الثلاثاء، 9 مارس، 2010

الحشريه وقلة الذوق

السلام عليكم

رفهت عنكم اهو ودلعتكم





تعالوا بقى قدامي على المقصله بما انكم جزء من الشعب الى انا باعاني منه ده



مش عارفه انا هاعمل ايه لما امسك الحكم فى الصين يعنى

دلوقتي يا ناس انا خلاص هاطق
 

فى ثنائي منتشر فى المجتمع خلاص ما عدتش طايقاه





الا وهما



الحشريه وقلة الذوق




ودايما دايما افتكر ياسمين عبد العزيز فى فيلم مش فاكره اسمه(عادل قالي دلوقتي اسمه ثمن دستة  اشرار) وهى بتقول


 

من يوم ما جيت وكل الناس بتتدخل فى حياة كل الناس بطريقه تضايق كل الناس


عندي احساس بشع بان في ناس فاضل انهم يقولوا للمحيطين بهم ممكن تسمحلي اعيش تحت جلدك ؟؟



ومع العباره دي وش ساقع بااااااارد بابتسامه صفرا





بجد مش ممكن الشعب ده انا اينعم ما عاشرتش شعوب كتير



ولما كنت فى الامارات كنا كلنا غرب حتى اهل البلد تحسوا انهم واخدين على معاملة الاغراب



فمش قادره احكم بقى



هل احنا الشعب الوحيد الى حشري بالشكل ده ؟؟





ولله الحمد كل واحد عنده الى مكفيه مشاكل ودوشه اييييييه بقى الى يخليك ترشق مناخيرك فى حياة الاخرين



الواحد اوقات الظروف تحطه فى موقف تخليه غصب عنه يدخل فى قصه مالوش فيها ناقة ولا جمل بس ما يقدرش ينسحب



صدقوني الواحد بيذوب خجلا لما يضطر عشان يفهم الموضوع يسأل مثلا عن حاجه هما ما قالوهاش من نفسهم





نفسي اعرف بقى أي شخص حشري فى الحياه بيعيش مع نفسه ازاي





لا وايه بقى 99% من الاشخاص الحشرين بيكون يصحبهم مع ذلك كمية من قلة الذوق لا باس بها امال هايبقى ساقع وصدغ ازاي




فانا بقى هاقولك اهم مظاهر الحشريه عشان الى عنده جزء منها يحاول تخلص منها



وزي بعضه مش هاقعدكم على الكرسي الكهربائي عشان تقولوا اعترفوا لنفسكم كفايه



عشان تعرفوا انى متسامحه



اكتر حاجه بتضايقنى وتعصبنى جدا



الكمبيوتر بتاعي



اهو اهو اسمه ايه ؟ الكمبيوتر بتاعي مش مشاع والله



أي حد ممكن يدخل يلاقي الجهاز مفتوح مثلا فيقوم رايح قاعد قدامه واميلات بقى مفتوحه ومواقع ودنيا



وبعدين بقيت انا وامري لله سقيعه شويه ولما حد يعمل كده اقوله بعد اذنك اقفل اميلاتي واقفل واسيبه



ابقى معديه كده



الاقي هاذوها الشخص مثلا فاتح الفيلات بتاعي مثلا وبيقلب فيها عادي جدا



وبعدين بعد شويه يدخل على قائمة المواقع المفضله



حبه كده ونلاقيه داخل على الصور وهنا بانفجر بقى خلاص واقوله عننننندك لحد هنا واربط



ومن اكترالتصرفات سخافة برضه تكون بتتكلم فى التليفون مثلا وتلاقي فى شخص مركز معاك بكل جوارحه وممكن بما انه قليل الذوق يشترك معاك فى الحديث كطرف تالت



ولا بقى لما تليفون يرن تلاقي حد بيديلك التليفون وهو بيبص على اسم الى طالبك يا ابويا على الغتاته



يجيلك رساله تفتحها وتقراها وتقفل الموبايل تلاقي شخص قاعد مركز معاك من اول ما جه رنة الرساله اصلا ولما تقراها يبقى قاعد باصصلك كده باستفسار مستنيك تقول الرساله من مين



الله هى غتاته ؟؟؟



تلاقي بقى شخص تاني غتيت اوي قاعد مع واحد بالكاد عارفه مثلا ويقوله وانت بقى بتلعب فى كام كده يعنى فى السوق ( يعنى حجم عمله فى السوق كام )





او يقوله امممممم والشركه بتاعتك دي بتكسب كويس ؟؟ كاااام كده يعنى فى الشهر؟؟؟



نخش على الحريم بقى وما ادراك ما حشرية الحريم



تلاقي ما تعرفش الحديث مشي معاها ازاي وتوصلك فى الاخر انها تسألك بكل بساطه مثلااااا عن مرتبك كام



بتصرفي كام فى الشهر؟؟؟ هو مصاريف المدرسه بتاعة ولادك كام ؟؟؟ هو انتى بتوديهم فى الباص ليه يعنى ما تنزلى انتى ولا ابوهم وصلوهم بالعربيه؟؟



مطلوب من الواحد يرد يقول ايه طيب ؟؟؟



انتى بتسهري ليه مش ولادك بيناموا بدري عشان المدارس ؟



انتى بتصحي الصبح وجوزك خارج ؟



انتى طابخه ايه النهارده ؟ يا شيخه ده يبقى تقيل فى الهضم


 

انتى بتلاقي وقت تقعدي على النت ؟ مش جوزك وبيتك اولى بالوقت ده ؟؟



انتى بتاخدي كورسات ؟؟ ليه يعنى ؟؟ انتى عايزه تشتغلي ؟؟ ولا لها لازمه الكورسات بلا قلبة دماغ





مايصحش برضه تكتبي كذا مالهاش لازمه
 

الله هى دي تخصك ده موضوع يخصنى انا ؟ ......ماشي بس برضه مالوش لازمه



الله مالوش لازمه عند مين ؟؟؟؟ عندك انت طب انت ايش اخششك ؟؟!!



حلوه الشنطه دي جديده ؟ ..... ايوه اتفضلي



منين وبكام ؟؟ ...... مش عارفه والله اصل جيالي هديه



هديه ؟ من مين ؟؟؟



!!!!!!!!!!(احيانا باقول احيانا تانيه ما باحبش اريح الصنف ده )



وممكن جدا لو قلتلها من اختي مثلا



تقولي بجد طب ممكن اساليها كده جايباها منين ؟



او الانقح بقى لما تقولي طب خليها تجبلى واحده زيها



(وش بيشد فى شعره من الفرسه )




 

تبقى عندك ضيفه لطيفه ظريفه



وتقومي لاي سبب تدخلي مطبخك ا و حتى اوضة نومك تلاقيها فجأه وراكي ومافيش مانع لو تمد ايدها وتتفرج على الميك اب بتاعك وتجرب البرفان وتسألك منين وبكام



وما يعجبهاش لون الروج



واحتمال تقترح عليكى تغيري نظام الاوضه عشان يبقى السرير جمب الحيطه والعيال ما تقعش



مع انه سريري انا مش سرير العيال





معلش حتتين بس قلة ذوق احسن بينقحوا عليا



انت فين ما بتسأليش..... معلش اصل كنت تعبانه ؟



ايه ده عندك ايه ؟ ..... عندي كذا





يووووووووووه ده انا كنت كده الاسبوع الى فات ................ وتكمل حكايات عن نفسها من غير ما تقول للطرف التاني سلامتك من الاه




تيجى تقدم تحيه لشخص ما تلاقيه من قبل ما توصل لحد عنده بيقولك ما باشربوووووش أو ممنووووع منه





والادهى والامر الى تقولك يوووووووووه جوافه هى ورانا ورانا ما سايبنها فى البيت




والاسخف والاسخف الى يدوق الحاجه او يشمها ويمتعض كانك شربته جاز ويقولك بقرف ؟؟؟ ايه ده ؟؟



 

خدوا عندكم الحته السخافه دي قويه بجد



منين جايبه العبايه دي ؟؟ تطريزها اول مره اشوفه .... ده انا الى مطرزاها




الله هو انا كل ما اسألك تقوليلى انا الى عاملاها ؟ خلاص ما تعمليلى بقى



(كنت الاول بارد بذوق بعد كده باقولها لا مش فاضيالك وش كده )




الحته دي كمان معلش والنبى




 

التورتايه الى كنتى عاملاها يوم عيد ميلاد فلانه(حد قريب مني ) ....... مرسي عقبال ما نعمل لست الحسن بنتك يوم فرحها







وتبدا فى سرد حكايه طويله عريضه مريعه مؤداها ان فى حد من اصحابها او اقاربها الى انا بالكاد اعرفهم عنده مناسبه والمفروض انا بقى اعزم واقولها اعملللللك انا



ولو سقعت وما عبرتش ... تطلبها صراحة ...( كنت زمان باتحرج وادبس دلوقتي باقول معلش مش فاضيه )







طولت عليكم صح



معلش اصل انا مبقوقه من الشعب هاموت هاموت خلاص



طب انا شلت المراره من اكتر من ست سنين



اخرتكوا ايه معايا كده



انا تقريبا فى الاخر هاعمل استئصال عقل جاي الواحد يرتاح





اه البتاعه  الى فوق دي تقريبا اسمها قصافه
دي عشان اي حد مناخيره طويله وحشري هاقصله مناخيره بها طبعا

شايفااااااااااكم الى حطوا اديهم على مناخيرهم 
هاجيبكم هاجيبكم 


هناك 69 تعليقًا:

Just waiting يقول...

حاجه فعلا تضايق
انا كمان كنت كاتبه بوست عن الناس الحشرية بس من فترة
هقولك حاجه بتحصل معايا
واحدة كل ماترن عليا وتلاقي الموبايل مشغول تتصل على البيت علشان تعرف كنت بكلم مين !!!
تحياتي ليكي
اول مرة ازور مدونتك
وان شاء الله مش الاخيرة

ستيته حسب الله الحمش يقول...

يالهوييييييييييي يا ندى يا اختي
يا عين امك يا ختي
ده انا اتخنقت من القراءة بس
لألألألألأ استني لما افوق

الحمد لله ياااااااااااارب
اقسم بالله موقف واحد من دول اخسر صاحبه للأبد
ايه القرف والزفت ده

كويس انك لبستي اخيرا وش البرود والغتاتة

انا ها ادعي لك ربنا يصبرك على كل هذا البلاء
بس قبل ما اختم واقوم اشرب ليموناضة اهضم هذه الحالات
احب اقول لك ان الكمبيوتر ده مش جهاز
ده زي المحفظة
زي المذكرات الشخصية
لا يجوز اطلاقا لمسه مهما كان الإحراج
واللي يزعل
يتفلق هو واللي يتشدد له

روحي يابنتي
قلبي وربي راضين عليكي ان شاء الله

لولا وزهراء يقول...

ندى الياسمين
-*-*-*-*-*



الذ وارق ندى على اجمل ياسمينه فى الدنيا كلها

انا مش قادره امسك نفسى من الضحك بجد

عجبتنى جمله بتتقالى كتير اوى اوى


"
انتى بتاخدي كورسات ؟؟ ليه يعنى ؟؟ انتى عايزه تشتغلي ؟؟ ولا لها لازمه الكورسات بلا قلبة دماغ "

على اعتبار انى باخد كورسات ده اكتر سؤال بس فيه غييييييييره كتييييييييييييييييييييييييييييير

المهم فى حاجه لما حد يقولك انتى مبسوطه فى حياتك انتى بقى تردى تقولى الحمد لله تلاقيها بتقولى ومبسوطه على ايه هى الحياه فيها حاجه مريحه تحسى انها هتضربك عين تجيبك ورا

اقولك على حاجه حلوه اوى بفضل من ربنا سبحانه وتعالى البسمه لا تفارق وجهى حتى فى اصعب اللحظات ممكن قلبى يبكى ومع ذلك اكون مبتسمه لان بصراحه كده الناس مش ناقصه وش مكشر
المهم من حوالى اسبوع كنت فى مشوار وراكبه الترام لاقيت الست اللى فى الكرسى اللى امامى بتقولى هو انتى مبسوطه على طول كده ووشك بيضحك بصيت لها قولت لها الحمد لله قالت طيب انتى مبسوطه ليه بقى قولت لها علشان شوفتك والله العظيم يا ندى انا مش اعرفها
امبارح كنت فى مصلحه حكوميه باخلص ورق وبرضه على وشى نفس الابتسامه لاقيت الموظفه بتقولى انتى مبتسمه كده على طول قولت له الحمد لله قالت طيب ربنا يفرحنا زى ما انتى فرحانه
اشد شعرى يعنى او اعمل ايه يا ندى شوفتى ناس حشريه زى كده

ربنا يكفينا شر الناس اللى انفها طويل الحمد لله انا انفى صغير اوى

بوست تحفه بجد
تسلم الايادى

شوفتى انا رغايه ازاى
اه يا خوفى تعملى بوست عن الرغى واكون انا المقصوده ;)

زهراء

ندى الياسمين يقول...

جست ويتنج

برافوا اكيد دي ما بتحصلش معايا عشان انا تقريبا من كل فين وفين لما اتكلم فى التليفون اساسا ما باحبوش

نورتي يا جميل وانشاله دايما منوره

ندى الياسمين يقول...

ستيتة حياتي

بزمتك يا اختي مش انا المفروض يعملولي تمثال ؟؟
لعلمك الخاص والله العظيم انا نقيت الحاجات الى بتتكرر انما فى حاجات بقى فريده من نوعها

تعاليلى على جنب وانا اشجيكى
هههههههههههههههه

انا صحيح بدأت اسقع واستتنح شويه بس برضه دمي بيتحرق

اصل الى مش واخد على انه يبقى قليل الذوق يا ستيته بيضايق لما يطلع منه حاجه كده
الواحد بالذمه مش له حق يهاجر ؟

اعملي حسابي فى اليموناضه بس انا يادوب يكفينى برميل على ما اروق
هههههههههه

عاشقه الرومانسيه يقول...

اى حد هيعمل معايا حركه من الحركات القرعه دى هاحط له سم فى العصير
واخلص من رخامته
هى ناقصه ضغط؟
انا ضغطى فى السما يااختى لوحده

ندى الياسمين يقول...

زهرا

اه اه تعالى يا صديقتى اقعدي جمبي

هاقولك مره كنت عندي مشكله ومضايقه اوي بس كان فرح اخو جوزي لازم اروح

طبعا مهما احاول ابتسم بتطلع صفرا الواحد كان تعبان على قرفان على مش طايق نفسه

تبصي تلاقي التعليقات بقى من الشخصيات اياها

ناقص تقولي يااااه اخيرا شوفناكي مكشره
ههههههههههههههه

ومره كنت باقضي مشوار برضه فى مصلحه حكوميه وكنت يا اختي صغنونه 19 سنه كده

صادوني بقى الحريمات من نوع برضه ايه الابتسامه دي وايه الضحك ده وبتخلصيله ورقه وهو مسافر كمااااااان
ده جوزي يعنى

وبعد 3 دقائق من انصرافي من عندهم كنت واخده سلم المحكمه زحلقه على ضهري تقوليش بالعب باتيناج بظاهري يا اختي ورقدت فيها شهر

حاجه فله اوي
ههههههههههههههه

وبعدين ايه الرغاييين مالهم الرغاييين

ده تلقيح ده ولا ايه
ههههههههههههههههههههه

انا بقى اسم مدونتى ندى الياسمين خلاص
هههههههههه

متشكره اوي يا جميل على كلامك انتى ترغي براحتك
مزالت مدونتي هى موطن الرغي الاصلي

ندى الياسمين يقول...

عاشقة الرومانسيه

خدي من ده كتير والله يا دودو بالذمه مش انا ليا حق اشيل المراره ؟؟

منوره يا جميل

عمرو جويلى يقول...

السلام عليكم
لحل هذه المشكلة نتبع كلام المولى عز وجل
فى قوله تعالى
{يَا أَيُّهَا الَّذِينَ آمَنُواْ لاَ تَسْأَلُواْ عَنْ أَشْيَاء إِن تُبْدَ لَكُمْ تَسُؤْكُمْ وَإِن تَسْأَلُواْ عَنْهَا حِينَ يُنَزَّلُ الْقُرْآنُ تُبْدَ لَكُمْ عَفَا اللّهُ عَنْهَا وَاللّهُ غَفُورٌ حَلِيمٌ} (101) سورة المائدة
صدق الله العظيم
خالص تقديرى

adel يقول...

فيلم ياسمين كان اسمه :
1/8 دستة اشرار

علي الطلاق اللي يقول طرزي عباية لعمله فرح في وشه :)

ندى الياسمين يقول...

عمرو جويلي

انا عن نفسي حافظاهاااااااااااااااااااااااااااااااا

فاهماااااااااها

وباعمل بيها الحمد لله
اعمل ايه طيب اعلقها على باب البيت ولا اعلقها فى رقابتى ؟؟

وما حدش حافظ كمان

من حسن اسلام المرأ تركه ما لا يعنيه



تحياتي يا فندم حضرتك نورت

ندى الياسمين يقول...

عادل

انت هاتستعبط
ما عندكوش يمين طلاق ياعم انت بتشتغلنا ولا ايه
ههههههههههههههههههههه

بس والله العظيم ثلاثه هى تستاهل خمسين فرح فى وشها

النوع ده بالذات انا ممكن الف عنه كتاب
ههههههههههههههههههه

نورت يا عادل

وشكرا على اسم الفيلم انت عارف السن بقى يا اخويا

sony2000 يقول...

معلشي يابنتي
هتعملي ايه يعني
بس حولي علي قد ماتقدري ابعدي عنهم
معلش
تقبلي مروري وتحياتي

star in the sky يقول...

يووووووووووه

دى كتييييييييييير اووى

فى الجامعة معايا بنت يخربيت النيلة حاجة مش ممكن هتعملى ايه وهتروحى فين ولما تروحى ولما تيجى رنى عليا و بتعملى ايه وحاجات ملهاش اى دخل فيها ولا تخص الجامعة
والمشكلة انى بطبيعتى طيبة ومتعاملتش مع حد بالشكل ده قبل كده بس اهه اتعلمت فيها وكنسلتها فى الاخر

بس مع انى لسة فى البداية فلما بشوف حد وافتكره حشرى بقيت اشوف اصعب منه
واتعلم فيه

بس بصراحة اللى بتحكى عليهم حاجة رخمة اوى ربنا يعينك عليهم

ندى الياسمين يقول...

سوني
حد يقدر يبعد عن قضاه

قدر الله وما شاء فعل هاعمل اييييييييييييه

نورتي يا جميل

ندى الياسمين يقول...

ستار

شوفي يا بنتى اي كم رخامه ممكن تقابليه كوم

والى ممكن تحسيه وانتى محتله فى بيتك كوم تاني
هههههههههههههههه

هييييييه دنيا

نورتي يا جميل

هتشوفوا يقول...

على فكرة أناهاعترف اني مرة بصيت على تليفون واحد مش صاحبي لما رن وكان مكتوب اسم واحدة لقيته بصلي حتة بصة, خفت منها والله ومن ساعتها خدت بالي, وعمري مااعملها تاني

الجماعة بتوع الجوافة دول بقى معندهمش حق خالص لأني بحبها
ومعلش انتي برده لو عندك مانجة متستخسرهاش فيهم

Wanda يقول...

دردر

معلش معلش معلش
هدى نفسك كده
روق يا مندى انت يا ياسمين :-)))

بصى بقى
اولا البتاعة الى فوق اسمها بنسة
بتاعت الكهربائية و الاعرق فى النهاية بيسموها الكماشة

حتة قصافة ديه معدتش عليا بالشكل ده
ليها شكل ثانى على ما افتكر

متفعش مع المناخير :-))
انت عايزلك مشرط :-))
كاتر كده يعنى

(معرفش حد قلك المعلومة و لا لا بس اصلى مقترتش التعلقيات )

نرجع للحشارية
بس مجتمعنا متداخل شكل صعب الفك و الفكاكا منه
بس هو ده ضريبة التاخل و السؤال
يعنى مينفعش تنقى كمية التداخل
ممكن تقنن المسموح لهم بالتداخل

عايزة الطريقة
معرفش تقدرى عليها و لا لا
بس الكلام فى العموم بحساب و فى الخصوص بالقطارة
اجابات سريعة مقتضبة
تخلى الى قصادك يخس انك مستثقله دمه
بس عليه حيبطل و كل ما تتدخل مكان هو فيه حيقطم فى الكلام و يبصلك شذرا :-)))

انما مع الصحبة الحقيقية حيعرفوا طبعك و ميزعلوش و يصبروا على ايام الفضفضة و تنقية الرز

قلة الذوق
اعتقد انعدام الاحساس بمقدار الذوق بيولد انعدام فى خروج الذوق فى كلامهم

يعنى حد محدش فى بيته بيقوله كلمة كويسة و لا لفتة ذوقية معتقدش حيقدر يراعى المواضيع ديه مع الاغراب
اصل فاق الشى يا دردر لا يعطيه
و عليه
انت تلميهم كلهم و تعدميهم رجما بالقبقاب يا شجرة الدر :-)))

و تخشى المطبخ بقى تعمللنا مندى فراخ او ضانى :-))))

يالله قومى يالله

Shaimaa يقول...

والله العظيم يا ندنود البوست ده فى الجول.. أنا كنت الأول بتحرج من أى سؤال وأضطر أجاوب وأختك الصراحة بتدلدق منها على الآخر... بس كنت ببقى مفروسة وعلى طرف لسانى أقول للحشرى ده وانت مالك يا غتت

طب ده الحاجات دى فيها أمور كتير سهلة... ده أنا عندى نماذج فى الشركة اللى بشتغل فيها مش عايزة أقولك :

*عملتى ايه فى العريس اللى جالك
*انتى بترفضى ليه
*انتى أختك مش اتجوزت من سنة... مخلفتش ليه
*لو كلمت ماما فى التليفون لازم يسمعوا المكالمة ويعلقوا عليها
*اشترينا أنتريه جديد... بسرعة يعلقوا.. منين وبكام ومقلتلناش ليه قبل ما تروحى
*الواد بقة بتاع البوفيه ده عالم تانى خالص.. شاغل باله بكل كبيرة وصغيرة ولو حصل حاجة ومعرفهاش مينمش طول الليل

بلاش هنروح بعيد ليه.. فى واحد دخل علق عندى على المدونة وقال.. انتى حاطة صورة حمدى قنديل ليه.. وايه الكتابات دى ... انزلى لأرض الواقع ياماما....
الله ... وانت مالك يا حشرى هوه أنا حطة الصور دى عندك ولا عندى... وبعدين مش عجباك متدخلش عندى
حاجة تفرس

عايش... ولكن !!!! يقول...

هو انتى شايله كل ده فى قلبك وساكته
دانتى ليكى الجنه :))
ايييييييييييييييه كل ده
انا عن نفسى اوقات يجيلى رساله ع الموبيل تلاقى واحد صاحبى قام راشق عينه فى الموبيل علشان يعرف مين اللى باعتها :)) بس انا بديله على دماغه على طول

ندى الياسمين يقول...

هتشوفوا

يعنى انت مناخيرك قصرت ولا نشغل الاله الى فوق دي
لا شكلها قصرت زي بعضه عدي

بس وربنا ما باستخسر يا اخويا

بس اصل الحكايه بتبدأ من الاول من غير ابسط قواعد الذوق الى هى الو احنا جايين نزوركم
احنا دي خمس ست افراد على الاقل

طبعا باقدم الموجود ولا ازرعلها مانجه فى عشر دقايق يعنى
هههههههههههههههههههه

نورت

ندى الياسمين يقول...

وندتى العزيزه

انا كنت كاتبه كماشه على فكره
قوم جه رضا قالي دى قصافه
وبما ان جوزي كهربائي قديم كان لازما ولا بد اصدقه
والكماشه هى الى بيخلعوا بهاالمسامير

المهم انها حاجه تقطم وخلاص
والكاتر يا اختي ما تعرفيش مش وقفوا استيراده ااااااه ده مشكله كبيره هابقى احكيلك عليها
ههههههههههههههههه

الطريقه بتاعتك بقى يا ستى انا ما باعرفش اعملها اطلاااااقا مهما حاولت انى اظهر ضيقى من حد ما باعرفش
ما باعرفش ابوز فى وش حد ولا ابقى قليلة الذوق فى الكلام اطلاقا

للاسف الشديد ما باعرفش
والله العظيم انا فى ناس بجد بابقى نفسي اعاملهم حتى بالمثل ومره واحده ابوز فى وشهم مثلا او اكلهم بغباوه ما باعرفش
هباله بعيد عنك




ومندى الفراخ والله عايزه اعمله يا اختي

بس ما حدش عندي بيشجعني هنا فى اكله

لو عايزه الطريقه موني كانت عاملاه حلو اوي مدام سلموني

نورتي يا بطه

ندى الياسمين يقول...

شيماء


لا بصي موضوع الجواز والحمل ده حضرتك عايز كتاب
طب هاقولك بقى على حاجه انقح وانقح
لما حملت فى خالد الي هو رقم 3
باقول لواحده انا حامل وانا كنت لسه عارفه انى حامل فى نفس ذات اليوم
قالتلى ايه ده بجد ؟؟؟؟؟ اه يا جبااااانه مش تقولي ؟؟
الله ما انا باقولك اهو يا اختي

لا يعنى ما قولتيش انك ناويه على حمل ولا حاجه

ناويه ؟؟

مش هاقولك انا قلتلها ايه بقى كانت بتسد فى بؤي خلاص
هههههههههههههههه

وبالنسبه لتعليقات المدونه طب ده على الاقل حد بيقول رايه وانتى حره في تصرفك فى النهايه

طب تعالي اتفرجي على الى حصلى انا فى موضوع المدونه
ما عليناااااااااا

نورتي يا جميل

ندى الياسمين يقول...

عايش ولكن

اصل حياة الاصحاب وكده موضوع تاني

لسه بقى لعابيك الحياه يا ابنى وقرايبك من بعيد واصحاب من بعيد وقرايب الزوج والزوجه وعلاقات المفروض انها تظل موجوده ولكن فى حدود مش كلهم اصحابك اكيد

بس انت الحمد لله كويس اهو بعد تعليقى عندك
يعنى مش فرفرت ولا حاجه
هههههههههههه

هاروح اشوف هناك حصل ايه

نورت يا باشا

فتاه من الصعيد يقول...

انتي صبوووووره قوييييييييييييي

انا ممكن يغمن عليا من موقف حشري كده

كويس اني دخلت انا كنت عماله ادور على مدونتك الجديده

مبروك يا ندى :)

مدونتك حلوه اوي

تحياتي

لولا وزهراء يقول...

اكتر حاجة تضايقني لما تليفوني يرن والاقي حد يقولي فلانة اكنسل؟ ولا ارنلك عليها ؟
هههههههههههه

لما اكون قاعدة على الكمبيوتر وحد يقعد ع الجهاز كأنه جهازة وكمان اكون بتكلم مع صديقة شات الاقيها جاية تقعد تقري ..


شكرا يا نونو على البوست الجامد ده

لـــولا

سمع هوص (Abo 3li) يقول...

ههههههههه...
انا بقي واخد مع نفسي عهد... ان اكتر كلمة هقولها بعد "السلام عليكم"... كلمة "وانت مالك" او "وانت مال اهلك"... ده علي حسب الشخص ال بيحشر نفسه.. وحسب الموقف ال بيحشر نفسه فيه..

اينعم ناس كتير بتضايق... بس بصراحة يستاهلو... وبالنسبة للناس ال انا ممكن اخاف علي زعلهم... ف دول بطلو يتضيقو مني - لما منخيرهم بتاكلهم ويحشرو نفسهم في خصوصياتي - لما بسكعهم "وانت مال اهلك" ... لانهم خلاص عرفو ان دي طريقتي مع الحشرية....
وبالنسبة لكمبيوتري... انا مكهربوو... محدش يقدر يقرب مني...

وساعات بكون ليا مزاج اكون حيشري... مش بهدف الحشرية في حد ذتها... لكن مجرد غلاسة وتناحة.. علي ناس بتستفز الغلاسة فيا... فبدور علي اكتر حاجة تضايقهم.. لو لقيتها اني احشر نفسي في حاجة بتاعتهم... بعمل كده بأستمتاع... نيهاهانيهاهاها

سيدتك ممكن تخدي بتجربتي.. لان ده الحل الوحيد... علشان متكتميش في نفسويتك... وصدقيني الحل هيبقي صعب في الاول... بس بعد كده هتخدي عليه... وهتلاقيكي بتوقفي اي حد مهما كان عند حدوده بسهولة...

ps: اوعي تعتبري لما سألتك البوست الفات علي اسم اولادك تدخل في حياتك... ده كان محاولة لزيادة الود... لما اقولك مثلا ياأم مريم...هههههههه...
تحياتي

حنعيش يعنى حنعيش يقول...

مش بقولك شعب يفقع المراره
عذرا ...انى حطيت تعليقك باسمك ....تداركت الموقف ....اصلى فهمت انك مادام كتباه باسمك انى احطه فى البوست ...سماح ...بس مش سماح بتاعتنا ...هاهاهاهاى

ندى الياسمين يقول...

فتاه من الصعيد

ربنا يخليكى يارب

ما تقلقيش كنتى هاتلاقينى ما انا منتشره فى البلوج يعنى
هههههههه

نورتي يا جميل

ومتشكره ليكى اوي

ندى الياسمين يقول...

لولا

اه والله بتحصل وساعات بابقى ناسيه ان الميل مفتوح

ماهم الضيوف بتوعنا بيجوا فجأه واكون انا فى المطبخ ارجع الاقي بيقولي على فكره كان فى حد بيكلمك

ببساطه جدا وهو قاعد على الجهاز

حسبنا الله ونعم الوكيل

نورتي يا لولا ومتشكره اوي

ندى الياسمين يقول...

سمع هوص

خلاص ماشي انت تدينى دروس بقى عشان انا ما باعرفش اعمل كده اطلاقا

بس تقدر تقول بدأت احاول احرج الناس بالكلام او اكبسهم

بس عارف انا ساعات من هول الصدمه من كلامهم بجد ما باعرفش ارد اصل الى بيحصل فوق العاده وربنا

وبعدين انت سألت على اسامي ولادي لما قلتلك ان البلوج كله عارف اساميهم
هههههههههه

وعلى فكره اغلب الناس بتقولي فعلا ام مريم او ام خالد
فانت تقول الى على كيفك يا باشا
نورت

ندى الياسمين يقول...

حنعيش يعنى حنعيش

اطلاقا مطلقا يا فندم

انا بس كنت باهزر والله هو اصلا مافيش فرق اوي بس الموضوع والتعليقات

ولو ما كنتش عايزه اكتب باسمي كنت كتبت بغير معرف

انا بس باهزر معاك خصوصا ان الشعب كده استخبى فى الدره وما حدش اتكلم الا انا هالبت انا ابجح واحده فى البلوج ده ولا ايه ؟؟

نحمد ربنا بقى ان رد بعبعه بتاع البوست الى قبله طلع معايا يونسني
هههههههههههههههه

انا اد كلامي لا تقلق

نورت يا دوك

سمع هوص (Abo 3li) يقول...

شكرا جزيلا يا أم مريم... وربنا يخليهوملك..

ندى الياسمين يقول...

الله يخليك يا ابو علي

متشكره ونورت

صمت المشاعر يقول...

هههههههههههههههه والله عندك حق

هوا دا اللي بيحصل فعلا


بتبقي حاجه تخنق

بس تقولي ايه

يبقي انت اكيد في مصر

صمت الحنين يقول...

السلام عليكم ورحمة الله

دا بقى العادى فى زمانا دا

فعلا زى ماقلت ياسمين عبد العزيز بالظبط

وكل الحكايات اللى قلتى عليها دى بتحصل وفى ناس ممكن تتدخل فى أدق تفاصيل حياتك ومش على كده وبس لا دى مثلا تعرف عنك حاجه تقعد مع واحده تانيه تحكى اللى هى عرفته عن دى ودى تقول لدى اسرع من الاذاعه والتلفزيون

ربنا يحفظنا يارب ويهدى الجميع

دمتى بكل خير

ندى الياسمين يقول...

صمت المشاعر

والله ما عايزه اقول يبقى انت اكيد فى مصر

ماهو انا برضه فى مصر اشمعن انا يعنى

ولا اكون انا كمان باعمل كده وانا مش واخده بالي
ههههههههههههههه

لا والله ده انا باحاول اعمل كده ساعات اقول عشان يحسوا يعنى
مافيش فايده ما باعرفش
نورتي يا جميل

ندى الياسمين يقول...

صمت الحنين

ايه ده

انت وصمت المشاعر اخوات ولا ايه ؟؟

بجد حتى مدوناتكم شبه بعض

عموما منوراني طبعا يا جميل


وعندك حق فعلا

لا خدي دي عندك بقى

تعرف تفاصيل حياتك عنووووووووه
وبعدين وهى عندك وفي بييييت تمسك تليفونك
وتكلم واحده صاحبتها انتى بالكاد تعرفيها
وتحكيلها اخبارك وتفاصيل حياتك على مسمع ومرأى منك

ايه رايك بقى ؟؟
اظن دي جديده صح ؟؟

نورتي يا جميل

حفيدة عرابى يقول...

ربنا يعينك ويصبرك
وش البرود وفى أقوال أخرى الوش الخشب
ينقذ صحتنا النفسية أحيانا
بس عايزة أعترف بحاجة
انا القريبين منى وأصدقائى بعرف منهم جابوا حاجتهم منين وبكام
وهما كمان عادى جدا
وساعات نجيب لبعض زى بعضينا من غير ماأسألهم مثلا لانى فاهمة انها هتعجبهم


لكن انا عايزة أقولك على حاجة تانية
انا زعلت جدا لما عزلت
وترددت كنير انى أطلب منك تعرفينى مكانك الجديد
لانك تقريبا مش تعرفينى لكن انا متابعاك باستمرار
وبعدين تشاء الاقدار
مع دور برد حرمنى النوم والصحة انى اعمل أى حاجة مفيدة على الصبح
خلانى أقلب فى المدونات ويعجبنى جدا موضوعك ده
واعجابى يخلينى ابص بصة سريعة على البوستات القديمة
وتكون المفأجاة الجميلة
انا وصلت لك لوحدى
ايه ده:)

ده البلوجر ضيق ياناس:)
انا فى منتهى السعادة والله
معقولة أفكر فى حاجة الاقيها قدامى كده
ولا يسعنى هنا الامقولة اللمبى الخالدة
الدنيا ضيقة سعادتك:)
تحياتى لك

ندى الياسمين يقول...

حفيده عرابي

تصدقى انا عارفه انك متبعاني مش فاكره تقريبا من ايام اللقاء بتاع القاهره دخلت عندك ولقيتك قريتى الى انكتب عندي

وبعد كده لقيت تعليق ليكى مش فاكره فين بتتكلمي عن موضوع عندي برضه

وقلت هاجي ازورك مش فاكره انا جيت ولا لا والله

وبعدين ليه ترددتى هو انا شكلي باعض ولا ايه
هههههههههههههههه

عموما فعلا سبحان الله اللقى نصيب

والدنيا ضيقه سيادتك
هههههههههههه


بالنسبه للكلام الى بتقوله بتاع صحابك
اه طبعا ده موضوع تاني

بصي انتى لما حد تكوني قريبه منه صاحبتك اختك عادي جدا تعملي كده معاهم
ده انا معذبه البت اختي هههههههههههههههههه
وممكن افتش شنطتها وممكن افتشها ذاتيا كمان ولا يهمنى ههههههههههههههههههههههه

انما اكيد انا اقصد حد مش كده وبعدين لكل مقام مقال

يعنى هل تتخيلى انتى قاعده فى مكان فيه مثلا عشرين فرد وهى على الهواء مياشرة وتشتغل اسأله من دي

يلا ما علينا

الصبر من عنده

نورتي يا جميله وبعد كده طالاما متابعاني ابقى شاوري ولا اي حاجه
حتى عشان اعرف اوصلك
منوره يا جميل

قلم رصاص يقول...

عشان كدا عرفت كنتي ليه صبرني يارب
ههههههههههههههههههه

بجد معظم المواقف اللي حكتيها بتحصل عند ناس كتير وانا ياما شوفت حركات من دي .. وبجد فعلا الواحد بيبقى واصل معاها لقمة الغيييييييييييييظ

بس المناخير مش متاجه قصافه
دي محتاجه الليزر يساويها بالأرض
هههههههههههههههههه

ربنا يصبرك ويصبرنا على هذه الكائنات

تقبلي مروري وتحيتي

blue-wave يقول...

هههههههههههههههههههههههههه
لألألألألألألأ
انتى مالكيش حل والله
البوست فعلا تحفه
والناس دى كنيييييييييير مووووووووووت
انا لما ببقى فى المترو وموبايلى يرن لازمن ولابد الاقى واحد حط وشه قدام شاشة الموبايل اروح قايله بمنتهى الزوق اتفضل دا اخويا رد عليه لو عايز:)))

ندى الياسمين يقول...

قلم رصاص

ربنا يخليك يارب

حلوه فكرة الليزر دى
ههههههههههه

نورت

ندى الياسمين يقول...

بلو ويف

ربنا يخليك

اه هى شوفت بقى انا لا باركب مترو ولا باروح في حته ومع ذلك بيوصلولي لحد عقر داري

نورت يا بلو

الجواز و سنينه يقول...

و الله يا ندى يا اختى يا حبيبتى يا مجوعانى دايما يا اللى قلتلك على الثوميه و ما عبرتنيش
شفتى انا فاكرالك ازاى
ههههههههههههههههههههههه
بصى يا حبيبتى
الناس الحشريه دى تضايق جدا
بس هيه مسأله تعود
بمعنى اكيد لما كنتى مسافره بره و جو الغربه مش بيسمح للناس بالتدخل
لكن هنا الناس الحشريه اللى بتسمى نفسها عشريه بتدخل الامور فى بعض

هاقولك على موقف يضحك جدا
مره واحده جات تباركلى على الجواز
و إذ فجأه و انا بفرجها على الشقه
قالتلى حلوه التلاجه دى
هيه واسعه من جوه اصلى عايزه اجيب ثلاجه
وإذ فجأه لقتها بتفتح التلاجه آل تتفرج عليها
انا اتخضيت بس قلت يمكن مش واخده بالها
بس بعد كده عرفت انها كانت قاصده انها تفتحها مش عارفه لغايه دلوقت ليه
و لا استفادت ايه و لا ايه بالظبط اللى كانت عايزاه
ناس غريبه
خدى من ده كتير
و لا تبقى رايحه المظبح تلاقى الضيفه فى ظهرك
مش مشكله لو هيه قريبه اوى منى
لكن اول مره و تلاقيها منتشره كده
و لا تسيب عيالها يهبلوا فى الشقه و مافيش حتى اسكت يا واد
فكرتينى بالغيظه يا شيخه
ناس تقرف

شمس النهار يقول...

:(
كده غيرتي كل حاااااااااااااااجه

طيب اقول ندي ولا ياسمين ولا صبورتي

هعيط انا بحب التانيه

عارفه اكتر واحده الناس بتحشر مناخرها في حياتها انا
واكتر واحده مابتدهمش فرصه برضه انا

يعني ادخل مكان تلاقي العيون خارمه كل شئ لابسه
ونبتدي بقا ده منين وده منين وده ليه
وياسلام لما تطلع واحده تقول لي ماتلبسي سنك!!!!!!!!
ان ديش!!!!!!!!
باروح قايله بالعكس ده انا بحاول البس اللي يكبرني وبرضه مابكبرش::::::::::::))))))))))


وحشتيييييينييييييي

Wanda يقول...

دردر
عمللك بوست على مزاجك :-)) تعالى
:-))))
ارغى براحتك لو لسه فيكى نفس
او اقعدى و اشربى الشاى و اتفرجى احسن
:-)))
او ممكن الاحسن تتنحررى كده و تكتبلنا قصة جديدة :-))))

فى السمك ؟؟ تصدقى انا نفسى قى صنية صايدية :-(( جعانة بشكل

نوتى هاللو انت عزلت مع دردر و فضلتى هناك؟؟فى باى الغبص؟؟

ندى الياسمين يقول...

الجواز وسنينه

والله يا جميل رديت عليكى فى الثوميه

طيب بصي انا هاجيلك بقى مدونتك اقولك على موضوع الثوميه هناك

بالنسبه للموضوع

اه ده موضوع التلاجه ده مشهور جدا

نفسي اعرف بيستفيدوا ايه الحقيقه

لا حضرتك انا مره كان فى واحده هاتمووووت وتفتح دولاب المطبخ عندي
كان نفسي اعرف ليه وايه مشكلتها

بس انا يومها كانت طالبه معايا رخامه وماريحتهاش

طب استنى استنى افتكرت حاجه
مره واحده بتقولي ايه بقى
بتحكيلى ان جوزها شاف جوزي فى السوبر ماركت ونهاية الحكايه ان لما جوزها راح قالها
خدي بالك ده على لسانها الكلام ده
قلتله طب وكان جايب ايه بقى ؟؟؟؟؟؟

شوفى يعنى حشريه وقليلة الذوق والبعيده ما بتفهمش
ههههههههههههههههههههه

المهم حسبنا الله ونعم الوكيل هايجنوني الشعب ده

نورتينى يا جميل وجيالك دلوقتي نشوف موضوع الثوميه

ندى الياسمين يقول...

شموستى الساطعه بالانوار عندنا فى المقر الجديد

والله يا شموسه غصب عني
انا كمان صعبان عليا اسمي والله

بس هاعمل ايه

بس يا جميل هما لازم يقلولك كده اصل الغيره بقى بتقطعهم هايعملوا ايه
هههههههههههههه

منوره يا جميل

ندى الياسمين يقول...

واندتى الزنانه موت
هههههههههههههه

هاجي عندك اهو اشوف الموضوع

السمك لسه واكلاه حالا حضرتك بس مش صياديه مقلي وسنجاري

عونيه حاضر نشوف بقى نوصيلكم على اكلة بياض معتبره

ونوتي خلاص مكتفاها فى رجل الكرسي انت ما بتصدق يا سيد ولا ايه
هههههههههههههههه

عطش الصبار يقول...

مبروك يا جميل المدونه الجديده
اسمها حلو قوى
الياسمين حلو شكل وريحه امال نداه يبقى ايه
بالنسبه للحشريين اكيد انت عارفه ان دى اسلوب وثقافه شعب بس هى قلت عن زمان دلوقت الناس سكان عماره واحده بيقابلوا بعض بالمصادفه
انا واللهى بقالى شهور ما شفتش جيرنى
عودنا بعض على كدا نتقابل بس فى المناسبات فقط
وبعدين مش معاكى القصافه اللى يحشر نفسه ااقصفى مناخيره هتلاقى تلت الشعب مش هيعرف يشم النسييم
تحياتى يا قمر

ندى الياسمين يقول...

عطش الصبار

ربنا يخليكى يا جميل متشكره اوي على كلامك الجميل

انا ماليش جيران اساسا
ههههههههههههه

انما دول قرايب اصحاب كده يعنى

نورتي يا جميل

يــوم جــديد يقول...

تصدقي بالله
قولي لا إله إلا الله
أنا جاية هنا ومكنتش أعرف إن دي انتي وقاعدة أقرأ البوست الحشري ده لا بي ولا علي وطول القراءة وأنا عمالة أقول
هي
اه أكيد هي
وربنا هي

مش ممكن تكون واحدة تانية بنفس الأسلوب وبتستخدم نفس المصطلحات وكل حاجة
نزلت بوستين لتحت وعرفت إنك الست المعزلة :) وطلع استنتاجي صح
أنا أعرف المدون من ريحته على طول .... قصدي من أسلوبه

على فكرة أنا بعتت لك ميل عشان تبعتي لي لينك المدونة الجديدة وفي احتمال من 3
1- إنك ما شفتيهوش في زحمة الإيميلات
2- إنه ما وصل أصلا والحركة دي حصلت في كذا مرة وهرفع قضية على هوتميل
3- تكوني اعتبرتيني حشرية عشان بطلب منك لينك المدونة الجديدة :)

بجد نوعيات البشر دي موجودة في الدنيا ؟؟
أنا فعلا اتخنقت لما قرأت بس لو أنا مكانك كنت هعمل ايه بقى
ربنا يصبرك يا ندى يا أختي
حلو الاسم الجديد

ندى الياسمين يقول...

يوم جديد

لا والله يا جميل ما وصلنيش

انا رديت على كل االميلات نفر نفر

اكيد ما وصلش يا جميل
هو انا اقدر

عموما بما انك شمتينى وجيتى بقى
ههههههههههههههه

منوره يا جميل

أحمد عاطف يقول...

ندى الياسمين

كلمتين انضافوا لقاموسي على يدك

صدغ ومخمضة

بصي الشعب حشري دا امر متعارف عليه

بس خلي بالك كثرة التعامل مع الكمبيوتر بيخلينا فعلا لا نتقبل الامور دي

مش مصدقاني انتي

انا نفسي لاحظت الامور دي فيا زمان كنت باتقبل اي سؤال

لكن من كثرة التعامل على الكمبيوتر بقيت لا اقبل ابسط الامور لدرجة لو واحد قالي انت جايب الولاعه دي منين

الرد المثالي بتاعي وانت مال ...

مع ان اصحابي بيقولولي انت زمان كان عادي يعني ان حد يسألك عن اي حاجه

الا قوليلي صحيح انتي بتعرفي تعملي تورته

اه وبتعمليها ازاي

نيجي لنقطة اللي يقولك انا ممنوع منه او مبشربوش

الغلط عندك انتي ... متزعليش مني ... انتي عايزة تضايفي

يبقى اسردي على الضيف ما يمكن عمله ولا يكلف الله نفسا الا وسعها

تشرب ايه هايقول الكلمة المعتادة بتاعة المصرينن متشكرين لسه شارب

طب نعمل شاي ولا قهوة ولا نجيب ساقع

ساعتها هو هيختار

قوليلي بقى التورتة بتتعمل ازاي الا صحيح انتي بتاخدي كورسات

بلا قلبة دماغ :D

محمد فؤاد (صاحب عمود النور) يقول...

انا بقى دايق من نفس الطبق بتاعك دا

وانا فى الشغل ورايح ببدله الاقى حد يقولى(جى بدله ليه مالهاش لازمه)

طب وانت مالك؟؟؟؟ انا حر ان شالله اجى عريان يا اخى

ولا مثلا لما ابقى جايب بنطلون جديد او عامل قصه جديده لشعرى يالهوووووى لا دا فى موقف كان لازم ارد كدا

زميلى : ايه الشنطه دى انت رايح المدرسة

انا: اه اصل ماما عاملالى سندوتشات وكنت لازم اخد الشنطه

مع العلم ان الشنطه عادية كروس قماش شيك جدااا وغاليه

لا بصى انا ممكن اعملك بوست عن كمية الحشرية اللى بتعرض ليها

ندى الياسمين يقول...

احمد عاطف

هههههههههههههههههههههههههه

انت لسه فاكر مخمطه هههههههههههههههههههههههههههههههههه

طب صدغ دي عايزه تشكيل طيب
بكسر الصاد والدال

دى كلمة بابا تصدق ما خدتش بالي انى كاتباها ههههههههههههههههه

المهم بالنسبه لموضوع الكمبيوتر لا لا خالص مش الفكره

انا طول عمري من قبل الكمبيوتر ما باحبش الطريقه دي فى الكلام

ما باحبش الحشريين بجد بالشكل ده

بص انا ممكن حد يقولي كورسات ايه بلاش وجع دماغ بس بطريقه تكون لطيفه او يعنى ابلعها انما فى طرق زفت الحقيقه

بالنسبه لتقديم التحيه للضيوف
اصل انت مش متخيلنا

انا ممكن يبقى عندي عشر افراد كده مثلا ضيوف ومش جايين مع بعض ومش قايلين انهم جايين

مش معقول اقف اسأل كل واحد انت بتحب ايه ده يبقى كافيه حضرتك

وبعدين انا ممكن اروح عند حد ولاي سبب ما اشربش التحيه بس ارد بذوق

استنى لما يجى عندي واقوله معلش والله اصل انا ممنوعه منه او مش قادره

انما تخيل المنظر وانا على باب الاوضه ايه ده عصير برتقال اشربيه انتى بيعملي حموضه ؟؟؟!!!!!

ايه ده ؟؟؟؟؟

ندى الياسمين يقول...

محمد فؤاد

ايوه عارفه الشنطه

ده شنطه عجيبه يا محمد هى بيبقى فيها ايه
ههههههههههههههههههههههههه

وبعدين ازاي تلبس بدله وانت رايح الشغل فى الاحمر والاخضر ياعم والوانتك دي
هههههههههههههههه

القصافه ايه ياعم خدها بقى لكل مناخير طويله تقابلك
منور يا باشا

قطرة وفا يقول...

تحححححفة

بجد انصدمت من حاجات


معقووووووولة الناس توصل لدرجاااتي؟


ومتخافيش مش بس الشعب المصري كدا..الشعب العراقي وبلا فخر كدا برضو هههههههههههههه


عجبني البوست و التعليقااات

احيانا انا مع صاحباتي او مع اهلي يعني عادي الحشرية بتشتغل هههههههههههه...بس موضوع الكمبيوتر بجد رفعلي ضغغغطي...انا اخوواااني لما يجوو ورايا اقلب الدنيا عليييهم...وانا عارفة انهم مش بيجوو يفتشو بس كدا من الزهق او عشان يهزرو معايا او كدا....بس مبتحمللش...

بس انا عادي اشوفهم بيعملو ايه واناقشهم هههههههههههه...مش الاخت الكبيرة؟؟؟؟


بس يعني صحيح احنا بنسال وكدا الناس اللي نعرفهم بس مش اي احد و مش بنصر..يعني احيانا بتسالي وحدة عن حاجة و انتي مش مفكرة انها حاجة خاصة تلاقيها تهربت...يبقى خلاص...نحترم نفسنا او نعتزر و نسكت...او حتى لو تنصحي وحدة و انتي عارفاها كويس بس من باب المحبة وانك خايفة عليها...تقوم رادة عليكي وانتي ايه دخلك او متناقشينيش بالموضوع دا حتى لو حرام!!!...وتكون سائلتك قبل شوية عنو!!!!!!

يعني بحس ان ردة فعلها بتبقى اوفر...مش انتي قلتيلي ايه الخلل اللي حاساه؟؟..و كمان مش انتي زي اختي ليه بتتصرفي كدا...بس فهمت انو الناس مش بيحبو تكلميهم الا باللي يحبووه


سووووري خرجت عن الموضووع اوووي...بس و اسفة على الرغي بس دا تعبير بالاعجاااب :)



ملاحظة:جربي تحطي فترة معينة بعدها جهازك يقفل و ممنوع الدخول ليه الا بكلمة مرور دا اريح بجد


صحيييح...واللي تسألك على الكورسات و كتير حاجات زي ملكيش فيها وكدا دا نابع عن الغيييييييييييييرة والحقد بدل متشجعك!!!..او تلاقيها مبتفهمش بالكمبيوتر و تقعد تقولك جهاز تافه!!...

اختك..

ندى الياسمين يقول...

قطرة وفا

يبقى الحشريه متفشيه بقى
ههههههههههههههه

بصي فى حكاية الكمبيوتر ده انا عملت كل حاجه

لو عملت الجهاز نفسه بباس وورد هايقولي الباس وورد كام

يا مؤمنه ده انا كنت باشيل وصلةالنت خالص كان بيوصلها ويقعد برضه

متشكره خالص خالص على الكلام الجميل ده وانتى نورتي يا جميل

جنّي يقول...

السلام عليكم

والله انا مش عارف يا اختي انتي بتجيبي الوقت دا كله منين والكلام دا كله منين .. كل دا بوست واحنا فاضينلك نقرا دا كله ونعلق كمان ..

معلش انتي السبب .. الظاهر ان احنا اتعدينا من الامثلة اللي كتبتيها ..

بصراحة هي مش قلة ذوق وحشرية .. دي غتاتة وتباتة ..

وبعدين مرارة ايه اللي شلتيها .. اكيد دي حاجة تانية خالص .. هو اي حد تجيله المرارة ولا ايه ؟ انتو ها تعملوا راسكو براس الريس ..

كفاية كدا احسن الريس يموت ويتهموني فيه ..

سلام يا ندى

ندى الياسمين يقول...

جني

ههههههههههههههههههه
والله يا استاذ سعيد انا شايلاها من ست سنين واكتر

يعنى هو الى بيقلدنى بقى

والبوست طويل اه انا عارفه معلش حقكوا عليا بس الرغي عاده بقى انتم عارفين
هههههههههههههههههههه

نورت يا فندم

micheal يقول...

يا نهار أبيض..ده موقف واحد بس من اللي قلتيهم كفيل بإنهيار عصبي بس على فكرة احنا جايز نكون شعب حشري بزيادة..ساعات بحس أن الناس بقت مضفرة في بعض..اه والله ..كله كتلة واحدة وكله ناطط في حياة التاني ده غير الافتاء طبعا في كل حاجة وصغيرة
عاوةز أقولك أسلوب لذيذ رغم طول البوست
تحياتي

ندى الياسمين يقول...

مايكل

والله طول البوست ده ماساه انا عارفه
بس تقول ايه يا اخويا من كتر ما الواحد اتفقع على فكره
ههههههههههههههه

متشكره لك اوي وانت نورت

واسفه على انى طولت عليكم

mrmr يقول...

ندى حبيبه قلبى

انت زعلانه ليه
دى يا حبيبتى طبيعه البشر نادرا لما تلاقى حد عايش فى حاله ويقول وانا مالى خلينى فحالى
هو فعلا الحشرى ده اسلوبه يفقع المراره لكن انتى تشكرى ربنا انك شايلها اصلا
عقبال ما اشيها انا كمان لحسن حاسه انها خلاص على وشك الانفجار
لكن ح احاول اغير من طبيعتى وخلينى بارده علشان ما اضطرش اشيلها
باى يا جميل وربنا يصبر قلوبنا

amirelhob يقول...

بسم الله ما شاء الله

عارفه البوست دا فاكرنى بايه بلقطه فى فيلم عريس من جهه امنيه وهما بيتفرجه على اللوحات فى المعرض هو وبنته والراجل الرسام قعد يقول اللوحه دى خدت منى كفكره 6 سنين وكتنفيذ يوم واحد


بجد بوست جميل جدا وبجد مش عارف انتى رصدتى كل الحاجات دى ازاى وجمعتيها كلها فى وقت كتبت البوست ازاى فعلا تقريبا انتى قولتى كل المواقف اللى بشوفها حتى لو مش نفس الكلام بس اكيد نفس الطريقه ربنا يوفقك وترصدى اكتر واكتر ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

ندى الياسمين يقول...

مرمر

حبيبتى بعد الشر عليكى

والله انتى عارفه ان قلة الذوق بتوجعني اكتر من الحشاريه

انا اصلا بطبعي واضحه وقريبه ومش باحب ابقى لغز يعنى

انما الطريقه بقى بتاعة الحشريين لا تطاق

تحياتي نورتي ياجميل

ندى الياسمين يقول...

امير الحب

يا سيدى يا عينى يا لالاي

ايه ده يا ولاد جيتار وقميص مفتوح لحد هناك كده عندي فى مدونتي

هالبت انا باحلم ولا ايه
ههههههههههه

نورت يا امير اولا
انا باهزر اوعى تزعل مني

انا هاجوزك البت بنتى بس بشرط تلبس قميص بدون زراير

وبالنسبه للرصد
اصل فى مثل بيقول كتر البكا بيعلم النواح

فالواحد من كتر ما اتعرض للمواقف دي حفظها عن ظهر قلب

ومتشكره لك اوي وانت شرفتنى بجد
واعى تزعل من هزاري

غير معرف يقول...

انا شايفه ان حضرتك مزوداها شويه ...يعنى مثلا فى بعض الحالات مش بيبقى غلاسه وغتاته وكده انما بيبقى فى اغلب الاحيان مجرد عشم فيكى مش اكتر