الأربعاء، 15 ديسمبر 2010

دكتور محسن ... محتاجه رايكم

السلااام عليكم

بجد وحشتوني مش عارفه ليه نفسي مش جايباني اكتب

حتى مع انى حضرت لقاء ا لبؤجه الشتويه وكان يوم جميل جدا جدا .. والسفريه كلها بصراحه كانت حلوه اوي انما برضه مش عارفه اكتب

بس انا من موقعي هذا باقول بجد لكل المدونين الي كانوا موجودين يوم اللقاء والى مش موجودين كمان  شكرا لانكم اصدقائي
بجد فرحت جدا انى عرفت اشوفكم المره دي ولوانهم كانوا شويه صغيرين فى نص اليوم بس نعمه يعنى فضل  وعدل

الحقيقه ما حضنى على الكتابه النهارده (حلوه حضنى دي خلي بالكم) انى  عايزه اخد رايكم فى مشكله محيراني

صحصحوا معايا بقى

نحكي الحدوته الاول

دكتور محسن عمره دلوقتي فوق الستين  سنه على المعاش يعنى .. عنده 3  عيال ما شاء  الله  منهم الى  اتجوز والى اتخرج والى لسه فى الكليه ... علمهم احسن علام وصرف عليهم كل قرش اتحصل  عليه طول  عمره  والى كانوا كتير اوي وباديه للعيان ... بس للاسف نسى يربيهم

الراجل ده كمان بصراحه قليل الادب .. ايوه لسانه طويل اوي ما بيبطلش شتيمه ... وشتيمه من افظع  الشتايم الى ممكن تسمعها وخصوصا لمراته  وولاده وبسبب وبدون سبب

الحقيقه اوقات باحس انه كارف على شوية جنان ميه ميه ... عاش طول عمره هو مراته الى ما تتخيرش عنه فى الجنان  يتشموا فى بعض يضربوا فى بعض ... ايوه كان بيضربها كمان .. وكل مشكله والتانيه تقول اطلق بس بترجعله تاني .. ايا كانت الاسباب بقى المختلفه على مر الزمن الطويل

تقعد معاهم ما تعرفش  مين فيهم الكذاب ومين الصادق يستفزوك انك تقولهم انتم كلكم كذابين ولاد ستين تيت ومجانين كمان

وقضوا عمرهم بفضايح مستمره قدام الجيران والدنيا كلها

عيلته ... سنين طويله على مشاكل معاهم  وخصام مع ده ومع ده وفى النهايه انقطع عنهم جميعا لمدة 15 سنه

وبعد كده واحده من اولاد اخواته اتبرعت انها تروح تزوره وتحاول ترجعه لوسط اخواته تحت شعار ما عادش فاضل فى  العمر حاجه عشان تفضل  مخاصم  اخواتك يا سيدى انسى  الى فات وخلي عيالك يعرفوا عيلتهم وعزوتهم

ورجع وسط اخواته وكل شويه يختفى ويجبوه تاني وهكذاااا والكل قرر  ياخده على اد عقله

الدكتور محسن .. ربنا يعافينا ويعافيكم مريض .. مرض  ادى الى شلل نصفي مؤقت .. طبعا محتاج حد يخدمه  خدمه كامله من  اول الحمام والاكل والشرب واللبس والادويه والخ الخ الخ

مش محتاج فلوس من حد ... عنده معاشه وكمان علاجه بالكامل على حساب شغله الى كان حكومي ... تمام كده ؟

وهو مريض كده  برضه بيشتم ولاده ومراته الى بيخدموه بافظع الشتايم  وممكن يزقلهم باي حاجه فى ايده  ودايما شاكك فيهم ومش مامن لهم لا على فلوسه ولا على دواه وحاسس انهم عايزين يقتلوه
هما بيحاولوا يتسحملوه .. بس مش كلهم فيهم ولد تربية  ايده بيرد عليه الشتمه وبيمسكله السكينه الى ابوه مسكهاله الاول وهو فى شبابه وبيهدده وبيقوله موت وريحنا

مراته اتصلت باهله وقالت تعالوا خدوه  خلاص غلب غلبنا معاه

الوضع حاليا هو بيشتكى وبيقول ما بياكلونيش ومانعين عني التليفون وشايلين مني الكرسي المتحرك  عشان ما  اعرفش اتحرك  والى اخره من الشكاوي .. وعايز  اخواته ياخدوه

من خلال معرفتهم الاكيده بشخصيته انه لو حصل واخدوه ... سوف يعيد الكره مع اخواته وهايشتمهم وهايسرقهم وعياله كمان هايسرقوهم اصلا

ولو جابوله حد غريب يخدمه بالفلوس  برضه هايعمل فيه نفس القصصصصه

حاولوا التفاهم مع اولاده بالحسنى ... قالوا اخر ا  عندنا نجيبله  حد يخدمه بفلوسه بس  المشكله انه بيقول كده قدامكم ولما بتمشوا بيعيط ويقول ما تسبونيش للغريب

اعلم جيدا ان فرضا على اولاده خدمته ... بس برضه  صوابعك مش زي بعضها مش كل العيال هايستحملوا لسانه واخلاقه دي

كمان ما تنسوش ان ولاده هو  الى مربيهم بعقليته دي يبقى التفاهم معاهم ازاي بقى حضراتكم ؟؟

احترت فى  حل  المشكله ده جدااااا قلت احيركم معايا

ربنا يعافيكم يارب ويكفيكم شر القرش الحرام وعقوق الوالدين


هناك 21 تعليقًا:

كلمات من نور يقول...

يا الله ايه العائلة دي ..زعلى فكرة زوجته و أولاده أولى بيه بس عايزين حد يشد ودنهم ويقولهم مش معنى انه وحش انكم ترموه والايام دوائر وربنا قال لو الام والأب مشركين نصابحهم في الدنيا معروفا

داه محتاج ممرض متخصص يبقى معاه في البيت ماهو مش معقول الواحد يرمي زوجه أو أبوه في دار او مستشفى ....يارب هون علينا في اخر عمرنا واهي اولادنا وبناتناواهدينا

adel يقول...

اللهم لا شماتة
بس بجني اللي زرعه بقي
!!!

هو تصرف الولاد غلط ولازم يستحملوا
بس مينفعش تلوم ولد علمته طول القوت ان السرقة حلال ولما يسرقك تقوله غلط !!1

Mona Hekal يقول...

يا ساتر يا رب ايه الناس دي بس هو بيجني الثمرة اللي زرعها.
مش عارفة ايه الجل بس محدش فعلا ممكن يستحمله غير ولاده و مراته
ايه ده فين الاخلاق و الدين لأ الموضوع بجد مستفز ربنا يهدينا جميعا

غير معرف يقول...

لا حول ولا قوة الا بالله

momken يقول...

مبدائيا دى عيله واطيه واطيه واطيه

لكن فى الاخر دول ولاده وله عليهم حق
ممكن يكون عصبى شويه
لازم يتحملوة
وواضح ان الواذع الدينى عندهم محدود
وثقافتهم الدنيه منعدمه عند الاب وعند الابناء والزوجه

الناس دى محتاجين حد يعرفهم ربنا
واموضوع مش صلى وصوم وقرايه قرأن
الدين المعامله.والدين البر..والدين التقوى

بالنسبالك انتى
جزاء الندل اجتنابه...ابعدى عنهم ولا اكنك تعرفيهم
اخشى ان يصيبك بعض طبعهم


تحياتى

فاتيما يقول...

صباح الياسمين يا صبصب

بصى بقى
البوست دا آثار شجونى
إيه؟
اشمعنى انتى قولتى حضنى ؟!!
واحدة بواحدة والياسمين اظلم


طيب

ليه اثار حزنى
لأنى للأسف افتكرت قصة مرض والدى الله يرحمه والتى كانت عاصفة مروعة صادمة وفيها كل العبر
وانتى بتحكى عن الدكتور محسن دا وطباعه الصعبة افتكرت بابا اول سنة مرض واللى مرينا بيه معاه

بصى الحمدلله بابا فلوسه كانت حلال
لكن طول عمره كان تركيزه ف الشغل وبرا البيت ..مكنش بيقعد معانا واغلب قعاده زعيق وعصبية وخلافات و..الخ ..الخ

لما عييى كانت اول مرة يقعد 24 × 24 ف البيت ومش بس قعاد
دا سهر وتمريض وعصبية وحالة نفسية سيئة وزيارات ودكاترة و...الخ ..الخ

ماما كانت طول الوقت ف خلافات معاه
اكمن عينه الشمال واليمين و الأربع اتجاهات كانت زايغة كما يجب ان يذكر الزوغان يعنى ...وبالتالى توابع الحكاية دى مخلصتش لما تعب دول الأخوات الفاضلات كانوا بيسألوا ويعفرتوا ماما بعفاريت الدنيا اللى نازلة تنطيط ...ألخ ..الخ

بابا كان عصبى وطباعه صعبة والمرض بيخلى الطباع تظهر اكتر ان مكنش من باب وطأة المرض فمن باب الملل والرقدة ف السرير والرغبة ف ان الشخص يبقاله اى وجود ويحصل على اهتمام من حوله خصوصا انه حاسس ان طول عمره قعد يجرى يجرى ومرتحش لحظة والمفروض دلوقتى يتقدر بينما هوه بيلاقى اللى حواليه ليهم حياة وبيحاولوا يوازنوا بينها وبين متطلاته كمريض مقعد ومحتاج ميت الف حاجة وبتحصل المشكلة من هنا والدنيا تولع ..الخ ..الخ


الحاصل بين افراد عيلة الأستاذ محسن بيحصل ف عائلات كتير
ولاد أصل او قلالة الأصل
وارد المريض بطبعه الصعب يقول حاجات مرعبة وبابا عمل كدا ..بس كنا فاهمين ان المرض هوه اللى بيتكلم ..
وكمان وراد الناس اللى بتراعى المريض تتعب وتزهق وتحتاج هدنة وتحس انها تعبانة ومش بتتقدر كفاية ونفسها ف كلمة شكر شكلها عمرها ما هتيجى من المريض ..ودا حصل برضو

بس بعد فترة وشوية صبر الدنيا بتتغير
المريض بيقنع بإن حالته كدا ولن تتحسن وان اللى حواليه نعمة
والأهل بيتعودوا على المصاعب وتبقى روتين حياة وبيحسوا بالعطف الشديد ع المريض وتحل الشفقة مكان الغضب


معنديش حل سريع بصراحة
غير الصبر
هما قدرهم يكونوا مع بعض لأن المركب واحدة واللى هينط منها خسران

المفروض ولاده يكونوا دلوقتى متحملين العبء الاكبر
مش عشان صلة الرحم
ولا هيرموه
ولا كدا
لأ
لأنهم الطرف الأقوى
والأعقل
واللى ربنا لسه مديله صحة
ومهما كان دكتور محسن بشع ولسانه يتفاتله بلاد وعصبى و..الخ ..الخ

هما الحلقة الاقوى
ومن العار ان تستأسد على ضعيف


مش هقولك خاطبى فيهم بنوتهم ليه
ولا تخاطبى عشرة عمر ..كانت سيئة اكيد
هقولك خاطبى الأنسان فيهم
لعل وعسى ربنا يهديهم


فكرة وجود حد يخدمه تحت سمعهم وبصرهم
فكرة تمسك العصاية م النص برضو
لأن أى غريب يدخل البيت
لازم يكون فاهم ان اهله موجودين


ربنا يحسن خواتيمنا جميعا
ومتعرفيش
يمكن دكتور محسن محظوظ
ان ربنا عاوز يشيل عنه ف الدنيا كل اللى جناه
ودلوقتى وقت دفع الفاتورة

وكمان دى فرصة للولاد يختبروا معدنهم
وربنا يكرمهم عشان ميندموش قدام لما ابوهم يقابل وجه كريم وساعتها يقولوا يا ريتنا كنا احسن من كدا


بابا قعد 8 سنين راقد ف السرير
تكيف مع مرضه اول سنة
بقى يقولنا
لو قمت على رجلى
هعوضكم وافسحكم واسعدكم
وبقى يبوس ايد ماما كل ما تعمله حاجة ويقولها سامحينى

احنا بقينا شايفينه بعيون تانية
وحاسين بقيمته قوى خصوصا لما ابتدت مشاكلى وحسينا ازاى هوه ضهرنا وسترنا واحنا انكشفنا بمرضه
وبقينا نتمنى نعمل اى حاجة
بس يحس انه كويس نوعا ما


شوفتى بقى الشجون
اللى قولتلك عليها ؟؟


صباحك ورد يا صبصوبتى

shimaa elkholy يقول...

كلمات من نور

الله يكرمك انا كمان شايفه الحل ده احسن

shimaa elkholy يقول...

عادل

انت لو شوفته مش هاتقدر حتى تشمت فيه وهايصعب عليك قدام مرضه ربنا يبعد عنك الشر يارب وما يكتبش المرض على حد ابدا

shimaa elkholy يقول...

منى ابو السعود

بيجنى بقى ولا غيره بس يعنى هانقول لولاده اه يستاهل ارموه بره ؟

لعلمك برغم انه كان سيء الطباع مع امهم وانه ممكن يشتم او كده

انما بشهادتهم هما نفسهم عمره ما ضرب حد فيهم ولو كانوا يطلبوا منه لبن العصفور ما ينمش الا لما يجيب طلبهم
وفسح وتعليم محترم وكل حاجه ممكن تتخيليها

بس تقديرى انا بعد الى شوفته انه ما عرفش يربيهم برضه

بالتالي هما جاحدين برضه

shimaa elkholy يقول...

الحب الجميل

ماشي فين رايك بقى هانهرب ولا ايه
ههههههههههههه

shimaa elkholy يقول...

ممكن

يعنى قلت كتير بس الوازع الدينى فعلا ضعيف

البنت بتقولي انا كنت باخدمه لوجه الله

تخيل

المهم ما ينفعش اجتنبهم حل غير وارد

shimaa elkholy يقول...

فاتيما

اولا انا ليا عتاب عليكى كبير كبير كبير عشان ما شوفتكيش فى البؤجه

جالي صدمه عاطفيه لما سألت عليكى قالوا ما جاتش
وكان نفسي يكون فى وقت نعمل لقاء مصغر انا وانتى وستيته وريم وننقي رز للصبح بس ما كانش فى وقت خالص والله


المهم ردك بجد وافي

حقيقى انا فكرت كده قلت يا ناس لو ابويا بعد الشر عليه تعبان كده ويشتمنى ولا يضربني حتى انا هاستحمله
وهو ده الفرق بين العيل المتربي والعيل الى مش متربي

بس يا فاتيما انتى بتقولي بيتعبوا ويزهقوا وكده ماشي

بس يعنى عمركم قلتوا لاهله تعالوا خدوه احنا خلاص مش عايزينه ؟؟


وده الى انا باقولك عليه

القرش الحرام الى انا اتكلمت عنه ده له اسبابه هابقى اقولك عليه بينى وبينك

وحشاااااني جدااااا

وفى كلمتين واقفين فى بؤي ليكى من كام يوم كده هابعتهوملك بقى

اشوفك على خير يا جميل

فاتيما يقول...

لأ طبعا يا صبصب
عمرنا ما نطقنا الكلمة دى
مع انه كان طول الوقت يقول همشى من هنا
وكان برضو متضرر ف الاول
لأنه مش متعود يقعد معانا طول الوقت
والمرض مجننه

الصبر
مفيش حل غير الصبر

انا فهمت من التعليقات
انك مينفعش تتجنبييه لأن طرف بعيد ف الحكاية وعشان كدا قلبك واجعك وكمان مش قادرة تاخدى موقف ..
لأن اولاده اولى الناس بيه

ربنا يهديهم

انا اسفة لأنى مكنش ينفع آجى البؤجة
لأسباب كتير
اولهم واهمهم هوه السبب اللى هيخلينى مقدرش آجى تجمعات تدوينية ف الوقت الحالى ومش هينفع اقول فيه ايه
بس انتى ممكن تخمنى
انا غصب عنى والله انى مجيش
انتى عارفة
انا اكتر واحدة بتفرح بلمتنا
بس المرة دى تكالبت الاسباب
وعدم المجى كان اسلم حل

بالنسبة للكلام اللى انتى عايزة تقوليه ..فأظن انى عارفاه
وعارفة خوفك وقلقك والنصيحة
وانا يا صبصب زى ما بيقول على سلامة
حاسس انى كنت ف خناقة
وانضربت بجد

انا زى اللى كل جسمها وارم ومفيهوش مكان لحد يلمسه
فممكن لو كلامك هيوجع ..تأجليه لحد ما أنشف حبتين واقدر اسمعه ؟

ولو انى عارفة انك هتخلى بالك
بس انا اللى بقيت على آخرى

بوسيلى العيال
وسلامى للأستاذ رضا
والقاهرة نورت بيكم


بوسات وحضونات يا حبيبتى

غير معرف يقول...

انتي محيره نفسك ليه :)

الناس اللي فاقده منطق الحياه دي صعب تحلي مشاكلهم بالمنطق

الانسب انهم يجيبوا حد يخدمه ... وهو يريحهم ويريحه

تحياتي

شمس النهار يقول...

يانهار ابيض

لو الناس تتعظ بقا

الدكتور محسن ده عايز دكتور نفساني
اي دكتور نفسيه وعصبيه
هتفرق كتير معاهم هو هيعالجه ويهديه
والحياة هتبقا فله
يجربوا بس
ومايقولوش ان ده دكتور نفسيه وعصبيه يقولوا بطنه

وان شاء الله خير

غير معرف يقول...

دا دكتور

ولا طور؟

shimaa elkholy يقول...

فاتيما

خمنت دلوقتي من كلامك وزعلت اكتر

وكلامي مش هايوجعك ما تخافيش اعتقد انه بالعكس عموما برضه هاجله شويه
خصوصا انى افضل يكون كلام مباشر مش رسايل فلما نقابل بعض ان شاء الله

بالنسبه لموضوع الدكتور محسن فانا مش من بعيد اوي انا من اهله وغصب عني اتورط فى التدخل فى الموضوع

وعموما انا عارفه انه مافيش حل غير انهم يصبروا وقلتلهم كده

نورتي يا جميل

shimaa elkholy يقول...

فتاه من الصعيد

انا كمان باقول كده

نورتي يا جميل

shimaa elkholy يقول...

شموسه

ايوووووه لو الناس تتعععععععظ
فعلا والله العظيم حالته عظه وعبره

دكتور نفساني ده كان عايزه من 30 سنه والله مش من دلوقتي

وحشااااااااني يا جميل

shimaa elkholy يقول...

مصري جدااا

وبعدييييين لا دكتور

راجل صعيدى يقول...

طبعا يشرفنى جداا أن احاول الرد او التعليق لكن بصراحة وضعتينا فى مأزق كبير ... هل أتكل كتير ام أن الاختصار أفضل بكتير اعتقد الاختصار وذلك بجاني تأييدى لكلام الاتاذة فاتيما بأختصار يا ام خالد المثل بيقول (اصبر على جار السو يا يرحل يا اما تجيله مصيبه تاخده) واضح ان هذه العائلة مبتعدة تماما عن الله فى كل حياتها وربنا يرحمنا ويحسن خاتمتنا اعتذر لتقصيرى معاكى لكن والله غصب عنى عمك اللى كان ليل نهار على الكمبيوتر اصبح بيشوف اولاده 3 او 4 ايام فى الشهر واصبح الاستقرار تقريبا فى اسكندريه .
عمك مدحت