الثلاثاء، 6 أكتوبر 2009

احنا الى كتب كتابنا كان مخدماتي .. مش مأذون


السلاااام عليكم




ازيكم وحشتوني والله ليا زمان ما اكلتش دماغكم


ايه رايكم فى عنوان البوست

دى عباره عن مقوله خالده لمعالي زايد (الى انا مش باحبها اصلا ) بس اعظم كلمه قالتها فى حياتها فى فيلم مجهول كده مش فاكره مع مين

المهم

كانت دايما تقول لجوزها كده

ده احنا الى كتب كتابنا كان مخدمااااااتي مش ماذوني

هى صحيح جمله معبره جدا جدا

بس انا لما دققت كده لقيت انه لاااااا كمان ولا حصلناها

طب حد فيكم عنده شغاله ؟

طب اليكم عشر فروق جوهريه بين الزوجه والشغاله :

اولا الشغاله بتاخد مرتب محترم اي والله محترم احسن من الموظفين فى بلدنا للاسف الشديد

الزوجه بتاخد ايه ؟؟ بتاخد كلمتين فى جنابها ممكن ؟؟!!


ثانيا : الشغاله لها يوم اجازه فى الاسبوع وحتى لو مقيمه المفروض القانون بيكفل لها ساعات راحه يوميه ونوم واكل واجازه سنويه كمان

الزوجه بقى يا حبة عين امها شغاله اربعه وعشرين ساعه فى اليوم 365 يوم فى السنه ولا عطل ولا اجازات حتى وهى نااااااااايمه

المفروض تكون فى وضع الاستعداد يعنى اون ديموند على طول . ويا حبذا لو نامت تحلم انها بتغسل الاطباق .

ثالثا : الشغاله ما بتذاكرش للولاد ولا بتوديهم للدكاتره ولا بتشتري لهم لبس ولا الافلام دي كلها

الزوجه بتعمل كل ده يا حبة عينى فوق البيعه كده .

رابعا: فرضا الشغاله بتشتغل شغلتين كل واحده نص يوم فبتاخد مرتب من الشغلتين طبعااااااا

الزوجه بقى لو فكرت تشتغل فهى بتشتغل نص اليوم الاولاني وتاخد مرتب تصرفه على البيت الى شغاله فيه نص اليوم التااااااني وتطلع منفضه برضه ولله الحمد .

خامسا : الشغاله بتلاقي الى يقول حرام اكلوها كويس وحرام لبسها وحرام عاملها كويس ولو ضربوها ترفع عليهم قضيه وتطلع عنيهم


الزوجه قطع فيها براحتك يا معلم هاتلاقي مليون لسان عايز قطعه بيقولها استحملي واصبري وربي عيالك وايه يعنى ماهو جوزك برضه


سادسا : الشغاله بتلبس اي حاجه وشكلها مش مهم وبتخلص شغلها وتروح او تنام

الزوجه هيهات . لازم تشتغل شغل الخدامين ده كله وبعدين تبقى فى نفس ذات الوقت حلوه ولابسه شيك وفاتحه بؤها اثنين متر بابتسامه عريضه والا تبقى زوجه مهمله فى نفسها ومش مراعيه حق جوزها .


سابعا :الشغاله لما بتمرض بتاخد اجازه ولو كانت مقيمه عندك هاتمرضها وتجيبلها الدكتور و العلاج


الزوجه تمرض ما تمرضش مالناش دعوه البيت ماشي عااااادي بس زي بعضه بنجيب لها الدوا


ثامنا : الشغاله مش هاتمن عليها بالفلوس الى بتصرفها على اكلها وشربهاولبسها ومرتبها لو كانت مقيمه


الزوجه تقدر كل يوم الصبح تعايرها انك أنيها وبتصرف عليها هى وعيالها (على اساس ان ده مش فرض عليك غصب عنك وان العيال دول هى جايباهم من السوبر ماركت لحسابها)


تاسعا: الشغاله تقدر فى اي وقت وبكل بساطه تمشي وتسيبك تتفلق انت وعيالك والى خلفوك

الزوجه للاسف ما تقدرش تعمل كده عشان عيالها وعشان المجتمع كله هايحكمها ويحكم عليها بالاعدام لو عملت كده


عاشرا : لو قليت اصلك وعملت حاجه مش تمام مع الشغاله هاتروح النار اولا وجايز الشغاله تبتزك وجايز تفضحك وتبقى فضيحتك بجلاجل


الزوجه حاجه ببلاش كده وياريت تامر فيك ده انت بتتامر وعينك على ابو سيلكون يا طفس


بس خلاص كفااااااااااااايه


البوست ده اهداء مني لجمعية المرأه المتوحشه وعضواتها الحلوين


دوروا على حقوكم يا بناااااات


اي خدمه يا رجاله


فى تأليب نفس اكتر من كده ؟؟


باهدي النفوس بس
هواااااااايه

اه والصوره الي فوق دي انا لطشاها من البت خيخه

هناك 63 تعليقًا:

AHMED SAMIR يقول...

اولا المقولة دي لمعالي زايد قالتها لمحمود عبد العزيز في فيلم السادة الرجال
ثانيا
الفرق برضة بين الزوجة و الشغالة ان الزوجة بتعمل الحاجات دي بحب علشان هي بتحب زوجها و اولادها انما الشغالة بتعملها علشان هي لازم تعملها...شغلها
تحياتي

فاتيما يقول...

و الله بوست مية مية
يترد بيه على بوست
الفرق بين الزوجة و الشغل من وجهة نظر الرجالة و اللى نشرته ستوتى ستيتة من مدة
انا معاااااك يا معلم
ف الطلعة دى
بس اجيب الكارنية بتاع الجمعية
و احصلك و بالمرة اجيب الشنطة
عشان اخد كيسين سكر و كيس رز

احساس طفلة محبة للرومانسية بس واقعية يقول...

هو دا الكلام يا صبصب
خلينا نعمل اى حاجة حتى لو شوية كلام كدا نقولهم يفكوا عن نفسيتنا
واكيد البوست دا تقصدى بية الرد على الفرق بين الزوجة والسكرتيرة :)
يلا عشان يعرفوا اننا مش هنسكتلهم

يارب تكونى بخير
تقبلى مرورى

صبرني يارب يقول...

استاذ سمير

حب ؟؟

اه ده لو كان في حب

والحب ده بيبقى من الاثنين

يعنى هى تشتغل فى البيت وبره البيت ويطلع عينها

وهو ما بيرحمهاش وما فيش لا حمد ولا شكرانيه

وبعدين مش عايزاك تاخد الموضوع على صدرك اوي كده
انا باهزر على فكره فى البوست عموما


وبتهيئلي ما كانش فى الفيلم ده

كان فيلم تاني

يلا مش مهم مش هانختلف

صبرني يارب يقول...

احساس طفله

اي خدمه لو تحبي اعملك بوست مخصوص للفرق بين الزوجه والسكرتيره من وجهة نظري نعملك يا باشا

فكي عن نفسيتك براااااااحتك يا معلم

صبرني يارب يقول...

فاتيما

مش كده والنبى يا اختي ؟

قالي يقولك الفرق بين مراتك والشغل

والنبى تتوكسوا

ويلا انجزي قبل ما السكر يخلص

ههههههههه

عاشقه وغلبانه يقول...

الله يانصرانا ورافعه راسنا
بس في فرق انتي قولته هاصلحهولك الخدامه لما بتشتغل شغلتين بتقبض مرتين اما الزوجه بتشتغل الشغله الاولي علشان صاحب الشغله التانيه ياخد مرتب الشغلانه اولي وهي تطق تموت
بعض الرجاله وليس الكل علشان انا لسه عايزه اتجوز ههههه صنف دون عايز قطم رقبته ويارتنا عاجبين ياختي الا في الاخر بيبصوا بره

انا جايه وراكي اهو ومعايا العضويه

عاشقه وغلبانه يقول...

بالنسبه لرد A.SAMIR احب اقوله جمله واحده
حب ايه اللي انت جاي تقول علي ايه هي الرجاله تعرف معني الحب ايه.....؟؟؟؟
علاقتكوا بينا في اغلبها تقدر تسميها اي حاجه غير الحب اللهم من رحم ربي

adel يقول...

هههههههههههههه
والله 10/10
والصراحة عندك حق

reem يقول...

ياصبرنى يارافعة راسنا انتى

واستاذ سمير بيقولك بتعملها بحب طيب ماهو كمان يساعدها بحب بردو
ولا هى بس اللى لازم تحب

هو انا خلاص بئيت عضوة في الجمعية ولا لسا بدرى عليا ياصبرنى ؟

وانتى فاهمانى طبعا

بس عارفه انى على ايدك اكيد هابئا عضو ومهم كمان

ههههههههههههههههههه

Mohamed Hamdy يقول...

وصدق اللى قال : متحسبوش يا بنات ان الجواز راحه :)

صبرني يارب يقول...

عاشقه وغلبانه

ايوه ما انا قلت انها هاتشتغل الصبح وتصرف الى بتقبضه على البيت
هي هي

وفعلا زي ماانتى بتقولي هو ده الوضع الا من رحم ربي

واستاذ سمير عايز يتحب بس انما يحب هو ويعمل بحب لا ما اعطلكش
تقولي ايه بقى عميييييييل يا اختي
ههههههههههه

بنهزر يا سمير اوعى تزعل

صبرني يارب يقول...

محمد حمدي

والله احنا مش عايزين راحه انما مش عايزين نموت برضه عايزين حقنا نعيش زي ما خلق الله عايشين

صبرني يارب يقول...

عادل

وشهد شاهد من اهلها يا رجاله

ولو انى شاكه يكون شاهد ما شافش حاجه

او شاهد تحت تهديد السلاح

صبرني يارب يقول...

ريم

والله يا ريم انا شايفه ان الجرعات بدأت تجيب نتيجه
وضوافرك بدأت تطول
فى امل
هههههههههههههههه

الاستاذ سمير زيه زي بنى جنسه كلهم عايزين يحبوا ويتحبوا بلووووشي


والله يا سمير انت صعبان عليا

كده يا ابنى تعمل فى نفسك كده وتعلق فى اول تعليق كمان اهم عضوات الجمعيه مسكوا فيك
هههههههههههههه

ستيته حسب الله الحمش يقول...

حلو قوي قوي كده


بس ها ارجع اقول بعلو صوتييييييييي
ان تخليت يا ام السعد عن حقوقك منك ليها ما تلموش الرجالة

يعني تتنيل البت تتخطب
هي طبعا تمد ايدها لقدام وتقول منقذييييييييييييييي
وهو راسي وهادي وبيحب بلسانه لكن هيهات قلبه يتحرك
اصلا هي ممكن بنسبة 90% متكونش الحب بس مجرد جوازة والسلام
يجي الموكوس وهي هيمانه ويقول لها ها نتشارك في كل حاجة يا حبي
تقول له طبعا طبعا

بعد الجواز معنى الإقرار ده: ها تشيلي نص مصروف البيت يا هيمانة وفوقيه بونص كل شغل البيت


يجي الموكوس يقول لك انا مامي معودتنيش اشتغل جوا البيت
تردي عليه طبعا طبعا
النتيجة:ما اسمعش صوتك يا موكوسة منك ليها .. ها تتحولي لشغالة ببلاش ما بقى لك من عمر


بحب اعزم اهلي مرة في الأسبوع
ترد تقول طبعا طبعا
طالما لم تشترطي انك ها تدخل المطبخ في العزومات قبلي يا عنيا ما اسمعش صوتك
ها تشتغلي بره وجوه وعزومات وخلافه


قررتي بعد ما اخدتي لقب ام السعد رسمي انك تكوني مسز شراء الطلبات ومسز زيارات الأطباء ومسز كل المهام المقطرنة
النتيجة انتي شيلتي ها توشي نفوخي ليه؟


كل حق بتتخلي عنه ايام الغرام والهيام والإنسجام هو حق مكتسب للي ببتجوزيه

وبما اني ستيتة اليكم الحلول
1- اياك في فترة الخطوبة تقري انك ها تصرفي على البيت
ان كنتي ها تصرفي على البيت فده بشرط يشيل معاكي نص الحمل
ونص الطلق
ونص الرضاعة
ونص سهر الليالي على المواليد الموكوسة اللي ها تتكتب باسمه
وكده كده ها تصرفي على ولادك ولكن يكون فضل وليس فرض
ولازم من مرتبك او مصروف ايديك اللي ها تاخديه من حبابي عينيه لو انتي قاعدة في البيت تدلعي نفسك
لااااااااااااااااازم تدلعي نفسك
ها ينفعك بإيه تضحيتك بالكوافير والجيم والحمام المغربي والمساج لما عينه اللي لا تثبت في مقأتيها تبدأ تتحرك

2- يوم راحة اسبوعي اجباري
تاخديه بالخناق الأول
وبعد كده ها يكون غصب عن عين التخين
لأنه كده كده ها يصالحك وها يرضى ويرضخ
اليوم ده فيه شيء اسمه الصحاب
فيه اهل من غير عيال
فيه تقفلي عليكي باب أوضتك وطظ فيه هو والعيال
اقسم بالله مش بقول لكم شيء مش بعمله

طالما انا انسانة يبقى لازم احس بآدميتي
طالما انا انسانة لازم اتحب
والحب مش كلام
ولا تسبيل وغرام
ولا نومة في السرير والسلام

الحب ان تضحي بجزء من وقتك من اجل راحتي وعلشان خاطر عيوني

الحب انك تحب اني اعلى واكبر
الحب انك تلاقي لي حقوق وتنصرني حتى على الوقت الضيق
الحب حضن
من غير الحضن طظ في كلام الحب

يــوم جــديد يقول...

دا انتي شايلة ومعبية يا صبربورة على رأي ماري منيب :)

كل راجل لازم يقر ويعترف ويتوغل ويقتل ويستمر ويستمر ويستمر في في مسلسل تعذيب الزوجة
لكن من دلوقتي لازم نبقى رجالة ونقف وقفة رجالة ونقول لأااااااااااااه
وراك يا ريسة

ňįĝŗő يقول...

قشطة جدا
ده لو المسألة بالشكل ده
ده أنا أتجوز بدري بدري بقى على كده
و أوافق على عروض الجواز الكتيييييير اللي متقدمالي و انا منفضلها .. ماهو الجواز نِفس برضه يا أوختي

ياااااااااااه ده واضح بجد إن الزوجة دي اختراع هايل جدا
أنا هأنقي بقى واحدة تكون - مع كل الأوبشنز اللي قلتي عليها دي - فيها دفع رباعي
و بجنوط فولكس
و بتدعم صيغ ال إم بي ثري و فور و فايف
و ممكن تصور لمدة عشر ساعات فيديو و بدقة حمسطاشر ميجابيسكل
و بتجيب هوا ساقع في الصيف و هوا سخن في الشتا
و بتجيب الأوروبي و النايل سات في نفس واحد
و يا سلام بقى لو بسوستة مش بزراير و تكون بجيوب شق

و كفاية على كده بقى

القناعة كنز لا يفنى



يلا سلام

semsem يقول...

نسيتى تقولى الشغاله مبتحملش 9 شهور ونحيب بيبى وكمان ابوة يسمية الاسم الا هو عوزة

بوست جامد وفى الجون

صبرني يارب يقول...

يوم جديد

لا يا شاطره نقف وقفة حريم

وقفة رجاله ايه
خدنا ايه من الرجاله غير حلاقة الدقن

صبرني يارب يقول...

نيجرو

هاقطعك يا نيجرو

ابقى هات فيها اوبشن ترقعة صوابع الرجلين بتفيد برضه

هههههههههههههههههه

صبرني يارب يقول...

ستيته

احينا الحياه ما بتديش فرصه للى انتى بتقولي عليه ده

هانعمل ايه قوليلى ما فاضلش عليه غير انى اقطعه حتت بقى ساعات اقول لنفسي يعنى هاتبقى انتى والدنيا عليه

وساعات باحس باستهبال غميق من بتاع الرجاله وفى هذا الوقت بيحصل ما لا يحمد عقباه

بصي انا الى نفسي فيه وهامووووت عليه الاجازه الاسبوعيه يا اختي

بس عندي مشكله
ان انا لو سبتله العيال هاينزلهم لماما ولما ارجع هاخد دش سخن من امي وابويا
ههههههههههههههههههه

هانفذ بقى الموضوع ده لما اعزل من هنا


اسمعوا كلامها يا ولاد

بس ماحدش فيكم يطلق مش عايزين دوشه

اه يا خالتي ماهو مش كلهم حسبوا باشا
ههههههههههههه

صبرني يارب يقول...

سمسم

ااااااااه مثلااااااااا اهو دي نسيتها

ايوه كده لعلعوا بقى

وبس يسميه الاسم الى هو عايزه

بعد ما انتى تربيه وتخليه راجل وبشنبات

هو يفتكر انه له ولاد ويجى بقى يقوله انت لازم تدخل كلية كذا يا ابن الهوهو عشان تساعدنى فى الشغل
ولما الواد يقول لا

يقولها تربييييييييييتك يا هنام

طب وانت كنت فين يا معلم فى مراجيع السبتيه طبعا

نورتي يا سمسمه

عاشقه الرومانسيه يقول...

مش متجوزه
خلينى قاعده لكم كده
ارتحتى؟
حرام عليكم عقدتونى


بس تصدقى ؟
عندك حق ياصاصا
والمسئوليه شئ مش سهل

شوكولاتة يقول...

يالهوي هو الجواز منيل بالشكل ده
بالطريقة دي أنا لاممكن أتجوز أبدا أمبوسيبل خالص ليه ده أنا لسه في عز شبابي

تسلم إيدك بوست يجنن

مسدس صغير يقول...

دا انتى عايزة اللى عندها جوز تقطعه وتوزعه على الجمعيات
ههههههههه
بس الموضوع مش كده
مهو بردة الراجل بيشتغل عشان يربى عياله وعيالها مش عيال الشغالة
يوم ما الشغالة تقرفه هيطردها
انما دى يوم ما تقرفه هيطلقها وتمرمطه فى المحاكم
ههههههه

يلا بقى انا عارف انك بتهدى النفوس
ههههههههه
متشكرين على البوست ده
وخليكى فاكراها
ههههه

حاسوباتيه يقول...

هههههههههههههههههه طول عمري بقول الجواز شر لابد منه انا صحيح لسه على البر بس خايفه مووووووووووت من الجواز بصراحه وناويه اعمل بوست عن كده لاني مالقتش اي حد بيشكر في الجواز ده وجع دماغ والله

صبرني يارب يقول...

عاشقة الرومانسيه

لا لا انتى بالذات هانجوزك عشان نقتص منك الى بتعمليه فينا
هههههههههههههههههههههه

هانكتفوكي ونجوزوكي من غير ما نعرفوووووكي

صبرني يارب يقول...

شوكولاته

طيب ما احنا عايزينك فى عز شبابك عشان ناخد عزه يا بطه
هههههههههههههههه

لا يا بنتى اتجوزي بس خلي بالك تتحولي للنموذج ده طول حياتك

صبرني يارب يقول...

مسدس صغير

يعنى انت مش لاقي غير الفرق بتاع الطرد ده
يا ساااااتر على كده

يعنى انتم معترفين ان الميزه الوحيده ان المحاكم فى الجواز اكتر من محاكم الشغاله

بسسسسسسس
ههههههههههههههههههه


وبعدين توزعه على الجمعيات ليه
تجبهولي وانااعمله حواوشي
هعععع

صبرني يارب يقول...

حاسوباتيه

لا لا لا انا مش باحب اعقد الناس كده والله

والجواز مش شر والله ولا حاجه وانا باشكر فى الجواز دايما والله عمري ما قلت عليه كده
ههههههههههههههه
انا اولا باهزر فى البوست يعنى باعاكس الرجاله شويه

وكمان برضه عايزه الفت نظرهم ما يستهبلوش

والفت نظر الستات انهم ما يبقوش هبل اوي ويحاولوا يشيلوا كل حاجه على راسهم لانه مش فى مصلحتهم


انما اتجوزي يا جميل وربنا يوفقك

الجواز سكنى وموده ورحمه

روحي اقري بوست آية الجواز فىالرؤيه الاسلاميه

مصري جدا يقول...

صاصا

كل دي ملاحيظ

عموما اللي كتب يمسح

بس بصراحة

اؤيدك بقوة تسعة ريختر

وتعيش نايبتنا صاصا

زومبة عالماشي

انتي كدا تعديتي على اختصاصات الست الريسة

وكدا غلط

اعملى الاول لجنة سياسات للجمعية وهوبا كلوبا
تبئي الريسة بدل النايبة

صبرني يارب يقول...

مصري جدا

يعنى ايه الى كتب يمسح دي ؟؟

وبعدين خالتي ستيته على راسنا يا اخويا ما تقدرش ت وقع بينى وبينها

هع هع هع

تعالى يا ستيته والنبى ومعاكي واحد كبسه وصلحه
ام رز ولحمه نيهاهاهاها

عمرو يقول...

تصدقى بالله يا أم خالد
قولى لا اٍله اٍلا الله
بقالى حوالى 10 دقايق بأفكر فى رد معقول على كلامك أدافع به عن الرجال و موقفهم الزوجى بصراحه مالاقيت كلام ينفع :)
و بصراحه أكتر مااتعودتش أدافع بالباطل عن أى قضيه ..
بصراحه أنتى عندك حق ..
بس يعنى بيشفع للرجال نوعا ما أنهم برضو متحملين .... متحملين أيه ؟؟
و لا حاجه ..
ما هم لازم يشتغلوا و يتعبوا و يشربوا المر علشان بيتهم و عيالهم ما هو ده الطبيعى :)
بأقولك أيه
صباج الخير يا أم خالد

Che يقول...

بمناسبه ان البوست عن الشغاله و الزوجه هرد عليكى بشويه امثال
اللى مفسه فى العسل يستحمل لسع النحل .... مهو كل البنات عارفين كده و مع كده بيتجوزوا برضه .... ليه يعنى
و فيه مثل تانى بيقول اللى بيحب الدح ... بس انا مش هكمل المثل ده ... و يالهوى على الامثال اللى ممكن تتقال
و لو هتردى عليا و تقوليلى ايه اللى رماك على المر .... يبقى اصبروا بأه و احتسبوا صبرك ده عند ربنا و ابقوا ادعوا علينا و انتوا كاشفين راسكوا ... بس ماتنسوش تبقى متوجهين ناحيه القبله عشان يبقى الدعا شرعى .... ههههههه
على فكره .... انا بهزر انا كمان

يا مراكبي يقول...

بوست جميل

:-)

على فكرة كده إنتي هتخلي الرجالة تفضل إن الزوجة تكون بتشتغل خدامة .. دي طلعت حاجة لقطة بجد

:-)

صبرني يارب يقول...

استاذ عمرو

هههههههههههههه تصور قعدت اضحك اوي

اصل لما يبقى استاذنا بحاله مش عارف يدافع يبقى انا زنقتكوا فى خانة اليك


هههههههههههههههههههه

هو انا قلت الرجاله ما بيتعبوش بس ما بيقدروش تعب الستات بجد
وما بيحاولوش يخففوا عنهم ولو بالكلام

نووووووووووووووووورت
وصباح الهنا والخير ان شاء الله

صبرني يارب يقول...

che

ده فى ناس بتلعب فى عداد عمرها


انا ارد عليك بقى واقولك هو فين يا اخويا يا العسل والدح ده

وان كان فيه مالوش هو يعنى فى العسل والدح عشان يستحمل قرص النحل

ولا احنا بس الى نشيل القرص

وبعدين كل واحد فيكم بيبقى عامل ملااااااك على البنيه وهاهنيكى وهادلعك والبحر طحينه والسما صنية بسبوسه والنجوم اللوز الى فيها
والحركات دي يا معلم

هانقطعوك هنا ان شاء الله

صبرني يارب يقول...

يا مراكبي

ويعنى هى بتشتغل ايه على الاساس ده يا فندم

ما قلنا ما حصلتش اهو
ههههههههههههههههههههههههههههههه

عايزين تقدير بس

مشاركه ولو وجدانيه دي بيوتكم زي ماهى بيوتنا

بسسسسسسس

حضرتك نووورت

Appy يقول...

طيب اياك اسمعك بتقولى عاوزه افرح بيكى

صبرني يارب يقول...

آبي

انتى بالذاااااااات هاجوزك يعنى هاجوزك

امال ناخد طارنا منهم ازاي يا اختي من غير ما نتجوزهم
ههههههههههههههههه

حـــواديت يقول...

حبيت بس اسجل حضور ومتابعة لمدونتك الى دايما مليانه حاجات حلوةوجميلة

اما عن البوست العظيم ده فأعتقد ان رأى واصالك كويس عن محور الخلاف الازلى بين الراجل والمراة ووجهة نظر كل طرف فى الاخر وانتقاده وتعليقاته لتصرفات الطرف الأخر
وراى انا المتواضع الى هو ولا حاجه التقدير للزوجة او الاخت او الام او المرأه عموما بيان وقت المحن الحقيقة وطبعا مقداره راجع على حسب اصل الراجل مش قصه حب خالص
وهنستنى منك البوست الجاى عن الراجل والالتزامات والضغوط الى مفروضه عليه علشان اولاده وبيته وعلشان الحياه تستمر خلينا نعرض الامور فى كفتين ميزان قدام الناس ودايما الراى الاقرب للصواب هو الى فيه كفتين ميزان متساوين على اساس ان الميزان المتساوى فى الاراء اساس للعدل
عموما كان يهمنى اوى اسمع واشوف تعليق ابو رياض هنا على البوست الجميل دة بالذات - تحياتى والى الامام دايما بمقالات جميلة كده

و بدون اى تعليق على حكايه الست المتووحشة دى عفوا قصدى جمعيه الستات الوحشةالحقيقة مش فاكر اسمها كويس ياريت تكتبى لنا عنوان الجمعيه دى فين علشان كلنا نعرف مكانها على كوكب الارض

حــــواديت

صبرني يارب يقول...

كده

ماشي ماشي انت معايا ولا معاه ياعم

عموما رضا لسه ما قراش بس نخليه يقرا مخصوص يعنى
هههههههههههههههههه

والستات المتوحشين ما تقلقش هاتعرررررررررفهم ان شاء الله

خلاص يا ابنى انت لعبت فى عداد عمرك

ماشي بس لما اكتب عن الرجاله ما امنش الجمعيه تعمل فيا ايه

بس هاكتب برضه ان شاء الله

نوووووووورت يا باشا

mahasen saber يقول...

بس تعالى هنا انتى بقيتى امتى عضوه فى جمعية المرأه المفترسه دى

شكلك هتعملى انقلاب منزلى ولاا ايه

اركز يا صبرنى وعد الى قواعدك سالما

mahasen saber يقول...

يا صبرنى يا جامده

بس الشغاله معندهاش الاسره الجميله ولاا الزوج الحنون اليى مهما حصل مش هيطلع مراته تشتغل فى البيوت عشان فى الغالب تصرف عليه

شفتى ان ممكن تكون الزوجه افضل من الشغاله فى حالات ازاى
....

بصى يا صبرنى وده ميمنعش ان الغالب ان المقارنه فى صالح الشغاله شبه دائما يعنى

Ahmed يقول...

ياصلاة النبي
لا والله؟ يعني المفروض اننا نصدقك الكلام ده (وش مزبهل ومش ممكن يصدق)

لو ديه الحقيقه مكنش انعزر ولا باع جرز

مكنش ده بقى الحال

دانا لما بمشي في الشارع مش بسمع غير صوت الست وهيا بتربي جوزها

مش بشوف غير هدومه بتترمي من الشباك


دا الواحج لما يروح يخطب واحده, ابوها بيقوله ياابني احنا بنشتري عبد لبنتنا مش راجل

من النهارده مفيش حكومه, فيه زوجه في البيت

صبرني يارب يقول...

محاااااااسن

الحقيقه انا مش عارفه انتم واخدين البوست على صدركم ليه كده
ههههههههههههه

هو احنا قلنا لا يا ستى ادينا موافقين على كل الاحوال

لا مافيش انقلاب ولا حاجه هو طول عمره بيسمع البؤين دول ومطننننننش

ولما قري البوست قالي هارد عليكى واقولهم ده هجص
هههههههههههههههههه

صبرني يارب يقول...

ابو العلا

بزمتتتتتتتتتك

طب انت لسه على البر ياعم لسه فى مرحلة دهن الكلام زبده ووالبحر طحينه


اطلع شوف كده استاذ عمرو بدر كده وشوف قايل ايه
ههههههههههههه

mahasen saber يقول...

صبرنى ما انا عارفه ان قلبك ابيض وانه مجرد هجص هههههههههههه

قوليلى اخبار الدراسه معاكى ومع العيال ايه
طوارئ زى ما انا شايفه البشر كلها عامله

حنعيش يعنى حنعيش يقول...

حقول فروق تانية عشرة برضة بس فى بوست عموما كالعادة اسلوب مميز وجميل

صبرني يارب يقول...

محاسن

لا والله يا جميل هو الهبل شغال من الناس اه

انما انا مكبره دماغي وواخدين احتياطنا من النضافه والتعليمات
والمدرسه بتاعة ولادي مدرسه خاصه والمواضيع هناك اهون كتير

احنا كمصريين بنطبل فى المطبل دايما

صبرني يارب يقول...

حنعيش يعنى حنعيش

ماااااااشي يااستاذنا هو احنا نقدر نتكلم
قول ياعم
ههههههههههههههههههه

احنا يهمنا

منور

همس الاحباب يقول...

ههههههههههه
ههههههههه
ملعوبة يا صبرنى
على كده انتى قائد التنظيم السرى
لجمعية المراة المتوحشة
هبلغ عنك
ههههه

أحمد حسن البنا يقول...

الفرجة على الافلام ليها شكل تانى معاكى بتجيبى منها حاجات توجنن ابقى روحى خدى هديتك من مدونتى وعلى الله تعجبك وماتفتحيش دماغى كنت عايز استاذن قبل النشر بس ماكنتيش موجوده

تحياتى ياام مريم

صبرني يارب يقول...

همس الاحباب

لا يا استاذنا

الريسه ستيته يا باشا
هههههههههههههههههه

بلغ شوف مين مستغنى عن عمره يجى ناحيتنا

صبرني يارب يقول...

احمد حسن البنا

والله انا متشكره خالص على الهديه

والواحد محرج مش عارف يشكرك ازاي

متشكره اوي تاني

ربنا يكرمك ويديم المعروف

طهر فؤادك يقول...

السلام عليكم ورحمة الله وبركاتة ,,,
موضوع جميل ومعبرا جدااااا
وياريت تشاركى معانا فى حملة نصرة الاقصى والموضوع بسيط جدا وياريت تشوفى موضوعى على مدونتى وتقوليلى رأيك.. رأيك يهمنى اكيدددد ..

صبرني يارب يقول...

طهر فؤادك

حاضر يا باشا عنيه هاروح اشوف ايه الموضوع

ابتسامة حزن يقول...

والله عندك حق فى كل كلمه قلتيها
تسلم ايدك
ياريت عاجبهم
شطرين بس فى الاماره وطولت اللسان

صبرني يارب يقول...

ابتسامة حزن

اكيد مش كلهم يا ابتسامه

بس خلينا نقول ان اغلبهم مش شايفين الحقيقه كويس

Anonymous يقول...

هو حضرتك يامدام شيماء متعرفيش ان الخدامة دى بتروح تشتغل زوجة فى البيت تيتو

صبرني يارب يقول...

طيب يعنى احنا مش خدمات يا سيدى

ولا هاتمنوا علينا بنعمة ربنا كماااااااان

نورت يا تيتو

samamasr يقول...

يعني الجواز

فيه ممكن راحة نفسية,وحب وتقدير


ولا,عدم تقدير:(