الاثنين، 26 أكتوبر 2009

تجمع مدونين فى المنصوره (تحديث تاااني انضمينا لخيخه )


خيخه اخدت راي الناس يا جماعه وقالت اوووك هاتيجى المنصوره وعلييه
فاحنا كده استقرينا على يوم الجمعه الجايه الموافق 6/11/2009
واي حد عنده اعتراض هاعوره بقى
وبالنسبه للترتيبات ادوني فرصه بقى اكلم الناس وارتب نفسي وارد عليكم بتفاصيل وترتيبات اليوم
ما اسمعش صوت حد فيكم بقى
****************************************************************
تحديييييييث : جرى البحث مع خيخه يا جودعان عشان نوحد اليوم
يعنى هى عندها تبرع بالدم يوم الجمعه الي بعد الجايه ان شاء الله يوم 6/11
فبما اننا ان شاء الله ناويين على تجمع فى المنصوره كان المفروض يوم السبت 7/11
فقنا نضرب عصفورين بحجر واحد
ونجيبهم فى المنصوره عندنا نشربهم شاي وناخد منهم دم
ههههههههههههههههه
وخيخه قالت هاتعمل عندها على المدونه استطلاع راي
الى موافق على انه يروح التبرع بالدم فى المنصوره يتفضل برفع يده
مواااااااااااااااااااافقه
هاتلاقوا الاستطلاع هنا يا قوم عند
على ايدك اليمين وانت داخل كده
***********************************************************************************************
سلاااااام عليكم


ازيكم يا حلوين


الحقيقه انا قلت بقى الى ما نعرفش نروحلهم نجيبهم هما لحد عندنا بالعاااااافيه


لا لا بالذوق يا حلوين وعلى راسنا


المهم انا سبتكم اهو تعملوا كل التجمعات بتاعتكم وفاتيما قالتلى ادينا فرصه ناخد نفسنا شويه من التجمعات


بس لقيت مسدس صغير بيقولي ان فى مجموعة مدونين عايزين تجمعوا فى المنصوره فنوحد بقى اللقاء وكده يعنى


المهمممممم بعد المداولات بينى وبين مسدس صغير وداليا قوس قزح


اليكم كل الاقتراحات الى توصلنا لها وعليكم انتم بقى تختاروا عشان انا احترت


اولا بالنسبه لليوم

فاحنا استقرينا على يوم السبت 7/11

الى هو السبت الى بعد الجاي ان شاء الله


ثانيا بقى الاقتراحات بالنسبه لليوم نفسه هايبقى ازاي


مسدس صغير قال كفايه مجرد لقاء نتعرف على بعض ونقعد مع بعض شويه عشان الوقت والناس الى مسافرين


قوووم داليا قوس قزح قالت كلا البت لازم نشاط خيري


قوم انا روحت لخيري قصدي لجمعيه رساله الخيريه وسألتهم على الاماكن الى ممكن زيارتها فى المنصوره ويكونوا محتاجين فعلا مساعده


اكتشفت الآتي


ان الملاجيء عندهم فلوس بس الى ماسكينها حراميه وحاجه زفت على الاخر


وناس كتير بتروح وبتودي حاجات عينيه كتير للعيال والعيال محتاجين بس توجيه يعنى حد يدوام على زيارتهم ويعطف عليهم ويوجههم

سواء ملجأ ا لكبار او الصغيرين


دار المسنين كذلك المشكله مش ماديه برضه برضه محتاجين زياره بس وكده


المهم قالتلى ممكن تروحوا مستشفى الاطفال بيكون فيها مثلا من 160 الى 180 حاله

بيكون منهم حوالي 100 حاله محتاجين مساعده ماديه او علاج


وبنعرف من خلال كلامنا معاهم وسؤال الناس الى بتشتغل فى المستشفى نفسهم

وبناخد معانا العاب بسيطه كده واحنا رايحين بالونات حاجات كده وهانروح تحت شعار الجمعيه هناخد منهم حد معانا عشان يجيبولنا التصريح بالزياره طبعا



وكمان قالولي فى جمعية رساله انهم بيعملوا حاجه اسمها قوافل الخير بيشتروا حاجات مواد غذائيه وسلع معمره وجهاز للعرايس وحتى كمان مواسير مايه وحاجات كتير اوي ويروحوا بالعربيات دي على بلاد كامله تحت خط الفقر منسيه

موجوده على حدود المحافظات وفى الادغال

ومش عندهم خدمات ولا مايه ولا صرف ولا حد فاكرهم اصلا


وقالت لو تقدروا تساعدونا احنا بنجهز لقافله هاتتكلف 80 الف جنيه وعرضت عليا اننا ممكن نروح معاهم فى موضوع القافله ده بس طبعا ده بهدله يعنى ما ينفعش يوم التجمع لانه سفر تاني اصلا



صلاح العمري بقى الى هو مسدس صغير اصحوا معايا


اقترح ا ننا نتقابل فى اي مكان ونتغدى سوا وكده ونزور مقر الجمعيه او حد فينا بس الى يروح يسلم التبرعات الماليه الى ربنا يقدرنا عليها للجمعيه لموضوع قوافل الخير


وبلاها الزيارات الى هتاخد وقت وتعطل الناس الى جايين من سفر وفى نفس الوقت فى حاجه مفيده فعلا وناس محتاجه فعلا



وبالنسبه لباقي اليوم

احنا نبدأ اليوم الساعه 11 عشان الى مسافرين يلحقوا يجوا


ولو هانعمل زيارات طبعا هاتكون الاول ونقول نخلصها على الساعه واحده


ونروح اي مطعم قريب نتغدى وزي ما تحبوا بقى لو تحبوا نروح نادي الاطباء مثلا نقعد شويه او اي مكان تقترحوه بالنسبه للناس الى من المنصوره يعنى عارفين الاماكن يقترحوا عليا


وبعدين على الساعه خمسه نقولكم روحوا بقى كفايه عليكم كده

هههههههههههههههه


ولو روحنا مستشفى الاطفال اليكم المطاعم القريبه المقترحه


جرين كورنر _ كنتاكي _ بيتزا استيشن _ كوك دور _ مؤمن


مترتبين حسب الاقرب من المستشفى


بالنسبه للاسعار تقريبا كلهم قريبين من بعض من 25 كده وانت طالع


شوفوا بقى هاتعملوا اييييييه عشان انا احترت بقى ومش عارفه اختار


عايزه اخد قرار فى خلال يومين عشان استقر وابدأ ارتببببب


يلا بقى سمعوني رايكم بسرررررعه
اه وما تعشموش نفسكم بالصوره الى فوق دي عشان الهدوء ده مش موجود بتاتا
دي تلاقيها متصوره الفجر مثلا

هناك 114 تعليقًا:

Soul.o0o.Whisper يقول...

طبعا أحجز أول تعليييييييييييييق

Soul.o0o.Whisper يقول...

لا طبعا ...

مش موافقة ،

لا بجد ما ينفعش كدا !!!!


يعنى بذمتكم يرضيكم؟؟؟؟

Soul.o0o.Whisper يقول...

لاااااااااا

لاااااااااا

لااااااااااا



كلا البتة
و الوزة كمااااااااااااااان

Soul.o0o.Whisper يقول...

و بما إنى أول تعليق فأنا أعلن أحتجاجىىىىىىىىىىىىىىىى
الرسمىىىىىىىىىىىىىى
النظمىىىىىىىىىىىىى
الفهمىىىىىىىىىىىى

Soul.o0o.Whisper يقول...

و ياللا غيروا المعاد بسرعة

أحسن الدنيا بتشتى
و كمان المغرب بيأذن

و أدعى عليكوا

Soul.o0o.Whisper يقول...

عاوزين لقاء تخلوه يوم جمعة

هو اليوم الوحيد الفاضى عندى

Soul.o0o.Whisper يقول...

أنا يا أمى بأخلص شغل الساعة 4

يعنى حتى مش هألحق أسلم على الناس اللى هتمشى الساعة 5

ستيته حسب الله الحمش يقول...

شوفي يا مودموااااااااازيل صبصب
انت عقلك يوزن بلد
وعليه اختارم مع بعض يا بتوع المنصورة
والعبوا مع بعضيتكم واحنا علينا التنفيذ
بالمناسبة انا من اشد المهتمين والمعجبين بأداء جمعية رسالة ومتابعة جدا
وقوافل الخير بتاعتهم اللي يشوف صورها يحزن ان فيه مصريين عايشين من غير سقف ولا صرف ولا انابيب مية
بيروحوا يعملوا لهم كل ده ثم بيعملوا عندهم معرض خيري لملابس التبرعات ووالله حاجة تفرح
بالمناسبة يا قوم
مرة حد قريب لي كان ها يتبرع هناك بثلاجة وغسالة مستعملين
وقال انا عاوز اللي تاخدهم عروسة من الأيتام
تعرفوا ردوا قالوا ايه؟
قالوا جهاز البنات اليتيمات بيكون جديد تماما يا فندم
ومش بنعرف خطيبها انه تبرع
لكن احنا ها نشوف نقدر نطلع ازاي فلوس من الحاجات بتاعتك سواء ببيعها قطعة واحدة او قطع غيار وها نحط الفلوس في تجهيز يتيمة
شيء مشرف صحيح
ورسالة من الجمعيات اللي اجمع عليها الناس على مختلف أهواءهم
ربنا يكرمهم ويبعد عنهم الفساد
مساء الفل يا صبصب

Soul.o0o.Whisper يقول...

ياللا مستنية تغيير المعاد



ياللا


ياللاااااااااااااااااااا



لسه؟؟؟

Soul.o0o.Whisper يقول...

دا أنا لسه يادوب مخطية باب البيت


قال يوم السبت قال


و الساعة 11 كمان





هزلتتتتتتتتتتتتت

بنت قلبى يقول...

اخيييييييييييييرا

رغم ان خايفه من الميعاد دا بس ربنا يسترها بجد

ومن نحيه اللقاء لو ربنا كتبلى اكون موجوده فا ان شاء الله هكون موجوده

ومن نحيه التبرعات
انا معاكو طبعا بس هتلاقى كتير هنا هحتجو عنها
بصى بلاش اسبق الاحدث
انا هتابع الردود لالاخر واشوف اخر كلامكم ايه
ومن نحيه انى من المنصوره فا منها بس المسافه الا بينها وبين بيتى نص ساعه فا امرها سهل

فاتيما يقول...

صبصب
و دوللى
و صاصا
الف شكر على الترتيبات دى
بس .........
اولا
انا معترضة على المعاد يا ماما
التبرع الخيخى يوم 6/11 يا بشر
يبقى الجمعة فى التبرع بالدم
و السبت سفر من صباحية ربنا ؟!!!
ثانياً
يا ريت يكون يوم جمعة يا صبرنى
عشان العالم اللى وراها شغل
و بيسافروا بيبقى حالهم اجارك الله
انا المرة اللى فاتت رجعت من اسكندرية مفشفشة
انا عضمة كبيرة با اخوانا
راعوا ظروفى يا تسفرونى فى عربية اسعاف بقى ....
ثالثاً
انا قولت ناخد هدنة من اللقاءات
مش بس من جهة المواعيد
لأ كمان الناحية المادية
يا جماعة
مش هنقدر كل مرة
يكون عندنا قدرة و ميزانية
انا شخصيا ميزانيتى الشهر دا
متنيلة خالص
و مش معقول هاجى عشان
اتفرج عليكو ؟؟!!
مش عارفة ما هو الضرر
يا قوس قزح
يا وش الخير
يا حبيبتى
يا دوللى
إننا نخلى السفرية دى للتعارف بس
و نخلى المرة الجاى لنشاط خيرى
احنا كدا ممكن نخلى ناس متجيش
بسبب الحكاية دى ..الاحراج يعنى
انا شخصياً هبقى محرجة جداااا مع انه عادى الواحد يبقى مزنوق مش عجبة
بس حاسة إننا كدا مبنشجعش الناس
اكتر ما بنخليهم محرجين
حضروا او محضروش
طب انا عندى جرأة الأفصاح عن انى مفلسة الشهر دا ...
بس حد تانى معندوش البجاحة بتاعتى دى
يا قوس قزح
يا حبيبتى
انا عارفة انك مش هتفهمينى غلط
و هتقدرى
انا بقترح زيارة لدار المسنين
و القعاد معاهم ..
يعنى دعم معنوى
بس خلوا بالكم الوقت هيجرى بينا
صاصا اقتراحه اقرب شىء
نبعت حد بالنيابة عن المجموع
بالتبرعات ....
اهم حاجة بقى
عشان دى منكن تضيع فيها رقاب
نادى الاطباء دا فيه فيسكافيه
على رأى سوووو الله يمسيه بالخير
عشان انا من دون الفيسكافيه بتحول لمخلوق اسطورى زائغ العينين
يا ريت تغيرى المعاد يا صبصوبتى
و النبى
و عموما مفلسة
مفلسة هاجى برضو
بس ابقوا لمولى
عشان اجرى ورا الأتوبيس
خالص حبى يا حبيبتى
انتى
و وش الخير
و صاصا

الشعب لابد له من حكومه تشكمه يقول...

انا جييييييييييييت فيها لاخفيها:)
معاكو ان شاء الله دا حتى عيب بياه فى المنصوره ومنرحبش بالناس الجميله دى دحنا نروح نقف لهم على محطه السوبر جيت بورده وونقولهم حللتم اهلا ونزلتم سهلا وازيكن ازيكن احنا فرحانين احنا مبسوطين:)

المهم ندخل على المفيد بالنسبه لموضوع التجمع سواء كان خيرى او غيره انا معاكو بس واضح ان فى انقسام للاراء.بس معاكو فى جميع الاحوال ونشوف راى الاغلبيه.

بالنسبه للمكان باه:
شوفى ياصبصب ارجوووووووووووووكى بلاش طلخا:( انتى مش من المنصوره ولا ايه انتى مش عارفه مأساة اى تاكسى علشان تروحى طلخا؟؟؟؟؟
وبعدين الناس جايه عاوزه تشوف المنصوره نوديهم مكان ملوش علاقه بالمنصوره؟؟؟؟؟؟؟
عازين نشوف اى مكان على النيل مثلا مش عارفه ايه هو بس من بداية الهابى لاند ولحد مقر الحزب الوطنى مفيش اى مكان ينفع للقعده؟دا حتى فى مكان كده كله شجر وعلى النيل جمب الحزب الوطنى علطول وشكله حلو..
شوفوا كده .
بالنسبه للغدا ابعدى عن جرين كورنر:)
اولا صغنن وثانيا احم احم بلاش تكسفينا ادام الاجانب اكله مش حلو اوى:)
خلينا فى مؤمن واسع واكله حلو او كوك دوور,كنتاكى برضه حلو وواسع .
ونأكلهم ايس كريم من عند الصياد او البارون كمان :)

الشعب لابد له من حكومه تشكمه يقول...

اه صحيح الملاجئ للاسف كلها سرقه فابعدوا عنها والتبرعات للاسف مش بتوصل للاولاد,تعرفى ان والدتى كانت لما تودى وجبات او لبس وتصمم انها توزعها على الاولاد بنفسها وتقعد تأكلهم كان البهوات المسؤلين بيرفضوا ده.وكانت والدتى تتخانق معاهم وتقول اوزعها عليهم بنفسى...
للاسف بياخدوا الحجات دى من الاولاد.فبلاش موضوع الملجا ده.

بـــــسمة انـــــــــور يقول...

يا جمااااااااااااعه

انا معاكم اينما كنتم الما فى المنصورة
وتمام اوى يوم السبت على فكرة
اقولكم لو فى اعترض على يوم السبت يريت يكون السبت او الاثنين او الاربع لان دى اليام اللى بكون فيها فى المنصورة غير كده مش مسموحل اروح المنصورة
بلييييييييييز خلو التفاوض حول الايام دى نفسى اكون معاكم

وعلى العموم انا هتابع الاكومنتت ويارب توصلوا لقرار مناسب ليا لان ظروفى ملخبطه على الاخر الايام دى

ف انتظر القرار النهائى يا قمرايتى
على فكرة وحشانى مووووووووووت

bos bos بسمه عبدالباسط يقول...

أخيييييييييييرا حاجة فى المنصورة هييييييييه جاية إن شاء الله

أقتراح فاتيما كويس أننا نتعرف المرة دى ونروح مثلا دار المسنين ولأن الوقت ممكن يضيع مننا وكمان علشان موضوع الاحراج فى الفلوس للناس اللى مفلسة

وبالنسبة للأماكن اللى ممكن نروحها هو أحنا ممكن نروح كمان جزيرة الورد اللى فى المشاية هو أنا يمكن ما روحتهاش قبل كده بس أسمع أنها حلوة قوووووى

منتظرة باقى التفاصيل والأتفاقات

الشعب لابد له من حكومه تشكمه يقول...

اه انا برضه كنت اقترحت على صلاح جزيرة الورد لانى سمعت ان فى لقاء من سنتين حصل فيها وبيقولوا حلوه ,مش انا من المنصوره بس عمرى مدخلتها هههههههههه..
واهى برضه على النيل...وفى نص البلد وقريبه من كل حاجه..
فلو حد دخلها يقول ايه النظام جوه او انا ممكن اخطف رجلى واروح اشوفها دى هناك اهى 5 دقايق:)

bos bos بسمه عبدالباسط يقول...

أيوة فعلا انا سمعت انها مش حلوة بس دى رااااااااائعة وكمان الكورنيش جمبها اكتر من رااااااااائع والمكان أعتقد انه جمبه كافيهات واماكن للاكل والشرب كتير انا يمكن معرفش المنطقة كويس لانى مش فى المنصورة نفسها ولكن اعتقد كده

بنت قلبى يقول...

اولا فكره فاتيما حلوه
وانا برضو معاكم فى الحالتين
ومن نحيه جزيره الورد
انا ذات نفسة روحتها 3 مرات
هيا عباره الاول على انك هتدفى تذكره بجنيه باين
وجوا نظام جننه كبيره اوى اوى وفيها حمام طبعا وفيها مراجيح لالاطفال وعلى الجمب زى كراسى كده خشب على النيل تقعدوا عليها وعاديه بس جميله وهاديه علشان الايام دى دراسه وكده
من راى انها حلوه برضو اوى

بـــــسمة انـــــــــور يقول...

اولا
انا فقه على راى ماما فاتيما
وكمان وحديقه الورد هاديه وجميله وممكن نركب مركب فى النيل وبعيد عن الدوشه
انا موافقه

حددوا اليوم المناسب بس ياريت يكون سبت او اتنين او اربع

صبرني يارب يقول...

طيب اعمل انا ايه دلوقتي

بسمه عايزه سبت
وسول عايزه الجمعه

والاثنين مطلعين مطاويهم عليناهههههههههههههههه

وبالنسبه لخيار جزيرة الورد انا ما اعرفهاش الحقيقه ما دخلتهاش قبل كده

الى دخلوها بقى يحكموا

بس لو روحنا يوم الجمعه هاتبقى زحمه احتمال يعنى


بسمه انا مستعده اكلم ماما وبابا واتحايل عليهم انا
هههههههههههههههه

صبرني يارب يقول...

وبالنسبه للنشاط الخيري بقى

انا موافقه على خيار اننا ما نروحش زيارات ميدانيه

عشان ظروف الناس العديده

وكفايه عليكم مصاريف الرحله اصلا

ولو حد يحب يتبرع يبقى هانجمع التبرعات لصالح جمعية رساله عشان قوافل الخير زي ما قلنا وكده يعنى

شوووووووفوا برضه ونعرف باقي الاراء

بـــــسمة انـــــــــور يقول...

خالتو صبصب يا حبيبتى
نوبروبلم هتنازل عشان خاطر الغالين بس ماليش دعوة بقى لو لاقيتينى بقولك هروح معاك عشان امى هتكون ردتنى بقى بس هه
هههههههههههههههه

خلاص حددوا بس وانا هتصرف عندى واتعامل معاهم هنا

بـــــسمة انـــــــــور يقول...

اه على فكرة برضو
جزيرة الورد بيقولو هاديه او بصى انا دخلت حاجه كده فى مرة بس مش عارفه هى دى جزيرة الورد ولا لاء
بس بجد كان مكان جميل وهادى

حنين القلب يقول...

ربنا يتقبل منكم ويجعل كل لحظه فى اليوم فى ميزان حسناتكم

صبرنى كان نفسى اجى معاكم اووووووووووى
وحشتينى

مسدس صغير يقول...

شفتى بقى يا صبرها هانم
احنا نخليه يوم من غير زيارات
وممكن نعمل موضوع الاظرف المغلقة لو حتى الظرف فاضى من غير كتابة اسماء على الاظرف وانا متبرع انى اخدهم واهرب قصدى اخدهم واوديهم مثلا جمعية رسالة
بالنوسبة للموكان ممكن جزيرة الورد هيه حلوة اوى بس مش عارف نظام الدفع والاكل والشرب ايه ياريت حد يعرفلنا ويقولنا ولو لقينا الدفع مناسب نتفق عليها ان شاء الله
بالنسبة لليوم
يوم السبت مناسب اوى لأنه أجازة ومش اجازة اجازة الناس هتعرف تفضى نفسها فيه
ومش اجازة بالنسبة للمواصلات من كل مكان هتبقى شغالة لأنه بردة فيه حركة شوية عن الجمعة
غير كده جزيرة الورد يوم الجمعة هيبقى زحمة
انما يوم تانى زى السبت مش هيبقى زحمة
انا مع فاتيما فى مسألة الفلس دى
هههههههه
انا يمكن يكون معايا فلوس دالوقتى بس يوميها مضمنش نفسى
هههههه
وطالما التجمع الخيخى يوم الجمعة ممكن نخليه السبت اللى بعديه
كلمى فاتيما ورتبى معاها
لو ممكن تيجى السبت اللى انتى قلتى عليه خير وبركة
لو مش هينفع بس هتيجى السبت اللى بعده يبقى اهلا وسهلا واهلا ونخلى المعاد اللى يناسبها
دا المنصورة كلها تنور
يلا بقى اسيبكو تتشاكلو
وبالنسبة لسول متقدريش تيجى السبت خالص؟
وبالنسبة لستيته تنورينا والله
وبالنسبة لشيما انتى ممكن تسألى عن الاماكن دى بسهولة وتشوفيلنا مكان مناسب سواء الحزب الوطنى الاخوان المسلمين التفجير والهجرة مفيش مشكلة
هههههه
يلا سلامى ليكو كلكو

مسدس صغير يقول...

حد اقترح عليه نادى النيل بردة
شوفو ايه نظامه وممكن نروحه

Anonymous يقول...

هو انا من حقي التصويت
في جنينة قدام مارشال الجزيرة
بس يا ريت المواعيد تتأجل شوية
ممكن تفصلوا بين النشاط الخيري والتجمع
تخلوها يومين




تامر

صبرني يارب يقول...

تامر

كل الناس تقدر تصوت وكل الناس تقدر تيجى مش المدونين بس

وهانشوف هانوصل لايه

صبرني يارب يقول...

ما حدش متفق على حاجه هاتجنوني كده

ههههههههههههههههه

اظاهر انا هاعلم الاحكام العرفيه واختار انا واقرر كل حاجه

الشعب لابد له من حكومه تشكمه يقول...

ليه بس زعلانه انا مش شايفه ان فيه مشكله.
اولا الميعاد فى شبه اجماع لان يوم الجمعه هيكون زحمه عموما فى اى حاجه.السبت كويس وشغال.

هى المشكله فى المكان ودا شئ طبيعى احنا بنحاول نوصل لافضل مكان يعنى الاقتراحات مفيده...

بالنسه لنادى النيل هو كويس وعلى النيل علطووووول بس اللى اعرفه انه للاعضاء اول مره اعرف انك ممكن تدخله عادى, يعنى انت تكون عضو وتدخل الباقى بتذاكر معاك كانت التذاكر من فتره طويله ب 5 اعتقد انها اكيد رفعت دلوقتى.بس هو عموما كويس ونضيف .

صبرني يارب يقول...

اه نادي النيل حلو

انا قلت لصلاح يستفسر عنه

لكن لا مش بخمسه جنيه

كان ب 2 جنيه بس

وانا كنت باروحه بتذاكر عادي لحد مااتخانقت معاهم خناقه فله اوي
هههههههههههههه

وهاخدكم بقى ونروح هناك وابقوا قولوا انكم تبعي

واليوم واضح هاناجله عشان يوم التبرع بالدم

لما نشوووووف


انا مش مضايقه ولا حاجه يا جميل انا باهزر

فاتيما يقول...

صبصب
واضح ان الجمعة قلق
طيييييييييب
خلوها السبت زى ما هيا
بس السبت اللى بعدهالله يكرمك
يوم 14 نوفمير يعنى نكون رايقين
اصله مينفعشى اخرج يومين الاجازة
ورا بعض
و متهيألى مش الكل كمان هيقدر
و شايفة ناس بتؤيد التعارف المرة دى و النشاط الخيرى المرة الجاية
ممكن نمسك العصايا من النص
و نبعت الواد صاصا يهرب بالفلوس على لندن
قصدى على جهة التبرع
و يرجعلنا
المكان دا مش هتكلم فيه
عشان انتوا لو قعدتونى معاكم
على الرصيف
انا هبقى مبسوطة
و سعيدة
و ميت فل و اربعاتشر ....
خالص حبى يا صبصبوتى

صبرني يارب يقول...

ايوه تمام كده يا فاتيما

خلاص

يبقى ان شاء الله السبت الى بعده فعلا

وكمان اقتراح لم تبرع لرساله ده برضه كويس

والمكان بقى مستنيه صلاح بيسأل على نادي النيل وهايرد عليا

ورصيف ايه يا جميل

وانا موجوده

ده انا اجيبكم عندي البيت نشيلكم على راسنا يا باشا

خلاص ان شاء الله على بالليل كده انزل تحديث بالاتفاق الى هانوصله

الشعب لابد له من حكومه تشكمه يقول...

هتعملةا اللقاء يوم ماتش مصر والجزاير ؟؟؟؟؟؟؟؟؟؟؟؟؟ هههههههههههههههههههههه.
فاتيما هتتبهدلى فى المواصلات لو خرجتى فى اليوم ده على فكره هيكون زحمه جدااااا فى القاهره والسوبر جيت, دا غير انى اصلا اخاف اخرج من بيتنا الشباب بيتهوروا بعد الماتشات دى وفى شاشه عرض كبيره بتكون عند البارون اى من المكان اللى هنكون قريبين منه ومش عاوزه احكيلك ايه المنظر,:) وبعد الماتش محكيلكيش برضه :)

بنت قلبى يقول...

لو بجد هتعملوا الميعاد فى التاريخ الا قالت عليه ست الكل فاتيما
فا انا مسحوبه من الميعاد دا ومش الميعاد بس لا دا النت كله كمان
فا طبعا مش هعرف انتم اتقبلوت ازاى ولا عملتوا ايه ولا اللقاء كن نظام ايه
فا طبعا فى اى حال من الاحوال ربنا يبسطكم يارب

صبرني يارب يقول...

لا ماهو يوم 14 نوفمبر ده شكله مش نافع معايا برضه

يبقى هايتبعت للسبت الى بعده

الى هو 21

لان انا ولادي عندهم امتحانات فى اليوم ده ومن الصعب بمكان انى اسيبهم كده يواجهوا مصيرهم لواحدهم

وزاد على الموضوع الكلام الى قالته شيماء

بتاع الماتش يبقى اليوم مضروب بالنار فعلا


طيب يا مسهل تحديدا اكبر

صبرني يارب يقول...

بنت قلبي

ايه فى ايه مالك كده واخده الموضوع على قلبك كده ليه

عموما احنا لسه ما حددناش المواعيد فمش تشدي علينا يعنى

mahasen saber يقول...

يوم سبت طيب يا صبرنى ..شكلك مش عايزه تشوفى وشى

يا بنتى مش لما كنا بنتكلم وبقلك نظميلنا لقاء عندكوا نواحيكوا فى بلدكوا قلتلك يكون جمعه
جمعه يا بشر
ماله جمعه حاطينه فى دماغكوا ليه ..كل اللقاءات سبت سبت سبت
مفيش جمعه

صبرني يارب يقول...

والنبى يا محاسن انا عايزاه جمعه والله
نفسي يعنى

اولا لان السبت ده انا باذاكر للعيال الصبح

وثانيا لان عندي كورس الساعه سته

يعنى هارجع من معاكم على الكورس ومش هارجع البيت الا الساعه عشره
يعنى هاتموتوني يعنى

خلينا نشوف اخرتها ايه

فاتيما يقول...

أأأأأخ
مكنتش اعرف حكاية الماتش دى
كدا المسألة فعلا عاوزة
اعادة نظر عشان المواصلات
و البلد كلها هتكون قلق خالص
خلاص خلوها الجمعة يا جماعة
معنديش مشكلة خالص
الجمعة 13 نوفمبر
و لو قفلت قوى نرجع للمعاد القديم و على عيونى حاضر مجراش حاجة ابقى
اروح يوم التبرع بدرى شوية عن كل مرة
و منحرمشى منك يا صبصوبتى
انتى الكرم كله يا حبيبتى
و يا بنت قلبى
متزعليش بسرعة كدا
احنا بنتناقش اهو
و دا مش آخر كلام
خدى و ادى معانا يا حبيبتى
و ربنا يسهل
و نلاقى معاد يناسب الأغلبية
ماشى ؟
طيييييييب

صبرني يارب يقول...

والله يا فاتيما حيروني

شكلها كده هاتتبعت لحد 21 نوفمبر

عشان مصريييين على السبت

وبيقولوا يوم الجمعه السفر صعب

صلاح الى بيقول كده عليكى به بقى

والله هاسيب الموضوع كده لحد ما نحدد مكان كمان
وانشر معاد غير قابل للتغير

ونروح انا وانتى نقعد هناك ونشرب فسكافيه
ههههههههههههههههه

عمرو جويلى يقول...

السلام عليكم
أود أن أسجل رأيى فى جمعية
رسالة حيث أنها من الجمعيات
الأهلية الجادة جداًوالتى لهادور كبير فى المجتمع التى يتواجد فيه أحد فروعها
خالص تقديرى

الشعب لابد له من حكومه تشكمه يقول...

يانهارى لسه موصلتوش لحاجه هههههههههه.
طايب بما اننا بنتناقش فانا شايفه انكو لو بعدتوه اوى انتو متضمنوش الجو ولسه معرفناش نظام الشتا السنادى هيكون ايه فممكن بنات كتير متقدرش تيجى من السفر.
لان انتو كده بتتكلموا عن راس السنه يعنى على بداية شهر 12 .بس والله فكره نقضى اول يوم فى السنه الجديده مع بعض هههههههه.
اما نشوف هترسى على ايه.
على فكره ياصبصب احنا كده منجيش غير لما حد يشكمنا:)ياخد القرار ويريح الجميع:)تو كلى على الله انتى:)

صبرني يارب يقول...

اللؤلؤه

ايوه فعلا يا فندم انا شايفه كده برضه عن الجمعيه دي

ربنا يكرمك ونورت

وايه مش بتفكر تشرفنا فى المنصوره ولاا يه

صبرني يارب يقول...

شيماء

باقولك ايه

مافيش غير حل واحد على فكره

اننا نعمل اللقاء ده يوم السبت الى جاي ده على طووووووول

الى هو موافق 31 اكتوبر

ايه رايكم ؟؟؟؟؟

بسرعه يا جماعه ردوا عليا

لان يا كده يااما هاناجله لحد يوم 21 نوفمبر

باعته جامده اوي
والجو هايكون بقى برد والسفر والتجمعات هاتبقى صعبه

ماشي ولاايييييييييه
خلصوني وربنا هاتضربواااااااااااااااااااااااااااااااااااااااااااااااااااااااااااااا

Soul.o0o.Whisper يقول...

احم احم .... معلش على التأخير يا جماعة

بس حقيقى أنا مش هينفع معايا أى يوم إلا الجمعة

مين اللى قال ان السبت أجازة؟؟؟
هااااااا
يسمعنى كدا تاااااااااانى؟؟؟

ماشى يا مسدس يا صغير
لو سمحتى بئا الصغيرين يمتنعون :)

شوفى يا صبرنى
أنا يوم السبت دا معايا مش نافع خالص خالص خااااااالص

no

never

it is impossible

il est impossible

أقولهالكوا بأى لغة تانية؟؟؟

يا بنتى غير الشغل ، عندى محاضرات ماستر



على العموم لو مانسبش الكل غير السبت ،
فحقيقى أتمنى لكم يوم سعيد ...
و خيرها فى غيرها ان شاء الله ...



سلام

بنت قلبى يقول...

لا والله العظيم
انا ما افشتش ولا حاجه وحياه لا اله الا الله
بس كل الحكايه خفت انكم توافقوا على الميعاد دا
لانى من اول 10\11
مش هدخل النت ولا هعرف اخرج اخواتى جاين وهما اصلا منعينى من كل حاجه ولا خروج ولا كلام ولا اى حاجه خالص فا دا الا اقصده وكمان هيقعدوا 6 شهور
بس
فا الا اقصده من كلامى انى خفت الكل يوافق وكده لانى نفسى اكون موجوده معاكم
فا انا بقلكم لو انتم قررتوا على الميعاد دا
فا الله اعلم برضو
مش هعرف اخرج ولا حتى النت هتبعكم فيه
دنا صبوووووووووره خالص وروحى طويله وما بقفشى بسرعه
بس كل الحكايه انى متحمسه جدا انى اشوفكم بس

بنت قلبى يقول...

وكمان مننحيه الميعاد الا قليه دا
انتى لو قلتى قومى تعالى دلوقت هاجى
وانا برضو بقلكم معاكم لعند 10\11
وانتم حددوا انهى جمعه او انهى سبت

Lady E يقول...

يوم 7/11 كويس وهنكون لسه مدخلناش في الشتا أوي

وبالنسبة للأماكن فأنا بقترح جزيرة الورد لأن اي تاكسي هنسأله فين مكان جزيرة الورد هيعرف لكن نادي النيل اول مرة اسمع عنه (انا مش من المنصورة)

صبرني يارب يقول...

سول

طب يعنى ما ينفعش كده تخلعي من الشغل ولو ساعه نشوفك وتمشي ؟؟

طب حتى اخر ساعه فى اللقاء اي حاجه

ماانا والله يا سول مش عارفه خالص اظبطها

الناس الى جايين من سفر قالوا يوم الجمعه المواصلات وحشه

وبرضه وجود صلاة الجمعه فى النص هاتلخبط كل حاجه

فاهمه قصدي ولا ايه
وربنا انا عايزه الجمعه
السبت ده معناه ان انا هاتبهدل اخر بهدله ومش هاروح البيت الا الساعه 10 بالليل
بس وات كان اي دو

صبرني يارب يقول...

بنت قلبي
خلاص انا كده فهمت المشكله

انا فعلا شكلي هاعمله يوم السبت الى جاي ده على طول عشان نخلص بقى

وربنا يسهل واحنا نصيبنا

صبرني يارب يقول...

ليدى

جزيرة الورد دي انا اعتقد انها ما تنفعش

لسببين
اولا مافيش قاعده معقوله تكفينا كلها نظام كراسي على الكرنيش

ثانيا مافيش فيها مكان مقفول برضه اعتقد فى حال الدنيا مطرت هانتمخمط

ثالثا ممكن نروح يوم السبت نلاقيها مليانه ما لذ وطاب

فخلينا نشوف الاول نادي النيل احسن
بس هو يقضي

ونادي النيل كل التاكسيات عارفينه ما تقلقيش

نادي النيل جمب نادي الحوار على طوووول

كل الناس عارفاه هنا ما تقلقيش

بنت قلبى يقول...

طب الحمد لله انك فهمتى الا كنت عوزا اقوله
ويا جماعه من نحيه اى مكان هتقولوه اكيد اى تاكسى هيعرف اى نادى يعنى فى المنصوره
والموبيلات بتجيب اى حد
وربنا يسهلها ان شاء الله

الشعب لابد له من حكومه تشكمه يقول...

جيت اشوف وصلتو لايه واقولك بالله عليكى مش فيا حاجه لله لسه بقولك امبارح الشتا والمطر شوفتى انهاردا البرق والرعد والتلج اللى نزل عندنا فى المنصوره هههههههههههه.انا المفروض احط لسانى فى بقى شكلى اول مبقول كلمه بتتحقق:))

ولازلنا فى انتظار النتيجه:(
صعب انك تلحقى تجمعى الناس على يوم السبت الجاى علطول :(
شوفوا كده وامركوا لله يوم 7\11 اعتقد ده مناسب لكل اللى اتكلموا ,معلش يافاتيما فسحه فسحه يومين ورا بعض تغير جو يعنى:) لو مش هينفع ناجله برضه علشانك هو عندنا كام فاتيما.

الشعب لابد له من حكومه تشكمه يقول...

ليدى :
نادى النيل بعد نادى جزيره الورد بشويه بمعنى ياقمر هتقولى للتاكسى بوابه الجماعه اللى عند البارون وانا اجى اخدك ياستى شوفتى باه اى خدمه.دول خطوتين متقلقيش خااااااااااااااالص:)

Soul.o0o.Whisper يقول...

والله يا صبرنى مش هينفع خااااااالص

الخروج من بوابة المركز لازم يكون بتصريح ... دا أولا

ثانيا بئا إنى فعلا باخد تصريح يوم السبت عشان أحضر محاضراتى

يعنى للأسف مش هينفع ...

خلاص بئا ... ربنا ييسر و أشوفكم مرة تانية :)

و يوم سعيد مقدما


تحياتى

صبرني يارب يقول...

يعنى انتى السبب يا شيماء
منك لله يا مفتريه
ده انتى غرقتي البلد كلها

بصي موضوع المعاد ده عملي هسس خالص

تصوري انا اقترحت على خيخه انها تيجى هى والناس ونتبرع هنا بالدم ونخليه يوم السبت برضه

بس لسه ما ردتش عليا مش عارفه راحت فين

وفعلا انا خايفه من حكاية يوم السبت الجاي على طول عشان مش هالحق اجمع الناس

وخايفه برضه من يوم السبت الى بعده عشان هابقى بعد التبرع وبرضه تعب على الناس
وانا عايزاهم يجوا كهلم

محتااااااااره

مستنيه صلاح يرد عليا فى موضوع نادي النيل

صبرني يارب يقول...

سوووووووول

لو عملناه السبت هانجيلك احنا المركز

تخيلى الفضيحه بقى الى هانعملهالك

همس الاحباب يقول...

ده لقاء ولامؤتمر جامعة الدول العربية
عايزبن راىء نهائى وقاطع
الحل الاصلح ان خيخة تاجل التبرع بالدم او تخليه فى المنصورة ويبقى كده ضربنا عصفورين بخمسيت حجر وما فيش حجر جه فيهم
انا منتظر ................
.......
لسه فى الانتظار ....

صبرني يارب يقول...

قلت كده يا خالد والله

وسبت رد لخيخه وما ردتش عليا

شوفوا كده الى يعرف تليفونها يكلمها ويرد عليا يا جدعان النهاااااااااااارده

فاتيما يقول...

يا جماااااااااعة
انا معنديش مانع خلاص
آجى يوم السبت 7/11 اللى
بعد الجمعة بتاع التبرع
و طالما هو المعاد المعقول للجميع
خلاص و الله ... مفيش اى مشكلة
على عيونى آجى و اى تعب يتنسى و يتمسح بالقعدة معاكم و وسطكم
خوخة لو مقدرتش تغير المعاد
خلاص ..اصلى عارفة انها دقيقة جدا
فى الحكاية دى
و مبتحبش تغير معاد اتحدد
اتكلى على الله يا صبصب
و ثبتى التوقيت
على السبت 7/11 و انا فرافيرووووووو
معاكو يا حبيبتى فى اى حاجة
بس اشوفكم

صبرني يارب يقول...

استنى يا فاتيما

جاري البحث مع خيخه اننا نوحد اليوم

وتتبرعوا عندنا فى المنصوره

هيه هيه هيه


زغرتوا يا عيال

أحمد حسن البنا يقول...

باذن الله هكون موجود ياام مريم بس لانشغالى ياريت تسيبيلى اخر معاد ومكان تتفقوا عليه على الايميل وليكو عليا تصوير اليوم فيديو عشان نخلد اليوم - لو عايزين طبعا - وفرصه للنقاش مع الزملاء الشباب والعواجيز والنص نص فى حاجات كتير بس الوقت يسمح وياريت اللى عنده اصدارات منشورة من دواوين او روايات يجيبلى معاه نسخ وهدفع والله وعندى فكره لا افكار كتيره عايز اطرحها على المدونين المحترمين بس مش هينفع هنا ..لما يكتبلنا ربنا اللقاء الاخوى ده اسمحولى اطرحه وكل واحد يدرسه براحته وعموما اجندة الاقتراحات هى
- عمل مجله شهريه باسم مدونين مصر تتناول اعمال مختاره من كل المدونات الجاده صاحبة الموضوعات المميزة وهيتم طباعتها على نفقتنا برموز بسيطة لن تتعدى كل واحد 100 جنيه مثلا لحد ماجيب دعم ليها من جهات اعلاميه ودى انا بسعى ليها مع القنوات المختصه فى الاعلام وباذن الله هتحصل
- طرح شعار جديد وموجه اعلاميه تحت شعار - احترم مدونة غيرك - وده من باب احترامنا لبعض وعدم التعدى على افكار بعض خصوصا لو تناقضت مع فكرنا والاختلاف يكون فى حدود الاحترام
- عمل سوق بسيط فى كل تجمع لبيع كتب الاعضاء المدونين اللى ليهم اصدارات فى الاسواق ومفيش مانع نشجع بعض وقت اللقاء ونشترى كتب بعض بجر رمزى ولو بنص التمن وده هيبقى دعايه لكل واحد بيكتب لان اللى هيشترى كتاب بسعره المخفض لانه مدون هيعمل دعايه ليه فى محافظته وبالتالى الدعايه هتكون متبادله بين الناس كل واحد او واحدة يعمل دعايه للتانى
- مساعدة الشباب اللى عايز يطبع كتب وشايف انه شغله يستحق النشر ومن ناحيتى انا متبرع بالمتابعه وتقييم الكتب المطروحة وعرضها على كبار المثقفين بمختلف كتاباتهم لتقييم الكتب وكمان هوجهه لدار النشر اللى تتبنى الطباعه والتوزيع وده من باب مساعده اى حد من المدونين نفسه يطبع بس مش عارف ازاى
وغيرها من افكار حاسس انها هتفيد الكل واتمنى تلاقى قبول للنقاش واللى عاجبه الكلام يجيب معاه شغله على سى دى او مطبوع ونتكلم يومها فى التفاصيل

تحياتى لمجهودك يام مريم
احمد حسن البنا

فاتيما يقول...

صبصب
كويس توحيد اليوم
بس انا قولت عند خوخة
اهم حاجة المكان اللى هنتبرع فيه
يا صبرنى
على ضمانتك ؟؟
انا بقلق الله يكرمكم
و متعودة على المصل و اللقاح بتاع الدقى و مطمناله
يا ريت المكان اللى هنروحه عندكم يكون متجرب برضو و امان
انتى عارفة القلق اللى ماشى الأيام دى ...ماشى ؟
طييييييب
حاجة تانية بقى
انا قريت تعليق الأستاذ احمد حسن البنا
و عاوزة بس احييه على اقتراحاته
بس عاوزة برضو
اعترض و اشجب و اندد
بخصوص حكاية تصوير الفيديو دى ...عشان يعنى اصلا البنات و نون النسوة عموما
بيقولوا للصور العادية لأ
و متتنشرش فما بالك بالفيديو
صعبة اكتر
و انا شخصياً مفضلش الحكاية دى خالص
و لو فيهاتفاق عام عليها
هضطر بعد اذنكم يعنى اروح
اخد جنب بعيد شوية عن موقع التصوير هى رخامة و غلاسةمنى ... صح ؟
بس عادى الراجل اخلاق
و قال لو عايزين يعنى
فانا بقول رأيى طالما هو ذوق كدا
ايه تانى ؟؟
لأ خلاص
لأ فيه حاجة
طب اما افتكر هبقى ارجع اغلس تانى يا صبصوتى
سلامؤكتااااان

mahasen saber يقول...

لسه مرستوش على معاد

يا مسهل

الشعب لابد له من حكومه تشكمه يقول...

مش متفائله ههههههههههههههههههههههه .
بس ياااااااااااااااااااارب ياااااااااارب...

صبرني يارب يقول...

احمد حسن البنا

تمام اقتراحاتك جميله وممكن فعلا ننفذها ونتناقش فيها ان شاء الله

وهاتنورنا باذن الله

انما الفيديو ده معلش بلاش عشان فى ناس كتير هاترفضه

انا بس الى هاصوركم غتاتة مني واخد كل الصور اتفرج عليها لوحدي فى البيت
ههههههههههههههه

وان شاء الله اقتراحك ده هانزله فى البوست الى فيه الكلام النهائي عن اللقاء ان شاء الله

صبرني يارب يقول...

فاتيما

طبعا يعنى هأمن موضوع التبرع بالدم ده

ده انا حتى بافكر فكره كده ان اجيب عربيه تبرع قدام النادي الى هانتجمع فيه ونعيش حياتنا واحنا فى النادي عشان ما نبهدلكوش رايح جاي

بس لسه لما اكلم الناس وكده


وبالنسبه لموضوع الفيديو انا رايي زيك
استاذ احمد مشكور بيعرض خدماته

وتقريبا عشان هو طلع فى التلفزيون وكده عايز يصيحلنا كلنا وبيقول واشمعن انا
ههههههههههههههههههه
ومعاكي للصبح كل شويه تعالى قولي حاجه يا جميل

وانا مستنيه رد خيخه عليا بس عشان اكد اليوم
جمعه ولا سبت

صبرني يارب يقول...

شيماء

هاقطععععععععععك ما تقعديش تنبري فيها
هههههههههههههههههههه

ما اسمعش صوتك بقى

صبرني يارب يقول...

محاسن

مستنيه بس رد خيخه عليا يا جودعان

Soul.o0o.Whisper يقول...

اممممممممممممم

مفيش مشاكل يا صبصب خاااااااااالص من انكم تجولى المركز ...
يا سلاااااااااااام
هههههههههههه
عشان نتقفش كلنا مع بعض ، مايكونش حبس انفرادى هههههههه



بس أنا لسه مافهمتش هيكون جمعة و لا سبت؟؟؟

صبرني يارب يقول...

سول

انا مستنيه رد خيخه عليا

هى عامله استطلاع راي على مدونتها لو الناس موافقين على التبرع فى المنصوره

هانوحد الايام وهايبقى التجمع عندنا يوم الجمعه

لو ما وافقوش هاضربهم طبعا لو ما وافقوش

يبقى هانعمل التجمع يوم السبت وامرنا لله وحده

Soul.o0o.Whisper يقول...

طب باقولك ايه يا صبصب يا اختى

لحد الوقتى أنا شايفة ان الناس موافقين

فياريت لو الدنيا شتت النهاردة و لا حاجة


تفضلى تدعى يارب يوافقوا يارب يوافقوا

عشان يكون يوم الجمعة و أقدر أشوفكم ..
ماشى؟؟؟


و طبعا أنا بادعى من دلوقتى ... مش مستنية الدنيا تشتى يعنى

بس اهو الواحد يعمل احتياطاته
ههههههههههههههههه


و ان شاء الله خيخة يناسبها يوم الجمعة
ماليش دعوة بئاااااااااااااااااا


عااااااااااااااااا




مستنية

Anonymous يقول...

واللة انا عندى اقتراح كويس اوى!!!!


المطاعم دى جرين كورنر _ كنتاكي _


بيتزا استيشن _ كوك دور _ مؤمن


كلها محترمة وجميلة اوى بس مش هنخسر


حاجة لو رحنا عند الحاج بغل نزورة


ونكل عندة لقمةحلوة كدة يعنى.


ولااية؟؟؟؟؟؟؟؟؟؟؟؟؟؟؟؟؟؟؟؟؟؟؟؟


تيتووووو

صبرني يارب يقول...

حرام عليك يا تيتو

انت عايز تحرق قلب الناس الى جايين من السفر
هههههههههههههههههه

بلاش بقى هايقولوا علينا بخلا ويعرفواالحقيقه

صبرني يارب يقول...

سووووول ادعي بزمه بقى

بنت قلبى يقول...

والله كنت حسا
انكم هتسقروا على اول ميعاد انتى قلتى عليه
يا جممممممممممماعه انتم مالكم معقدينا ليه
اول مره اشوف لقاء ياخد الراى دا كله
يا جماعه والنبى سهلوا الامور بقا مش كفايا امى هنا كمان معارضه
استغفر الله العظيم يارب
اللقاء دا ماله يا ناس
نفسى اخرج والله
الشارع وحشنى ووشوس الناس كمان
وانا بقا متحمسه اوى انى اجى اشوفكم
يارب بقى يسهلها بجد
والنبى ماتعصلجو علشان لو ختوا انتم القرار انا هحاول اقنع ماما هنا

صبرني يارب يقول...

بنت قلبي
حاااااااضر والله حاضر

هاكلم خيخه بالليل واشوف وارتب المواضيع واشوف
يا جدعان بالراحه عليا

مسدس صغير يقول...

موافقون
والترتيبات هنعلنها ان شاء الله حد اقصى يوم السبت ان شاء الله
ربنا يستر بقى من الفضايح
ده بقى يوم عالمى
هههههه

بس ان شاء الله هنكون أدها

واعملو حسابكو القرارات يوم السبت سيادية لا يجوز التعديل ولا التغيير ولا المناقشة ولا التبديل ان شاء الله

بنت قلبى يقول...

اخييييييييييييييييييير
اشهد ان لا اله الا الله
بس لما اشوف الا اسمها خيخه دى الا
خلتنا نستنا بفارغ الصبر
والحمد لله انى عرف من النهارده
وان شاء الله كده مش هيبقا فى اى اعتراض عند حد
وايييييياك حد يقول لاء ومش هينفع ولا اى حاجه
دنا كنت بخلل على المدونه دى علشان كنت بتقنقط من الا بسمعه
وان شاء الله مش هيكون فى حاجه
وربنا يسترها عليا انا بس

شاب فقرى يقول...

يا خسارة

أول تعليق ليه هنا يكون على بوست التجمع

للأسف أنا معرفش الجميع

اعرف بس الشعب لابد له من حكومة تشكمه ومسدس صغير وبنت قلبى

انا كدا كدا نازل المنصورة فى خلال تلات ايام تقريبا بعون الكريم

كنت بفكر والله آجى

بس كدا هخليها للقاء الجاى :$

مش عارف أفكر ولا عارف أقول إيه

انا مش عارف ظروف الشغل والحياة والبيت والألف موضوع اللى أنا عايش فيهم هيبقى حالهم إيه فى اليوم الموعود دا

ولكن أولا وأخيرا

دعواتى لكم بالتوفيق

شاب فقرى

Soul.o0o.Whisper يقول...

على بركة الله


سيرى يا نورماندى تووووووووو
هههههههههههههههههه


ماشى يا صبصب
شفتى كنت بأدعى بذمة إزاى؟؟؟P:

ياللا بئا مستنيين التفاصيل

بس بلاش ضرب نار يا مسدس يا صغير
ماااااااااشى؟؟؟



ياللا
ادينا مستنيين !!!!

الشعب لابد له من حكومه تشكمه يقول...

شكلكو وصلت لاتفاق:)
طايب انا جيت اقولكو متعملوش حسابى فى اليوم ده:)

بااااس خلاص بضاحك معاكو محدش يضاحك معاكو ياسااااااااااتر يارب.
كانوا هياكلونى:)

بالمناسبه لو عاوزنين اى حاجه قولولى وانا اساعد فيها:بس تقولوا علوزين 1,2 ,3 اه انا اللى يحددلى هو عاوز منى ايه بعمله على احسن وجه.
لو عاوزين منى حاجه بثثثثثثثثت واحده وهتلاقونى عندكو وامد يدى بالمساعده.:)

قوس قزح يقول...

حمدلله على السلامة
اخيرا وصلتوا لحل
يعنى ده اخر كلام ؟
انشر عندى الميعاد ولا لسه ؟

و النبى بس الناس اللى مسافرة تفطر قبل ما تسافر .. سامعة يا طمطم
ده فيها تبرع كمان يعنى لازم تكون الصحة تمام

انا عجبنى فكرة جزيرة الورد بسمع كتير عنها المهم يكون فيها ورد بجد :)

هبقى اكلمك على التليفون قبل ما انشر
سلام

فاتيما يقول...

صبرنى يا قمر
----------
اخيراااااااااااااا
الحمدلله
نذيع ع المدونة عندى يعنى
و لا لسه؟؟
طب بمجرد ما تحطى التفاصيل النوهائية علطول
أبص فى ورقك
و اغش بالملى ...
------------
بت خيخة و أى كلام
------------
مشكرين يا خوخة على توحيد المواعيد و تفير الجهد على العالم كلها هنا و هناك
و طول عمرك ديموقراطية
-------------
بنت قلبى
عالله يكون المعاد مناسب ليكى
يا حبيبتى
و بعدين تعالى هنا
الا خيخة ..دى جهة سيادية يا ماما
و لما تشوفيها
هتعلق فى ذاكرتك و تبقى من زوار مدونتها للأبد إن شاء الله
فرحانة قوى انى ممكن اشوفك
---------------
قوس قزح
---------------
يا وش الخير يا داليا يا حبيبتى
من ناحية الفطار حاااااااااضر
هدب جامد الكام يوم اللى قبل المعاد كمان عشان الدم يبقى تمام ...
و أن شاء الله منتظرة تقولى امتى بؤجة الخير الشتوية انا متوقعة تكون التجمع التدوينى التالى بعد المنصورة و عشان كدا قولت يا ريت تجمع المنصورة يكون تعارف و بس عشان الناس تعرف تحط ميزانية للبؤجة لما يعلن عنها و ييجى اكبر عدد ممكن إن شاء الله
وحشتيييييينى قوى و اشوفك يوميها بكل الخير يا حبيبة قلبى
-------
مسدس صغير
----------
معلش يا صاصا خليها عندنا المرة دى
و انتوا اخواتنا الجدعان برضو و هتيجوا على نفسكم عشان خاطرنا
----------
خالد همس الاحباب
----------
الله ينور يا غالى
اقتراحك عين العقل و الاختيار
منتحرمشى منك
-----------
تحياتى بقى لكل اللى علق شيماء بتاعة الشعب اللى عاوز حد يشكمه دا
و سوووول الجميلة و احمد حسن البنا و شاب فقرى و كل من ترك تعليق و اهتم
خالص ودى

بنت قلبى يقول...

ست الكل فاتيما

انا يا حبيبى ذات نفسى لعند يوم 10\11
عادى اى معاد قبل دا مش فارق معايا
بس فى حته خايفه اوى منها وهيا طبعا ماما
خيفا لتكون بتيمنى علشان ما ابرطمشى طول الاسبوع
انا قلتلها امبارح لقيتها بصتلى كده وطبعا عنيها بتقلى اذا كان انتىمش بتطلعى على السطح فا هتروحلى المنصوره
بس طبعا اول ما احولت عينى كده لقيتها بتقلى ماشى خلاصى هخليكى تروحى اهو تشوفى الناس
بس جوايا بيقلى انها بتنيمنى
ومهما يحصل لو ربنا كتبلى اجى اكيد اجى
بس يااااااااارب اكون موجوده معاكم
ـــــــــــــــــ
وعلى فكره انا طلبت من الاستاذه شيماء حاجه منك ومعرفش بقا هيا عرفتك ولا لاء

يــوم جــديد يقول...

:'(

خواطر شابة يقول...

جميل مقدرتكم على ان تخرجو من هدا العالم الافتراضي للعالم الواقعي
تجمعاتكم فرصة لتعارف أكبر واستغلالكم لها في انشطة خيرية هو عين العقل وخسارة ان انا بيني وبينكم ألآف الاميال لان المشاركة كانت ستسعدني بس يالله مليش في الطيب نصيب.
وفقكم الله لما يحبه ويرضاه

صبرني يارب يقول...

لا يا داليا

استنى لما بكره هاروح اتفق مع النادي

لا جزيرة الورد الى بتسمعي عنها سماعي بس
هههههههههههههه

انا باحاول اوضب نادي كويس اهو بس عشان العدد وكده محتاجين موافقه من المدير هاروحله بكره ان شاء الله


انا دلوقتي وصلت لمكان التبرع خلاص واتفقت عليه

لسه مكان النادي بس
ويبقى كله تمام

خلي النشر لبكره يا جميل

صبرني يارب يقول...

فاتيما يا حياااااااتي

قولي بس عايزه تفطري ايه وانا اجبهولك عوووونيه ليكى


وربنا يسهل بس ارسى على بر فى كل نقطه عشان يبقى مافيش تغيير بعد كده

اووووووووك

صبرني يارب يقول...

خواطر شابه

يا حبيبتى ولا تعلمى جايز يجى يوم تكوني معانا فى اي تجمع من تجمعاتنا

وعقبال ما تعملي انتى تجمع فىالمغرب جايز نجيلك احنا
ههههههههههههه

صبرني يارب يقول...

بنت قلبي

سيبى ماما عليا

لو ما وافقتش كلمينى على الاميل وانا اخد تليفونها واكلمها دوووووونت وري انا ليها سككي مع الامهات
ههههههههههههههه

صبرني يارب يقول...

شاب فقري

هانستناااااااك يعنى هانستناك مش محتاج تفكر

وهناخد منك دم كمان

مش عشان فقري يعنى هانسيبك

صبرني يارب يقول...

شيماء موشكرين يا اختي على العرض

تعالى اشتغلي شويه

ممكن تيجى تقعدي بالعيال على ما اروح التجمع انا
ههههههههههههههههههههههههه

صبرني يارب يقول...

سووووووول
هديتى اتبطيتى بقى يوم جمعه اهو
هههههههههههههههههههههههه

وهانضربك بالنار طبعا اول ما نشوفك مش عايزه كلام

صبرني يارب يقول...

يوم جديد

بتضحكى على ايه بت
ههههههههههه

بـــــسمة انـــــــــور يقول...

ازرغط ياناااااااااااس

اخيرا ستقريتوا على ميعاد

بس ياخوسارة ويالف خوسارة
يوم الجمعه مش هعرف اروح المنصورة
ماما هتعترض ......انا بس بروح سبت واتنين واربع فى ايام محاضراتى
يب اعيط دلوقتى يعن ولا ايه
اعيط يعن اعيييييييييييط

ربنا يسهل بقى واعرف اجى
وياريت يا خالتو صبصب وشيما واللى معاه ميلى يعنى قبل اللقاء سبيلى رقمك علشان اعرف اكلمك واشوف هاجى ولا ايه لانى معرفش حاجه فى المنصورة
بس كده خلاص

وادعيلى بقى اعرف اتفاوض واوصل لنتيجه مرضيه

بنت قلبى يقول...

يارب يارب يارب يارب يارب
الدنيا تهدى هنا واعرف ابكش تمام واضحك على ماما علشان ما تقليش لاء بعد كده
ويارب يارب يارب يارب كمان
على فكره دا مش العادى بتاعى لاء
بس زى ما قلتلك انتى متحمسه بس
لانى والله الاغلبيه هنا متبعاهم من زمان وحباهم واتمنى انى اشوفهم
رغم انى اصلا من عشاق البيت بس دا تعود يعنى
وشكلى كده هسمع بكلامك وهتكلمى امى
وربنا يسهلها بقى يارب

بنت قلبى يقول...

باين كده يا بسمه الا بيتمنوا يرحوا ومتحميس جدا ونفسهم بجد فى حتته لقاء من دا
للقاء ايه ونوال ايه
المهم
شكلنا كده مش هنروحها ولا ايه يا جدعااااااااااااان

bos bos بسمه عبدالباسط يقول...

الحمدلله أستقريتوا على اليوووووووووووم يارب بقى نعرف الميعاد علشان نظبط أمورنا أصلى لازم أظبط أمورى قبلها بسنه سنه ونص كده
هههههههههههههههههههههههههه

مع ان بينى وبين المنصورة ساعة بالعربية يعنى يعتبر سفر وبتاع ولازم التجهيز والترتيب واللذى منه
رتبوا الميعاد وربنا يسهل بس حاسة أن كل الناس بتوع الدقهلية محدش منهم عارفنى مع أنى أعرف ناس كتيرة من بتوع مصر
شكلنا وحش قوى ولاد محافظة واحدة وما نعرفش بعض
عاااااااااااااااااااا

صبرني يارب يقول...

بسمه

انا هايسيب رقم تليفون طبعا قبل التجمع وهايكون معايا يوم التجمع

وعموما لو انا اميلى عندك كلمينى بس واحنا نتوصل لحل

واكلملك ماما يا ستى

ايه يا ولاد ده هاعملكم مجلس اباء بعد كده
هههههههههههه

صبرني يارب يقول...

بوس بوس

تعالي بس انتى واحنا هانعرفوووووووووكي

خلاص ظبطي على يوم الجمعه بقى وسيبى الترتيبات علينا

صبرني يارب يقول...

بنت قلبي

ما تنبريش فيها يا بنت انتي

يا ستااااار عيال من حزب بكره النكد بكره

أم مالك يقول...

ازيك ياصبرنى
يارب تتجمعوا دايما على الخير
وفى الخير
لانتسى خالتك ام مالك من الدعاء
ربنا يتقبل باذن الله
تحياتى

صبرني يارب يقول...

ام مالك

الحمد لله يا جميل

منوره يارب تكوني بقيتى احسن

والله بادعيلك وربنا عالم

ربنا يشفيكى يارب ويردك بالسلامه ويجعله فى ميزان حسناتك يا جميل

الشعب لابد له من حكومه تشكمه يقول...

كده تمام الحمد لله:)

بالمناسبه ياصبصب انا لسه جايه من بره من شويه وكنت فى المشايه وطقت فى دماغى اشوف جزيرة الورد اللى بيتكملوا عليها دى مش معقوله نكون من المنصوره ومنعرفهاش فضيحه:)
بس تصدقى اتصدمت المكان حلو بجد حلو جداااااااااا وكله زرع وشكله نضيف جداااااااااااااااااااااااااا... اه انا استغربت زيك برضه:)
بس مش عارفه فى كافيه جوه ولا لا نسيت اشوف:(

زى مقولتلك خليكى فى مؤمن الله يكرمك بلااااش فضايح:) او كوك دور..

صبرني يارب يقول...

شيماء

انا كمان باقول كده مؤمن او كوك دور


لا جزيرة الورد مش هاتنفع لاسباب عديده

المهم خلوني بس اروح اقابل مدير نادي النيل ونشوف كده

يا مسسسسسسسسسهل

طهر فؤادك يقول...

السلام عليكم ورحمة الله وبركاتة

ربنا يكرمكوا يارب والمسلمين ... وجزاكم الله خير على ماتقدموة وكتر الله من امثالكم ان شاء الله وياريت كنت فى مصر كنت شاركت معاكوا بأذن الله بس الحمد الله على كل شئ قدر الله وماشاء فعل ...

صبرني يارب يقول...

طهر فؤادك

الله يخليك يارب

ويارب تكون معانا المره الجايه ان شاء الله

يــوم جــديد يقول...

بضحك ايه بس يا صبصب
دا عياط أهو :'(
هو اللقاء خلاكي مش مركزة كده

صبرني يارب يقول...

يوم جديد

لا اصل الصور مش بتظهر عندي
بتظهر الرموز

فانا ما خدتش بالي اصل الفرق كمه صغيره كده يا اختي

العتب على النظر

طب انتى بتعيطى ليه

يــوم جــديد يقول...

بعيط عشان مش هكون معاكم

الشعب لابد له من حكومه تشكمه يقول...

خلاص ان شاء الله هكلمك الصبح.
بس قوليلى الساعه كام اصلى حساسه ومش عاوزه اسبب ازعاج:)
استغلينى براااااااااااحتك:)