الاثنين، 7 مارس 2011

امن الدوله

فى الحقيقه انا لما باكون متعصبه اوي مش باعرف اكتب فى المدونه
جايز اهيص على الفيس بوك اصوت واعيط على تويتر  انما ما اعرفش اكتب فى المدونه مش عارفه ليه
جايز لانى باحب اكتب فى المدونه  بعقلي اكتر

وبحاول  كمان ما اكتبش والاحداث سخنه حيث ان بيكون لسه الامور ما اتضحتش

امن الدوله

من زمان وانا عارفه ومتاكده انهم اساس الفساد وانهم دوله لوحدهم وانهم بكل تاكيد اعداء الشعب الاوائل

وايام الثوره كل مصيبه كنت باشم فيها ريحة امن الدوله ..الى انا باعتبرهم كلاب النظام ربوه عشان يسيبوه على الشعب لكن الحقيقه الكلب كبير لدرجة ان صاحبه كان بيخاف منه ويعمله حساب

يوم سقوط وزارة شفيق قلت الدوووور يا ناس على امن الدوله مش هانعرف نعمل حاجه من غير ما ينتهي ده

بس عرفت ان شباب التحرير قرروا يكون الاسبوع ده مطلبه المحاكمات ...ما عجبنيش الكلام اوي رغم اهمية المحاكمات طبعا  عشان التجميدات للناس دي عشان البورصه لو فتحت اصولنا ما تتبعش لاجانب بتراب الفلوس

لكن برضه امن الدوله كان واجعني ونفسي نخلص منه عشان المكائد الى شغاله ضدنا دي تتوقف على الاقل

المهم سبحان الله بمجرد اعلان اقالة شفيق حسبى الله ونعم الوكيل اترعبوا هما وبدأوا فى الحرق والفرم وده الى اثار الناس وبدأت باسكندريه وانتهت بلاظوغلي

الحقيقه انا كنت سعيده جداااااااا فى اليوم ده كنت شايفه رمز للفساد بينهار ايا تكن النتائج والاسباب  فالجهاز طبعا بينهار بعد المقرات فعلا كانت مفجاه لهم لكن بعد كده كان فى توقع وكانوا مستعدين وفارمين وحارقين ومفضيين المقر من المعتقلين كمان وسايبين المقر بشوية مستندات هبله ودخلوا مخابئهم كلهم فى انتظار الفرصه للخروج تاني من وجهة نظري
لكن ده كله ما يمنعش انى فرحانه انهم خافوا مننا  على الاقل ...لكن متاكده ان كل واحد فيهم شايل شوية مستندات تنفع للضغط على شخصيات معينه ومعتبرها سلاحه ..ومتاكده انهم قد يكون لهم خطه للعوده والانتقام بشكل او باخر
لانى مقتنعه انهم اشخاص متجردين من انسانيتهم  كا لهم سلطات غير محدوده جردوا منها وهايحكموا من منطقهم ان الشعب هاينتق منهم بالتالي هايفكروا ينتقموا هما ...من العبيد الى ثاروا عليهم طبعا  احنا يعنى

لكن برضه دي خطوه كان لا بد منها ..محتاجين تحركات سريعه يا ناس ما ينفعش البطيء ده ..مش كان يبقى احسن لو كان الى حصل اول امبارح ده حصل من شهر فات ؟؟ كنا هنفاجئهم كنا هانستريح منهم فى مراحل الثوره ....فلو سمحتم يا مسؤلين عايزين تحرك اسرع ..تحقيقات  وجهاز قضائي قوي وسريع ..وجهاز شرطه صاحي وشريف وقوي

المستندات ... الحقيقه ما اقدرش اقول للناس لا تلهثوا وراءها هو كان فى حد يتخيل الى بيحصل ده ؟؟ دي مصر كلها لها ملفات يا جدعان .. ده انا كان نفسي اروح امن الدوله هنا فى المنصوره عشان اجيب ملفي ..اه اكي ليا ملف طبعا هو انا قليله ولا ايه J

طبعا انا مش مع  تداول المستندات دي مع اشخاص ..متخيلين المستندات الى فيها مثلا تقارير عن شخصك وتليفوناتك وتحركات واسرارك كلها  تقع فى ايد حد ممكن يستغلها ضدك ...هو مستند مصر كلها بقى ممكن يقع فى ايد مين ما نعرفش
كمان هما سابولنا الملفات الى تعمل قلق بس مش الى تفضحهم هما بلاوي اسود بكتير من الى احنا بنلعب بيها دي
يعنى فلان كان على علاقه بفلان والفنانه الفلانيه اتجوزت فلان فى السر وفلان كان متعاون وفلان كان موالي لنا وبيكتب تقارير فى اصحابه ..وهكذااا

هاديلكم مثال : حد على تويتر قال  انا معايا دلوقتي تقرير بيقول ان فى علاقه بين زوجة مسؤل ومش عارف اعلامي ولا ايه كده  ومحتار انشر ولا ما انشرش
الاجابه ببساطه ..ما تنشرش طبعا ...لان  حياة ناس على المحك
وما ينفعش نعتمد على تقارير بيكتبها افسد الفاسدين فى البلد
فقد يكتب بعضهم تقارير غير صحيحه لانتقام شخصي او لتحقيق اغراض ومنافع شخصيه
دول طغاه فاسدين
متخيل المخبر ولا الظابط ولا الامين الى بيشتغل فى امن الدوله ده وساكت على البلاوي الى فيها تكون اخلاقه ايه ؟؟
بالتالي ما ينفعش نفكر كده وما ينفعش ننساق لكده

عموما ياريت صوت العقل بقى يتغلب ونبدا نفوق من نشوة حل امن الدوله ونفكر بقى فى المهم فى الى جاي

طبعا وعلى راسهم التعديلات الدستوريه ..من فضلكم اقراوا فى الموضوع ده وافهموا التعديلات دي حقا   وتبعيتها عشان تقدروا تصوتوا عليها لما يحصل الاستفتاء نكون جاهزين براينا
بقالي كام يوم عايزه اكمل موضوعي عن التعديلات الدستوريه وانزله بس مش لاحقه من الاحداث عموما ان شاء الله فى اقرب فرصه

كمان من فضلكم وللامانه الى معاه مستندات وملفات اخدها من اي مكان ياريت يسلمها للجهات المسؤله ايا كانت اهمية المستندات دي من عدمها ..ونسيب الناس تشوف شغلها ونتمنى انهم يكونوا على قدر ثقتنا فيهم

كلمة اخيره للناس الى كل شويه مش عارفين يحددوا الجيش مع الشعب ولا مش مع الشعب

عايزه اقولكم  ثلاث حاجات تفهموها كويس :

1.    الجيش مافيش حد تاني دلوقتي هو ممكن يكون معا ه اصلا ولا اتخيل طمعهم فى الحكم لو كان كده كانوا شقطوه من زمان

2.    وكمان حاجه ايا كانت نزاهة القياده في القوات المسلحه لحد فين الا ان  يبقى غبي لو فكر يعادي الشعب لان الى هاحصل هانبقى زي ليبيا كده مثلا الكتائب هاتفضل تنشق وتلتحق بالشعب لان اساسا الجيش جزء من الشعب

3.    احنا مافيش قدامنا دلوقتي اي خيار غير اننا نثق فى الجيش بس مش ثقه عمياء وانما ثقه مفتحه ..لان ببساطه مافيش قوه غيره متماسكه فى مصر غير الجيش .. ولو ما كناش ناخده لصفنا هايبقى فى مواجهتنا فالموجود دلوقتي فى رايي افضل الخيارات المتاحه

نهدا شويه يا جماعه ونركززززززز عشان هانقرر مصيرنا فى خلال ايام

الى اللقاء ان شاء الله فى التعديلات الدستوريه

هناك 16 تعليقًا:

حلم بيعافر يقول...

ايوه
بس الجيش دايما بييجى متاخر

وردة الجنة يقول...

امن الدولة دلوقتى بيحاول ياخد كل حاجة ليه حتى عندنا فى جامعة المنصورة سمعت انهم دخلو مبنى حرس الجامعة واخدوا كل الورق اللى هناك

بجد نفسى نتحد على حاجة واحدة وميكونش فى بينا ناس ضعيفة النفوس تهبط العزائم وتساعد على الفساد عشان مصر تتغير

والجيش فعلا بحس ان تحركاته دايما بطيئة مش عارفة ليه بس ممكن اكون بلتمس ليهم عذر حماية مصر من الخارج مع الداخل

الحقيقة مبقتش عارفة

.......

ثـــوره الــغضب يقول...

الجيش ديما بيحب يتفرج من بعيد ويتابع الاحداث زي متقولى كدا هوا محايد جدا وده شيئ غريب انو يكون محايد مش لاقى سبب وامن الدوله بقه ماضى والحمد لله

الازهرى يقول...

مفيش حاجة اسمها ثقة عميياء
وبصراحة مش فاهم ثقة مفتحة
اللى أعرفه واللى كنت بأتكلم عليه مع ناس من الجيش من زمايلة

إننا محتاجين نبنى بلدنا
ونتعاون مع بعض
علشان تكون لنا كلنا فى الآخر

تحياتى دوما

ahmed_k يقول...

أوافقك جدا على كل ما اوردتيه في موضوعك بخصوص امن الدوله
هذا الجهاز الذي كان يتم إختيار عناصره بدقه متناهيه بحيث يكون لا يملك قلب ولا خلق ولا دين ولا ضمير لدرجة انهم تاذى منهم الكثير من ضباط الشرطه أنفسهم وليس المواطنون فقط ،،
وامثال هؤلاء لا يؤتمن جابهم ويجب الذر منهم ومحاكمتهم على جرائمهم
فالمفترض بكل من تعرض لتعذيب داخل أروقته ان يقوم بالإبلاغ عما حدث له وإعطاء اسماء من نفذ فيه التعذيب كي تنالهم مقصلة العداله ،،،

والتعديلات الدستوريه رغم روعتها إلا انه توجد مواد اخرى بحاجه للتعديل لم يلتفت إليها كشروط عضو مجلس الشعب وصفات الفئات والعمال
وكذلك قصر مدة الرئاسه بأربعة سنوات تعتبر قليله ومن وجهة نظري 5 سنوات مقبوله وبها من الفرصه للرئيس كي تظهر نتائج أعماله ومدى نجاحاته من عدمها
المهم ما يتفق عليه الأغلب من الشعب فكلنا سنقبله

خالص تحياتي

كلمات من نور يقول...

يارب ينصفنا ويقوينا يا ندى على التخلص من هذا الفساد الذي عم مصرنا الحبيبة

تسلم إيدك

باحث عن حب يقول...

انا فرحان قوى يا ندا

sony2000 يقول...

انا نفسي فحاجه بس
الكل يرركذ شويه
فشغلوا وبس
وكل حاجه حلا هتيجي بعد كدا
ننتخب ونشتغل ونحاسب
ونحمي
بس نضرب بعض تاني ونسمع للي بيشعللوا
دي العيبه فعلا

shimaa elkholy يقول...

حلم بيعافر

انا اتوقع والله اعلم ان الجيش هايتغير بتغير الوزاره وهانشوف عموما هانوصل لفين واحنا متيقظين للكل وغير مخونين للجيش برضه

shimaa elkholy يقول...

وردة الجنه

معلش شويه شويه هانعرف وهانفهم لما فلول النظام من امن الدوله والحزب الوطني ينتهوا من عملية الفلفصه بعد الدبح

shimaa elkholy يقول...

ثورة الغضب

الواحد لما بيشتري عربيه جديده بيقعد يومين كده علىما يتوحد عليها

والجيش بتاعنا فعلااا كان غير مسيس تماما وبشكل مقصود طبعا

shimaa elkholy يقول...

الازهري

تمام محتاجين ده بس خد بالك عشان تعيد بناء بيت

بتجيب مقاول هدم ومقاول حفر ومقاول بناء

نورتنا

shimaa elkholy يقول...

استاذ احمد

تمام الله ينور عليك وليا كلام ان شاء الله فى موضوع الدستور ان شاء الله نتكلم عنه

وزي ما حضرتك قلت فى النهايه كل واحد مننا هايقول رايه وفى النهايه الراي للاغلبيه

shimaa elkholy يقول...

كلمات من نور

ربنا يخليكى وتسلمى يارب

ويارب ان شاء الله ينصرنا

shimaa elkholy يقول...

محمود باحث حب

والله انا فرحانه اوي اوي بس زي ما تقول كده بنفرح نص ساعه وبعدين نبدا فى قراءه السنيورهات بقى الخفيه ونكتئب ربنا يعديها على خير
تحياتي لك

shimaa elkholy يقول...

سوني

يا حبيبتى نركز ونشتغل اه

نتلهي وننسى لا

ان شاء الله خير