الاثنين، 1 أغسطس 2011

عن الاخوان نتحدث



اولا  رمضان كريم وكل سنه وانتم طيبين وربنا يعوده عليكم بالخير يارب

وحشتوني جدا جدا ووحشتنى المدونه والكتابه فيها
وزي ما بتقول صديقتى العزيزه ستيته يبدو ان تويتر بال140 حرف بتوع فعلا حارقا للافكار 

جاتلي دعوه على الفيس بوك للمشاركه فى شهر التدوين اليومي وطبعا انا مش ضمناني خصوصا اننا فى رمضان لكن انا قلت لما اشترك واحترم نفسي بقى واحاول  اكتب تاني بانتظام



ثانيا بقى ندخل فى موضوع البوست

الاخوان

طبعا خلال الفتره الى فاتت ويمكن من بداية الثوره او قبلها حتى رايي فى الاخوان ثابت وما اتغيرش ولكن مش عارفه ليه لما باقول رايي بصراحه ده بيدعوا ناس كتيره جدا للهجوم عليا بشكل شرس جدا حتى لو كانوا مش اخوان

الحقيقه مش عارفه امته هانسمع  بعض  بكل بساطه ومش مهم نقتنع ببعض لكن يفضل الود قائم بل اكثر من الود كمان

بداية انا مش معاديه للاخوان ولا لاي اتجاه تاني بصرف النظر  عن مرجعية اي تيار الدينيه والسياسيه كل واحد حر ولكن .. من حق انتقده او اخالفه براحتي بدون ما يصبغ  ذلك بصبغه  معاديه لدين او لله كمان

والى غلبت اقوله للناس كلها انا ليا اصدقاء اخوان وسلف بل ان اختي الكبيره والله اخوانيه هى وجوزها  وعادي جدا على مائدة السياسه والفكر بنتعارك فكريا ونشد فى شعور بعض  وعلى مائده المحشي بنقعد عادي نعمل محشي وناكل محشي  مافيش اي مشكله

اقول بقى رايي فى الاخوان نفسهم وبلاش رغي

الاخوان جماعه معروف اصلها والمفروض انها جماعه دينيه ولكن من بداية الامر وهى لها وجود سياسي وده انا لا انكره على اي حد فى الدنيا ايا كان  التواجد السياسي حق كل واحد وكل تيار
حتى انى لا اعارض قيام احزاب على اساس دينى ما دام انا باكفل حرية الاحزاب

 ولكن اذا انت كداعيه للدين وحامل راية الاسلام  دخلت عالم السياسه فهل عليك خلع عباءة الدين داخل موقعتك السياسيه والقول بان الخديعه فى الحرب مباحه .. ولكن حين يوجه اليك النقد بصفتك فصيل سياسي ترفع سبحتك فى وجهي قائلا لعنة الله على الكافرين ؟؟؟

حدد موقفك هل انت رجل دين دائما حتى سياسيا ام انك تخلع العباءه وترتديها  وقتما تشاء ؟؟

السؤال الذي هو مثار جدال دائم : هل الاخوان يعقدون الصفقات مع السلطه ؟؟
رايي انا الشخصي : نعم ونعم ونعم ..تاريخيا نعم  .. وفى الماضي القريب نعممم.. وفى الحاضر نعمممم

حد بقى يقولي دلائل اقولك ده حضرتك تحليل سياسي ان صح التعبير لك ان تاخذ به ولك ان تتركه

ولكن انا بما رايته من الاخوان على مر سنين عمري فقط يؤكد ليا انا شخصيا انهم يعقدون الصفقات مع النظام مهما كان النظام

واظن انه لا يخفى ابدا ان الاخوان عقدوا الاتفاق مع الملك ومن بعده عبد الناصر واداهم بمبه والسادات واخدوا نفس البمبه  وما اقتنع به شخصيا انهم برضه  عقدوا الاتفاق مع نظام مبارك واخدوا نفس ذات البمبه  بشكل او باخر
خلينى اقولكم تحليلى ولكم الاقتناع من عدمه طبعا انتم احرار

ايام لما كنت فى الكليه انا يعنى تقريبا فى اواخر التسعينات الحقيقه مش عارفه ليه انا كنت فوتوجينيك بالنسبه للاخوان كل شويه الاقي واحده جايه تقولي الاخوه وانضمي لينا وكلا م من هذا القبيل  الى اكيد عدى على معظمكم ..جايز لانى كنت مواظبه على الصلاه فى المسجد كانوا حاسين انه يجى مني

المهم انه فى الوقت كان ردي عليهم دايما لما تقولي انضمي لنا ..هو من انتم ؟؟؟  بجد والله كنت اسالهم انتم مين اصلا ؟؟؟  انتم اخوان يعنى ؟؟
تتفزع البنت كانى قرصها تعبان وتقولي لا لا اخوان ايه يا ستى احنا مش اخوان ولا غيره احنا بس مجموعه من الناس معتدلين متوسطين ملتزمين بدين ربنا ...  اقوم انا اقولها يا راااجل طب ما انا ملتزمه بدينى انتى شايفه فيا حاجه غلط ولا ايه ؟؟   وغالبا بتنتهي المناقشه على انه انا مش بانضم لحد انا مع نفسي

كان فى انتخابات سنة 2001 تقريبا ؟ الحقيقه انا كنت بره مصر ما حضرتهاش حضرت بقى انتخابات 2005  واذ فجأة لقيت نفس ذات الناس الى كانت بتقرصهم التعبان لما تقولهم اخوان  معلقين يافطه كبيره قدام بيوتهم ولا محلاتهم الاخوان المسلموين يهنئون اهالي المنصوره الكرام بالاسراء والمعراج (مثلا ) مع تحيات المهندس فلان الفلاني .. كده وش ؟ الاخوان المسلمين كده وش ؟؟؟

كان ايامها بقى بنتكلم عن الاشراف القضائي على الانتخابات وبنقول يا مهووون تكونش دي ضغوط دوليه ؟؟ عشان تحقيق الديموقراطيه ؟؟
بس ادورها فى دماغي لا برضه دوليه مين ..ده امريكا (باعتبارها اقوي صوت دولي )هرست العراق بكلمة  الاستبداد اكيد مش هاتتمنالنا الديموقراطيه ؟؟!!

الله هو مش جماعة الاخوان المسلمين اصلا تعد جماعه محظور عملها فى مصر ؟؟؟   الله امال ازاي الحكومه سايبنهم كده بكل بساطه ؟؟
فجاه الشوارع اتملت نفس الصور ونفس الاشخاص الى عهدتها من عشر سنين فى الانتخابات ولكن كان بيتحط بوسترات لهم وجمبها بوسترات تانيه عليها سيفين ومكتوب الاسلام هو الحل ...يعنى مش الاخوان كمان
لكن فى 2005  بقى كانت وش كده فلان مرشح الاخوان المسلمون

لا وكمان ايه ؟ مقرات ثابته وواضحه للاخوان المسلمين ومنهم واحد جنب بيتى  ويافطه كبيره ونور وهيصه !!!!

ايه ده  انا فين ؟؟؟!!!  انا كنت لسه راجعه من بره باقول يا هادي فى الدنيا هنا  ....الحقيقه حاولت افهم واسمع من الاخوان تفسيراتهم من الكبير فيهم للصغير والله  انى اقتنع بكلامهم لا ممكن ابدا وتصريحات المرشد وغيره وغيره ايه ده فى ايه ..ما لقيتش اي تفسير وقتها غير ان الاخوان عقدوا صفقه مع الحكومه

لكن الصفقه دي برضه ازاي وليه ويستفيد بيها ليه النظام ؟؟  ده كمان سابهم يدخلوا المجلس فعلا بعدد ما كانوش يحلموا به

طب استفاد ايه النظام ؟؟؟ طب الاخوان دفعوا ايه ؟؟؟؟؟

الحقيقه ما لقيتش تفسير وقتها مقنع ... لكن كان عندي قناعه تامه بان الاخوان عقدوا صفقه رغم محاولتهم لاثبات عكس ذلك بدليل واحد مين هايعقد الصفقه ؟؟ ده العريان فى المعتقل اصلا ... برضه كل ده ما يدخلش دماغي يا محترم
احدهم قالي اصل الدعوه فى الاول كانت تستوجب السريه ودلوقتي تستوجب الاعلان  عن انفسنا  والجهر !!!!  نعم ؟ لا بجد نعم ؟؟ دعوة ايه ؟؟؟ ركزوا هى دعوه ولا سياسه ؟؟؟

ومع ذلك هما فى الانتخابات  فرحوا يومين فى المرحله الاولى والتانيه وفى التالته اخدوا على دماغهم وطلعوا بالتزوير منها

ايامها فرحوا اوي برضه وقالوا  انه نصر الله والفتح  الاراده الشعبيه اختارتنا ... وقلتلهم انا عشم ابليس فى الجنه لان كل الحكايه انكم قصاد الوطني بس ..الناس لما بتختار بين الوطني والاخوان بتقول الاخوان لان مافيش غيركم على الساحه

وروحي يا ايام وتعالى يا ايام واخيرا فهمت الصفقه دي استفاد منها النظام فى ايه ... كان ايامها بقى حيلتها(جمال يعنى) استقر فى مصر  وقال امسك الحكم وعشان يكسب دعم امريكا والغرب كان لازم يرعبهم  قالهم اهو ادي الحريه والحياه الديموقراطيه شوفتم عملت ايه ؟؟؟  لو احنا سبناها الاخوان هايمسكوها وهاتبقى ليلتكم طين فى المنطقه .
الامريكان ولا غيرهم ما يهمهمش مين الى هايحكمنا ولا اخوان ولا بتنجان لكن كل الحكايه ان الاخوان  والتيار الاسلامي دايما دايما معتبر امريكا فى كفه واحده مع اسرائيل وبيعتبرها عدو بالتالي امريكا لها حق تخاف من ان الاسلاميين يمسكوا الحكم فى مصر لان ده هايضر بمصالحها فى المنطقه

كده نظام مبارك من وجهة نظري عمل صفقه مع الاخوان الى ما بيتعلموش من الاقلام الى بياخدوها واستغل مبارك الاخوان كفزاعه للغرب لكسب تايدهم ودعمهم لمخطط التوريث لحيلتها  والاخوان كسبوا برضه وقتها مقاعد البرلمان ..مكسب وهمي مالوش اي بعد  طويل المدى..عادتهم دايما يبصوا تحت رجليهم

راح الزمان وجت الثوره

الحقيقه انا فى اول الثوره كنت فرحانه جدا جدا بموقف الاخوان وباقول ايوه كده يا عاااااااطف اخيرا فهمت
كنت شايفه تدخل  الاخوان والاسلاميين فى الثوره من اولها هايكون مدعاة لاعتبار ده انقلاب سياسي ويروح قايلك الارهاب وجماعه محظوره ولم يا جدع على المعتقلات وخلصت
وفرحت اكتر بمشاركتهم فى الوقت المناسب وعجبنى ايامها تصريحاتهم الى كانت منظمه وثابته على موقفها

اينعم انا استندلتهم اووووي لما قبلوا المفاوضه مع عمر سليمان ..لما بص فى عنيهم كده فى التلفزيون وقال انا متاكد الاخوان مش هايضيعوا فرصة التحاور على المستوى ده ...بس رجعت قلت برضه هما فصيل سياسي مقهور عاش فى الضلمه سنين طويله ومن حقه يطلع دلوقتي ويدور على اثبات وجوده لان فى التفاوض معهم من قبل الحكومه اعتراف ضمني بوجودهم وانهم مش محظوره ... وخصوصا انهم خرجوا وقالوا ما اتفقناش ..فقلت ايوه كده يا وديييييع

لكن الى حصل بعد كده بقى من وجهة نظري مخزى ...بتهيئلي مافيش حد عنده مخ يقول ان موقف الاخوان دلوقتي من الثوره والثوار لا يصرخ فى وجوهنا بوجود اتفاق اوصفقه بين المجلس العسكري والاخوان

مش عيب على فكره السياسه كده صفقات ..لكن العيب يا اخوان انكم تتفقوا معاهم علينا ...العيب انكم تصموا اذانكم عن اصوات الشعب وتجروا ورا مصلحتكم كجماعه .

سؤال بس باقوله بينى وبين نفسي كتير
اما آن للاخوان وغيرهم من التيارات السياسيه ان الوحيد الذي يستحق عقد الصفقات معه هو الشعب ؟؟؟

انا عارفه انهم حاليا عندهم تخبط وده عادي ... هم دلوقتي كمن عاش فى كهف مظلم لعقود عديده وخرج لنور الشمس فجأه ...طبيعى يصاب بانعدام رؤيه وتخبط لفتره

لكن ده مش معناه برضه انهم يعقدوا صفقات على حساب الشعب ويطلعوا علينا بتصريحات يفوح منها رائحة الكذب عيب والله

بعض الناس بتقولي انتى متحامله عليهم ليه اكتر من باقي التيارات ...ردي عليهم ان اولا الاخوان المسلمين هما اهم تيار سياسي  حاليا ,, وثانيا لانهم مصرين صبغ صورتهم بالمثاليه والنورانيه ..... واظن من على لسان واحد منهم قريب كان بيقول الاخوان المسلمين تيار سياسي طاااهر ....طبعا غنيتله يا ام المطاهر رشي الملح سبع مرات
لان مافيش حاجه اسمها تيار سياسي طاهر اصلااااااا السياسه سياسه
 ده غير استغلالهم فعلا للدين بشكل سخيف  ورفع راية الاسلام وكانهم حامي الحمى
والمغالطات السياسيه وكل ما تواجههم بيافطه ولا منشور مكتوب عليه الاخوان المسلمين يقولك لا ده تصرف فردي
ولما يطلع حد  منهم تصريحات يقولوا تصريح فردي
ولما يتزنقوا يقولك اصل العاطفه  ما نقدرش نمنع جموع الناس من التعبير عن عاطفتهم
ده كلام ؟؟؟ دي مسخره سياسيه يا اخوان عييييييييب بقى انضجوا ارجوكم

دائما وابدا هافضل اقول   ان الاخوان المسلمين جماعة او تيار ولاؤه الاول لنفسه للجماعه ومصلحة الجماعه

سواء ان اداروا ذلك بذكاء سياسي ام لا

وهاقول للاخوان المسلمين انفسهم كان ممكن تكونوا فى صف الشعب وتكسبوا فعلا لكن انتم دايما تختاروا غلط

اعزائي الاخوان لقد خسرتم صوت كل ذو عقل من خارجكم والان بداتم تخسروا كل ذو عقل من داخلكم

خساره كان ممكن نكون احسن من كده يا اخوان

اسفه انى طولت  عليكم 

وكل سنه وانتم طيبين ورمضان كريم ... هاتفطروا ايه النهارده ومع مين؟؟؟ اعترفوا جميعا

هناك 9 تعليقات:

شمس النهار يقول...

صبرني عندنا يامرحبا يامرحبا

البلوووووووجر نور
ايوة كده حلال فيكي التدوين اليومي
يابنتي هنا الاصل هنا السمن البلدي والبهريز
مش تويتر ابو 140 كلمة انا بحول هناك مش بلاحق
ولا الفيس التيكااااااوااااي

:)))))))))

كل سنة وانتي طيبة وبخير وسعادة واسرتك كلها بخير
ورمضان كريم
هفطر في البيت طبعا
ماانتي عارفة كل واحدة هتفطر مع اهل جوزها :)))
لكن بكره القبيلة متجمعة كلها
وهفطر اكل رجيم فاصوليا خضرا شوفتي انا بعترف بسرعة ازاي
:)))))))

خواطر شابة يقول...

اهلا عزيزتي وحشتينا ونورتي بعد غياب
رمضان كريم تقبل الله منا ومنك صالح الاعمال هنا في المغرب الثلاثاء هو اول ايام رمضان
بخصوص موضوع التدوينة انا لاازال استرجع بيني وبين نفسي وقائع الجمعة الماضية وخصوصا شعار يا اوباما يا اوباما كلنا هنا اسامة واشعر بالقشعريرة خصوصا انني كنت منومة مغناطيسيا طيلة الايام السابقة للجمعة ببيانات التوافق والعنوان العريض للم الشمل ربي يصلح الاحوال عزيزتي

meka يقول...

السلام عليكم
الاول كل سنة و انتى طيبة عشان رمضان و كده
ندخل فى الموضوع :
اتفق معاكى فى بعض ما ذكرتيه عن الجماعة و اختلف فى نقاط اخرى .

اولا: بالنسبة للانتخابات سنة 2005 فعلا كان تواجد الاخوان بشكل رسمى قوى و لكن مش عشان صفقة . تعالى نرجع كده للاحداث المواكبة للفترة دى من تعديل دستور لنظام الانتخاب والمادة 77 و غيره .
بالفعل كان فى ضغوط خارجية و كان فى ربط بين المعونات و الديموقراطيه اللى هى مش شرط تجيب الاخوان
لو كان فعلا فى صفقات بالشكل ده ماكانش هيبقى فى تزوير فى الجولات التانية و التالتة و بالنسبة للجولة الاولى ممكن ترجعى لشهادة المستشار ابو الليل وزير العدل فى الوقت ده . و بعدين مش ممكن يكون فى صفقات و اعتقالات للقيادات بالشكل ده. اى نوع من الصفقات دى ؟
و الاعتقالات امتدت لافراد من الجماعة (منهم اصدقائى) و ماكانوش لا مسلحين ولا ارهابيين ولا الكلام الفاكس اللى اتقال عليهم .

لو هنناقش اداء الجماعة بعد الثورة . انا عن نفسى مش متفق مع قيادات الجماعة بالمرة و مش عاجبنى الاداء و برضه مش عاجبنى اتهامهم بأى حاجة . التصيد للاخوان تحديدا عااااالى جدا. لو فرد مجرد فرد قال حاجة مش هواهم الدنيا تضخمها لدرجة انها تبقى رأى التيار الاسلامى كله . و لو فادى صرح تصريح محترم يحصل حاجة من ال3 :
- ده رأيه الشخصى و مش هناخد بيه
- اسلوب ثعبانى حلزونى ملتوى و انا لا أثق فى كلامهم
- ولا كأن فى حاجة اتقالت اصلا


طيب نيجى كده لتصريحات العلمانيين اللى ماليين الدنيا تحقير لأى رأى مخالف ليهم و الاتهامات بالجهل بتتوزع بالزوفه . ده غير الاستعلاء ع الشعب و انه محتاج يطلع من وصاية النظام عشان يتحط تحت وصايتهم (باعتبار انه ما بيفهمش مصلحتة فين )

بلاش كل ده .. انت قلتى " ولكن حين يوجه اليك النقد بصفتك فصيل سياسي ترفع سبحتك فى وجهي قائلا لعنة الله على الكافرين ؟؟؟ " طيب انا مش هنتكلم على قبل الثورة . حصل ده امتى بعد الثورة ؟؟ و ايه الموقف تحديداً ؟؟

و اخيرا احب اوضح نقطة ان انتقادى لقيادات الجماعة مش معناه انى معادى للفكرة الاساسية اللى بحترمها جدا و شايف ان فى سوء تطبيق للفكرة
و مش معنى دفاعى عنهم فى بعض المواقف اللى باحس انهم واقعين تحت ظلم انى اخوانى و لو انى متربى مع الاخوان و هم اللى علمونى الدين المعتدل و انا صغير و ده فضل ادبن لهم بيه.

معلش ع الرغى ده كله :))

shimaa elkholy يقول...

شمس النهار

ميرسي يا جميل ربنا يخليكى ده نوووورك

وكل سنه وانتى بخير يارب وسلام انتى وبنوتاتك واسرتك كلها

ووحشاااااني

shimaa elkholy يقول...

خواطر شابه

حبيبتى والله وحشاااااني جدا ورمضان كريم يا قمر وكل سنه وانتى بالف خير

الحقيقه يا خواطر كلنا بقى عندنا هسهس من الى بيحصل ربنا يعديها على خير

shimaa elkholy يقول...

ميكا

يا فندم هنا الموطن الاصلي للرغي ارغي براحتك

ثانيا انت نورتنا وشرفتنا بالزياره الاولى

ثالثا بقى ندخل على الخناقه هههههه


اولا : ايه المشكله ان حصلت صفقه والاخوان كالعاده اخدوا على قفاهم وفى الاخر الانتخابات اتزورت بعد ايه ؟؟ ما قالوا للعالم كله فى الجوله الاولى والتانيه كمان كانت نص نص اهوووووو لو اديناهم ديموقراطيه الاخوان الى بيكرهوكوا هما الى هايجوا هااااا هاتخليكوا معانا ولا نسيبهم

ولحقوا نفسهم بقى فى المرحله التالته وقالوا للاخوان العبوا بعيد

ثانيا اظن معروف تماماااا بين الى بيدخلوا المعتقل ان حتى لو فى صفقات بيكون من ضمنها تحمل المعتقلات دي عااادي ويقولك هو الشغل كده

وبرضه الاخوان كالعاده قبلواالصفقه وطلعوا بكل هبل حطوا رقابتهم تحت ايد امن الدوله ووقت اللزوم قاله انت بتتكلم ليه انت محظوره اصلا تعالى هنا بقى على المعتقل يا صغنن

وان لم يكن ادينى حضرتك تفسير منطقي ومعقول يقولي ليه الاخوان طلعوا بشكل رسمي فى الانتخابات يومها؟؟؟

shimaa elkholy يقول...

اما بالنسبه للتصريحات بتاعة الاخوان فمعلش يعنى مش معقول ابدا يطلعلي واحد كل شويه يقول انه اخواني ويقول كلام فارغ وبعدين يقول ده كلام شخصي

هو انت كقائد جماعه مش عارف تمشي الناس بتوعك انت عندك مشكله فى الاداره بقى

ومين الى بيستعلى على الناس بس ده الاخوان اساتذه فى الاستعلاء بس من ناحية تانيه الدين بقى انت مين اصلا وتعرف ايه ودارس ايه

وزي ما قلتلك التصيد للاخوان من وجهة نظري او بشكل شخصي لانهم يدعون الطهر وبيتلزقوا فى الدين وتعالى ناحية الدين فى اي وقت وقل القل تلاقينى بادبح الله اكبر على طول

بالنسبه للعلمانيين ولا مش عارف مين ياعم صدقنى انا اي حد بقع تحت ايدى يقول كلمه ما تعجبنيش ما با عديلوش لان انا اصلا مش تبع اي فصيل سياسي ولا فكري انا مع نفسي

shimaa elkholy يقول...

اما بالنسبه للتصريحات بتاعة الاخوان فمعلش يعنى مش معقول ابدا يطلعلي واحد كل شويه يقول انه اخواني ويقول كلام فارغ وبعدين يقول ده كلام شخصي

هو انت كقائد جماعه مش عارف تمشي الناس بتوعك انت عندك مشكله فى الاداره بقى

ومين الى بيستعلى على الناس بس ده الاخوان اساتذه فى الاستعلاء بس من ناحية تانيه الدين بقى انت مين اصلا وتعرف ايه ودارس ايه

وزي ما قلتلك التصيد للاخوان من وجهة نظري او بشكل شخصي لانهم يدعون الطهر وبيتلزقوا فى الدين وتعالى ناحية الدين فى اي وقت وقل القل تلاقينى بادبح الله اكبر على طول

بالنسبه للعلمانيين ولا مش عارف مين ياعم صدقنى انا اي حد بقع تحت ايدى يقول كلمه ما تعجبنيش ما با عديلوش لان انا اصلا مش تبع اي فصيل سياسي ولا فكري انا مع نفسي

shimaa elkholy يقول...

اما المواقف يا سيدى الفاضل قبل الثوره وبعد الثوره كتييييييير وما تعدش ومافيش حد فيهم بادخل معاه فى نقاش الا لما يروح لابس الحته المقطعه ويقولك احنا ياما اتعذبنا وياما جرالنا وياما وياما وهوب ويروح ماسك السبحه ويقولك احنا اصلا ناس لا نبغى دنيا وانما نبغى اخره والى اخره من الكلام الى بيتوهوا به الناس

وبعدين هو ايه الفرق بين قبل الثوره وبعد الثوره عند الاخوان مش فاهمه

وبرضه مش عشان انا بانتقدهم يبقى انا متعارضه معاهم على طول الخط اولا احترمهم او او اطلاقا لكن من حقي اسجل اعتراضاتي