه زي الفل الشعب ده يا ولاد والله
المهم انتم تنوروا فى اي بلوج ولا يهمكم يا بشوات
الحقيقه انا عندي انفلونزا ووجع فى النافوخ فوق العاده ومش عارفه ارغي ولا احقق وادقق ولا اتناقش ولا اتكلم من عقلي خالص مالص بالص
بس انتم وحشتوني قلت اجي اسلم عليكم كده واقولكم على ما يجول بخاطري فى هذه اللحظه بالذات
انا زهقااااااااااااااااااانه
ايوه زهقت من كل حاجه
زهقت من التخلف والغباء
والشخصيات الرخمه
والشخصيات الى ما بتفكرش
والشخصيات الى بما بتفهمش
والشخصيات الى بيستهبلوا
والشخصيات الى سايقين الهبل على الشيطنه
والعيال ا لمدلعه
والابهات والامهات الى حاطين اديهم فى ا لمايه البارده
والتواكل والكسل والتناحه والصفاقه
والعواطليه فعلا ومعنا
وكل حاااااااااااااااجه قرفت من كل حاجه من الحاجات دي
اعمل ايه ؟؟
حد يدينى حل
ما عدتش قادره استحمل ولا اسمع ولا اعرف ولا اتناقش ولا اتكلم
اعمل ايه ؟؟
اهاجر طيب ؟؟
جايز يكون ده الحل ؟؟؟؟؟؟؟؟؟؟؟؟
اعمل ايييييييه
عارفين فيلم الليون كينج ؟
الكارتون اه
الاسد اسكار قال كلمه خااااااااااااالده باحبها موت وارددها بين طياتي بين الفينه والاخرى
قال انا محاط بشله متخلفه
والعاقل الرزين ابو بال طووووووويل بوفاسا قال اعمل معاه ايده يا زازو
وزازو حكيم عصره قاله كل عيله فيها واحد سيادتك متخصص دايما فى افساد الاوقات السعيده
اعمل اييييييييييييييييييييه؟؟؟؟؟؟؟؟؟؟
حد يقولي اعمل ايه ؟؟
ونكتفي بهذا القدر من الخنقه عليكم

هناك 27 تعليقًا:

مصري جدا يقول...

بس كدة
أنا اقول لك تعملي اية

بصي يا ستي

أعملي دقية بامية باللحمة الضاني وعيش محمص وطرشي بلدي

وأديها

اللة يخرب بيت المرارة اللي محرماني اكل الاكل اللي بحبة

خضار مسلوق في مية
دة أكلي

انا ودماغي يقول...

ليه بس كل ده

هو طبعا الصفات اللى اتذكرت دى موجود منها كتيييير بس اكيد برضه فى ناس كويسة بصى حواليكى اكيد حتلاقى حد و على فكرة كل حد فينا فى نسبة من حبة الصفات دى فلازم كلنا نراعى بعض

بس فى حاجة انا معاكى فيها و انا كمان زهقت منها بغبااااااااااء

الامهات و الابهات اللى ادهم فى المية الباردة

و العيال المدلعة

و العواطلية

دول بجد اكتر 3 حاجات بحس انى عايزة اولع فيهم

ربنا يعافينا

صبرني يارب يقول...

مصري جدا

يا باشا المراره الى توجعك شلها

انا شلت المراره من ست سنين حاليا اناا حسن كتير من قبل ما اشيلهاولما تشيلها بعد 3 شهور هناكل كل حاجه عادي


وبعدين انا مش باحب الباميا اوي مات شوف حاجه تانيه

عاشقه الرومانسيه يقول...

فى ايه ياصبصب
هو مين مزعل مين ومين خانق مين
انا مش فاهمه حاجه خالص

صبرني يارب يقول...

عاشقه

والله انا مش عارفه

انا بس مخنوقه حبتين فيها حاجه دي

استحملوني يا جودعان

صبرني يارب يقول...

انا ودماغي

هو انا قلت ان مافيش حواليا ناس تمام التمام

بالعكس

بس بقى فى ناس تانيه زهقت منهم بقى

مخنوقه شويه
معلش

نورتي يا جميل

مي يقول...

طبعااااااااا نستحملك يا بنتى
مالك بقى؟ خلاص متزعليش نفسك بقى
خلاص فرفشى كده احنا فى رمضان
بس شفتى انا عالطول بعلق فى بلوج الطبخ وعملت القطايف كمان المفروض تفرحى بقى
هاتى بوسة بقى اموووووووواه

مصري جدا يقول...

جبتي التايهة

أنا شلتها بعد حداشر يوم جواز

وتلت الكبد

كانوش شالوا المخ اللي تاعبني بالمرة

بصي يا ستي

اللهم اني اعوذ بك من الهم والحزن اللهم اني اعوذ بك من العجز والكسل اللهم اني اعوذ بك من غلبة الدين وقهر الرجال ثلاثا

هتنباسطي عالاخر

ضكـــــتور جدا يقول...

ولا حاجة
قولي لا اله الا الله

ستيته حسب الله الحمش يقول...

لما تلاقي فيزا
متنسينيش معاكي
فعلا انا محاط بجو كامل من الغباء
والله كينج لايون ده حبيبي
وخاصة تيمون وبومبا لما يقولوا حكمتهم الخالدة
هاكونا ماطاطا
كلمة نغمها لذيذ
هاكونا ماطاطا
ارمي وراك اللي يغيظ

يا سلام
يا سلام

فاتيما يقول...

و الله يا صبصوبتى عاوزة اقولك إنك لو كنتى جيتى معانا الفطار كنتى هتحسى بعكس كدا خالص مالص بالص
بس عارفة إنك مقدرتيش فى آخر لحظة و منكن منكن يعنى يكون دا سبب من اسباب احساسك بالإنحباط
الفيلم دا مليان جمل خالدة و له ذكريات حلوة عندى مع يوسف
روقى كدا يا ست الستات و اعملى زى ما هانى مصرى جدا ما قالك و ربنا يفرجها إن شاء الله
بوسة و حضونة ..و متبعديش وشك لتختفى تعدينى و لا حاجة عشان انا اشاساً عندى برد مش راضى يمشى

صبرني يارب يقول...

مي

بوستين يا جميل

طبعا فرحت انك عملتى القطايف المهم يكون بابا سليم
ههههههههههههههه

ومش زعلانه والله بس هى حالات كده خنقه بتيجى من البشريه وبتروح بعد شويه


نورتي

صبرني يارب يقول...

ضكتور جدا

لا اله الا الله ولا حول ولا قوة الا بالله

ونعم بالله يا فندم

متشكره اوي

صبرني يارب يقول...

مصري جدا

يا عينى يا حراااااام 11 يوم

بطله الست دي ابقى عرفنى علينا والنبى

انا بقى شلتها بعد اربع سنين يعنى احنا جامدين اوي بالصلاه على النبى

شكرا على الدعاء والاهتمام يا استاذنا

صبرني يارب يقول...

ستيته

عوووونيه هاخد المدونين كلهم ونروح فى حته فاضيه كده ما لهاش اصحاب نعمل دولة المدونين الكبرى

خالتي احفظي الاغنيه كويس

وارمي الماضي الى يغيييييييييييييييظ

هكونا ماتاتااااااا

نورتي يا جميل

صبرني يارب يقول...

فاتيما

الف سلامه عليكى

هو الحقيقه انا كنت مخنوقه من قبل اللقاء وقلت هيه بقى هاروح اللقاء وشوف الحبايب

بعدين ما عرفتش اجي غصب عني والله فاتقفلت كمان شويه

وبعدين اصلها لما بتقفل معايا فاي بقى فسفوسه تحصل تقفل اكتر واكتر واكتر لما تعمل قافله كامله شامله زي دي كده

كام يوم كده وهاروق ان شاء الله انا عارفاني

ومتشكره يا جميل

الطائر الحزين يقول...

هههههه
ضحكتينى

سكار انت اللى مش لازم تدينى ظهرك

رمضاااان كريم

شمس النهار يقول...

صبرنييييييييي يارب

كلنا لها

وبجد بجد فعلا كل عيله وفيها دمل دايما بيوجع وعمر جعبته مابتفضي فعلا

وبدين هتطفشي تروحي فين كان غيرك اشطر

حضرتك وانا في بلاد العم سام في اخر الدنيا كانوا برضه حسهم معايا وبينكدوا عليا

خاليها حسبه لله
واهي طوفه وهتعدي زي اللي قبلها واللي قبلها اقول لك انا هكلمك في التليفون احسن

رمضان كريم

صبرني يارب يقول...

الطائر الحزين

لا لا على فكره ما حدش فيكم حافظ الفيلم بالظبط

اسكار هو الى كان بيقول:

بوفاسا انت الى مش لازم تدينى ظهرك

ده بعد ما بوفاسا قاله سكاااااار حذاري تدينى ظهرك

صبرني يارب يقول...

شموسه

والله الواحد بتيجى ساعات كده وتقفل معاه بقى

والى بيستحمله كل يوم مش عايز يسمع عنه النهارده كده يعنى

بس على رايك الى اين الهروب

تسلمى يا شموسه ما اتحرمش منك ابدا

حرروف يقول...

ممكن تقوليلي حتعملي اية عشان اعمل زيك بظبط ولو مسافرة ومهاجرة خديني معاكي بالله عليكي
اعمل اية
اعمل اية
لو في برتقانة حلوة زيك كدة
اعمل اية

دمتي بالف خير

صبرني يارب يقول...

حروف

والله ما انا عارفه يا حروف فعلا اعمل ايه

ماهو المدينه الفاضله مش موجوده

بس برضه حرام كده اعيش المدينه الهبله

نورتي يا جميل

عمرو يقول...

و الله يا أم خالد الأغبياء أعدادهم فى تكاثر مطرد حتى قاربت على الظن و بعض الظن اٍثم أنه يوجد عامل غامض فى الهواء و الماء يعمل على تنشيط غدة الغباء لدى بنى البشر !!
و بعد طول معاناة و جهد ما وجدت أفضل من العمل بمقولتين أشتهر بهما الواد أبنى الكبير حتى صارتا شعاره فى الحياة الدنيا :
-اٍنسى و خد البنسه
و
-اٍنسانى و خد عنوانى
و هما يدلان بعمق و حكمة عن فضل التنفيض و شراء الدماغ و تكبير الجمجمه و هى من مصطلحات الزمن العبثى الذى نحياه شئنا أم أبينا ..
صبرنا يااااااااااا رب

صبرني يارب يقول...

استاذ عمرو

والله نفسيييييييييييييي

باعمل كده فعلا كتير

بس بتيجى لحظه بقى
انفجااااااااااااااااااار

متشكره اوي لحضرتك وربنا يكرمك

نورت

تامر علي يقول...

أولاً أنصحك متردديش كلام سكار في البيت كتير علشان محدش يسمع كده ولا كده ويحصل ما لا يحمد عقباه (زي صورة الكرامة العربية كده:)))

ثانياً الحل الأكيد للزهق هو التغيير ... ممكن تغيير مناظر أو تغيير خلق أو أماكن أو أفكار أي تغيير هايكون مفيد أنا سعات لما بزهق ومالقيش حاجه اغيرها بغير هدومي وخلاص :))

تحياتي :)

صبرني يارب يقول...

تامر علي

لا يا سيدى الى في البيت خارج الموضوع

هما كمان بيقولوا زي

وياريت انا اقدر اغير حاجه غير انى على رايك اغير هدومي

Yusuf يقول...

الصراحه أنا أول مرة أخش مدونتك
وأول مرة أخش مدونة ألاقي الهجوم الحاد ده علي البني أدمين

بصي انا هقولك حاجة حلوة انا بعملها علطول
اللي خانقك مايستاهلش دوسة الكيبورد عشان تكتبي الكلام ده كله اعتقد المفروض تركزي طاقتك ف انك ترميه ورا ضهرك

وبعدين انتي كنتي المفروض تبدأي التدوينة بجملة

" أصل أنا مبحبش اتكلم عن نفسي كتير"