الخميس، 29 أبريل 2010

ليـــــــه ؟؟ هاه ؟؟ ليه ؟؟؟

تصدقوا رغم انكم اندال وما حدش سأل عليا  الا انكم وحشتوني جدا

الواحد نفسه حلوه والله
هههههههههههههههههههههههه

لا لا باهزر طبعا فى ناس سألت  عليا على الميل والتليفون وعلى المدونه كمان  ومتشكره لهم

وطبعا انا كنت متغيبه عن المدونه وعن متابعة الحبايب عشان كان عندي كمية احداث مختلفه ومتلاحقه
الحمد لله اغلبها احداث حلوه الحمد لله

المهم
باعلن اسفي على انى نكدت عليكم البوست الى فات ونكشت على الموجع والله يا جدعان ما كانش قصدي . كل الحكايه الواحد اوقات بيطلع قدامه مواقف وحاجات ما بيقدرش يعديها

اه وعلى فكره فى حد عبيط  اهبل سألنى هو انتى صاحبة القصه ؟؟  بذمتكم انا عايزه ذمتكم صاحبة القصه دي شبهي حتى ؟؟
البنيه بتقول فى الاربعينات ( انا 18 سنه يا غجر قلتلكم ) وبعدين هى بتشتغل  انا خالي شغل  على راي ستيته  الانسان مش بيعيش حياته بس وانما بيعيش حيوات كتيره حواليه  ( تقريبا كانت كاتبه كده مش فاكره النص )

المهم يعنى حاولت بكل الطرق اكتبلكم حاجه فرفشه نعنشه كده ما عرفتش  دماغي مش جايبه والله
دورت فى دفاتري القديمه لقتنى هاغمكم اكتررررررررر  او هانشر حاجه تجبلي وجع الدماغ اكترررررررررررر

قلت اجي ارغي واكل دماغكم حبه

بصراحه عندي كام سؤال عمالين يلفوا فوق راسي زي الى كان بيجى فى توم وجيري زمان ده

اولهم والى سألته على الفيس بوك والناس جاوبوا كما توقعت :

هو احنا بنروح مدارس وجامعات وكلام من ده ؟؟؟ هاه ليه ؟؟؟

طبعا زي ما حصل على الفيس هالاقي الى بيقول عشان اخد شهاده والى بيقول عشان اشتغل والى بتقول عشان اتجوز واحد عليه القيمه

والى واخد الامور بسخريه وبيقولك عشان اقعد على القهوه  او عشان اقعد خاليه شغل كده

والى بيقول منظره كدابه

المهم كان نفسي حد واحد بس يوحد ربنا ويقول بنروح المدرسه والجامعه عشان نتعلم

أي والله نتعلم ... لان من وجهة نظري الى على ادها  ان التعلم فى حد ذاته هدف

غير بقى الشغل والجوازه والمنظر والمركز الاجتماعي   كل ده حلو وجميل بس مش هو الهدف الاول


السؤال التاني :
ليييييييه البنات دلوقتي  بيرقصوا رقصات غريبه ويعملوا حركات اعجب على اساس انهم بيرقصوا بالمطاوي ويغنوا اغنية شربت حجرين عا الشيشه باين ولا اسمها ايه

والشباب هما الى بقوا بيرقصوا بوسطهم ؟
تفتكروا ليه هاه ؟؟ ليه ؟؟


طيب السؤال التالت :
ده انا داخل عليا مود الامتحانات خالص  وخلوا باكلم كلهم اجباري مش عايزه استعباط

ليه فى ناس كتير اوي شايفاني صح  وناس كتير  اوي برضه شايفاني غلط  طب اصدقهم ولا اطنش الاثنين  واصدق نفسي ؟؟؟


السؤال الرابع :
هانفضل لحد امته فى ام البلد دي الى يفكر يمشي صح هو الى يطلع عين اهله ؟؟؟

ابسط الامثله والى تاعبه نفسيتى اليومين دول

انا قررت  اخرج من دايرة الدروس الخصوصيه  وما اطلعش ولادي مدمنين عليها زي باقي الجيل وقلتلهم اعتمدوا على المدرسه وانا كنت باذاكر لهم  رغم صعوبة ده عليا لانهم فى مدارس لغات وانا تعليمى عربي
بس قلت مش مشكله ادينى هاتعلم معااااااهم وبذاكر وحياتي عندكم زي زيهم وزياده

قوم ولاد التيت فى المدرسه  ما يكملوش المناهج ويقعدوهم فى البيت وكمان الحبه الى اخدوهم اخر كروته واستهبال رسمي وانا حاليا طالع عين اهلي باذاكر وادرس للاثنين وايام الامتحانات واكتر من نص المناهج  العيال ما يعرفوش عنها حاجه عشان خدوهم فى اخر عشر ايام وفى حاجات ما اخدوهاش اصلا

اعمل ايه انا فى البلد دي ؟؟؟ اطفش منها ؟؟؟   طب مش طفشانه وقاعده على قلبكم هنا يا انا يا انتم


السؤال الخامس :
الحرب الشعواء على المنتوجات الصينيه بصحيح يعنى عشان مصلحة الشعب وعشان الالعاب المضره للاطفال والحاجات المغشوشه   ولا عشان  ماما امريكا قالت  كده  كلنا نقول امين وراها

مش قادره ابلع حكاية مصلحة الشعب والالعاب المصنعه من الرسايكل وكده يعنى   خااااالص   طب يعنى الاولى نشوف  ماية المجاري الى الشعب بيشربها
بلاش مجاري مافيش مجاري يا كلاب يا بتوع الاشاعات
لعب الاطفال المصري حد يخطف رجله لاي مصنع لعب اطفال فى مصر ويسأله جايب البلاستك منين
مش عايزه استهبال على فكره يا بلد


السؤال السادس : هو انا ليه  غالبا كل لما اشوف برنامج حواري فى التليفزيون فى الاونه الاخير استحمر المذيعه والضيف بشكل فظيع واحس انهم بيستهبلوا وبيحاولوا يستعبطونا واصلا مش فاهمين حاجه وبيمثلوا
ليه هاه ؟؟ ليه ؟؟


السؤال السابع : هو ليه اغلب المتجوزين بيلعنوا فى الجواز وايامه ومع ذلك عايزين اخواتهم وولادهم يتجوزوا ؟؟
ما يرسوا على بر هو خير ولا شر  ؟؟

حلوه دي تنفع اغنيه


وكفايه كده اسأله عليكم عشان انا زهقتلكم بصراحه
اتفضلوا كل  واحد يكتب اسمه على ورقة الاجابه وما حدش يكتب بقلم الوان
والى هايبص فى ورقة الى جنبه هاعلم على ورقته

هناك 32 تعليقًا:

صوت من مصر يقول...

هجاوب على السؤال الاول بطريقى لانى فهمته
بروح المعهد عشان العب طاولة

just waiting يقول...

ايه دا انتي اسئلتك دي اصعب من الثانوية العامه
ما علينا عموما انا بروح الكلية اقعد مع اصحابي واغير جو بدل النادي وبروح الدروس علشان اعرف اجابات الأسئله الي بتيجي في الامتحان زي ما الدكتور عايز علشان انجح وخلاص
وبعدين تعليم ايه يابنتي اذا كنا طلبه جامعه وبنصم الاسئله واجابتها وخلاص وبنربط الحمار زي ماصحبه عايز ولو فكرتي تفهمي بتسقطي

سواحة يقول...

:-)))))))))))))))))))))
قرات البوست ده فى االمطبخ و قعدت ادور على الاكل (عارفة همى على بطنى :-))
و ملاقتش حاجة :-(( و بعدين لاقيته هنا
قولت لازم اعبر عن خيبة املى المطبخى
و اجى اغلس
اسئلة باسئلة
:-))))))))))))))))))))))))))))

مش انت عندك بياض و امتحانات ؟ نزعجك و لا نزعجك ؟؟ها ؟؟؟مش تخلصى المذاكرة كده و تفضلنا نبقى نغلس برحتنا

عايز رد على البوست فى السريع مكروت و لا تصبر لحد ما اخلص الامتحان بتاعى انا و امخخمخلك تعليق ؟؟ها ؟؟:-))
شوفت بقيت بعلق بالطلب :-)

تابعوا بقية الاجابات و الاسئلة
فى الحلقة القادمة انشاء الله
بعد وصول اجابة السؤال الثانى من المعد
كان معكم المذيعة الى مش عارفة حاجة كالعادة واندا :-))))))))
بدون ضيوف

فاتيما يقول...

عااااااااااااا

انا ساقطة من اولها كدا
و على بلاطة


كل دى أسئلة


مش هلحق افكر و استمخ
و اجاوب ؟!!!


و بعييين لو فكرت أنى أبص ف ورق اللى جنبى فمفيش تعليقات كتير لسه
عشان اغش منها

عااااااااااااااا
تانى


طب مبئياً كدا
اختك فاتيما من الناس اللى مش هتحرق دمك ..لنى دخلت الجامعة عشان اتعلم فعلا ..مش أى حاجة تانية و لما كنت بتكلم مع يوسف على حكاية التعليم دى كنت بقوله لو نفسك تطلع نجار او سباك او جزار حتى ..مفيش مانع المهن دى مش وحشة و لا غلط ..بس بشرط ..تدخل الجامعة و تدرسها صح ..ايه المانع تكون نجار بس معاك شهادة ..مش عشان نعلقها ف الصالون ..لأ عشان الجامعة او أى مكان اكدايمى لازم هيفتحلك دماغك و يعلمك حاجات مش هتعرفها غير فيه من دكاترة و ناس مخها نضيف و عاوزة تنفعك ..زطبعا كل دا كلام نظرى حاليا بس على ايامى كانت الجماعة هيا كدا ..المكان اللى الواحد يروح يرفع من مستواه العلمى و الثقافى فيه ..يفترض تبقى كدا دايما

الناس شيفاكى بشكل و انتى حاسة شكل تانى ؟؟
كنتى جيتى قريتى بوست تباريح بتاعى بتعليقاته يا صبصب و انتى تسمعى كلام روحك و ملكيش دعوة بحد ..مبتأذيش حد يبقوا يقعدوا ساكتين و يسبوكى فى حالك .. اسمعى كلام اللى يحبك و خايف على مصلحتك و بس ..سيبك م الباقى

لحد امتى الماشى صح يطلع عينه ؟؟
حتى لو ظروف البلد اتغيرت هتلاقى روحك مثار انتقاد ..اعملى اللى يوافق اخلاقك و طباعك و تربيتك و سيبك من أى حاجة ..يكفى تنامى و ضميرك مش واجعك ..دى مش قليلة


الجواز خير و لاشر ؟؟
خير و شر
انا آخر نفر يتكلم ف هذوها الموضوع عشان رأيى هيكون غير حيادى ..بس يفترض ان الجواز الصح يبقى خير مش اللى بيحصل دلوقتى

الحملة الشعواء اللى بتوقولى عليها يا صباصيبو لو كانت م الاول كانت تبقى منطقية و تتصدق لكن دلوقتى طبعا شكلها مغرض و وراها توجهات
انما هيا صح .. لكن زى ما بيتقال كدا
حق يراد به باطل


انتى وحشتينا قوى
و انا م العالم الأندال دول
بس عارفة انك مش هتزعلى منى
بواسات و حضونات
يا ست الستات

أنا - الريس يقول...

بسم الله الرحمن الرحيم
------------------
اجابة السؤال الأول :
بنروح عشان بابا وماما عايزن كده .. انا خلصت الحمد لله .

اجابة السؤال الثاني :
مش عارف .. بس اللي بيرقصوا دول هيتضبطواااااا اخر حاجة ... وملك الحسنات ياخد فترة استراحة برضه .

اجابة السؤال الثالث :
صدقي الصديق المخلص فهو احسن واحد ينصحك ... واعرضي اجابته علي قلبك لو لقتي اللي بتعمليه قلبك حاسس فيه بالذنب يبقي واضح والعكس .

اجابة السؤال الرابع :
انا بفكر في السفر من اول يوم جيت في الدنيا.

اجابة السؤال الخامس :
حقد بعيد عنك ,, ناس بتبيع وناس تانية عايز تبيع واحنا اللي بنشتري منهم وبنزعل طب ليه مش عارف .

اجابة السؤال السادس :
لأن اغلب المتجوزين اتجوزا لاسباب تانية غير الدين .. هوا اخترها عشان مزه وهيا اخترته عشان مز او سبب الفلوس أو النسب ,, لكن لو كانا الجواز مبني علي الاسلام صدقيني كان حياتهم هتبقي اسعد وارضي وربنا يرضي عنهم فيخليهم يرضوا عن بعض ويخلي الناس ترضي عليهم ..

سؤال بقي ليا :/:

هوا التسطير والخط الحلو عليه درجات ,

لــــ زهــــــراء ــــولا يقول...

صباح الفل على ارق ندى
وحشاااااااااااانى جدا جدا
بصى يا ستى احنا بنروح المدارس لسبب بسيط خالص مالص وهو اننا مش ينفع تفضل المدارس فاضيه من غير زباين اقصد من غير تلاميذ وبالتالى الجامعات برضه يعنى الدوله كلفت نفسها وبنيت مدارس اخر شياكه وجامعات ولا كامبردج فى زمانها ومعامل واماكن للرياضه وعاوزه الحاجات دى كلها تبقى فاضيه مش لاقيه حد يشغلها ده حتى عيب
قولى بقى على كلامى غلط

بالنسبه لموضوع الدروس الخصوصيه دى موضه يعنى لازم كل الطلبه تاخد دورس خصوصيه هو مش لازم برضه اولادك يمشوا على الموضه ؟؟؟؟

بالنسبه بقى الناس شايفه انك كويسه او وحشه او حلوه او مش حلوه يا بنتى المهم انتى شايفه نفسك ايه من كان ضميره صديقه فلا يشغل باله بكلام الناس وحوارتهم الفاشله

الامتحان صعب اوى يا ميس

الزواج بقى اممممممممممممم
بما انى لسه ع البر كل اللى حواليا عاوزين يفرحوا بيا وفى نفس الوقت كلهم بيشتكوا يبقى انا كاده مرتاحه والحمد لله وبرضه اللى اعرفه احسن من اللى مش اعرفه

شوفتى الاجابات
كفايه كده وجعت دماغك

وحشاااااااااااانى اوى اوى



سلااااااااموز

زهراء

ستيتة يقول...

ستيتة حسب الله الحمش
مدرسة التخلف العقلي والهبش وشغل حلق حوش بعقلية علمية مستفذة

1- اتعلمت علشان غبية يا أبلة
ماهو انا مش لسه ها
انا ماضي منصوب عليه
يعني انتي فكراني عاوزة محل كشري علشان بهزر؟
امبارح اتنين اساتذة فوق الستين بينصبوا عليا عيني عينك وانا مضطرة البس وش العبيط
طب لو ملبستش وش العبيط البس ايه؟
ها البس في حيطة
سبوبة ونصب وقلة ادب وعملية اصلاح مزيفة
حسبي الله ونعم الوكيل انا نفسيتي زي الزفت
نفسي اعمل علم نافع ومازلت
لم أيأس بعد من ان يعطيني الله حاجة صغيرة من فيض رحمته انفع بيها العباد

2- البنات دلوقت بترقص رقصات غريبة؟
مشفتش يا اوختشي
كل اللي بشوفهم بيرقصوا عادي يعني ماركة حبيبي يا عيني
ايييييييييييييييه دنيا
لكن الشباب الي بيرقص زي النسوان ده شفت
شفففففففففففففففت وياريتني ما شفت
شيء مقزز
اظن انهم نتاج مجتمع منقوص الرجولة بشكل واضح
ومنقوص الأنوثة برضه
ومنقوص الأدب
ومنقوص الأهداف
وبعدين يا ندى يا وحشة
خليكي كول
دول بيهزروا لكن عاوزة طيب ها يبقى طيب هو ممكن برضه يكون شرير
بمعنى انهم شباب قديرة
أووووووووووول سايز

3- لا أعرف اسباب النجاح ولكني اعرف اول اسباب الفشل
اسيب رضا ربنا وضميري واروح ارضي اللي ميسواش

4- معلش دي اسمها اعراض مايو وكلنا بنمر بيها وبتنسحب الأعراض اول ما العيال يخلصوا
انا عمري ما اعطيت العيال درس وبسم الله ما شاء الله ماشيين عادي
لو مدرس استقصد حد فيهم اروح اطلع ترابتيت اهله وانا معروفة تمام في المدرسة
ولو واحد ما شرحش خلاص انا معودة ولادي يشرحوا لنفسهم ويجوا يسئلوني في اللي مش فاهمينه
عاااااااااادي
بتمشي الدنيا وخاصة اول ما كل الفيلق اللي عندك تكةني اسستيه
ييعني ابشرك مجرد ما العيل يوصل لخامسة ها يعتمد على نفسه وانتي ها تكوني مجرد عامل مساعد في تحفيز التفاعل فقط
اما عن الضمير فاشمعنى ها الوم على المدرسين
يا ندى الضمير بيطلع في النفس الأخير في البلد دي
انا واثقة ان لو حد غريب حكم عليا ها يقول اني انا شخصيا زيي زي الكل بلا ضمير
انا مؤكد اللي شايفة ان عندي ضمير زي كل الناس وشايفة اني حلوة

5- الإجابة تجدها في بوليكة انفلونزا الخنازير

6- بالعكس تماما
انا بقعد قدام المذيع والضيف احسدهم بحق وحقيق
هو فيه ناس تقدر تقول عكس الحقائق بالثبات ده كله وتلعب على كل الحبال حلو كده؟
يا سلام لو كنت انا كده
كنت اتنعنشت يا وديع

7- المتجوزين لو تعبانين وقرفانين وعاوزين يجوزوا الناس يبقوا تبع نظرية المؤامرة
انا في الغلب واشمعنى انت مرتاح
لكن اغلبهم ولاد وبنات لزينة
عارفين انهم في نعمة
وعارفين انهم في هنا
وعارفين انهم حالهم احسن من بيوت ابوهم
بس لابسين وش انكار النعمة ووش الشكوى رقية
علشان كده عاوزين يجوزوا اللي بيحبوهم

يالهوي
يعني تغيبي تغيبي وتيجي توجعي قلبي وتقلبي علي المواجع والبطاطس
مش قلت مائة مرة بعد اجتماعات الهنود الحمر تدوني بوستات من نوعية والنبي على قلبك دلعني يا سعادة البيه؟ :)

غير معرف يقول...

1- انا كنت بروح الكليه كتطور طبيعي لحياتي..ولا تعليم ولا نيله

2- البنات بيرقصوا كده والرجاله كده لأن حال الدنيا اتقلب

3- حكايه نظره الناس ليكي دي بتختلف من مدى قربهم...ومدى ذكاءهم برضو خللي بالك...فماتشغليش نفسك برأي الناس

4-تفكري صح لما تبقى البلد ماشيه صح..كده حضرتك ضد التيار

5- البلد بتشتغلنا طول عمرها ...ومفيش حاجه اسمها صحتنا

6- برضو التليفزيون طول عمره بيشتغلنا

7- رخامه...الشكوى رخامه كده :)

النتيجه امتى يا ميس :D

تحياتي

عطش الصبار يقول...

الحمد لله انا مش هجاوب عشان انا نسيت الامتحانات من اصله كفايه انى فضلت بع التخرج لمده 5سنين احلم انى با امتحن
وبعدين ان بطلت اتفرج على التلفزيون لانهم بيستفزونى
بطلت اتفرج على الرقص لانى بقيت اشوف مخنثين بيهزوا وسطهم زى اجدع رقاصه
فقرفت من منظرهم
انا رحت الجامعه لانى كنت حابه التعليم وحابه ادخل جامعه
كفايه اجابات لحد كدا
هاجاوب فى الترم التانى
تحياتى

غير معرف يقول...

انا جوبت خلاص

sony2000 يقول...

لااااااااااااااااااا
ايه ده
اسئله تعجيذيه
ههههههه
علي فكره انا من رأئ ممتي
هي قالت كل المفيد

shimaa elkholy يقول...

صوت من مصر
تلعب طاوله طب والى ما بيعرفش يلعب طاوله يعمل ايه ؟؟؟

الدومينو تمشي ؟

shimaa elkholy يقول...

جاست ويتنج

بالظبط كده الله ينور عليكى هى بقت كده

وعموما هما حتى العيا دلوقتي لما بنربطهم زي الحمار

قصدي لما بيربطوا الحمار زي ما يقول صاحبه برضه بيسقطوا فعليا ومعنويا والله

shimaa elkholy يقول...

وندتي

انتى فين يا بطه

ايوه انا نزلته هناك غلط

وتعالي غلسي براحتك

خلصي الامتحانات وتعالي يا اختي مستنياكي براحتك

shimaa elkholy يقول...

فاتيما

ليه بس يا جميل انا هانجحك كوسه حتى ههههههههههههههه
حتى الكيلو بجنيه يعنى مافيش ارخص من كده

انتى كمان وحشاني خالص والله يا بطه

وبعدين انا شوفت الاجابات وباديلك عشره من عشره
انا حره بقى

shimaa elkholy يقول...

مستر برززدنت

لا على فكره انا مش قصدي يعنى على انهم بيرقصوا البنات قدام حد غريب حتى لو بيهزروا بينهم وبين بعض تلاقيهم بيعملوا حركات بالمطوه وكده يعنى على اساسا انهم يادوب جايين من المدبح

والشباب هما الى بيرقصوا بوسطهم اظاهر الدنيا هاتمشي بظهرها

ومنين تعرف انه مخلص
بلاش مش يمكن يكون هو رايه انك كويس عشان هو بيحبك مثلا ؟؟؟

مش عارفه اصلها معادله صعبه

على فكره احنا المفروض نولي وجهنا لله تعالى دايما

بس كمان احنا مش بنتجوز كده لله ورسوله بس لا وعشان نفسنا كمان ده عادي مشروع يعنى

مافيش اي مشكله انك ترغب فى حاجه دنياويه
لكن كمان ما يمنعش انك تعمل كده بشكل يرضى ربنا سبحانه وتعالى

والخلاف هنا بقى للاسف هو ايه ادين الدين نفسه بقى مش معروف دلوقتي

التدليس والتهبيل شغال الله ينور

نورت

shimaa elkholy يقول...

زهراء

صباح الهنا يا جميل انتى الي وحشاني والله

حلو اوي السبب بتاع المدارس ده يا شيخه تصدقي
مبتكر

الموضه بتاعة الدروس عندك حق برضه

لعلمك مريم سألتنى مره وقالتلى اشمعن انا الى مش باخد دروس ما اصحابي كلهم بياخدوا دروس
وطبعا قعدت اشرح واعتقد انها فهمت

اسبنى من حوارتهم الفاشله

اه ياريت انا عايز اسيب لهم الدنيا كلها والله


الى نعرفه احسن من الى ما نعرفوش

لا طبعا المبدأ ده الى جابنا ورا وحياتك 30 سنه بينحل فينا
اش عرفك ما يمكن فى حاجه ما نعرفهاش


وانتى نورتي يا بطه

shimaa elkholy يقول...

ستيته

والنبى على قلبك دلعني يا سعادة البيه

عونيه حاضر والله حاولت يا ستيته ما عرفتش
وبعدين مافيش معايا الجدول بتاع الهنود الحمر
ههههههههههههههههه

اتنصب عليكى ازاي يا خالتي قوليلي بس انا من خارج الهيئه يعنى ممكن اجي اخدلك حقك ولا يهمك يعنى

على فكره انا كمان زي ما انتى عارفاني باروح المدرسه الطلع ترتتبتتي الى انتى قولتيها دي لكل الى فى المدرسه
وكلهم عارفينى برضه

واه مريم دلوقتي بتعتمد على نفسها فى حاجات كتير
بس برضه مش معنى كده انى الاقي نص المنهج فى الساينس واخدينه فى اسبوع
ده استهبال يا خالتي

ومش قلة ضمير من المدرس لا
ده سوء اداره من الوزاره نفسها المفروض ان المناهج بتنزل متقسمه على الشهور والحصص فين الكلام ده ؟؟؟

هى مسخره وبس

وحشاني يا خالتي

shimaa elkholy يقول...

فتاه من الصعيد

بصي لو انتى فى مدرستي انا اديلك عشره من عشره

لو انتى فى المدرسه بتاعة التطور الطبيعى للحاجه الساقعه
هايدولك درجة النجاح عشان مختصر لازما تكوني حافظه مش فاهمه
هههههههههههههههههه

نورتي يا جميل

shimaa elkholy يقول...

عطش الصبار

تصدقي انا لسه باحلم انى بامتحن لحد دلوقتي
انا متخرجه من 11 سنه على فكره

وانتى كده مبطله كل حاجه طيب قشطه الواحد يبطل برضه ويرتاح ولا ايه
ههههههههههههه
نورتي يا جميل

shimaa elkholy يقول...

غير معرفه

انتى بتكروتي يا بت

انتى جاوبتي على سؤال واحد فين الباقي
هههههههههههههههه

shimaa elkholy يقول...

سوني

ايه ده

تعالى ده انا هاقطعك

اولا اسمها تعجيزيه بالزين مش بالذال
فضحتونا الهي تتوكسوا انتم والى علموكم


ثانيا مين فيهم مامتك هههههههههههههههه

ماهو فى ماهمهات كتير فوق اهو

فاتيما ولا ستيته ولا عطش الصبار

اعترفي بسررررررعه

الازهرى يقول...

أجاوب على السؤال الأول

ببساطه وهدوء هتلاقى إنى اول واحد يقول لكك انى رحت علشان اتعلم

أيوه حقيقي وربنا سبحانه وتعالى شاهد علىكده
وتخيلى كمان انى باذاكر وهاقدم على تمهيدى برضه حبا فى التعليم مش اكتر
مع ان انا لا مليونير ولا كلام من ده بالعكس انا من الطبقة العادية جدا والدى موظف ووالدتى ربة بيت

لكن اشتركوا فى تعليمى وانا صغير والتعليم مش مدرسة وبس
لأ فى مدرسة الحياة ودى لا تقل أهمية
وأهم حاجة علموها لى
ان المرء يسأل عن عمره فيما افناه وعن مال من اين اكتسبه وفيم انفقه
وبكده م أول حياتىوانا مواظب على النظام والترتيب يعنى لو فى فاقد وقت بتبقى مشكلة عندى ولو صرفت حاجة بدون داعى باعذب نفسى عليها
وكمان اتعلمت من مجتمع الريف بتاعنا ان الولد لازم يشتغل من صغره والبنت كمان وكان اول محل بقاله فتحوه ل وكان صغير لما كنت فى تالته ابتدائى وكانت والدتى تقعد معايا فيه ولما وصلت لسنه خامسه كنت لوحدى
بعدها الحمد لله كبرته وبقى حاجه حلوه ومن نشاط للتانى لما الحمد لله قدرت ابنى نفسى واساعد فى بناء المجتمع من حوالى
لا الحمد لله بقى لى شغل محترم ودخل كويس
وبقى التعليم بالنسبة لى مزاج
دخلت الكلية على مزاجى واخترت قسم باحب دراسته واتخصصت تخصص داخلى علشان باحبه واحب دكاترته مش علشان الشغل

وبقت المحصلة فى النهاية انى دخلت الكلية علشان اتعلم
والحمد لله اتعلمت


اما بخصوص السؤال السادس فواضح انك كنتى نايمة السنتين اللى فاتوا
انا منعت التليفزيون من اساسة بدل ما يطلع لى ودنين وانا قاعد قدامه زى الكاريكاتيرات القديمة

اما بخصوص الجواز فادينى باحارب فامى وخالاتى وربنا يستر واقدر اطلع من مطب الجواز ده على خير ( دى ولا حربنا مع اليهود )

والله المعين

غير معرف يقول...

طيب متزوقيش
هكمل اجابة باقي الاسئله
انا جوبت الاولاني صح
صح

السؤال الثاني ؟
بصراحه انا معرفش خالص حكايه الرقص اللي بالوسط ورقص المطاوي ولا اعرف الموضه فيه لاني ببساطه مبروحش افراح الفتره اللي فاتت ديه خالص
وحتي الناس اللي حواليا معظمهم ملتزمين والحمد الله
ونادرا لما اروح فرح مش اسلامي واشوف بنت بترقص عادي اشحال بالمطوي
لكن موضع الشباب اللي بترقص ديه انا بكره اي راجل يرقص ويهز وسطه
بحس انه مجرد ذكر بس شكل فقط لاغير



السؤال التالت
بصرف النظر انا شيفاكي ايه وازي
لكن نصيحتي حبي نفسك زي مانتي شايفها
واوعي اي حد مهما كان
شوفي مهما كان انه يهز ثقتك بنفسك
الانسان اللي بتغير علشان يرضي الناس بيفضل يخدع نفسه وبعد كده بيضرب نفسه بالصرمه القديمه
وبعدين لو عملتي قرد مش هتقدري ترضي كل الناس
يبقي حولي ترضي نفسك وبس
بس علي فكره انا بحبك زي مانتي


السؤال الرابع :
راي انك تتوكلي علي الله
ومدام ححولتي وتعبتي فإن الله لايضيع اجر من احسن عملا
انا خالتي عملت زيك كده ولله الحمد قادره وبتكمل
عندها ابن في تلاته اعدادي لغات
وبتذاكرله ولما معرفتش تمشي معه في الساينز اضطرت توديه دروس في ماده واحده بس
لان دراستها برده عربي
واوعي تيأسي انا كمان هعمل كده واعرف ناس كتير بتعمل كده
وكل ما عدد الناس هتزيد في الموضوع ده كل مهيبقي اتجاه قومي
بس ارجع واقول برده المدرسين ربنا يكون في عونهم



السؤال الخامس :
حكايه المنتجات الصينيه ديه حكايه
بس راي الخاص في الموضوع ده ان في ناس كتير مستائه علشان هيخربوا اقتصاد البلد
وعلي راي المذيعه في برنامج العيشه واللي عايشنه هنقلب خوفوا هنلاق مكتوب عليه mide in china
طيب محنا عندنا الناس بالكوم ليه مبنعملش زيهم
عارفه ليه ؟؟
لانهم هما اتربوا علي العمل والانتاج
لكن احنا اتربينا علي الانتخه



السؤال السادس :
بصراحه حكايه استحمار المذيعه
سعات وسعات لكن مش في كل الاوقات
بتعجبني اوي مني الحسيني

لكن كتير ببقي عايزه اضرب الضيف علي قفاه واقوله كان زمان وجبر
اتفقست ياحلو
مبقناش نصدق ولا حد هيستهبلنا زي زمان
وتقدري وانتي قاعده تعرفي الصادق من الكداب


السؤال السابع :
السؤال بقي ده لعبتي
عارفه ليه هما بيعملوا كده
بيقولوا يمكن يكون حظهم احسن من حظي
ده علي اساس ان الطرف اللي بيتكلم هو المظلوم علي طول الخط وهم الملاك البرئ ابو قلب طيب قوي ( الله يمسك بالخير ياعموره )

لكن الجواز سنة الله في ارضه
مهما دارت الدنيا ولفت بينا برده هنحن لقب يحضنا بصرف النظر عن كون القلب ده قلب راجل اوست

خلصت ياست الكل
ومن غير استهبال تقديرا لحالتك النفسويه التعبانه
سلام

sony2000 يقول...

مااااااااامتي الدكتوره ستيته
اللي بحبها وبمووووووووووت فيها:)

جنّي يقول...

السلام عليكم

اندال اندال بس نعيش ..

نيجي بقى للعكننة ووجع الدماغ ونحل وامرنا لله ما نقدرش نقول لأ ..

1 - ما انتي غششتينا والكل ها يقول علشان اتعلم .. بالفعل لكي نتعلم ونتعلم ليه ؟ لاننا من امة أقرأ ولارضاء ربي سبحانه :
{ يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ وَاللَّهُ بِمَا تَعْمَلُونَ خَبِيرٌ }المجادلة11

وقال جل ذكره
{ إنما يخشى الله من عباده العلماء }
وقال
{ وما يعقلها إلا العالمون }
{ وقالوا لو كنا نسمع أو نعقل ما كنا في أصحاب السعير }
وقال
{ هل يستوي الذين يعلمون والذين لا يعلمون }
وامتثالا لامر النبي صلى الله عليه وسلم :

وأن العلماء هم ورثة الأنبياء ورثوا العلم من أخذه أخذ بحظ وافر ومن سلك طريقا يطلب به علما سهل الله له طريقا إلى الجنة ..

وبالطبع هناك اهداف اخرى للتعليم فالامة المتعلمة امة حرة يصعب اسنعبادها ..

2 - بسبب قلة الحياء للبنات وقلة المرؤة للشباب .. وانعدام التربية وغياب القدوة ..

3 - بالنسبة لي احيانا اجدك صح واحيانا اجدك غلط بمعنى اختلف معك واظنني ذكرت ذلك في بعض التدوينات .. لاني لو رأيتك صح دائما لاصبحتي صبرني العدوية ( النص الحلو طبعا ) فالكمال لله وحده .. ثم ( عن عمر بن الحطاب أنه قال في خطبته : حاسبوا أنفسكم قبل أن تحاسبوا وزنوا أنفسكم قبل أن توزنوا ، وتزينوا للعرض الاكبر ، يوم تعرضون لا يخفي منكم خافية.

4 - من مظاهر افساد المجتمع والتحكم فيه افساد التعليم وكلما ذكرتيه من مظاهر افساد التعليم ولو استطعتي ان تدرسي لابنائك وهم في هذه المرحلة فهل تستطبعي ذلك في مراحل متقدمة .. لقد فشلت وانا معلم علوم قد الدنيا عندما وصلت ابنتي الكبرى للصف الاول الثانوي .. ورغما عن انفي اخذت دروس خصوصية وانا لا اعطيها مطلقا طوال عملي في مصر ..

5 - تعرفي في احد الموالد تفحصت طرطور للولاد ووجدته متصل بانبوب بلاستيك عبارة عن قسطرة اخذت من فضلات المستشفيات ودا من افضل الاماكن لاخذ البلاستيك المعاد تصنيعه .. دا الصيني ارحم بكتير ..

6 - لانه بصراحة حوار الطرشان وكل يغني على ليلاه وكلنا زيك بالضبط ولنا نفس الاحساس ..

7 - هو لسه فيه سبعة ؟ نعمل ايه امرنا لله .. دا الفجر ها يأذن يا اخوانا ..

عايزين اخواتهم وولادهم يتجوزا علشان يغوروا من وشهم وكمان علشان يتعذبوا زي ما اتعذبوا .. غرام وانتقام بقى ..

اشهد ان لا اله الا الله

مع السلامة

سواحة يقول...

ايه يا دردر انت تغيبى و ترجعى ببوستين على بعض

الحق اجاوب على الاسئلة مدام عندى شوية وقت قبل ما اتلخم ثانى

السؤال الاول: اعفاء :-)
بنروح مدارس و جامعات ليه :-))
صحيح عايزنى اجاوب
ممكن اعفاء من السؤال
اصلى واحدة اطخبتت فى عقلها لما تولدت و من ساعتها و بتحب العلم و لسه ربنا مشفهاش :-)

بس خلينا نقولها بصراحة العلم بنتعلمه من حاجات كثيرة حوالينا
زمان الى كان عايز يبقى عالم (عالم دين او عالم علوم او حتى دكتور ) كان بيبقى تابع للعالم ده 20-30 سنة من حياته لحد ما يشرب من المعلم كل حاجة و بعدين ممكن يستقل لوحده و يبقاله تابعين ليه

دلوقتى اغلب العلماء دول ملهومش مزاج يتبعهم حد بيرموا الى موجود فى الكتب و يخلوا الطالب يلف من اول و جديد لفتهم لحد ما يوصل لحد ما وقفوا و بعدين ياخذ شهادة و يخرج للشغل علشان يكتشف انه :-) متعلمش حاجة و لازم يبداء من الصفر من جديد

انا بعترف انا اتعلمت فى ابتدائى لانى كنت منبهرة
فى اعدادى علشان اعرف اختار سكتى فى الثانوى و فى الثانوى علشان ادخل الكلية الى عايزها
و فى الكلية علشان اعرف اشتغل
و بعد التخرج :-) بدات اتعلم من اول و جديد :-)

السؤال الثانى
تمرد
البنات زهقوا من انهم يكونوا تقليدين و عايزن يشدوا الانتباه ليهم بشكل مختلف علشان يتقال واو :-)
الولاد :-) فى الاول كانوا بيرقصوا تريقة على البنات و بعدين اعجبوا بنفسهم :-) و تجاهلوا انهم مبيعجبوش الباقين (اتنمردوا هما كمان بالطناش)

السؤال الثالث
اسمعى من الاثنين وجهة نظرهم جايز فيه نقط فاتتك واستفتى قلبك :-)
لما حتحسى انك غلط صلحى الغلط
لو حسيتى انك صح اتمسكى بالصح

السؤال الرابع
الاجابة ماتتطفاشيش منها و كملى مذاكرة مع انك تعلميهم ازى يدورا على المعلومة بنفسهم
مشكلت التعليم عندنا ان جاهز
المعلومة جاهزة مفيش تعليم ازى توصل للمعلومة
و لما بعدين نتزنق فى البحث عن معلومة مشابة منعرفش نوصلها

سؤالى انا مادام مش راضية بالمدرسة بتوديهم ليه و تدفعى فيه فلوس مصاريف ليه ؟؟ مفيش اختيار ثانى ؟

السؤال الخامس
المنتجات الصينية بتتحارب اى نعم
ده تهديد للعالم كله :-) الى بيوفر من عملته و بيبعتلها تنتجله :-)
و ليهم تقريبا خمس درجات جودة من اعلاهم لاسواء
اوروبانفسهم بدات تتقلل مصانعهم علشان البيئة و الايدى العاملة و بتستغل يا شرق اوروبا يا الصين
المشكلة فى مراقبة الجودة عندنا هنا

السؤال السادس اعفاء :-))
اعذرينى بقالى زمن متفرجتش على برامج حوارية بس عموما بحسهم تمثلية بايخة

السؤال السابع برضع اعقاء :-))
انت الى تقوليلنا ليه :-)


حلو الامتحان الى مليش فى نص منهجه اساسا
انا كده ضمنت النجاح :-) ب50% من الدرجة

shimaa elkholy يقول...

الازهري

الحمد لله تعالى انك اتعلمت

بس ايه حكاية انا باذاكر مع انى مش مليونير دي ؟

طب وهو المليونير فى بلدنا دي يذاكر ليه
هههههههههههه

ومش هاتعدي من مطب الجواز يا ابنى كلنا لها
ادينى بس ماما وخلاتك وانا اتضامن معاهم

shimaa elkholy يقول...

غير معرف

بصي انا اينعم عارفاكي بس يعنى اختارليك اسم بقى

الواحد لما يحب يخاطب مصر يخاطب مين هنا

ام هند

انا ما ازقش ليه طيب

طيب ينفع ازق بالراحه ولا ايه
هههههههههه


واجاباتك شافيه ووافيه ومافيهاش اي مظاهر استهبال

ومرسي على انك بتحبينى زي ما انا (وش بيبرش وكده يعنى )
ههههههههههههههههههه

shimaa elkholy يقول...

سوني

اوك يا جميل

ستيته ربنا يخليهالنا ما اقدرش انا اقول مامتي كانت ستيته علقتنى على باب المدونه
هههههههههههههههههههههه

shimaa elkholy يقول...

جني

استاذ سعيد اجباتك حضرتك فى الجوووووووووون

مرسي خالص على الاجابه وحضرتك تعبت نفسك وسوري انى اتاخرت فى الرد

وطبعا اناعارفه اننا بنختلف انا وحضرتك فى الراي بس طبعا بكل احترام للراي الاخر وده بيسعدنى جدا جدا

ومتشكره جدا على تشريفك دايما ليا والله

shimaa elkholy يقول...

وندا

الاختيارات فى المدارس كلها زي بعضها

كل اولياء الامور بيشتكوا نفس الشكوى

وطبعا حضرتك انا دلوقتي مريم عندي كبيره
فى سنه رابعه
لو قلتلها هانقلك من المدرسه ممكن تحجر عليا عشان اصحابها

انا اخترت المدرسه دي لانها قريبه مني وفى نفس الوقت لها باصات ومستواها معقول ولغات وسعرها كويس وكمان تابعه لجمعية المحافظه على القرآن الكريم ده بيديها شويه محافظه على مظاهر الاسلام على الاقل
عشان فى مدارس عندنا هنا لغات تابعه لكنائس وده ما ينفعش انا باعتبره بيعمل تضارب عقائدي وفكري عند العيال
وحكاية المعلومه الجاهزه دي انا واخده بالي منها وما باحبش طريقة التلقين وادلق الكلام فى ورق الاجابه وروح وكده


وبالنسبه لموضوع راي الناس

فانا اوقات كتير بابقى نفسي الحقيقه يحتفظوا برايهم لنفسهم لانهم مش بيقولوا رايهم فيا
لا دول بيتدخلوا فى حياتي بشكل سافر جدا
وطبعا احنا كشعب مصري اصيل بنحب نتكلم فى الى مش عاجبنا بس
انما الى عاجبنا خليه فى سرك انت هاتمرعها علينا ولا ايه

الحقيقه ومع احترامي لوجة نظرك انا كتير كتير كتير باطنننننننننننننننش
ايوه باقعد اقول خليك هاااااادي يا واد طنث خاااااااالث كده يعنى
عشان امراض العصر انتى عارفه مش مش مخليه وانا صاحبة عيا وشايله المراره

واندا حياتي الى هربت من نص الامتحان
وحشاني جدا