الثلاثاء، 21 أكتوبر 2008

كلهم فوزي


يعني الاول احب اعتذر لكم عن ارهاقي لكم بالبوستات ورا بعضها
طبعا حاسين ان في ماسورة رغي ضربت عندي
لكن والله هى جت كده المناسبات جت ورا بعضها
حتى فى مدونة الضاحكون نزلوا البوست الجديد بتاعي النهارده في وسط الزحمه
صبرني القديمه ماتت ...من النهارده فى صبرني جديده
ابقوا شوفوه
زهقتوا ؟؟
طب خلاص بلاش تشفوه
نيجى بقى لموضوع البوست النهارده
الحمله الى اطلقها الاخ سوووو
وقال اشمعن يعنى هما كلهم ليلى ما احنا كلنا فوزي ومتفقلطين ومتبهدلين وليلى مطلعه عينا
قلنا ماشي مافيش مشكله احنا عازينلك كل خير يا فوزي قصدي يا سوووو
وأنا قررت اشارك فى يوم كلهم فوزي
كمشاركه وجدنيه واحنا ما نرضالهمش الظلم ابدااااا
وفى اطار فعاليات اليوم تم عمل لقاء مع الفوزي الوحيد فى حياتي الاخ رضا
وكان تفاصيله كلأتي :
أنا : يا ترى يا اخ رضا انت بتحس فعلا انك فوزي ؟؟؟
رضا : طبعاااااا ده كلنا فوزي . فوزي جدا خالص
أنا : طب امته بتحس انك فوزي .
رضا : بصراحه انا باحس انى فوزي جدا لما باروح القاهره .
أنا بانشكاح: ليه تفتكر هناك ليلى شاده حيلها
قالي : لااااااا . لما باروح اركب المترو بيبقى في عربيات للستات وكلها فاضيه ورايقه وقاعدين هما مأنتخين فيها
فى حين باقي عربيات المترو كلها مشتركه وزحمه موووووووت وفيها ستااااات
طب اشمعن ما يبقاش فى عربيات كمان رجاااااله بس ؟؟؟!!!
ولاد البطه السوده احنا ؟؟؟
ومن هنا نطلقها مدويه لازم يعملوا عربيات مترو رجاله بس عشان هما عايزين يأنتخوا هما كمان فى المترو وبعدين خايفين على نفسهم من التحرش
وده كان راي المواطن فوزي قصدي رضا
=====================
لا بجد فعلا انا شايفه انهم فوزي بجد كلهم أو اغلبهم فى حاجه واحده بس
ان بما ان ليلى المجتمع ككل راكب على نفسها وخانقها
ففي ليلات كتير بتطلع علي فوزي كل الى اتربت عليه غلط
حقيقى وبطلع عين الى خلفوا فوزي بكل دم بارد
وانتم عارفين بقى ان كيدهن عظيم
وبتبقى حاسه انها داخله مع فوزي حرب مش مع فوزي بس
لا مع فوزي واهله واي حاجه من طرفه
حرب غالب ومغلوب
حرب فيها جرحى وضحايا قد تكون قلبيهما
بيبقى في تحفز يعنى للمشاكل والهبل
والله انا ما زلت مصره ان مش فوزي خالص هو الى ظالم ليلى
هو يمكن يكون بعضهم هو المساعد على ظلم ليلى او احد ادوات الظلم
الا انه ابدا مش هو الى ظالمها
ليلى بتظلم نفسها وبتسمع للمجتمع كله بافكاره يظلمها
ومن هنا اطلقها مدويه يا ليلى خدي بالك من فوزي مالكيش بركه الا هو
فوزي عايز يقف جمبك بس مش عارف ازاي
دوري انتى على حقك وعرفيه حقك عشان يقف جمبك
وعنينا لك يا عم فوزي قصدي يا عم سوووووو
تحياتي لكم
ويارب ما حدش يفجر المدونه من كتر الرغي

هناك 45 تعليقًا:

Soooo يقول...

وشهد شاهد من اهلها

اهو
جبتش حاجه من عندي انا

والله الرجاله اغلب من الغلب
عايزين بس اللي تقدر تناغشهم وتاكل بعقلهم حلاوة

والف شكر ياستي على تشجيعك لحملة كلنا فوزي
وانتي من الاحرار


ملحوظه
الحكايه مش جواز وبنت الحلال وكده .. الحكايه في الاول والاخر هي سخريه من الحاله اللي وصلنا ليها من عدم قدرتنا على التواصل مع بعض





سلاموووووووووووووز

صبرني يارب يقول...

ايوه سوووووووو ما صدق بقى ويقولك اغلب من الغلب وهايقطعوا هدومهم الرجاله بقى ويربطوا عنيهم

تحياتي لك يا فوزي

بس انا قاعد ه هناك فى الفيس بوك
مش عارفه اعمل اي حاجه
اصل انا ماليش في خالص

تحياتي لك

mony يقول...

ههههههه



حلوة فوزي ده


دا تامر ما هيصدق لما اقوله علي الفكرة


اهه من نفسهم حد يطبطب عليهم شوي

Sweet Violet يقول...

انا معكى طبعا ان فى و فى سواء فى ليلى او فوزى

لكن الاغلب بيبقى فوزى ليه ؟؟؟

عشان المجتمع كبر فى دماغه حكايه الرجل الشرقى اللى هو يعمل اللى عايزه وبراحته اما البنت لا و ألف لالا

زى مافى حاجات الدين فرضها على ليلى برضه الدين فرض حاجات على فوزى

المجتمع بقى حلل لفوزى كل حاجه و حرم على ليلى كل حاجه

مافيش عدل فى التعامل و سببه المجتمع اللى هو انا و انتى و غيرنا كتير

لو كل واحد فكر و نفض من على دماغه تراب العادات والتقاليد اللى هى اساسا مخالفه للدين صدقينى ولا هايكون فى فوزى و لا ليلى

صبرني يارب يقول...

يا ضد التيار

شوف لا ليلى عدوه فوزي ولا فوزي عدوها

الحكايه كلها ان المجتمع فيه اخطاء
عايزه اصلاح
مش هايكون الا باتباع الدستور الالهي

تمام زي ما انتى بتقولي

وطبعا على الجانبي فى ناس محترمين وفى ناس مش تمام
تحياتي لكي

صبرني يارب يقول...

موني

يلا بسرعه بقى روحي اعملي لقاء مع الاخ تامر هو كمان
شوفيه بيبقى فوزي امته

هما اساسا بيتصعبنوا على طول وغلابه يعنى

تحياتي ليكى يا جميل

mostafa rayan يقول...

بصي طبعا انا مش فوزي ومش هسمح لحد ابدا يخليني فوزي بس انا متفق معاك في ررأيك وكمان شاكر جدا ليكي تعاطفك مع فوزي وكل
رغم اني مقتنع ان ليلي مالهاش غير فوزي وفوزي مالهوش غير ليلي

romansy يقول...

فوزى
بكره بقى يطلع كلنا برعى
وكلنا حسنى
وكلنا يسرى

بس الاكيد اللى كلنا مجروح

خمسة فضفضة يقول...

السلام عليكم ورحمة الله وبركاته

شوفي يا صبرني بما ان احنا في بلد ديموكراتي
وبما ان حرية الكلام والفضفضة مكفوله للجميع
وبما ان اي حد زهقان من اي حاجه لازم يطلعها من جواه والا تجيله عقده نفساويه مكلكعه ومانعرفش نفكهالو
فنحن لسنا ضد فوزي ، فليتحدث كل فوزي ويبوح بما يجول في معاميع عقله الباطن والظاهر كمان
لعل وعسي يمكن لما كل فوزي يبقي سليم نفساويا ما يطلعش عقده علي ليلي ويقرفها في عيشتها ..ههههههههههه



----------

كل سنة وانت طيبه وعقبال 100 سنة جواز
انا كمان عيد جوازي كان الشهر ده ، ماهو شهر اكتوبر المجيد بقي وكله انتصارات :)))))))))



سلام

صبرني يارب يقول...

مصطفى ريان

طبعاااااااليلى ما لهاش غير فوزي وفوزي مالوش غير ليلى مافيش كلام

تحيات لك

مش عارفه ليه انا مصممه اقرااسمك ريحان مش ريان
هههههههههههههههههههه

يلا حصل خير

صبرني يارب يقول...

رومانسي

بلاش ابوس ايدك كلنا حسني دي مش ناقصين كفايه الى عندنا

ويارب ما نكون مجروحين ابدا

صبرني يارب يقول...

خمسه فضفضه

هههههههههههههههههه

تصوري فعلا
خيليهم يا اختي يطلعوافى قلبهم ويفكوا عقدهم
ههههههه
تحياتي لك يا جميل

الطائر الحزين يقول...

ماشى يا عم سوو

متلقيش الا فوزى

طيب قول كلنا عبد الجبار

صبرني يارب يقول...

طائر

ايه ده ماله فوزي ده امور خالص

نورت يا طائر

tarek momen يقول...

مين صاحب الصورة دي

صبرني يارب يقول...

استاذ طارق مؤمن


والله ما انا عارفه ده الشعار ده انا جايباه من عند سوووو

وجوزي سألنى نفس السؤال وقالي ذنبه ايه الراجل ده تبهدلوه معاكم

انا ماليش دعوه يا فندم حضرتك انا هاسأل سو واقول

اااااااه ياسو يا جايبلي الكلام

Sherif يقول...

هو السؤال الأول .. الصورة اللى فوق
مين الأخ ؟

ثانيا .. يعنى احنا اتخوتنا بليلى .. مع ان ليلى هى اللى جننت قيس وودته المورستان وفى الآخر راحت اتجوزت ابن عمها لان الاول كان موش من مستواها

ده عدل؟

ojg يقول...

حبيبة قلبي
يا بنتي شوفي
لا كلهم فوزي ولا كلنا ليلى
لو كل واحد في الاتنين عرف حقوقه وواجباته صح
وحس باللي قدامه
وعرف اللي قدامه محتاج ايه وحققهوله قد ما يقدر
بجد بجد هيبقى كلنا أحمد ومني
ولا هيبقى فيه ليلى ولا فوزي
بس سيبك انتي
فوزي صورته زي القمر
:))
حد بقى في الليلات عمل صورة حلوة كده للجروب بتاعهم؟
:)
وبالنسبة للمترو
أنا بقترح ان العربيات تبقى مقسومة نص حريمي ونص رجالي
كده بقى هنريح ونستريح
:))
ولا إيه؟

صبرني يارب يقول...

شريف

والله انا ماليش دعوه يا جدعان بالصوره

الله يسامحك يا سووووو

صبرني يارب يقول...

اوجي
بصي يا جميل انا معاكي تمامافى الكلام الى بتقوليه

بس اساسا مش فوزي هو سبب شقاء ليلى والعكس
والله العظيم كلهم ظالمين نفسهم

وظالمنا احنا الاثنين المجتمع الى افكاره غلط ومنافيه للشرع فعلا

واحنا بنبصم عليها من غير اي اعمال للعقل

وبالنسبه للمترو اقتراح حلو جدا جدا

بس الى يبقى يعبرنا يعنى

أنا حر يقول...

ياستي والله احنا حاجة واحدة مكملة لبعض ولا ليلى ولا فوزي
كلنا لينا نفس الحقوق وعلينا نفس الواجبات
هما الستات كده والرجالة برضه مش شايفين غير انهم هما بس اللي مظلومين وعلشان ما يحصلش لبس انا طبعا من الرجالة بس اللي شايفين نفسهم بشر زي الستات يعني كلنا حاجة واحدة كلنا بشر
تحياتي

صبرني يارب يقول...

انا حر

حقيقى انا معاك يا اخي والله فى كل كلامك

بس المهم نعرف بصحيح ايه هى الواجبات والحقوق
وما نستهبلش وناخد من الشرع الى على هوانا
تحياتي لك ونورت

mohamed يقول...

عزبزتى
نعم كل الرجال فوزى
وكل النساء ليلى
كلهم مقهورين
كلهم أغلقوا عقولهم
كلهم بحاولوا قهر الاخربن
كلهم فقدوا الاحساس بقيمة الانسان
كلهم يتكلموا كالبغباوات
كلهم هدفهم الماده


كلهم جباربن مع الضعيف
وكلهم ضعفاء أذلاء مع القوى

Anonymous يقول...

والله انتي زي العسل يا غير مطحونه

وفعلا انا كل لما ادخل مدونه او اي موقع على الفاس بوك الاقي هجوم شديد جدا جدا على فوزي ليه مش عارف

لدرجه انها بقت موجه عامه من الهجوم على فوزي
وبالذات من بعض البنات اللي لسه ما اتجوزوش وسنهم كبر شويه
مش عايز اقول عوانس
بالاقيهم بيهاجموا الرجاله بصوره غير طبيعيه

مش ممكن هجوم فظيع ولا اكنه هوه السبب في العنوسه اللي هما فيها ديه واللي مش مصدقني يدخل على جروب

محبي مدونة عايزة اتجوز بالفاس بوك

مبهدلين الرجل بهدله مش ممكنه خاااالص
لدرجه ان الرجالة اللي بتدخل للجروب وتعترض بيتم الغاء عضويتها عشان يكملوا تقطيع في لحم الرجل

عندهم شعار رافعينه ان الرجاله ماتت في الحرب

ربنا يشفيهم

صبرني يارب يقول...

الاخ محمد

كالعاده يا استاذ محمد تعجز فى الايجاز
وتصيب الهدف بابرز واقل الكلمات

حقيقى تحياتي لك بيعجبنى ردودك جدا

صبرني يارب يقول...

غير معرف

انا ما اعرفش المجموعه دي

لكن الى اعرفه ان همامش معاديين الرجل بسبب تأخرهم فى الجواز

أنا اصدقك انهم يعادوا المجتمع ككل لانه هو السبب فى الى حصلهم ده

المجتمع ظلمهم يا اخي الفاضل
حرمهم من حقهم الطبيعى فى تكوين اسره وحياه طبيعيه

وخلي بالك انا يمكن كنت باتابع عايزه اتجوز وبعض مدونات تانيه
ولقيت انهم يا عينى من كتر ما شافوا من اصناف رجاله تستاهل الحرق
يعنى مع احترامي لحضرتك
الا ان فعلا فى ناس بتعتبر الى اتأخر سن جوازها شويه تكون رميه

فحضرتك لو عندك يارب عند بنت او اخت اتأخر سن جوازها كنت تحس بمشكلتهم دي

انا يمكن قربت من المشكله لاسباب كتير
عشان كده انا متفهمه موقفهم

لكن حقيقى المجتمع بافكاره ظلم البنات دي فارجوك ما تظلمهمش

تحياتي لك ونورت
وبالمناسبه بلاش العسل

nody يقول...

بصى ياستى
ليلى هى الى بتظلم ليلى
للاسف مش فوزى
ماهى ليلى دى هى الى ربنت ليلى على الضعف
وربت فوزى على الانانيه
يبقى فوزى حتى لما بيكون ظالم
بتكون الى معلماه الظلم ليلى
وانا معاكى ان فيه فوزى كتير متاخد حقه
لكن مش زى ليلى

تحياتى

صبرني يارب يقول...

نودي

اه انا معاكي فى الكلام تماما

بس مش ليلى بس الى بتربيه على كده ليلى وجوز ليلى ومنظومة المجتمع ككل

تحياتي ليكى يا جميل ونورتي

canary يقول...

.
لالالا واضح ان فوزى بتاعك أثر عليكى

وهو اللى خلاكى تقولى الكلام دة

مترو ايه اللى عاوزين عربيات مخصوص

ليهم فيه مش كفايه القهر اللى

معيشينا فيه وهما عايشين فى نعيم

دى بقى رغى واحدة غلاويه وقلبها اسود

متخفيش محدش يقدر يفجّر مدونتك يا قمر

صبرني يارب يقول...

كناري

ههههههههههههههه
لا بصي الحق يتقال لا هما فى نعيم ولا احنا فى نعيم
هما برضه بيتعبوا
بس مافيش مانع انهم بيأنتخوا على حسنا ومش حاسين بمجهودتنا العظيمه

تحياتي ليكى يا جميل

KHALED يقول...

برافوووووووو
واضح إنك من نوع ليلى العاقلة الراسية إللى بتعرف تجيب الدنيا لحد عندها بدل ماتروح هيا تجيبها ..

صبرني يارب يقول...

خالد

تعيش يارب

بس والله انا لا باجيب ولا باودي بس عموما عمري ما اجري ورا الدنيا ما تلزمنيش

الواحد بس عايش بما يرضى الله

تحياتي لك ونورت

Anonymous يقول...

ياحبيبتى ازاى فوزى متبهدل ومظلوم من ليلى؟كفايه ان كل غلط بيعمله المجتمع بيبرره ليه وممكن يعلق الغلط على شماعة ليلى-خدى عندك
1-لو الباشا سهر للصبح مع اصحابه يبقى ياعينى مخنوق فى الشغل او من ليلى وبيفك عن نفسه وراميها هى وعيالها فى البيت
2-لو بحلق فى واحده فى المول ومراته جنبه يبقى اكيد الغلط من ليلى لانها مش ماليه عينه اوالست الى باصلها لانها لابسه من غير هدوم او لان الشرع بيقول النظرة الاولى حلال
3-لو ضيع نص المرتب على ساعه غاليه او اكسسوارات للعربيه يبقى دى فلوسه الى تعبان فيها وهو حر
4-لو ليلى غلطت مره واشتكت له من الاولاد وتربيتهم تبقى نكديه ومش مقدرة انه مش فاضى للحاجات الهايفه دى
5-لو نسى عيد جوازه وعيد ميلادها وهى زعلت تبقى نكديه لان دماغه مش فاضيه زى دماغها وكفايه عليه الشغل
6-لو اتناقشوا فى موضوع وكان رايها صح لازم يبقى غلط لان حاشا لله ان سيادته يغلط
7-لو اترقت فى شغلهاواخدت مكافاة يبقى ده لان المدير ليه نظرة تانيه مش لانها مجتهده
8-لو فكرت انها تنزل تخرج مع صاحباتها تبقى مش مهتميه ببيتها ولا ولادهاويعينى على جوزها
9-لو واحد ضايقها فى الشارع تبقى اكيد هى السبب لانها مش محتشمة او بصت له نظرة مش ولابد
10-واخيرا وليس اخرا من حقه يتجوز 4 ولوليلى قالت لا تبقى بتعارض شرع ربنا
وتقوليلى مظلومين ياشيخه ده احنا لينا ربنا
داليا من دبى

صبرني يارب يقول...

داليا يا حبيبتى

بافرح بتعليقك على فكره

كل الى انتى قلتيه تمام وصح الصح

مش قادره اناقشك فيه

لكن انا قلتلك زي ما ليلى بتظلم نفسها وفوزي بيظلمها

كمان فوزي بيظلم ليلى وبيظلم نفسه

شوفي

فوزي لما بيعمل كل ده فى ليلى بتتحول ليلى الى جثه هامده
فى حين هو محتاج لها ما يقدرش يستغنى عنها

فى حين هو بيسعى من اول ما يشوف ليلى انه يحولها لآله ولتابع
لا لها راي ولا لها اهتمامات ولا لها عقل
ولا حتى لها جسم

عشان لا تناقشه ولا تطلب منه حاجه ولا تنشغل عنه ولا حتى حد يفكر يبصلها

وفى الاخر لما تتحول لجثه

ويبدأ هو يفتقد الى ليلى

قوم يدور على ليلى تاااااااانيه

لوكل الامور اتحطت فى نصابهاالصحيح الطرفين هايرتااااااااحوا

تحياتي لك يا داليا ولكل ليلى

حقيقى انا مقدره كل الكلام الى بتقوله وبشده
لان هو ده ا لى بيحصل

مواطن مصرى نايم يقول...

انا عن نفسى بتضامن مع اى حد سواء فوزى او ليلى
بس اصلى انا اسمى احمد
و مش ممكن اكون فوزى
و مهما كانت ليلى متوحشه
عمر كلمتى ما تنزل الارض ابدا

حنفىىىىىىى

خلااااص حتنزل المره دى لكن المرة الجاية اعملى حسابك ان كلمتى لا يمكن تنزل ابدا

هههههههههههههههههههه

خير مثال على قهر المرأة للرجل
فيلم ابن حميدو

و دور عبد الفتاح القصرى (حنفى) و كان من الاولى لسووووو انه يكتب كلنا حنفى

و الا ايه رأيك ؟؟

صبرني يارب يقول...

مواطن مصري نايم

ههههههههههههههههههههههههههههههه
حلوه حلوه حلوه حكاية حنفي دي

على فكره انا عندي شخصيات فى الحياه العامه مسمياهم حنفي فعلا
اصل الشخصيه دي فى ا لفيلم ده كانت مميزه جداااا

ودايمااقولها
انا كلمتي لا ممكن تنزل الارض ابداااااااا

تحياتي لك يا احمد ونورت

حسن حنفى يقول...

هو فوزي ناقص كفايه فوزي بقي

صبرني يارب يقول...

حسن حنفي

والله هو ما حدش ناقص خالص

تحياتي لك ونورت

mahasen saber يقول...

لالا بصى يا جميله المجتمع مقسوم نصين نص فوزى ونص ليلى واليى بيخلى فوزى فوزى مش ليلى لا ده اخلاق فوزى ولان فوزى منفذش اليى ربنا قاله فى معاملته ليليلى ..
وليلى بتبقا ليلى لانها اتعودت واتربت انها تامر ينفذ وانها وجدت لتطيع ..بس فيه ليلات كتير بينجحوا ويعيشوا حياتهم بنجاح بس فتشى جواهم وهتلاقى ليلى متربعه جوه..
يا صبرنى انا اعرف ستات والله من المناصب ما تقشعر له الابدان وبالرغم من كده بتضرب فى بيتها وتخاف تخاف تعمل رد فعل لتوصم بكلمة مطلقه
...........
فسمعونا الصلاة والسلام على اشرف الخلق احسن
يا ريت يا فوزى تعامل ليلى زى ما سيدنا محمد عامل بناته وزوجاته هتلاقى ليلى زى خديجه وعائشه وحفصه
........

صبرني يارب يقول...

ماهو ده الى انا باقوله يا محاسن

انا باقول ليلى ممكن تكون بتغلط فى فوزي او بتسيء له مش كل ليلى طبعا لكن منهم طبعا

لكن ده راجع لانها اصلا بقت فى موقف عداء منه

تخيلى لو انتى عندك طفلين وبتعاملي واحد منهم كويس اوي والتاني لا
بصرفا لنظر عن جنسهم هايكرهوا بعض

خصوصا المظلوم هايكره اخوه ويحقد عليه ويعتبره عدوه
ويفضل طول عمره يحب ياخد منه كل حاجه

نفس الحكايه
المجتمع عمل كده من الست والراجل

فرق بينهم فى المعامله وركب الراجل على رقبة الست

طبيعى بقى ان يحصل عداء داخلي بينهم

اما بالنسبه لحكاية الضرب والخوف من الطلاق انا مصدقاكي فى الموضوع ده

عشان كده باقول فيها ايه بس لما تستحيل العيشه اننا نطلق
وفيها ايه لما يكون فى تسريح باحسان
وفيها لو نبقى ناس محترمين مقدرين بعضنا ومقدرين النصيب والقدر

كتير اوي احنا ناسينه يا محاسن

بنوته مصرية يقول...

هههههههههههههههههههه

حلوة عاوزين عربية علشان ينتخو فيها

ههههههههههههههه

ماشي يا ستي بقي انتي معاهم بتفرحيهم فينا

بصراحه انا برضه مع فوزي الحقيقة احنا طلعنا فيها زياده مش كدا ولا ايه


موضوعك جميل اووي
تحياتي

صبرني يارب يقول...

والله يا بنوته

احنا مش عارفين نطلع منها اساسا عشان نطلع فيها

كل ما هنالك اننا بنعالج الخطأ بخطأ

تحياتي ليكى يا قمر ونورتي

Diyaa' يقول...

حلوة الدعوة دي
بصي هقول لحضرتك حاجة هحاول مكونش رغاي فيها..الخلاصة يعني
مشكلة ليلي وفوزي ..إنهم مش مستوعبين إنهم بيكملوا بعض..بيكملوا بعض كنوع من السكينة والمودة والرحمة اللي بيقدروا يكملوا بيها عبادة ربنا علي أكمل وجه وإعمار الأرض وفي نفس الوقت يستمتعوا بالدنيا كلما أمكن ذلك
وإعمار الأرض مش بس نجاح في شغل عشان فلوس ..لأ إعمار الأرض هو مسئولية كل ولي أمر فيهم عن أسرته وأولاده وشخصياتهم اللي بتخرج مشوهة لقلة الخبرة أو الإنشغال أو الملل أو عدم التفاهم بين الزوجين والعند علي حساب الأولاد..فبتكون الخلاصة..ملايين ليلي وفوزي خارجين للمجتمع بشخصيات نصها مخرباة والنص الباقي بيشاور عقله
فبنوصل للمهازل اللي بتحصل والتفكك الأسري الشنيع اللي بيتوغل وبينتشر للأسف في مجتمعنا المشغول بالكورة وبستار أكاديمي وبالباديهات والستريتشات والتحرش وألعاب الكمبيوتر وكل حاجة تبعدنا عن فهم تعليمات اللي خلقنا وفهم دورنا في الحياة أصلاً كان إيه
فهيا مشكلة أزلية بتزيد جيل بعد جيل..زي هرم مقلوب كده..قاعدته كانت فيها 80% من فوزي وليلي مثلاً عاقلين ويعتمد عليهم في بناء وحدة المجتمع وهيا الأسرة دلوقتي بقوا 10% بس وبيقلوا ..دعواتك بالهداية للجميع
مفيش حل غير كده أعتقد في ظل تعليم عقيم ونظام ديكتاتوري مش عايز الناس توعي وتفوق وتفهم دينها ودنيتها بشكل صح عايزنا نتلهي في تصفيات كاس العالم والحضري وإيناس الدغيدي وسوزان تميم وهو يخرب البلد من الناحية التانية عشان مصلحته ومصلحة إبنه وعصابة الأربعين ألف حرامي اللي حواليهم..وأسف للإطالة
تحياتي :)

Diyaa' يقول...

مثال..حضرتك مسمية نفسك امرأة غير مطحونة وده معناه قناعة ورجاحة عقل قدرتي معاهم تكتشفي نعمة ربنا عليكي
الباقيين بقي..سواء ليلي أو فوزي..أغلبهم بيبقي حتي لو نام علي ريش نعام وعاش احسن عيشة برضه مفيش حاجة بتعجب ودائم التذمر والشكوي ممكن ميقومش بدوره صح والمهم إنه يطلع غيره غلطانين وبس :)
ربنا يديم عليكي نعمة القناعة

صبرني يارب يقول...

ضياء

معاك يا استاذنا فى كل كلمه قلتها بالتمام والكمال

تحياتي لك ونورت