السبت، 4 سبتمبر 2010

الاسلام ارقى من كده

سلام عليكم
متشكره اوي يا جماعه على اهتمامكم بالبوست الى فات ودعواتكم لبابا  بس استمروا يعنى  وربنا يمن عليه بتمام الشفا ان شاء الله
وانا والنبى ادعولي  عشان مش عارفه ضغطي فوق فوق فوق  تقريبا انتم السبب والله اعلم

انا قلت لما اجي افضفض لكم بكلمتين جايز وربما الضغط يحترم نفسه وينزل

طبعا احنا فى رمضان كل سنه وانتم طيبين ورمضان قرب يخلص بس انا عدى عليا موقفين يا مسلمين يا صايمين معلمين فى نفسيتي اوي اوي اوي

الموقف الاول

خناقه فى الشارع واحد بجلابيه قصيره ودقن ماسك فى واحد تاني وبيشتم بقى وكل ما يلزم والناس بتشيلهم عن بعض والتاني كذلك برضه بكل ما يلزم

سألنا في ايه يا جماعه وده كان ساعة صلاة التراويح والناس نازله تصلي

رد متطوع من الجيران وقالك اصل فلان اكل عند حماته فحماته المفتريه الى مش هاتورد على جنه كانت عامله سمك مقلي وحاطه فى السمك المقلي توووووووووم

اي والله كدهو  توووووووم

المفتريه تحط توووم فى بطن السمك المقلي

وعم الشيخ بقى لما اكتشف هذا  الامر الجلل

اتخانق مع المودام وامها واخوها وفضحهم فى الشارع كده

لانه يا ساده لما اكل الثوم فى السمك مش هايعرف يروح يصلي فى المسجد لان الرسول نهى عن قصد المسجد وهو واكل توم

اه والله العظيم عم عماد الى فى اخر الشارع قال كده والعهده على الراوي

عشان التووووم الى فى السمك

وعشان ما حدش يقول فى ناس بسيطه ومش فاهمه الاخ جامعي ومتعلم
وايام ما كان بيكلم مسلمين عادي كان بيقولي انه سلفي

الرسول قاله ما تصليش فى المسجد وانت واكل ثوم قوم لما حماته طفحته عندها والاكل كان فيه توم كان لزاما عليه يفضحها ويشتمها ويشتم الكل  كليله

الاخ ابو دقن نص متر وصلاة  المساجد وجلابيه قصيره  لم يمر  عليه الحديث الى بيقول  الى عايز ياكل بصل وتوم يطبخهم وياكلهم عاااااااااااااااادي

الاخ ابو دقن وحرص  على صلاة المسجد ما يعرفش انه لو ما صلاش التراويح اصلا خالص مش هايؤثم انما بالى هو نيله هايتنيل على عينه  هايؤثم

الاخ ده قصته طويله معايا  هابقى هاحكيهالكم فى موال لواحدها

ننتقل الى الموقف التاني والى هو مشهد سريع

سائق تاكسي محترم واخر الاجه  وسايق التاكسي اي والله كده

وماسك الدركسيون بايده  وبصوباعين كده ماسك مصحف صغير وبيقرا وهو سايق

اي والله حدث ذلك

طبعا هاتقولوا يا مفتريه تلاقيه سايق فى حته فاضيه وهاديه ويمكن بس بيراجع ولا اي بتنجان تاني

طب الى من المنصوره هايعرف انه مش باتجنى عليه وانه عايز يتعلق على باب زويله

كان سايق التاكسي الساعه 9 صباحا فى شارع البحر قدام مركز الكلى كده

حيث الجامعه وملحقاتها ومستشفياتها والكل كليله

اييييييييييييه رمضان وعايز يلحق يختم القرآن

ربنا قاله يقرا القرآن بغير تدبر وغير عابيء بحياة البشر الى حواليه

بلاش حياته
طز فى حياته مش عايزنها اصلا هانعمل به ايه وهو كده

الناس الى حواليه  الى اصلا مش ناقصين غلب وقرف


يا ناس حرام عليكم هاموت منكم والله

يا مسلمين
الاسلام مش كده
والله العظيم الاسلام مش كده

الاسلام
احلى من كده
ارقى من كده
اعمق من كده

افهمواااااااااااااااااا
الهي يستركم افهموااااااااااااااااااا


هناك 27 تعليقًا:

كاشف همومى يقول...

الفهم متناقص
لان الادراك بالقلب
وليس بالعقل
من وجهه نظرى
اسألكى الدعاء
ياريت
تزورينى

باحث عن حب يقول...

المشكله مش فى الدقن ولا المصحف ولا التاكسى
المشكله فى العقول اللى مكان المخ
عجه مش عجوه
يارب الهمنا فهم دينك الصحيح
انتى مش بتيجى ليه مش تبقى تجى كده

ادعوكى لمدونتى الجديده والقديمه ماشى
elbanany.blogspot.com

adel يقول...

دي ثقافة شعب
زي كل رمضان نمسك هب السيجارة بتفطر ولا لا
واصلا لو تسمعي التفسيرات الموافقة و المعرضة هتزهقي

كل واحد دماغه مرياحه
----------
....... !!!!!
ده كومنت هافوله بعدين

Ramy يقول...

انا متفق مع عادل فى رأيه

فين العقول

هى دى المشكلة

ربنا يهدى النفوس

رمضاااان كرييييم

Ramy يقول...

و ربنا يقوم الوالد بالسلامة

أن شاء الله

مش ناسين أى حد خالص صدقينى (:

sony2000 يقول...

يااااااااارب يهدي الجميع
اللهم امين

قلم رصاص يقول...

فعلا زي ماقال اخونا محمود(باحث عن حب)
المشكله مش في الدقن والا المصحف ولا التاكسي
بقدر ماهي في العقليات والتفكير


ربنا يهدي الجميع

غير معرف يقول...

أصبت كبد الحقيقه

بس هعدل تعديل بسيط

يا من تدعون الأسلام

أسلموا

shimaa elkholy يقول...

ضياء القلب

هو تقريبا مافيش ادراك تماما

ربنا يصلح حالك يارب وانا زورتك فعلا بس تصفحت فى السريع ان شاء الله اجيلك تاني

نورت

shimaa elkholy يقول...

محمود

اه طبعا مش الدقن والمصحف الى غلطانين

العقول فعلا

والله يا محمود مش بازور حد تقريبا خالص

عندي شوية ظروف كده
اعذرني ان شاء الله تروق معايا الحكايه وهازور الكل من تاني

shimaa elkholy يقول...

عادل


انا اساسا ما باسمعش البتنجان ده اعصابي مش بتستحمل

فين الكومنت طيب سبهولي على الميل ولا اي حاجه اثرت فظولي يا رجل

shimaa elkholy يقول...

رامي

تمام يارب امين نورت

shimaa elkholy يقول...

سوني امين يارب

shimaa elkholy يقول...

قلم رصاص

يارب امين

نورت يا سيد

shimaa elkholy يقول...

مصري جدا

تعديلك او خليها اضافتك اتفق معاك فيها جدا

نورت يا فندم

عمرو يسرى يقول...

ناس كتير دلوقتى بقيت حافظه مش فاهمه

شمس النهار يقول...

ماهو يا ستي الناس بتتشدق بالدين وهي ابعد مايكون عنه
ومناظر
ربنا ستاااار بقا
لكن في فجر بيفضحوا نفسهم كمان

تحياتي

shimaa elkholy يقول...

عمرو يسري

دول كده لا حافظين ولا فاهمين والله

نورت

shimaa elkholy يقول...

شمووووسه

ايه النور ده يا ولاد

فعلا بيفضحوا نفسهم بس بيفضحونا كمان لا دول بيعرونا والله

وحشاني يا جميل

غير معرف يقول...

لسه واحده صحبتي امبارح ضرباني كلمتين حلوين اوي
بتقول ان الرسول قال اني بعثت اليكم لتمم مكارم الاخلاق

مكارم الاخلاق
وقال رسولنا الكريم ما معنه
اقربكم مني يوم القيامه احسنكم اخلاقا
مقلش اكثركم قرأه للقرأن او اعدلكم بين الناس
او اللي ميفوتش يوم في صلاة التراويح
طيب هل واحد من ابو دقون دول اللي انا خلاص اتفقعت منهم
يقولي انهي احسن اصلي التراويح
ولا افسح مراتي
اقوله لا طبعا تفسح مراتك
لان مراتك لما ترضيها سواء بفسحه او اكله او حتي تقعد معها في رمضان فده فرض عليك
لكن صلاة التراويح سنه
والفرض مقدم علي السنه
عموما كل واحد من بتوع الدقن بيفسر القرأن والسنه والاحاديث علي هواه
وبيعمل اللي يريحه هو ومش مهم الصح فين

ربنا يرحمنا بقي برحمته
سلمي علي الوالد وربنا يشفيه
علي فكره انتي وحشاني جدا جدا

shimaa elkholy يقول...

غير معرفه

والله وانتى كمان وحشاني جدا

بس مش يفسح مراته كل يوم وما يصليش :)
مشيها يوم ويوم معلش هههههههه

عموماطبعا ايا يكن الفرض مقدم على السنه

وطبعا طبعا بدقن او غير دقن
المشكله فى فهم الدين خطأ

بيتدينوا بالدقن والتعدد والكلام باللغه العربيه ومافيش اقامه حقيقيه لروح الدين

نورتي يا جميل

Humman being يقول...

ياريت الناس تفهم كدة يا ندى ياريت
ياريت يعرفوا ان الدين سلوك مش دقن وجلابية وعلامة صلاة وارتياد مسجد قدام الناس

مرة كتبت حاجة زى كدة عندى بقول فيها ان الدين سلوك مش مظاهر
دخلت أمة لا اله الا الله تشتم فيا وتقول ان فى حديث عن الرسول ما معناه ان الراجل مادام ارتاد المسجد فهو مؤمن تمام الايمان

الدين سلوك ... تطبيق لتعاليم وسنة الرسول... تطبيق لدستورنا اللى هوه القرآن مش مظاهر فقط

hasona يقول...

كل عام وأنتم من عواده
وكل سنة وانت بخير
وأسعدكم الله في عيد الفطر

غير معرف يقول...

كل سنه وانتي طيبه يا جميله :)

معلش لو كنت موش قدرت أتابعك في رمضان :)

عيد سعيد عليكي وعلى كل الاسره :)

بنت الغربة يقول...

كل سنه وانتى طيبه ياحبيبتى
ويارب تكون صحة بابا احسن...
وسلامة ضغطك ياقمر
تحياتى
عيد سعيد

Kiara يقول...

كل سنة وانتي طيبة ياقمر

وحشاني اوي

حـــواديت يقول...

ادام الله علينا اعيادنا دهورا
بها ومنها سعادتنا
وكل سنة والف سنة واسرة المدونين دائما وابدا بخير ورحمه وحب واكرام