الأحد، 19 ديسمبر 2010

لقاء مدوني المنصوره ... وزيارة مؤسسات الايتام..+ تحديييث

تحديييث
يا جماعه تعديل بس بسيط فى الميعاد  بناءا على طلب مديرة مؤسسة البنات بالحاح اننا نروح بعد الصلاه فان شاء الله احنا هانصلي الجمعه فى المسجد الى جنب المؤسسه
والى اسمه مسجد عباد الرحمن فى شارع سعد الشربينى ... وهانطلع بعد الصلاه على طول على مؤسسة البنات  وبعدين نكمل اليوم عادي
وطبعا الى عايز يجيلنا على مؤسسة البنات على طول مافيش مشكله
معاكم تليفون اللقاء بقى كلمونا

كمان فى حاجه انا اتصلت على مؤسسة الاولاد تاني ومش عارفه رجعوا فى كلامهم وكلموني كويس جدا ورحبوا بينا وقالوا ممكن حد يروح يسلم التبرعات
بالتالي ان شاء الله احتمال نبقى نبعت حد من الشباب لمؤسسة الولاد هى مش بعيده عن مؤسسة البنات يعنى ويوصلوا التبرعات

الحاجه التانيه موضوع الغدا
ياريت  الى هايجي ياكدلي قبل يوم الخميس انه جاي ويقولي عايز ياكل ايه عشان ابلغ الشيف بتاع الكافيه يعمل حسابه
****************************************
السلام عليكم يا اصدقائي الاعزاء

ارساء لقواعد التجمع دايما على خير بادعوكم انا وكل مدوني المنصوره انكم تشرفونا عندنا فى المنصوره ان شاء الله  يوم الجمعه  31 /12/2010

ايووون اخر يوم فى السنه بنلحقها تقريبا وما تقلقوش هانمشيكم بدري الى عايز يلحق يحتفل بالسنه الجديده فى اي مكان تاني ان شاء الله يلحق

كل سنه وانتم طيبين

طيب نرجع تاني للموضوع  بتاع اللقاء

فى الحقيقه  احنا قطعنا فى شعر بعض كتير كمدوني المنصوره يعنى على ما استقرينا على المعاد والمكان J

انا بقالي سنه تقريبا جاي على بالي جدا زيارة مؤسسات الايتام الكبار الى هما من سن 8 سنين فيما فوق

وهما بيفصلوهم طبعا لمؤسسة بنات ومؤسسة اولاد

انا ايام ما كنت فى الكليه كنا بنروح ملاجيء الاطفال فى واحد من مشرفين الخدمه العامه هناك قالنا يا جماعه ياريت تبقوا تفتكروا تروحوا ملاجيء الكبار وخصوصا الاولاد
لان حالتهم وحشه جداا ومواردهم قليله جدا جدا

ليه  ؟؟ لان اي حد بيفكر يتبرع او يزور ملاجيء بيروح ملاجيء الاطفال  الصغيرين  ولو حصل وحد فكر فى الكبار بيروحوا للبنات عشان الجواز والجهاز والصبيان دول بقى حالتهم وحشه جدا مش بيلاقوا يلبسوا حتى واحيانا كتير ما بيلاقوش يدفعوا مصاريف المدرسه  ومنهم كتير بيطلع من المدرسه بسبب كده وبيشتغلوا حرفيين

المهم ايامها فعلا عملنا كده وجمعنا حتى مساعدات عينيه وملابس قديمه وبعتناها
من حوالي سنه  شوفت حلقه لوائل الابراشي وكان جايب العيال دول بس مش ملجأ المنصوره مكان تاني وحقيقى قطعوا قلبي قعدت كام يوم كل ما افتكر شكلهم اعيط بجد

وكمان كان فى مشكله كبيره  فى المؤسسه هنا فى المنصوره والموضع كبر وكان فى قلق كتير

المهم يعنى من يومها وانا ناويه اعمل لقاء ونروح لهم

طبعا بعد البحث والزياره للاماكن دي عشان نعرف هما محتاجين ايه

بالنسبه لمؤسسة  البنات : انا روحت بنفسي وقابلت المديره ست لطيفه جدا ومتعاونه ورحبت بينا ورغم ان الجمعه اجازتها  قالت ادوني خبر قبلها عشان نكون فى استقبالكم

وقالتلى ان النواقص فى مخازنهم عباره عن الآتي :

شاي
مربى
بيض
حلاوه
حبنه نستو
لانشون

طبعا بلاش البيض عشان اكيد هما مش عايزين عجه الصبح

وطبعا قالت لو فى اي هدوم حتى لو مستعمله بس نضيفه وحالتها كويسه مقاس البنات دول اوك

انا قابلت البنات كمان وكان عندهم خطوبه وعاملين هيصه وملبسين العروسه والعريس قاعد مع المديره جوه  ودخلت باركت للبنات

وهما البنات عددهم 40 واعمارهم من 15 وانت طالع

انا سألتهم هما محتاجين ايه بصفه شخصيه غير احتياجات مخازن الاداره

الحقيقه بنات عسولين جدا جدا وكانوا مكسوفين مني خالص بس فى بنت كده طلعت وقالتلى بصي احنا عندنا اربعه مخطوبين وفى منهم واحده هاتتجوز بعد شهر وبنجهزها فياريت لو اي حاجه من حاجات جهاز العرايس

كوبايات .. كاسات .. اطقم سراير ... فوط ... الخ الخ الخ   وكمان لو لبس برضه للعرايس مافيش مشكله

وعليه اي حد جاي ويقدر يجيب معاه اي حاجه من الحاجات دي يتفضل يجيب معاه

اما بقى مؤسسة البنين فدول موالهم موال

محمد  متولي الله يصلح حاله راح امبارح زارهم وما لقاش  هناك حد الا مشرف قاله انا ما اعرفش افيدك المهم خد تليفون المؤسسه وانا كلمتهم النهارده
وكلمت مدير المؤسسه
الحقيقه كان ناقص يقولي انتم عالم فاضيه ما تقرفونيش

قالي اولا احنا عندنا مشاكل فى المؤسسه وبناء عليه لاغيين الزياره ( مش فاهمه ليه )
قلتله طيب ماشي المساعدات لو جمعتها مش ممكن حد يجى يسلمهالكم ؟
قالي : اه كده ممكن .

قلتله طب ايه المطلوب عندكم ؟
قال : سخان مايه  لان السخان الى هنا عطلان وبلوفرات للولاد

واضاف بغتاته بس الى يجى يكون من 8 الى 2 ظهرا

قلتله لا يا  فندم ما ينفعش ده هانيجى  الجمعه

قالي : لاااااااااااااااا جمعة ايه مافيش الكلام ده ..
قلت : طب حد من الاداره يتواجد عشان يستلم مننا يجيلنا مخصوص  عشر دقايق بس قبل الصلاه

قالي : لا لا لا ما ينفعش خالص يا تيجوا من 8 لاثنين غير الجمعه يا بلاش

وهوب وراح مدورني مكتب وهايدينى بقى محاضره عن الالتزام بالقوانين واحترام النظام
وطبعا جابه لنفسه خد كلمتين فى التمام وقفلت وانا امني نفسي انى اروح الزقه قلمين

رغم ان فى ناس اقترحوا اننا نخلينا فى السالك ونروح ملجأ اطفال والمهم نعمل الخير (ويظهر نرميه البحر )

بصراحه ما اقتنعتش  ومش عايزه استسلم بكل سهوله .. اغلب الظن مدير المؤسسه دى مش حرامي .. عشان لو كان هياخد نص التبرعات دي ولا حتى كلها كان فرش لنا الارض رمل  وجه مخصوص يوم الجمعه

المهم طبعا هاقولكم احنا توصلنا لايه فى برنامج اليوم والاتفاق عليه


اولا هانصلي ان شاء الله الجمعه فى مسجد عباد الرحمن الكائن بشارع سعد الشربينى
 يوم الجمعه 31/12/2010
وبع الصلاه ان شاء الله على طول هانطلع على المؤسسه الى جنب المسجد اصلا

 
والمؤسسه  لو حد عايز يجى على المؤسسه على طول ... جنب المرور بالظبط الى هايركب تاكسي يقوله ودينى عند المرور البوابه الجانبيه ( بوابة  الفحص )

هاندخل المؤسسه على الساعه 12:30  تقريبا بعد الصلاه يعنى هانسلمهم التبرعات  ونقعد مع البنات شويه ومعلش الشوباب بقى يستنونا بره  عشان ممنوع يدخلوا المؤسسه  واحنا مش هانتاخر عليكم  وعد J
 وهنشوف لو كنا هانبعت حد من الشباب لمؤسسة البنين

وهانطلع  بعدها  على المكان الجميل الى هانقضي فيه اليوم .. وهو كافيه بامبو ومكانه قدام اكادمية السلاب بالظبط



وطبعا الى يجيب مساعدات عينيه يكون احسن عشان نسلمها على طول للمؤسسات ولو ماديه هابقى اتصرف انا واشتري حاجات واوديها بصراحه شايفه العينيه  احسن  من الماديه احتمال وصولها للولاد اكتر


هاقول تاني الاحتياجات

للبنات : شاي مربى حلاوه جبنه نستو لانشون ........ وجهاز للعرايس .. وملابس

للبنين : مطلوب  بلوفرات للولاد وهما عددهم هناك حوالي 11 ولد  (ايوه بس ومش عارفين يكسوهم الموكوسين ) وسخان مايه



نيجى بقى للمكان الى هانقضي فيه اليوم ده انا لقيته باعجوبه والله

دولي حبيبتى داليا قوس قزح كل ما تيجى المنصوره  حاسه بقى انها جايه الاقاليم وعايزه يا عينى تاكل فطير وقشطه وعسل و جبنه قديمه
وما كنتش عارفه اوديها فين الصراحه بعدين عثرت على المكان ده بالصدفه

وهوكافيه بامبو هو مكان جميل اوي ومفتوح وحواليه  اراضي زراعيه والمكان نفسه معملوه ديزاين بسيط اوي وريفى وقلل بقى وفخارات والجو ده

وفى كمان مبنى مقفول فى حال الدنيا بردت ولا حاجه نستخبى جوه

وفى مراجيح بسيطه كده فى جمب

وفى ركوب خيل ايوووووون والله في ركوب خيل هازيطك يا دعاء

وبالنسبه للاكل
هما بيعملوا كل حاجه سندوتشات واطباق سريعه و فطير مشلتت  وحاجات كتير تانيه بس المشكله انه بالطلب من قبلها
فقالي خصوصا الفطير لازم تبلغينى من قبلها بيوم

بالتالي الناس الى هايجوا لازم يبلغوني  من على بيات ... وقالي ان الفطيره بتكون كبيره تكفي فردين وتفيض وبتنزل معاها عسل وقشطه وجبنه قديمه ... وسعرها 35 جنيه تقريبا
ام هند يعنى ياريت تبلغوني الناس الى اكيد جايه عايزين ياكلوا ايه وعموما هماناس مرنين يعنى ممكن الى مش عاجبه الاكل يطلب دلفري او كده الحقيقه صاحب المكان انا كلمته وقالي اعملوا كل الى انتوا عايزينه

بس  هوفى مشكله انه المكان بره المنصوره على الطريق السريع مافيش مواصلات عليه بالتالي احنا لازم نأمن وسيلة  مواصلات بالذات فى الرجوع والموضوع ده هاشوفه  بقى وارتبه انا ومحمد متولي ربنا يسهل

تمام كده يا جماعه فى حاجه انا ناسياها ؟؟؟؟

فكرووووووووني

والله كنت ناسيه التليفون بتاع اللقاء
يوم اللقاء  ان شاء الله هايكون معايا  التليفون ده
0126379796
هافتحه من قبلها بيوم عشان الى عنده اي استفسار عن الطريق والترتيبات

طبعا طبعا لازم اشوفكم بجد عند عندنا وكلكم واحشنى وفاتيما لو ما جيتيش هاجيلكم البيت اجيبك عنوه
دولي يارب  تعرفي تيجى  عشان لو ما جيتيش هاجيب الفطير واجيلك بقى
وكل الناس طبعا اتمنى تنورونا هنا  ونتجمع على خير دايما

هناك 33 تعليقًا:

كلمات من نور يقول...

ربي يوفقكم جميعا لما يحب ويرضى ويجازيكم كل خير إن شاء الله

مجرد حلم صغنتوت يقول...

تسلمي يا شوشو :)
ربنا يعلم انا محتاجة اليوم ده ازاي اصلا
ربنا يتمه على خير يااا رب

شمس النهار يقول...

ان شاء الله يكون تجمع في الخير
وتنبسطوا كلكم

:))

وتعالي عندي المدونه حلي الفزورة بسرعة

:))

MaNoO يقول...

امممممممممم اتمنى ان شاء الله اتواجد خاصه انى محضرتش لقاءات مدونين قبل كدا وبما انكم كمان جايين جنب مكان العلام بتاعناالسلاب هحاول اخرج من هدوئى النفسى ازاى معرفش خاصه انى لو جيت مش هبقى عارف حد

فاتيما يقول...

ههههههه

لأ جاية ان شاء الله يا صباصيبو
مدام فيها سفر
يبقى ينفع اجى
ان شاء الله ومفيش قلق


والمعاد حلو
اكون قبضت كمان
ان شاء الله يكون يوم ناجح
وهعلن عنه عندى عشان الكل يلحق يحضر روحه ويرتب ميزانيته


ربنا يكرمك
ويوقفك ف الخير دايما
يا ست الستات

:)

غير معرف يقول...

طبعا طالما فيه فصل بيني وبين الحريمات يبئا

موووووووووووووووش جاي

ال فصل ال

sony2000 يقول...

عااااااااااااااااا
انا بقي
اخدت اواااااامر من الباب العالي
بعدم الذهاب
حراااااااااااام
اهئئئئئئئئئئ
عاااااااااااااااااااا

فاتيما يقول...

معلش يا صبصوبة رسايل sms للغاليين
-----------------------------

بت يا
-----
سنسن
----
اخيييييييرا ظهرتى
حمدلله ع السلامة
شغلى العياطة دى يمكن تجيب نتيجة
لسه فاضل عشر تيااااام

وحشتينى

------------




هانى مصرى جدا
------------

جرى ايه يا فندم
الفصل ف القوات
ف الدار بس
انما بعد كدا اليوم كله معانا
انتا مصر تتهرب من واجبك الكانونى تجاهنا ؟؟
طب الواجب الغنسانى ؟
مش تيجى تاخد بحسنا
ولو اتعاكسنا تنضربلنا ؟!!
او لو انضربنا كلنا
مين اللى هيلم الليلة ف القسم
عشان اقدر اروح لأومى ؟!!!
مش انتا المحامى بتاعنا ؟؟



يلا استعيذ بالله
وقول امشى يا يمن
امشى يا يمن
وانا جااااااااااى

------------

اشوفكم على ألف خير

تخاريف مترجــِــمة يقول...

اول مرة ادخل مدونتك يا قمر

اولا بحييكي على جهدك وسعيك ف الخير

ثانيا بقى وبخصوص اللقاء فبجد كان نفسي احضر معكم

لكن وعلى الرغم أني من المنصـورة الا اني مش هعرف آجي للأسسسسف

بس باذن الله اقابلكم يوم تاني أكون فاضية فيه

ربنا يجمعكم على الخير دوما



ا

أنا - الريس يقول...

أنا قلت أغلس

بالتماسي

علي أحلي

مدونين من المنصورة ( بلديتنا )

وأما الغرابة

" ماشي يا فاتيما "

علي عيني

بس قولي لي " الضرب هيكون في العين
اليمين ولا الشمال أصلها تفرق جامد معايا "

أومال .

غير معرف يقول...

جازاكم الله خيرا

لقاء موفق بعون الله

تحياتي

قلم رصاص يقول...

يالهوووووي ايه التفاصيل دي كلها؟
دا احنا عبرنا برليف أسهل من كدا
هههههههههههههههه
ثم ايه تكعيبة الياسمين دي؟
انا افتكرت اني توهت لما جيت المدونه
لالالالا ارسي لك على بر قصدي اسم
هههههههههه

بجد انا مبسوط انكم هتعملوا اللقاء دا جدا وطبببببعا زي كل مره هاقولك نفسي احضر والكلمتين اياهم وبرددددددو محضرش

هحاول المره دي ان شاء الله
خصوصا اني اتدبست في التسجيل بتمهيدي ماجستير الاقتصاد يعني مفروض اني باجي المنصوره اليومين دول

ان شاء الله متجمعين في الخير
وفي ميزان حسناتكم الجزء الاول من اللقاء ان شاء الله

وبقية اللقاء يكون رائع

مشلتت؟
لالالالالالالالالا أؤكد لك اني جي
ههههههههههههه

سلام عليكم

غير معرف يقول...

سيدى يا سيدى ع اللقاءات
ايييييييه ده بس

بيعجبنى فيكم حبكم للخير وانكم تفعلوا المجتمع التدوينى على ارض الواقع وانه يبقى حقيقة مش عالم افتراضى وبس


اكيد يعنى انا مش جاية :D

بس ميمنعش ان لو الظروف سمحت اتصل واسلم عليكى وعلى كل الموجودين

بجد ربنا يكرمكم على قد نيتكم

shimaa elkholy يقول...

كلمات من نور

مرسي يا حبيبتى مش عايزه تنورينا ولا حاجه ؟

shimaa elkholy يقول...

دعاء
ان شاء الله يبقى كله خير بوجودكم يا قمر

shimaa elkholy يقول...

شموووسه

ازيك يا جميل

اه طيب حاضر اجي

بس ايه مش ناويه تعمليها وتيجى عندنا

shimaa elkholy يقول...

مانو
طيب مادام جمب مكان العلام بتاعكم يعنى فى منطقتكم لازم تيجى بقى عشان تبقى دليل بقى ههههههههه

هاتنور ان شاء الله

وبعدين ما تقلقش من حكاية مش عارف حد دي كلنا ما كاناش عارفين حد تعالى واتعرف علينا عادي

انا ما زلت كل ما باحضر لقاء افضل ماشيه اقول لكل الناس مين انت مين انت عادي

shimaa elkholy يقول...

فاتيما

تسلمى يا جميل هو ايه الناس الى مش بتيجى غير بالعض دي هههههههههههههه

يلا تعالى بسرعه بقى وحشاااااااااااني

shimaa elkholy يقول...

مصري جدا

ايه هو ده هو انت كنت هاتيجى تقعد مع الحريمات ولا ايه

هههههههههههههههههه

فكر يا استاذنا وتعالى نورنا

shimaa elkholy يقول...

سوني

من هنا ليومها فرج يمكن ربنا يسهل ويحنن قلب الباب العالي

shimaa elkholy يقول...

فاتيما
هههههههههههههههه
عسوووووله ضحكتينى

يلا تعاااااااااالي يا يوم الجمعه عايزه اشوفها

shimaa elkholy يقول...

تخاريف مترجمه

ربنا يخليكى متشكره ليكى خالص

وحاولي كده تفضي نفسك ولو ساعه نتعرف بيكى وان شاء الله تنورينا

shimaa elkholy يقول...

الريس

ليه بس مسميها غلاسه انت تنور

وشكرا ياريس وحاول تنورنا يوم اللقاء طيب

shimaa elkholy يقول...

فتاه من الصعيد

شكرا يا جميل ربنا يخليكى

shimaa elkholy يقول...

قلم رصاص

هههههههههههههههههههه
انت دايما كده واقفلي على الرغيه ما تسبنى ارغي براحتي

وبعدين ايون غيرت الاسم فى ايتها اعتراض فى المنطقه
هههههههههههههههه

مش لايق على كلامي يا اخي ندى الياسمين دي والله

وان شاء الله نتكسف ونيجى اللقاااااااء بقى لما نشوف اخرتها معاك

shimaa elkholy يقول...

ستار

تعالى وانا اعملك تنويم مغناطيسى ولا تقولي منوم بقى ولا بتاع
هههههههههههههه
مرسي يا جميل

Dr Ibrahim يقول...

ماشاء الله
ربنا يوفقكم ويعينكم على فعل الخير
والله على الرغم انى من المنصورة وومكن اجى
بس للأسف عندى مشغوليات فى اليوم دا
يالا خير مفيش نصيب...يالا تتعوض مرة تانية..:(
تحياتى لكم

همس الاحباب يقول...

امممممممممم نشت يا فالح
ربنا يستر ونعرف نيجى
عامة انا هعلن عن اللقاء عندى وربنا ييسر الاحوال
جزاكم الله خيرا وجعله فى ميزان حسناتكم
تحياتى

الطائر الحزين يقول...

متجمعين ف الخير دوما

Darsh Basha يقول...

تسلمى بجد على اللقاء الجميل دة
وان شاء الله هبقى موجود ومعاكو

richardCatheart يقول...

ازيك يا دردر يا جميل وحشانى جدا

والله كنت وعدتك يوم تجمع مصر اننا هانحاول نيجى بس والله الظروف غصب واقتدار عننا

ربنا يكرمك ويكرمكم كلكم ويجعله يوم طيب تبدو به السنه الجديده ان شاء الله

ايمان الحب الجميل بعتالك سلامها وكان نفسها تيجى بس ظروفها صعبه بسبب عمليها هدير اختها ربنا يشفى عنها يارب
والدنيا كلها فوق دمغها

ربنا معاكى يا سكر وبوسيلى قطعك قطعه قطعه خصوصا الواد خلود السفروت السكره دا

!!! عارفة ... مش عارف ليه يقول...

إن شاء الله يكون يوم موفق بإذن الله

ويحقق كل الأهداف المرجوه منه


وياسلام لو الكوفي شوب ده يأجر فلاحتين كومبارس

واحدة منهم قاعدة بتحلب اللبن

والتانية قدام فرن بتخبز المشلتت

اااه وشوية فلاحين تانيين في الخلفية وسط الغيطان بينقوا الدودة

ونسمع مع المشهد ده .. سلام الأرض لو عطشانه

علشان قوس قزح تعيش الموود :)))))

-----------

كان حقيقي نفسي أكون موجود للمرة التانية في المنصورة في يوم زي ده

لأن كتير من الناس اللي جايين من القاهرة دوول عملوا معايا الواجب وزيادة .. أه والله :)

وكلهم أكتر من الأخوات حقيقي

وميرسي للتدوين اللي خلى الناس الجميلة دي تتعرف على بعضها
ويتقابلوا في عمل الخير

أطيب تحياتي للجميع

وليد الزهيري

مدونةاكسجين مصر يقول...

السلام عليكم ممكن ان توضع مدونتى عندك الرجار الرد فى مدونتى مدونة اكسجين مصر