الثلاثاء، 18 نوفمبر 2008

محتاجينكم يا جماعه

السلام عليكم يا جماعه
بصراحه انا من الصبح باحاول اكتب بس مش عارفه اكتب
دماغي مش جايب كلام
افكارى متركزه فى ناس باحبهم وناس مقطعين قلبي
ناس ربنا ابتلاهم فى صحتهم واختبرهم ايما اختبار
وعشان كده باطلب منكم كلكم يا جماعه انكم تدعوا للناس دي
يعنى انا عارفه انكم يمكن ما تعرفوهمش
لكن اكيد تعرفوني واكيد هاتحسوا بهم
الناس دول اسمحولي اعرفكم بهم
سيف اخويا الى مش من امي وابويا عرفته من سنه من خلال النت ومن كتر ما قلي يا اختي تقريبا انا صدقت او يمكن ما صدقت
ويمكن تكونوا تسمعوا عنه من اليس فى بلاد العجائب مدونة اه منك يا دنيا
عنده ورم فى المخ فى مكان صعب استئصاله ورحلة العلاج طولت عليه وصعبه الله يشفيه ويشيل عنه
ومحمد ابن اخو رضا حكيت لكم عنه قبل كده عنده لوكميا اه هو بدأ يتحسن لكن ما زال بياخد كورسات ا لكماوي لكن هو احسن كتير يارب يتم شفاه على خير
حمزه ابن اخو سوووووو الى وجع قلبي اوي لما شوفت صورته وعرفت انه تقريبا نفس حالة سيف يارب اشفيه لاهله يارب ونجيه لهم وصبره وصبر اهله
ملك بنت انا جعان انا ما اعرفش انا جعان ولا اعرف بنته لكن سمعت عنه عند قوس قزح يارب يشفيها وينجيها ياااارب
عائشه بنت اخو ابو فاطمه يااااااارب اشفيها ياااااااارب ونجيها
يارب اشفيهم كلهم وصبرهم وصبر اهلهم وخفف عنهم الم العلاج وتعبه
واملا قلبهم ايمان بربنا وعزيمه عشان يقدروا يهزموا مرضهم الجسام
هما واهاليهم
ويارب اشفي كل مرضى المسلمين وعافنا واياكم من المرض
معلش لو كنت ضايقتكم بس صدقوني دماغي مش جايب اكتب غير كده
سلام عليكم

هناك 50 تعليقًا:

mahasen saber يقول...

يا حبيبتى انا حاسه بيكى
وعارفه فوق ده بتبقى بتكلمى نفسك بصوت واطى خالص هو ممكن يحصل لابنىكده
يا رب سلم

ربنا يشفيهم ويعافيهم ويخفف الامهم لانه عز وجل رحيم بعباده

ويشفيهم لانه عز وجل مخلقش داء الا وله دواء

ربنا يشفيهم ويخفف الامهم ويعافيهم

mahasen saber يقول...

انا هدعيلهم وكلنا ندعيلهم بظهر الغيب

وفى السجود
ونبقى عارفين ان الملايكه هتقول ولك مثله

ربنا يطمن اهلهم عليهم
ويشفيهم ويعافيهم
ويجيب دعائنا ليهم
اللهم امين
اللهم امين

رئيس جمهوريه نفسى يقول...

ربنا يشفى الجميع ان شاء اللة رب العالمين

عمرو يقول...

رينا يشفى كل مريض .. كل مريض يا رب بغير اٍستثناء بغض النظر عن دينه أو جنسه أو سنه
ربنا قادر اٍن شاء يعفو عن المرضى بالشفاء و عن المتعبين و المحزونين بفرحه هو وحده يعلم من أين تأتى
الله قادر على رفع الظلم عن المظلومين و أن يبدل باٍذنه قساوة الحياه لفرح لا يناله غير الصادقين فى محبته
أدعوا لكل مريض علها تكون ساعة اٍستجابه

KHALED يقول...

ربنا يجعلك سباقة للخير و نبتهل إلى العلى القدير أن يشفى مرضانا ..
ولكنى أرى فى المرض رحمة برغم قسوتة
و الله رحيم بالعباد

فاتيما يقول...

يا مروة متقوليش كدا
كتر ألف خيرك إنك فاكرة الجميع بالخير
أن بدعى و الله لحمزة أبن اخت سوووو من قلبى
و هدعى كمان لكل من ذكرتيهم و ربنا يستجيب بإذن الله
تحياتى يا حبيبتى

صبرني يارب يقول...

محاسن

رئيس جمهورية نفسي

عمرو

خالد

الله يكرمكم يارب بس افتكرونا بالدعاء دايما

صبرني يارب يقول...

فاتيما

انا مش مروووووه
هههههههههههههههههه
نسيتى اسمي
عاااااااااا
ده انا كنت لازقالك طول التجمع

نورتي يا فاتيما وربنا يكرمك ويجعلك الخير من دعائك كله

romansy يقول...

ربنا مع كل محتاج ويشفى كل مريض يارب

mohamed يقول...

قضائك يارب به نرضى
ورحمتك بها نستغيث
وعفوك منتهى رجائنا
يارب
أنظر الى عبيدك المرضى
نظرة يخجل بها المرض وتاتى بها الشفاء
لاحول
لاقوه
الا
بالله العلى العظيم

كيــــــــــــارا يقول...

ربنا يشفيهم ياااااارب

ويخفف الامهم


وحشاني ياصبصبتي

صبرني يارب يقول...

رومانسي

محمد

شكرا لكم ويارب يستجيب دعانا كلنا

صبرني يارب يقول...

مولااااان

صبصبتى ؟؟؟؟؟؟

انتى كيارا ؟؟؟

هو ايه الحكايه

انا ما عرفتش ايه حصل عندك اساسا وامبارح قعدت اقول ايه الحاجات الغريبه على جايه عندها دي

هاروح اشوف اهو

د. إيمان مكاوي.. أم البنين يقول...

اللهم اشفهم وعافهم..واشف جميع مرضى المسلمين
واجعل مرضهم تخفيفا لذنوبهم يوم العرض عليك يارب العالمين

حواء يقول...

ربنا يشفيهم جميعا يارب
مش عارفه ايه اللي بيحصل ده
ده ابتلاء ولا اهمال
السرطان دلوقتي بقي عامل زي دور البرد
حسبنا الله ونعم الوكيل

ahmed_k يقول...

اللهم أشفهم وعافهم
وأكشف الضر عنهم برحمتك وقدرتك
يا ذا الفضل العظيم
اللهم أشفي جميع مرضى المسلمين
وأرحمهم وتجاوز عنهم يا الله

وآخر دعوانا أن الحمد لله رب العالمين

ahmed_k يقول...

أخيراااااااااااا عرفتك
ههههههههه
قفشششششششششششششتك
بعد كل المده دي عرفتك أخيرااااا ههههه


سلااااااام يا أم مروه يوووه مريم

صبرني يارب يقول...

ايما الله يكرمك يارب


زوجه والله بقى عنده رعب منه



استاذنا احمد
يارب امين

صبرني يارب يقول...

استاذ احمد

ههههههههههههههههه

لا والله ده بصحيح فاتيما غلطانه

مش مروه خالص والله

انا اسمي مش سر يعنى انا في التجمع عرفتهم بنفسي

بس فاتيما نسيتنى الوحشه

بس انا مش باحب حد يندهني باسمي وروحي يا سكيننه وتعالى يا سكيننه
هههههههههههههه

عشان كده بافضل ما اقولش اسمي عشان ما حدش يغلط واضايق انا واشيل فى نفسي بقى
هههههههههههههههههههههه

لما ترد عليا فى موضوع العروسه بقى نبقى نشوف
هههههههههههههه

على فكره عندي عروسه من بلدكم ايه رايك ؟؟؟؟

ahmed_k يقول...

صادقه صادقه أنا مصدقك ههههه
من غير حلفان مصدقك

من بلدنا !!!!!! إزاي

أحمد (زوج مخنوق ). يقول...

اللهم اشفي مرضانا و مرضى المسلمين
بجد اكثر شئ بيؤلمني هما الاطفال
تلاقي الطفل بيتألم و مش عارف هو بيتألم ليه و او مثلا لما بيجوا ياخدوا الكيماوي
الطفل بيتعب و بيتشكشك و هو مش عارف هو بيتعذب ليه
بيعيط من الالم و بيعيط علشان صعبانة عليه نفسه و بيعيط علشان بيبقى شايف مامته بتعيط عليه

ربنا يعفو عن جميع المرضي عامة و مرضانا و مرضى المسلمين خاصة
اللهم امين

جزاكم الله خيرا يا ام مريم على الدعاء و التذكرة

صبرني يارب يقول...

استاذ حمد

مش حضرتك من الغردقه ؟؟
من الغردقه هي

لو بجد بتفكر قولي اسيبلك الاميل

نورت

صبرني يارب يقول...

احمد المخنوق سابقا

وجايز كبلوجريين نتلم عليه ونخنقه احنا بعدين

ارد انا عليك دلوقتي يا عم الشيخ احمد ولا فها شبهه
يا جودعان شايله المراره من خمس سنين انا

يارب يشفيهم كلهم ويصبرهم ويخفف عنهم المهم

سيف هياخد جرعه كماوي دلوقتي يارب يقوم منها على خير

حسن حنفى يقول...

اللهم اشفي مرضانا ومرضي المسلمين

mony يقول...

ربنا يشفي الجميع شفاء لا يغادر بعده سقما


و يطمنهم و يريحهم


بس بحب اذكر بالحديث عن الرسول صلي الله عليه و سلم
"داو مرضاكم بالصدقات"

صبرني يارب يقول...

حسن
الله يكرمك


موني

تذكره جيده ويارب يكون معمول بها

Anonymous يقول...

الله الشافي

Anonymous يقول...

طيب وهى خيخة كمان تعبانة؟
انا حاسس انها تعبانة وبتخبى
اصل بقالها فترة مش مظبوطة

ربنا يشفى الكل ويخفف عنهم

جعلوني مريض نفسيا يقول...

عن ابن عباسٍ ، رضي اللَّه عنهما ، عن النبيِّ صَلّى اللهُ عَلَيْهِ وسَلَّم قال : « مَنْ عَادَ مَرِيضاً لَمْ يَحْضُرْهُ أَجَلُهُ ، فقالَ عِنْدَهُ سَبْعَ مَرَّات : أَسْأَلُ اللَّه الْعَظِيمَ رَبَّ الْعَرْشِ الْعَظِيمِ أَنْ يَشفِيَك : إِلاَّ عَافَاهُ اللَّه مِنْ ذلكَ المَرَضِ » رواه أبو داود والترمذي.

همس الاحباب يقول...

لا حول ولا قوة الا بالله
الله اشفى مرضانا ومرضى المسلمين جميعا
ربنا يشفيهم شفاء لا يغادر سقما

جزاكى الله خيرا يا ام مريم

صبرني يارب يقول...

غير معرف امين يارب


خيخه مش عارفه والله لعله خير

صبرني يارب يقول...

جعلوني مريضا نفسيا

همس الاحباب

متشكره لكم ربنا يجازيكم خير

واحدة مفروسة يقول...

ربنا يشفى كل مريض يارب

صبرني يارب يقول...

امين يا مفروستي

كلام حسام يقول...

اليس كتبت توبيك بعنوان صفر
ربنا يشفيه يارب ويشفي كل مرضي المسلمين

صبرني يارب يقول...

كلام حسام

اهافعلا يا اخ حسام وشكرا لك

اقصوصه يقول...

اجر وعافيه يارب

عسىالله يشفيهم ويعافيهم

ويبعد شر المرض عن كل المسلمين:)

صبرني يارب يقول...

بيبرس

قصقوصه

يارب امين ربنا يكرمكم جميعا

بنت الغربة يقول...

مش عارفه ااقول لك ايه ياصبرنى - موضوعك يوجع القلب قوى -ربنا يشفى كل مريض -خصوصا الاطفال وربنا يصبر اهاليهم ويحميهم - تعليقى جه متاخر معلش - كنت مشغوله جدااااا -تحياتىليك ولكل الى دعتيلهم وربنا يشفيهم- داليا-

مهندس مصري يقول...

ربنا يشفيهم جميعاً
آميين لكل دعواتك يارب

kochia يقول...

اللهم اشفيهم جميعا يارب واعفو عنهم واشف جميع المسلمين
اميــــــن

الامر لله من قبل ومن بعد

عاشقه وغلبانه يقول...

ربنا يشفيهم جميعا ويشفي كل مرضي المسلمين
يارب عافيهم وطمن قلوب اهلهم عليهم
امين يارب

صبرني يارب يقول...

مهندس مصري

بنت الغربه

كوشيا

عاشقه وغلبانه


تعيشوا يارب ربنا يكرمكم ويستجيب دعانا كلنا

Appy يقول...

ربنا يا رب يشفيهم جميعا يا رب ويعفى عنهم

صبرني يارب يقول...

امين يا ابي يا جميله

mostafa rayan يقول...

اللهم اشفي جميع مرضانا

mahasen saber يقول...

طب انا كده قلقت عليكى بجد
انتى كويسه
انتى فيه شئ قالقك ومزعلك غير كده

ولادك كويسين
ربنا يصلح حالك ويسعدك ويرضيكى ويكرمك فى كل من تحبين

حملة ساندوا يقول...

إهداء لمن باعوا أرواحهم لله...وكانت الفردوس حلمهم
إلى من سالت دمائهم الطاهرة...وارتسمت فوق ثغورهم ابتسامة عاطرة
إلى من صدقوا الله فصدقهم ...وإهداء لمدونة الشيشـــــان
.
.
قد كنت فوق الأرض
نوراً سائرا
والوجه بدر فى الليالى
مشرقا
والليل تحيه صلاة
قائما
والقلب يسموا فى السماء
محلقا
.
.
فى ذات يوم يا أخى
أصبحت فيــه
مسافرا
سألوك كل الناس
ياولدى أجبنا أى بلد
قاصدا
فأجبتهم متبسما
وطنا طهــــورا
طيبا
أدركت ذاك السؤل ثم أجبتهم
لا تقلقوا الخير فيه
وافرا
..
ورحلت تقصدها الشهادة
صادقا
قد كنت ليثا فى الوغى
قد كنت سيفا
باترا
..
حتى أصابك أحدهم
فتساقطت قطرات دمك يا أخى
تنثر عبيـــراً
طاهرا
وتبسم الثغر الذى
بالخير دوما عاطرا
ووجدت صحبك دامعا
أوباكيا
فنطقت فيهم يا أحبة
لا بكا
..
قد كانت الفردوس حلمى
هاهنا
ولقد رأيت هناك روحى
طائرا
فلتلحقوا يا صحبُ بى
وصمت شيئاً ثم قلت متابعا
لله إنــــ راحلا ــى

صبرني يارب يقول...

مصطفى

شكرا لك وربنا يكرمك


محاسن

يا قلبي ايوه الحمد لله انا كويسه والله بس من ناحيه بجد ما كنتش عارفه اكتب وكمان كان عندي ضيوف فى الويك ايند

شكرا على سؤالك يا جميل ربنا يكرمك

صبرني يارب يقول...

حملة ساندو

قلبي وجعني من القصيده بتاعتك ربنا يرحم شهدائنا كلهم احياء عند ربهم يرزقون