الأحد، 24 فبراير 2008

6-خلى بالكم من دخان الطبيخ

السلام عليكم . ازيكم يا قطاقيط ؟ اه اه قطاقيط افرحوا بشبابكم شويه . ايه رايكم فى العنوان اول مره اختار عنوان بوست قبل ما اكتبه .
تفتكروا ايه اهمية دخان الطبيخ عشان نخلي بالنا منه شوفوا أنا عايزه اكلمكم عن المرأه النص الحلو فى المجتمع - اه حلو مش عايزه ولا كلمه - وهاقول كلمتين لكل البنات والستات يحطوها حلقه فى ودنهم . وكلمتين للرجال برررررضه يعلقوها فى الموبايل حتى ما لناش دعوه .

يا نساء العالم اياكم والتنازل عن انفسكن . التنازل ؟؟؟ اه اوعي تتنازلي عن نفسك . عارفه بتتنازلي ازاي ؟؟؟ انك تلغي شخصيتك ووجودك وتنسيهم وتذوبي فى شخصيات اخرى تحبينها اكثر من نفسك . خلى بالك اوي كل الناس هاتشجعك اوي وتقولك برافوا عليكى حتى لو ما كانوش هما الي انتى تنازلتي لهم عن نفسك ( ناس بتشجع كده وهى مش غرمانه).
طبعا تسألى من دوووووووول الى اتنازلت انا هنا اهو لسه . هاقولك مين بتحبيه اكتر من نفسك ولادك وجوزك وبيتك . اه ده كلام حلو اوي هما على راسنا بس وانتى محتفظه بنفسك .

ازاي تحتفظي بنفسك ؟؟؟؟
سؤال مهم برافوا عليكى . اقولك ازاي طبعا مش هاقولك الكلام الفارغ بتاع الناس الى بيجوا يجعجعوا بكلام سطحي ومتخلف . ( الى هو حافظي على رشاقتك اهم حاجه ومظهرك وسايري الموضه وما تبقيش معقده وريحة البصل وسمنتك فى الاكل كتير وكده يعنى) فكر الاعلام الهابط المسيطر على المجتمعات العالميه كلها .

لا اهم حاجه ان مخك ما يصديش . ما تخليش دخان الطبيخ يعمل غيامه على عقلك . اه بعيد عنكم دخان الطبيخ ده اثره وحش اوي لما ما تلمعيش مخك منه يا لهوي بيعملى بلاوي .
مش هاقولك بقى لازم تشتغلي وتحققي ذاتك وحقوق المرأه واخلعي جوزك وارمي عيالك فى الملجأ لا لا خالص . ياما ستات بيشتغلوا وموظفات لهم سنيييييين طويله لكن برضه ما بيشيلوش اثر الدخان بالعكس بيدخل عليه بقى كمان غبار الشوارع بيعمل بلاوي . لان طبعا انتم عارفين ان اغلب الوظائف الحكوميه مافيش فيها شغل اصلا ولاابداع ولا اي جديد بيروحوا يفطروا ويكتبوا ورقتين على الكمبيوتر يغلطوا فيها ويفكروا بقى هايروحوا امته وهياخدوا الحوافز امته .

لكن هاقولك خلى بالك من عقلك شغليه فى اي حاجه . اي حاجه غير الطبيخ والعيال والبيت وحلة الباميا باللحمه الضاني الى فى التلاجه .اعملي اي حاجه اقري فى اي كتاب شوفي برامج ثقافيه محترمه مش بس تسمعي الشيخ سالم بتاع قناة الناس . ولا تعيطى قدام حسان وهو بيدعي لا مش ده تشغيل المخ برضه .
بصي قطعي نفسك واعملي كل شيء فى الدنيا عشان تحتفظي لنفسك بساعه مثلا او نص ساعه حتى يوميه او حتى غير يوميه على فترات كوني فيها نفسك. اعملي اي حاجه بتحبيها وفكري وخلي لك راي ما تتنازليش عن رايك ونمي فكرك .
عارفه لو استسلمتى للمجتمع ككل من أول امك وزوجك واولادك وأصدقائك الى يمكن يقعدوا يعددوا مشاكلهم وينوحوا على ما اصابهم وفى الاخر يقنعوك ان الناس كلها كده بمعنى استسلمي ؟؟؟ عارفه ايه هايحصل ؟؟؟ بعد فتره طالت او قصرت هاتكون قالبا فارغا الا من القلب الذي احب من تنازلت لهم عن نفسك . وهاتبقي ساعتها مش قادره تسايريهم ولا تتكلمي معاهم حتى جوزك هاتلاقي نفسك بعيده عنه هو تفكيره اتغير ونمى مع الزمن والخبرات المختلفه وانتى زي ما انتى. وصدقينى هاتلاقي نفسك غريبه وسطهم وتلاقي الدنيا فضت حواليكى .
ناس كتير هاتعارضني وتقول احنا بنحب امهاتنا حتى لو كانوا مش بيعرفوا يقروا ويكتبوا اها بس بتحبها حاجه وتشاركها حياتها حاجه تانيه . لازم يكون لك اهتمامتك الخاصه الى تملي بها حياتك لما تفضى او تكاد تكون فاضيه .
ومش فاهمه ليه بنقول شعارات وبس من غير ما نفكر فيها زي التضحيه المطلقه وان الامومه انك تكوني لا شيء الا الام حتى انهم بيغفلوا دور الزوجه ودي مشكله كبيره . بيركزوا على دور واحد وهو الام مع المفروض ان الشخص ممكن يلعب ادوار اجتماعيه متعدده وده الصح والطبيعى .
والى تقولك مش مهم انا كفايه عليا اشوف ولادي كويسين وناجحين ؟؟؟!!! طب ليه ما يكونش انتى وهما ناجحين ؟؟؟
ليه تتنازلي عن نفسك بغير سبب ؟؟؟!!
مش معنى كده انى بانكر دور الام ولا تضحيتها لكن مجرد انها تربي ولادها اساسا بتضحي كتير . لكن لو فكرت مجرت تفكير فى تقدير ذاتها واستكمال عناصر شخصيتها هاتلاقي الى بيعارضها .
زي كتير من الناس ما بتقولي بدل ما انتى قاعده هنا روحي شوفي ولادك ؟؟؟!!!! هل معنى وجودي على النت اكون انا مش عامله كل واجباتي ومسؤلياتي ؟؟؟
ليه مش بيقولوا كده للستات الى بيشتغلوا شغل مالوش لازمه ؟؟؟ عشان بتاخد مرتب اخر الشهر ولا عشان الاعلام بتاعنا سقانا ان عمل المرأه حق مكفول لها . حتى لو كانت مش محتاجه المرتب؟
وليه مش بيقولوا كده للستات الى قاعدين متابعين كل المسلسلات الى فى الدنيا لدرجه ان واحده مره قالتلى انها متابعه 16 مسلسل ؟؟؟؟ تخيلوا ؟؟؟ اه والله العظيم كنا فى رمضان ومش واحده بس والله ناس كتير .
كمان مش معنى كلامي انى مش عايزه الستات يهتموا بمظهرهم لا طبعا بالعكس لكن مش هى دي المشكله اطلاقا لا الجمال ولا الميك اب ولا الموضه ولا اختفاء ريحة البصل هو الى هايخليكى شخصيه قويه ومحترمه وجميله وذات كيان وراي يحترم . انما طبعا لازم تهتم بنفسها وشكلها لكن مش بس شكلها هو المشكله .

ده كله كان الحلق بتاع الستات لسه الميداليه بتاعة الرجاله .
ارجووووووووووكم بلاش تلغوا شخصية الست لانكم انتم الى هاتندموا . وانت عندك 25 سنه عايز تحس انك بقيت راجل وتبقى انت كل شيء . وتبدأ بقى من اول الخطوبه . انتى بتدخلي النت ؟؟؟ لا بلاش النت فيه ناس مش كويسه .
انتى بتخرجي مع فلانه ؟؟؟ لا بلاش مع فلانه ولا غيرها لما تحبي تخرجي قولي وانا اخرجك يا ستى انا عنيه ليكى ( ده عنيه دي عشان الخطوبه بس ) الى اخره .
ندخل على الجواز : انتى رايحه عند خالتك فلانه تزوريها ؟؟ لا مالوش لازمه كلميها فى التليفون كفايه بصراحه كده انا مش باستريح لابنها . مش ده الى كان عايز يخطبك ؟؟؟
(مع انه هو طبعا بيدخل النت وبيخرج مع اصحابه رغم انه عارفه ان الواد فلانه ده واد بتاع بنات ووحش بس مش مشكله وبيزور عمته الى كان بيحب بنتها قبل ما يقلبها لما دخلت كلية طب وعقدته ). عااااااااادي
خلفت : مالوش لازمه الشغل جايلنا منه ايه مرتبك صغير هايروح على لبسك وحضانة للبيبى خليكى فى البيت احسن ومش هاينقصك حاجه . جيم ؟؟ جيم ايه يا ستى انتى كده حلوه عاجباااااااااني . .............. الخ .
وهكذا تبدأ انت فى امتصاص شخصيتها ومسخها وتخليها ولا حاجه لا فكر ولا شخصيه ولا جديد ولا اي حاجه بعد ما يبقى عندك 45 سنه تكون هى بقى مثلا 40 او اقل او اكثر وعندها 3 او 4 عيال . ودخان الطبيخ اشتغل تمام معاها .
وانت فكرك اتغير جدا وبعد ما كنت محتاج زوجه وحبيبه وام لاولادك الصغيرين . بقيت محتاج كمان شريك وصديق بعد ما اتفرقوا الاصدقاء القدامي وبقت علاقاتك شبه سطحيه بالناس . وتتلفت بقى ما تلاقيش غير زميلتك فى العمل الى عندها شخصيه وراي وحكمه وزوق وشايفه نفسها من كله وبتفهمك وبتلاقي عندها جديد وتلاقي عندك جديد وتبدأ دايره تبشر بمشاكل لا حصر لها . نداااااء ( احتفظ بشخصية زوجتك ونميها ده لا ينقص من قدرك ابدا لكن حافظ عليها واحميها فى الاخر هى لك واوعى تقطع حبل الاتصال الفكري بينك وبينها عشان ما تندمش ).
وكفاااااااايه بقى عشان هاتخنقوني .
والبوست ده اهداء الى صديقتى الى أخدت منها كلمة دخان الطبيخ والى نفسي تحاول تلمعه كل فتره ونفسي اشوفها .
وانا كتبت دلوقتي مخصوص عشان خاطر اثنين عزاز عليا في الشات الى بادخله وبيشرفوني هنا كتير هما ( على بالي - وندى)

هناك 5 تعليقات:

Anonymous يقول...

بسم الله الرحمن الرحيم
يحلى الكلام ويعبر القلم عن واقع نعيشه ولا زلنا نعاني منه نحن العرب والسؤال لماذا ؟
انا بقلك اذا عرف السبب بطل العجب واحب اقول لك اجمل واروع مدونه ولكن فيها شويت معانات وياس وقولها لك بجد.

الأمل هو انشراح النفس في وقت الضيق والأزمات؛ بحيث ينتظر المرء الفرج واليسر لما أصابه، والأمل يدفع الإنسان إلى
إنجاز ما فشل فـيه من قبل، ولا يمل حتى ينجح في تحقيقه.
وما أروع الأمل والتفاؤل، وما أحلاه في القلب !وما أعْوَنَه على مصابرة الشدائد والخطوب، وتحقيق المقاصد والغايات
لا أعرٍفُ اليأسَ والإحباطَ في غَمَمِ يَفيضُ من أملٍ قلبي ومن ثقةٍ لا يُنبِتُ اليأسَ قلبُ المؤمنِ الفَهِمِ اليأسُ في ديننا كُفْرٌ ومَنْقَصةٌ

صبرني يارب يقول...

اخي الفاضل غير معرف والى من لهجته اعتقد انه الاخ ابو مشعل والله اعلم

شرفت المدونه وشرفتني ومش عارفه ايه الى اوحى لحضرتك ان انا يائسه او مش تفائله .
لكن الحمد لله تعالى انا مش كده خالص والحمد لله راضيه وسعيده بحياتي والبوتس الى حضرتك معلق عليه لو كان هو المعنى بتعليقك فأنا باوجه نداء للستات انهم ما يهملوش عقلهم ليس الا .
وشكرا على تشريف لنا يا اخي الفاضل

Anonymous يقول...

السلام عليكم يا صبرني

إيه يا ستي الكلام الكبير ده كله

الكلام ده كان زمان أيام سي السيد الله يرحمه ويمسي عياله بالخير

دلوقتي الست هي اللي شغالة على ودنه ومطلعة عين الراجل الغلبان

روح تعالا روح تعالا

هو ده سبب انهيار الأسر دلوقتي

بس عندك حق برضه لازم الست تكون مسايرة ومخها بيلمع وبيبرق لأني واحد من الناس بأعجب جدا وبانجذب للشخص الذكي

سواء راجل أوست مش مهم

وعلى فكرة يا صبرني ياما في ستات مش متعلمة أصلا

وبيوتها ماشية زي الفل ودماغها بتبرق مهنية جوزها وعيالها

وفي ست متعلمة ويمكن متخرجة من طيب ولا صيدلة كمان

ومطلعة عين 0000 (( بلاش )) الراجل
ومبهدلة عياله لأن ما عندهاش وقت
ومزدة حكاية استقلال النفس دي وفاكرة أنها لما تعند مع جوزهايبقى هي شخصية وذكية جدا

بتخرب بيتها بنفسها

على كل مرة تانية أتشرف أني رديت على المدونة

وأشيلك البرناطة تحية لدماغك العالية



التوقيع \\\\ THE WHITE KNIGHT

صبرني يارب يقول...

وايت يا منورني بالقوي

الحكايه مش حكاية تعليم ودرجات تعليم الحكايه .
انا باقول انها تكون لها وقت تهتم به بفكرها وشخصها بصرف النظر عن كونها معاها صيدله ولا ابتدائيه قديمه .

وبعدين انا كاتبه المدونه دي للناس الى بتعرف تفك الخط بس التانين يسمعوها بقى في الراديو يا وايت
وشكراا لك يا باشا

nona elsha3nona يقول...

فعلا يسلم ذوقك وكلامك