الثلاثاء، 26 فبراير 2008

7- ساحرة القلوب غائبه

بسم الله الرحمن الرحيم
 بعد ما احتارت وحيرت الناس معايا عشان اختار موضوع للبوست . كالعاده لما بدأت اكتب الهام جت فجأه وقالتلى اكتبي عن بياع الفاكهه الى تحت البيت عندكوا . ( الهام دي الى كل الكتاب والناس دي بيقولوا عليها يعنى اشمعن انا )
ماله بقى بياع الفاكهه الى تحت بيتنا ؟؟؟ الراجل كتر خيره وشه سمح سماحه - اللهم احفظنا -مافيش بعدها سماحه مع انه واخدها - المطوه يعنى- عياقه كده فى خده بس عادي كل ما انزل اشتري من عنده لازم يحصل بينا مشاده كلاميه على الاقل بسبب خلاف فى وجهات النظر لانه معتقد اني حوله ومش شايفه التفاحه البايظه والبرتقاله الضاربه الى حطها فى الكيس . لكن انا مش حوله الحمد لله او لسه ما بقيتش .
لكن بقى انا عجبنى حاجه فى الاخ الى واخدها عياقه فى خده انه دايما تلاقيه منظم الفاكهه بتاعته وحاطط الفاكهه الحلوه السليمه الملمعه دي فوق كده ومخبي الضاربه تحت . انما ابراز الشيء الجميل ده حاجه عظيمه فلسفه عليا .
الاخ ده بكل بساطه بدل ما يقف يقول باثنين جنيه تعالى يا بيه . وفر على نفسه التعب وخلى البرتقال الحلو على الوش يتحدث عن نفسه وكتب عليه يافطه بالسعر ( بس مش هو ده السعر الى هاتشتري به ده سعر القفص البايظ الى وراه) .
طيب زهقتوا من اقفاص ا لفاكهه نشوف الرابط العجيب بين اقافص الفاكهه والاقفاص الصدريه ؟؟؟!!!!
السؤال ::: احنا ليه عندنا مشكله فى التعبير عن المشاعر والحاجات الكويسه ؟؟؟؟ انما لسانا 3 متر لو كنا عايزين نقول لحد انت مال عنيك باصه لبعضها ؟؟؟ وبكل شجاعه وهمه نقووووول : أنا اقول للأعور انت أعور فى عينه( أحيانا باعتبرها بجاحه مش صراحه) . طب ليه كمان ما تقولش للي عنده عنين اثنين انت عندك عنين جميله ربنا يحمي ؟؟؟؟!!!
عارفين ايه الكارثه فعلا ؟؟؟ ان الى انا باقوله ده بيحصل بين ناس المفروض يكونوا اقرب ما يكون لبعض، الازواج مثلا !! بين الاب واولاده !!!! والام واولادها !!!! حتى والله والاصدقاء والقرايب !!!! تلاقي مافيش تعبير عن موقفك ومشاعرك الحقيقيه الحلوه لباقي الناس السلك بيجى لحد الكلمه الحلوه ويقطع .
بالله انا مره واحد بيشتكى من مراته انها دايما متذمره وده بيضايقه وعندها احساس ان هو مش عاجبه حاجه ابدا . قلتله: وهو انت فعلا مش عاجبك العجب زي ما هي بتقول ؟؟؟ قال : أبدااا. قلت انا : طب هى جابت الاحساس ده منين ؟؟؟ هو : مش عارف .أنا: طب انت مبسوط منها ؟؟؟ حضرته : اه الحمد لله، فى حاجات بتضايقنى منها ساعات لكن فى المجمل هى كويسه . أنا وأنا عارفه الاجابه : طب انت عمرك اظهرت فرحتك بحاجه كويسه فيها زي ما بتظهر ضيقك من الحاجه الى بتضايقك ؟؟؟ قالي ( وده الصريح كمان والله) : مش عارف . قلت: إعرف الاول وبعدين لوم عليها .
حاجه تانيه شعور غريب عند كل المراهقين ان اهاليهم مش طايقنهم طب ليه ؟؟ سن صغير جواه طفل مش عايزه يظهر محتاج مشاعر اهتمام من الاخرين لكن فى السن ده بيبدأ الاهالي يبعدوا عن عيالهم عاطفيا وشويه شويه يبقى من المستحيل ان الاب او الام ياخد ابنه فى حضنه. وبعد مناقشات مع الطرفين وضغط عليهم شويه لقيت المشكله انهم بعد سنوات جفاء مكسوفين يعبروا عن المشاعر الحلوه الى جواهم وبيسقطوا ده على الطرف الاخر وجفاؤه مع انه هو كمان له دور فى الجفاء ده .
أرجووووووووكم يا جماعه نكلم بعض كلام حلو ونزوق كلامنا زي ما عمو بتاع الفاكهه بيعمل مش هايحصل حاجه ممكن نتكلم عن الوحش بس عن استحياء وبرفق وبهدوء( زي بتاع الفاكهه برضه الى بيدبس الناس فيها وهى مش حاسه لكن هايشوفوها برضه لما يروحوا ) وفى وقت مناسب من غير ما تخلي الى قدامك يكرهك ويكره نصحيتك خليى دايما الحلو يبقى على الوش ويبان اكتر .
فيه مسلمات اه . زي مثلا واحد يقولي هو فى حد يكره ابنه المفروض هو يعرف كده ؟؟؟؟ وواحد يقولي هو انا عشان مراتي تصدق انى باحبها افضل رايح جاي اقولها باحبك ؟؟؟ ما هى عارفه . بينى وبينكم وكلام سر الناس دي الى بتقول الكلام ده هاتموت وتسمع كلمه حلوه . بس مش عارفه زي ما بيكونوا مكسوفين يسمعوا ومكسوفين يتكلموا .
هو الكلام الجميل والتعبير عن المحبه وتعديد محاسن الناس كلما سنحت الفرصه بقى يكسف ؟؟؟؟؟
اشمعنا لسانا طويل فى تجريح بعض وما بنتكسفش وتندب في عنينا رصاصه ؟؟؟
عشان خاطري حتى لو بتتكسف او بتتكسفي جاهدوا نفسكم ودربوها عادي هايجى منها والله واتكلموا قولوا الى في نفسكم انتهزوا الفرص .
عارفين الازواج الى بيفتقدوا النقطه دي ؟؟ هما الاثنين مقصرين طبعا لان مافيش علاقه بتبوظ بسبب طرف واحد لازم يكون الطرف التاني كمان غلطان ولو بسلبيته . فى الاخر بقى كل واحد فيهم يبقى عنده جفاء من التاني حتى لو الطرف التاني حاول يقرب بينفر هو على سبيل الدلال مثلا او الاعتداد الزائف بالنفس او الهبل حتى مش مشكله . انما المشكله بقى ان ممكن الزوج الى كلامه بقى جامد جدا مع زوجته كلامه يبقى حاجه تانيه خالص مع زميلات العمل وده يجننها اكتر وتقولك ما هو بيعرف يطبخ القرع اهو جت لحد انا بقى ؟؟ وهو كمان يسمع ضحكها فى التليفون مع صاحبتها حتى يقول اه اضحكي يا اختي البوز ما يطلعش الا ليا انا !!!!!!! واه لو سمعها بتقول لامها ما اتحرمش منك يا ماما ........ طيب يا اختي خليها خليها تنفعك . سلسلة من الحاجات الى تخلي الحياه سوداء وتنذر بوجود بركان تحت الرماد .
قول لمراتك انتى احلى واحده فى الدنيا . قولي لجوزك انت اعظم واحد في الدنيا . قول لابنك انا بافتخر بك وباحمد ربنا انك ابنى . قول لامك وابوك لولاكم عليا كنت ولا حاجه وبوس اديهم . قول لصديقك انا ربنا كرمني بك وباعزك زي اخويا . مش مره لا مليون مره( العمر طويل ) كلما سمحت الظروف بالعكس ترصدها كمان واتصلب عشان تقول كلمتين حلوين . الكلمه الحلوه هى فعلا ساحرة القلوب . بس نتعلم فنها ومش بيجى مره واحده انشاله تتعلم فى عشر سنين المهم النتيجه .
صدقنى حياتك هاتتغير . هاتقول كلام جميل وتسمع كلام جميل اوي . جربوواااااااااااااا .
انتم لسه هناااااااا ؟؟؟ يلا كل واحد يفكر هايعمل ايه لما يروح .
وياريت لو كلامي اثر بالايجاب على اي حد فى حياته يقولي ولو فى ودني اصل ما تعرفوش قيمتها ايه عندي .
وأشوفكم على خير وسعاده يارب
وما تكتمش ابدا الكلمه الحلوه . الكلمه الحلوه أكبر ساحره للقلوب .

هناك 13 تعليقًا:

ahmed_k يقول...

فتح الله عليكي فعلا الكلمه الحلوه ساحرة القلوب وكثيرا ما نفتقد دفئ العلاقات الأسريه بسبب الخشيه من اظهار الحب لبعضنا قد يكون خوفا من ردة الفعل او اظهارنا في موقف الأضعف ومن ثم يأتي الندم حينما يفقد الشخص احد احبابه ويقول يا ليتني عبرت له عن مدي حبي له او يا ليتني قضيت معه وقتا اطول اتقرب منه ولكن حينما لا ينفع الندم شكرا لكي ام خالد ووفقكي الله ويا ريت تشرفونا ونراكم في الغردقه (عروس البحر الأحمر)

صبرني يارب يقول...

الله يفتح عليك انت يا اخ احمد ويكتبلك كل خير ومش عارفه من غير تنويرك المنتدى والتعليقات كنا نروح فين .
عشان انا ما حدش بيسال عني بيقروا المدونه ويكسلوا يردوا اصلا . وممكني تلاقيهم جايني بقى على الشات او الاميل يناقشوني هناك .
الله يبارك فيك على الدعوه الجميله واحنا الى نتشرف بيكم والله وياريت نعرف نيجى الغردقه بس بلدكم بعيد اوي اوي عننا .
لكن من الاماكن الى نفسي اروحها نوعدك لما نلاقي رجاله يشتغلوا معانا عشان ما عادش ونكون مستقرين فى الشغل اننا نحاول نصيف فى الغردقه او نشتي حتى مش مشكله .
انما حاليا مش عارفين نروح شربين حتى ههههههههههههههههههههه
شكرا لك يا اخ احمد ونورت

ahmed_k يقول...

اشكرك يا اختي علي اطرائك بس مقولتيش ايه رايك في تقييمي لموضوعك(ساحرة القلوب غائبه) مع خالص الشكر والتقدير

صبرني يارب يقول...

استاذنا العزيز أنا متفقه تمام معاك فى رايك عن الساحره الغائبه لى تعليق واحد على من سيقرا تعليقك لو اعتقد ان فقدان احد الاحباء فقد بوفاته مثلا ده مش صح لانك ممكن تفقد احبائكم وهما حواليك وقدايم عينك لكن ابعد ما يكونوا عن نفسك وانت ابعد تكون عن نفسهم حتى وان أحبوك.
وشكرا لك على المتابعه الجميله اوي

Hassan يقول...

salamo 3alekom , okht sabany

walahy laqad asabty bayt el qaseed.mogtama3nah el masry we shar2ee 3omoman mabya3afsh ye3abar 3an masha3roah. gayz kol taaf byftaker en el ta3beer 3an el masha3r el 7elwah, dda3ff.fa beltaaly bykbetha gewah. we dah byzee 7alaat el tagafy fee kol el 3elaqaat el ensanyah soaa2 ban el 2ab we ebno 2awo el om we bentaha 2awo 7atah e zoog we zogto.wel 7al bel nesbaaly howah fel tadreeb el omtakaer we tadegy 3an el boo7 bel masha3eer el 7elwah.zay maben2dar neza2a22 we net7'ane2 bel tadeeg hana2dar kaman nefa7 we ne3abar 3an fara7nah.dah kan ra2yee.gazaky alah 7'eer
Hassan
Norway

صبرني يارب يقول...

الاخ حسن والله حضرتك نورت جدا ومتفقه معاك تماما فى رأيك . مافيش حل لاننا نذيب الجليد غير اننا نذيبه قطره قطره والا نغرق فيه لو حاولنا نذيبه دفعه واحده . لازم نتدرب ونحاول واحده واحده مش احنا بس احنا والطرف الاخر سواء بالاتفاق الصريح او الضمنى معاه .
وشكرا ونووووووووورت

Anonymous يقول...

السلام عليكم تالت مرة يا صبرني

على الله ما تكونيش زهقتي مني كل شوية داخل

بس أنا مش مصدق نفسي رديت على موضوعين

وده التالت ما تحسدنيش بقى

المهم كلام جميل بس فين التنفيذ ربنا يستر والناس تاخد بكلامك

على فكرة تالت مرة أقولك كلامك صح مية المية

على كل للأسف احنا صراح أوي في الغلاسة

ومكسوفين أوي من الكلمة الحلوة بس أرجو أن اللي قلتيه أنفذه انا شخصيا

وإن كنت بأنفذه من حين لآخر عشان ماأنساهوش

يعني مع الجميع سواء والدي أو والدتي أوأخواتي أو صحابي

بس الأهم أحيانا بقولها تقضية واجب وخلاص
متهيألي لازم أتدرب على خروجها من قلبي للناس اللي بحبهم وبعزهم


يا صبرني بالمناسبة كنت عايزك تعرفيني على إلهام دي

شكلها طيبة وبنت حلال

تحياتي ليكي يا صبرني


التوقيع \\\\ اللي مطلع عينك تالت مرة في يوم واحد THE WHITE KNIGHT

Anonymous يقول...

نسيت أقول حاجة يا صبرني

بس جت على بالي دلوفتي

أحيانا بيكون السبب أننا مش بنطلع الكلمة الحلوة أننا نصادف ناس تكون متعتهم أنهم يأذوا الآخرين ويوقعوهم

والواحد بيتصرف معاهم على هذا الأساس

يعني لازم تتعامل معاه بطرقة معينة ترد كيده وألاعيبه

وللأسف قابلت كتير من العينة الغريبة وفي الحالة دي تكون الكلمة الطيبة أدامهم (( على الأقل من وجهة نظري )) ضعف

لازم نعاملهم بشدة معينة

فأحيانا الواحد بيعيش الدور ويفتكر ان الناس كلها من العنية الغريبة إياها

بس الحمد لله بالنسبة لي كل شيء انكشفن وبان وبقيت عارف مين اللي يستاهل ومين مايستاهلش


دي فكرة كانت محشورة في زوري قلت أطلعها

أشكرك مرة تانية يا صبرني وربنا يزيدك


برضه التوقيع // THE WHITE KNIGHT

صبرني يارب يقول...

اه نسيت اقولك سلامة زوووووورك انت تقول هنا كل الى يطلع على قلبك ولا يهمك شكرا لك يا وااااااايت

صبرني يارب يقول...

وايت نايت

أنا باقول نعبر عن الاحساس الحلو الى جوانا مش الوحش بس .
واكيد لو جواك احساس ايجابي من ناحية حد هايبقى حد كويس او على الاقل فيه حاجه كويسه .
وما دام الحقيقه انه عنده حاجه كويسه يبقى من الحق انك تظهر له انك شايفها .
ويمكن لو حصل ده تغيره على الاقل من ناحيتك وتخليه بنى ادم تاني ولو حتى معاك انت .
الكلمه الطيبه صدقه يا واااااايت بلاش بخل .
اماان الكلمه الحلوه ممكن تكون ضعف بتهيئلي فى ظروف خاصه جدا ومجال ضيق جدا لكن بيرجع الحكم فيها للذكاء الاجتماعي للفرد .
ونوووووووووووورت

NOur يقول...

بجد هااااايل جدا يا ((صبرنى؟!!))
كلامك انا حاسة بيه اوى
و انا فعلت وصلت للأسف للمرحلة اللى كنتى بتحذرى منها ..
كتير أوى بيكون جوايا مشاعر جامدة جدا لأقرب الناس ليا زى ماما او بابا و مبعرفش اطلعها لانى مش متعودة معاهم على كدا .. و كان نفسى بجد حياتى تبأة غرقانة أكتر من كدا ف الحب الظاهرى الصريح بمعنى انى اصحى الصبح أحشن ماما و بابا و يحضنونى و انا خارجة ماما تقوللى ايه القمر دا و انا داخلة انام تبوسنى و هكذااا

و اكتشفت انى مفتقدة الفيلد دا خالص ف حياتى مع كل الناس مش بس ماما و بابا

و بالتالى دا سببلى نوع من الفراغ العاطفى احيانا و خلانى بفرح لما بتتقاللى كلمة غزل لأنى مش متعودة عليها

بس بجد انا نويت دلوقتى احاول ابدأ اخرج اللى جوايا دا و أعبر و أتكلم ع الاقل مع اصحابى أو لما تعجبنى حاجة أقول انها عجبتنى يمكن ربنا يصلح الحال

صبرني يارب يقول...

نور
ايه النور الى هل علينا ده يا نور

حبيبتى حاولي كمان مع ماما وبابا واخواتك ابدأي الاول كده بحاجه بسيطه بعدين الباقي يجي واحده واحده .

ولا تيأسي لو صدوكي زي ما قلنا الجليد الى كونه السنين مش ممكن يسيحه لحظات من الدفيء
لازمله ساعتين ثلاثه دفى
ومستنيه منك تقوليلى عملت بالبوست بتاعك عشان اعلق ردك على جدران المدونه
ونورتي

nona elsha3nona يقول...

شوفى بقى بما ان ده آخر طلب ليكي متكتنمنش ابدا الكلامه الحلوة فطبعا انا لازم اقولك ان اسلوبك حلو جدا فى الكتابه
والموضوع ده كمان صح جدا محدش بيقول فلان بيعمل حاجات حلوه وكان ده الطبيعي لكن اللى مش طبيعي ان انا لازم اقول لفلان انت بتعمل وحش