الأربعاء، 6 أكتوبر 2010

له فى خلقة شؤن


انا مؤمنه تماما بان مافيش حاجه بتحصل في الكون ده اعتباطا وانما كل حاجه بتحصل مخطط لها ومقدر انها تكون بامر الله وعلمه ولحكمته



وله فى خلقه شؤن



احيانا بيحصلى موقف مثلا واستغرب اوي واقول ليه ؟؟ ليه حصل ده ؟؟ وافضل شايلاه فى الذاكره على جنب كده واقول مؤكد له عوزه بعدين



اسمحولي النهارده عايزه اسجل حاجه هنا معاكم جايز فى يوم احتاجها



مره من حوالي سنه ونص كنت فى البنك المفروض هما الى طالبينى عشان شوية اوراق فدخلت على الموظف وعرفته بنفسي انا فلانه رحب بيا وقالي طب اتفضلي معلش دقايق اخلص العميل الى معايا



العميل ده رجل متوسط الطول ورشيق القد وعمره اديته الخمسينات عنده شعرتين كده مهتم بيهم ومطولهم وقالبهم على جنب عشان يداري الصلعه ومعاه بنت اموره كده فى العشرينات قدرت انها بنته



لاحظت انه لما سمع اسمي رفع عنيه وبصلي قلت جايز يعرف حد من العيله



المهم الموظف استاذن وقام لقيت العميل ده بيبصلي وبيقولي هو حضرتك من عيلة كذا

قلتله ايوه .. الى من المكان الفلاني .. قلت ايووووه



قالي انا والدتي من عيلتكم .... قلتله اهلا وسهلا يا فندم .... طيب نتشرف بك



قالي انا فلان ..... قلت وانا باحاول اركز : عمو فلان يبقى لك ايه



الراجل اندهش ورفع حواجبه لفوق وقالي عمو فلان؟؟؟؟؟ ده يبقى اخويا الصغير



وبتقولي عمو ده انتى هاتكبرينى كده .... ضحكت وقلتله اعمل ايه طيب ماهو صاحب عمي وطول عمري باقوله يا عمو ده عمي دلوقتي عمره 57 سنه



المهم كلمه من هنا على كلمه من هنا ك عرفت عيلته كويس بس هو ما كنتش اعرفه لانه كان مسافر بره طول عمره لكن عارفاه بالاسم



عرفنى ببنته وحكالي على الايام الخوالي ايام ماكان فى الكليه وكان زميل اعمامي فى السكن فى القاهره

سابلي ارقام تليفوناته وقالي انه مسافر بعد 24 ساعه لو ما عرفش يشوف فيهم بابا اول ما ينزل مصر تاني هايكلمه هو او عمي



واعطيت تليفوني لبنته فى حال احبت تتواصل وافترقنا ورجعت البيت حكيت لبابا ولعمي فى التليفون وبلغتهم السلام والتليفونات



وبابا حكالي قصة حياة الاخ ده وقالي انه عاش طول عمره بره مصر وكان ابوه لما يقابل بابا يقوله انا زعلان على فلان طول عمره متغرب ما عملش اي حاجه غير فيلته الى كل ما ينزل اجازه يهد الى بناه ويبنيه تاني وفى الاخر بعد لما فرشها كان بيقضى فيها الاجازه بس.. وانه من سنتين كده مراته توفاها الله بعد مرض .....



وبعد سنه من مقابلة البنك دي جه عمي وقالي انه الراجل ده اتصل عليه وقاله انه بمصر وانه نازل يعمل فحوصات وانه تعبان

فسألت عمو تعبان لاي مدى يعنى عنده ايه . فصدمنى وقالي نازل يدور فى عملية زرع كبد



المهم عمو راح يزوره وروحت معاه ومش عارفه ليه ارتبط عاطفيا بالقصه كلها



بصراحه على اد ما باحب زيارة المريض وثوابها على اد ما احيانا بتتعبنى نفسيا

الرجل تقريبا خس النص وصحته تعبت جدااا وما عادش قادر ياخد نفسه وحالته بقت صعبه جدا



استضفنا فى فيلته الجميله على النيل .. واستقبلتنا ابنه اخرى له



الفيلا زي المهجوره والموبيليا متغطيه والدنيا مكركبه



واستضافنا فى اوضته لانه مش قادر يقعد معانا فى الرسبشن



وبنته الهاديه الاموره جداااا قالتلى ان اختها الى انا شوفتها من سنه اتجوزت وقبلها اخوها وهى الى باقيه مع ابوها بس بتدرس فى الكليه

بالتالي هى قاعده فى مصر فى بيت العيله مع اعمامها وبتيجى الفيلا لما يكون باباها موجود بس



طبعا سبتلها تليفوني وطلب منها ضروري تكلمنى ونزور بعض لان بصراحه البنت صعبت عليا اوي بوحدتها وكمان مامتها متوفيه



المهم رجعت قعدت مع عمو وصاحبه المريض الى كنت قلت اكيد لما قابلته السنه الى فاتت كان تعبان بس مش باين عليه



اصل مش معقول فجأه كده عايز زرع كبد



لكن الراجل حكالنا حكاية مرضه والى بدأت بان رجله بتوجعه ووارمه فعمل

تحاليل وفحوصات ودخل من شارع على حاره مع الدكاتره وهكذااااااا فى خلال اربع شهور فقط



وبعد كام شهر من الزياره دي يا جماعه وبعد رحلة علاج مضنيه الراجل ده توفاه الله تعالى



ومش عارفه لحد الان انا ليه قابلته واتعلقت بقصته وبشخصه المتفائل المقبل على الحياه وعنده امل لسه انه لما يرجع من غربته هايعيش في مصر ويستقر وينعم بحصاد السنين



وما بيروحش من دماغي شكل الفيلا الجميله اوي والى فى نفس الوقت خاويه على عروشها



ما بيروحش من دماغي كمان بنته الصغيره الوديعه الوحيده



ما بيروحش من دماغي تفاصيل قصته مع المرض وهو بيحكيها باعياء



ولا بانسى نظرته ليه واحساسي انه كان مشفق عليا وحاسس انى ماليش ذنب اقعد مع العواجيز واسمع كلامهم الممل وما يعرفش انى مش راحه مجرد صدفه انما مش عارفه ليه انا روحت مع عمو لما قالي انه رايح عنده



حقيقى مش عارفه ليه اثرت فيا جامد القصه دي ومش عارفه اصلا ليه قابلته ولا ليه انشغلت بحاله ؟؟؟!!!



الله تعالى اعلى واعلم



الى كل مغترب من واحده جربت الغربه قليلا .... ارجوكم خلوا بالكم من سنينكم وعمركم ما تخلوش الغربه تسرق عمركم وتعيشوا طول عمركم تستعدوا للحياه القادمه بعد الاستقرار وتنسوا تعيشوا الحاضر



تحياتي لكم يا اصدقائي ومعلش لو نكدت عليكم



وادعولي من فضلكم ربنا يقدرلي الخير



هناك 27 تعليقًا:

الازهرى يقول...

أووووووووووووووووووووووووول

الازهرى يقول...

وتانى وتالت
إلخخخخخخخخخخخخخخخخخخخ

الازهرى يقول...

رينا يقدر لك الخير دايما
ويرزقك من نعيمه فى الدنيا والآخرة

الغربة مرة زى ما سمعنا زمان
احيانا بتكون كويسة لان اللى يزيد عن حده ينقلب لضده

تحياتى دوما

كلمات من نور يقول...

سبحان الله يا ندى الياسمين ( فعلا زي ما قلتي كل شيء مقدر لك أكيد له سبب ) دايما ادعي للرجل داه بالرحمة والغفران

==================

فعلا الغربة صعبة بحس فيها بالمرض و السنين اللي فاتت زوجي يقولي نهاجر وانا اقوله انا من تراب مصر ومعجونة مع أهلي وحبايبي مقدرش أبعد ...

ربي يخفف عن كل المغتربين ويردهم لبيوتهم وبلادهم آمنين

منى القلب ليلى يقول...

يااااااااااه رحمه الله أنا أعرف أكثر من خمس قصص كده وده اللى بيخوفنى جدا من الغربة بحس انها بتدى مال وبتاخد صحة وفراق وعذاب وجفا

ربنا يرضيكى بكل خير ويرضى عنك

كيــــــــــــارا يقول...

ربنا يرحمه يارب

والغربة بجد شئ صعب يعدي مش عارفه ليه اللي بيسافر بيفضل طول عمره كدا ليه مش بيكتفي بوقت معين

فتاه من الصعيد يقول...

ربنا يمتعك بالصحه والستر ويخليكي لكل اسرتك يا رب :)

الغربه بتاخد على قد ما بتدي

تحياتي

ادم المصرى يقول...

نفسى اقولك حاجه بعد مقرأت كتباتك الجميل

انتى انسانه رومانسيه جدا بطبعك عطوفه جدا حنينه زياده عن اللزوم وعشان كده الموضوع ده حسسك بعطف وتعاطف كبير جدا جمب هذا الرجل الذى توفاه الله الله يرحمه هوا وباقى المسلمين

انا بجد معجب بأحساسك وشعورك النبيل اتجاه المرضا سواء كان قريب ام غريب وان شاء الله وقت متحتاجى لأى حد ربنا هيوقف جمبيكى مليون حد

قلم رصاص يقول...

ربنا يكرمك يارب ويقدر لك كل الخير

القصه فعلا مؤثره جدا
الله يرحمه ويجازي اولاده كل خير

شكرا ام مريم على هذه النفحه الانسانيه
اللي كتير بتيجي في وقتها لعل القلوب المتحجره ترق

تقبلي تحيتي

ندى الياسمين يقول...

الازهري

نورت يا ازهري اول وثاني وثالث

مش فاهمه يعنى ايه الى يزيد عند حده ينقلب لضده

وعلى فكرة انا مش ضد الغربه ولا طلب الرزق فى بلاد الله

بالعكس تماما

لكن باقول حتى سنين الغربه ما نخليهاش سنين ضائعه لا نعيشها ونستمتع بها قدر الامكان

لو ماكانش يبقى بلاش منها
تحياتي لك

ندى الياسمين يقول...

كلمات من نور

كانت جدتى تقول دايما الغربه كربه

ربنا يفك كربتهم جميعا

تحياتي ليكى ونورتى

ندى الياسمين يقول...

منى القلب
تسلمى يا جميل وربنا يكتبلك الخير حيث كان

ندى الياسمين يقول...

كيارا

والله يا كيارا ما اخبيش عليكى هو قرار صعب جدا انك تاخديه وبيكون اصعب كلما تقدم بك العمر هناك

انا جربت الغربه واحتكيت بالمغتربين هناك
لذلك احنا مااستنناش لما ندخل فى المعمعه اوي رجعنا دوغري

ندى الياسمين يقول...

فتاه من الصعيد

متشكره اوي ونورتي ياجميل

ندى الياسمين يقول...

ادم المصري

ايه تصدق اول مره حد يقولي رومانسيه دي :)

متشكره اوي على الكلام الجميل
وربنا يسمع منك
وياريتما احتاجش لحد اصلا ده يبقى اجمل

متشكره لك وانت نورتنا

ندى الياسمين يقول...

قلم رصاص

شكرا يا سيد ربنا يخليك يارب ونورتنى

تامر علي يقول...

أؤمن جداً بأنه خلال حياة الانسان يبعث الله إليه بالكثير والكثير من الاشارات والومضات والعلامات بل وحتى بالانذارات ونحن نتلقى منها الكثير يومياً ولكن المشكلة في أجهزة الاستقبال التي أحياناً تكون معطلة إما بفعل فاعل أو معطلة ذاتياً بناء على طلب المشترك :))

ندى الياسمين يقول...

تامر علي
كنا نفتقد تعليقاتك يا مستر تامر والله

وفعلا عندك كل الحق المهم المستقبلات وحلوه اوي بفعل فاعل ولا بناءا على طلب المشترك

معبره جداااااااااااااااااااااا

نورت

د. ياسر عمر عبد الفتاح يقول...

مفيش حاجة كده بتحصل بدون فايدة
كل حاجة وراها سلسلة من الأحداث

بس لازم نطلع الدرر والفوائد من كل موقف بيعدي علينا

راجل صعيدى يقول...

السلام عليكم ورحمة الله وبركاته
تصورى بقى انتى حظك من السما قعدت كتبت مقاله طويله عريضه ماطلعتش انتتى فيكى حاجه لله .
بس بأختصار تصورى بقى انك الوحيده اللى رديتى عليه رسالتى لانى بفتقدكم جداا على فكره انا اشتغلت فى شركة كويسه جداا فى اسكندريه والحمد لله ووظيفه ممتازه وخلال 8 شهور طلعت عمره مرتين يارب انتى والاسره تكونوا بخير وانا الايام دى فى اسيوط وبعت لحضرتك على الايميل رساله ياريت تشوفيها واسمع من حضرتك رد . تحياتى للمهندس رضا ومريم وخالد وعمو الزهايمر اشتغل نسيت ابن حضرتك التالت ربنا يسعدكم ويحميكم ودايما افتكرى صاحب الحكايه بالدعاء يابنتى .
عمو مدحت

الازهرى يقول...

أقولها ازاى دى ؟

اللى يزيد عن حده زى مثلا اللى بيروحوا هربانين عن طرق مختلفة لطلب الرزق وبيبقوا عايشين فى خوف وعيشة أقل من اللى ممكن يعيشوها فى بلدهم
واللى يروح ويقلب أفرنجى فى عاداته وسلوكياته ويربى ولاده على كده وبعدها برضه المجتمع الأجنبى بيرفضهم بيبقى صعب يرجعوا هنا

وغيرها من الأمثلة دى

ندى الياسمين يقول...

د ياسر

نورت يا فندم

ندى الياسمين يقول...

راجل صعيدى

يا فندم انت نورتنا وانا قريت اميلك ورديت عليه وربنا يكرمك يارب ويوفقك ويصلح حالك وحال اولادك وحبايبك يارب

ندى الياسمين يقول...

اها ازهري فهمتك

بس الاخ الى انا حكيت عنه ما كانش كده ولا كده

ده كان استاذ جامعه فى السعوديه
بس طبعا الى انت بتقول عليهم دول كمان مصيبتهم مصيبه

Shaimaa يقول...

ندى مش عارفة الموقع بتاعك تقيل جدا بقاله فترة وفين وفين عما بيفتح مش عارفة ليه..

المهم... ربنا يقدرلك الخير دايما انتى وكل اللى بتحبيهم ... ياريت كلنا ناخد بالنا من عمرنا وسنيننا اللى بتجرى مش بس المتغربين

دمتى بخير

eng_semsem يقول...

معلش هو اللي عايش في بلده مستريح اه في جو غير الجو بس عن تجربه الاهل فعلا وحشوني بس مصر ما صدقت استريحت منها ومن كتير ناس فيها

KHALED يقول...

عجتنتى الحدوتة جداً و بيعجبنى عرضك للعلاقات الإنسانية فى شكل مبسط و جميل

ربنا يرضى عنك و يرضيكى
قولى أمين