التبــــريــــر (الطبطبه على النفس )

التبرير(الطبطبه على النفس)

بعد السلام والتحيه على احلى بلوجريه

الواحد يا جماعه شايف الايام دي فى هبل بالاطنان بين الناس مش عارفه في ايه كل واحد بيغلط ويعلق غلطه على 300 شماعه غير ان هو نفسه غلطااااان ووحش

والحاجه الى تجنن ان كمان الى حواليه نفسهم بيدوروله على تبرير برضه وسبب مش عارفه ليه وفى نفس الوقت يمكن بتبريرهم ليه يكونوا بيدبحوا شخص تاني ويسلبوه حقوقه قدام االتبريرات دي .

ويفضلوا يطبطبوا عليه وهوكمان يصدق نفسه ويطبطب على نفسه

المهم ندخل على الرغي الجامد بقى

السؤال بقى على عايزين نعرف اجابته هو ليه احنا بنخلق تبريرات واسباب قد تكون وهميه للخطأ بصرف النظر ده عن كون الخطأ ده صادر من الشخص نفسه او من حد يهمه او حتى بيعبر عن وجهة نظره .

يعنى مثلا : واحد ضرب مراته وشتمها وبهدلها .

فيقول : اه انا مش غلطان ده انا كنت جاي من الشغل تعبان وما نمتش أو عندي مشاكل فى الشغل او اصلها عصبتنى . بصرف النظر عن وجو د الاسباب دي وعن قدر تأثيرها على تصرف الشخص فعلا الا انها مش مبرر للخطأ ولا تنفي ان الشخص ده غلط.

لان التبرير ده نقدر بقى كمان نحطه لكل مصيبه بحيث انك تطلع من كل حاجه وانت ملاك باجنحه ما تستاهلش الى بيجرالك . وكل الى حواليك غلطانين ووحشين وشياطين .

ندي امثله لحاجات يمكن بتحصل قدامنا كل يوم :

التحرشات الى فى الشارع : سببها ان البنات مش لابسين هدوم او ان دينا الرقاصه كانت بترقص فى الشارع او ان الشباب يا عينى مش لاقي جواز.

فى نظري انا سببها قلة ادب وقلة تربيه من العيال دي . وأي تبريرات غير كده يبقى احنا بنستهبل
مش صح تمشي البنات فى ا لشارع بهدوم غير لاقئه ومش صح دينا ترقص فى الشارع ومش صح الشباب يقعدوا من غير جواز . أو ان البنت دي اسرائليه ولا يهوديه ولا حتى ما لهاش مله خالص .

ألا ان ده ما يعطيش مبرر الخطيئه والانحراف الاخلاقي بالشكل ده.

الحرايق والمصايب والحوادث كلها سببها اهمال او اي حاجه من المسؤل الصغير أو حتى من المصابين الى ماتوا ولا اتحرقوا انما الكبير قاعد ومأنتخ وبيدى تصريحات فى الجرنال والفضائيات .

من وجهة نظري كلهم مسؤلين بما فيهم التخين بتاعهم .وكلهم مهملين وكلهم غلطانين مش عايزين استهبال .

اصحاب الجوازات الفاشله : سواء ان كانت استمرت الجوازه او انتهت الا انها الواقع الفعلي انها فاشله .

طبعاااااااا كل طرف شايف الطرف التاني عنده قرون حمرا وماسك شوكه فى ايده ااااه شيطان بقى . اما هو فالاجنحه بترفرف ورا ظهره .

وطول ما هما كده عمرهم ما هيعرفوا يوصلوا لحل لمشاكلهم .

واحد اولاده طلعوا بايظين : يقولك مش خطأي انا ربيتهم احسن تربيه بس هما الى ما تمرش فيهم .

ازاي يعنى ؟؟؟!!! مؤكد انت غلطان يا سيدى يا ربيت غلط يا صرفت عليهم من مال حرام ربنا ما باركش فيهم اي حاجه المهم انك لك دور انهم يطلعوا كده . فاقد الشيء لا يعطيه .

شوف انت كان نقصك ايه وانت بتربيهم يمكن تعرف تلحقهم .

اقصد ان الواحد ممكن يغلط لكن اوعى تدور على شماعه تعلق عليها غلطك .

حمل نفسك انت الجانب الاكبر دايما من السبب فى المشكله ودايما قول لنفسك انا الغلطان ودور الغلط جاي منين وليه وحاسب نفسك .

ومش معنى انك مش شايف الغلط منك فين يبقى مافيش غلط لا طبعا نادرا ما تلاقي حد ربنا ينعم عليه انه يعرف غلطه ويعرف الحق فين.

مش عارفه اسميها لكن ممكن نقول عليها جلد النفس . ربي نفسك انت بدل ما الايام تربيك .
ولتعلم خطأك اين وتسعى لاصلاحه قبل ان تبحث عن اخطاء الاخرين
وتحياتي لكم