الأحد، 26 أكتوبر 2008

أنا اصطادت سمك !!!


السلام عليكم ايها المدونون


ايوه العنوان ده بصحيح انا روحت اصطادت سمك .


يوم الجمعه روحنا كلنا كده والعيال وبابا كمان وروحنا نصطاد سمك . بصراحه يا جماعه كانت رحله جميله جدا . لا اكتر من جميله

والعيال كانوا هايزقلوا من الفرحه . وامهم والله .


روحنا مكان كده غريب ما اعرفش رضا توصله ازاي اساسا. المفروض انه اسمه العصافره والمفروض انه هو مدينه جديده صناعيه وكمان زراعيه لان بيمر عليها ترعة السلام .


بصرف النظر عن كونه مشوار جامد شويه الا ان الرحله كانت جميله واتمنى اننا نكررها ان شاء الله.


وشايفه حد بيسأل هنااااك يعنى جبتوا سمك ؟؟؟


ايوووه بلااااافخر

بس طبعا مش هو السمك الى فوق فى الصوره ده بس شبه والله بس السمك الى جايبينه بقى متفاوت الاحجام جدا وياما رمينا سمك صغير بقى اوي فى الميه تانيه يلعب مع اخواته هناخده نعمل به ايه

جبنا سمك يجى اربعه كيلو والبت رحمه بنت المحظوظه جابت اكبر سمكه وبعدها على طول جابت سمكتين مع بعض وهانشوي وهانقلي بقى ونقطع نفسنا


ومستر خالدعاش حياته مع الطبيعه بقى والبقر والحمير الى معديه وكان حاسس نفسه فى حديقة حيوانات الجيزه.


احنا قعندنا نصطاد حلو اوي بتاع ساعتين وشويه كده وبعدين فجأه السمك ا ختفى .

اه والله بجد اختفي .


ايه يا جدعان في ايه ؟؟؟ ياعم السمك تعالى كل ده حتى العوم بيجوع يا اخي

ايه يا بابا هو في صيام ولا ايه النهارده .


المهم اكتشفنا فى الاخر ان فى سوء فى الاحوال الجويه قادم الينا فى الطريق السمك طلع اذكى مننا وحس بالموضوع قبلنا ونزل استخبى طبعا

ما فهمناش الا لما جالنا تليفون من ماما قالت لنا وهى بتعيط تعالوا بسرعه احنا عندنا عواصف وبرق ورعد ومطره وطبعا حاسه اننا بقى هناك عندنا اعاصير . بس احنا كن الجو ميه ميه يعنى المهم رجعنا بقى وقلنا بارك الله فيما رزق .


طبعا فى مجموعة نقط بقى توقفت عندها وانا في الرحله دي منها الحلو ومها الوحش


نبدا بالحلو يا حلو انت يا حلو


اولا: اكتر حاجه لفتت نظري وعجبتني ان كان كل ما حد يعدي علينا فى الحته المقطوعه دي وهو راكب حماره كده وبيتمختر يقولنا سلاااااااام عليكم . افشاء السلام . والله كانت بجد حلوه اوي ما حدش عدى وما قلناش سلام عليكم بابا قالي الارياف كلهم كده والله اعلم .


ثانيا : ترعة السلام يا ولاد شكلها يفرح وحواليها اراضي وخير كتير حقيقى .


ثالثا : الشمس والهوا النضيف والخضره حاجه جميله اوي اوي ما تحرمو نفسكم منهم


رابعا: الخروج مع الاسره كمان حلو اوي ما حدش فيكم يخرج ويسيب بقيت اسرته صدقوني كلنا محتاجين نخرج ونشم هوا .





نيجى للوحش خد عندك ياعم وما تزهقش :


أولا : الحيوانات النافقه الى شوفتها على الطريق وعلى جنب الميه الى كنا بنصطاد منها والى اكتر من واحد وبجميع مراحله حاجه تحزن


ثانيا :ترعة السلام الى فرحتني فوق دي عرفت انها مش متفعله ميه فى الميه عشان ناقصها خمسه كيلو بس . بس مش فاضيين احنا نعملهم احنا هانقطع نفسنا ولا ايه ؟؟؟!!


ثالثا : الطرق الى كنا مسافرين عليها فيها وصلات زفته زفته لا نور ولا رصيف عدل ولا اشارات ولا اي زفت ده غير المطبات الصناعي على طول الطريق من غير علامات ولا نيله لكن ممكن تلاقي علامه من غير مطب عاااااادي


رابعا :المجاري المائيه عموما على طول الطريق مافيش لها اي عنايه حاجه قرف وزباله عليها وناس بتحمي البهايم والتوكتوك اه والله والتوكتك بيعاملوه زي الحمار بالظبط ومنزلينه الترعه يستحمى هههههههههههه

وفى قنايات صغيره كده البوص مغطيها تقريبا يعنى ما خدناش بالنا انها مايه اصلا .


خامسا : في وسط القاعده الجميله دي بقى طلع لنا واحد الله يصلح حاله شغل ماكينة مايه بالجاز ولا بايه مش عارفه خنقنا بالعادم وصدعنا بالصوت . كان مالها الساقيه ام جاموسه اموره ولونها بامبي كده يا ولاد .


وبس خلاص مش فاكره حاجه تانيه


لكن نتيجة الرحله دي ان العيال ماسكين فى زمارة رقبة رضا عايزين يروحوا تاني .

لا انا مش ماسكه فى زمارة رقابته لما مسكة العيال تفشل ابقى ابدأ انا .


وكمان من النتايج ان تضخم عندي حلمي انى اخد ارض صغيره وابنى عليها بيت كبير واعيش فيها واكل من خيرها واشم هوا نضيف واعيش ولو نص يوم بعيد عن المدنيه .

بس مش عارفه هاقدر فعلا ولا لا .


صدعتكم طبعا كالعاده انا هابقى انزل على فكره بنادول مع البوستات

تحياتي لكن واتفضلوا معانا سمك

هناك 47 تعليقًا:

أحمد (زوج مخنوق ). يقول...

الماء و الخضرة و ال ( رضا ) الحسن
حياة جميلة جدا
بتفكرني لما كنت بأطلع سفاري
حياة جميلة جدا فعلا
كتير بنحتاج نرجع للطبيعة
ربنا يباركلكم يا رب
و بالهنا و الشفا

صبرني يارب يقول...

تعيش يارب
وربنا يكرمك يارب ويصلح ما بين اديك

Appy يقول...

اممممممممم
عارفه بحب كل اللى انتى بتقوليه بس بضايق من المناظر التانيه خالو كل مره يروح يصطاد يعمل محاولات فاشله معايا انى اروح اقوله لا بخاف من الحاجات اللى بشوفها يالا بالهنا والشفا

صبرني يارب يقول...

حاجات ايه ؟؟؟

بتخافي من ايه يا آبي

والله ده كان فى خرفان هناك جمييييييييله
هههههههههههههههههههه
تبعك يعنى الليله

محمد عبد الغفار يقول...

خطوة جريئة من شباب اكثر جرائة ، لعل حماسكم لا يفتر وتعاودونها

بس خيالك ميسرحش بعيد فكل ميسر لما خلق له

حسن حنفى يقول...

المهم ان الرحله كانت ممتعه

:)

وان شاء الله تحققي حلمك بس يكون الوضع اتعدل كده والسلبيات دي مش موجوده او علي الاقل نصها اختفي

بالهنا والشفا

:d

romansy يقول...

جميله قوى الرحله وكمان طعم السمك جنان يارب يخلى رضا اللى عرفكم المكان دا
وياريت العيال تسيب من رقبه رضا علشان صعب عليه
هههههههههه

KHALED يقول...

انتى نسيتى تقوليلنى نوع السمك أية ..

دنيس ولا بورى و لا بلطى ولا قاروص ولا أية ...؟
عموما الرحلات دى بتبقى ممتعة ..
رحلة سعيدة و عقبال ما تتكرر

خمسة فضفضة يقول...

السلام عليكم ورحمة الله وبركاته

ماشاء الله
ايه الجمال ده

بس هي العصافره دي غير العصافره بتاع الاسكندرية ولا هي هياها ؟

مش تعزمينا بقي علي السمك اللي اصطادتوه دا اللي ياكل لوحده يزور :)))))))


الحلم بتاعك هو نفسه حلمي اني اروح فحته بعيييييييييد اوي واعيش بعيد عن كل مظاهر المدنيه و باكتفاء ذاتي من انتاج مزرعه حوالين البيت


سلام

خواطر ليست عابرة يقول...

أحسن حاجة في رأيي في الموضوع ده هو إن الواحد يبتعد بقدر الامكان عن البيئة المصنوعة والاتصال بالطبيعة مباشرة
فبدلا من النظر الي المناظر الطبيعية الجميلة نذهب إلي هذه المناظر لنستمتع بها روحا وعينا وقلبا وعقلا وكل ذرة فينا تصير علي صلة مباشرة بالطبيعة كما خلقها الله

تحياتي لك علي هذا البوست الجميييييل جدا

وأتمني لك تواصل دائم مع الطبيعة
تحياتي

صبرني يارب يقول...

الاخ محمد عب الغفار

نورت بعد الغيبه
على فكره انت ابن حلال انا الصبح سمعت اغنية بولابولا وافتكرت وقلت راح فين هابقى اروح ازور مدونته واسال عليه

نورت يا فندم

لا خلي بالك انا مش اول مره اعمل كده انا صياده قديمه اوي بس صيد بحر ايام ما كنت فى ابو ظبي
ورضا بيروح برضه بس اول مره نروح معاه

وبالنسبه للخيال
اوعى تفكر انى باقول اعمل كده وهاربي انا حاجات وازرع بايدى
لا طبعا
ما باعرفش ومش هاعرف انا باخاف امسك فرخه يا فندم المدنيه بوظتني خالص هههههههههههههههه

انما كنت عايزه اجيب مثلا واحد فلاح ومراته صغيرين كده في السنه يقاسمونا رزقها ونعيش فى هدوء يعنى
حلم بعيد بس اهو حلم

تحياتي لك ونورت

صبرني يارب يقول...

رومانسي

هههههههههههه لا نسيب رقابته ليه ربنا يخليه ونفضل فى رقبته

صبرني يارب يقول...

حسن حنفي

الله يخليك يارب ونورت

صبرني يارب يقول...

الاخ خالد

لا سمك بلطي اتفضل معانا يا فندم

تحياتي لك ونورت

صبرني يارب يقول...

فضفضه

والله يا جميل انا كل الى اعرفه انها عصافره دقهليه ما قبل المنزله

مش عارفه بقى ان فى في اسكندريه ولا ايه

والسمك تعالى والله ولا اوزعه عليكم فى المدونه ولا ايه

وربنا ينول كل واحد حلمه يارب

صبرني يارب يقول...

خواطر ليست عابره

تحياتي لك ونورت

همس الاحباب يقول...

ههههههههه
ههههههه
سمك مرة واحدة
وحضرتك اصطادتى ايه بقى سمكة ولا سمكة ونص
الحمد لله ان رحلة كانت موفقة
ولازمن الخروج وتغيير الجو وروتين الحياة لتنشيط النشاط
وبالهنا والشفا
بس بلاش تحدفينا بالشوك بعد كده
تحياتى

صبرني يارب يقول...

همس الاحباب

لا والله انا جبت يجي كيلو وزياده لوحدي

هما جابوا كتر مني بس انا طبعا كنت كالعاده مسؤله فى الرحله عن على عايز ينام والى عايز ياكل والى عايز يشرب

وطبعا الصناره بتاعتي كانت بتحلو فىعنيهم اوي ويجوا يتشاكلوا عليها

ومش هازقكلم ولا حاجه مش هابقى فاضيه بقى

هههههههههه

mayada يقول...

عصافررررررررررررررررررررره
اللي قبل المنزله ياحبيبتي يامصر
هههههههههههههه
ايه اللي خلاكي تاخدي المشوار ده علي قلبك والنبي
انا رحت حته قبلها اسمها الجماليه زياره
لصحبتي اغمي علي في الطريق كنت رحت القاهره مرتين ورجعت ارحم
رحله شعيده ياام مريم بحب السمك مقلي علي فكره

صبرني يارب يقول...

مياده

والله هو فعلا اسوأ حاجه طول المشوار
بس والله عدى يعنى ساعه ونص اهو كنا بنرغي طول الطريق واحنا رايحين

واحنا راجعين انا نمت شويه انا والعيال

والسمك هانشويه بقى ما تبقيش كده ههههههههههه

هانى زينهم يقول...

اول مرة ازور المدونة الاقى اكلة سمك وانا باعشقه الصراحة يبقى اكيد حماتى داعيالى !!
بالهنا والشفا وسعيد بالتعرف على المدونة وتقبلى مرورى

صبرني يارب يقول...

هاني زينهم

اتفضل معانا
الله يخليك وانا اسعد بمرورك

ربنا يكرمك يارب ونورت

mony يقول...

يا بختك يا صبرني


فعلا خروجة تحححححفة



بس المشكلة اننا مانعرفش نعمل كده فيييين؟؟


انا مش بقر ولا حاجة لحسن تقولي اني بقر عليكي ولا حاجة

بسم الله ماشاء الله


ربنا يباركلكم في بعض و يهنيكم ببعض و بالهنا و الشفا

mostafa rayan يقول...

بالهنا والشفا السمك
وربنا يحققلك كل احلامك
تحياتي لك ودمت بخير

ahmed_k يقول...

أيوه بحب اكل السمك جدا
بس ياريت يكون فاضل حاجه
والتجمع الأسري طبعا شيئ رائع
وبيحس بيها العزاب أمثالي لما ساعات الواحد بيكون في شيئ مضايقه ويروح يقعد عالبحر (بحر بجد مش ترعه هههه)
شويه وببقى عايز أصطاد بس
مبيكونش معايا حد يشد السناره هههههه

حمدالله على السلامه ورحله سعيده
وتحياتي لرضا و مريم وخالد

صبرني يارب يقول...

مصطفى ريان

تحياتي لك ونورت

صبرني يارب يقول...

موني

تعالى نفس المكان ونتقابل هناك
هههههههههه
على فكره احنا سافرنا بالعربيه ساعه ونص مش عارفه من عندكم كام بقى هاسألك والله

وبعدين قري يا ستى اشمعن انتى
ههههههههههههه
مع انى غلبانه ومش باتنصف فى فسحه يعنى بس اهو اتنصفت المره دي بقى

يارب ينفع واقابلك هناك والطعم علينا يا ستى هههههههه
نورتي يا جميل

صبرني يارب يقول...

استاذنا الغالي احمد

ماشي ماشي بتغيظنا بالبحر ماشي ياعم

انا على فكره صياده قديمه من البحر اول مره اصطاد نيل

وال اداك بحر يدينا يااستاذنا

وايه حكاية عازب دي طب ما نغير الاوضاع نشوفلك عروسه يا استاذنا
قول بس انت وانا اجيبلك عروسه من بلدكم وحياتك ههههههههههههه

نور الملايكة يقول...

سمك انتي بتقولي سمك هههههههه دي اكتر اكلة ماما بتحبها وبكل انواعه
المهم بالهنا والشفا ليكم وان شاء الله تحققي كل اللي انتي عايزاها وينصلح كل السلبيات مش في العصافرة بس في البلد كلها ..
لكي مني كل تحياتي

Anonymous يقول...

ياحبيبتى بالهنا والشفا على السمك الجميل ده-اناباحب اصطاد بس باخاف انزل البحر بالمركب وباصطاد من على الشط بس دايما حظى فى السمك الصغير ومرة اصطدت كابوريا وصعبت على ومرضيتش اكلها-بس جوزى بيصطاد كويس ودايما سمك كبير والحمد لله-بس انا الى بادبس فى تنظيفه لما زهقت وبقيت اوديه يتنظف بره-الصيد عندنا فى دبى حلو بس ليه مواسم علشان الحر والرطوبه الجامده هنا -تحياتى ليك - داليا

صبرني يارب يقول...

دالياااااااااااااااا

كده فكرتينى بالذي مضىىىىىىىى

انا يا بنتى ياما اصطادت فى ابوظبي من على البحر وسمك كبير وصغير وكل حاجه

والكابورياااااا اه من الكابوريا

مين دي الي صعبت عليكى ؟؟؟؟؟؟

ده انا ياما جريت وراها على الشط لحد ما امسكها
كنت باكلها اول ما اروح وحياتك

وكنا فى الحر الجامد بنروح الساعه 12 بالليل ونروح لماالنهار يطلع

كنت والله باطبخها واكلها الساعه 7 الصبح كنت حامل بقىىىىىى وباتوحم

احلى كابوريا واحلى سمك كلته هو الىانا اصطادته

هيييييييييييييه كانت اياااااام فكرتينى
تحياتي ليكى يا داليا ونورتي

صبرني يارب يقول...

طرئعة دماغ

اهلا يا جميل نورتي

اتفضلي معانا سمك انتى وماما

DR.HAMAS يقول...

انا بحب الصيد بصراحة

بس بقالى فترة طويلة مروحتش اصطاد

على فكرة جميلة التعليقات

سواء الايجابى منها و السلبى




جزاكم الله خيرا






د.حماس

صبرني يارب يقول...

دكتور حماس

انا كمان كان بقالي كتير ما اصطادتش وكانت تجربه حلو يلا اعمل زينا

ربنا يكرمك يارب ونورت المدونه وصاحبتها

واحدة مفروسة يقول...

ههههههههههههههه
طبعا و العادي انى متأخرة عن البوست يومين
انا قلت تكوني نضفتي السمك
و تبلتيه
و سوتيه
يااادوبك آجي على الاكل على طول
لا المصيبة تطلبي من المساعدة فى تنضيفه و لا حاجه

المهم يا ست صبرني
ان بلدنا فيها حاجات جميله اوي
و مناطق ولا احلى... و ولا اروع
بس تقولى ايه للأمخاخ المصريه
همه اللى بيرموا الزباله
و الحيوانات النافقة
همه اللى موسخين يا امي
الحكمه مالهاش دعوة على فكرة
هوه احنا نوسخ وة الحكومة تلم زبالتنا
كفاية بيلموها من الصفايح الكبيرة
كمان حيمشوا ورا كطل واحد ينضف وراه
ديه بقت حاجه تفرس


اوعي ترمي الراس بتاعة السمكة
انا بحبها
بالف هنل و شفا

قوس قزح يقول...

الله باين عليه مكان جميل
فين ده ؟؟
ما تيجى طيب نعمل رحلة كلنا سوا للمكان ده ؟

اما عن العيوب فللاسف مفيش حاجة فى مصر بتكون حلوة 100% الا لو كانت معمولة لطبقة معينة من الناس

و بعدين ازاى يفوتك انك تصورى التوكتوك و هو بيستحمى .. ده كان هيبقى منظر بمليون جنيه ههههههههه

عايزين بقى تعملى السمك ده بطريقة جديدة و تجربى فينا :)

ربنا يسعدكم دايما و تكون على طول ماسكين فى زمامير رقاب بعض

بطلب الخير مش خناق متخافيش ههههههههههههههه


سلام

mahasen saber يقول...

بس لمة العيله تمحى اى شئ وحش باستيكه ...اسالينى انا دى حتى الحاجات دى بتبقى ذكرىحلوه وبنفتكرها ونبتسم

صبرني يارب يقول...

يا مفروسه مش عارفين ناكله الجو برد وعايز اكل بقى شوربات وكده

عينك فييييييه عارفااااااكي

هههههههههههههه

واه الحكومه المفروض تمشي تلم زبالتنا على فكره بفلوسنا يا حلوه

صبرني يارب يقول...

محاسن صابر

ده اكيد فعلا
انا عن نفسي فاكره كويس لما كنت باروح مع بابا اصطاد برضه
صحيح ما كناش بنجيب سمك بس عاااااادي اي فسفوسة سمك كانت بتبقى حاجه جامده يعنى

صبرني يارب يقول...

والله يا داليا انا فعلا فكرت فى الموضوع ده
وسألت رضا على المسافه من القاهره لهناك عشان موني بس قالي انه هايبقى مشوار جامد جدا حرام يعنى نموتكم معانا

بس احنا ممكن بقى لو الجو اتحسن نشوف مكان تاني يكون فى النص يعنى ونروح

الللللله وربنا تبقى جميله

والتصوير والله كان نفسي بس عارفه ايدى مش فاضيه انا على طول عشان امسك الموبايل واشتغل بالعافيه صورت العيال كده صورتين هناك

مواطن مصرى نايم يقول...

ههههههههههههه
ماشى
بس انتى مش بتصدعينا بجد
اهم حاجة انكم اتبسطوا
ربنا يجعل حياتكم كلها سعادة يا رب
ان شاء الله
بس اول مرة اعرف ان فى مكان تانى اسمه العصافرة
غير العصافرة اللى انا ساكن فيها بتاعة اسكندرية
اللى يعيش يا ما يشوف
ههههههههه

و المرة الجاية عاوزينك تصطادي حيتان
هههههه

تحياتى

اسلام

مواطن مصرى نايم يقول...

اه صحيح نسيت اقول
برغم انى اسكندرانى
لكن مش بحب اسمع حتى اسم السمك
مش بحب اكله خالص
بس ممكن اصطاد
لكن اكله صعب شوية

صبرني يارب يقول...

اخس عليك يا اسلام
حد يكره السمك

ده انا باحب البحر بميته وسماه وسمكه واي حاجه تبعه

انت اسكندراين يااسلاااااام تب تبدل معايا ؟؟؟

وفى العصافره دقهليه مدينه من المدن الجديده الغير مفعله تماما زي اي مشروع بدأ ولم يكتمل
تحياتي لك ونورت

Anonymous يقول...

هو رضا رايح تانى امتى
مين رضا ؟

شفـقــة و إحســــان يقول...

انا ماليش دعوة انا عايزة سمك
كده برضوا تروحى لوحدك يا وحشة
المرة اللى جاية هحضر السنارة واجى معاكى

صبرني يارب يقول...

شفقه هانم

بس كده والله يا رييييييت

بجد لما موني وقوس قزح قالولي قلت لرضا شوفلنا مكان يكون قريب من القاهره عشان ينفع نتقابل كلنا لو حصل هاقولك
ولو الجو بقى برد بقى ونخاف على العيال بس مش مشكله جاي الصيف بعد الشتا

تحياتي ليكى ونورتي يا جميل

امرأة الميزان يقول...

الحلو ما يكملش هي دي العادة

المهم المهم ان انتوا انبسطواا