الاثنين، 18 أكتوبر 2010

جاري احمد

النهارده هاحكيلكم حكايه حصلت معايا انا شخصيا  طبعا مغيره الاسامي الا يطلعلي حد يرفع عليا قضيه
هههههههههههههه

كان ليا جار  يعنى اول معرفتي بيه كنت انا فى الكليه وهو حلو كده عشر سنين يعنى
كان بيقولي يا ابله  وما كنتش اعرفهم الحقيقه اوي يعنى  بالشبه كده عارفه انهم جيرانا

المهم يعنى سنين عدت مش كتير اوي يعنى انتم عارفين انا اصلا عندي 18 سنه والواد ده كبر وبقى في الجامعه

وبعدين حيث ان انا من المصريين القدماء الى ابتكروا وصلات النت الدي اس ال للبيوت وما كانش لسه فى حد بيعمل كده آن ذاك فهو قصد جوزي واخد من عندنا وصله .. وبقى اوقات يكلمنى فى  التليفون النت قاطع كده يعنى.. كان ولد مؤدب واخلاق وذوق  الحقيقه

المهم يعنى دار بينى  وبينه مناقاشات مره على احد المنتديات الى دعاني هو اكتب فيها  وحسيت ان دماغه شاطه شويه  بس يعنى مش مشكله عادي

بعد فتره كنا فى رمضان لقيته مربي دقنه وكده قلت عااااتي .. فى العشره الاواخر قابلنى انا ورضا وقاله انا هاروح اعتكف فى المسجد وبتاع برضه قلت عااااتي الواد اتخرج وقاعد لسه مش بيشتغل واهى سنن يعنى برضه.

لكن للاسف بعد هذا الاعتكاف الولد انقلب حاله .. طهقنى فى عشتنى مناقشات على النت طبعا .. حتى بابا ورضا ما عتقهومش برضه ... مناقشات بقى عن الدين والسلفيه .. وما ادمى قلبي انه بعد ما طلع روحي مره فى الكلام وقال سلفيه ولا عشرين مره .. فى الاخر قالي هو اصلا يعنى ايه سلفيه ؟؟؟؟(وش بيشد فى شعره )

المهم اختصارا  هارسملك صوره للشاب ده حاليا وبعد حوالي 3 سنين من الاعتكاف اياه  والصوره دي وصل لها تدريجيا لعلمكم

دقن طويله .. وجه عبوس .. بطل يقول سلام عليكم لو كنت على باب البيت صدفه ... بقى قليل الذوق جدا فى الكلام مع رضا   وبيزق فى  الكلام وحاجه قرف ....مراته لابسه طبعا نقاب خمس طبقات واستك  هو جايبها كده على الجاهز .. ايوه مراته اتجوز من سنه ... غالبا ابوه بيصرف عليه لان اكيد تحفيظ القرآن فى الجوامع ما يفتحش بيت(ليسانس اداب هو وكان نفسه يشتغل مترجم وكان بياخد كورسات وبيدور على شغل بس ده قبل الاعتكاف)
 .. من آن لاخر نسمع صوت زعيق وصويت ويوقولوا احمد بيتخانق مع ابوه ... اه اه اه والله حصل

واقولكم كمان اخته لبست النقاب وابوه واخوه ربوا دقنهم وكده يعنى

اخر موقف فاكراه له .. انه اتخانق مع اخو مراته وحماته وشتيمه وقلة ادب وصوت عالي فى  الشارع واحد الجيران قال انه زعلان من حماته لانها كانت عازماه على الفطار فى رمضان واكلته سمك مقلي والسمك المقلي كان بطنه فيها تووووووووم اي  والله فيها توم .. وبعد ما اكل التوم وهو مغيب تقريبا مش  هايعرف يروح يصلي التراويح فى المسجد ... تقريبا ما عداش  عليه الجزء بتاع الحديث الى بيقول فليميتهما طبخا  البصل والتوم يعنى

حزينه من قلبي على الدين والى جراله
حزينه من قلبي على الشباب وعقولها المغيبه

مضايقه منهم ومخنوقه من المشايخ الى معبيين دماغهم
مضايقه من كل ولي امر وراع غافل عن رعيته

حسبى الله ونعم الوكيل

هناك 32 تعليقًا:

يوميات شحات يقول...

معلش علشان لسه صغير و بكره يتعلم و هيرجع تاني يعقل و يعرف
يا ريت بطريقة غير مباشرة تعطيله الحديثين دول

الحديث الأول
(ما من شىء أثقل فى ميزان العبد المؤمن يوم القيامه من حسن الخلق )رواه الترمذى عن ابى الدرداء

الحديث الثاني
روى أبو داود عن أبي أمامة -رضي الله عنه- أن رسول الله -صلى الله عليه وسلم- قال .
"أنا زعيم
ببيت في ربض الجنة لمن ترك المراء وإن كان محقا، وببيت في وسط الجنة لمن
ترك الكذب وإن كان مازحاً، وببيت في أعلى الجنة لمن حسَّن خُلُقَه

كلمات من نور يقول...

بازعل من قلبي عاللي بيمسكوا بالقشور بتاعة الدين ويسبوا الاصول ....بس مع الأسف مشايخ كتير جدا وصلت اولادنا للحال داه ونسوا إن حسن الخلق أصل من أصول الدين ونسوا إن السلام صدقة والتبسم في وجه أخيك صدقة ووووووووووووو

يارب اجعلنا من الأمة الوسطية دوما ولا تجعلنا من المتشددين .ربي يهديه ويهدينا كلنا يارب

Noha Saleh يقول...

المفروض كل ماالانسان يعرف ربنا اكتر ويتعمق فى الدين اكتر بيكون افضل فى اخلاقه وفى كل حاجة
بيكون بار بوالديه
بيعامل الناس كويس
لكن النقيض ده مش عارفة اسميه ايه

adel يقول...

لا تعليق احسن !!!

شمس النهار يقول...

معلش اولي الامر
مش فاضين عندهم طبيخ اليومين دول

يوووه
قصدي انتخابان

هيخلصوها ويشوفوا الولد ده واللي زيه مالهم

:))

سـولــو - QŁρ 7žēŋ يقول...

هههههههههههههه
ده كده تنيم ارهااابى
هههههههههههه
معلش برده اصل اكتر حاجه تقلب كيان الشاب
لما يكافح ويتعلم ويرسم خطه فى دماغه وبعدين يقعد ع القهوه مش لاقى شغل

اما بالنسبه للدين فا الدين اليسر
ربنا يهدى
قوليلى بقى بتعملى الوصله بكام :))

الازهرى يقول...

طبعا بداية أى تعارف معايا وخاصة هنا بألاقى الكل متهيب وخايف من النقطة دى
مع إن اللى أعرفه عن الدين إنه غير كده خالص
الصح إننا بنتعايش مع الناس بسهولة ويسر وهدوء ومفيش مشاكل خالص حتى لو مختلفين معاهم
ك الموضوع إننا لازم نحاسب من إننا نستدرك للوقوع فى الخطأ اللى بنبه الناس اللى حوالينا ونقول لهم بلاش تقعوا فيه
إنما الرسول صلى الله عليه وسلم كان بيضحك حتى تظهر نواجذه والصحابة كانوا بيضحكوا ويشتغلوا ويويرحوا وييجوا فى الحياة
وكمان لازم الأمر بالمعروف والنهى عن المنكر يكون بأسلوب جميل وبالحكمة والموعظة الحسنة للأسف الشديد الكل حاليا بياخد من الدين القشور أو ما هو أقل
ولا حول ولا قوة إلا بالله

ندى الياسمين يقول...

يوميات شحات

صغير ؟؟؟؟ مين ده الى صغير حضرتك ؟؟

هو عشان هو اصغر مني وكان بيقولي يا ابله يبقى صغير ؟؟

ده عنده بتاع 26 سنه !!!!

ايه يا جماعه هو احنا هانضحك على نفسنا ولا ايه ؟؟

انصحه واقوله ايه باقولك ما عادش بيقول سلام عليكم اساسا ليا خلاص بقت حرام دلوقتي يقول سلام عليكم بقى اصل انا واحده ست

حتى كلامه مع الرجاله بقى بمنتهى الصفاقه وقلة الذوق من منطلق اننا كفره بقى اكيد او حاجه شبه كده

يا فندم بالنسبه لي فات اوان النصح معاه انا عملت معاه كتير وهو مش صغير ابدا
لكن انا معاك انه بكره هايفوق ويتعلم لو كان ربنا بيحبه طبعا

نورتنا يا فندم وشكرا على الاحاديث

ندى الياسمين يقول...

كلمات من نور

يارب امين نورتينى

ندى الياسمين يقول...

نها صلاح

نسميه مسخ احنا فى زمن المسخ كل حاجه اتمسخت حتى الدين مسخناه فى شويه كلام فاضي

ندى الياسمين يقول...

عادل
هههههههههههههههههههههه

اه فعلا بصورتك دي ممكن تتعمل كفته ههههههههههههه

صدقنى المصاب واحد للاسف

ندى الياسمين يقول...

شموسه

حلوه يا شموسه والله عندهم طبيخ دي

بس على فكره هما لما يخلصوا مش هايشوفوا برضه كانوا شافوا قبل معاد الطبيخ

وحشاني يا جميل

ندى الياسمين يقول...

سولو

هو كان لحق يقعد على القهوه

ولا اصلا كان حد قاله يقعد ولا يتنيل ما كاان خرج اشتغل

اشتغل اي حاجه زي ما الاجانب بيعملوا وبيبقوا بيدرسوا فى الجامعه وبيشتغوا ويتر ولا حتى يغسل صحون

والوصله يا سيدى وحياتك ناقص عليهم يقلولي طب الوصله الى احنا واخدنها دي مافيش معاها سندوتش همبرجر ولا حاجه
ههههههههههههههههه

ندى الياسمين يقول...

الازهري
الله يفتح عليييييك

لا لا خد دي عندك

يقولك الرسول ما كانش بيضحك الرسول كان بيبتسم بس

اقولهم ليه يا ناس ما عدتش عليكم فضحك حتى بدت نواجزه

هو ايه اصله ده هو انا باتكلم عن حد تاني غير الى انتم بتتكلموا عنه ولا ايه

وفعلا لا حول ولا قوة الا بالله

نورت

Ramy يقول...

أنا مع نهى صالح و عادل

لأنى بجد صعب اعلق

ربنا يصلح الحال

richardCatheart يقول...

معاكى طبعا حاجه تزعل وتقهر بس ليه تزعلى

بس منها لله الدوله اللى خربت كل شىء من الابرا للصاروخ

الواد كان زى الفل وماشى فى حياته الاحباطات وتضيق السكك على الشباب تعمل اكتر من كده

زياده عليها جهل الاسره هو مين اللى بيربى مين علشان ابوه يمشى وراه ويعمل زيه
الاب كمان عليه عامل لانه لو كان عارف دينه الصح كان علمه دينه الصح

وانا عن نفسى جوزى فى العشرين من عمره مر بنفس التجربه لولا وجود ام واعيه ومثقفه دينيا صح وشخصيه قويه متميزه حقيقى هى اللى انتشلتو من الضياع
وجيت انا كملت عليه هههههههههههههههه

معلش يا دردر ربنا يهدى الحال الدنيا ياما فيها

تامر علي يقول...

حاجه من الاتنين
يا اما هيسيبو من اللي هو فيه ده خالص ويبقى فريش ويرفع شعار قضيها الناس لبعضيها وكثيراً ما رأيتها بأم عيني :)
وإما سيزداد عبوساً وانغلاقاً وتوحداً وسيعم هذا الحال على المحيطين به وفي هذه الحال يرجى عدم الاقتراب والتصوير

في النهاية يظل داخل كل اتجاه اطياف متعددة حتى في السلفيين يوجد اشخاص يمكن التفاهم معهم ولهم نصيب من حسن الخلق وحسن المعشر (وقليل ما هم :))))

ولا عجب في زمن قل فيه العلم وغلب فيه الجهل ونطق الرويبضه

تحياتي

ستيتة حسب الله الحمش يقول...

موقع ما
عامل موضوع عن الخليجيات اللي بيسافروا لسوريا لترقيع غشاء البكارة

موضوع فاكس وميهمناش اشاسا في حاجة

طب نيجي للي يهمنا

الموضوع معاه صور كتير لخليجيات
يعني العباية السودة
يعني البرقع
واحلى سلام على طول السلام للكحل يا جداااااااااااااااااااااع

سابوا الموضوع سخسيا
سابوا الحدوتة كلها والإحصائيات والحلال والحرام

واشتغل 3 او 4 بني ادمين على اه يا سيدي
طالما ترقيع غشاء لازم تجيب صور منتقبات!!!!
الراجل ولا ليه فيها اساسا
دي صور من اهل البلد اللي بيتكلم عليها
حسبي الله ونعم الوكيل فيك يا فخري

بقر
احنا في زمن المسخ
زمن البقر
ياعين امه
بقى أكل سمك بثوم
لأ مظلوم
الله يمسيك بالخير يا محمد يا محي :)

مصري جدا يقول...

ابله أبله

يااااه
دا انتي طلعتي عتيئه أوي

فشكووول يقول...

السلام عليكم صبرنى
تحياتى
هى بتبتدى كدا .. شويه مع الملتحين وبعدين الاعتكاف وبعدين الله اعلم ماذا يحصل
المهم .. الفراغ بيعمل اى حاجه .. واجد ما عندوش شغل وأبوه بيأكله ويشربه ويجوزه ويصرف عليه .. ما المنتظر ان يفعل
ديننا الحنيف سهل جدا لكن نحن نعقده بطريقه تجعل الدين ينفر منا
كلنا سلفيين وكلنا سنيين ولكن ليست السلفيه والسنيه هى العبوس والاكتئاب .. لنا ان نفعل كل شيئ لا يغضب الله سبحانه وتعالى نضحك ونمرح ونسمر بشرط الا نغضب الله ..
ادعوا كل هؤلاء لقراءة سورى الواقعه وفيها من التبشير اكثر مما فيها من التنفير .
شوفى اصحاب اليمين لهم ايه
وشوفى السابقون ماذا اعد الله لهم
وشوفى اصحاب الشمال ( يا دوب كلمتين عن العذاب وخلاص) لكن الجماعه دول قلبوا لنا الدنيا سوادا وعفاريتا وناكر ونكير وعذاب القبر وليس لديهم اى بشاره بالجنه وما فيها .

ربنا يهدينا جميعا
تحياتى

bos bos بسمه عبدالباسط يقول...

مش عارفة اقولك ايه اكتر من ان القصة دى حصلت قدامى كتييييييييييييييير ومن ناس اعرفهم
عشان كده مقدرة شعورك مليون فى المية

والمشكلة انهم لو بصوا لاهم حاجة وهيا المعاملات هيلاقوا انهم اكتر ناس محتاجين يصححوا وجهه نظرهم

ربنا يهدى

قلم رصاص يقول...

طب واحنا ليه نظلم المشايخ
الله طب مانبص للموضوع من زاويه تانيه
بدليل ان فيه شباب بيسمعوا لنفس المشايح وماشيي على صحيح الدين شكلا وموضوعا

يبقى العيب في الانسان نفسه


يعني بالعقل كدا هو الشيخ من دول بيقول للشباب اهتموا باطلاق اللحيه ولبس الجلباب وبس ..واعى تعامل الناس كويس واوعى تعامل ابوك وامك كويس الخ الخ الخ

بالذمه دا اسمه كلام ياام مريم؟

انا معاكي ان فيه شيوخ مش كويسيين
يبطنون عكس مايظهرون
بس فيه نقطه مهمه اوي
لما احنا نعمم ونقول مشايخ دا بينسحب مننا سهوا او عمدا على كل المشايخ بمن فيهم الناس الكويسين والعلماء اللي همهم في الدنيا كله الدعوه لدين وبس

وربنا يهدي الجميع

على فكره انا فاكر اني قريت الموضوع دا عندك قبل كدا

انتي اعدتي نشره من جديد ولا ايه؟

تقبلي مروري

ندى الياسمين يقول...

رامي

ما دام مع عادل يبقى السكوت علامة الرضا بقى
ههههههههههههههههه
نورت

momken يقول...

سيدتى هؤلاء هم المسلمون الجدد..او مسلمون اخر الزمان

لا اتهمهم بجهل ولا نفاق ولكنه تعليم وتدين فاسد وفهم خاطىء للدين والتدين
انه تدين الناظرين تدين للاخرين وليس لله
ومع مرور الوقت ياخذ هذا التدين الغير حقيقى مكان التدين الاصلى
كل هؤلاء يرددون الحديث الشريف كلكم راعى وكلكم مسئول عن رعيته

فمن اذا الراعى المسئول عن كل هؤلاء الضحيا فى هذا العهد
بنسى انه هو اساسا رعى على قدر مسئوليته
وينصب نفسه ملاكا فوق البشر
هذا هو تدين المظهر

ولا الوم هذا الشاب لكنى اللوم من جعله فارغ بلا انتماء فبحث عن اول ملجأ ياويه
ولو وفرنا له انديه انشطه جامعيه او حتى عمل ينقذه من بطاله او فراغ لوفرنا عليه وعلينا المشقه

دائما كلامك فى الصميم

تحياتى

ندى الياسمين يقول...

قطه حلوه اوي انا كملت عليه دي هههههههههههههه

ربنا يكمله بعقله

بس احباطات ايه بس الواد يا بنتى كان لسه متخرج اساساما لحقش يحبط

ما عليناربنا يهديه هو وكل الى زيه

ندى الياسمين يقول...

تامر علي

لعلمك انا فضلت اقول زيك كده برضه بكره يفوق بكره يرجع بكره يفهم

لكن اكتئبت لما وصل للنقطه التانيه عدم الاقتراب والتصوير

وفعلا عندك حق والله لا عجب فى هذا الزمان

ندى الياسمين يقول...

ستيته حياتي

اه شوفتي اكل توم فشردح المدام واهلها

اه يا نفوخي ياني

وايوه وهنا هاتلاقي حد بيقولي بتهاجمي المشايخ ليه صبرك بالله

منوره ياجميل

ندى الياسمين يقول...

مصري جدا

عتيئه ؟؟؟ ده انت طلعت قديم اوي هههههههههههههههه

ندى الياسمين يقول...

استاذنا الغالي فشكول


اااااااه قولهم بشروا ولا تنفروا
قووووووولهم

حسبنا الله

نورت يا فندم

ندى الياسمين يقول...

بسمه

اه المعاملااات عليكى نووور فين هى ؟؟؟

ليه يعملوا كده فينا ليه ؟؟

نورتي ياجميل

ندى الياسمين يقول...

قلم رصاص

ايامك كلها بنى معايا على فكره

طيب يا سيد لما يبقى فى مدرس عنده عشر تلاميذ

منهم 3 بس نجحوا والباقيين سقطوا ...اقول انا ساعتها انه مدرس ناجح والطلبه هما الى عندهم عته عقلي بدليل ان فى 3 نجحوا ؟؟


يا سيد انا عارفه كويس انا باتكلم عن مين وفكرهم ايه وكلامهم ايه ودماغهم ايه

وياسيدى انا ما حددتش اسامي ولو ان كان نفسي

بس خلينى ساكته قلتلك

انا قلت المشايخ الى بيعبوا دماغي العيال كلام من ده

الى بقى

والمعنى فى بير البترول وخلاص

حد يناولني مطوه بسرعه بقى

ندى الياسمين يقول...

ممكن

متشكره اوي

احنا نوفرله تربيه

ونوفرله تعليم

تعليم فيه منهج دينى فعلا مش هبل

نوفرله انشطه وتنميةمهارات وفكر

عايزين نعمل دماغ صاحي وواعي وفاهم

ربنا يسترها معاناومع ولادنا

نورت