السبت، 1 مايو، 2010

فلسفة الكوميدينو



الكوميدينو عارفينه ؟؟

أي حد زي جوزي بيتلخبط بين الكوميدينو والتسريحه والشيفونيره والبوفيه والنيش  يعرف ان الكوميدينو ده
هو عباره عن قطعه من الاثاث زي  الى فى الصوره الى فوق ده يحتوي على ادراج وبتبقى جمب السرير من الناحيتين

ام هند

الكوميدينو بقى ايه مشكلته معايا النهارده

كام مره يا معلم فكرت فى الكوميدينو بتاعك النهارده ؟؟؟

نقول 3 مرات

طب فكرت فيه ليه ؟؟

مره لما دورت على الدوا بتاعك الصبح
ومره لما دورت على الهند فري بتاعتك
ومره لما خبطك فى رجلك وانت رايح تجيب هدومك من الدولاب

اممممممم

طب هل فكرت مره وحيده فى حياتك من غير الكوميدينو ومحتوياته هاتكون ازاي
ابسلوتلي نوت ولا جه على بالك اصلا
طب وانت اصلا هاتفكر فيه ليه
ماهو موجود على طول
هو يعنى هايروح فيييييييييين
ده مضمون اخر حاجه وانت حاطه فى البيت وقافل عليه تمام هايروح فين
طب لو اختفى الكوميدينو من حياتك اصلا هاتفتكره امته ؟؟

ده انت ممكن ما تاخدش بالك اصلا ا نه مش موجود الا لما تحتاج حاجه منه

ومع ذلك بيفضل الكمودينو شايل الحاجات بتاعتك ومحافظ عليها ومش بيمانع ابدا انك تاخدها
ولا يمانع انك تتسند عليه ولا حتى تقف عليه عشان تطول الحاجات الى فوق الدولاب ما انت اوزعه اصلا
وياما دلقت انت عليه كوباية العصير وكوباية المايه ولا قالكش مش تاخد بالك يا جدع ولا البعيد اعمى ؟ ... ولا عمره قالك ما تحطش كوبايات عليا تاني


فلسفة الكوميدينو بقى تكمن فى

ان فى حياة كل منا كوميدينو  مش عارفين قيمته

ياريت ما تنتظرش  لما الكوميدينو يخبطك فى رجلك ويوجعك عشان تفكر فيه


وياريت كمان ما تنتظرش لما الكوميدينو يضيع منك عشان تفتكره وتفتكر احتياجك له

وياريت لما تدلق عليه الشاي تقوله معلش حقك عليا

ولما يتكسر تزعل عشانه وتصلحه

ولما الادراج بتاعته ما تبقاش مستحمله حاجاتك تشيل الحاجات الى ما لهاش لازمه وكفايه عليه المهم

ولما تزهق من اهله يا سيدى ابقى بيعه لحد محتاجه  ما ترمهوش فى الشارع ولا تركنه فى البدروم  ولا تكسره ما حدش غيرك يستعمله

واوعااااااك تفتكر ان في حاجه مضمونه
الكوميدينو ممكن يزهق منك ومن اهلك ويطفش
مالوش رجلين ؟؟
ممكن يطلعله عادي جدا
انت زنقه كويس فى الحيطه بالسرير
ممكن يكسرلك ام السرير ماهو مش طايق نفسه

وما تقولش ده كوميدينو سكه واي كلام وهايطفش يروح فين  مش هايلاقي حد يعبره
لا يا حبيبى الى تزهده غيرك يشتهيه والله 
واحتمال يجى حرامي يسرقه منك
وبما انه حرامي وبياخد الى مش من حقه هايبهدل الكوميدينو بتاعك حبيبك وهايفرغ كل محتوياته حاجتك او الى كانت حاجتك وبعدين بعد كده يبيعه بابخس الاثمان

وبناءا على ما تقدم
كل واحد يخلي باله من الكوميدينو بتاعه ويحترم نفسه بقى عشان ما يرجعش يندم

هناك 46 تعليقًا:

مصري جدا يقول...

صحيح جدا

ودا يثبت وبما لا يدع مجالا للشك

ان الراجل اصله كومود ( أصلي مسأف أوي)

عارف هتسأليني عنكوا
والوليه أصلها اللي ضيعته

فتاه من الصعيد يقول...

ههههههه

لما اجيبه ابقا اشوف بقا هتصرف معاه ازاي :) ..

لأني لن ابقا كومودينو له ...بفكر ابقا تسريحه بمرايه يشوف فيها نفسه :) ..

ويبقى هو كومودينو الاسرار بتاعي ..

تحياتي

حنعيش يعنى حنعيش يقول...

كنت عامل زمان بوست اسمه نفسى ابقى كوميدينو ... لو طلع قصدك هوه قصدى ...يبقى الله ينور عليكى ..ويبقى فيه امل ان حد بيبص للاخر ...لكن لو ماكنش قصدك كدة يبقى عليه العوض

الازهرى يقول...

انا بقى الكوميدينو بتاعى حاطط فيو تشوينة كتب
واخر مرة مديت ايدى ناحيته كانت من سنة تقريب لانى قرأت الموجود جواه وسايبه للزمن

بس بصراحة باراعيه بالنضافة اول بأول واهتم بيه
طبعا عن طريق اخواتى البنات
مش هم كمان كوميدينوهات لى

تحياتى دوما

ندى الياسمين يقول...

مصري جدا

الكمود بتاعي يمشي مذكر ومؤنث

هههههههههههه

ندى الياسمين يقول...

فتاه من الصعيد

والله كوني ما تبغين ان تكوني

بس خدي بالك لازم يبصلك مش يشوف نفسه بس يشوفك انتى كمان
اوعى تلغى نفسك

ندى الياسمين يقول...

حنعيش يعنى حنعيش

والله يا دوك انا اول لما كنت باكتب كنت مش على بالي الكوميدينو بتاعك

وبعدين افتكرته وانا باكتب وقعدت اضحك

طبعاااااااا فاكره البوست بتاعك يا فندم

نورت

ندى الياسمين يقول...

ازهري
هههههههههههههههههههه
ايوه بتراعيه بشكل غير مباشر

فكرتني بالمقوله الانجليزيه الشهيره
هنحارب لاخر جندي هندي
هههههههههههه

صيدلانيه طالعه نازله يقول...

الله عليكى يا ستنا

كل واحد فى حياته كومودينو و الشاطر اللى يفضل محافظ عليه و كمان يصونه و يصلحه لو اتكسر او حصله حاجه
لانك النهارده مش محتاجاه بكره يمكن تحتاجيه
كمان للاسف فى ناس بتبقى مستنيه الكومودينو بتاعك و فى لحظه بتخطفه من غير ما تحسى

ربنا ميحرم كومودينو من كومودينته

وش بيغمز

ستيتة حسب الله الحمش يقول...

اللي يعمل نفسه كوميدينو يستاهل الأباجورة تتحط عليه
انا لا اقبل بأقل من دولاااااااااااااااب
وبلكار كمان

reem يقول...

عاجبنى اوى البوست دا ياندى

حلوة اوى حكاية انه ممكن يطلع له رجلين دى جدا

عارفة فعلا في ناس مهمين في حياتنا مش بنعرف اهميتهم بغبائنا واستهتارنا بمشاعرهم ومش بنفكر انهم ممكن فعلا في لحظة يروحو مننا

توتة انتى كدا دايما بتكتبى حاجات في وقتها الصح

ندى الياسمين يقول...

صيدلانيه

كلنا يا اختي كمودينهات والله

على الله حد يفكر فينا بقى

مش عارفه يا عندك عين كده بتغمز انتى عينك مطروفه ولا ايه

ههههههههههههههه

ندى الياسمين يقول...

ستيته

والله زي ما تحبي اختاريلك اي قطعه ولا يهمك

بس خدي بالك الدولاب البلكار ده يا اختي بيشيل كتيييييييييييير

خليكى فى الكومدينو اسهل
منووووره

ندى الياسمين يقول...

ريم

حياتي اي خدمه

هههههههههههههههههه

مرسي يا بطه على الكلام الجميل

sony2000 يقول...

بجد بوست راااااااااااااائع
وحسيت اننا كلنا
محتاجين لكومودينو:)

sweet angel يقول...

والله فعلا
الواحد بيبقى في حياته اكتر من كوميدينو ومش حاسس بقيمته

لولا وزهراء يقول...

ارق ندى

احلى صباح على عيونك

حلو اوى الاسقاط اللى فى البوست وكل واحد هيشوفه بطريقته بس انتى عارفه طبعا ان هناك 2 كومود
تخيلت ان الكومود ده صديقى اللى بيتحمل منى اللى ماحدش يتحمله ويمكن تخيلت انه زوج المستقبل ان شاء الله وكفايه انه هيتحمل دماغى بكل ما فيها من حاجات غريبه عجيبه .....

كل واحد مننا فى حياته كومود لا يشعر بقيمته لا عندما يشرع انه هيفقده لكن غير كده هو موجود هيروح فين يعنى

تحيه لافكارك ودماغك الجميله الاكتر من رائعه
وحشااااااااااااانى اوى اوى

زهراء

غير معرف يقول...

عندك حق جدا
بس ياريت وكلمة ياريت



بس انا متغاظه
متغاظه من كلمة اخر حاجه ديه
بصراحه تفرس
ومش انا لةحدي علي فكره اللي بتفرس لما اسمعها
دول عاملين جروب علي الفيس بوك للي بيكرهه كلمه اخر حاجه


هههههههههههههههههه

ندى الياسمين يقول...

سوني

اهو شوفتوا اهمية الكمودينو بقى ؟
ههههههههههههههههه

ندى الياسمين يقول...

سويت انجل

طب خلي بالك من كمديونهاتك بقى

ندى الياسمين يقول...

لولا وزهرا

هو فعلا انا مش قصدي بس انه يبقى الكمود حد بعينه

عشان فى ناس بتتكلم على ان الكمود ده الزوج او كده

وانما انا قصدي بجد كل حد مهم فى حياة البنى ادم

زوج او زوجه او صديق او ام واب او اخ اي حد

وانتى وحشااااااني والله
وان شاء الله اقفشك مره على الميل نرغي

ندى الياسمين يقول...

غير معرفه

ليه مالهااخر حاجه؟

اسكتي دي ارحم من كلام كتير

والجروب بتاع الفيس بوك ده انا هاعمل جروب مناهض له
ههههههههههههههههه

رحله البحث يقول...

أأأأأأأأخخخخخخخخخخخخخ
لو كنت اخدت الوصل

جنّي يقول...

السلام عليكم

قبل ما ندخل في الكوميدينو .. في البوست اللي فات افضل سهران واحل اسئلتك لحد الفجر والاخر لا حس ولا خبر ولا شكر ولا حمدانية ولا رد على التعليق .. ماشى ..

عن الكومدينو انا زي عم رضا بالظبط وبغلب العيال معايا على اسماء القطع اياها .. بس انا قدرت اتخلص منه نهائيا وبنام كويس من غير كوميدينو ولا يحزنون ..

بس تعرفي اول مرة افكر في الاشياء التي ذكرتيها دا مسكين بجد ..

سلام

هبة الحياة يقول...

هههههههههههههههههههه
طيب والي مش عنده كوميدينو يعمل ايه؟
انا عندي دولاب وسرير وبس

اعمل ايه انا بقي دلوقتي؟ استخدم الفلسفة دي ازاي؟

ااااااام اقولك انا هاضحك علي النيش الي عندي في الصاله واعمله كوميدينو

ندى الياسمين يقول...

رحلة بحث

طب والنبى يا اخويا لو لقيت الوصل بتاعك دور كده جمبه على الوصل بتاعي

هههههههههههههههههههه
منور يا محمد

ندى الياسمين يقول...

جني

يا خبررررررر

اكيد التعليق سقط سهوا مني يا فندم

انا باحترم كل تعليق يتحط عندي ولازم ارد عليه ولو اقول شكرا على التشريف

ان شاء الله حالا هاشوفه وارد عليه طبعا


وبالنسبه للكوميدينو شوفتوا بقى انتم ظالمين الكومدينو ازاي بقى

وكمان بتنام من غيره

شوفوا الظلم بقى
ههههههههههههههههه

نورت يا فندم

ندى الياسمين يقول...

هبة الحياه

امممممممم والله فكره مش بطااااااااله

اقولك على حاجه انتى لو عاملتي النيش على انه كوميدينو ممكن بعد فتره يقتنع عادي جدا
هههههههههههههههه

نورتينى يا جميل وانا زروتك بس ما لحقتش اعلق لنا عوده ان شاء الله

star in the sky يقول...

حاضر :D

هخلى بالى من الكوميدينو بتاعى بس اما هو يخلى بالى من كوميدينوه بقى

ندى الياسمين يقول...

ستار

ماهو لو قعد كل كوميدينو يستنى التاني يخلي بالي منه مش هانوصل لحاجه

طب جربي تخبطيه فى صباع رجله جايز يخلي باله


نورتي

محمد عبد الغفار يقول...

انا محتل فى بتنا 2 درج كوميدينو و2 درج تسريحه وعاوز تانى

أحــوال الهـوي يقول...

لن اركض خلف الاسقاطات او ابحث بين السطور عن المعاني الفلسفيه
فقط سوف اكرر الدرس الذي تسعين اليه

قل لمن بقربك انك تحبه فهو حافظة اسرارك يتحمل منك سقطاتك و يغفر لك اخطاءك
انه الاولي ان تذكرة بحبك له قبل ان يفوت الاوان و تصبح كلماتك بلا معني

قد تري البعيد و تتودد له و لكنه ابدا ليس كمن هو بقربك قل لزوجتك لزوجك لابناءك لذويك و اصحابك انك تحبهم

الآن

تحياتي

فاتيما يقول...

يا خراااااااااشى عليكى

آه يانى
تنهييييييييييييييييدة طويلة

و سكتة كدا

و سرحان ف الكلام الكبير اللى اتقال فوق دا و فى خفة دمك و ف الربط الهايل ما بين الحاجتين دول

الكومودينو و البشر

و مدى معاملتنا للأشياء المهمة فى حياتنا على انها ثوابت مش هيطلعلها رجلين ف يوم و تسيبنا و تمشى


ضحكت و ابتسمت و رغرت و قولت الله عليكى لما قريت البوست

بجد بوست تحفة

بوسات و حضونااااااااات اد كدا يا غالية و طيبة و كل حاجة حلوة ف الدنيا



بوسيلى العيااااااال
و سلامنا لأبوهم

ندى الياسمين يقول...

محمد عبد الغفار

نورت يا فندم

طيب كويس ما انت واخد حقك على الاخر اهو
خلي بالك بقى من الكوميدينو والتسريحه كويس

ندى الياسمين يقول...

احوال الهوى

استحمل فلسفاتي بقى يا استاذنا معلش
اصل انت عارف ان انا متعبه كده
ههههههههههه

وطبعا كلام حضرتك فى التمام جدا

ندى الياسمين يقول...

فاتيما

مرسي يا جميل ده انا الى هاعيط من كلامك كده

والله انتى الى جميله بجد ووحشاني جدا

ولعلمك انا هاعمل لقاء فى المنصوره عشان اشوفك بقى مافيش حل بس امتحانات العيال تخلص

وبوسات وحضونات اكتر ليكى يا جميل وربنا يخليكى لنا يا قمرايه

حنين القلب يقول...

ايه يا حاجه
فيه ايه؟؟
ها
كوميدينو ايه اللى افكر فيه
يعنى انا خلاص كل مشاكلى فى الدنيا اتحلت
وعمر بقى ينام وسابنى انام ولو ساعه انا اضيع الساعه ده فى التفكير فى الكوميدينو؟
دنا مش بفكر فى اللى اشتراه اصلا هفكر فيه هو
ومن هنا نطلع بحاجه مهمه
ظط فى عفيش البيت كله وانام ولو ساعه
هههههههههههههههههههههه
وحشتينى يا ست ندا
فيه كلام عنك عندى ابقى تعالى شوفيه
فيه لقاء فى اسكندريه الشهر ده حاولى تيجى هموووووووت واشوفك
ماااااااااااااشى

حنين القلب يقول...

نتكلم جد بقى

فيه حاجات كتير فى حياتنا مش بنفكر فيها الا لما تبعد وساعتها بنندم عليها اوى رغم انها كانت فى ايدينا بس لما راحت ظهرت غلاوتها عندنا

وده غباء مننا

وعجبى

had-befham يقول...

يا سبحان الله
فعلا
ما الدنيا اللا كومودينو كبير:))

قلم رصاص يقول...

رجعنا للرغي تاني
هههههههههههههههه

انا لا اقبل بأقل من نجفه
اه عشان وقت اللزوم انزل على النفوخ من دول اخليه قطع غيار
ههههههههههههههه

بجد البوست جميل اوي وفكرته رائعه

تسلم الأفكار ولوحة المفاتيح

تقبلي مروري وتحيتي

ندى الياسمين يقول...

حنين القلب

حبيبتى ازيك عامله ايه

انتى يا بت انتى هاتعيطى من شهرين

يا عينى علينا يا غلابه يانا

انا روحت عندك يا بطه وشوفت الموضوع ومرسي على الكلام الجميل

واللقاء

تصدقي بالله
لسه النهارده باقول لصيدلانيه انا نفسي اروح لقاء اسكندريه
واقعد هناك يومين ثلاثه كمان

وفى بالي اوي اجي اشوف ابنك الى غلبنا ده
هههههههههههههه

والله خليها بظروفها يا لولو لما اشوف وقتها هايبقى في ايه

نورتي يا جميل

ندى الياسمين يقول...

حد بيفهم

لا قول ما الناس الى كومديونهات بعض
هههههههههههه

نورت

ندى الياسمين يقول...

قلم رصاص

يعنى الافكار والكي بورد

وصاحبتهم ما لهاش اي حاجه ولا ايه
ههههههههههههههه
نورت يا سيد

Timo.. يقول...

عارفة..
من عنوان البوست وانا عارف انه الكلام وراه كلام وكلام..
ويمكن كمان حسيت اللي انت عاوزة تقوليه..
يمكن عشان طول عمري باقدر الكوميدينو بتاعي وعشان ديما باخد بالي من الحاجات اللي الناس مش بتديها اهتمام وبتهملها..
ولما تغيب تبتدي تحس انه حاجة نقصاها
وفعلا..
"حاجات كتير وهي معانا مش بنفكر ابدا فيها..
غير لو ضاعت..
نبتدي نندم..
ونعيش نحلم نرجع ليها..!!"

انا متابعك من فترة على فكرة وبتعجبني مدونتك قوي (';')

Timo.. يقول...

آآآآ....حبيت اقول انه كمان عجبني قوي البوست اللي فات:
"ليـــــــه ؟؟ هاه ؟؟ ليه ؟؟" (';')

انا ديما بسال السؤال ده في المحاضرة:
هو احنا بنروح مدارس وجامعات لييه..؟؟
ولاسف برضة باتصدم في الاجابات زيك..!!

ندى الياسمين يقول...

تيمو

بالظبط ده كان قصدي وفكرتي

وانت نورت ومتشكره اوي على كلامك عن المدونه وعني