الأحد، 13 مارس 2011

دستور يا اخوانا

السلام عليكم

طبعا الان الوضع غير مستقر تماما وانا قلقاااانه اوي اوي بس يعنى عندي امل فى ربنا كبير ربنا ينتعنا بالسلامه

عايزه اتكلم معاكم النهارده عن الدستور بس قبل كلامنا عن الدستور عندي كلمتين عايزه اقولهم لكم بخصوص الجيش

الناس محتاره من اول يوم فى الثوره ..يا ترى الجيش معانا ولا علينا ولا عايز ايه بالظبط
الحقيقه انا حاليا عندى يقين ان الجيش زي الشعب بالظبط ناس منهم مقتنعين جدا بالثوره وناس لا

الناس الى مش مقتنعين فريقين  ..فريق فاسد ومستنفع بالفساد الى فات ..وفريق تاني شايف انها ثوره عيال او انها هاتخرب البلد ...يعنى نفس موقف الشعب
ولكن...
انا برضه حالهم حال الشعب الجزء المقتنع بالثوره وعايز يحميها اكتر واكبر واقوى
حتى لو كان جزء من قيادات الجيش مش معانا وانما عارفين كويس ان الظابط الى هايكون على ارض المعركه مش هايكون معاهم

طيب نعمل معاهم ايه ؟؟ من وجهة نظري المتواضعه بقى يا شباب .

احنا عملنا ثوره ..المفروض ان الثوره هلى الى تحكم البلد دلوقتي لانهم هما الشرعيه الوحيده دلوقتي فى البلد
الجيش بقى ما ينفعناش ...اه لانه محايد ..ينفعنا فى حماية البلد عموما انما يحكم لا ..احنا دلوقتي عايزين حكم متحييييز للثوره  ...اه متحيز للثوره حقنا يا جدعان احنا مش عملنا ثوره ولا كنا بنلعب استغمايه فى التحرير

بالتالي الحل دلوقتي الى شايفاه مناسب هو مجلس رئاسي من اثنين مدنيين وواحد  عسكري
هنختاره زي ما حصل مع عصام شرف نقدم اقتراحات ويختاروا منها الشرفاء والكفاءات كتير كتيركتير

لما يكون عندنا مجلس رئاسي بقى متحيز  للثوره ويعمل  لنا الى احنا عايزينه وما يخضعش لاي ضغوط من اي نوع وما يكون مداس على رجله ولا على راسه بطحه لاي حد خصوصا من فلول النظام القديم

ساعتها بقى نبقى فضينا وعندنا وقت وعندنا دماغ نفكر فى موضوع الدستور ...مستقبل مصر الحقيقى

الدستور

انا كنت قعدت افكر فى موضوع التعديلات وكنت كتبت بوست بالفعل عن التعديلات وما كنتش عارفه اكون راي فيها وقلت اسمع منكم وتسمعوا مني لكن جدت ظروف واتاجل البوست واتغيرت الافكار فقلت نبدا من جديد

التعديلات المطروحه  الى احنا المفروض هانستفتى عليها يوم 19 مارس ..نعم ؟؟؟ ازاي ؟؟ طب هى فين يا معلمي ؟؟  لحد الان مافيش بيان رسمي بنص المواد المعدله ؟؟؟!!! انا قريت وسمعت اكتر من حاجه وفيهم اختلافات طب مين صح


طيب اقول الى لاحظته

اولا  مجلس الشعب ..ما جابوش سيرة ال 50% فلاحين ولا مقاعد المرأه ولا كل  هذا الهبل ..طب ايه ؟؟
هما دول الى هايختاروا اللجنه التاسيسيه ؟؟!!  والمرشحين للرياسه وكل ده ؟؟ طب  ازاي؟؟

ثانيا : دى بقى نقطه شوفتها مختلفه فى حاجتين او مره نشرت التعديلات فى جرائد قالوا ان الطعون على عضوية مجلس الشعب تكون امام محكمة النقض ..ده كويس ...لكن فى المؤتمر الصحفي لطارق البشري قال المحكمه الدستوريه والحكم نهائي لا يجوز الطعن عليه  .. دى مش حلوه ...ليه ؟؟ ما ياخدش درجتين ليه نقض ودستوريه مثلااااا ؟؟

ثالثا :سلطات رئيس الجمهوريه ما حدش  جه ناحيتها اوي برضه غير 3 نقط ابرام المعاهدات واعلان الطواريء وتعديل الدستور !!!

رابعا :الاحزاب ؟؟!!! ايه هايبقوا ازاي مين فين ...امال هانعمل انتخابات بمين ؟؟ الوطني والاخوان ..وشوية الكتاكيت الى على الساحه ؟؟؟  ده يبقى استهبال


خامسا : السيناريو المطروح  والى بيقول نعمل انتخابات برلمانيه بعد شهرين ؟؟!! نعم طب مين وازاي وفين

لعلمكم هو ممكن بس هاتبقى اميشن امبوسيبل محتاجه مننا نعمل بهلونات عشان نقنع الناس المحترمين فى كل الدواير انهم يترشحوا ..لان دلوقتي الى موجودين على الساحه هما الحزب الوطني اه طبعا لسه موجودين بقرفهم وبلطجياتهم  وسلطاتهم كلها .....والاخوان .. انا ما باتعاملش مع الاخوان على انهم بعبع لا ..بس برضه مش عايزاهم يبقوا هما اغلبية المجلس ولا حتى ثلث المجلس .. وده مش لراي شخصي او مصلحه شخصيه وانما المفروض كده اصلا مايكونش فى اتجاه معين هو الى مسيطر الفتره الجايه فقط لانه مافيش غيره  .

سادسا : المحافظين ونظام الحكم المحلي ...نعم ؟؟؟ ايه عايز تسيب العصابه دي فى البلد واحنا بنشتغل فى دستور والانتخابات والجو ده ؟؟؟ ده لا ممكن ابدااااااااا

سابعا : بالنسبه للماده الخاصه باشتراط الجنسيه المصريه وعدم حمل غيرها حتى سابقا ولا هو ولا مراته ولا ابويه.....انا شايفاها شروط صعبه اوي ...بس بيرن فى دماغي كلمة طارق البشري لما قال احنا بنطبق الشروط دي على ظابط بدبورتين فى الجيش ..ورئيس ا لجمهوريه ده هايبقى القائد الاعلى للقوات المسلحه ..ما يبقاش عليه الشروط دي ؟؟!!!
حقيقى لسه محتاره فيها النقطه دي 
                                                              
كمان حكاية الحكم يكون برلماني ولا رئاسي ما اعتقدش هاتفرق كتير اوي لو كان سلطات الرئيس محجمه ويبقى حكم ديموقراطي فعلا مش بتنجاني زي الى احنا كنا فيه


طيب انا دلوقتي واقفه اشد فى شعري فى النص لانى مش عارفه اقرر
لكن فى قدامي صوره مش عارفه هى هاتكون صح ولا لا
لكن اعتقد انها هاتكون مناسبه ....وطبعا عايزه اسمع رايكم

نستعرضها كده ونشوف:

اولا: زي ما قلت فوق مجلس رئاسي ويتفضل الجيش ومتشكرين لحد كده ومش يخلينا نتسرع عشان هو مش فاضي يقعد لنا...والمجلس الرئاسي مع الحكومه الى موجوده دلوقتي يسيطروا على البلد ويمشوها وينقذوا البلد اقتصاديا وهاتمشي فل والله

ثانيا : تجميد عمل الحزب الوطني ..وحرمان اعضاؤه من العمل السياسي والانتخابات جمعاء  لمده من خمس لعشر سنين ...كفايه الى عمله  فينا 

ثالثا : فتح الباب لتكوين الاحزاب ..عشان يبقى فى مناخ سياسي يسمح باقامة انتخابات محترمه ومجلس شعب محترم يمثل الشعب بصحيح

رابعا : الحكومه والمجلس الرئاسي  يختاروا اللجنه التاسيسيه الى هاتحط دستور جديد نوووفي على الزيرو عشان زهقنا المستعمل المرقع يا ريت ...على راحتنا بقى ما البلد ماشيه والناس بتاكل مم والتنميه عادي والاقتصاد عااادي
والدستور لما يتكتب ينزل رسمياااا مكتوب بصياغته الاساسيه ونتناقش فيه لمدة شهرنقطعه من غيرما يكون  فى امن دوله يعملنا حوادث وفتن عشان نتلهي فيها عن الكلام فى الدستور ...وبعدين نصوت على الدستور وطبعا كان بودي اننا نصوت على المواد ماده ماده ..بس مش عارفه ايه صعوبة موقف زي ده فى الحاله الى احنا فيها دي

خامسا :الانتخابات الرئاسيه  بقى وتكون حسب الدستور الجديد ونقعد برضه شهرين ثلاثه نقلب فى المترشحين ونسمعهم ويسمعونا ونقرر برااااحتنا ..وبعقلنا مش بقلبنا نبطل نستدعي خالتي عواطف بقى فى الامور السياسيه الى زي دي ..وبعد ما نختار  الرئيس  نقوله يلا يا حلو ظبط نفسك  بقى واختار نائب ورئيس وزراء  وشكلوا الوزاره 

وسادسا : ونكون ساعتها بدأنا فى ترشيحات مجلس الشعب ..ونكون بقى اتنصحنا والناس اتنفست الحريه وبقى فى احزاب حره .ومستقلين محترمين ...والاقي واحد مرشح نفسه محترم بقى من نفسي بدون اي اتجاهات ولا اي مطامع غير خدمة الوطن والمجتمع ياااااااااارب بقى

 وخلال ما كل ده بيحصل .ولحد ما  الوزاره الجديده تحلف اليمين قدام رئيس الجمهوريه المنتخب .....والى اتخيل انه ممكن ياخد مننا سنه ..اه عادي ورانا ايه يعنى

تكون بقى الدنيا  ماشيه ...اه وزاره شرف تشوف شغلها صح ...تحاسب كل المخطئين وتصلح  الى انكسر وتجيب حقوقنا الى اتنهبت وتعمل تنفس صناعي للاقتصاد بتاعنا .. والاوضاع الخارجيه المنيله فى المنطقه
وتنفس صناعي للاحوال الداخليه اجمع بداية من لقمة العيش لحد الفتنه الطائفيه

وعملية استئصال داخل جهاز الشرطه لا بديل ولا فكاك منها ..وعملية مسح باستيكه لجهاز امن الدوله الفااااسد


وطبعا لان الدستور الجديد هاحقق احلامي .. اه وهايبقى  عندنا محافظين منتخبين ومجالس محليه منتخبه وحكم محلي حقيقى ..
وانتخابات نقابيه حره وانتخابات مجالس ادارات حره وانتخابات لرؤساء الجامعات والعمداء حررررره

كل ده بقى يتعمل تباعا ... ونفضل كده نرتب ونوضب فى البلد لحد ما تبقى تمام نبدا نشم نفسنا بقىىىىىىىىىىىىىىىىىىىىى

 يهمنى اوي اسمع رايكم

انتم عارفين انا مش متخصصه انا بس باتصور واتخيل ازاي ممكن الدنيا تمشي
متاكده ان فى منكم ناس متخصصه وتعلم اكتر مني عايزه اسمع رايكم اوي عشان اقدر اكون راي ونساعد بعض كلنا فى ده

اسفه لانى طولت عليكم بس يعنى الامرجد خطير(حلوه جد خطير دي اوي )

يلا عايزه اراااااااائكم ما حدش يكسل

هناك 16 تعليقًا:

NuNa NuNia يقول...

على فكرة يا ياسمين كلامك ميه ميه والسيناريو اللي انت كتبتيه للاحداث جميل ومريحني اوي اوي
انا من الوافقين على التعديلات الدستوريه مبدايا,لكن بعد ما قرات كلامك,وخاصة اني رغم اني من الموافقين على التعديلات الا اني كان قالقني اوي موضوع السربعه والاستعجال ده وفي نفس الوقت قلقني برضه بقاء الجيش في الشوارع كده وعدم رجوعه لمواقعه على الحدود
يعني انا وصلت لحل وصت بعد ما قرات كلامك
طب هوة احنا ليه ماينفعش نوافق على التعديلات دي وبعديها على طول نعمل مجلس رئاسي من اتنين مدنيين و2 عسكريين يمسكوا البلد,ونكون براحتنا باه في تكوين احزاب وغيره وغيره!!!!! هل في تعارض من اننا نواق على تعديلات الكام ماده دي ومن اننا برضه نعمل بعد كده مجلس رئاسي؟؟!!! مع العلم انه لما حنوافق على التعديلات هذا ليس معناه ابدا انك موافقه على الدستور كله على بعضه,ودي نقطه للاسف غايبه عن كتيييير من الناس
الناس اللي رافضه التعديلات كلهم فاكرين انه طالما وافقنا على التعديلات اذا تبقى باقي المواد الخاصه بكوتة العمال والمراه والاحرزاب وغيره وغيره من العك كما هي,
لا,ده مش صحيح ده هوة مطروح عليكي كام ماده متعدله وكام ماده جديده عشان تمشي حالك الى ان يتم عمل دستور جديد,والدليل على كلامي ده انه الماده 189 مكرر بتنص كده :انه البرلمان لازم حيعمل دستور جديد على طول بعد تشكيله(يمكنك قراءة النص القانوني في التعديلات الدستوريه)
من وجهة نظري المتواضعه ان هذا حل وسط مع العلم اني برضه لست قانونيه ولا حاجه

sony2000 يقول...

وانا كومان بشد فشعري
اعااا

Dr Ibrahim يقول...

نعم للتعديلات الدستورية..

Mahmoud Ahmed يقول...

السلام عليكم و رحمه الله و بركاته
دي اول زياره لي
و عاجبني الموضوع فحبيت اني اشارك
هو كل الى انتي قلتيه ده كلنا موافقين عليه و كلام جميل محدش يقدر يقول عنه حاجه
بس فيه نقطه مهمه
ان كل ده عايز وقت كبير و مجهود كبير
مينفعش نزيل بلاوي و اخطاء سنين في ايام معدوده
اخنا في التعديلات الدستوريه على الاقل ضمنا انتخابات نزيهه و شريفيه بإشراف قضائي وهي دي اهم حاجه

و يكون تعديل الدستور او تغيره مهمه الرئيس القادم لمصر

و من فوائد التعديلات الدستوريه انهاء فتره الطوارئ و هنرجع بقي نشتغل القانون من جديد

و من فوائده ايضا تعين نائب للرئيس في خلال 60 يوم

كل ده فوائد ، اعتقد من وجهه نظري انها اهم شئ

لأن هي ده الى هتححد معالم الدوله
اي حاجه بعد كده هتاخد وقت عشان نتخلص منها و نستأصلها

غير معرف يقول...

دخلتي في التفاصيل بسرعه جدا

طيب

أقرأي عندي يمكن أساعد

كلمات من نور يقول...

ربي يكتب لنا الخير جميعا يا ندى فحال مصر بقى محير وموجع...تحياتي

مدونه ما كفايه بقى يقول...

السلام عليكم

كلامك جميل جدا بس نيجى للواقع بقى هيتنفذ؟؟؟؟؟؟؟؟؟؟؟؟؟

هيتنفذ لمجرد انك اقترحتيه ( مع احترامى لحضرتك)

الواقع مش بيقبل مجرد اقتراح ولا ايه؟

بصى أقرأى الموضوع ده ويا رب تقتنعى بكلامى

http://itwasmyhope.blogspot.com/2011/03/blog-post_12.html

تحياتى لكى

shimaa elkholy يقول...

نونا
انا عارفه ان التعديلات دي والدستور المرقع ده مؤقت

لكن اولا التعديلات دي مش كفايه فى حاجات مهمه لازم تحصل معاها

وعموما يا نونا اول مره اشوف ثوره تقبل بالحلول الوسط بصراحه

وليه اصلا دي ثوره ونجحت فى اطاحة النظام تقبل بالفتات ليه ؟؟

الكيانات المنظمه فى البلد الوطني والاخوان والسلفيين هما الى موافقين على التعديلات

لان ده هايديهم فرصه يكون المجلس بتاعهم يعنى القرارات الجايه بتاعتهم

لكن الحقيقه انهم ما بيمثلوش السواد الاعظم من شعب مصر الى مالوش اتجاه سياسي ولا فكرى
وهنا يكمن الخطر فقط

تحياتي ونورتي

shimaa elkholy يقول...

سوني
شدي يا حبيبتى شدييييي براحتك كلنا لها ههههههه

shimaa elkholy يقول...

ابراهيم

اوك

shimaa elkholy يقول...

سبايدر مان
اهلا بك يا فند

اتفق معاك انها تعديلات ما كناش نحلم بيها

لكن يقلقنى تواجد الوطني والاخوان والسلفيه على الساحه حالياوهما الوحيدين الى منظمين وعندهم كوادر تسمح بخوض انتخابات وما الى ذلك

تحياتي لك

shimaa elkholy يقول...

مصري جدا

قريت يا فندم وقلتلك رايي هناك

shimaa elkholy يقول...

كلمات من نور

لا تقلقي ان شاء الله خير ونسال الله السلامه

shimaa elkholy يقول...

مدونة ما كفايه بقى

حضرتك بتفكرينى لما قالولنا هو فكرة خلع الرئيس ممتازه بس مش واقعيه مش هاتقدروا

بس قدرنا بفضل الله تعالى وصبر وشجاعة شباب التحرير

قريت موضوع حضرتك ورديت عليكى هناك

ومتشكره ليكى ونورتي

ثـــوره الــغضب يقول...

لا لترقيع

لا لكومديا التدى تقوم بها الجهات والقوات المسلحه

لا لخراب البلاد

واحد جورنالجي يقول...

برجاء مراسلتي على الميل بخصوص مدونتكم حيث نرغب في نشر تدويناتكم على موقعنا mujaz.me

hazem9009@gmail.com