السبت، 26 فبراير 2011

سلاح الفتنه

انظمتنا العربيه تستخدم سلاح الفتنه ..وما اقذره سلاح

ما شاء الله حاسه ان الانظمه الحكوميه العربيه كلها اخوات فى الرضاعه كانت بترضهم جموسه واحده ....كلهم متخرجين من نفس المدرسه التييييييييييييييت لتفريخ خونه ومتسلطين ومتعجرفين

فى ليبيا هذا المجنون القذافي بيثير الفتنه بين القبائل ومن اسبوعين سبقوا الثوره بيسلم القبائل هناك اسلحه عشان يضربوا بعض .. بس قدرة ربنا بقى ورحمته ان انقلب السحر على الساحر وهم الان يد واحده ويحاربونه باسلحته

حتى ان احمد قذاف الدم جه مصر يحرض قبائل السلوم على الذهاب للحصول على اراضيهم التى ذهبت الى قبائل اخرى فى شرق ليبيا حين حدث تعديل الحدود
وعرض عليهم دعم مالي وسلاح لكنهم رفضوا ومشي وهو قفاه يقمر عيش
وبالمناسبه احذرمن انه اعلن انه انضم للثوره وعايز ياخد قوافل طبيه ويروح ليبيا من مصر .....اظنها خدعه والله اعلم

فى اليمن ...صالح صحى فيهم الانفصال وقال اهم ده المشكله انهم عايزين ينفصلوا ...امعانا فى فضل الله انقلب عليهم الامر وقال اليمنين الجنوبيين مش هاننفصل امشي انت وبعدين نبقى نفكر نعمل ايه احنا بس انت امشي الاول

فى البحرين ... انها فتنه وسنه وشيعه وهايشتغلوا ....قالوا الشيعه طييييب احنا هنختار زعيم لنا يكون سنه عشان ما تقولوش حركه شيعيه ...كبسه يا عم الملك

تكرار نفس المقرر القذر الى هما حافظينه حاجه تقرررررررف يا حكام العرب بجد

فى مصر  وما ادراك ما مصر وامن الدوله فى مصر..من قبل الثوره حتى والاسافين شغاله عشان المسلمين والمسيحين يقعوا فى بعض  اولا عشان الحكومه تتذرع بالارهاب وتلم كل من يقولها بم قبل الانتخابات الرئاسيه
وثانيا عشان  ننشغل فى بعض عن الي هما ناويين يعملوه

بعد الثوره ..السلفيه (حسبى الله ونعم الوكيل ) قبل التنحي كانوا بيقولوا حرام الخروج عن الحاكم

الجمعه الى فاتت كان راسهم المريض  لامم حواليه لامه هنا وقاعد يقول الدوله الاسلاميه وبيلمح ان السلفيه هايقتحموا المجال السياسي ونحكم احنا وياحليله يا حليله ......تعليقى انا تييييييييييييييييييييييييت

اضافة الى  ان السلفيه عمالين يلكو فى الكلام الخاص بالماده التانيه من الدستور  والخاصه بالشريعه الاسلاميه

الحكومه عاجبها اوي اللغط ده عن الماده التانيه وقال ايه عاملين استفتاء على موقع الاهرام ..الاهرام التعبيريه  ها ؟؟

هالبت احنا يا ولاد ما زال شكلنا غبي  .... ده  حاجه غريبه جدا فعلا
طيب استكمالا لفضل الله تعالى ورد كيدهم الى نحورهم ..المسحيين ناس منهم قالولي اصلا ما يهمناش  الغاء الماده التانيه لانها بكل بساطه _وده رايي_ بتقر واقع

حدش اهبل بيرط فى الكلام ده الاا السلفيه والاهبل منهم الى بيصدقوهم
وهو كان حد يا هبل جاب سيرة الماده التانيه فى التغيرات ؟؟ ما تتوكسوا بقى وما تفضحوش نفسكم اكتر من كده يا سلفيين وتبينوا عمالتكم وتعاملكم مع الجهاز المشبوه المدعو بامن الدوله

رايي الشخصي فى الماده التانيه ....

لو كل واحد حط لسانه فى بؤه واهتممنا اكتر بتركيز دعائم الحريه ووسائل ضمان استفتاءات وانتخابات تشريعه ورئاسيه نزيهه وحره .....بعد كده مافيش مشاكل

لو انهم عملوا استفتاء حقيقى على الماده التانيه للدستور – مش استفتاء هزلي تعبيرى على الاهرام -  ايه الى هايحصل ؟؟؟  اظن غالبا هايحصل اقرار الماده التانيه واستمرارها لاننا غالبية مسلمين ولو ستين فى الميه فقط من المسلمين وافقوا على وجود الماده التانيه هاتكون الغلبه لهم بالتالي نخرس بقى يا ريت ؟؟

لو حصل تصويت عليها انا هاقول تستمر الماده التانيه ...اولا لانى مسلمه اقتنع تماما بان تطبيق الشريعه الاسلاميه فيه مصلحة الجميع ان شاء الله حتى المسيحيين .. والعاقلين منهم عارفين كده

ثانيا : لان وجودها فى الدستور شايل عننا بلاوي احنا فى غنا عنها دلوقتي .... مش مجال تفصيلها

فى حال انا كان رايي ان الماده دي تفضل لكن الاغلبيه فى انتخابات نزييه اختارت الغائها اييييييه العمل ؟؟

قدامي حلين (عاقلين )  اما اظل فى البلد وانا مقتنعه برأي واحاول اروج لفكرتي و قضيتى واحاول اقنع الناس بها  الى ما شاء الله
واما امشي واشوفلي بلد تانيه تكون بتقر المبدا ده الشريعه الاسلاميه الحق ..والى لحد الان من وجهة نظري لسه مش موجوده .
كده خلص الكلام عن الماده التانيه  وياريت اسمع رايكم

وكلمه هاموت واقولها ....مش لاقيه يا المجلس الاعلى للقوات المسلحه للابقاء على امن الدوله غير ان زي ما قالي صديق عزيز ....اصل كله متصوووووووور يا باشا .....

وما حدش يقولي الامن ....فين الامن وفين الدوله ............لن يهدا لي بال الى بانتهاء مهزلة امن الدوله

الى حصل امبارح من القوات المسلحه من مواجهات للشباب فى التحرير مش فاهماه حقا وحتى بعد اعتذارهم انا مش مسمحاهم ولازم يقدموا تبرير وتوضيح يقولوا ازاي ده حصل وليه وايه الاجراءات الى خدوها عشان يضمنوا عدم تكرار ذلك

عفوا يا قواتنا المسلحه ..بطلت تعاطي العاطفيه فى السياسه ...

هناك 14 تعليقًا:

ahmed_k يقول...

أولا بخصوص الماده التانيه فزي ما قلتي الموضوع عباره عن فتح ابواب للفتنه ليس إلا ويقوم بتلك المهمه السلفيين او من يدعون السلفيه وأقباط المهجر وبعض الأقباط هنا وكانها هي سبب الفتن السابقه،
فلا مساس بالماده التانيه ابدا وده أمر مفروغ منه
اما بخصوص الجيش واللي حصل إمبارح فبيان الجيش واضح ان في ناس كانت بتبيع ممنوعات وسط التجمعات وتم غلقاء القبض عليهم وإتضح انهم مسجلين خطر ونوه البيان إلا التحرز منهم وعدم التجمع معهم لأن الثوار بذلك بيضعوا انفسهم محل الريبه وبيتم إعتقالهم وهذا حق لابد من أخذه في الإعتبار،
وموضوع أمن الدوله لابد ان يبت فيه بسرعه ويتم حلله لأنه سبب الكثير من مشكلات مصر سابقا ولاحقا لو أستمر

تقبلي تحياتي

حفيدة عرابى يقول...

موافقاك على كلامك
اتنين وعشرين ريس عربى مايتخيروش عن بعض
وأرجع أقول يافرعون ايه فرعنك
أحيانا بحس ان احنا اللى عملناهم كده
بميراث النفاق الرهيب اللى عندنا

سيناريو الفتنة حقير وماشاء الله عليهم أساتذة فى الحقارة

المادة التانية بمنتهى البساطة هيتعمل استفتاء على الدستور الجديد ننزل كلنا ونقول اللى عايزينه
والمستشار طارق البشرى كان قال كلام فيما معناه
ان الحافظ لحقوق المسيحيين المسلمين مش الدستور
يتعنى حسب مافهمتها ممكن نخلى الدستور لا يمت للشريعة الاسلامية بصلة ونخلى فيه مواد تدى المسيحيين اكتر من حقهم
بس مين هيديهم الحق فى تنفيذ المواد دى ؟
اختصارا لو احنا سوا ناويين على خير
ربنا هيكتب لنا الخير
ده بعد مانفهم الناس بالذوق وبالعقل
ان تطبيق المادة التانية مصلحة وعدل للطرفين

السلفية ...مخنوقة من تصرفاتهم من هنا للسنة الجاية
فجأة التظاهر بقى حلال حلال ومبارك بقى السابق خلاص
ولما اتقتل سيد بلال فى اسكندرية الشيخ ياسر برهامى فضل يقنع الاتباع بكل الطرق على الصبر وعدم الخروج على الحاكم
وصبر آل ياسر
لكن بعدها بايام لما الريس مشى
بقت الدنيا فل وبقى الجيش ولى الامر الشرعى الجديد

sony2000 يقول...

انامن كتر مافكرت
بجد تعبت م التفكير
الاسافين شغاله ومش بيهمدوا
ايييييييييييه دا؟؟
انا فالاخر
بقول ياااارب
سبناها عليك
وانا عرفين انك هتحلها
الحمد لله انك واقف جنبنا يارب
ومخليا كويسه لحددلوقتي

حلم بيعافر يقول...

حتى فى الغباء اخوووووووووووات

وردة الجنة يقول...

حكماء العرب فعلا كلهم اخوات وكلهم زى بعض

ربنا ينصرنا عليهم وينصر الحق

اما المادة التانية فهيا فعلا المفروض تفضل موجودة لان ده ديننا واسلامنا واللى عمره ممس اى ديانة تانية والحمد لله

ان اى فتنة هما بيعملوها بيننا بتقف

ويارب ينصر مصر وينصر شعبها هيا واى دولة عربية تانية

تقبلى مرورى ........

الازهرى يقول...

لالا
الموضوع أكبر من الغباء
دا عته منغولى بعيد عنك

المادة التانية فى لغط حواليها كتير ومفيش حد عاقل قابل بيه
اما ضرب الجيش للناس فانا حذرتهم قبلها بناءا على معلومات من المؤسسة العسكرية باسستفزاز الجيش من عناصر مغرضة هتندس وسط الناس والرد عليهم

بس الناس ما فهمتش الكلام فى الوقت المناسب


وربنا يستر فى اللى بعد كده

ثـــوره الــغضب يقول...

وصفك للحكماء العرب اكيد ليكى كل الحق

بس لما فكرت اكتشفت اننا نستاهل اكتر من كدا

لأننا فقدنا السيطره على عقولنا وتركنا انفسنا لأشياء كثيره جعلت منا دميه

اما الماده الثايه لا مساس لها لأنها خاصه بأن مصر دوله اسلاميه لا غير

والكلام الى بيدور حوليها الان لأن النصار عيزين مصر دوله علمانيه ذى تركيا وده بجد على جوسسنا كلنا

واما ضرب الجيش لمتظاهرين افتكر ان ده كان واجب لأن الى كانو هناك ساعت الموضوع ده ملهمش علاقه ولا بشباب الثوره ولا اى بتنجان واصلا اشكلهم بتقول انهم ملهم علاقه باى شيئ


بوست جميل ياسمين

shimaa elkholy يقول...

استاذ احمد

تمام جدا وحكاية واقعه الجيش دي اظنها غير ذلك وان وجد بلطجيه فالضرب فى الكل مش الحل

تحياتي

shimaa elkholy يقول...

رشا عرابي

كالعااااااده اتفق معاكي بشددددددددددده

shimaa elkholy يقول...

سوني
كلنا بنقول يارب بس لازم ما نتوقفش عن التفكير والعمل
نورتي

shimaa elkholy يقول...

حلم بيعافر

اينعممممممممممممممم

shimaa elkholy يقول...

وردة الجنه
تمام كلامك

ونورتينا

shimaa elkholy يقول...

الازهري

فعلا خلاصة القول ربنا يسترررررررررررر

shimaa elkholy يقول...

ثورة الغضب

لا برضه يا ادم كان فى ناس هناك من الشباب عادي بس هما الطرفيين غلطوا عموما

وبلاش حكاية على جثيتنا والكلام الانفعالي ده محتاجين نفكر بهدوء هى مش فتونه

نوووورت