الخميس، 18 مارس، 2010

الحمامه البيضاء .... كنز


السلام عليكم يا اصدقائي

بقى فى دماغي يجي خماشر موضوع عايزه اتكلم فيه متحوشين ومش لاحقه اتكلم على فكره حد يتكلم بدالي شويه مش فاضيه

اولا وباديء ذي بدء تدعولي ربنا يعنى اصل اخوكم مزنوق زنقه هباب فى البياض والدنيا عندي ضلمه على الاخر
لعلمكم انا باكتب من تحت الانقاض

ثانيا ندخل على الرغي بقى

عاااااااااااااااا ما عادش اسمها رغي

طيب زي بعضه نخليها ندخل على الندى بقى

ايه بقى موضوع الحمامه البيضا

بقى احنا يا جماعة الخير  كنا مربيين حمام من كام سنه كده
رضا اصله غاوي حمام وبالتالي ضحك  عليا واشترى جوز حمام وقالي بس لمريم تلعب بهم وتتفرج عليهم وحطهم فى قفص زي قفص العصافير كده بس كبير على السلم وطبعا واحده واحده بقت اوضه مليانه حمام يا حلولي

طبعا انا بره الليله دي ماليش فيها خااااالص من كل كام اسبوع مره اطلع اتفرج عليهم من بعيد لبعيد
(بدون اي تريقه ما باعرفش امسك اي كائن حي فيه النفس باشعر واصرخ واطلع اجري )

المهم مره رضا قالي فاكره الحمامه البيضاء الى انتى كنتى بتحبيها ؟
قلتلها ماالها ما تقولش مااااااتت
قالي لا مولفه بقالها كام شهر ومش بتبيض مش عارف ليه
قلتله طيب اخدها اوديها لدكتور امراض نسا ولا ايه

فسأل واحد من الى بيربوا الحمام قاله يااااه دى حاجه زي الفل
دي كنز دى بقى بتربي الحمام الصغير كويس جدا

دي بقى تخليها عندك ا حتياطي
ممكن حمامه من الى عندك تموت وهى راقده على البيض
او حمامه لسه هبله واول مره تبيض فمش بتعرف تاكل ولادها كويس فتسيب لها بيضه واحده وتاخد التانيه تديها للحمامه الى مش بتبيض دي

او اصلا تاخد بيض بتاع حمامه من الى هو انواع غاليه وبدل ما تعطل هى وترقد وبعدين تقعد تأكل فى الزغاليل الصغيره تقوم تدي البيض للحمامه البيضا ترقد هى عليه وبالتالي الحمامه الاصليه تبدأ تبيض تاني اسرع وهكذا

وفعلا رضا عمل كده وقالي ان الحمامه لما حطلها البيض بدون اي مشكله رقدت على البيض فعلا وهى ووليفها كمان كانوا بيتناوبوا عليه عادي ولما فقست اكلته عادي جدا
واستمرت على كده فعلا

بتهيألي واضح انا قصدي ايه من الكلام ده

حقيقى مش عارفه ليه كل اثنين ربنا ما اعطاهمش من فضله اولا ما ياخدوش طفل او اثنين يتمى يكسبوا فيهم ثواب
ويسعدوا هما كمان بيهم
ليه نفضل سنين وسنتين ممكن يوصلوا عشر سنين مثلا وزياده
بنجري ورا العلاج والحقن المجهري واطفال الانابين  ونضيع عمرنا كده

ماشي ماشي عارفه والله
عارفه ان كل واحد عايز ولد من صلبه وكل واحده نفسها تحس الامومه فى قلبها
ما قلتش لا
اجري ودوري واتعالجي واعملي كل ده
بس وانتى فى حضنك طفل يتيم غلبان هايطلع فى الغالب مشرد منبوذ من المجتمع من غيرك انتى واسرتك معاه
مش  هاتخسروا حاجه بالعكس
حتى لو خلفتي
وحتى لو كان نوع المولود الى هاتخلفيه هايبقى مختلف عن الى انتى اتبنتيه
ما فيش مشكله والله
يعنى بالله عليكى لو لا قدر ا لله اخوكي ولا اختك ولا اخوك ولا اختك توفاه الله مثلا وسابولك ابنهم ولا بنتهم مش هتاخده تربيه وسط ولادك ؟
ولا هاترموهم فى الشارع
كتير اوي اوي حالات كده يا جماعه
كتير اوي واحد متجوز سابقا وعنده اطفال وواحده متجوزه سابقا وعندها اطفال وبيتجوزوا ويعيشوا عادي
اه معلش هايبقى فى خايله شويه يا سيدى بجملة
اساسا حتى الاخ والاخت لازم يبقى عليهم رقابه مش هاتتساب كده
وفى النهايه انت قاصد وجه كريم
ومش عايزاكم الله يصلح حالكم تقولوا اصل لو ولد هايحبس حرية الست لما يكبر
واصل لو بنت هاتحبس حرية الاب
( طبيعى مجتمعنا متحفظ حتى داخل العائله الواحده )
الهي يصلح حالكم بلاش فيلم العذراء والشعر الابيض
الموضوع مش كده خالص

ليه الاقي واحده قعدت 15 سنه تجري لحد ما خلفت
طب ما فى ال15 سنه دول تكوني ربيتى طفل او حتى اثنين وعديتى بهم لبر الامان
وابنك  الى من صلبك يجى على مهلك

انتم عارفين
انا اعرف لحد الان 4 حالات تاخر فى الانجاب لخمس وست سنين بدون اسباب معلومه
ولما كنت باحلل الموضوع الاقيه زياده فى التوتر لاسباب كتير اهمها انها منتظره الحمل بقلق

تخيلوا لو واحده قعدت كده عشر سنين مش لو كانت شغلت نفسها بعد اربع سنين مثلا كانت زمانها خلفت من زمان
طبعا انا هنا باقصد كفالة يتيم
تبنى بالرعايه
ولكن مش بوهب الاسم

من فتره بسيطه كتبت شيماء مدونة شوية فضفضه عن موضوع التبنى
هى كان لها راي فى موضوع التبنى جايز نابع من ان اليتامى واللقطاء صعبانين عليها

وهو ان ليه ما نشوفش حل لموضوع التبنى ويبقى التبنى حلال

وقالت قياسا على زرع الاعضاء خلونا نوصل لاتفاق مع الازهر ونشوف حل لموضوع التبني

وطبعا ده ما ينفعش بتاتا البته
الايه واضحه وصريحه
وادعوهم لابائهم

ما ينفعش فيها اتفاقات دي

انا اقترحت  عليها حل فى الرد على موضوعها هناك هاقوله لكم هنا عل وعسى يكون فيه الشفا

والحقيقه الحل ده كان بابا اقترحه على شخص ربنا يكرمه لقى لقيطه فى مكان مهجور وصعبت عليه وخدها رباها وسط ولاده
وكان قلقان من فكرة ان الاسم وانها لما تكبر  هاتسأل وهايبقى صعب عليها تعرف  الحقيقه وصعب المجتمع يتقبلها

الاقتراح بقى

هو انك بطلب بسيط وقت عمل اوراق التبنى
تخلي نهاية اسمها زي نهاية  اسمك
يعنى تضيف بس على اسمها لقب العيله بتاعتك
بالتالي لما تكبر وتسأل البنت قولها والله يا بنتى انتى ابوكي كان اخويا كان ابن عمي كان اي حد وتوفاه الله فى حادث هو ومامتك وما لكيش حد الا احنا
وانا خدتك اربيكى وسط ولادي
ويكون كمان باقي ولاده عارفين كده والاصحاب والمعارف عشان الكل يتفق على نفس الروايه وما يأذوش نفسيه البنت
من هنا نكون ما عملناش مشكله فى الانساب ولا خالفنا اوامر الاهيه
وكمان بدل ما نقعد نهاتي مع المجتمع بحاله نقنعه ان الطفل مالوش ذنب
وما يبقاش الطفل لما يكبر لصيق به لقب (ابن حرام )
للاسف الشديد ده الى بيحصل


وعلى فكره الشيخه فاطمه الكتبي الله يصلح حالها زوجة الشيخ زايد آل نهيان الله يرحمه
رئيس دولة  الامارات سابقا  عشان الى مش عارفه

كانت عندها يجى عشرين ثلاثين بنت كده بتربيهم من ايتام الامارات وكان الكل بيتكلم عنهم بيقول بنات الشيخه فاطمه
وكانت برضه فى الاوراق الرسميه الحقت عليهم لقب عيلتها الى هو الكتبي

واحتذى بها كتير من الامرا ء والشيوخ هناك وعملوا كده


نداء حار الى كل حمامه بيضاء
شوفيلك زغلولتين ربيهم الله يخليكى انتى والزغلول الكبير
اكسبي فيهم ثواب واسعدي نفسك وعيشي حياتك واسعي برضه ما حدش قال لا

تصوروا البوست ده لايق على عيد الام

الى ماجابش هديه لمامته يروح يجيب يا ولاد ما تزعلوش مهمهاتكم فى عيد الام

واي واحد هايطلع يقولي عيد الام حرام على مستوى البلوجر كله
ساضرب باحترام الرأي الاخر عرض الحائط واقوله
................
بلاش كفايه عليه الحائط

وكفايه عليكم كده برضه بطلوا رغي شويه صدعتوني

هناك 67 تعليقًا:

sony2000 يقول...

بجد ياريت
ان يكون عندنا الفكر دا
علي الاقل لو اتطبق
بعد مده موش هيكون في لااولاد شوارع ولا غيره

Che يقول...

اول تعليق ليا فى المدونه الجديده و الف مبروك و يجعلها خير دايما يا رب
البوست رائع أوى ، و فعلا زى ما سونى قالت يا ريت نلاقى الفكر ده عندنا عشان على الاقل ده ابسط انواع التكافل اللى فى الاسلام و حتى زى ما انتى قلتى يبقى حسنه تنفعنا يوم لا ينفع مال ولا بنون

جنّي يقول...

السلام عليكم

جميلة جدا المقدمة لموضوع اجمل ..

تربية الايتام وكفالتهم ثوابه الجنة وكافل اليتيم مع النبي صلى الله عليه وسلم في الجنة ..

وفكرة اللقب جميلة ولكني لا استطيع الافتاء بتحليلها او تحريمها .. فلست اهلا للفتوى ..

بالنسبة لعيد الام بحتفل به غصب عني بس يوم 14/3 يوم وفاة امي رحمها الله وان كنت احتفل بهاودائما بشكل يومي وفي كل صلاة بالدعاء لها .. أليس الدعاء اجمل هدية وان كنت لا ادعي الصلاح ( ولد صالح يدع له) ..

بس تعرفي انا كنت اربي الحمام وانا في الاعدادي والثانوي ولم امر بالحمامة المربية والتي لا تبيض واول مرة اعرف هذا الامر .. ولكن اعرف انه يمكن تبديل البيض لسلالات نقية تحت امهات تعتني جيدا بصغارها ..

تحيتي

norahaty يقول...

كما قال الأستاذ
سعيد(جنّى )انا
ما اقدرش أفتى
فلست أهلاً للفتوى
لكن الأهتمام باليتيم
وكفالته والاشراف عليه
دامن صلب ديننــا الأسلام
لكن حأضيف كمان قول الشيخ
الشعراوى فى تفسير قوله تعال
(ربى ارحمهما كما ربيانى صغيراً)
بأن الله عز وجل قال ربيانى
ليدخل فى طلب الرحمة كل
من اشرف وساعد فى تربية
صغير او صغيرة وأن لم ينجبهم.

مصري جدا يقول...

ما بتعرفيش تمسكي كائن حي

والنبي ايه

ورضا كائن ايه؟

مسيري اخد بأيده علشان يولف بس برا المنصوره اشاسا

سمع هوص (Abo 3li) يقول...

الاول نغير نظرة المجتمع للايتام... واطفال الشوارع...


تحياتي علي النصيحة

سمكه واحده يقول...

بوست اكثر من رائع
وياريت المجتمع يتغير شويه ولا شويتين تلاته كده ونبدا نفتح مخنا ونجرحش ناس ملهاش اي ذنب ونخلي كل انسان يحي حياه طبيعيه وياخد فرصته الكامله في الحياه
وبجد فكره جميله جدا
ياريت كله ياخد باله منها بكده لا هيبقي في اطفال شوارعغ ولا متشردين ولا انسان طالع كاه وحاقد لمجتمع مدهوش فرصه ويطلع مجرمين وبلاوي كتير
ياريت كلنا نتبني نفسنا
اه والله
تحياتي

أحمد عاطف يقول...

سبحان الله

يعني هو ماينفعش نربي عيل الا اللي بنتبناه

يعني الحمامة البيضا الكنز دي

ماينفعش جوزها يتجوز واحده تانيه وهي تساهم في التربية

يعني ربنا مدينا حلول نورانية سهله وبسيطة

واحد مراته مبتخلفش مقلناش يتخلى عنها

بس فيها ايه بقى لما يتجوز واحده تانيه ولما يخلف منها الحمامة البيضا تربي ايه المشكلة

لولا وزهراء يقول...

اجدع ندى على احلى ياسمين

عرفت فركتك والغرض والقصد منها من اول سطر ولكن لاننى باعشق كلام حضرتك قرات الموضوع مرتين لان اسلوبك تحفه واخر شياكه ...
عن تجربه حصلت امامى وكنت شاهده عليها فى سيده فاضله كانت قد تزوجت من سنه المهم راحت للطبيب قالها بكل صراحه انتى عندك عيب خلقى مش ممكن يحصل حمل طبعا انهارت ونفسيتها تعبت اقترح عليها زوجها انهم يكفلوا يتيمه ولا سباب ما اتصلوا الناس بيا المهم بدأنا رحلة البحث بين دور الايتام والله العظيم طلع عين اهلنا رغم ان فيه مسئولين اعرفعم فى هذه الدور لكن بيحطوا اشترطات صعبه جدا جدا ...

انتى عارفه يا ندى لما حد ياتخر فى الانجاب الاهل بقى ربنا يكرمهم يقعدوا يرغوا طلقها واتجوز عليها او يا بنتى اخلعيه علشان تلحقى تخلفى لى حتة عيل وهكذا
حلوه فكرتك واضم صوتى لصوتك ...
كل سنه وانتى طيبه وياترى مريم جابت هديه ربنا يحفظ لكى ابنائك ياااااارب
ده حال المجتمعات الشرقيه
الله المستعان ...
زهراء

عمرو جويلى يقول...

السلام عليكم
دعوة طيبة لكفالة اليتيم
أما عن القب فأعتقد إن
الموضوع محتاج فتوى شرعية
خالص تقديرى

عطش الصبار يقول...

يااااااااه ربنا يبارك فيكى يا ندى الياسمين فكره جميله والله هتنقذ اطفال كتير وتديهم الامان
ان كنت مره بزور قسم اللقطاء فى مستشفى عام ولقيت كام طفل منهم طفله فكرتنى [اطفال الصومال ولقيت اللمرضات كل واحده جايبه طفلها تربيه معاهم فرق فظيييييع هما واطفالهم الد هينط من وشهم من الصحه ودول اطفال الصومال مع ان كان بيروح لهم مساعدات ماديه وغذائيه وملابس لكن يظهر كانت ليها طريق تانى
المهم قدرنا نعمل لهم بتبرعات اهل الخير مكان أخر لاننا بالمتايعه عرفنا ان الاطفال دول بيتقفل عليهم الحجره ليلا وحتى الصباح دون رعايه منهم طفله عرفت ان عمرها 6شهور وجسمها كانها مولوده حديثا
المهم كان فيه ماسى وحاجات من الخيال كانت بتصل معاهم
وفعلاكل واحده وواحد يتخيلوا لو انقذوا اطفال زى دول شوفوا عندربنا هيبقوا ايه
تحياتى
نسيت اقلك ان الاطفال الاكبر لحد ما يطلع الصبح حسب كلام ممرضه شلفت الوضع ده كانوا بياكلو البراز لانهم طبعا بيسيوهم فى الصيف باخف ملابس 

adel يقول...

هههههههههههه
تعليق مصري جدا في الجون :)

ماعلينا

كلام جميل
بس مين قالك ان الاهل و الاقارب و الاخوات كلهم ناس كويسة و محدش هيقول للبنت بعد شوية انها لقيطة ؟؟؟
اشك
الدنيا مش جميلة و حلوة قوي كده
خصوصا ان كل عيلة فيها كويس و فيها زبالة
والزبالة ده اللي هيعمل فيها حمامة السلام و هيقول للابن او الابنة المتبنية دي
وكانك يابوزيد ماجبت زيت

صيدلانيه طالعه نازله يقول...

ايه الكلام الجميل ده
تخيلى من بدرى ما قريتش بوست مريح للاعصاب و هادى زى البوست ده
يمكن عشان صوره الحمامه البيضا اللى فى اوله
كلامك جميل قوى و فعلا كفاله اليتيم و تربيته حاجه جميله قوى و يكفى ان اللى حيقوم بيها حيجاور الرسول فى الجنه
كمان حكايه كتابه الاسم انتى اقترحتى اقتراح رائع ميجرحش مشاعر الطفل و الطفله دى اما يكبروا زى ما بيحصل فى المواقف دى دايما

ربنا قويكى على البياض يا حاجه و نيجى نزورك ان شاء الله و نقص الشريط

ستيتة حسب الله الحمش يقول...

حراااااااااااااااااااام عليكي
ادعي عليكم كلكم في مولد النبي؟
حرام يا ندى يا اختي
طب الخط اقسم بالله حول أهلي كلهم
لأ اتصرفي كبريه إن شا الله تحقنيه عند ممدوح فرج

المهم
بعد جهااااااااااااااااااد عرفت اخلص البوست
وكنت يا ابلتي كتبت عن القصة العجيبة دي في نفس التوقيت السنة اللي فاتت واسمه "اسم ابوك ايه" وحكيت عن وفاء صاحبتي اللي اتغيرت حياتها فعليا بعد ما تبنت جنة

ياريت الناس تسمع
والله درب السعادة قريييييييييييييييب
بس الناس عميت ابصارها
مش عاوزين يسمعوا من حد حاجة

بس انا مش موافقة خالص على قصة اللقب
لأن السر كده كده ها يطلع طالما أئتمنتي عليه عيلة فيها الصالح وفيها الطالح

لكن يا ندى هناك خمسين طريقة ممكن تتقال وتتعمل تخلي حياة البنت او الأبن عادية جدا

بس الناس تخلي عندها نية
هو احنا بنقول لكم ضحوا
ده احنا بنقول عيل في حضنكم بالدنيا واللي فيها وها تتهنوا وتخشوا الجنة

وسيبكم من الأفلام العربي

تحياتي على الرغي
ومازالت مصمصمة ان الإسم اللي تنازلتي عنه غصم وإتدار هو ده انتي
عاااااااااااااااااااااااا
ندى ده مش بالعاه من زور

صيدلانيه طالعه نازله يقول...

انا كمان عينيا وجعتنى زى ستيته حرام عليكى يا ندى هانم عينيا ضاربه لوحديها و مش ناقصه

قلم رصاص يقول...

ينصر دينك والله

فكره نبيله جدا وقولتيها بشكل اجمل

بس ابقي حاسبي بقى بعد كدا واعرفي ان اخوكي عضمه كبيره ومش هيقدر يقرا كل البوست اللي أطول من الطريق الدائري دا كله لمجرد انك انتي اللي كاتباه
هههههههههههههههههههههه

لا خلاص خلاص هقراه عادي..بس من غير زق وشتيمه طيب ^_^

اضم صوتي لصوت الدكتوره ستيته وباطالبك بضرب الخط ضربا مبرحا حتى يستغيث
هههههههههههه قصدي تكبريه شويه يعني

كل ما اجي اقرالك بوست بعد التجديدات
اقول لنفسي :

مين دي ؟

هههههههههههه

جزاكي الله خيرا على الموضوع المتميز

في امان الله

Wanda يقول...

فعلا كنز امينة رزق البيضاء ديه :-)

بصى يا دردر
الموضوع ده زمان فى بيوت العيلة الواحدة بتلاقيه اختفى لان الحمامة البيضاء كانت بتحضن كل اطفال العيلة و تربيهم و خاصة الايتام فيهم
بس دلوقتى بقى كل واحد لوحده و فى حاله قوى
لدرجة محدش يعرف الباب المقفول ده جايز مقفول على ايتام و بيتين لوحدهم و محدش بيساعدهم و جايز الناس بتأذيهم فمشعايزين الا الباب يتقفل عليهم و خلاص

بص هى فى نقطة
ان الحمامة تكون ام فعلا مش مجرد مربية ، يعنى ايه؟
يعنى الام بتضرب بتقرص على الودان ساعات كثير علشان الطفل ينصلح حاله
هى بتعمل كده محبة و خوف مش مجرد اذية
فى نوعية الام المربية او مرات الاب مثلا حتى بيكون الموضوع ياعقاب قوى يا دلع و حنية قوى
التوازن ده بيكون صعب بجد

و بعدين لو قراتى عندى موضوع بيومى افندى
اعتقادى ان الراجل هو الى صعب يقبل طفل مش من صلبه او حتى شاكك فى صلبه

المرأة معندهاش نفس المشاكل ده
لان احساس الامومة جواها غلاب و بيتطغى على العقل نفسه

عندى واحدة عانت لحد ماربنا كرمها بالذرية
مسالتهاش فى موضوع التبنى بس حسيت انها ساعات بتقدرش على بنت اختها طول الوقت
اه تطبطب و تدلع و تلاعب بس مبتعرفش تقسى و تشخط فبتتعب فى اخر اليوم و مابتصدق الام تاخذ بنتها
دلوقتى اكيد بتعمل كل ده مع بنتها هى
الدلع و الشخط و الطبطبة و القسوة

بس
الا قوليلى حتدهنى الحيطان بلون ايه ؟؟

Abu ShoSho يقول...

كل سنة و حضرتك طيبة

غير معرف يقول...

فكرة ممتازة اعجبتني
عبد الجليل

نـــوارة يقول...

:(

كلامك سليم وباحييك عليه

كل سنة وانتي احن ام ربنا يخليكي ويحفظك يارب

وحشتني موت يالغلا

وفكرة الوالد تحفة ربنا يبارك بعمره

دمتي بحفظ الرحمن

صمت المشاعر يقول...

بجد كلامك جميل جدااا

بس الناس مش بتفكر كدا

او الاغلبيه مش بيفكروا كدا كل حد زي ما قلتي عاوز ابن من صلبه زي ما بيقولوا بس فيها ايه يني لو تبني طفل واعتبره ابنه

جزاكي الله كل خير علي البوست الجميل دا

ندى الياسمين يقول...

انا جييييييييييييت يا بشرررررررررررررررررررررررررررررر

ايه ده استعباط والله الكمبيوتر يبوظ وبابيض الشقه حاجه تجيب تخلف عقلي

يلا بقى عشان امزمز فى الردود

ندى الياسمين يقول...

سوني

مرسي يا جميل

وياريت فعلا

ندى الياسمين يقول...

شي

مرسي يا عمرو ونورت والله

ندى الياسمين يقول...

جني

لا اعتقد ان فيها ايه شبهه شرعيه

لان الاصل اننا بنتكلم عن اللقطاء الغير معلومين النسب اصلا

وعموما لو عرفت حاجه بلغني


والله يرحمها يا فندم وتعيش وتفتكر

وعلى فكره رضا كمان كان بيربي حمام وهو صغير وبرضه قال انه عمره ما قابل حاجه كده

تحياتي لحضرتك ونورت

ندى الياسمين يقول...

norahaty

تمام الله يكرمك

انا شايفه شرعيا مافيش فيها مشكله

لو حد فيكم عنده معلومات تانيه ياريت يبلغني

نورتي يا جميل

ندى الياسمين يقول...

مصري جدا
ههههههههههههههههههههههههه
كده يا استاذ هاني

ماشي ماشي

لا هناك فرق بين البنى ادمين والحاجات التانيه

وبعدين انا ما باخافش قلنا بقى

الى يقدر على حاجه يعملها والى عايز يعمل حاجه يعملها

احنا ناس متمكنين بالحسنى
هههههههههههههههههه

نورت

ندى الياسمين يقول...

ابو علي سمع هوص

طيب ما قلناش ما نغيرش

بس صعب الحكايه تبقى بالبساطه دي دلوقتي
اعتبر الحل ده مسكنات

ندى الياسمين يقول...

سمكه واحده

الله يخليكى يا جميل ونورتي

ايه ده انتى كنتى مختفيه عن البلوجرز ولا انا بتهيئلي

عموما منوره يا جميل

ندى الياسمين يقول...

احمد عاطف

لا انت تطلعلي بره بقى عشان يبقى الدم للركب

ايه الى جاب الموضوع ده دلوقتي

ما قلناش لا الى عايز يتجوز يا سيدى يروح يتجوز

طب والراجل الى ما بيخلفش يا حلو ؟؟
نخلي الست برضه تروح تتجوز عليه ؟؟

ولا زي بعضه بقى دلوقتي من حقه يتبنى طفل يبقى ابنه هو بس مش ابن ضرته

انت ايه البساطه الى انت فيها دي

يعنى انت يا احمد متخيل ان بكل بساطه ضرتها هاتديها عيل تربيه وتقوله ده باسمك وده باسمي يا حصبله

ما يروح هو يا سيدى يتجوز ويخلف
ويسيب الست الى مش بتخلف هى كمان تتبنى عيل وتربيه
ايه المشكله

ونخانق على عيال بعض ليه
ما فى عيال اصلا من غير اهل اهوووووووووووووووووووووو

احمد استناني بره عشان فى ناس هاتتقطع النهارده

ندى الياسمين يقول...

لولا وزهرا

ولا عبروني يا اختي

انا عارفه موضوع الاشتراطات ده يا زهرا ودى حاجه لازم منها برضه

حتى بره بيحصل كده
بس هنا المشكله فى غباوة تطبيق الشروط

غباوة المطبقين

النظريه صح والتطيب غلط

مرسي على الكلام الجميل
ونورتي يا قمر

ندى الياسمين يقول...

عمرو جويلى

طيب همتكم معانا واسألولي فيها لو تعرفوا تسألوا حد ثقه

نورت يا فندم

ندى الياسمين يقول...

عطش الصبار

وجعتي قلبي بجد جداااااااااااااااا ومش متخيله اي ام فى الدنيا بين ضلوعها فى قلب عرف يحب ابنه فعلا

ان يجيلها قلب تعمل كده فى شوية اطفال غلابه

بجد حسبى الله ونعم الوكيل

وحسبى الله فى كل ظالم وولي امر مهمل فى رعيته

تحياتي لحضرتك ونورتينا

ندى الياسمين يقول...

عادل

بتعوم على عوم مستر هاني

ماشي ماشي

خليك فاكرها هاوريكم

ههههههههههههههههههههههه

اولا انااعرف ناس عملوا كده فعلا
بس هما تكتموا الامر عن اغلب الناس وقالوا انها بنت واحده معرفتهم وماتت يعنى اشتغلوا الناس كمان
ههههههههههههههههه

عموما حتى لو حصل ده بعد ما البنت او الولد يكبروا هايكون احسن المهم فى فتره خطر لا يفضل انه يعرف فيها الطفل الحقيقه

بس انتم ربوهم ومالكوش دعوه بقى

نورت يا باشا

بس هاوريك برضه

شمس النهار يقول...

انا جاية بس اقول لك
كل سنة وانتي طيبة

ومش عارفة هتشوفيها ولا ل
ماانا عرفت من الفيس ان الكمبيوتر عطلان

ان شاء الله يتصلح بالسلامة
وهرجع تاني اقرا البوست بتمعن
سلامي

أحمد عاطف يقول...

سبحان الله

اول ما تيجي سيرة الجواز للمرة التانيه تتحول الانثى إلى نمر مفترس

هو مش دا شرع ربنا ولا ايه ... تاني حاجه يوم لما يكون الراجل مبيخلفش في خلع تبقى تخلعه وتروح تتجوز غيره او تطلب الطلاق حقها في الحالة دي

يكفي انها تقول اخاف الا اقيم حدود الله

انا مستني على باب البلوج اما نشوف الخناقة دي هاتصفى على ايه :P

ندى الياسمين يقول...

بص يا احمد
انا تقريبا كان فى مني وخلص

باشتغل من الصبح لحد الفجر حاليا وخلاص انتهيت

بس برضه هاعض فيك مش قادره

هههههههههههههههههه

يا اخويا والله ولا نمر مفترس ولا حاجه
اقولك على حاجه ان شاء الله اقرب لقاء تدوينى ويكون فى نصيب وتشوف رضا واسأله

هايقولك انه مطلق السراح تمام الى عايز يتجوز يتجوز نو بروبليم وطبعا اعلم حقوقي تماما واعلم انى اقدر اخلعه
او حتى اطلق منه

طيب افرض يا سيدى ان احنا مجتمع ظالم ومفتري
ولو الراجل طلق الست عشان ما بتخلفش او حتى اتجوز عليها نقول حقه

انما الست لو كان الرجل ما بيخلفش بتلاقي الف بؤ وبؤ يقولها كفايه عليكى راجلك بالدنيا وضل راجل ولا ضل حيط وما حدش لاقي جواز اليومين دول
واصبري اصل الطب اتقدم

ومش بعيد فى حاله اخرى لو ما كانش الخلفه بس يقلولها انتى بتفكري فى قلةالادب ليه احنا كنا فاكرينك مؤدبه

او بلاش المجتمع الظالم هى يا سيدى رضيت وعاشت معاه
طيب ايه المانع انهم يتبنوا طفل ؟؟

انا عايزه افهم دي بتوجع فى ايه

وبعدين انا قلتلك ما يروحش يتجوز
بالعكس تماما انا شايفه ان كل واحد او واحده تفكر الف مره قبل ما تقر انها تكلم حياتها او حياته بدون اطفال كرما للحبيب الغالي

انما
ماشي يتجوز تاني ويخلف تاني

بس يسيب مراته الاولانيه لو فضلت على ذمته تتبنى طفل تطلع فيه امومتها مش نقولها خلي ضرتك تسلفك عيل

ولا ايه حضرتك

اها هاقوم انام بقى عشان خلاص انتهيت والصبح اكمل الردود

ادعولي يا قوم

ندى الياسمين يقول...

صيدلانيه

طيب يلا ماشي بس هاتي الشريط معاكي وانتى جايه
هههههههههههههههههههه

نورتي يا جميل

ندى الياسمين يقول...

ستيته

والله يا جميل ولا انا بالعااااااه اعمل اييييييييييييييييييه

وبالنسبه لموضوع الخط والله يا ستيته غلبيني المحرر مش راضي بعدين قلت طيب اقفل دلوقي وارجع اعدله

قوووووووم قفلت من هنا والكمبيوتر حلف يمين ثلاثه ماهو فاتح

وبالنسبه لموضوع الاسم

زي ما قلت لعادل

انا اعرف ناس خبوا على العيله نفسها كمان اخترعلهم قصه عن صديق متوفي وكده يعنى

يا ستى مش لازم موضوع الاسم

بس المهم الفكره ياستيته

المهم ما نستعيبش نجيب عيل نربيه حرام علينا والله

منوره يا قمر

ندى الياسمين يقول...

صيدلانيه

يا لولو حقك علياااااااا

غصب عني والله

ندى الياسمين يقول...

قلم رصاص

متشكره اوي يا سيد ربنا يكلمك

احنا نقدر يا باشا

بس ممكن نغزك مافيش مشكله
هههههههههههههههههه

وبعدين ايه ده مين دي والنبى حد يقوووووووووولي

ندى الياسمين يقول...

وندا

وحشاني موووووووت

امينه رزق اعتقد عدي عليا البوست وتقريبا ما لحقتش اشوفه

يعنى ايه يا وندا بدل ما نغلط فى تربيته بلاش نربيه ؟
ولا ايه ما فهمتش قصدك

وبعدين انا موافقه على انها ما دام ابن اختها زهقت منه وعايزاه يروح

وهو ده الفرق
لما تحس ان الطفل ده مسؤل منها وحدها مش هاتقول زهقت حد ياخده

الفكره ان ده ابنها والتاني مش ابنها

تربي ولاد العيله مافيهاش مشكله

انما يظلوا مش ولادها

فى مثل شعبي بيقول ايه

هننوني وبننوني واخرتى للى ولدوني

انا اعرف واحده يا وندا
ربت اجيال من عيلتها عمرها دلوقتي 74 سنه
بجد اجيال
يعنى تقدري تقولي انها بدات فى الجيل التالت
ومش مراعيه بس
لا
تربيه من الالف للياء واقامه كامله لظروف مختلفه
وحاليا هى برضه وحيده هى وجوزها
فين وفييييييييين لما حد من الى ربتهم بيجى يزورها وما زالت حاسه انهم مقصرين رغم انها لو كانت امهم بصحيح برضه كانوا هاينشغلوا عنها

انما الاحساس نفسه انهم مش ولادها وعشان كده هى وحيده

برضه صدقينى مش زي ما يكون لها ابن فعلا مش ابن مستلفاه فى فرق

وتقبل الاب ده يا وندا لو هو هايكتبه باسمه انما يربيه بس
اظن ده عادي
وهاشوف البوست بتاع الفيلم حاضر

والالوان يا ستى ما بين الكريمى واللبنى والروز والبيج
حسب الاوضه بقى
وكده ده انا هابدع ابداع يا لهووووووووي هابقى افرجك ان شاء الله

منوره يا وندتي

ندى الياسمين يقول...

ابو شوشو

وانت طيب وبخير وسلام ربنا يكرمك يارب

ومنورنا

ندى الياسمين يقول...

استاذ عبد الجليل

متشكره ربنا يخليك يارب

ندى الياسمين يقول...

نواره

يا حبيبى ربنا يخليكى يارب ويكرمك

وكل سنه وانتى بالف خير

منوره يا جميل

ندى الياسمين يقول...

صمت المشاعر

متشكره اوي ليكى

وادينا بنقول جايز حد يسمعنا

منوره يا جميل

ندى الياسمين يقول...

ِشمووووووووسه حياتي

وانتى طيبه يا جميل وبالف خير

ده واجب عليا والله

سباقه بالخير يا جميل

ان شاء الله اكلمك ومستنياكي تقريب وتقوليلي رايك

(حلـم)،، يقول...

اول مرور في قطر الندى


اول مرور في ندى الياسمين


ياسلام اسم اللي اختارتوا دماغ بس ايه ؟؟


مميزة



جميل ما خطيتي


سلام

يا ندى

عفوا يا ساسمين


هههههه

انا حلم

ندى الياسمين يقول...

حلم

متشكره اوي لك ونورت ندى الياسمين

اثنين فى واحد
هههههههههههههههههه

ودايما منور

Wanda يقول...

بقالى زمن مدوشكيش
فين نوتى اكيد مشغلاها شغل العبيد فى التبيض و التوضيب
و بعدين ايه الالوان ديه كلها ؟؟؟

انت عملها بيت القاضى جحا ؟؟ و لا مغارة على بابا
لزم تورينا علىالاقل وصفا
امال
و عليها قصة بوليسية فى خضم البياض تن تنتنتنت تاتا تا اااااااااااااااا
وجدت صاحبة الشقة شنطة مجهولة فى احدى الاركان و لما كشفت عنها و فتحتها وجدت ........................

بوست امينة رزق ةو بيومى افندى
قصدى بيه ان ان المهم الحب
لما الرجل يحب الطفل ده حتى و لو مش من صلبه بيخاف على مصلحته و الام الحب عندها ده ملوش حساب و لا مقدار طاقة لوحدها
بس فيه ساعات ناس بتستغل الايتام دول
و تربيهم تربية غلط
الموضوع عايز ناس وعية لمعنى التكافل و دولة بتسهل الاشراف

بس تعرفى معلومة حلوة الحمام الى مبتبيضش ديه ، اكيد فى باقى الدواجن بتحصل

بيضتى العشة بتاعتهم هما كامن ؟؟
نوتى تعالى بقى نلعب لعبة الاولى بقالى زمن ماتنططتش :-))) و قوليلى عملت ايه دردر فى العمال و افتنيلى :-)

حنين القلب يقول...

اولا وقبل اى شى الف حمد وشكر لله

ثانيا انا معاكى طبعا فى كل كلامك
بس معلش مهما ربيتى فى ولاد غيرك غير ابنك اللى حته منك

صدقى واحده جربت كلللللللللل ده

وحشتينى يا ست ندى والله

ندى الياسمين يقول...

وندتي

الالوان اصل يا ستى الموضوع كبير عندي الرسبشن على جزئين بالوان مختلفه

واوضة البنات عايزين يعملوها ملونه اشي اصفر واشي روز

واوضتي انا مش عارفه هاعملها ايه لسه
موال موال يا اختي

اما بالنوسبه للعمال فقد تصدمين من الامر
قالعمال عباره عن فردين غلاااااااابه طالع عينهم بيشتغلوا كل الاشغال الشاقه المؤبده
وهما عباره عن انا ورضا
ايون ايون اختك دلوقتي نقاش درجه اولى
وصدقوني لو نجحت التجربه هاوريكم شغلنا ولحد الان هى ناجحه والله

اما بالنسب لموضوع التبنى ما قلناش مش محتاج وعي

بس خلي بالك احنا عشان الملاجيء الحكوميه عندها مشكله فى العماله بيعملوا نظام اسمه الام البديله
بيعطوا الاطفال من عمر يوم لعمر سنتين لست خارج الملجأ وطبعا بمراقبه منهم المفروض ترعاه لحد ما يبقى عمره سنتين ويرجع يروح الملجأ
وده مقابل مرتب شهري طبعا
وطبعا الى بيعملوا كده بيعملوا عشان المرتب الشهري غالبا وبيكونوا حالتهم الماديه صعبه جدااااااا
بس لا تتخيلى انه مع الحياه الصعبه دي فى منهم كتير بيتعلقوا بطفل من الاطفال دي وياخدوه يربوه فعلا لحد ما يكبر وحصلت كذا مره
يعنى من غير وعي ومن غير ثقافه
الفيلم الى بتتكلمي عليه مش فاهمه يعنى ايه مش من صلبه
ويعنى قبله
يعنى كتبه على اسمه ؟ ولا رباه بس
ومش من صلبه ازاي
تبنى ولا ابن مراته ؟؟

وصدقينى زي ما فى عاطفه امومه فى ابوه برضه وان كانت الامومه اقوى

اه والعشه ياستى خلاص فنيتو الحمام ده اول لما رضا جه يسافر الصين
قلتله نو نو نو بيعه يا باشا كفايه عليا اكل العيال واتابع الشغل والمواويل دي

ونوتي حاضر نبعتهالك مخصوص ولا يهمك
منوره يا جميل

ندى الياسمين يقول...

حنين

منوره يا جميل

بصي يا لوليه عشان انتى جربتى المفروض تكوني عارفه يعنى ايه طفل انتى بس الى امه مش حد تاني معاكي

وفاهمه قصدي

والى ما تقدرش تعمل كده وتخلف يبقى ليه تحرم نفسها وتحرم طفل مسكين فعلا محتاج لام

مهما تربي فى ولاد اختك ولا قرايب ولا غيره فى النهايه مش ولادك

غير احساس ان ده طفل انتى بس الى امه مالوش غيرك

وطبعا غير ابن من صلبك بس يعنى نعتبره اول بديل للى ما يقدرش يخلف انه يتبنى طفل فى بيته مش انه يترجى نظره من عيال العيله

وحشاااااااااني يا جميل
وبوسيلي الواد ابنك

الجواز و سنينه يقول...

بصى يا ندا
الفكره هايله طبعا
بس عليها كام حاجه كده
ليه
لان اللى بيدور على حاجه من صلبه و بيدفع فيها دم قلبه لما تييجى ان شاء الله مش هايكون بالساهل برضوا
ده عايز علاج و مدارس و مصاريف جامده
و لو ربنا رزقه باللى من صلبه
ساعتها هايفرق بين مصاريف ده و ده
و ده غصب عنه على فكره
إلا بقى فى الحالات اللى مافيهاش علاج
ساعتها يبقى ليكى حق فى اللى بتقوليه ده
لكن قبل كده ماحدش هايقدر على كده إلا نوعيات بشر قليله و ده مش متوافر زى الطبقه الوسطى
الحل انه لازم الاطفال اللقطاء دول يتعملهم تقنين
يعنى يتعرفوا همه مين و همه فين و بيعملوا ايه
مش عيال فى الشارع محدش عارف عنهم حاجه و لا دول تبع مين
الاطفال دى ممكن بقى من الزكاه او اى طريقه اخرى نوفرلهم حياه كريمه
ربنا يصلح الحال يارب

ندى الياسمين يقول...

الجواز وسنينه

لا طبعا انا اختلف معاكي تماما

البنى ادم السوي الطبيعى الي يربي طفل من وهو رضيع ولسنين لازم يكون متلق به نفسيا ما يقدرش يعتبره بعد كده مش ابنه
يعنى خلينا بقى نتكلم عن الموضوع فى العموم
اعتقد الى بتقوليه ده يبقى حاله خاصه لشخص متجمد المشاعر فعلا
عشان لما يخلف يرمي بقى الى اتبناه او يعامله وحش

اما بالنسبه لموضوع الزكاه والفلوس فى الحقيقه ده مش موضوعنا
عشان احنا فى حاجات كتير فى مجتمعنا عايزه تتصلح بشوية فلوس قليلين بالنسبه للمليارات الى بتتنتور حوالينا شمال ويمين
ولكن انا الحقيقه اقصد هنا مش كفاله ماديه
اقصد الكفاله النفسيه والتربيه والحنيه والعاطفه الى بيفتدها فعلا الاطفال دي

وكمان نقطة صغيره يا جميل
المفروض ان الى بيتبنى طفل بيكون وجهتة الاولى هى لله ورسوله بخالص النيه
والى بيعمل كده ما اعتقدش ابدا ان يضيق به رزقه عشان يربي اليتيم
بالعكس قد يرزق هو عياله وعيلته كلهم اكراما لليتيم ده

فارجوكم ما تتكلموش فى اي اطفال سواء تبنى او خلفه بمبدأ منين اجيب لهم
عشان الرزق بيد الرزاق

ونورتي يا جميل

Timo.. يقول...

بجد احييكي على الفكرة الانسانية والاكتر منها اجتماعية..
بس سؤال..يا ترى الناس اللي علقت مقتنعة بالفكرة لنفسها على سبيل المثال ولا تتنفذ (في المجتمع) وخلاص..؟؟

كمان عجبني قوووووووي موضوع:
"الحشريه وقلة الذوق" لانك ببساطة ما سيبتيش حاجة من قلة ذوق الناس وحشريتهم في كل حاجة وعجبني قوي موضوع استخدام القصافة للتعامل معاهم :)

ضيفي بقى لموضوع الحشرية سؤال الموبايل الشهر (الو..انت فين..؟؟) لاني عملت بوست عنه من كتر خنقتي من قلة ذوق السؤال (';')

شمس النهار يقول...

انا رجعت تاني اهو

البوست جميل
حلو اوي موضوع الحمام ده

معقول الو مرة اعرف
اي كائن حي انثي ربنا خلق فيهم الحنية

بس موضوع التبني ده فيه قوالان كبير

علشان المحرم

لو اتبنوا بنت الزوج مش محرم لها
ولو ولد اجنبي عن الزوجة

وجدوا ان الافضل التبني وهمه في الملجأ

ربنا ماسبش حاجة
وونبي مافيش زي بنتة ولا زي ابنها

دينا نظم كل حاجة

سلامي

الازهرى يقول...

ياااااااااااا بخته رضا
ويا بختك بيه
انا مش لاقى وقت اربى نفسى اساسا
اقوم اربى حمام


طبعا الدعوة جميلة جدا وبأيدك فيها
ويا ريت الناس فعلا تبدأ تغير وجهة نظرها ناحية التبنى
لإن فى أطفال لو ما لحقناهمش بدرى يبقى ظاهرة اطفال الشوارع مثلا هتزيد بأضرارها المعروفة
وكمان ممكن نلاقى بيتبناهم شوية عصابات ويدربوهم على الخروج على القانون وترويع المجتمع (واسألينى أنا على دول ) بجد كارثة

أدعا الله أن يجزيك خيرا على هذه الدعوة الجميلة

ندى الياسمين يقول...

تيمو

والله ده الى باحييك عشان قريتلي بوستين من بوستاتي الطوييييييييله

مره واحده

متشكره لك على كلامك الجميل

وبالنسبه لموضوع التبنى والناس الى ردت مقتنعين ولا لا لنفسهم

اصلا مش كل الى ردوا عندي قالين انهم مقتنعين بالعكس فى ناس كتير مش مؤمنه بالفكره وواضح من كلامهم

وحتى الى قالوا مقتنعين اعتقد ان ربعهم لو الموقف يخصهم رايهم هايتغير

وده اعتقاد شخصي الله اعلم صح ولا لا


بالنسبه لبوست الحشريه وقلة الذوق
اه اصل انا موجوعه منه شويتين
وبص الو انت فين دي مش باقولها الا لجوزي
هههههههههههههههه

وساعات اختي الصغيره

اظن ده اقل واجب يعنى


وانا جيت مدونتك على فكره بس ما لحقتش اعلق نروح تاني ان شاء الله

ندى الياسمين يقول...

شموسه

تنوري يا جميل فى اي وقت

يا شموسه التبنى داخل الملجأ مافيهوش الا فلوس
والفلوس مش هى المشكله الوحيده

الاطفال دول محتاجين ام فعلا مش فلوس بس

والناس الى ربنا ما ارادش لهم انجاب هما كمان محتاجين يفرغوا طاقاتهم ويشغلوا وقتهم ويملوا حياتهم
ويلاقي حد يراعيهم فى كبرهم ويطمنوا على الاقل ده

التحريم كمان واضح وصريح ومعروف ايه هو الخطأ

وحكاية ان لو لولد يبقى مش محرم للام والعكس

ماشي يا جميل بس يعنى الحكايه مش اوي كده والله محتاجه بس شوية محافظه بسيطه لاننا بطبعنا داخل البيوت متحفظين الى حد ما

ودينا اه طبعا ما سابش حاجه لكن الرسول عليه الصلاة والسلام يا شمس اخد ابن الزنا والمعلوم انه ابن زنا
وبعد ما امه سلمت نفسها واعترف بخطأها

اخد الرسول الولد وقال من يكفل هذا ويكون رفيقى فى الجنه

ده الدين وده الاسلام

ما قالش مين يصرف عليه
قال مين يكفله
كفاله كامله

يعنى اقولك نورتي وانتى شمس

ما طبييعى تكوني منوره

بس برضه نورتينا يا جميل

ندى الياسمين يقول...

الازهري

هو فعلا الحمام عايز حد فاضي
وعشان كده ما عرفناش نكمل

رضا كان فاكر هايبقى عنده وقت زي زمان طبعا قول للزمان ارجع يا زمان

وكلامك عن العصابات واولاد الشوارع طبعا حقيقى وفعلا التبني ممكن يحل المشكله دي
لكن مش لواحده
لازم يكون فى جهات مسؤله مش تبقى سايبه الحكايه

نورت يا ازهري

Wanda يقول...

دردر
انت ساكنة فى قصر؟؟؟؟
و بعدين انا كده جوعت
و لولة قعدة تغيظنى بورق العنب و الملوخية بالارانب :-(((((((((((((((((
يرضيكى كده

ما انا لو بطنى مليان مفكرش فى غذاء الناس الثانين :-((((
يامجوعانى :-(((

ذو الوجه المبتسم يقول...

السلام عليكم

كل سنة وكل لحظة وانتى طيبة

وكل ام طيب

تحياتى

هتشوفوا يقول...

يا سلام موضوع جميل جدا, أنا فعلا ندمان اني اتأخرت في قرايته اصل مكنتش فاضي الفترة اللي فاتت, الموضوع شدني جامد, اكيد مكتوب بمزاج

يا ريت نوصل للدرجة دي من التسامح

ندى الياسمين يقول...

وندتىىىىىىىىىىىىىىى

وحشاني وحشاني وحشاني

والله تعبت يا وندا خالص والله دي شوره الوان

والنبى يا وندا ما انا عارفه اطبخ اساسا ده احنا لاجئين الايام دي اصل انا فكيت المطبخ وبعته يتوضب هو كمان
بناكل عند ماما بقى تعالى كلي معانا هناك واسكتي
ههههههههههههههههههههههههه

وحشااااااااااااني جدا والله

ندى الياسمين يقول...

ذو الوجه المبتسم

متشكره يا استاذ ناجي وحضرتك طيب وبخير وسلام يارب
وكل اب وهو بخير برضه ان شاء الله

نورت

ندى الياسمين يقول...

هتشوفوا

متشكره اوي على الكلام الجميل

وياريت ننضف مخنا بس يافندم هانبقى زي الفل

نورت