الخميس، 9 أكتوبر 2008

الناس ما بيتجوزوش ليه ؟؟؟!!!

سلام عليكم :
عدنا الى الرغي مره اخرى يا حلوين . وحشني الرغي جدا جدا .

فى موضوع اعتقد انه بقى مهم جدا جدا كل الناس اتكلموا فيه . الا وهو ان ما عادش حد بيتجوز !!!! مش بس البنات لا
طبعا بنات وشباب والله قاعدين من غير جواز ولما تسألهم عن الاسباب تلاقيهم قالوا شوية حاجات كده ماسخه مش هى السبب الحقيقى .

فأنا بقى فى قاعده تمحيص وتحليل للموقف وصلت للنتايج الاتيه :

أولا : ان الازمه دي مش سببها الاساسي هو الحاله الاقتصاديه . ليه ؟ لان فى ناس كتير معاها فلوس بالعبيطه وبرضه
قاعدين من غير جواز .

ثانيا : ولا سببها انهم مش عارفين يحبوا ما بيتنيلوا يحبوا من وهما عندهم 18 سنه وبعدين يزهقوا من بعض لما يبقوا فى سن الجواز ويهيموا على وجههم بقى .

طيب يبقى ايه السبب ؟؟؟

انا من وجهة نظري شايفه ان الاسباب مش هي دي خالص ومن منطلق ان انا صاحبة موطن الرغي فانا كل الشعب المصري بيرغي معايا ويفضي عندي بلا بلاش كله نصه عشان الامانه .

بالنسبه للبنات اسمعكم بعض الى لقيته جواهم :

خوف فظيع جدا من الفشل . ايوه اصلا هى مش عارفه تتجوز عشان خايفه تفشل لان على حد تعبيرهم مافيش ضمانات للنجاح .
ده بالنسبه للفئه العمريه ما بين 20 و 35

اما الى اكبر من كده : فهما اساسا ما عادش يهمهم الموضوع وخايفين من التغيير . وعلى حد تعبير احداهم برضه انا لسه هاجيب واحد يتحكم فيا ويصدعني انا كده كويسه وعايشه وباشتغل وما عنديش ولا ساعه فاضيه .

ده غير بقى الى مستنيه انها تتجوز عن حب وتقابل فارس الاحلام الى هايخدها على حصان اخضر . ومش عايزه تتجوز جواز صالونات . وكلام الافلام العربي بتاع محمود يس ده .

وغير كمان المبدأ الى فى ناس بتعمل به وهو : القاعده فى الخزانه ولا الجوازه الندامه .

اما بالنسبه للشباب :

فهو خايف برضه بس مش من الفشل . لا في كتير منهم خصوصا العكاكين خايف ينضرب على قفاه . تحديدا شاف كتير خاينين ومنيلين بنيله ما عندوش ثقه فى حد وبرضه ما عندوش ضمانات .

وطبعا فى ناس مش معاه فلوس بس دول ربنا بيسهلهم ويتجوزوا ولو كبار شويه .


وفى اسباب مشتركه :

ومنها مكتب التنسيق الى فاتحينه للجواز والى خلى كل واحده تقولك انا دكتوره واتجوز محاسب يا للهول .
وطبعا كل نفس تصبوا للاعلى منها من وجهة نظرهم وبالتالي بتحصل دروبات فى الموازين .

من وجة نظري خريجي الجامعات كلهم ناس على مستوى ثقافي واحد مالوش دعوه بالتكافوء الاجتماعي الخاص بالجواز . دى خرافات بس احنا بنروج لها وعاشينها .

وكمان كل واحد سافر بره مثلا عشان يكون نفسه ورجع معاه فلوس بس بقى عنده 35 سنه لما يجى يتجوز بقى عايز يعوض الى فاته قوم يدور على واحده ورور كده عندها 22 سنه ولا حاجه وتتفلق بقى الى عندها 30

ولو الى عندها 30 طبعا سولت لها نفسها انها تتجوز واحد عنده 30 الا شهر يبقى ايامه وايامها سوده .
طب يعنى يعملوا ايه ؟؟!!! يتجوزوا مين ؟؟؟؟

عملت دروب كبير فى تواؤم الاعمار الحكايه دي على فكره مش هزار .

وثالث حاجه هى فكرة الناس عن الجواز يعنى البنات يسمعوا المتزوجات يقولوا الجواز وسنيه وايامه السوده وتفضل تقولها ما تستعجليش على الجواز يا اختي بدري القرف وتجيبى واحد يتحكم فيكى ويقرفك . وعيال يتعبوكي ويقرفوكي وما الى ذلك من سنفونية السخط على الحياه .

وعلى الجانب الاخر تلاقي برضه .بلا جواز بلا قرف هو شهر يا ابنى واحد وبعد كده هاتكره الصنف كله . كبت حريه ورايح فين وجاي منين وهات فلوس وودينى وهاتني وبعد شويه عيال ومصاريف وقطم وسط وخلق تسد النفس عن الحياه .

صوره كئيبه سخيفه مريعه تخلي اي حد عاقل يقول وعلى اييييييييه ما انا قاعد اهو بلا وجع دماغ .

وطبعا طبعا احنا عندنا جيل شباب من الجنسين ولله الحمد ما عندوش اساسا حب للمسؤليه ولا للجد والعمل جيل طالع عشان يرتاح ويأنتخ على حساب الناس
طبعا مش الكل لكن كتير منهم كده للاسف .


ده غير المشكله الام اصلا فى كل حاجه فى حياتنا اننا نسينا كتاب الله وسنة نبيه وبقى عندنا معايير تانيه كتير ماديه واجتماعيه وسطحيه للغايه بنحطها فى المقام الاول من حسابتنا للاسف الشديد .

باختصار يا جماعه الازمه مش ازمة فلوس وامكانيات ماديه فقط احنا عندنا افكار اجتماعيه غلط لازم نصلحها
عندنا اوضاع مذريه .
عندنا مشاكل فى نظري اكبر من كونها مشاكل ماديه وبس .

عرضت المشكله يمكن لما نعرفها نقدر نحط لها حلول ومستنيه اسمع رايكم الى يهمني ا وي

هناك 56 تعليقًا:

الطائر الحزين يقول...

انا مقتنع تماما انه اذا صدقت النوايا يسر الله السبل

=========
الخوف من الفشل ليس من الزواج لكن من الانفصال وحمل لقب مطلقة وكأن الطلاق ليس من شرع الله

ان الله سبحانه وتعالى شرع الانفصال حتى يبحث كل انسان عن طريقة مرة أخرى بطريقة ترضية مع استحالة العشرة وعدم تحملها لبعضهما
======
مشكلة تحتاج تفكير فعلا الله المستعان

صبرني يارب يقول...

الطائر الحزين

اتفق معاك تماماعلى فكره

بس انا فردت المشكله بس لكن هو ده رايي برضه بالنسبه لموضوع الفشل
تحياتي لك ونورت

أحمد (زوج مخنوق ). يقول...

الناس ما بيتجوزوش ليه؟؟
لانهم بجد شايفين نسبة اد ايه من الجوازات اللى نجحت
الشاب يبقى عارف انه علشان ينجح في جوازه لازم يطنش و يكبر دماغهو يستحمل و يفضل طوب الارض يقوله استحمل انت الراجل
طب و على ايه؟؟
ده حاجة تخنق
و البنت برضه شايفة صاحباتها اللى اتطلقت و هي فى اول العشرينات و اللى جوزها نصب عليها و اللى بهدلها و اللى ضربها و اللى و اللى
و شايفة اللى لسه متجوزة كل ما تقابلها تقولها ده انا مستحملة الغلب و مستحملة القرف
عايزاها تفكر في الجواز ليه؟؟
الموضوع فعلا بقى انا ايه اللى يجبرني على كده
ما انا عايشة في بيت ابويا ملكة متوجة او ملك زماني
ده فضلا طبعا عن الناس اللى مش عايزة تتحمل اي مسئوليات
و ده انا باتكلم عن معرفة شخصية بناس
الست بعد ما اتجوزت و خلفت و عرفت انها بقى معاها كل الحقوق بالقانون ببتمرد على جوزها مش هاعمل مش هاخدم مش هاسوي
و لما يشتكيها لأهلها
امها تقول معلش دي غلطتي
اصل ما عودتش بنتي انها تخدم حد و لا حتى نفسها
يبقى المفروض الرجل يعمل ايه
ينصح اصحابه بالجواز؟؟
و لا يقول لكل واحد عيش يا ابني ملك زمانك

اسف على الاطالة
بس الموضوع جه على الجرح

kochia يقول...

عندك حق طبعا وانا متفقة معاكي في اللي قولتيه
المشكلة ان الرجل والمراة كل منها بيعامل الاخر علي انه " الاخر "
عارفة يعني لازم حرب .. ولازم منهزم ومنتصر
وكان الزوجة لو قالت حاضر يبقي عيب
وكان الزوج لو طنش وسامح وجه علي نفسه تبقي فضيحة
وكانه سجال .. مش تكامل
الصورة دي خوفت الناس
البنت بتفكر انها لما تتجوز انه لازم هيتحكم فيها ولازم هيجور عليها ولازم هيبقي فيه مشاكل مع اهله و و و
ليه لازم ؟؟؟؟
والراجل فاكر انها لازم هتبقي طماعة ولازم هتهمله ولازم يكذب عليها عشن يعيش معاها سعيد
ليه لازم ؟؟؟

القضية انها مركب لها قائد اختره ربنا ولها تابع له دور لا غني عنه ولها شريعة وقانون اللي هو الدين

اسبابك اللي طرحتيها واقعية الي حد كبير .... والموضوع واسع وفيه كلام تاني كتير

تحياتي

حسن حنفى يقول...

اعتقد ان الحزء الاكبر علي العامل الديني فلو الانسان عارف ربنا كويس سواء شاب او انسه مش هيخاف وهيقدر يتحمل المسئوليه وهيتوكل علي الله والام هتلاقيها ترضي باي شاب عنده دين وخلق مش هتدور كتير عن انه معاه فلووووووس كتير ولا لأ وهكذا

Appy يقول...

يبقى المشكله الحقيقه الخوف
عارفه بقوا جميع الاطراف ميقدروش يتحملوا مسئوليه دلوقتى خالص
ودى وجهه نظرى لانهم متربوش على كده

لورنس العرب يقول...

البنت دماغها في الفلوس
والشاب دماغه في شبيهة نانسي عجرم وهيفاء وهبي - واحيانا بيفكر في واحده غنيه ترفع من مستواه المادي
وده لأنه شاف فلان اتجوز واحده غنيه وعاوز يعمل زيه
وسرعة حالات الطلاق وقصر عمر الزواج
وكل المتزوجين بيشتكوا من ان الزواج وحش ومش حلو "على الرغم من ان معظمهم كذابين" لكن كله بيقول كده ولا تفهمي ما هو السبب، ما من واحد لقيته إلا لما يقول لي " أوعى تتجوز- دي نصيحه مني" !!
ومفيش حد بيطبق الدين
والنتيجة اننا مقبلين على كارثه
الناس اعمارها كبرت شباب وبنات
وياعالم ايه الحل

اسامه عبدالعال يقول...

كل الاسباب اللى قولتيها صح وكلها اسباب مقنعه يبقي مستغربه ليه ان الناس مش بتتجوز

خمسة فضفضة يقول...

السلام عليكم ورحمة الله وبركاته

اكيد طبعا دي بعض الاسباب بس ماتنسيش برضو ان العامل المادي له الدور الاكبر في تأخير الزواج خصوصا مع العراقيل الفظيعه والطلبات المريعه اللي اهل العروسه بيطلبوها من العريس
وكمان الحاجات الكتير اللي ملهاش لازمة اللي العروسه بتبقي مطالبه انها تجيبها والا تتعرض لما لا يحمد عقباه من اهل العريس وجزء كبير اوي منها مش بيبقي الا للمنظره الفارغه

ربنا ييسر الزواج للجميع ويعينهم عليه

سلام

AHMED SAMIR يقول...

حلو المسح الاجتماعي دة على فكرة
بس تسمحي لي اختصر البوست الجميل دة في جملة واحدة
الناس خايفة من بكرة
بكل ما تحملها الجملة من معنى سواء اكان خوف مادي او انساني او مرضي
الناس خايفة لأنها مش شايفة بكرة....بكرة بالنسبة لهم ضبااااااااااب
تحياتي

حبيبـــــــة القمـــــر يقول...

الناس مبتتجوزش عشان خايفه من المسئوليه
مبتتجوزش عشان مش لاقيه الامان
مش لاقيه الثقه والاخلاص والصدق في التعامل

للاسف محدش بيفكر صح
الشاب عايز بنت من غير دماغ ولا عندها طموح عشان ميحسش بضعفه قدامها ويعرف يعيش دور سي السيد

والبنت عايزة شاب ميقتلش جواها الرومانسية ولا يلغي تفكيرها

الناس كده مرتاحه اكتر
على الاقل لسه جواها حلم بتقول مسيرة يتحقق ولو متحققش تبقى عاشت حلم جميل

تخيلي لو بكره دا اتحقق ولقيته اسود هتجيب احلام تانيه منين وهتعيش ازاي

... amr يقول...

ممممممم .... هو انا عايز اقول كلمتين صغننين بس .....


انا مش لاقي عروسة كويسة ... :(

كل سنة و انتي طيبة

مطلق يقول...

0101598انا بالذات مش حعلق علي الموضوع

بس الموضوع جميل

romansy يقول...

تصدقى ان فعلا كلامك صح
اوقات الانسان بيخاف م الفشل
وكمان خايف م النجاح
اصل فيه حاجات غريبه فى البد دى

مصري بالغربة يقول...

اولا احب اهنيكي جدا على الموضوع ده , لان نسبة كبيرة جدا ف مصر عندها المشكلة ديه

بس انا من وجهة نظري ان السبب في الموضوع ده حاجات كتيرة جدا جدا

بس فعلا احنا غاب عننا الوازع الديني , لو نعرف ديننا كويس صدقيني هتتحل المشكلة

لان للاسف بيجيبوا حاجات من الغرب وقوانين وضعية وحقوق المراة ومساواة

ويخلوا المرأة تحس انها مغلوب على امرها ولازم تكون ند للرجل وده كلام مش مظبوط طبعا

الاسلام ادى لكل واحد حقوقه وواجباته
ولازم نلتزم بيها فيه رب للاسرة وهو الرجل وفيه اسرة لها حقوقها عنده ومسئوليات

اسف للاطالة بس انا لي تعليق تاني هابقى اكمله على موضوع الشاب اللي بسافر ويكون نفسه ويرجع يطلب عروسه عندها مثلا 22 سنة

Sweet Violet يقول...

انتى معكى حق ان الجواز مالوش دعوة بالفلوس ياما دول معها وفيها عنوسه اكتر

لكن هو الخوف فعلا لان دلوقتى نسبه الطلاق والفشل كتييير غير طبعا الخوف من المسؤلية و اعتقد انه هو دا العامل الاساسى

لان دلوقتى قليل قوى لما تلاقى حد بيعرف يتحمل مسؤليه نفسه اساسا يبقى هايتحمل مسؤليه اسرة كامله؟؟؟

الموضوع فيه كلام كتير واسباب كتييييييييييير لا حصر لها

تحياتى

صبرني يارب يقول...

زوج مخنوق

شرفتنا يا اخي الفاضل

شوف يا استاذنا الفاضل انا معاك فى كل كلمه بتقولها والله

وعشان كده باقول احنا للاسف عندنا مشكله اجتماعيه مش حاسين بها
وقاعدين نقول جمعيات عشان نجوز المحتاجين

ونقول الشباب مش لاقي شغل ومش لاقي جواز
مع ان الحقيقه ان مش هي دي المشكله
حقيقى فعلا احنا ما عدناش لا بنربي ولد ولا بنت
الولد مش عارف يتحمل مسؤليه نفسه بالتالي بيكون مستحيل يتحمل مسؤلية اسره كامله
والبنت كذلك ما كانتش بتراعي نفسها يبقى ازاي هاتراعي اسره بحالها .

معاك تماما فى كلامك بس عرض المشكله يمكن يساعد فى حلها .
والعيال الى مش عايزين يكبروا ويتحملوا المسؤليه دول علاجهم يتقطم رقابيهم
والبنت تتسك على دماغها من اهلها وترجع بيت جوزها وتشوف حياتها وتعتمد على نفسها
والولد ينطرد بره اول ما يبقى عنده 20 سنه على الاقل بلاش 16 زي الاجانب

ان ما كانش يعتمد على نفسه ويبقى راجل
يبقى بره بقى وروح اكل نفسك

ومافيش اطاله يااستاذنا عيب ما تقولش كده انت فى الموطن الاساسي للرغي

صبرني يارب يقول...

كوشيا

حبيبتى لا فض فوك

بس فى كلمه بقى هانعور بعض عليها حالا

فى قائد اي نعم
فى تابع ؟؟؟!!!! كلا البت احنا مش توابع
احنا شركاء هو القبطان وانا النائب بتاعه
ما اقدرش اخد قرار لوحيد وهوما يقدرش يبعدني عن القرارات برضه

تابع دي مفهوم غلط غلط غلط
هاطردك كده من حزب النسوه

وعلى فكره هو لازم هايبقى فى مشاكل
بس المهم ازاي نواجه المشاكل دي
ازاي نصغره ونقللها
ازاي نخليها هامشيه
ما تكبرش وما تبقاش محور حياتنا

تحياتي لكي ونورتي

صبرني يارب يقول...

حسن حنفي

والله المشكله مش بقت الى معاه فلوس كتير
رغم ان فى ناس كتير بقوا تفكيرهم كده

لكن والله لسه فى الى بيدوروا على الاخلاق

بس مش لاقينها لانهم احيانا كمان بيبقوا يفتقدوا لها الا من القشور بس

صبرني يارب يقول...

آبي

تعرفي انا خايفه اقول انهم حاليا عيال ما اتربوش اصلااااااااا
عشان بيجيلى احباط من الفكره دي

جنّي يقول...

السلام عليكم

والله المشكلة اصبحت معقدة بنفس تعقيدات المجتمع ..

زمان من عشرين سنة كانت ازمة فلوس او شقة وشبكة ومهر ..
وبنات الحلال كانو كتير ..

لكن التغيرات الاجتماعية والاقتصادية التي حدثت في الفترة الاخيرة عقدت المشكلة

شاب حديث التخرج منين يجيب شغل اولا ثم شقة ثم مهر وشبكة والدهب مولع

وبعد اللي شافه في الجامعة من ضرب ورق العرفي .. طبعا احسن له يعتزل الجواز

الحل ممكن اب يوافق على خاتم من حديد لبنته
ممكن اب يسمح لابنه الزواج معاه في شقته ولا الحرب ها تقوم بين الام والعروسة

ممكن البنت تصبر على عريسها بعد الزواج وتستحمل شوية ولا ها تنكد عليه عيشته وعايزة وعايزة

ممكن البنت تكافح مع جوزها ولا عايزة تتستت

ممكن الشاب يسف التراب ولا عايز يريح الجمجمة

حاجات كتير وحلول كتير بس فين النفس

مع السلامة بقى وكفاية رغي

صبرني يارب يقول...

اسامه
انا مش مستغربه

انا صعبان عليا الناس اوي

صبرني يارب يقول...

لورانس العرب

اولا نورتنا

ثانيا حضرتك مش كل البنات والله دماغها فى الفلوس
لكن بتهيئلي كل الشباب دماغها فى نانسي عجرم ههههههههههه

وسرعة حالات الطلاق من وجهة نظري هو ان كل عيل اهبل خد اربع سنين كليه مشي فيهم مع واحده هبله برضه زميلته فى الكليه وهو لسه فى الجامعه يمكن طلب من ابوه شبكه وشقه
واول ما يتخرج يجوزوه وهو ما تعبش ولا نزل نقطة عرق .
طبعا لازم اول طوبه تقابله فى حياته يتكعبل فيها ودب على وشه

المشكله فعلا كبيره وكارثه حقيقه بس مش مقبلين عليها لا احنا فيها بالفعل
تحياتي لك

صبرني يارب يقول...

خمسه فضفضه

بصي هى الناحيه الماديه لهادور بس صدقينى مش هى المشكله الاساسيه

والا ما كانش يبقى الى معاه فلوس هو كمان قاعد من غير جواز

وفكرة متطلبات الزواج من البنت دي بقى لنا قاعده فيها طوييييييله ان شاء الله بوست مستقل
نورتي يا دكتوره

صبرني يارب يقول...

a.samir

الناس خايفه من بكره اه

عارف ليه ؟؟؟

عشان مافيش بينهم وبين ربنا عمار

قلبهم فاضي

تحياتي لك ونورت

صبرني يارب يقول...

حبيبة القمر

الحلم ممكن يموت مش بس عشان انتهت الاختيارات

الحلم كمان ممكن يموت مع مرور الوقت
الورده لها عمر افتراضي مهما رويتيها واعتنيتى بها

هايجي عليهاالصيف وهاتدبل ومن بعده الخريف وهاتفنى

صدقينى ده مش حل

وايه الى ممكن يحصل ؟؟؟!!!
خلينا دايما نقول طول عمرنا وما دام فينا نفس
نقدر نبدا من جديد
مع احترامي لكل الافكار المجتمعيه الغبيه

ايييييه يعنى لما واحده ولا واحد يتجوز ويطلق ؟؟؟
عادي الصحابه كانوا بيطلقوا ويتجوزوا من غير اي مشاكل غبيه كده
لكن احنا ايه ؟؟؟
سبنا الاصل ومسكنا فى الهبل المجتمعي .
تحياتي لكي ونورتي

صبرني يارب يقول...

عمر

يا ضنايا يا اخويا ابعتلي بياناتك وانا اشوفلك عروسه
هههههههههههههههههههه
نفتحها خاطبه بقى وخلاص

ولو كنت من المنصوره كمان تبقى فله هاجيبلك طابور يا باشا
نورت وربنا يوفقك يارب

صبرني يارب يقول...

كريم

هههههههههههههههههه

ليه بس يا يا استاذنا ده انت اهم واحد
انت تنور وتعلق زي ما تحب او ما تعلقش انا عارفه شعورك
هههههههههههههههههههههههه

صبرني يارب يقول...

رومانسي

الله يكرمك نورت وصح لسانك

صبرني يارب يقول...

مصري بالغربه

تحياتي لك ونورت

والله حضرتك هى اصلا الست ند للراجل لكن مش زيه
الست مش زي الراجل يا سيدى الفاضل انما مش اقل منه ولا هو اكتر منها فى شيء .

وطبعا احنا فعلا مش فاهمين روح الدين كويس عشان كده ما بنطبقوش صح وبالتالي بنتوه منه

وفى انتظار تعليقك على الموضوع الى ذكرته اهلا بك دايما

صبرني يارب يقول...

ضد التيار

تحياتي لكي ونورتي واتفق معاكي طبعا

صبرني يارب يقول...

جني

والله العظيم يا اخي الفاضل الخريجين دول مأساتهم مأساه

احنا ما نا بناش من التعليم العالي غير اننا عرضنا ودان العيال

وبقوا ملطعين على الارصفه ومش عايزين يشتغلوا
ويقولك انا جامعي واشتغل بياع فى محل ؟؟!!!
وهو والله العظيم ما يقف في سوق العلام العالمي بنكله ولا بيهم حاجه ولا بيعرف يكتب اسمه حتى

وكل الى حضرتك بتقوله ده والله عن تجهيزات الفرح
انا شايفه انه بقى هبل وان ابو العروسه مثلا يجهز على العريس وبيجهز على نفسه اصلا
ونص التجهيزات بتاعة الفرح من عفش وهدوم واكل بتترمي او بيبدأوا يستعملوها بعد عشر سنين مثلا

حقيقى احنا غلطانين كتير اوي فى حق نفسنا

نورت يا استاذنا ودايما تنورني يارب

حنين القلب يقول...

ايه البوست الجامد ده
بصى يا ستى انا شايفه ان الناس اللى زينا اللى هما على قد حالهم مشكلتهم كلها الفلوس يعنى العروسه اهلها عايزين وعايزين وهو مش معاه علشان كده مش بيتجوز
اما بقى اللى مقتدرين هيتجوزا ليه ويتحملوا مسئوليه ليه مهو عايش ويتفسح مع دى ويروح ديسكو مع دى واخلاقه بايظه يبقى لازمته ايه الجواز ؟

انا اتجوزت من زمان والحمد لله
ربنا يصلح حال الجميع
تقبلى مرورى

mahasen saber يقول...

لا اعتقد السبب الرئيسى ظروف اقتصاديه لان مش معقول مثلا واحد هيشوف فتاة احلامه ومعاه كل الامكلنيات وهيخاف ياخد حطوة الجواز عشان الفشل فيه...
وكذلك نفس الرؤيه على البنات...
يعنى اعتقد دى رايى بالنسبه للنسبه الكبيره اما الباقى ممكن يكون خوف من التجربه ممكن ليه لا ....
واولا واخيرا رغم اى حد وحده ورغم كل الظروف ده نصيب وقدر ثم نصيب وقدر...

صبرني يارب يقول...

حنين القلب

لا والله يا جميل مش شرط الى معاه فلوس يبقى بايظ

ومش شرط الى مش لاقي انحلال هو بس الى يدور على الحلال

وصدقينى الناس الى مش لاقيه فلوس والى عايزين يتجوزوا فعلا بينحتوا فى الصخر لحد ما يتجوزوا
لكن يحط ايده على خده ويقول مش لاقي جواز لا ده استهبال واستنطاع على المجتمع

صبرني يارب يقول...

محاسن صابر

هو حضرتك هايشوف فتاة احلامه دي فين ؟؟

اعتقد كلمة فتاة احلامه دي كلمه صبيانيه الى حد كبير . تتعدى الموقف الى احنا بنتكلم عنه من حيث تأخر سن الزواج .

وبعدين زي ما قلتلك حقيقى انا اعرف ناس كتير اوي معاهم فلوس ومش بيتجوزوا
وكلميهم يقولك اه عايز اتجوز بس مش لاقي حد او ما وفقتش مع حد

ده غير بقى الى على ما بقى معاهم فلوس بقى مثلا عندهم 40 سنه ومنهم كتير بيقولك هو انا لسه هاتجوز بقى ما خلااااااص

وطبعا هى اولا واخيرا نصيب
لكن احنا لازم ناخد بالاسباب

ما نقعدش ادينا على خدنا ونقول ده نصيب اننا فشلنا فى تكوين اسره

ahmed_k يقول...

جيت علشان أقول
مبروك النيولوك للمدونه
ولي عوده
أقرأ الوست وأترك تعليقي عليه

سلام مؤقت يا أم مريم

صبرني يارب يقول...

استاذ احمد

ايه النور ده الله يبارك فيك يارب

الصراحه ده بعد عناء شديد ولبخ كتير كتير وبعدين بوظت الدنيا كلها وبعدين مفروسه الله يصلح حالها بقى خدت الباس وورد وظبطتنى بس انا خلاص اتعلمت
بقى هاهريكم بقى نيو لوكات اصل انا باحب التغيير

شرفت ومنتظره تشريفك تاني ورايك الى يهمنى

mony يقول...

عندك حق يا صبرني

هم مش بيتجوزوا ليه؟؟؟


بس اعتقد ان عندي اسباب تانية



فعلا و الله يا صبرني الحالة المادية بقت صعبة اويييي
وان كان مش هو ده السائد
بالعكس في كتير رجالة(مش ذكور)من اللي بيعتمد عليهم قاعدين مع اهاليهم كافين خيرهم شرهم بدل ما يجيبوا واحدة يوكسوها جنبهم


مين اللي هيرضي يجوز بنته لحد يا دوب عايش
لا
لازم يستًرها ولا الناس تقول ايه؟؟
مش هو ده تفكير الناس برضه؟

و البنات كتير عايزة تتجوز كتير مش خافين من الفشل ولا حاجة بس عايزين فرصة يثبته فيها نفسهم

وموضوع الجواز بمكتب التنسيق ده منتشرة اوييي اوييي
للاسف

ديه ثقافة عامة

الدكتورة تقول اناااا اتجوز واحد خريج تجارة
وكأن خريج التجارة ده خارج من كلية للمعاقين ذهنيا

خلاص خليها قاعدة مستنية الدكتور بتاعها
بس علي فكرة كتير من الدكاترة العاقلين عاوزين العروسة تكون واحدة خريجة تجارة ولا اداب(كلية مش عملية عموماً) علشان تكون رايقة
مش بيات في المستشفيات ولا عيادات لاخرالليل

انا مش بهاجم الدكاترة الستات و الله


بس الدنيا مخلوقة علي اساس ان كلنا مش كاملين
وان لينا نصف تاني لازم يكملنا

و اللي بيدوًر علي الشباب الورور بيني و بينك هو عنده حق
لانه لسه عايش انه صغير و ماكبرش من ساعة ما سافر
و كأن سنين سفره ماتتحسبش


اما موضوع ان البنات بتخاف من كتر السب في الزيجات السابقة فمعتقدش ان الحاجات ديه بتحوق في حد



اهم هاجة ان الذكر اللي عايز يتجوز يكون رااااجل


علشان يعرف يتجوز و يمشي بيته صح و بالتالي هيعرف يختار شريكة حياته صح



لازم يكون بعرف يتحمل المسؤلية و ان كان عنده مبادئ فده كفاية علي ما اعتقد

و في الاخر طبعا زي ما قلتي لو مشينا علي الكتاب و السنة كل المشاكل اللي فوق ديه كلها هتتحل

و الناس هتتجوز في سلام آمنين



معلش طوووووووولت عليكي اويييييييي
اعذريني

kochia يقول...

هههههه
لا وعلي ايه طرد
مفيش تابع يا فندم
احنا شركاء

بصي يا ستي
انا قصدت بكلمة تابع اننا لا نتنافي علي عجلة القيادة لان هذا هو الذي يسبب الكثير من المشاكل
كلكم راع .. وكلكم مسؤول
وانا قصدت احدد وارتب المسؤوليات

وهديك مثال
احنا مثلا بنزعل من الراجل اللي مش بيصرف .. ولو الست بتشتغل ومش بتصرف نقول هي ملزمة منه .. صح ؟
دي بقي مش شراكة
دي كل واحد يقوم بدروه في الحياة

والامثلة المشابهة كتير بس مش مجاله لان موضوعك غير كدة
وارجو انك مثلا تعملي حملة وتناقشي الموضوع من كل الجوانب
وممكن تعمل استفتاءات
وكدة يعني
عشان تبقي قدمتي فعلا افكار وحلول مش ناقشنا الفكرة بس
ايه رايك ؟؟

صبرني يارب يقول...

كوشيا

على فكره ما فهمتش وجهة نظرك بتاعة المصاريف والشغل دي

على ما فهمته ان من الملزم له انه يصرف على بيته لكن مش من الملزم لها انها تصرف علىالبيت لو كانت بتشتغل مع انها شركه

واحب اقولك ايه ماهو الشركه مش معناها ان الشريكين يعملوا نفس الحاجه بالظبط والا يبقى مالوش لازمه
كل فى دوره وفي مكانه

وعلى فكره انا بالفعل ناويه اتكلم فى الموضوع ده كتير تحت تبويب مشكلات الزواج وفى بوست كان قبل ده برضه
وان شاء الله نتكلم فيه تاني
وتحياتي لكي

صبرني يارب يقول...

موني

أنا ما نفيتش السبب المادي ابدااا
لكن انا باقول ان مش هو بس السبب

وعموما لو زي ماا نتى بتقولي كده فى رجاله عن حق وعايزين يتجوزوا ومش عارفين
من موقعي هذا باقولهم اجتهدوا عن حق واشتغلوا كل دقيقه واخلص ا لنيه من قلبك للحلال وربنا هايوفقك
تيته الله يرحمها كانت دايما تقولي حاجتين الواحد لما يبدأ فيهم ربنا يسهله :
الجواز والمباني
ودي حكمة ربنا عشان الارض تعمر

باحب الجمله دي جداااا من تيته الله يرحمها الى علمتني كتير

وفعلا صدقينى ده حقيقى ولاحظي وانتى تشوفي

وبالنسبه للرجاله حضرتك بتهيئلي الصنف ده بقى نااادر مع اعتذاري للجنس كله بتاعهم
بس حقيقى الراجاله الي عن حق ما عادوش كتير
وانا افتكر مره على الشات واد عبيط قال للبنات على الشات كلكم شوية عوانس مش لاقيين حاجه تعملوها

قلتله قال ابوك مات من الجوع قال يعنى كان لقي اكل ولا كالش ؟؟

هما يعنى كانوا لقوا رجاله ولا اتجوزوش ؟؟؟؟!!!!

تحياتي لكى وتطولي براحتك هنا موطن الرغي الاصلي
امال احنا فاتحين المدونه دي ليه

أنا حر يقول...

كل الاسباب اللي ذكرتيها فعلا صح وده اللي بيحصل في المجتمع
الموضوع محتاج تغيير الثقافة وتغيير مفهومنا للجواز
كمان محتاجين نعود شبابنا على تحمل المسئولية في سن بدري شوية ونعود البنت على اتخاذ القرار والتصرف لوحدها برده من صغرها علشان نقدر نحل جزء من المشاكل دي
تحياتي

عبده الرايق يقول...

اتفق مع الطائر فى موضوع الفشل بلنسبه للفتيات
اما الفتيان فهى الفلوس اولا واخيرا
لو الشاب معاه فلوس يتجوز مس بيحسب اى حسابات نهائى
وبعدين ايه حكاتيه مكتب التنسيق ده
برضه فى توزيع جغرافى وكراسه رغبات ؟؟؟

خواطر ليست عابرة يقول...

كلامك فعلا منطقي جدا وواقعي للغاية
وحتي لا يحوي تعليقي تكرارا لكلام سبق ذكره، أو التركيز علي معني غائب قد يكون فيه حلا لمشكلات الزواج، ألا وهو مفهوم الصداقة الذي هو المدخل لأي علاقة قد يترتب عليها زواج. إذا ما فهم معناه جيدا كثير من مشكلاتنا ستحل

صبرني يارب يقول...

أنا حر

فعلا محتاجين تغير ثقافات واخلاقيات
تحياتي لك ونورت

صبرني يارب يقول...

عبده الرايق

انا كمان متفقه تمام مع الطائر بس بالنسبه للبنات والشباب

اما حكاية انه لو معاه فلوس بيتجوز وما يحسبش فده اصلا مش صح الجواز مش مقدره ماديه بس

ده غير ان حاليا مش الى معاه فلوس هو الى بيتجوز
لا الي ابوه معاه فلوس هو الى بيتجوز وهو لسه بياخد المصروف من ابوه حتى

وكراسة الرغبات اتلغت يا دكاتره بيعملوا الرغبات دلوقتي على النت ولا طوابع ولا تلزيق بقى

نورتنا يا استاذنا

صبرني يارب يقول...

خواطر ليست عابره

تحياتي لك اولا ونورت المدونه وصاحبتها

بس انا ما فهمتش جزئية الصداقه دي حضرتك تقصد بها ايه ياريت لو شرفتنا تاني تبقى تفهمني

تحياتي لك

ahmed_k يقول...

مين اللي قال مفيش جواز
ده من يوم العيد لحد دلوقتي
وصالات الأفراح والنوادي محجوزه علطول
وماشاء الله تقولي الناس إتهبلت عالجواز

عارفه يا أم مريم المشكله الأساسيه مش في الفلوس بحد ذاتها
المشكله أن تكاليف بداية الجواز مش عايزه فلوس دي عايزه شوال فلوس
الأوضه اللي كانت ب4و5آلاف إنهارده ب10و11 ألف الشبكه اللي كانت يكفيها 5آلاف
أصبحت هي نفسها15ألف ومطالب أهل العروسه ثابته عند الجرامات ومالهمش دعوه بالسعر ولما ياجو يجوزوا ولادهم يحسوا بالمشكله
فإرتفاع الأسعار بشكل فلكي له عامل كبير
كل الشباب عايزه تتجوز بس طلبات البنات وأهاليهم تسد النفس
أنا أعرف واحده كانت بتطلب دايما من خطيبها يجيبلها تكييف لحد ما فسخوا الخطوبه ولا طالت تكييف ولا مروحه
وسبب تاني
محدش عنده أمان في ثبات دخله
طبعا الأمان من عند الله بس ده سبب موجود
يعني الموظف دخله مش مكفيه ليوم 10في الشهر فخايف يفتح بيت وميكفيش طلباته
واللي بيعمل حر إنهاردا معاه بكره لأ
واللي بيشتغل قطاع خاص ودخله الشهري معقول ممكن لأتفه سبب يتفصل
فالكل عنده عدم ثقه في الغد
ولديه خوف من أن لا يستطيع تحمل الأعباء المعيشيه في تلك الحاله
فيفضل العزوبيه لأنه خلالها مسئول بنفسه فقط ويستطيع أن يأقلمها
أسباب عديده لتأخر سن الزواج
وزي ما قلتي على رأس تلك الأسباب فقدان الوازع الديني الذي يعد الحصن الحصين ضد كل تلك الأسباب
فقد قال رسول الله صلوات ربي وسلامه عليه (ثلاثة حق على الله عونهم )منهم الناكح يبتغي العفه
أدعو الله أن يعين الشباب والشابات للعفه ولما فيه خيرهم وصلاح أمرهم


دمتي بكل خير

mostafa rayan يقول...

بصي انا شايف ان المشكلة الأساسية عند الستات هي المستوي الأجتماعي اعرف حد بنته عندعا 32سنة اتقدم لها معيد في الجامعة رفضته لأن ابوه عطار قالت لأبوها ماينفعش يبقي حمى اخواتي دكاترة جامعة ومستشار وانا حمايا العطار حاول يقنعها ان الشاب كويس ومش عيب ابدا ان ابوه عطار لأن العطار دة ربى دكتور جامعة لكنها رفضت وقالت له اعتبرني مجنونة
بالنسبة للشباب المشكلة الرئيسية هي المشكلة الأقتصادية في مشكلة تانية ان الشاب احيانا مش بيعرف يختار منين خصوصا لوكان مالوش في العك ورافض ان امه او حد من عيلته يختار له فبياخد وقت لحد مايلاقي البنت اللى هوعايزها

صبرني يارب يقول...

الاخ العزيز احمد

اه فعلا معاك حق الناس من العيد وفى افراح كتير ومصدعنا هههههههههههه

بس طبعا هي نسبه وتناسب ما احنا برضه كتير اوي يا استاذنا ما شاء الله ربنا يبارك فى الكيف مش الكم بس

اما بالنسبه لتكاليف الجواز انا طبعا شايفه ان الى بيحصل دلوقتي هبل مالوش اي لازمه
انا عن نفسي اتجوزت فى شقه اه كانت 3 غرف ورسبشن كبير
لكن كنا فارشين الرسبشن وحجرة النوم بس والمطبخ طبعا
صحيح انا كانت ليا ظروف خاصه من سفر وكده
ولما رجعت فرشت شقتي
لكن كنت خلاص عندي اسره من خمس افراد ومحتاجه افرش الشقه كلها
شايفه انهم يجهزوا الاول شقه على اد فردين وبعد كده يحلها الحلال ويرزقهم الرزاق .

اما بقى حكاية مافيش امان دي
انا مش معاك خالص فيها . حضرتك مين بس يضمن رزق بكره سواء متجوز ولا عازب

على الله رزقه يا اخي الفاضل

لا لا ده عدم ايمان منهم طبعا لو فكروا كده .
الواحد لازم يتوكل على الله ويشتغل
يعنى مش يتوكل على الله ويقعد فى بيتهم لا ده يبقى تواكل

انما يتوكل على الله ويسلك كل السبل عشان يعيش
ويشتغل ويصبر على الشغل
ممكن يتعب النهارده وبكره اوي بس سبحان الله بعدهم ربنا يكرمه ويرزقه من حيث لا يحتسب

تغدوا خماصا وتعود بطانا ياا ستاذنا
ربنا يكرمك
تحياتي لك ونورت

صبرني يارب يقول...

الاخ مصطفى ريحان

اولا بالنسبه للبنات يعنى ايه المستوى الاجتماعي ؟؟؟
هى اصلا فى الحاله الى حضرتك اتكلمت عنها مش قالت انا ابويا كذا قالت حمى اخواتي
معنى كده هي مش بتدور على حد فى مستواها هى بتدور على حد فى مستوى نسايب اخواتهاوكده هى واحده بتبص للناس والمظاهر ليس الا ومش كل الناس كده
على فكره انا مع التكافؤ الاجتماعي جدا يعنى لو الواحده حاسه ان الشخص الى متقدم لها ده اقل منها كتير او اعلى منها كتير يبقى يفضل انه بلاش لان ده احساس هايفضل جواها
ونفس الموضوع برضه بالنسبه للراجل


اما المشكله الاقتصاديه انا ما نفيتش وجودها لكن قلت انها مش السبب الوحيد

وبالنسبه لمشكلة الاختيار
حضرتك العكاك ده خارج حسابتنا لانه حتى لما بيتجوز بيتجوز عك

وليه حضرتك بيبقى مش عايز امه واهله يدوروله ويرشحوله ناس محترمين مناسبين وهو يا سيدى يبقى يختار منهم

ولا لازم يبقى عكاك ويمشي مع عشرين بنت لحد ما يلاقي فتاة احلامه ؟؟؟

بنات الناس المحترمين بندور عليهم فى البيوت يا فندم مش فى الشوارع
ودول البنات الى يفتحوا بيوت وعمروها .
وتحياتي لك

الربان يقول...

تحياتي

استباط صحيح...ليست فقط الحالة الاقتصادية هي السبب. لكن ايضا عوامل
عدة منها ما ذكرتيه حضرتك.

و احب ان اضيف ، ان تعلم المرأة و عملها اسهم بشكل او بأخر في عزوف البنات عن الزواج. لان البنت اصبح لها
مالية مستقلة و ليست في حاجة الي من يؤمن لها متطلبات الحياة.

ايضا التطلعات المادية لدي الشباب اسهمت بدور ما في عزوفهم عن الزواج.

موضوعك جيد..و مهم...نشكرك عليه.

تحياتي و تقديري

صبرني يارب يقول...

الربنا

تحياتي لك

لكن برضه انا هاختلف معاك فى موضوع عمل المرأه احد الاسباب

انا والدتي امرأه عامله من حوالي 35 سنه

يعنى الستات طلعوا اشتغلوا من زمان اوي ا وي
والازمه دي لسه متفاقمه في الجيل الحالي

غير ان الست السويه علىمااعتقد باعتباري ست
مش هدفها من الزواج تأمين الوضع المادي

لان بالفعل هى حتى وهي بنت فهي مسؤله من اب او اخ

لكن ممكن يكون ده صح فى بعض الحالات مش بسبب الاستغناء المادي

لا لكن بسبب انها ما عندهاش مشكلة الفراغ النفسي الى حد ما

تحياتي لك واتشرفت بحضرتك

mahasen saber يقول...

انا بختلف معاكى انا مش شايفاه كلمه صبيانيه انا بتكلم عن تاخر سن الزواج لشباب والشابات صح يبقى اليى هيحلم بيها ايه عجوز احلامه طبيعى طبيعى تبقا فتاة احلامه ...
مع احترامى لحضرتك انا شايفه ان الكلمه مناسبه للموقف اليى بنتكلم فيه ومتتعدتوش خالص ولا حتى تعدت المعنى...ده رايى
واناالحالات اليى بشوفها بتبقى هتموت فى تكوين اسره بس كل خوفها واليى رادعها الظروف الاقتصاديه فعشان كده الامور حللتها كده
..وطبيعى اى موضوع بيحمل الاختلاف والاتفاق فى وجهات النظر...

صبرني يارب يقول...

محاسن

طبيعى انا باحترم الاختلاف جدا وباقدره

لكن عموما ما زلت باقول انا ما لغتش الاسباب الاقتصاديه

لكن من وجهة نظري مش هى السبب الجوهري والوحيد للمشكله

وحكاية الخوف من الفشل دي هانقاشها فى البوست الجاي ان شاء الله
تحياتي لكي ونورتي