الثلاثاء، 30 نوفمبر 2010

الفيل النونو


على راي الست  عفاف راضي .. مره سالت الفيل النونو انت كبير اوي ليه ومتين  ... شال زلومته وقال بعيونه انا باكل والعب  تماااارين

ايه ده  مش جايين نغني هنا

بس الحقيقه ناويه احكيلكم حدوته قبل  النوم

بس ركزوا كده معايا  يا حلوين عشان فى سؤال فى  اخر الحلقه

قصدي البوست

كان يا ما كان يا سعد يا اكرام ولا يحلى الكلام الكلام الا بذكر النبى  عليه الصلاة والسلام
اللهم صلي عليك يا بنى

كان في فيل  نونو صغنونوا امور كده وودانه بتهفهف على وشه

صاحبه الى هو ما شافش غيره طول عمره ويوعى يلاقيه

كان رابطه فى شجره كبيييييييييره بحبل  قوي جدا

والفيل كان بيزهق من الربطه السوده دي وحاول كتير يفك منها
مافيش فايده ما قدرش

مع الوقت الفيل خلاص بطل يحاول واقتنع تماما  انه  خلاص ما يقدرش يقطع الحبل ده

واتعود وعاش وخلاص وبقى ياكل الى صاحبه يرميه له وخلاص لا يقدر لا ولا مش عايز ولا مش جايلى نفس

ومرت الايام بحلوها ومرها والفيل النونو واقف زي ما هو مربوط بنفس الحبل فى نفس الشجره

ومرت سنين وسنين يجى 28 سنه كده وما حدش يفهمنى صح

والفيل كبر ما شاء الله مش انا قولتلكم فوق ان الفيل بياكل وبيلعب تمارين

و اقولكم على سر

الفيل ده اهبل اخر حاجه 

لان الحبل الى هو مربوط بيه فى الشجره اصلا الزمن هراه

غير ان الفيل كبر يقدر اساسا يوقع الشجره كلها

بس هو الى اهبل ويأس وما عادش بيحاول اصلا

 وما زال  هذا الفيل العبيط واقف مكانه  الى الان

وهكذا اصدقائي الحلوين المقطقطين  الهبل دايما يجرالهم كده


سؤال الحلقه بقى

ما هى احتمالات ان الفيل ييقطع الحبل ؟؟؟

ها فكروا جيدا   وهاقولكم الاجابه بعد الفاصل

فكروا الاووووووول

ممنوع الغش من تحت

ف
ا
ا
ا
ا
ا
ا
ص
ل
.

.
.
.
.
.
.
.

عدناااااا

ها فكرتوا ؟؟

 طيب الاجابه اهي

بس على الله حد يغشها قبل ما يفكر


أولا : ان الحكايه تيجى مع الهبل دبل كده والفيل وهو بيلعب حاوريني يا طيطا مع الكلاب الضاله يروح قاطع الحبل ... وده احتمال بعيد حيث انه صاحبه حريص وما بيخليش الكلاب الضاله تلعب معاه اصلا

ثانيا: ان الفيل يفهم لوحده كده ويعرف انه كبر وبقى قوي وان الحبل عجز وبقى ضعيف   وانه يقدر يقطعه ..... وده احتمال ضعيف برضيك حيث ان الفيل مخه تخين باين ولا ايه

ثالثا : ان الفيل  يتعرض للجوع والظلم والتعذيب والاستهبال عليه على الاخر فيقرر انه يحاول تاني مع الحبل وطبعا هايتقطع المره دي  .... وده  احتماااال وارد عشان الضغط بيولد الانفجااااااااااااااار

رابعا : انت تيجى من عند الله كده وفار عبيط رفيع كده يعدي من حصار صاحب الفيل ويقرض الحبل ويبقى الفار نجده  وربنا بعتها للفيل الغلبان العبيط ابو مخ تخين .... بس والنبى طيب وحنين وامور كده وودانه بتهفهف على وشه


وفى نهاية الحلقه باهدي اغنية  عفاف راضي هم النم


لكل اصدقائي الحلوين .. وخصوصا ميمي وسوسو وتوتو وديد ي وطنط سوزان
وباتمنالهم نوما هنيئا

هناك 25 تعليقًا:

sony2000 يقول...

هههههههههه
حلوه القصه دي
بس ياتري بتفكرنا بأيه
بأييييييييه
انا مش فاكره:)

كلمات من نور يقول...

فكرتيني بتوفيق الدقن و عبد المنعم ابراهيم الله يرحمهم ....زالعلبه دي فيها إيه؟؟؟؟؟؟؟؟؟؟؟؟؟ظ و إياك تقولي خاتم يا ندى ههههههههههههههههههه

أضحك الله سنك

محمد عبد الغفار يقول...

لو الفيل اللى فى دماغى يبقى عمره ما هيقطعه والحبل هينقطع لوحده وهو هيموت جنب الشجره

محمد عبد الغفار يقول...

لو الفيل اللى فى دماغى يبقى عمره ما هيقطعه والحبل هينقطع لوحده وهو هيموت جنب الشجره

Noha Saleh يقول...

انا هروح افك الحبل
ده الفيل ده
على فكرة كلنا كده او معظمنا

خواطر شابة يقول...

حاضر مش حأفهمك صح لكن تعرفي المثال اللي انت عطتيه حلو ومعبر
مع ودي

فشكووول يقول...

السلام عليكم
تحياتى
يقول الله تعالى
( اينما كنتم يدرككم الموت ولو كنتم فى بروج مشيده)

هى الحكايه حتيجى صدفه من غير الفيل ما ياخد باله حيلاقى الحبل اتقطع يقوم بقى يعمل عمايله

تحياتى

شمس النهار يقول...

:)))))
عرووووووستي ؟؟؟

:))

حنعيش يعنى حنعيش يقول...

ستى اللى مابتعرفش تقرا الله يرحمها كانت دايما بتقول : الكلب ركب الجمل ... قالوا الحق عيه نخ ليه

حلم بيعافر يقول...

ههههههههههههههههه

انا بحب اغانى العيال دى اوى

اصلى معيشتش طفولتى صح)))


بكرة الفيل يشم ويحس ويخزى على دمه ويبص لنفسه وميستحملش شكله فيجرى بعيييييييييييد وساعتها ياولاد حيغور الحبل فى ستين داهية
ابلة ابلة فضيييييييييييييييييييلة

ههههههههه بوست جميل جدا

فشكووول يقول...

ولا فيه اى حاجه

الدوله المصريه بجلالة قدرها وبتاريخها العريق الضارب فى اعماق التاريخ وبأأجهزتها الداخليه والخارجيه .. حصلت على صفر فى الموندبال
الدوله القطريه .... بارك الله فيهم... حصلت على حق تنظيم بطولة كاس العالم 2022.... ولا تعليق الف مبروك لقطر

رحــــيـل يقول...

:))
هههههههه
ياختى طعم .. فيل قمر قمررررر
واهبل وعبيط ومغفل

رحمتك يارب

والله انتى سكر ياندى ههههههههه

خواطر شابة يقول...

عزيزتي هناك دعوة لك على مدونتي رجاء الاطلاع عليها

shimaa elkholy يقول...

سوني

انا عن نفسي بتفكرني بابله فضيله

shimaa elkholy يقول...

كلمات من نور
فيل طبعاااااااااا هو انا اقدر

shimaa elkholy يقول...

محمد عبد الغفار

لييييييييييه كده
سبنى اتفائل

سبنى احس انه ممكن

عشان هو ممممممممممممكن والله ممممممممممكن رحمة ربنا واااااااسعه ليس لنا اياها

shimaa elkholy يقول...

نها صلاح

لا قوليها كلنا على بعض هو الفيل

shimaa elkholy يقول...

خواطر

ميرسي ياجميل منوراني

shimaa elkholy يقول...

فشكول

ايوه يا فندم واوقات باتخيل انه هايطيح ويخرب الدنيا برضه الله اعلم

shimaa elkholy يقول...

شمس النهار

لا ما تقوليش ما فهمتهاش ياشموسه ازعل من نفسي والله

shimaa elkholy يقول...

حنعيش يعنى حنعيش

الله الله الله بالظببببببببببببط كده الله يرحمها

بس مين يفهممممم

shimaa elkholy يقول...

حلم بيعافر

مرسي يا حبيبتى ربنا يخليكى

shimaa elkholy يقول...

فشكول

رغم ان الملف القطري عجبنى الا انى شايفه انهم خدوه زي ما خدوها جنوب افريقا بالظبط

عموما الله اعلم ومبروك يا سيدى عليهم

لكن اعتقد ان هدف قطر من استضافة كاس العالم غير اهداف جميع الدول المتقاتله عليه

الدول تتقاتل على كاس العالم لهدف اقتصادي ومنفعه اقتصاديه لبلدهم

اما قطر فهي ا لى هاتصرفع لى كاس العالم وتبقشش على العالم كمان بالمدرجات البلاستيك

طلبا للشهره فقط مش لمنفعه اقتصاديه

shimaa elkholy يقول...

رحيل

مرسي يا جميل

shimaa elkholy يقول...

خواطر

عنيه حاضر حالا اشوفها