الأحد، 23 نوفمبر 2008

يعنى ايه تربيه جنسيه ؟؟

سلام عليكم

وحشتوني ووحشني اكل دماغكم رغي اوي .

النهارده ان شاء الله نرغي بخصوص موضوع مهم اوي قد يكون كل الناس تقريبا اتكلموا فيه ولكن من وجهة نظري اتكلموا فيه من ناحية واحده بس وهي التأييد والمعارضه لوجود التربيه الجنسيه فى المدارس .

وطبعا ياما اصوات علت فى الاتجاهين وبعصبيه اكتر من كونها بعقلانيه .

وخصوصا اننا فى مجتمع شرقى له طابع خاص بمجرد ذكر كلمة جنس فى اي موضوع يبقى قلة ادب وما يصحش وعيب وما الى ذلك كله.
حتى انه فى بعض المشاكل المتعلقه بالجانب ده من حياة البنى ادمين فاحنا بنفضل نترجها جانبا معلقه بلا حل بل ونتركها تتفاقم عشان عيب نتكلم فيها .

عموما وبصرف النظر عن حكاية عيب دي . فاحنا حاليا بصدد الكلام عن معنى التربيه الجنسيه اساسا.

التربيه الجنسيه هى امداد الشخص منذ طفولته بالمعلومات اللازمه حول جنسه اي نوعه وما يستدعيه ذلك من عادات سليمه يجب سلوكها واجراءات وقائيه لحماية الطفل والشخص حين يكبر ايضا.

على فكره ده انا الى مخترعه التعريف ده من خلال فهمي للموضوع .

المهم يعنى ايه الكلام ده

أنا هاديلكم امثله : يعنى لما الاب او الام يقول للولد وهو مثلا عمره سنتين ولا اقل حتى لا ما تلبسش توكه انت ولد التوكه بتاعة البنات . .... دي تربيه جنسيه

لما اقول للطفل عموما سواءا فى ذلك بنت وولد ما حدش يقلعك هدوم الا ماما وبابا وفلانه مثلا ولو حصل وحد عمل كده غصب عنك لازم تقول لماما .... دي تربيه جنسيه

لما اقول للطفل الى عمره 10 سنين خلي بالك من نفسك ما تروحش فى مكان مع حد انت ما تعرفوش ما تصاحبش ولاد اكبر منك كتير خلي بالك على نفسك ما تخليش حد يمد ايده عليك حتى لو كان بالهزار ..... دي تربيه جنسيه

لما اجي فى عمر 10 سنين للولد والبنت وجايز قبل كده كمان اديله التعريف التشريحى للاجهزه التناسليه للنوعين واعرفه هو جهازه بيشتغل ازاي وعلامات البلوغ وكل المعلومات المتعلقه بمرحله جديده من حياته .... دي تربيه جنسيه

لما يبقى عمره او عمرها 18 سنه وبيسمع ويشوف حواليه تعبيرات واحوال تثير فضوله واعياه الحصول على الصدق فيها حول الحياه الجنسيه للبشر من حقه ان يعرف كلام علمي يتناسب مع عمره وجسمه وظروفه كمان ...دي تربيه جنسيه

كل ده احنا لسه تقريبا ما وصلناش للعمليه الجنسيه نفسها صح ؟؟؟

والى احنا بنعتبرها عيب وما يصحش نتكلم فيها

رغم ان اساسا ده مش صح الا انه مش موضوعنا حاليا

العمليه الجنسيه فى حد ذاتها اخر فصل من فصول التربيه الجنسيه الى احنا بنتكلم عنها .

وحكاية اننا نحطها فى المدارس .
هو مافيهاش مشكله ابدا لكن بالنسبه لكونا دوله متخلفه ومجتمع معلش برضه متخلف
وعندنا نظام تعليمى فاسد ومتخلف برضه (الشله كلها تخلف يعنى ههههههههه)

يبقى لو حصل والتربيه الجنسيه نزلت فىا لمدارس هاتبقى مصيبه سوده ومهازل وبلاوي هاتحصل .

فضلا عن المناهج الغبيه الى هاتنزل والى يمكن يستوردوها عن غير فهم .

لكن من وجهة نظري ان موضوع حساس زي ده يكون الافضل فيه التعامل معاه بشكل خاص وعلى نطاق ضيق داخل الاسره بين الام واولادها والاب واولاده برضه .

لكن عارفين ايه المشكله ؟؟؟

ان الام والاب نفسسسسسسهم محتاجين يعرفوا الاول ايه هى التربيه الجنسيه وتكون ازاي . اه والله العظيم

صدقوني زمان ايام الجدود كانت التوعيات متوارثه فعلا وكانت موجوده على بساطتها وفقدانها للطابع العلمي الى انها كانت موجوده

فجأه سقطت مش عارفه ليه .وبقوا الام والاب يستحوا يتكلموا اولادهم .

صدقوني دى مشكله كبيره لان غياب التربيه الجنسيه دي مسببه مشاكل كبيره اوي:

اولها واخطرها التحرشات بالاطفال لو كان عنده وعي ما كانتش على الاقل ممكن تتكرر

المشاكل النفسيه والصدمات الى بياخدها المراهقين بمجرد البلوغ وعدم قدرة الاهل على احتواء المشاكل دي .

شوفت الام الى بتستنى لما البنت تبدأ حيض اصلااااا ويمكن تتصدم وتفكر نفسها هاتموت وبعدين يقتصر الكلام عن كيفيه مواجهة دم الحيض فقططططط!!!!!!!!!!!!.

وشوفت الولد الى بلغ واحتلم وما عرفش ايه ده ولما قال لابوه رزعه قلم متين !!!!!!!!!

عشان كده باقول ان الاب والام هما الى محتاجين تربيه جنسيه الاول عشان يقدروا يدوها لاولادهم .
ياريت نبطل نهرب من مشاكلنا

الحياء شعبه من شعب الايمان

لكن الخجل المرضي قد يقضي على الشخص يوما ما

طوووووولت برضه عليكم وانا ما كنتش ناويه والله
بس يلا انتم واخدين على كده

مافيش معايا بنادول كل واحد يجيب لنفسه بقى

هناك 52 تعليقًا:

الطائر الحزين يقول...

جزاك الله خيرا

أدبوهم لسبع وعلموهم لسبع وصاحبوهم لسبع

==========

مروا أبناءكم بالصلاة لسبع سنين واضربوهم عليها لعشر سنين وفرقوا بينهم في المضاجع وإذا أنكح أحدكم عبده أو أجيره فلا ينظرن إلى شيء من عورته فإنما أسفل من سرته إلى ركبتيه من عورته

صبرني يارب يقول...

وجزاكم مثليه يا طائر

ولو انى مش عارفه ايه الرابط بين الحديثين الشريفين الى حضرتك كتبتهم بالموضوع الى احنا بنتكلم فيه

يمكن تقصد نهج التعليم والتربيه ولا ايه ؟؟؟

Appy يقول...

والله برافو عليكى
بس عاوزة اقولك كلمه فى ودناتك الاب والام فى الزمن ده مش بيعلموا ولادهم علشان معتمدين على ثقافتهم الشوارعيه صدقينى عاااااااا

صبرني يارب يقول...

طب ماهي دي المصيبه يا آبي

الطفل لما مش بيلاقي مصدر للمعلومات الى ترضي فضوله تجاه نفسه والجنس الاخر بيلجأ لمصادر شوارعيه على رايك

تحياتي ليكى يا قمر

أحمد (زوج مخنوق ). يقول...

الجنس مشكلته في مصر انه زي ما قلتي خليناه عيب نتكلم فيه
كان في اعلانات اشتغلت فترة كده ان فعلا المفروض يبقى الاب و الام هما مصادر الثقافة لانهم لو ما اتكلموش فعلا هتبقى الشوارع هي المصادر و دي قمة الغلط
دخولها في المدارس او لا محتاج ترتيبات كتير يتهيألي ان احنا بوزارة التربية و التعليم الهايلة المتحضرة العطوفة على ولادها بتاعتنا دي معندناش امكانيات اننا نعملها
لما يكون مدرسة مشتركة بتاعة ثانوي في مدينة نصر و يكتشفوا وجود خمس بنات و اربع مدرسات انسات و كلهم حوامل و لسه ما دخلوش التربية الجنسية
تفتكري بعد ما يدخلوها ايه اللى هيحصل؟؟؟؟
الموضوع محتاج اصلاح للمنابع اساسا قبل ما نفكر نصلح الانتاج

راجى يقول...

انا بس عندى تعليق على التوجيهات التى تصدر من الاباء الى الابناء فى سن الطفولة وقبل البلوغ ، فلا يكفى مجرد التحذير بل ويرافقه شرح مبسط لما قد يتعرض له الطفل من ايذاءاذا تحرش به شخص ما
ايضا الرقابة والمراقبة وعدم ترك الاطفال فى الشارع او فى الحضانات ( بحجة عمل الام )والحذر من الاقارب جدا جدا
محاولة اقتناء طيور زينة او حيوانات اليفة نظيفة مثل القطط فهى تعطى دروس فى العلاقة بين الذكر والانثى بطريقة مباشرة يشاهدها الطفل بعينيه واذا سئل عما يراه فيكون من السهل الشرح فى هذه الحالة
الثقافة الدينية ( الاسلامية ، لست ادرى عن ما جاء فى الانجيل او التوراة عن هذا الموضوع )فما ورد فى ايات القران واحاديث الرسول حول هذا الموضوع يعتبر منهج متكامل وبلغة نظيفة بليغة وطبعا نحن نعرف كيف تناول القران كل شيء حول هذا الموضوع فلو كان عند الاباء ثقافة دينية فهذا يؤدى بالضرورة الى ثقافة جنسية متحضرة جدا
ولكى التحية على الموضوع الجميل وتناوله بطريقة حضارية

Sara يقول...

متفقة معاك في كل اللي قولتيه.. بس مختلفة في نقطة واحدة ..

"لما يبقى عمره او عمرها 18 سنه وبيسمع ويشوف حواليه تعبيرات واحوال تثير فضوله واعياه الحصول على الصدق فيها حول الحياه الجنسيه للبشر من حقه ان يعرف كلام علمي يتناسب مع عمره وجسمه وظروفه كمان ...دي تربيه جنسيه"

ده حقيقي بس مش عند عمر 18 سنة .. في عمر بدري عن كده بكتير .. لأن الدنيا بقت مليانة حاجات كتير تثير فضول اي انسان من عمر صغير و لو الاباء و المهات متخيلين ان ميصحش يتكلموا مع ولادهم غير بعد 18 سنة يبقوا هيتكلموا معاهم متأخر قوي ، و ساعتها ابنهم أو بنتهم هيقولهم ( مش لازم في وشهم بس ممكن في سره ) هوا انتوا جايين تتكلموا دلوقتي !!

سمكه واحده يقول...

بجد والله انا معاكي في كل كلمه قلتيها وبردو زي ما قلتي في حدود الدين والاخلاق والحياء
مش عيب ان احنا نعرف ونفهم علشان ميحصلش الجهل والتخلف اللي احنا فيه تصدقي الواحد وهو شحط كبير لسه بيعرف حجات مكنش ولا في دماغه انها موجوده في مصر وحس انه مش فاهم حاجه في اي حاجه تخيلي
بسبب عيب وغلط ومفيش داعي الكلام ده واتربي علي كده مبقاش يحاول يفهم ولا يسمع المنطقه دي حظر تجول
وده بعد كده بيسبب مشاكل كتير جدا
ياريت يكون في تربيه جنسيه سليمه
ونفهم صح بدل الواحد مهو اهطل كده
تحياتي ليكي

مواطن مصرى نايم يقول...

فعلا الموضوع مهم جداااااااااا
بس كمان لو فى توعية فمناهج التعليم بتاعتنا كان حيبقى الوضع احسن من كده

مش زى ايامى اول صدمة كانت فمنهج العلوم فتالته اعدادى
و ده سبب كبير ان الكلام فالموضوع ده يكون مخجل

مع ان لا حياء فالعلم
و ده علم
لازم الكل يعرف كده

موضوعاتك كلها مميزة بجد

تحياتى

اسلام

دكتور حر يقول...

اول مره اشوف رغي مفيد


بس انتي عديتي اهم فتره من 10 لى 18 سنه مع انها اهم فتره

لكن كمان متفق معاكي في ان الاباء هم اللي عاوزين يتربوا .......

:))))


ربنا يكرمك

صبرني يارب يقول...

احمد زوج مخنوق

ليه ما نفكرش ان لو كان فيه توعيه جنسيه كفايه كان ممكن مشكلة الحوامل دي ما حصلتش ؟؟؟

او على الاقل كانوا بقوا النص مثلا

ليه العلم متهم ؟؟؟

ليه مجرد علم البنات والناس بالحياه الجنسيه فى حد ذاته متهم
؟؟؟؟؟؟؟؟؟

وليه رابطين بين الزنا والتربيه الجنسيه ؟؟؟؟؟؟؟؟؟؟؟؟؟؟؟؟؟

يمكن لو كانوا اتربوا صح ما كانوش وصلوا لكده ده رايي

صبرني يارب يقول...

راجي

اتفق معاك كليا فى مصدر الدين الاسلامي كمصدر للتربيه الجنسيه

لكن ما زال ده يا فندم للكبار

محتاجين الكبار يفهموا كويس عشان يقدروا يفهموا الاطفال الى اكيد ما يقدروش برضه يوصولوا للمعاني المطلوبه من خلال القرآن فقط

تحياتي لحضرتك

صبرني يارب يقول...

سمكه واحده

بعد الشر عليكى من الهطل يا حبيبتى

بس طبعا العلم افضل من الجهل مهما كااااااان راي الاخرين

صبرني يارب يقول...

ساره

انا فى الموضوع كنت باضرب امثله على فكره مش باتكلم عن كل النقط

وبعدين انا قلت 18 سنه لان المفروض السنه ده هو نهاية الموضوع

وقتلها لازم يكون اخد فصول التربيه الجنسيه الى اخر فصل

وتدريجيا
وقلت كمان بما يتناسب مع عمره وظروفه وجسمه

تحياتي ليكى ونورتي يا ساره

صبرني يارب يقول...

بيبرس

هبه قطب ست محترمه وصاحبة علم فعلا مش بتيجى عشان وشنا يحمر من كلامها


وانا فعلا قلت انه من وجهة نظري احسن تكون التربيه الجنسيه مكانها البيت لان المدرسه مش مناخ ملائم حاليا للاسف ولا سيما مدارسنا وبلدنا

صبرني يارب يقول...

مواطن مصري نايم

ياريته حتى دامت الصدمه بتاعة 3 اعدادي

هما كل شويه يغيروا السنه المقرر عليها الجهاز التناسلي اصلا

وفى الاخر ما حدش بيشرحه وما حدش بيتكلم فيه وما حدش بيذاكره وما بيجبهوش فى الامتحان

ايه الفايده ؟؟؟

لازم نبطل نستسهل الجهل

صبرني يارب يقول...

دكتور حر

والله نورتنا

انا مش عديت فتره ولا حاجه

انا اساسا ما اتكلمتش بالتفصيل عن التربيه الجنسيه
انا مجرد عرفتها وانا قلت ان دي مجرد امثله

التربيه الجنسيه لازم تكون كتاب مش بوست

وانا اخترت النهايه تكون 18 سنه لان المفروض فى السن ده يكون خلص كتاب التربيه الجنسيه كله
لااااااااخر فصل
بتدريج يتناسب مع عمره وجسمه وظروفه

زي ما انا قلت

لكن طبعا من عشره ل 18 دي فعلى عالهم فتره فى التربيه الجنسيه لانها فترة المراهقه
فتره التغيرات الجسمانيه والعقليه كمان المرتبطه ارتباط وثيق بالجنس والتطور الجنسي للجسم والفكر

نوووووووووورت

راجى يقول...

راجعى كلامى تانى تلاقى انى قلت الثقافة الدينية للاباء
تحياتى

همس الاحباب يقول...

تسلم ايديكى بجد
وبارك الله فيكى
وجزاكى خيرا
انا متفق معك ان الاب والام اكثر حاجة لفهم وتطبيق التربية الجنسية السليمة
وهناك فرق بين الخجل والحياء فى العلم
ومفهومنا لابدان يختلف فى التربية الجنسية والتوعية لما يحدث من تحرش ومضايقات للاولاد والبنات فى سن صغيرة جدا
وفى الماضى برغم الاميةالمنتشرة كانت هناك تربيةجنسية للبنتمن ناحية الام بصفة خاصة واهتمام وشرح
اما الان مع انتشار التكنولوجيا انتشر الاهمال وعدم التوعية الجنسية مع زيادة الاخطار فى مجملها .
تحياتى وتقديرى

صبرني يارب يقول...

اوك يا استاذ راجي

معلش العتب على النظر

انت عارف السن بقى
ههههههههههههههههه

صبرني يارب يقول...

استاذ خالد

الله يكرمك شكرا لك نورتنا بمرورك ا لجميل

Ahmed Al-Sabbagh يقول...

ربنا يكرمك يارب
والله انا كنت بتكلم مع زميلى فى الشغل انهاردة فى نفس ذات الموضوع
وقولنا كلام كتير اوى
اسلوبك ماشاء الله راقى
ربنا يكرمك

صبرني يارب يقول...

صباغ

شكرا لك يا صباغ نورت

mony يقول...

عندك حق و الله يا صبرني

بس في حاجة عايزة اضيفها بعد اذنك

ان التحرش الجنسي بالاطفال قليل اوي اللي بالقوة

يعني المتحرش ده عايز يعمل حاجة و يعرف يوصلها
و مش هيوصلها لو الطفل عيط او اتضايق
فبيحايله و يحببه في الموضوع
اللي عايزة اقوله انه مش كله بالقوة

و هنا بيجي دور الام و الاب انهم يوعو ولادهم انهم مايتكشفوش علي حد ابداااا
الا باذن الام او الاب

و بعدين ماهم بدأوا في وزارة التربية والتعليم في بعض قري الصعيد انهم يعملوا ندوات للتربية الجنسية للبنااات بس(خدي بالك من البنات بس) و يا تري ايه دور الندوات ديه او ايه اللي بيدور فيها

بيعلموا البنات ازاي الجنس الآمن
يعني ازاي البنت تعمل اللي نفسها فيه بس من غير ما تحمل

شوفتي الحلاوة

و من بجاحتهم بدأو بالصعيد

انا ليا اقارب في الصعيد في المنيا و سوهاج

و هم اللي قالولي كده
لو كنت سمعت الكلام ده من اي حد تاني مش ممكن كنت اصدق

فأنا رأيي التربية و التعليم ما تتدخلش في الموضوع ده بتاتا


ممكن يعملوا ندوات التوعية ديه للامهات و الابهات علشان يعرفوهم يتكلموا مع ولادهم ازاي في الموضوع ده

انما منهم للعيال كده لا انا ما اطمنش

ِِAdem El-Mahdy يقول...

بسم الله الرحمن الرحيم

انا معاكى جداا فى كل كلمة

و مشكلة التربية الجمسية عندنا سببت للناس عقدة فى التعامل مع الجنسين

بقا ارتباط البنت المحترمة ان هى متحاولش تكلم ولد و العكس

طبغل فى حدود الشرع

و المشكلة الاخطر
ان عدم طرح التربية الجنسية الصحيحة
بتجعل الشباب يقدمون على وسائل اخرى للتربية كألافلام الاباحية و اقرناء السوء

صبرني يارب يقول...

موني

بصي طبعا مافيش حد مش هايحاول انه يكون بيعمل كده من غير ما يثير غضب الطفل

لكن طبعا ده ما يمنعش ان فى حالات ارهاب بتحصل طبعا للطفل بانه ما يقولش والا كذا وكذا


وبالنسبه لموضوع الصعيد ده

يعنى ازاي ما ينقوش من كتاب التربيه الجنسيه الا الفصل ا لوحيد الى ضد الوضع عندنا اصلا

يا اما الى بيدرس المنهج غبي يا اماالى وضعه اغبى
يا اما الى بيفهم اصلا هو الى ما فهمش
وكل ده وارد طبعا

وما زلت باقول احنا المفروض يكون عندنا بدل برامج لتوعيه بتاعتهم دي

يكون مكانها توعيه دينيه وصحيه مناسبه لوضعنا الدينى والشرقي

نورتي يا موني

صبرني يارب يقول...

ادم المهدي


حضرتك شرفتنا

وطبعا مش مجرد الكلام مع الولد يعتبر قلة ادب احنا عموما عندنا خلل كبير فى المجتمع

متأكده نقدر نعالجه لونرجع للقواعد الشرعيه

kochia يقول...

والله كلامك كله مظبوط
اولا الاب والام هم اللي محتاجين كدة في الاول
محتاجين وعي وثقافة ودراسة كيفية تربية ابناءهم ومحاورتهم
ولو كان الحوار ده موجود اصلا لم نكن لنحتاج التربية الجنسية في المدرسة
وبصراحة كلامك في الجون
ومحتاج كلام كتير
دراسة يعني
ومش محتاجين بنادول ولا حاجة

تحياتي

صبرني يارب يقول...

كوشيا

فعلا هو محتاج كلام كتير اوي

نورتي يا جميل

KHALED يقول...

كلام موزون وفى السليم
عجبنى الموضوع خصوصا إنة بيمس جزء كبير من التربية السليمة و إللى باعتقد إن ليها تأثير هام و مباشر على بناء الشخصية فى المستقبل

تحياتى

صبرني يارب يقول...

شكرا لك يا خالد ونورت

عمرو يقول...

الشارع مش لوحده مصدر الثقافه الجنسيه حاليا .. أيضا الفضائيات بقنواتها المتخصصه فى عرض أفلام الجنس كمان الأنترنت اللى أصبح فى متناول الجميع بما فيه من ملايين المواقع الاٍباحيه
أنا ضد تعميم فكرة الثقافه الجنسيه فى المدارس حاليا لأسباب كتيره أهمها أن المناخ العام غير ملائم لذلك لأن الموضوع حيتقلب تهريج و قلة أدب بين الطلاب و الطالبات و بلاش نغالط نفسنا و نقول لأ ولادنا مؤدبين و واعيين
دى حاجه الحاجه التانيه فين المدرس أو المدرسه الميقفين جنسيا بشكل علمى صحيح و يكونوا مؤهلين لتدريس الجنس ؟ بدون شك هم نفسهم محتاجين أصلا يتأهلوا ثقافيا لتدريس الجنس
الأب و الأم و الكبار فى الوقت الحالى تقع على عاتقهم مسئولية توعية و تنبيه أطفالهم كيفية الدخول الآمن الصحيح لهذا العالم و لازم ينزعوا من ذهنهم فكرة أن الصغار ليس لديهم خلفيه عن الجنس لأن ده غير صحيح
أييييييه الله يرحمك يا جدتى كانت دايما تنبهنا و أحنا صغيرين و تحذرنا لو حد فى الشارع قال لنا تعالوا أفرجكم على الكلب الرومى اللى تحت السلم نصوت و نجرى على طووووول

اسامه عبدالعال يقول...

المنظومه بالكامل غبيه ومتخلفه ويكفى ان اغلب حالات الطلاق والمشاكل الاسريه تكون بسبب عدم الاستقرار الجنسي للزوج والزوجه وده ما بيكنش عن عجز فيهم ولكنه بيكون عن عدم فهم فيصبح ما انتظرته الفتاه او الشاب وحلم به عند الجواز هو شئ منفر وغير ممتع مما يسبب الضرر النفسي والمشاكل الاسريه التربيه الجنسيه هى توعيه وليست انحلال ولكن نقول لمين

شاب مصري مفروس يقول...

هقولك ايه
عندك حق
مهو كل حاجة خربانه
والمفايهم عندنا كلها بايظة
اشمعنى ده يعنى

صبرني يارب يقول...

عمرو

ماهو انا المقصود بثقافة الشوارع هنا الى هى ثقافات الاصحاب والافلام والنت وما الى ذلك

بالنسبه لموضوع المدارس اتفق معاك كليا في ده

وجدتك الله يرحمها ههههههههههههههههههه

هو ده الى انا باقوله على فكره كان زمان فى توعيه على بساطتها بس كانت بتقضي الغرض

نورت يا استاذنا

صبرني يارب يقول...

اسامه عبد العال

تمام كلامك واتفق معاه جدا جدا

رغم ان الموضوع بتاعي بتكلم عن التربيه الجنسيه عموما مش بس التوعيه الجنسيه المتعلقه بالعمليه الجنسيه فى حد ذاتها
لكن هو جزء كبير من المشكله

بس لازم نقول ونقول كتير عشان الناس يمكن ربعهم يفهم

صبرني يارب يقول...

شاب مصري مفروس

ايه يا جماعه البلوج بقى كله مفروسين ولا ايه

هههههههههههههه

نورت المدونه وصاحبتها يا مفروس

وشكرا لك على المرور وأتمنى نقدر نصلح الخربان فى يوم

صفــــــاء يقول...

.
يا خرابى يا صبرنى

انت عاوزة الاب والام يكلمو أولادهم فى الحاجات دى؟

مش لما يبقو هما الاول يعرفو حاجه يبقو يقولوها للعيال يا اختى
.

فشكووول يقول...

أنا موافق على ان تكون التربيه الجنسيه فى حدود الجنس ( النوع ) وغير كدا تكون فى اضيق الحالات بين الاب والام وان يتسع صدرهم لسماع وتوجيه اولادهم لكن غير كدا ما ينفعش .. الكلام فى المواضيع دى على بلاطه يبقى كلام وتفتيح ودان وتفتيح عين على اعمال قد تكون مش حلوه خالص .. طب انا عايز اقول حاجه .. لو فيه ولد وبنت عاشوا فى الغابه وما شافوش انسان خالص غيرهم لما يكبروا حيعملوا ايه .. لازم حنشوف عيال معاهم من غير تربيه جنسيه ولا غيره .. تحياتى

صبرني يارب يقول...

ًصفاء

هههههههههههههههههه

اه ايه المشكله هو ده الصح

والى ما بيعرفش يتعلم لازم نتعلم نربي عيالنا صح

هو ده دورنا الاساسي فى الحياه

صبرني يارب يقول...

فشكول

حضرتك هات الغابه واوعدك لما نعيش فيها نستغنى عن التربيه الجنسيه

لكن احنا حاليا مش فى الغابه

اقصد حضرتك فى مثالك بتاع الغابه ده جردت الموضوع من المحيطات

ودي طريقة بحث قد تكون ممكن فى مواضيع تانيه

انما هنا المحيطات بالحدث لها جانب عظيم من التأثير

والولد والبنت الى حضرتك بتتكلم عنهم فى الغابه هايتجوزوا على سن 13 سنه بالكتير
واظن ان ده مش ممكن فى مجتمعنا

وعليه احنا لازم نهيء الطفل للمجتمع العادي الانساني مش مجتمع الغابات

الطفل الى فى الغابه الى حضرتك بتتكلم عنه هايفضل من غير معلومات او مثيرات فضول لحد ما يبلغ ويبقى عنده مثيرات جنسيه اصلا

انما فى المجتمع مش هايبقى الوضع كده
ولا سيما ان احنا فى مجتمع حاليا مفتوح نسبيا

وده يخليك ما تقدرش مهما حاولت تحط ولادك فى علبه وتقفل عليهم
ولو عملت كده
يوما ما سواء فى حياتك او لا العلبه دي هاتتفتح
ومجرد ما يطلعوا لهوا عمرهم ما شموه قبل كده
كل حاجه عندهم هاتبوظ وتتلخبط

علمني العوم وارمينى الميه

فتح عنيهم وفتح ودانهم بس علمهم كمان ازاي يجتنبوا الاخطاء ويراعوا ربنا

مش مطلوب مننا اننا نكون قطط مغمضه ونستنى حد يسحبنا طول عمرنا

اختلف مع حضرتك كليا فى الموضوع ده يا استاذ فشكول

ولكن لا يسعنى امام اختلاف الراي الا احترام الراي الاخر والعقل الاخر

وشكرا لحضرتك ولا تحرمنا وجودك دايما

صبرني يارب يقول...

ابدا مافيش اسف ولا حاجه

اتمنى ما يكونش ردي ضايق حضرتك

من غير عنـــوان يقول...

موضوع هام لشعب يفضل أن يدفن رأسه في الرمال ولا يواجه الحقيقة بدء من التربيةالدينية وحتى التربيةالجنسية ..

سياسة قطيع


أمنياتي

صبرني يارب يقول...

من غير عنوان

بص ماهو اساسا النظام الحالي كان لازم يوصلنا للحاله دي

القطيع

عشان يعرف سوقنا قدامه

واحنا موافقين او مجبرين مش مهم المهم ان احنا متساقين

نورت

koukawy يقول...

كلامك عين العقل و الأدب في نفس الوقت
لأن ديه كمان بتعمل كشاكل كبيره بعد الجواز عند الجنسين

امام سليم يقول...

السلام عليكم المدونة جميلة جدا

صبرني يارب يقول...

امام سليم

تحياتي لحضرتك ونورت

صبرني يارب يقول...

كوكاوي

مش عارفه بصراحه مؤنث ولا مذكر مش مكتوب فى البروفايل

بس من الصوره والكلام على مدونتك اعتقد انك بنت
المهم

والله مشكلة الجواز دي احدى المشكلات الى بتحصل بسبب انعدام التربيه الجنسيه

نورتي يا جميله

aloneinlife يقول...

This is very true specially these days and all the things we hear around us...bas bardo btab2h sadma for the parents and haga mo7rgaa 3ahsankda mafrood almdrsa ykoon leah door bardo wlhaga tab2ah btare2ah 3almya wrabna yostorha ma3ana game3ann

صبرني يارب يقول...

alone in life


بصي يا جميل

لو كانت الام هاتتحرج من بنتها والاب هايتحرج من ابنه

يبقى الاولى ان المدرسين كمان يتحرجوا

وان كان على الطريقه العلميه

ماهوسهل الاب والام يتكلموا بها
وصدقينى

لو خدتي الموضوع تدريجيا انتى نفسك

يعنى فى تربية اولادك بتدرجي معاهم هاتلاقيها عادي

وانا باقولك ده وانا ام الحمد لله وجربت ده

ووجود مساحة الخصوصيه دي بينك وبين ولادك صدقينى مش بس عشان التربيه الجنسيه لا عموما بتخلي مافيش حرج بينكم لو حبت هى تسأل عن حاجه هاتلجأ لامها وهايبقى في لينك حلو بينهم

وكذلك الولد برضه مع ابوه او امه مافيش مشكله

نورتينى

هى فوضى يقول...

بصى دا سلاح ذو حدين
يعنى عايز حكمة فى الحوار فيه وطريقة سليمة فى ايصال المعلومة
جزاكى الله خيرا

صبرني يارب يقول...

هي فوضى

وهو حد قالي غير كده ؟؟؟

كل حاجه فى حياتنا عايزه حكمه ومن اوتي الحكمه اوتي خيرا كثيرا

تحياتي