الأحد، 2 مارس 2008

9-اتجوز تاني وما تصدعناش

السلام عليكم ورحمة الله وبركاته

أنا جيت اخيراااااااااا . طبعا فكرتوني مت او تهت وانا جايه او دخان الطبيخ كتر عليا ؟؟؟ لا الحمد لله انا لسه متواجده بس كان عندي شويه حاجات كده باخلصها على السريع. هاتتعودوا على اختفاءاتي كتير ده عادي. بالاضافه الى التواجد المستمر لاولادي الهاديين جدا فى البيت يومي الجمعه والسبت بيبقى جو ملائم اوي للتركيز.



لحد دلوقتي مش عارفه لسه أنا هاتكلم عن ايه ؟؟؟؟!!! شويه كده يمكن الهام تاهت وهي جايه .......!!!!!

اخيرا جاتلي فكره بس مش من الهام دى من الذاكره لانى كنت ا تكلمت عنها قبل كده فى منتدى مش فاكره ايه ولا فاكره قلت ايه لكن تعالوا نرغي حولها .
شوفوا هو الموضوع متعلق بالزواج التاني لكن بقى مش بموقفي تجاهه ولا بتفحيصه وتمحيصه وموقف الدين منه والكلام الذي قتل بحثا ده .
لا انا بقى عندي نقطه معينه ومحدده عايزه اتكلم فيها :
ليه الرجل مهما كانت ظروفه وافكاره ومشاكله بيداعب خياله دايما الزواج التاني ؟؟؟!!!!

مش فاهمين قصدي صح ؟؟؟
طيب نرغي الاول ،دلوقتي انا باسمع كلام بابقى مش عارفه اضحك عليه ولا احدف الىبيقوله باي آله حاده؟؟؟ زي ايه ؟؟؟
والله انا بافكر اتجوز تاني . طب اتجوز . اصل بصراحه: (بداية الحجج بقى وتبرير المواقف مع انه مش مطلوب منه اي تبرير)
عد بقى الاسباب الجوهريه::: اصل التعدد هو اصل الزواج لان الايه بدأت بكلمة مثنى (هايطلع على التاني على طول ) .
الى بعده : اصل التعدد سنه عن الرسول عليه الصلاة والسلام(خلص كل السنن ووقفت على دي واصلا مش صحيح لان الرسول قال خذوا عني امور دينكم ) .
الثالث : اصل الستات عددهم بقى اكتر من الرجال ودى من علامات الساعه لازم بقى نعدد عشان نحل مشكلة العنوسه .(اذ فجأة كده بقى قلبه على المجتمع وهايضحي عشانه وخلص كل الواجبات فاضل حاجه واحده)وطبعا مش محتاجه اقول ان الكلام ده تعبان ومافيش خلل لسه فى النسب بين عدد الرجال والنساء فعلا وزي ما في نساء معنسين في رجال معنسين يبقى مش الحل هو التعدد. اوت دي كمان .

الرابع:وده بقى مواله كبييييير لانه هايقولك كلام يقطع القلب:انا مش مرتاح فى حياتي ، زوجتى العزيزه غرقت فى الحلل والاولاد ( تفتكروا مين غرقها اصلا) وتركتنى حقى اتزوج بواحده تعوضنى افتقاد الحب.(طب لما التانيه تغرق فى الحلل برضه هاتعمل ايه ؟؟؟ او يقول انا مراتي ما بقتش زي اول ما اتجوزنا اتغيرت بقت عامله زي طبق الملوخيه البايته الى ملحها قليل ؟؟؟!! طب حضرتك مش ملاحظ انك زي طب الكشري البايت الى من غير دقه ؟؟؟
طب ولما تبات الملوخيه الجديده هاتعمل فيها ايه ؟؟؟!!

ايه رايكم ؟؟!! اظن بعد ما يقنع نفسه ومن حوله بالكلام الجميل المسبك ده يبقى هو كده بريء وماحدش يلوم عليه والاهم هو نفسه ما يلومش نفسه لاي سبب من الاسباب .
مع ان ما حدش طلب منه ده ما الى عايز يتجوز يروووووووح يتجوز( الجدع فيكم يورينا نفسه) هو لّّك فى الكلام وبس . انت مش مطلوب منك تبرير عايز تتجوز روح اتجوز ماتصدعناش .

طبعا انا عارفه كويس ان الشرع اباح التعدد . لكن انتم معايا فى كلمة اباح ؟؟؟ أباح التعدد يعنى سمح بالتعدد ولكن لم يأمر به ولا شيء . والى بيتكموا اساسا فى النقطه دي من ناحية الشرع هم ابعد ما يكون عن تطبيق الشرع فيه . وزي ما اعطى الاسلام الحق للزوج انه يعدد الزوجات فكمان اعطى حق للزوجه انها ترفض الاستمرار معاه حتى بدون ابداء اسباب. ومش حرام ولا حاجه عليها عادي جدا .

وطبعا مافيش اي مبرر من الى فاتوا يقول انه يتجوز فى السر من غير علم زوجته الاولى حتى لو برر لنفسه انه كده احسن لها هي ( انا مش عشااااااااني عشاني هو) عشان ما يجرحهاش (الواد حساس وعاطفي الاخر).

المهم دول بقى الناس الى لقت حجه نشوف التانين بقى دول يا عينى غلابه حالتهم تقطع القلب لانهم عارفين ان التعدد مش سنه ومش هايحل مشكلة العنوسه (متفتحين وفكرهم عالي ) وزوجاتهم ستات زي الفل وهما بيحبوهم جدا وكل شيء ميت فل واربعتاشر . طب ايه ؟؟؟ فين المشكله ؟؟؟!!!
المشكله انهم رغم كل شيء فى داخلهم ولو فى مكان بعيد كده هايموتوا ويتجوزوا تاني ؟؟!!!! ليه الله اعلم !!!!
حاولت اعرف على فكره بس ما قدرتش اليكم ما دار بينى وبين نفسي ::
..قلت يمكن لما يتجوز اثنين يمشي الرجل نافش ريشه ويثبت للناس كلها انه راجل ونص ؟؟!!! يجوز !!!
..او يمكن عشان يحس انه متفوق على غيره وخصوصا المرأه بانه متجوز اثنين وهى لا ؟؟ يجوز برضه .
..ويمكن برضه من باب استخدام الرخص والحقوق والاستفاده منها ؟؟ يعنى زي كده الى يلاقي علبة تونه وعليها عرض خاص اثنين بسعر واحده يشتريها وهو ما بياكلش التونه اصلا ؟؟؟ الله اعللللم !!!

المهم انى ما عرفتش اجاوب فى الاخر على السؤال وقلت اكيد هذه الاجابه تكمن فى بير مالوش قرار فى نفس الرجل (مسيرنا نوصله برضه ما وراناش الا هما).
بس اظاهر ان مش بس حلم الجعان عيش ..... لا ده حلم الشبعان برضه عيش

( هششششش شكلها من الاخر طفاسه) ما تقولوش قدامهم يا بنات
والى لقاء اخر ان شاء الله (بنات اسألوا عليا الا يموتوني الطفسين )




هناك 9 تعليقات:

ahmed_k يقول...

عزيزتي ام خالد اسمحيلي أختلف معاكي لأنك أخذتي الموضوع من وجهة النظر النسائيه بشكل بحت و اعطيتي تصور عن كل النساء كأنهم ملائكه لا تخطئ مع أنه من المفروض الأعتراف بان للمرأه في أغلب الأحيان دور رئيسي في لجوء الرجل للزواج الثاني بعدم الأهتمام بنفسها او أهمال زوجها وواجباتها تجاهه وأعترف انه في بعض الأحيان تكون هناك طفاسه من الرجل لكن هذه ليست القاعده بل الأستثناء ولتعلمي ان الله سبحانه تشريعه رحمه للناس فلم يشرع تعدد الزوجات للرجل ومنع منه المرأه الا لعلمه سبحانه بالفرق الكبير بين طبيعة تكوين المرأه والرجل وذلك لخير الأنسانيه أنظري عندما ترين بعض اتباع الديانات الأخري الذين يطالبون بالمساواه مع المسلمين في هذا الأمر لعلمهم وبالتجربه ان شريعتنا ولله الحمد اخذت في الأعتبار جميع الظروف البشريه ولكن الله حدد بذلك شرط مهم الا وهو تحري العدل والمساواه بين الزوجات واما بان من حق المرأه ان تطلب عدم استمرار الحياة الزوجيه بسبب ان زوجها تزوج عليها فقط فلا ليس من حقها وانما ان ترتب ظلم بين من جراء هذا الزواج فمن حقها ان تطلب الخلع لذلك ارجو ان نراعي ان في الحياه مشاكل كثيييييره لا تحل الا بالزواج مرة أخرى وهذا الموضوع من الناحيه الأجتماعيه مهم جدا ويجب عدم أخذ الأمر من نواحي عاطفيه بحته بل من جميع الأوجه فكما هو عامل هدم للأسره في احيان كذا هو عامل أصلاح في أحيان كثيره وآسف علي الأطاله مع خالص تحياتي ام خالد والسلام ختام

صبرني يارب يقول...

استاذنا الغالي ما فهمش كلامي او يعنى ما عجبوش رايي وما وصولش فكرتي والنقطه الى انا باتكلم عنها .
انت دافعت عن الرجال رغم ان انا ما هاجمتهمش ولا حاجه . ودافعت عن الزواج التاني او التعدد رغم ان انا لم انكره ولم اجعل منه جريمه بالعكس انا مقتنعه تمام الاقتناع بحق الرجل فى التعدد وصحته من الناحيه الشرعيه والتى تتبعها بالفعل الناحيه الاجتماعيه لان الدين هو دستور الحياه الذيلا يخطيء .
وانا لم انظر للنساء خالص فى موضوعي على انهم ملائكه ولا غير ملائكه ولا دي وجهة نظري بالنسبه لهم .
اما بقى حضرتك بتقول ان المرأه فى اغلب الاحيان لها دور رئيسي فى لجوء الرجل للزواج التاني !!!
فأنا اختلف معك كل الاختلاف اخي الفاضل لسببين : الاول ان العلاقه الزوجيه شأنها شأن اي علاقه اخرى لها طرفان ان فسدت العلاقه باي شكل ومن اي جه فان الطرفين مسؤلين مسؤليه مشتركه ومتساويه عما وصلوا اليه ولو بسلبية احدهم او كلاهما .
ثانيا:ان انا فى رايي ان الرجل قبطان السفينه بما اعطاه الله من قوامه ( ولا القوامه دي حقوق بس مش واجبات كمان ؟؟) وبما انه القبطان فهو المسؤل الاول عما آلت اليه الامور . سواءا بتصرفات آتت بأثر سلبي على العلاقه أو حتى بسلبية ردود افعاله المواجهه للطرف التاني وسوء معالجته للأمور .

أما بالنسبه للخلع فياريت اخي الفاضل تراجع الشرع فى هذا الامر وتراجع واقعة الخلع المستند اليها الحكم وانه من حق الزوجه طلب الخلع بدون ابداء أي اسباب من اي نوع غير انها لا تريد هذا الرجل زوجا ولا يشترط الظلم ولا الاساءه ولا اي شيء.
ومن قال انه ليس من حقها ان ترفض ان تستمر ان تزوج بأخرى ؟؟؟
ألم يرفض الرسول زواج علي من ابنة ابي جهل وقال لعي ان تزوجتها فطلق فاطمه . ليس اعتراضا على الزواج التاني عموما ولكن اعتراضا على من سيتزوج ويجمع بينها وبين فاطمه اذن من حق المرأه ان تعترض على ذلك .
وايضا الم ترفض امرأه الزواج من رسول الله لانه متزوج من نساء ا خريات وهى امرأه غيور ؟؟؟ ولم تلام على ذلك من الرسول وانما احترم رغبتها ورأيها ؟؟؟؟

أنا لا انكر على الرجل حقه فى الزواج ولا انكر اهمية وشرعية الزواج التاني للمجتمع وانماا يضا ليس من حق الرجل ان ينكر حقوق الزوجه
كما أنه ليس من حق المجتمع ككل تحميل فشل الحياه الزوجيه من نجاحها على المرأه وحدها والصاق بها الاسباب والنتائج.
مما بات للرجل الحق فى تجريح زوجته واتهامها دون وجه حق لمجرد انه فى نفسه غرض للزواج بأخري.
فمن يريد ان يتزوج ثانية فليفعل دون ايذاء الاخرين ولا سيما من شاركته الحياه يوما .
وتوضيحا اكثر للفكره اخ احمد انا اناقش توق الرجل دائما للتعدد حتى فى حالة عدم وجود كل الاسباب ولا حتى القدره ولا الرغبه فى الزواج بأخري ورغم كل ذلك هو حلم كامن فى نفوس الرجال حتى وان قالوا عكس ذلك .
هذا ما اناقشه ليس الا .
شكرا لك يا اخ احمد يا منورني دايما

ahmed_k يقول...

اختي العزيزه السيده فاطمه ابنت رسول الله والثانيه ابنت عدو الله لذلك رفض النبي الكريم ان تجمع مع ابنته وليس للمبدأ وانا لم أحمل المرأه سبب فشل الحياة الزوجيه حاش وكلا بل عند لجوء الرجل للزواج الثاني في بعض وليس كل الحالات وقد انكرت علي المرأه ان تطلب الطلاق فقط لأن زوجها تزوج عليها ولم يحدث لها ضرر من عدم العدل او المساواه ولكني لم انكر ان من حقها طلب الطلاق ان كرهت زوجها وعليها ان تبريه من تبعات الطلاق من مؤخر وخلافه وبعدين الناس مش عارفه تتجوز اولاني مش تاني وتالت ومين المجنون اللي يتزوج اثنين في الزمن ده ومنين حأيكفي طلباتهم والسلام عليكم

صبرني يارب يقول...

اخي احمد انا استشهدت بواقعة فاطمه لانه اعتراض من الرسول على الزواج التاني مع انه من حقه الا انه اعترض عليه لسبب معين .
وعليه لاي واحدها الاعتراض وتخيير الزوج كما فعل رسول الله لسبب يخصها .
وايضا ليس الضرر يقع بعدم العدل فقط وانما الضرر النفسي ايضا كما فعلت من اعتذرت عن الزواج برسول الله لعدم قدرتها النفسيه على احتمال التعدد.
اماالتبرأه من حقوقها فهذا راجع لها وله والحكم بينهم فى الامر ان لم يتفقا.
واما عن المجنون الى يتجوز تاني فالمجانين كتير الايام دي .
خصوصا الى بيقولوا كلمه وحشه اوي بتأذي مشاعر ناس كتير :: أه نتجوز تاني ما البنات قاعدين ملقحين مش لاقيين جواز وهايوافقوا بنصف زوج مش احسن من مافيش خالص .
مبدأ وحش اوي وكلام جارح لاي حد عنده مشكله مماثله .

وانا قلت لبابا قبل كده اجبلك عروسه يا بابا ونرجع الست دي(ماما يعنى) لاخواتها. قال لا هو انا اهبل ؟؟؟؟ كفايه كده مش ناقص . هههههههههههههههههههههههههههههههه

وجوزي بيقول انه اول ما يفضى هايتجوز عشان كده هو مش هايفضى ابدااااااا. (بابا كان بيقول كده برضه بس على ما فضي كان عرف الحقيقه بقى)
نووووووووورت يا استاذنا

Anonymous يقول...

السلام عليكم يا صبرني

بصي يا ستي أولا ربنا يقدر الراجل الغلبان على ست واحدة بتبقى مورياه الويلات

يبقى يجيب تانية ليه هو حصل لمخه حاجة

بس في رأيي لما الراجل يتجوز تاني ده حقه بس بشرط العدل بين زوجاته

وبعدين أحيانا يا صبرني بيكون في سبب عند واحد ما يمشيش عند غيره

بمعنى واحد مراته مش بتخلف مثلا يروح يتجوز غيرها

في غيره هيبوس إيده وش وضهر ويعيشها في نعيم وهو شايف أنها كل أمله في حياته

على كل برضك ماليش دعوة بالموضوع لأني لسه ما اتجوزتش

يمكن لما أتجوز أقولك ليه الواحد يفكر يتجوز واحدة واتنين وتلاتة


تحياتي ليكي

التوقيع /// THE WHITE KNIGHT

صبرني يارب يقول...

وايت نايت

نورك مغرقنا .

أنا غير معترضه على الزواج التاني او التعدد عموما معاذ الله ان انكر ما احله الله .
ولكني اناقض وجه اخر للموضوع
ومستنييييينك لما تتجوز ان شاء الله وتقولنا ( ابقى قابلنى )
هههههههههههههههههههههههه

Crystal Lobna يقول...

انا لقيت كل التعليقات لرجال فقلت لازم أعلق. أنا أول مرة أدخل على البلوج و أدينى قعده أقراه بالراحة أهه واحده واحده . هما ليه كلهم فهموا أنك بتهجمى الجواز التانى مع أنى كل اللى شفته أنك بتعملى رصد (حلوه رصد دى) للأسباب اللى الرجالة بيقلوها للجواز التانى يعنى فى البلوج الأصلى كنتى بتعلقى ان الرجالة كلها فعلاً نفسها تتجوز تانى حتى اللى سعداء بيتعملوا مع الموضوع كأنوا حلم رائع. كفاية كده و أكمل قراءة و حقول رأيى ليكى على أخر بلوج أن شاء الله

صبرني يارب يقول...

بيبرس

تسلم يارب

صبرني يارب يقول...

كريستال لبنى

والله انا كمان مش عارفه هما زعلانين ليه

هههههههههههههه

تقريبا عشان فقستهم


تحياتي ليكى ومستنيه تعليقك