الجمعة، 29 أكتوبر، 2010

يوم فى الأرياف

ازيكم يا اصدقائي
حاسه ان فى فايرس ماشي فى البلوجز يا جماعه بطلنا نكتب ونتابع ليه
هو انا صحيح شايفاكم كلكم على الفيس بوك بس والله انا ما عنديش نشاطات هناك يعنى
عموما يارب نحترم نفسنا جميعا ونرجع نكتب ونتابع بعض

انا الحقيقه جه بالي موضوعات كتير كتير اتكلم فيها بس ما تعرفوش ليه كده يا اخواتي ماليش مزاج اتكلم جد
قلت اديها فى الهايفه يا نانانس   بس ما تاخدوش عليها

هاحكيلكم يوم من ايام حياتي معلم فى ذاكرتي جدا

طبعا رغم ان انا من الاكاليم على راي البت شيما الندله مساها الله بالخير   الا انى من المنصوره نفسها وماليش اصول فى بلاد ارياف للاسف  بالتالي لحد هذا اليوم ما كنتش روحت بلد ارياف قبل كده.. وكنت اقعد احقد على  البت زميلتى فى ثانوي الى كانت تقولي احنا بنروح البلد يوم الجمعه وكده يعنى

وقبل الكليه كمان ما كانش ليا اصحاب من الارياف بالتالي  ده كان عالم  مختلف بالنسبه لي

واحده صاحبتى من بلد قريبه مننا كانت زميلتى فى الكليه وقالتلى خطوبة اختها وطلبت مني اساعدهم بقى فى شرا الفستان والحركات دي وفعلا قد كان ومحسوبتكم كانت متخصصه يعنى مش اي كلام .. المهم جه يوم الخطوبه وطبعا انا معزومه بس هيهات بابا عمل موال وصاحبتى واهلها اتصلوا عليه وضمانات وحوارات جامده اوي على ما روحت

المهم روحت بقى  مش عايزه اقولكم على ما وصلت البيت  كان فى خماشر واحد سألنى انتى عايزه مين .. لدرجة انا شكيت فى نفسي هو انا عندي 3 عيون ولا ايه يا جماعه للدرجه دي شكلي مريب

فى البيت بقى المفروض هانجهز حاجة العروسه عشان نروح الكوافير فى المركز الى قريب منهم وانا باقول يلا هانتاخر وكده يعنى  ...  فلمينا الحاجات وراجعتهم ويلا يا بنتى

راحت جدتها وقفت وقالت حاجات الحقيقه ما فهمتش هى قالت ايه خالص هى كبيره فى السن واللهجه بعيده عليا بالتالي ضعت فى النص ... بس يعنى الى فهمته من الموقف ككل وتعبيرات المحيطين ان فى حاجه المفروض نستناها وحد طلع يجيبها من فوق .. كنت شاكه كده انى سمعت كلمة برسيم . بس قلت تؤ مش معقول اكيد ما فهمتش

المهم  لقيت الى طلع نازل ومعاه  حزام طويل كده طوله بتاع متر ونص  والحزام ده من القماش وهو مش مصمت ده محش حاجه من جوه مش عارفه هى ايه .. وبعدين راحت جدتها قالتلها خدي البسي على وسطك ..( فهمتها لوحدي دي )
انا مش فاهمه تلبسه فين .. المهم العروسه اعترضت وزعقت وقالت ما ينفعش هايبان من تحت الفستان .

قوم انا زهلت ... اييييييييه فى ايه مين ده الى هاتلبسه تحت الفستان يا جماعه بتاع ايه ده .. طبعا جدتها ردت عليا وانا ما فهمتش فماماتها قالتلى  ده عشان ما تتربطش .. فانا بصيت كده وقلتلها اه يعنى اعمل ايه

قالتلى هى تلفه كدهو على وسطها تحت الفستان وخلاص ... وبعدين سألتها تاني طب فهموني ده عشان ايه طيب ... قالتلى عشان ما تتربطش ... قوم انا وبدأت اتعصب قلتلها ويعنى اييييه ما تتربطش.

ويااااااريتنى ما سألت ... اه يا ريتنى ... راحت مرات خالها ( ايوه ماهو كان شعب مصر كله مشترك فى الحديث ده ) مرات خالها بقى تبرعت انها تفهمنى كده اون اييير قدام الشعب ده كله  وكملت الحديث جدتها  مشيره الى ابنها الماثل امامانا انه يا حبة عين امه اتربط وداخوا بيه  .... اه والله جرالي كده .... قوم انا بصوت خفيض (على راي البت ريم ) قلتلها هى دي مش خطوبه يا جدعان ولا أنا مش فاهمه ولا ايه

فاكد الجمع ان ده بيحصل حتى فى الخطوبه ويمتد مفعوله ويستمر ويستمر ويتوغل وينتشر ... المهم اقنع فى طنط مامتها يا ستى انا ليكى عليها هاقرالها قرآن عيب يا طنط الكلام ده يا ستى حرام ... مافيش ولا كانى موجوده

قوم فكرت كده وانا افكاري ما تخرش المايه ... وقلت عمو ايووووه هو عمو ابوها .. راجل طيار سابق وعايش طول عمره فى القاهره  .. وجريت زي ابطال افلام الكارتون عمووووووو انقذنى النجده

يا عمو الحكايه كذا وكذا والعروسه هاتعض مامتها جوه وده كلام فارغ يعنى  يا سيدى انا هاقرالها المعوذتني والكرسي ... ولو كانت طلعت اغنية يا ساتر استر من دخول الحاره كنت غنيتهالها

قوم الصدمه العصبيه بقى ان عمو يقولي ... لا لا يا اسكتى اصل انتى من البندر ما تعرفيش بلدنا ... الناس هنا وحشين اوي  ... وراح موسع كده الجمعه ومزعق فى البت عشان تلبس الحزام والى اكتشفت ان صفته انه تحزيمة البرسيم يعنى انا كنت سمعت صح للاسف

المهم العروسه كانت هاتنتحر فوقفت كده وقلت ايه الغباوه دي ما احنا راحين عند الكوافير وهى هاتلبس هناك انا باقنع الناس دي ليه اصلا .. ما انشاله ما اقتنعوا ... وروحت قلتلها ايه يا بنتى ما تسمعي الكلام بقى فى يومك ده هاتي يا طنط خلاص خلاص انا هالبسهولها فى نفسي حطيه يا بنتى فى الشنط يلا وغمزتها بقى تخرس عشان نمشي وخلاص

وطبعا ولا عبرتهم البت كانت لابسه فسان تحفه  قماشه ناعمه جدا وضيق لحد الخصر اتهبلوا دول ولا ايه هههههههههههههههههههههههه

والفرح كان فى مكان واسع جدااا قدام بيتهم وعاملين بقى فراشه وكده وبعدين خلص الفرح بدري بدري طبعا وكان فى كتب كتاب قبل الهيصه دي
ولما خلص الفرح   روحنا قعدنا فى بيت العروسه والعريس موجود .. وجالي شبه تخلف عقلي من الكلام الى اتقال والى مش هاعرف اقوله هنا الحقيقه .... وطبعا فى صورة هزار .. اه والله هزار .. بس شروع فى .... ماشوها قتل

ام هند الى غظني وقاهرنى قالك العروسه لازم تروح لبيت اهل العريس بقى سيرا على الاقدام  ومعاها اهلها  عشان ده كتب كتاب

طب يا جماعه هاو كام العروسه فستانها له ديل امريكاني (طويل شويه من ورا) هاتتمرمط كده طب ما نروح بعربيه قالوا لاااااااا ده قريب

لاخت العروسه صاحبتى طب ما تخليكى انتى هنا معايا وبلاش نروح ... قالت لا يمكن ابدا لازم اروح وانتى طبعا امال هاتقعدي هنا لوحدك ... ونزلت روحت معاهم ... ولن اقص عليكم بقى كنت  هاقع كام مره والبت صاحبتي الى اساسا  طول ركبتي كانت مسكاني من ايدى يا اخويا  وانا ماشيه باصه فى الارض احاول اتبين موضع قدمي

وطبعا طلع مشوار لطيف خااااااااااااااااااااااااااالص .. اقولهم ده قريب يا مفتريين انتم المسافات بتاعتكم غير بتاعتنا ولا ايه .

بس اكتر ما عجبنى بجد هناك ... عندهم ترابط اسري فظيع جدا بحيث ان العيله كلها اساسا عندهم من الصبح ... ناس بجد طيبين جدا بالذات جدتها ... الخضره والاراضي الزراعيه عشان انا باموت فيها ...  العيش  الى طنط بتعمله والفطير الى جدتهم بتعمله بصراحه فظيع ... فوق كل ذلك جالي عريسين وانا فى الفرح ده  .. بس يا خساره كان مكتوب كتابي ... فالواحد حس انه لقطه يعنى ههههههههههههههه

وخدوا بالكم  انا وهى لسه اصحاب جدا اينعم بنشوف بعض كل كام سنه مره عشان احنا الاثنين متجوزين وكل واحده عندها ربع دستة اشرار بس بنسال على بعض بالتليفون وبينا صلات عائليه قويه كمان

مش عايزه بقى عقد نفسيه وحد يطلع يقولي بتتريقى على بتوع الارياف وكده والله مش باتريق ده مجرد هزار باقوله لهم حتى الى خلاني اكتب صديق ليا اكتشفت انه من نفس البلد وكنت باحكيله اليوم وقالي لازم تكتبيه وكده 

اي خدمه يا عم محمد كتبنا اهو 

وده ما يمنعش اعتراضي على الايمان بالسحر بشكل مبالغ فيه تماما ومعالجته بتتم بشكل غلط

تحياتي لكمن يا حلوين  

هناك 32 تعليقًا:

الازهرى يقول...

أولا بخصوص أول سطرين اللى بيته من زجاج بلاش يحدف الناس بالطوب

أما بالنسبة للباقى فبلاش تريقة على بتوع الأرياف لو سمحتى لإن دى طريقة غريبة للتعبير والإخلال بالتوازن البيئى والعمرانى

أما بخصوص المسافات فعندك حق المسافات عندنا شىء غير تقليدى ودا لإن الدنيا عندنا واسعة على عكس المدينة (مع العلم إنى مقيم فى المدينة برضه بس مدينة شبه ريفية وكمان شغلى فى الأرياف حوالينا كتير ) فالمدينة مخنوقة والمسافات متقلصة بطريقة تخنق
وحأكى لك موقفين الأول يوم عيد ميلاد مولان لما لقيتهم مش موجودين رحت على نادى الصيد وبعد الجمعة رجعت لهم لما واحد عرف حسيت إنه بيبص لى على إنى مجنون
الموقف التانى كان الجمعة اللى بعدها وكان عندكم فى المنصورة بعد ما خلصنا كان معايا اتنين زمايلى وقالوا هنركب منين وطبعا بما إنى الخبير قلت له من الدولى فسألوا هو فين فقلت لهم خطوتين من نا وأخدناها مشى من الإستاد لهناك وطبعا كانوا بيدعوا على فى نهاية الطريق مع إنى متود على المشوار ده جدا وكل مرة بأعمل كده

اما بالنسبة للعادات فأنا بأفضل أسيب الناس تعمل اللى هى عايزاه فى حدود المعقول يعنى عادة المشى أو غير مفيش مشكلة لكن للأسف مع ازدياد نقص الدين والظهور المخيف للخرافات بقى الموقف لا يحتمل أحيانا بس هتعملى إيه واحد بيسمع وألف لأ

تحياتى دوما

يوميات شحات يقول...

قراءة القرآن شفاء من الحسد و السحر إن شاء الله
و الذكر أيضا

adel يقول...

ههههههههههههه
مين قالك مش بنتابع او بنسال ؟
هو انت بتابعي طيب ؟؟
ههههههههه

الموضوع عاجبني قوي قوي بس برسيم ايه
يعني العريس عادي يلاقي البنت ببرسيم كده وليلة الدخلة ؟؟

بس هي فعلا عادات وتقاليد اقوي من الدين عندهم

ستيتة حسب الله الحمش يقول...

بوست فطسني من الضوحك
يانهار ازرق
يتجوز البت يلاقي ريحتها برسيم
نهارها أخضر ان شاء الله

نيجي للجد
التوحيد كلمة سهلة جدا
بس ساعة التطبيق تعرفي التوحيد الحقيقي
وهو ليس له اي علاقة - كما تعلمي يقينا - بالتعليم
ليه علاقة بالثقافة واليقين فقط

بالنسبة لملحوظتك عن ان اهل القرية الكلام عندهم مكشوف
أههههههههههههههههه
موافقة جدا
وبيتكلموا عادي وكأننا في فيلم بورنو والله
ولما حللت الأمر لقيت له تفسيرين من وجهة نظري
1- الحياة اللي بيحيوها بتخلي أمور بيولوجية :) تتبع الحيوانات تحدث بينهم من الصغر وبيسموها بأسمائها وبيتكلموا فيها عادي
فتقريبا بعد كده بتبقى عادي يا مدام عادي
2- الكبت
فما بين تقيد مقيت بتقاليد أغلبها ملوش علاقة بدين
وما بين رغبة في تورية وجناس
وما بين إن الكلمة هناك بترن والسمعة ممكن تتعك على اشاعات وفضى ستات
تلاقي كل اللي انتي شفتيه

Ramy يقول...

(:

لالا و رحمة رياض بنكتب

متسألنيش مين رياض

دة واحد صحبى معرفوش

بس جميل قوى الوصف التفصيلى دة
(:

دة فى الأرياف فى كتيييييييييييير جداً

بس المشكلة بيتعبوا فى الشغل صراحة

لما يجى من الريف ع الشغل علطول

مش ذكاء و كدة لالالا

بيتعبوا أجتماعياً (:

تحياتى

حنعيش يعنى حنعيش يقول...

مضطر لان القافيه حكمت ...ومش قادر علشان انا مفقوع ... وعلى فكرة انا فلاح كابر عن كابر ... اقول بقى : لما خدوا البرسيم عملوا بيه الحزام ... امال اتغدوا ايه؟؟؟؟؟ اسف بس مضطر

كيــــــــــــارا يقول...

اول مره اسمع عن موضوع الحزام دا

بس بردو انا اكيد الخضرة في الريف ليها طعم تاني

كيــــــــــــارا يقول...

مين بيجيب سيرة عيد ميلادى بئا هه

مصري جدا يقول...

كل دا بوست!!!!!!!!!!!!!

ما شاء الله عليكي

مصري جدا يقول...

اه

بمناسبة تبطيل الكتابه

بصي بئا كلنا كدا يجمعنا ستوته أما هيا تبطل بالتبعيه بيحصل لنا حالة أنفراط

هتئولي ماهي بتكتب

هقول لك فيه بوستات اه بس ستوته لأ

هتشوفوا يقول...

سلام عليكم
اه والله فيروس وربنا يعافينا منه
ومبقناش عارفين نقول ايه

المهم نفس الموقف اللي بتحكيه حصل معايا في قرية برده, لما الفرح اللي كان في الشارع خلص, لقيت اتنين ماشاء الله حمالين اسية وحد لفع العريس على كتفه والتاني عبط العروسة وجروا بيهم على فوق, على فكرة بقى العريس بيشتغل امام وخطيب في الأوقاف
تقريبا والله اعلم الموضوع ده مفيش فيه هزار
وكل اصحابنا اللي كانوا حاضرين الفرح صدقوا على الفعل ده بس اكدوا على ان الشخص اللي يعبط العروسة يكون من اقربائها حتى الدرجة التالتة شمال يعني اهلاوي م الاخر

مساء الخير

أبو حميد يقول...

بوست زى العسل
على فكرة الأرياف فعلا فيها عادات كتيييييير ما نعرفهاش
واحد صاحبى من العياط قبل فرحه كان مرعوووووووب ليتربط (بجد والله مش هزار) وعندهم فى فرحهم عادة منيلة بنيلة... العريس والعروسة يطلعوا شقتهم والفرح يفضل شغال وبعد ما ربنا يكرمهم كده العريس ينزل الفرح يسلم على المعازيم ويقعد معاهم ... وخدى عندك بقى تعليقات بعد ما ينزل

كلمات من نور يقول...

جميل البوست ولذيذ .وجديد علشان الواحد سمع حاجات كتيرة بس مسمعش اللي حكيتيه يا ياسمينه ..تسلم إيديكي يارب .ويارب يبعدنا عن الحسد والسحر و يحفظنا بكتابه وكلماته و ذكرنا له .....

re7ab.sale7 يقول...

مساء الوروووود
دي اول زيارة لي واكيد مش راح تكون الاخيرة ...
انت معاك حق في كل كلمة قلتيها وللأسف ان الموضوع ده لسة لغاية دلوقتي...لكن مش بنفس الانتشار
ومش في كل المناطق الريفية
ده حتي في بعض الاماكن الراقية بيحصل بشكل من الاشكال دي
بس انا ولا مرة صادفت حاجة زي دي
يمكن عشان انا مش بروح افراح وخطوبات لاني اكره جو الزحمة والناس اللي تفضل تبص لك شمال ويمين وفوق وتحت ولية سيبت خطيبك , وانا سمعت ان الاستاذ فلان كان بيخطبك , هو انت يا ختي لسة برضه شغالة صوحافية ...ما تسيبك م الكلام ده وتتجوزي احسنلك
هههه
بجد موضوع حلو اوووي

بنت الغربة يقول...

ههههههههه
لا بجد حصل الكلام ده ياصبرنى..
انا رحت الارياف كتيير مع بابا وتيتا الله يرحمهم..علشان عند تيتا فدانين برتقال ويوستفندى...وكنت باحب قوى اروح هناك..الجو الرااائع والخضرة والاكل اللى مالوش حل..خصوصا الفطير..
بس عمرى ماحضرت افراح هناك..
بس ازاى الناس لسه بيعتقدوا فى الكلام ده..هو الحسد مذكوور فى القراان..بس كفايه المعوذتين واية الكرسى..دى حماية من ربنا..
وقل لن يصيبنا الا ماكتب الله لنا..
ربنا يهدى الجميع..

تحياتى ياقمر

دودو يقول...

هههههههه
والله بوست زى السكر

ضحنى جدا جدا
بس جديده حكايه حزام البرسيم دى اول مره اسمعها
سمعت عن اشياء اخرى كتير بس حزام البرسيم ده لا

مبسوطه جدا لانى فى مدونتك لاول مره يابلدياتى ياغاليه
:)
وانشاءالله مش اخر مره

richardCatheart يقول...

تم اضافه مدوناتك فى بيت المدونين قسم المطبخ والقسم المنوع

نرجو المتابعه

http://bloggers-house.blogspot.com/

ندى الياسمين يقول...

الازهري

انا بيتى من ازاز يا ليه بقىىىىىىى

والله انا تقريبا متبعاتي ما قلتش اصل انا اصلا طول عمري كده متابعتي على ادها والله
وبعدين مش بس متابعتنا لبعض الى قلت اصلا كتابتنا فى مدوناتنا وده الاهم

والله مش باتريق بجد عليهم انا بس باحكيلكم الى حصلي وبعدين اتريق على نفسي ماهو انا من الاقاليم برضه هههههههههه
حقيقى مش تريقه انا بس اليوم ده معلق معايا وحبيت احكيلكم

ندى الياسمين يقول...

يوميات شحات

والله انا مقتنعه بس هاعمل ايه طيب

ندى الياسمين يقول...

عادل

والله باتابع على اد صحتى ههههههههههههههه
ماانت عارف السن يا ولدي

لا هى مش برسيم ده الرباط الى بيربطوا به البرسيم يعنى هى بدل البرسيم هههههههههههه

ندى الياسمين يقول...

ست السوتيتات على راي فاتيما

والله انا مياله للسبب الاول الى هو الحياه المرتبطه بالحيوانات وكده

بس عموما كنت هاموت يا اختي منهم هناك وانا كنت صغنونه كده بتاع 19 سنه هههههههههههه

نورتي يا جميل

ندى الياسمين يقول...

رامي

وحياة رياض مش فاهمه

يعنى ايه بيتعبوا اجتماعيا دي ؟؟

ندى الياسمين يقول...

حنعيش يعنى حنعيش

هههههههههههههههه لا مش فاكره بقى اتغدينا ايه يومها ههههههههههههه

بس على فكره هو الحزام مش معمول من البرسيم وانما هو الحزام الى بيحزموا به البرسيم تفرق يعنى
ههههههههههههههههه

ندى الياسمين يقول...

كيارا

شوفتي ازهري جايب سيرتك اهو وبيقولك مشي خمسه كيلو وكده يعنى هههههههههه

ندى الياسمين يقول...

مصري جدا

معاك فى موضوع القفله

بس برضه فى ستوته حتى وهى قافله بتبقى ستوته

ندى الياسمين يقول...

هتشوفوا
ههههههههههههههههههههههه
طارق هاموت من الضحك

بتكلم جد شالوهم

طب ده ليه ؟؟ هو انا خمنت عشان لو حد راميلهم عمل ما يخطوش من عليه

صح ؟؟ حماتي كانت بتقول حكاية العتبه ويخطوا وكده دي

بس عجبتنى الدرجه التالته شمال دي ههههههههههههههههههه

يعنى هما خلاص الفقه واخد بعضه ومش عارفين يقولوالهم الحافظ هو الله
طيب

ندى الياسمين يقول...

ابو احميد

يا دي المصيبه السوده ايه العادات الهباب دي

الحمد لله تعالى على ما اصابنا ههههههههههههههه

يعنى حلو اوي الى احنا فيه الصراحه

ندى الياسمين يقول...

كلمات من نور

مرسي يا حبيبتى ربنا يخليكى يارب

ندى الياسمين يقول...

رحاب

طب انتى لسه شغاله صوحافيه ؟؟
هههههههههههههههه

مرسي يا حبيبتى ومنوراني

ندى الياسمين يقول...

بنت الغربه

والله بالامانه المهنيه يا اختي هو ده الى حصل بالحته ما زودت ولا نقصت
وطبعا فى حاجات اكتر من كده عاااااااادي

ندى الياسمين يقول...

دودو

مرسي يا حبيبتى ربنا يخليكى يارب ومنوراني واهلا بيكى يا جميل ودايما منوراني يارب

ندى الياسمين يقول...

قلب القطه
انشاله يخليكى تبقى تفهمينى موضوع بيت المدونات دي يا مارو

وعموما مرسي خالص على الاضافه فيها

وانتى وحشاني ابقى تعالى يوم نرغي شويه والنبى