الأحد، 9 نوفمبر 2008

بنت الاقاليم راحت مصر المحروسه يا ولاد

رضا والعيال عند الهرم
سلام عليكم

وحشتوني ومن ساعة ما جيت من القاهره امبارح وانا قاعده الف عليكوا ومش لاحقه اخلص قرايه انا هنا كل يوم على فكره حبك تكتبوا كلكم وانا مش هنا ولا ايه .


يلا بكره نخلصكم ان شاء الله

انا طبعا زي ما انتم عارفين لو ما حكيتش لكم على كل حاجه واكلت ودانكم مش بيجيلى نوم فأنا عايزه احكيلكم على الحدث الجلل الى حصلي يومي الخميس والجمعه تفصيييييلا .


انا كنت رايحه القاهره المفروض عشان ازور خالتي عشان الله يشفيها كانت عامله عمليه .وقلت هما 24 ساعه ونرجع على طول

المهم بعد ما قررت السفر اكتشفت ان التجمع بتاع خيخه هايكون يوم الجمعه فقمت طبعا مسكت فى زمارة رقبة رضا هههههههههههه برضه لحد ما قالي خلااااااااص هاوديكى بس مش متبرع مش تعلقوني بقى تصفوا دمي وتقعدي انتى مع اصحابك هههههههههههه.( لا بس هو حقيقى خاف احسن يتعب واحنا كنا مسافرين يومها وهو الى سايق )


المهم روحنا القاهره بعد تجيزات مضنيه والطريق كان حلو اوي والجو كان جميل والعيال ناموا والدنيا هاااااااديه وانا عماله ارغي انا ورضا وجبنا سيرتكم وقطعنا فى فروتكم كويس . لحد ما وصلنا الطريق الدائري قال رضا قالي هو احسن عشان البلد زمانها زحمه

قال زحمه قااااااال . وقفنا لما طلع عنينا يا سيدى الفاضل بتاع نص ساعه ولا اكتر فيييييييين لحد ما خرجنا ولله الحمد ومشينا مافيش عشر دقايق كده ودخلنا نفس المشكله تاااااااني فى شارع مش عارفه اسمه ايه بس كان فيه الهيئه العربيه للتصنيع . والواحد كان فى الاول بيقول عدي يا ليله وبندندن يعنى بدل الكاست عشان بايظ بالغيظه فى البت مريم ما كانش عاجبها اغنية عيون القلب .

بس جيت للاخر بقى والعيال صحيوا وقرفوني والحر اشتغل بتاع القاهره والمناظر فى العربيات الى حواليا تصد المنافس وانتم عارفين انا اقليميه بقى مش واخده على الهم ده . المهم وصلنا بعد العذاب والضنا مدينة نصر الساعه 8 مساءا .

كنت ناويه اروح مشوار ما قدرتش خلاص هنجت تماما ضربت سندوتش جمبري من كوك دور ونمت ما حطيتش منطق للصبح .ولا منبهات مأثره ولا اي حااااااااااجه .


وبعدين كان فى اقتراح بقى اتقال ان بما ان انا رايحه الدقي عشان التجمع بتاع خيخه يبقى نكمل بقى نودي العيال الاهرامات . وقلنا مااااااشي وصحينا ولبست العيال وهوب شدينا على الدقي


فى الدقي بقى بجد كنت فرحانه اوي رغم ان الناس كانوا قليلين جدا وانا كان نفسي اشوف كل الناس كل المدونين الى اعرفهم والى ما اعرفهمش لكن الى شوفتهم طبعا شرفوني وفرحت بهم اوي مش هاقول اسامي عشان ما انساش حد ويزعل لكن بجد كنت فرحانه اوي

طبعا ما اتبرعتش انتم عارفين انا دمي هربان ههههههههه عندي انيميا وخيخه بتقول كمان السنان لها علاقه ودي كمان ضاربه عندي تماما .

وقعدت معاهم شويه وبعدين مشيت بقى عشان نلحق وقتنا

وطلعنا الهرم

اه والله تخيلوا ان انا ما كنتش شوفت الهرم قبل كده ؟؟؟!!! اه والله طول عمري باروح القاهره فى الغالب مش باخرج بره مدينة نصر عشان بتبقى زيارات قصيره وكده يعنى .


طبعا ولادي كانوا هاتهبلوا خصوصا خالد لما شاف الجمال والحصان كان حاسس نفسه فى حديقة حيوانات ومش فاهم الهرم ولا الكلام ده .

انا كمان كان نفسي اركب الجمل بصراحه بس المشكله ان ما كنتش عامله حسابي على خروجه اساسا


المهم بيقولك ايه قليل البخت اييييييييه يلاقي خوفوا نايم وقافلين الهرم

قلنا نروح ندخل الهرم خصوصا ان انا ورضا مفتونين بالفراعنه اوي بس المشكله اننا كنا راكنين عند الهرم ا لاصغر

فرجعنا مشي بقى مشورا زي الفل وما اخبيش عليكم بقى رجلي باااااظت ما كنتش عامله حسابي فى الشوز على مشي خالص . وطلعت عند الباب لقيتهم بيقفلوا ويقولوا هانفتح بعد ساعه

طبعا هيهااااااات ده العيال انا سايباهم وهما مجنين ماما فى العربيه رجعنا نجر اذيال الخيبه

وكله بسبب البت السماويه مريم ما كانتش مسماحه فى المشوار وشيعتنا بنظرات الحقد والغل

جيت ابدل الشوز مع خالتي لقيت رجلي تقريبا طالعه من غير جلد قوم قعدت فى العربيه وقلتلهم خلااااااااص مش هاتحرك من مكاني ده اذهبوا انى شئتم

لفينا بقى بالعربيه شويه

ورجعنا مدينة نصر بس كانت فسحه حلو والله وما كنتش على البال .

وعلى الساعه 8 كنا فى المنصوره الحمد لله برحلة عودة هادئه جدا .


بس عارفين يا جماعه القاهره جميله اوي يوم الجمعه ا لصبح بس ما احزنني بجد وخلاني اشفقت على الناس الى عايشين فيها كمية الهباب الاسود الى على واجهات العمارات والشوارع فى المناطق الزحمه يعنى حاجه مش ممكن بجد

والبلد فاضيه تحس ان كان فى معركه من الحياه هنا وخلصت

يعنى الهباب الاسود ده انتم عايشين فيه يا جماعه كده ولا ايه ؟؟؟؟

كمان الواقفه بتاعة العربيات دي سخيييييييييفه وكنت حاسه ان انا الوحيده الى متذمره من الموضوع كان فى ناس عايشه حياتها يعنى ولا كأن فى حاجه


حقيقى القاهره دي لازم يكون لها حل

ما عادش ينفع تكبر اكتر من كده

ده فى لخفنه فى الكباري عجيبه الشوارع بقت خمس ادوار كده

ماهو احنا لو بنغير حكمنا

كنا نغير عواصمنا زي ما حصل فى كل دول العالم

وفى مصر نفسها زمان


ثانيا الصراحه قابلت ناس مفاضيح كتير فى مصر ام الدنيا ههههههههههههههههههه

بجد يعنى مش عارفه الواحد بقى يقول حلوه يا بلديييييييييي المنصوره يعنى .الا انا ضغطي بيعلى بسرعه


رضا بيبص فى المرايه واحنا فى احدى الوقفات الطويله لقيته بيقول : سجاير كمان طب عيب على الحجاب الى على دماغك

قلتله :ايه ده ؟
قالي واحده ورانا .

طبعا هو بيبص فى المرايه على طول لان العربيات عماله حوالينا يلطشوا فى بعض ميه ميه من كتر المشي والوقوف

شويه كده وقالي :اوبااااا ده في بوس ولا ايه ؟؟!!! ههههههههههه

انا مش واخده بالي وكنت بدأت اتخنق من الوقفه .

الاقيلك البت مريم بتقول :اه يا بابا فى هي باسته .

فوقتلهم بقى ايييييييييه ده هى باسته يا بابا يا حلاااااااااااوة المولد


مين ده فى ايه

أنا :

مرييييييم ما تبصيش على حد عيييييييب كده بصي قدامك عيب لما تتابعي الناس (تقولش هما فى بيت ابوهم )


رضا طبعا كاتم الضحك ويقولها: اه يا مريم عيب انا بابص فى المرايه عشان اشوف الطريق

طبعا وفى حد بيتقرص بقى وكده من تحت لتحت

=========================

المهم كانوا 24 ساعه ظراف جدا بصرف النظر عن رجلي الى بقت من غير جلد بس عادي هاتخف يعنى ههههههههههههههههه


حاليا كلنا مصابين مش عارفه ليه

انا رجليا بجد تعبانه اوي

ورحمه وقعت فى الحمام واخدتها زواقه تحت عينها

وخالد وقع برضه وعنده كوره فوق مناخيره

ورضا واخد دور برد عجب


اهو ده بقى المثل الى بيقول قلت للهم رايحه اتفسح قال وراك وراك هو انا مكسح

هههههههههههههههههههه


صدعتكم اكيد اكيد لكن انا فرحانه باليوم اوي وبلقائي بخيخه والناس هناك وكان نفسي اشوف ناس اكتر من كده لكن طبعا نصيب

وطبعا هاوريهم خالد همس الاحباب ومفروسه وقوس قزح وهما عارفين ليه

الحقودين القريبين من الارض دول ههههههههههههههههههه


يلا الى صدع بقى يجي ياخد بنادول


هناك 52 تعليقًا:

mohamed يقول...

نورتى القاهره انتى ورضا وأولادكم


لكن
========================
لالجلد الطبيب المصرى1500 جلده فى السعوديه

صبرني يارب يقول...

تسلم يا اخ محمد

معاك طبعا لان الجلد بالشكل ده مش معقول ابدا

بس المفروض الى يقول لا هى حكومتنا وتطلب المحاكمه على ارضنا ونشوف ايه الموضوع

ahmed_k يقول...

أنا عن نفسي محضر الريفو هههههه
حمدالله على السلامه يا أم مريم
ورحله سعيده وإن شاء الله تكون خالتك
بقت كويسه وصحتها حلوه
ألا بصحيح أيه أخبار محمد ؟؟؟؟؟؟
إن شاء الله يكون بخير
ورحمه جديده على أنا كنت عارف خالد ومريم لكن رحمه أول مره أعرفها
ياتري في الصوره مين فيهم مريم ومين رحمه؟

بس بجد اللي كان في العربيه اللي وراكم ده؟؟؟؟؟ في الشارع كده بدون كسوف
يمكن كانت بتوشوشه ولا حاجه!!!!
لالالالالا ظلمتيهم يا أم مريم ههههههههه

حمدالله على السلامه

صبرني يارب يقول...

تعيش يارب يا استاذ احمد

الحمد لله خالتي بقت كويسه بس بندور على عروسه لعمي بقى الى هو جوزها ههههههههههه

ومريم هى الكبيره الى لابسه اخضر ورحمه الي لابسه موف

ومحمد الحمد لله بقى احسن كتير وطلع من المستشفى وبيروح متابعتا كل اسبوع
ربنا يطمنا على سيف بقى كمان

والله يمكن يا استاذ احمد بس مش انا الى شوفت شكل البت مريم دي هي ورضا نيتهم وحشه وهى كانت بتحطله قطره ههههههههههههههه

mostafa rayan يقول...

نورتي القاهرة العامرة يا فندم
-شوفتي بقي انتي ماتحملتيش يوم واحد امال احنا نعمل ايه اللي عايشين في الهم دة على طول
- بس المرة الجاية اشتري من عند مؤمن لأن كوك دور اكله مش لذيذ
تحياتي ليكي ولرضا ولخالد ومريم

صبرني يارب يقول...

مصطفى ريان

والله يا مصطفى بجد اشفقت على الناس فعلا من العناء ده

وبالنسبه لمؤمن والله انا لا ليا فى ده ولا ده على فكره والاثنين عندنا فى المنصوره من زمان على فكره وانا مش باحب اكل من بره
بس الناس الى كنا عندهم عزمونا يعنى

وشكرا لك يا مصطفى ونورت

mahasen saber يقول...

يادى النور يادى النور
بقه انتى والعيال ورجالك نزلتوا المحروسه
طب كنتى قوليلى اديكى جبنه وسمنه وزيت وسكر لحبايبنا اليى هناك ههههههه
والله انتى واسرتك ربنا يحميكوا منتهى الجمال
وبعدين العيال كده متعنطظه فى الصوره
اكيد طبعا فرحانيين بمامتهم وباباهم وابو الهول
والله يا جميله الرحلات فعلا ليها وقع السحر على الاطفال واى فسح عامتا

انا هروح الشغل وارجعلك يا قمر ليا تعليقا اخر
ربنا يباركلك فى اسرتك ويحميهملك

محاولات مخنوقة يقول...

والله انت دمك زى العسل
بجد بوست لذيذ جدا .. وانتى نورتى القاهرة وعاوزة اقولك ان انا اصلا من القاهرة وماما وبابا في القاهرة بس انا اتجوزت وتقريبا شبه مقيمة في طنطا لان اغلب شغل جوزي هناك وبصراحة انا كل ما اروح القاهرة ومع انى متعودة عليها بس بقيت اتخنق من الزحمة جدا بجد لازم يكون في حل مش عارفه كمان كام سنة هايحصل اكتر من كدا ايه
عموما الف سلامة عليكو كلكو
تحياتى
ريم

عمرو يقول...

نورتى القاهره الساحره أنتى و الأستاذ رضا و الأولاد بس يا ستى حد يزور الهرم يوم الجمعه ؟؟ مش ممكن تعرفوا تستمتعوا بيه لا يوم الجمعه و لا السبت و لا الأحد اللى هى أيام الأجازات
و أيوه عايشين فى مدينة الدخان و العوادم و الكآبه المروريه و لهذا تلاقى أهل القاهره مكفهرين عصبيين و ملابسهم سوداء مهما حافظوا على نظافتهم و لله فى أمره شئون
و مادام الأستاذ رضا بيبص فى المرايه يبقى عندك حق فى الحصار اللى فارضاه عليه
الحق ينقال يعنى هههههه

Appy يقول...

والله اسف الظروف مش خلتنى اجيلك الولاد ما شاء الله عليهم وشكله كان يوم يعنى حلو ومشيها حلو بقى
بس بزمتك مش المنصورة حلوة برضه بس عيبها برضه الزحمه

بنت الغربة يقول...

حبيبتى ياصبرنى وحشتينى - حبيبتى انت اول مرة تروحى الهرم ليه؟ماروحتيش وانت فى المدرسه ليه؟انا روحته كتير ايام الجامعه بحكم الدراسه لما زهقت -بس ولادى عمرهم ماشافوه وده بحكم الغربه الى احنا فيها ولما بننزل فى الصيف بيكون الجو حر عليهم قوى(وعلى انا كمان)اما بالنسبه للزحمه فتعالى شوفى دبى عامله ازااااااى السواقه فيها تحرق الدم كل يوم من كتر الزحمه وعادى جدا تقفى ساعه فى اشارة والناس هنا حصلهم تبلد من الزحمه محدش بيزعل ولابيتضايق وعادى -اما بالنسبه للمناظر الغلط اللى بتشوفيها فى الشارع فاحمدى ربنا انك بتربى ولادك فى مصر اهون كتتتتتتير من دبى لان عادى قوى تلاقى اتنين بيبوسوا بعض فى الشارع علنا كده - وعادى قوى تلاقى معظم الستات مش لابسين هدوم اصلا وعادى قوى تلاقى واحده تشاور لجوزك وانت راكبه معاه العربيه - او ولادك يسالوك ياماما ليه مش بتلبسى زيهم وانت خارجه وليه بتلبسى مايوه محجبات وكلهم بالبكينى على البحر - شفتى بقه الهنا الى انا فيه؟ عموما حمد الله على سلامتك وسلامة رجلك ياقمر وابقى زورينى فى دبى -داليا-

صبرني يارب يقول...

محاسن صابر

والله يا اختي مفروسه كانت عايزه بيض وسمنه بس قالتلى متأخر مالقحتش اخدلها

هههههههههههههههههههه

الله يكرمك يا جميل وانا مستنياكي

صبرني يارب يقول...

محاولات مخنوقه

والله هى الزحمه بقت فى كل حته بس ما وصلتش عندنا فى المنصوره اننا فى يوم عادي من اايام ربنا كده نقف نص ساعه فى مجرد اختناق مروري يعنى

وتسلمى ونورتينى يا جميل

صبرني يارب يقول...

يا استاذ بيبرس

والله العظيم كان معايا بسبوسه
ههههههههههه
واخدت منها للمدونين فى تجمع خيخه بتاع التبرع اسألهم بقى وحشه ولا حلوه

وبعدين رضا بيبص فى المرايه اه ما خد نصيبه خلاص
امال مين كان بيتقرص ههههههههههههههههه

وبعدين انا سألته قلتله الاستاذ بيبرس بيقول انك بتفكر
قالي قوليله لا يلدغ مؤمن من جحر مرتين انا تبت
هههههههههههههههههههههههههه

صبرني يارب يقول...

عمرو

بالعكس انا شوفت ان اليوم ده انسب يوم نروح الهرم عشان الشوارع كانت فاضيه
وصلنا الهرم من مدينى نصر فى ربع ساعه ودي ما بتحصلش

والله مشفقه عليكم من الدخان والعوادم بجد جدا

صبرني يارب يقول...

آبي
والله كان نفسي اشوفك كلكم ما حدش جه من الشله جه
لا مفروسه ولا قوس قزح ولا انتى ولا اي حدددددد
يا وحشين

والمنصوره زحمه بس مش زي القاهره برضه واساسا هما شارعين يعنى المنصوره كلها

رئيس جمهوريه نفسى يقول...

كل زيارة للقاهرة وانت فى سعادة يارب موضوع انهم يشوف حل لزحمة القاهرة صعب لانى طبعا طول ما الاهتمام الاكبر متوجة للقاهرة حيظل نزوح اهل الاقاليم ليها

صبرني يارب يقول...

بنت الغربه

والله يا داليا ايام الدراسه بابا ما كانش بيوافق على رحلات خالص بتاتا البته
وكنا بنروح القاهره كتير عند عمي بس ما بيبقاش فى وقت نروح فى حته

وبالنسبه لدبي يا جميل انا عشت هناك اربع شهور وفي الامارات عموما اربع سنين

فمش تحكيلى
وياريت ازورك وحشتنى دبي

على فكره كنت باقعد فى فنادق خمس نجوم فى دبي
يعنى شوفت اهوااااااااااااال

صبرني يارب يقول...

رئيس جمهورية نفسي

والله انا رايي ان العاصمه اساسا تتغير

تفضل القاهره على ماهى عليه وتتنقل العاصمه فى قلب الصحراء زي ما عملت السعوديه فى الرياض
وعواصم تانيه كتير حصلت كده

وتحياتي لك ونورت

همس الاحباب يقول...

ههههههههههه
ههههههههههه
بجد مش قادر امسك نفسى من الضحك
مش ليكى حل بجد
ايد ده كله يا ام مريم
كل ده حصل فى 24 ساعة بس
ومال لو 24 يوم كنتى عملتى ايه
طبعا الحمد لله ان اليوم عجبك
واحنا كنا مبسوطين جدا بتشريفك لينا
ومبسوطين ان شفنا الامورة مريم ورحمة
بس خالد كان فين ما جاااااش ليه
وعندك 2 بنادول وصلحه.
ياستى انا مالى انا قلتلك مفروسة بتوقع بينا
هههههههههههه
تحياتى

صبرني يارب يقول...

همس الاحباب

ياابو همس اه والله ده انا حتى اختصرت حاجات كتير حصلت

وخالد كان نايم فسبته مع ماما جابوا وجولنا بقى الدقي مش قلتلكم رضا بره مستنى ناس

والبنادول عنينا
وماليش دعوه هاتتقطعوا هاتتقطعوا

mayada يقول...

ههههههههههههههههههههههه
هههههههههههههه
هههههههههههه
وربنا مت من الضحك
جيت عند حته مصر ام الدنيا مليانه
مفاضيح وهلكت
ولا مريم وهي بتقول اه هي باسته يابابا
ياخرابي عليكي ضحكت ضحك
بسم الله ماشاء الاولاد قمامير ربنا يخليهميارب
ماما قاهريه ومن يوم ماجدتي ماتت مبترحش
غير للشديد القوي قوووووووووي يعني
بتقول اعصابي بتلتهب

جنّي يقول...

اتاري قاهرة المعز كانت منورة يوميها ..

الصور اللي شفتوها دي واحد على مية من اللي بيحصل .. امال لو روحتو شارع عباس العقاد ليلا ولا شارع جامعة الدول العربية كنتم قولتم ايه ..

ياريتها تيجي على سيجارة ولا مجرد بوسة بريئة .. ولا شوية هباب ..

ربنا يعافيكم .. الناس اللي برة القاهرة في نعمة والله ..

ربنا يبارك في اولادك وزوجك ..

سلام

قوس قزح يقول...

اولا نورتى القاهرة
و بعدين انا جاية و لابسة خوذة و جزمة كعب عالى
يعنى عاملة حماية و كمان على نفس المستوى

يا بنتى والله انا كان عندى استعداد بس فى مدينة نصر
انتى اللى جاية من هناك على الاكل و النوم
و تانى يوم ماشية بالعافية اهو و رجلك بقى زى ابو رجل مسلوخة

عموما تتعوض و نيجى لك المنصورة حيث الخيرات الفلاحى و الهواء النقى

المهم انك كنتى مبسوطة و اطمنتى على خالتك و قابلتى ناس جميلة من المدونين

و عقبال الزيارة الجاية و خاليها يوم شم النسيم علشان تيجى تشمى معنا العادم شوية و نننضف الجو

صبرني يارب يقول...

مياده

والله العظيم ده حصل بالحته يعنى بس انا ساعتها ما كنتش باضحك اصل كنت بجد تعبت من الواقفه وكمان عادم العربيات بعملي صداع ومغص فى نفس ذات الوقت
فكنت خلاص شميت عادم 7000 عربيه يعنى فاضل ثواني واولع فيهم
هههههههههههههههههههههههه

وماماتك قعدت فى بلدنا ياا ختي استحلتها انا عارفه حلوه يا بللللللللللدي
نورتي يا جميله

صبرني يارب يقول...

جني

تعيش يارب
لا لا ما تحكليش على عباس العقاد
انا بقالي 30 سنه بانزل القاهره مش باروح الا مكرم عبيد من قبل ما يبقى فى حاجه اسمها عباس العقاد اساسا

حضرته بكل مراحله
ما كنتش باروح ابعد من كده يعنى

عارفاااااه عارفاااااه يعنى
ههههههههههههه
تحياتي لك يا جني وهى منوره باهلها

صبرني يارب يقول...

قوس قزح

هههههههههههههه ماشي هانضف القاهره احنا

انا والله كان نفسي اشوفك فعلا بس زي ما شوفتي الساعات كانت متقطعه يعنى

بس ان شاء الله هاجي القاهره تاني يمكن على اجازة نص السنه ربنا يسهل

mony يقول...

ياااا


كان نفسي اشوفك اوي يا ام مريم

بس للاسف كان عندي ظروف قهرية تمنع تبرعي للدم
الصحة بأه علي الأد يا أُختشي


عموما خيرها في غيرها انشاء الله

KHALED يقول...

تصدقى انا كل يوم باقف بالعربية من غير ماتحرك حوالى ساعة علشان الزحمة وانا مروح .. تخيلى إن دة بقى من طقوس حياتنا اليومية ..
تبقى واقفة وسط العربيات و الدخان و التراب يوميا ..
عموما حمدا للة على السلامة و عودا حميدا ..

soulmate يقول...

اسلوبك جميل بجد وحسستينى انى اعرفك من زمان من كتر تلقائيتك وبجد انتى نورتى القاهره وبالنسبه للحاجات الى مش عجبتك للاسف اهل القاهره كلهم شايفين الحاجات دى من زمان بس خلاص اخدنا على الوضع ويا ريت تكررى الزياره كتيييييير انتى وطفالك وزوجك وربنا يسعدكو دايما بخروجات وسفريات مع بعض ويمتعكو بوقتكو

المستنصر بالله يقول...

نورتى القاهرة وان شاء الله تكررى الزياره تانى وتكون من غير اصابات


تحياتى لحضرتك

جعلوني مريض نفسيا يقول...

السلام عليكم

المدونة كبيرة محتاجة وقت طويل علشان افهم من الأول واقدر ابقي متابع

انا شوفت الموضوع الأخير ده حلو قوي الطريقة الي انتي بتحكي بيها قدرتي توصلي احساس الغير قاهري لما ينزل القاهرة

والف سلامة عليكم كلكم

وفرحت قوي لما عرفت انك من المنصورة طلعنا بلديات مع اني مرحتهاش غير 3 مرات في حياتي بس من اكثر الأماكن المحببة الي قلبي وكان نفسي اسيب القاهرة وانقل المنصورة بس بصراحة اسعار العقارات سواء شقق او اراضي في المنصور غريبة جدا مش عارف ايه سر الغلو الرهيب ده عن باقي المحافظات دي اغلي من القاهرة بكتير

صبرني يارب يقول...

موني
والله انا كان نفسي اشوف الكل واتغريييييت بقى من التجمعات الى فاتت وقلت هاشوف كل المدونين والمدونات الى انا فعلا نفسي اعرفهم كويس

بس خانوني وادوني مقلب وما جوش بس انا وراهم ورااااااهم

وان شاء الله يكون ليا نصيب تاني

صبرني يارب يقول...

مشمشه
اسمك جميل يا مشمشه
هابقى اقولك ليه بعدين

وتسلمى يارب وربنا يكرمك ونورتينى والله

صبرني يارب يقول...

خالد

والله يااستاذنا انا اشفقت عليكم جدا
وفى نفس الوقت استغلطكم برضه يعنى ارض الله واسعه يا اخي

اذا كان انا بافكر جديا انى اسيب المنصوره عشان بقت زحمه واشوف مدينه هاديه كده اعيش فيها
زي اسماعليه ولو انى ما حبيتش اهلها بصراحه

او مطروح الى ماروحتهاش اصلا وده لاني باحب البحر اساسا

ليه انتم بقى عاملين فى نفسكم كده

تحياتي للجميع والله يعينكم

صبرني يارب يقول...

المستنصر بالله
الله يكرم يارب منوره باصحابها

صبرني يارب يقول...

جعلوني مريضا نفسيا

والله انت من المنصوره ؟؟

بلدياتي يعنى

لا بس الاسعار مش للدرجه دي فى اماكن غاليه وفى اماكن عاديه

قولي اخرك كام وانا اقولك ينفع ايه لو حبيت مساعده يعنى

ونتشرف بك فى المنصوره بلدك وبلد اجدادك يا خوووووووي
ههههههههههههه

اقرا البوست الاول فى المدونه فى شهر فبراير هو الى فيه انا مين وكده

تحياتي لك ونورت

Ahmed Al-Sabbagh يقول...

القاهرة نورت
وسعدت جدا برؤياكى
احمد

رئيس جمهوريه نفسى يقول...

كان فى مشروع مقدم من قبل رئيس الوزراء بعمل عاصمة جديدة لمصر على غرار برازيليا فى البرازيل مع دعوة اليونسكو والهئيات الدولية للمساهمة فى المشروع ولما اتعرض على الرئيس قال لا بدون مناقشة فبقيت لا رغم انى المشروع كان حضارى و حيفتح فرص تانى لاستيعاب الاف البشر وخفض نسبة الكثافة السكانية في القاهرة بس لا لية من الرئيس اللة اعلم ومات المشروع في المهد

صبرني يارب يقول...

احمد الصباغ

الله يكرمك يارب والله انا الى اتشرفت بكم جميعا

صبرني يارب يقول...

رئيس جمهورية نفسي

بجد حد فعلا عمل مشروع زي ده ؟؟

طب ما انا دماغي حلوه اهو يا جماعه

طب هو المحروس رفضه ليه ؟؟؟

يمكن خاف بقى ينقل ومواصلا ت وبتاع ولا ايه ههههههههههههه
تحياتي لك يا ريس

حاجــ عيال ــات يقول...

حمد الله على سلامتك ورجعتي لنا تاني المنصورة
ويا سلام على بلدياتي وهيا رايقة وبتعمل بسبوسة
ياريت اشوفك في حفلة توقيع اشرف توفيق
جهاد مشالي

صبرني يارب يقول...

حاجات عيال

تعيشي يارب

والله انا كمان نفسي اجي ربنا يسهل قولي يارب

صفــــــاء يقول...

يخرب عقلك
دة انتى غلبتى الصعيدى اللى نزل القاهرة اول مرة
ومالك منبهرة ومزبهله كدة ليه
دة انتى حتى لما روحتى الهرم ولا شوفتيه ولا دخلتيه ولا مشيتى هناك ولا حتى ركبتى جمل
لا بس حقيقى يعنى مجالكيش نوم قبل ما تبخى الكلمتين
تقريبا لو مكنتيش قولتيهم مكنتيش نمتى للصبح اصلا
ههههههه اقولك الحق؟
انا اصلا بكرهه القاهرة جداااااا ومش بحبها ابدا ولا حبيت العيشه فيها
مالها الاقاليم بتاعتنا وهاديه وجميله ونلفها كلها فى ساعه زمن وعلى رجلينا كمان.....

صبرني يارب يقول...

صفا ء جلال

ههههههههههههههههههههه
لالا خالص انا باروح القاهره كتير على فكره

بس اول مره احكيلكم عنها يعنى

انتى عارفه الواحد من يوم ما بدأ يكتب هنا وهو بقى دقيق النظر شويتين

وفعلا الاقاليم بتاعتنا يا اختي زي الفل
انا برضه طول عمري ما باحبش القاهره

تحياتي لكى ونورتي

Dr Ibrahim يقول...

لا انا اروح اربط دماغى احسن

رحلة سعيدة ووقت طيب

وكل حاجة حلوة

د/هيما

صبرني يارب يقول...

دكتور هيما

طيب اجيبلك حاجه تربط بها

نورت يا دكتور

كـــيــــــــارا يقول...

والله انتي ثكر وكان نفسي اشوفك والعي مع العيال بقي عااااااااااااااااااااا

صبرني يارب يقول...

كيارا يا قلبي
وانا كمان كنت نفسي اشوفك والله

عاااااااااااااااااا
هاوريكم كلكم

فشكووول يقول...

السلام عليكم .. كيفكم صبرنى يا رب .. وبعدين با بنتى انتى اسمك صبرنى يارب ومش عارفه تمشى فى القاهره أمال انا اعمل ايه .. احنا ما بنشوفش اثار بلدنا ومحرومين منها وعاملين زى القرع بنمد لبره وبنورى اثار بلدنا للدنيا كلها الا اهلها .. سيبك سيبك .. مدينة المنصوره اجمل من القاهره كتير وخصوصا شارع البحر وشارع المحافظه وهناك فى الدراسات عبق السيده زينب.. تحياتى

صبرني يارب يقول...

الاخ فشكول
حضرتك نورتنا يا فندم والله

وانا والله اشفقت عليكم من الزحام فعلا
وانا برضه من ضمن حزب القرع ده ولا كنت باروح فى اي حته هى جت كده المره دي

وحضرتك تنور المنصوره والى فيها يا فندم
بس ايه علاقة ا لدراسات بالسيده زينب ؟؟؟

ojg يقول...

واضح اني هرغي كتير في التعليق
اولا انا زعلانه جداااا اني مش جيت التبرع
بس ان شاء الله نتقابل قريب
ثانيا بقى انا عايزة اقولك ان القاهره بجد بجد اللي فيها سوء تخطيط
انا حاسه انها ممكن تكون اهدى من كده لو اتخططلها تاني
ومابقتش الدنيا تلزيق
كل ما نتزنق
نقوم عاملين كوبري ولا نفق
ثالثا بقى
انا نفسي اروح الهرم
مش كنتوا تقولوا
انا عمري اصلا مارحته رغم اني من ساكني قاهرة المعز
:))
والف سلامه على الجميع
ان شاء الله تكونوا بخير