الثلاثاء، 3 فبراير 2009

قلب ايمان..... التاسع

معلش يا جماعه على التاخير فى الجزء بس حقيقى ما كانش ليا اي نفس اكتب كل يوم بافتح المدونه واقعد قدامها متنحه تماما مش عارفه ليه

ما علينا خلينا نشوف ايمان عملت ايه

**************************
ايمان احتارت قوي وقلبت فى الارقام الى على الشريحه والاسماء الغريبه والى اغلبها زي ما تكون اسامي دلع لبنات وكانت هاتتجنن ومش عارفه تعمل ايه ودموعها نازله على خدودها تجري وهى يمكن مش حاسه وما زالت عنيها مبرقه ومذهوله .


والف سؤال جه على بالها والف ظن والشيطان لعب بعقها كتير اوي


يا ترى الشريحه دي بتاعة اشرف فعلا ؟؟؟ طب ليه ؟؟


يا ترى مين البنات ولا الستات دول وعرفهم منين ؟؟؟ وانا كنت فين ؟؟؟


والعلاقه بينهم وصلت لحد فين ؟؟


وانا الى غلطانه ولا هو ؟؟؟


طب اعمل ايه ؟؟؟


اقوله انى لقيت الشريحه ؟؟؟ اقوله مين دول ؟؟؟


اسأله يمكن الشريحه دي مش بتاعته ؟؟؟......... هاتضحكي على نفسك ؟؟


طب اعمل ايييييه ؟


وتبكي ايمان بحرقه وحيره ونار فى قلبها الى ما صدقت يا دوب انه دفي بحب اتمنته.


وبعدين بعد ما فكرت بسرعه قبل ما اشرف يجى قررت تأجل القرار لما تهدا وعليه شالت الشريحه وخبتها وغسلت وشها وحاولت تداري ولما جه اشرف


اشرف : مالك يا ايمان ؟؟ شكلك متغيره


ايمان: ابدا يا اشرف مافيش حاجه


اشرف : لا انتى شكلك معيطه مالك فى ايه ؟؟؟ ماما تعبانه ولا حاجه ؟؟


ايمان : لا ابدا بس اتعصبت شويه من العيال ومخنوقه كده من ساعتها .


وغصب عنها نزلت الدموع من عنيها


اشرف وهو بياخدها فى حضنه : طيب ليه كده يا حبيبتى مش بالراحه على نفسك .


ايمان وهى بتمسح دموعها وبتنسحب من حضنه : دلوقتي هابقى كويسه ... أنا هاروح انيم نور .


اشرف باستغراب : طيب ماشي يا حبيبتى بس روقي كده .


ايمان راحت نيمت الولاد وطول ما هى معاهم وهى بتبكي جامد اوي من غير صوت وبتفكر ومش عارفه تفكر .


واشرف بعد شويه لما حس الولاد ناموا راح ينده عليها عشان تقوم تنام مكانها ايمان كانت صاحيه بس ما ردتش عليه وكتمت صوت نفسها وبكاها لحد ماهو فكرها نامت ومشي


اشرف استغرب من كل الموقف وقعد يفكر كتير وحاسس ان فى حاجه غريبه .


وعدت الليله تقيله على ايمان حتى لما نامت حلمت احلام سخيفه واشرف كمان ما نامش الا الفجر من حيرته


والصبح


اشرف وهو بيلبس : ايماااااااان فين البنطلون الكحلي بتاعي ؟؟


ايمان بترد من خلال بوز طوله مترين : غسلته خد غيره من الدولاب .


اشرف بفزع : طب شلتي الاوراق الى كانت فى الجيوب ؟؟


ايمان : ايوه عندك على التسريحه زي العاده .


اشرف لبس وراح ياخد حاجته وبعدين وهو بيلم فى الحاجه قعد يدور على حاجه فى المحفظه مش لاقيها وقلب المحفظه

وايمان شافته وطنشت وعملت مش واخده بالها ونزلت على شغلها


واشرف اخد الولاد النهارده وداهم وراح على مكتبه طلب قهوه وقعد يدورفى درج المكتب ويقول فى باله : يادي النيله السوده تكون شبورة النكد بتاعة امبارح دي وراها الشريحه المقندله بتاعتي ؟؟؟


والله باين كده ... دى تبقى مصيبه .... يارب ما يكونش كده والله يارب انا كنت تبت وانت عالم وبقالي شهر اهو ماحطيتهاش حتى فى الموبايل

ايه بس الى خلاني ما رمتهاش ولا حتى ولعت فيها .

عموما هايبااااان كل حاجه
*****************

ايمان فى التليفون: ايوه يا داليا انتى وراكي حاجه بالليل ؟
داليا : استر  يارب مالك ؟؟؟
ايمان : مافيش هاجيلك عايزه اتكلم معاكي شويه .
داليا : طيب هاروح كده واشوف الظروف والجوابات عشان افضيلك الجو واقولك فى التليفون.
ايمان : ماشي لو مش هاينفع اجي انا تعالى انتى

داليا بجديه وقلق تساوي صوت ايمان الحزين المكسور : حاضر يا ايمان عنيه

وفى البيت عند ايمان فضلت ايمان برضه حزينه وبتحاشى الكلام مع اشرف واشرف قلقان وسألها تاني وتالث ايه مضايقها وهى بتقول  مافيش وقلقه هو يزيد

وباليل راحت عند داليا واشرف راح لاصحابه وهايبقى يرجع ياخدها
داليا : تعالى يا بنتى نقعد انت قلقتينى خالص

ايمان : انا مخنوقه خالص يا داليا ومش عارفه اعمل ايه
وانفجرت فى البكا

وداليا: لا حول ولا قوة الا بالله فى ايه يا بنتى بقى انتى  ما بتلحقيش

ايمان قالت لداليا على موضوع الشريحه وعلى كل ما دار بعقلها وداليا سمعتها كتير
وفى الاخر :
ايمان: انا محتاره مش عارفه اعمل ايه

داليا : اقولك الحق انا كمان محتاره
بس بصي انتى لو اتكلمتي معاه فى الموضوع ده انا شايفه  انها هايكبر

خصوصا انك بتقولي الرسايل كلها كلام تعبان يعنى ما تدلش برضه على ان فى حاجه خطيره يعنى
يعنى هاتلاقيه كله كلام فارغ وسنسنه على الهوا

ايمان: يعنى ايه اعديها كده بكل بساطه؟؟

داليا : لا طبعا ما قلتش كده بس لازم تاخدي بالك بقى وتعرفي ان كان لسه مستمرفى الوضع ده ولا لا
وكمان ما تنسيش ان كان فى فتره ما بينكم العلاقات كانت وحشه ويمكن ضعف وانتى عارفه ان ده ممممممممكن

ايمان بحده : داليا ارجوكي لو كنتى تقصدي موضوع محمود انا ما كانش فى بينى وبينه اي حاجه وانتى عارفاني كويس وانا اصلا صديته يعنى وخلصت الحكايه

داليا: طب بس اهدي طيب ما يمكن كمان جوزك خلصت الحكايه مش يمكن ؟؟؟

حتى انتى نفسك بقيتى تقولي انه ما بقاش يقعد كتير على النت لوحده ولا يخرج كتير مع اصحابه

ايمان بتحاول تهدى: طيب يعنى انا ازاي  اقدر اعديها كده مش عارفه وابص فى وشه ازاي

داليا وهى بتحاول تكسر حدة المناقشه: يا ستى البس نظاره شمس وبصي

ايمان : لا ما تهزريش بجد ماليش مزاج

داليا: والله يا بنتى هاتعدي وهاتنسي بس انتى حاولي تسامحيه وتنسي وفى نفس الوقت خدي بالك بقى من غير ما تحسسيه انك شاكه فيه  طبعا لحد ما تشوفي هايحصل ايه

ايمان: والله ما انا عارفه يا دالي بس هاحاول  خصوصا انك عندك حق انا نفسي كان ممكن اضعف زيه بس برضه انا ما عملتش زيييييييه. 

داليا : معلش ما تدبحيش من اول  غلطه يا ايمان اصبري لما نعرف الحكايه ايه

***********************

اشرف مع اصحابه مبوز وشارد ومحتار

اسامه : ايه يا  ابنى مالك متنح وشكلك مضروب كده ليه؟؟ هو كان بورده ولا بصباع ؟؟؟
اشرف: بس يا هاني مش ناقصه رواقتك  يا ابنى خلينالك الورد والصوابع .

هاني وهو بيضحك: لا وحياتك الحكايه شكلها اتقفشت يا حلو .يارب تكون اتقفشت عشان تبطل هبل
اشرف: بس يا انت كمان لا ما اتقفشتش و هي دي المصيبه.
اسامه: ازاي يعنى مش فهمك انت عايز تتقفش ولا ايه نفسك هفاك على ابو ورده يعنى.
اشرف:كن يا ابنى ابو ورده ده لامثالك 
..... انا شاكك  انها عارفه حاجه من امبارح فوق انى مش لاقي الشريحه اياها بتاعتي
هاني: طب ما تسألها عليها .
اشرف: انت عبيط يا ابنى ما يمكن اتنيلت الشريحه دي وقعت فى اي مكان اقولها واجيب لنفسي الكلام وامته بعد اصلا ما ا نا خلاص قطعت علاقتي بهم كلهم وما حطيتش الشريحه دي من شهر وزياده؟؟؟؟
اسامه: طول عمرك فقري يا اشرف هاتروح فى ابو نكله على مافيش وكمان بطلت المفيش نفسه.
هاني: طب ما هو ده سبب أدعى انك تقولها اصلا .قولها وقولها انك خلاص تبت وانبت
.
اشرف: لا مش عارف قلقان .المهم يا اخي ان الفتره الى فاتت دي كانت الدنيا بيس خالص بينا والمشاكل تكاد تكون انعدمت .
هاني: معلش قدر الله وما شاء فعل .وبعدين عشان تبطل الهبل الى كنت بتعمله كان جايلك ايه من السهوكه فى التليفونات والنت يعنى.وعمال تستخبى وتكذب وعامل مواويل حواليك.
اشرف:والله انا ندمت فعلا وحسيت انى باتعذب بكذبي على  مراتي وعلى الناس الى باكلمهم برضه بس كان غصب  عني وخلااااااص قلنا بطلت ما تقعدش تأنب فيا يا عم هاني بقى.
اسامه: ياعم ولا تقول ولا بتاع هى لو عرفت هاطين عيشتك وتبقى ايام سوده وانت طرقعلها وهى تسكت وتنسى بعد شويه وخلاص
هاني لاسامه: بس يا جدع انت خليك محضر خير لتقل خيرا او لتصمت....
ولاشرف ما تسمعش كلام الواد ده يا ابنى كان نفع نفسه  مراته سايبه البيت بقالها اسبوعين .
اشرف وهو بيضحك: لا ما انا عارف انه مهياص وبؤ على الفاضي .
اسامه وهو بيهزر : كده طيب يا امور انت وهو ادينى ساكت البس فى  اول جدار بقى انت وهو
هاني: ايووه اسكت احسن....
ويبص لاشرف: بص يا ا بنى حتى لو حصل وقالتلك هى او انت الى اعترفت ما تكابرش اول ما تتزنق قول من اول قلم هههههههههههههه
اشرف: حلو ا وي شكلي انا التسالي بتاعتكم النهارده
هاني: استنى بس بجد اول ما تلاقي نفسك اتزنقت اقر بذنبك وقولها الحقيقه الصدق منجي .وانت مراتك طيبه يعنى هاتسامحك ما تقلقش
اشرف: اه يا اخويا طيبه اوي بس مجنونه وعصبيه اوي والحمد لله.
اسامه ميت من الضحك : مش  انا قلتلك عندها شبشب بورده ؟؟؟
اشرف : ثانيه واحده اطرقعلك انا بابو رباط ياض .
هاني: بس اسمع بجد يا اشرف الستات عقلهم صغير كلمتين حلوين على هديه على فسحه حلوه هاتنسى وبعدين انت فعلا بطلت الهبل ده واستقمت وهى لو انت صادق هاتصدقك .
اشرف : ماشي بس انا مش هاقول برضه انا حاجه لو هى قالت ماشي .
هاني: وما تنساش انك فعلا غلطان فى حقها وفى حق نفسك يعنى ترضيها .ورفقا بالقوارير يا اخي
اشرف: صدق رسول الله ماشي . ربنا يعمل الى فيه الخير .
اسامه: طب اتكلم بقى ؟؟؟!!
اشرف وهاني فى نفس واحد بغيظ منه : لااااااااا
*************************
وفى  البيت وبعد ما خلصت  الليله كلها وايمان دخلت تنيم نور
اشرف بجديه وحنيه فى نفس الوقت: ايمان ما تناميش جوه انا عايزك .
ايمان من خلال نفس البوز: حاضر هاحاول.
اشرف بابتسامه حلوه: مافيش تحاولي هاجي اشيلك هيله بيله من هناك لو نمتي .
ايمان بتحاول ترد الابتسامه: ماشي ابقى شيل .
ايمان نيمت نور وخدت وصلة العياط بتاعتها وقامت بعدها مسحت وشها وراحت لاشرف
ايمان: خير يا اشرف فى ايه .
اشرف وهو بيشدها من ايدها تقعد جنبه : انتى الى في ايه مالك
ايمان: مافيش مضايقه شويه كده ومخنوقه .
اشرف: كده من غير سبب ما هو  لازم في حاجه .
ايمان: لا مافيش سبب مخنوقه لوحدي كده
اشرف بحنيه: على  انا برضه ليه هو انا لسه هاعرف ايمان النهارده
ايمان وهى بتحاول تمنع نفسها من العياط: قلتلك مافيش حاجه يااشرف انا هاروق لوحدي 
وما قدرتش تمسك نفسها وفتحت  الحنفيات على اخرها وهاتك يا عياط 
اشرف: اه لا باين انه مافيش حاجه تعالى يا هبله 
وياخدها فى حضنه ويقولها: طيب خلصي الوصله بتاعتك بقى عشان نعرف نتكلم .
ايمان من بين العياط  وبحده شويه: لا مش عايزه اتكلم .
 اشرف: طب انا زعلتك فى حاجه .
ايمان تعيط اكتر ومش بتتكلم
اشرف بعصبيه شويه: الله فى ايه يا بنتى ما تنطقي .
ايمان وهى بتتنفض بره حضنه وبتمد ايدها فى درج الكومودينو : فى ديييييي
خلاص ارتحت  كده
يتبع ............ 

هناك 38 تعليقًا:

أحمد (زوج مخنوق ). يقول...

الموضوع طول قوي كده يا صبرني
و ما زلت عند رأيي ان كده اشرف متجوز داليا مش ايمان
او على الاقل دماغ داليا
هو ايمان دي ما بتعرفش تاخد اي قرار لوحدها
ليه تحكي اسرار جوزها او بيتها لأي حد؟؟
ثم اصحاب من عشر سنين و لا من خمسين سنة حتى فداليا في الاخر مش متجوزة اشرف يعني ما تعرفوش بشكل كامل برضه
كل معرفتها بيه من خلال حكاوي ايمان ليها يعني ردود افعالها برضه هتبقى بناءا على فهمها لاشرف ده من حكاوي ايمان مش من طبيعة اشرف الحقيقية
فاهمة قصدي و لا انا بأخرف؟؟
عموما منتظرين الباقي

تحياتي

عمرو يقول...

أزيك يا أم خالد ؟
متهيألى فيه خلل ما فى شخصية أشرف ..
يعنى حنيته الزائده و اٍهتمامه باٍيمان و نحنحته بتخللى ده متناقض مع علاقاته بالأخريات حتى و لو كانت كلها علاقات بريئه .. بس ده لا يعيب التركيب البنائى للروايه لأن النفوس البشريه مليانه بالفعل بعدد من المتناقضات ..
و بصراحه بقى اٍيمان غلطانه أنها حتواجه جوزها بما أكتشفته لأنها بالطريقه دى بتدفعه دفعا اٍما للكذب و الاٍنكار و اٍما للثوره و الوصول لنقطة اللاعوده
فى رأيى كان المفروض أنها بعالج الأمر بغير مواجهه ليست محمودة العواقب و تسأل نفسها أيه اللى مش موجود عندى و وجده زوجى عند الأخريات ؟؟
ربنا يهدى الجميع :)
يالا العاشر

شمس النهار يقول...

انا مؤيده كلام عمرو وكذلك احمد زوج مخنوق شويه
المفروض انها كانت تداري الموضوع وتمشي في خطتها والا كأن حاجه حصلت
عموما انت عارفه انا مابحبش اطفش وامثاله اللي بيتسلوا بزوجتهم وكمان النساء الاخريات
وفاكر انه كده فهلوي وفي الحقيقه هو بيأذي نفسه وبيته وعياله ومراته

إسلام الدسوقى يقول...

أنا شكلي هتوه ولا أيه
مش مشكله أنا هراجع المواضيع اللي قبل كده

أول مرور ولن يكون الاخير أ شاء الله
تحياتي

حسن حنفى يقول...

السلام عليكم

اتمني انها تقبل تتقبل موقفه لانها لو اتعاملت بقلبها مش هترضي مبرره

صبرني يارب يقول...

احمد

اشمعن علقت على ان ايمان حكت لصحبتها وما علقتش على اشرف انه راح برضه اشرك اصحابه فى الموضوع؟؟

ومين قال ان ايمان بتسمع كلام داليا فى كل حاجه ؟؟؟

ماهو داليا قالتلها ما تقوليش لاشرف وعدي الموضوع ومع ذلك هى ما عملتش كده ؟؟؟!!!!

وداليا كمان قدمت نصيحتها بس لكن ايمان ما عملتش بها او ما قدرتش


انا مش شايفه ابدا عيب فى ان اي شخص سواء كان الست او الراجل يلجأ لصديق او اخ او اي حد قريب من نفسه وياخد رايه فى حاجه

نورتنا يا استاذنا

صبرني يارب يقول...

عمرو

الحمد لله يا استاذنا ربنا يكرمك

اشرف ما كانش مشغل طقم الحنيه زمان

ده حصل بعد التغيرات الى ايمان عمدت اليها فى حياتهم والى بعدها اشرف فعلا بطل يكلم البنات التانين

اما بالنسبه للمواجه

مش عارفه ازاي ما خدتوش بالكم ان اشرف نفسه كان محتاج المواجه دي وهو ضغط عليا ودفعها لكده اصلا

هو نفسه كان حاسس بالذنب وعايز يخلص منه

وهى كمان سألت نفسها برضه فى الاول

يا ترى انا الغلطانه ولا هو الى غلطان

ده معناه ان سؤال حضرتك دار فى دماغها ليه جوزي كلم ستات بره

وزي ما انت قلت حياتنا ونفوسنا مليانه تناقضات

نورت يا استاذنا

صبرني يارب يقول...

شمس

مش عارفه يا شمس انا حطيت نفسي مكانها لقيت انى مش هاقدر ابص فى وشه ولا احبه وانا مخبيه حاجه زي كده

ومافيش حاجه اسمها بياذي نفسه وبيته وعياله

لا ده بيأذيها هيا وبيجرحها وزي ما قلت كده لعمرو

اشرف نفسه دفعها لكده لانه كان شاكك ومحتاج يخلص من الشك والشعور بالذنب

نورتي يا جميل

صبرني يارب يقول...

مش انا

اها لازم تشوفي الاول عشان تفهمي احنا بنعمل ايه هنا

نورتي يا جميل ويارب دايما منوره

صبرني يارب يقول...

حسن حنفي

يمكن تقنع نفسها انها قابله عشان هى عايزه كده ؟؟؟

الله اعلم لسه مش عارفه

mony يقول...

ايييون

كده القصة بتسخن


بس بشوية حوار بينهم الموضوع هيتحل

بس الثقة مش هترجع زي الاول

ولا ايه رأيك؟؟؟

حاسوباتيه يقول...

ياه ده القصه اشتعلت اهي مستنيه الباقي بفارغ الصبر ماتغبيش ونبي

Soul.o0o.Whisper يقول...

اول زيارة

تقوم تيجى فى شريحة موبااااااااااايل

لالالالالا

دا حتى بداية غير مبشرة
ههههههههههههههههههههههههه


بجد البوست رائع
و هأحاول أجيب الحكاية من اولها
عشان افهم الخكاية


ربنا معاكى







دمتى بود

mahasen saber يقول...

اه فى دىىىىىىىىىى اهى دى الكارثه دى

صبرنى هو اليى بيدفع راجل متجوز انه يشترى شريحه هبله ويعمل عليها الشاب العبيط ايه

الملل من الحياه الزوجيه
ولاا الندم على انه اتجوز اصلا
ولاا تفاريح بيحب يحسس نفسه انه لسه عايش وممكن ينسلخ من المسئوليات حتى لو بالكدب فى حياه تانيه

عايش... ولكن !!!! يقول...

احيانا بنبقى فى حاجه للتغيير وللأسف بنغير من غير ما نعرف حد من اللى حوالينا
ده اللى اقدر اقوله حاليا
لسه هرجع اقرأ المواضيع السابقه لانى مكنتش متابع كنت غايب عن التدوين لفتره

مواطن مصرى نايم يقول...

لا انا لازم اقرى من الاول بقى
لانها شكلها تحفة

و كون ان الراجل يشرك اصحابه فشئون بيته
دا غلط جدااا و عيب فحقه
اكتر من ان الست تحكى لحد
رغم ان كده غلط بردو

انا حقرى كله من الاول
عشان ارتب الموضوع كله فدماغى

تحياتى

اسلام

صبرني يارب يقول...

موني

والله يا موني مش عارفه تفتكري ان الثقه اصلا كانت موجوده ؟؟؟

مؤكد كان فى اشارات وهى كانت بتكذب نفسها مثلااااااااا

صبرني يارب يقول...

حاسوباتيه
والله يا حاسوباتيه انا عايزه اخلصها بقى عشان جايبالي الكلام كتير

صبرني يارب يقول...

سول

ايوه شوفتي شريحه مره واحده ههههههههههههههه

انشاله دايما منوره يارب ومستنيه رايك فى باقي الاجزاء

صبرني يارب يقول...

عايش ولكن

المشكله فى اننا نغير المشكله ازاي نغير وفين نغير وامته

تحياتي لك واتمنى تقرا وتقولي رايك

وحمد الله بالسلامه من الاجازه التدوينيه

صبرني يارب يقول...

محاسن

قلة عقل يا حبيبتى الى بيخليهم يعملوا كده قلة عقل
هههههههههههههههههههههههههه

بصي النقطه دي ان شاء الله هانتكلم عنها كتير بعد كده لانى طبعا من خلال القصه دارت بينى وبين ناس كتير اوي مناقشات كتير اوي اوي عايزالها 20 بوست على ما اخلص كلام معاكم فيها

تحياتي ليكى ونورتي

صبرني يارب يقول...

مواطن مصري نايم

اسلام

بص يا اسلام الناس طباعها بتختلف فعلا

فى ناس لما يقعد مع صاحبه ما يتكلمش عن مراته وبيته لا من بعيد ولا من قريب ولا اصلا اصحابه يعرفوا مراته ولا هى تعرفهم

وفى ناس بقى بيبقوا عايزين قطع لسانهم
بيقولوا كلام ما يصحش يتقال اساساااااا لا لاصحابه ولا لامه حتى

وفى ناس وسط بين ذلك وحسب درجة قرب الصديق ممكن يتكلموا عادي فى حدود وعن موضوعات معينه كده يعنى انا شايفه ان الى دار بينه وبين اصحابه فى اطار المعقول والحدود ومفيش فيه مشكله

اما لما دار بين ايمان وصاحبتها والى حديث اقرب لبعض فيه واوضح

فيمكن انتم انت واحمد زوج مخنوق مثلا مش قادرين تفرقوا بين حياة الستات وحياة الرجال لانها فعلا من الناحيه دي بتختلف منوجهة نظري على الاقل

تحياتي لك ونورت

ملكة في بيتي يقول...

السلام عليكم ورحمة الله وبركاته

انا بدأت أكره كلمة يتبع دي

اتفق مع الناس اللي اعترضت على نقطة افشاء الاسرار

انا مش عارفة ازاي زوجة تحكي لصديقتها مهما كانت مخلصة وكتومة ووو

تحكي لها ادق ادق تفاصيل حياتها كده

والزوج ايضا ازاي يحكي لاصحابه

اسجل متابعة

دمتى مبدعة

تحياتي

صبرني يارب يقول...

ملكه

تحياتي ليكى وما زلت شايفه انهم ما تعدوش حدود الخصوصيات اوي ولا حاجه

شمس النهار يقول...

انا اختلف معاكي في الموضوع ده
الدنيا ابتدت تروق وهي عارفه ان كان في تقصير من الطرفين ولما الامور تتصلح حصل حاجه بايخه اتغاضي عن الوضع واستمر في خطتي لحد الاخر والله الامور مشيت تمام والدنيا بقة جميله ماشي مامشيتش
اكيد هيغلط تاني ويبقا الحساب يجمع
عشان المواجه دلوقتي مش في صالحها هتفتح علي نفسها فتوحات مش وقتها

صبرني يارب يقول...

ِشموسه

على فكره انا مش معترضه على ده بالعكس انا كمان شايفه انه كان احسن تستنى على الاقل عشان يبقى رد قعلها مش مبالغ فيه نظرا لاحساسها لسه بالجرح جديد

لكن من وجهة ان ضغط اشرف عليها وهى اساسا مجروحه ومخنوقه

مش عارفه يا شمس يمكن طبيعتى بهتت على شخصية ايمان وهى انى مش باعرف اشيل حاجه فى قلبي لبكره طاااااااخ ونخلص بقى
ههههههههههههههههه

Che يقول...

اتبسطت و حسيت بشماته فى أشرف لما قعد يزن لغايه ما ورته دليل ادانته .. مع انى حاسس انك ممكن تكونى عامله مقلب فينا و تطلع ماورتوش الشريحه برضه لانى مش عارف انا حاسس ليه ان ايمان من الناس اللى بتنام و تحلم ان مشاكلها تتحل الصبح لوحديها من غير مواجهه و تصعيد و كده ، بس ادينا مستنين الفصل العاشر .. يعنى خمستين فى وش العدو

بنت الغربة يقول...

حبيبتى ياصبرنى
مش عارفه ااقول ايه غير ان كلهم صنف واحد.... وحاجه تقرف...
الواحد منهم لما يلاقى نفسه كبر ومعاه عيال ...يفكر ويقول لنفسه ...انا خسرت قد ايه لما اتجوزت
وعمرى راح وعايز يعوضه....
ويبدأ يتصرف زى المراهقين من تانى
قال يعنى ده اللى هيرجع له شبابه
والبنات اللى مش لاقيه وفاضيه على قفا من يشيل...
ومش مهم الاخلاق ...مالهاش لازمه دلوقتى..
اما لو مراته فكرت مجرد تفكير انها
تضحك لاى حد فى الشارع ...ضحك بس...تبقى خاينه ولازم يقام عليها الحد..يمكن الرجاله شايفين الست دى انها طوبه او حجر ..يحطها قى اى حته ويسيبها ...وبرضه هيرجع يلاقيها زى ماسابها...فليه مايعيش حياته هو..؟؟؟
مافى واحده هبله فى البيت بتربي ولاده ...واكيد هتسامحه...يعنى هى هتلاقى احسن من سيادته فين؟؟؟
مش كفايه انه مستحملها...ده هى تحمد ربنا ....حسبى الله ونعم الوكيل
معلش ياصبرنى طولت عليك وخنقتك ...
بس بصراحه انا كرهت اشرف ده...
وحاسه انه عامل زى السحليه اللى بتتلون علشان تاكل الفريسه بتاعتها...او علشان تستخبى...
تحياتى ليك ياقمر

بنوتة يقول...

السلام عليكم
دى أول زيارة لمدونتك القصة شدتنى وقريت كل ايللي فات ونفسى أعرف ايه ايللي هيحصل
بس انا عندى اقتراح يا ريت ايمان تتعلم من ايللي حصل وتفكر هى بدماغها هى مش صغيرة لان كده مع الوقت اشرف هيحب داليا لان ايمان منفذ لوصايا داليا
تحياتى ليكى ودمتى بالخير

صبرني يارب يقول...

che

انت فرحان فى اشرف هههههههههههههههههههههه

ماشي ياعم هانشوف هانعمل فيه ايه

صبرني يارب يقول...

بنت الغربه

بيتك ومطرحك يا جميل قولي كل الى انتي عايزه تقوليه

وللاسف الى انتى قولتيه ده صح

هو بيعمل الى هو عايزه ومش عارفه ليه مطمن كده وحاطط فى بطنه بطيخه صيفى انه سايب طوبه فىالبيت ؟؟؟!!

وصدقينى انا ما كنت ناويه اتعرض لحياة اشرف الا ان غاظني السكاكين الى اتسنت على ايمان عشان فكرت مجرد فكرت تقبل رساله من زميلها فى الشغل

واستعذبت عبارات المدح الى لسه كانت بريئه اصلا

وخلاص الكل سن عليها السكاكين حتى الستات
هى غلطانه بس مش هاندبحها برضه ونطبط على التاني
وقلت خلينا نشوف ايه تعليقهم على وضع اكثر خطأ من جانب اشرف

اعتقد ما حدش ماسكله السكاكين

لا دول عايزين ايمان تطنش وتعيش

مجتمع متناقض ومعووج والخلل ده ظالم شقي المجتمع

اشرف وغيره وغيره من الى زيه واسوأ منه قد يكون فى البدايه وفى البدايه بس ضحيه لافكار مجتمع مخلول الفكر والمباديء

وايمان طبعا دي ما فيهاش كلام

خلينا يصعب علينا الاثنين يا داليا لحد لما نشوف هايعملوا ايه

صبرني يارب يقول...

بنوته

نورتي ومتشكره على تعبك معانا تقري كله

وبالنسبه لموضوع داليا واضح انكم مش فاهمين الفكره تماما لان ده مش رايك لوحده

وعموما هافضل اقول مش شايفه ابدا ابدا الكلام ده يعتبر افشاء اسرار

ولا شايفه ايمان مجرد تابع لداليا بالعكس

هي بتتصرف من دماغها كتير

ولنا لقاء بعد القصه نناقش مقوله ما خاب من استشار

تحياتي ليكى ونورتي

عاشقه وغلبانه يقول...

احلي حاجه في الموضوع اني قرأت التسع اجزاء مره واحد لحد عنيا مش شايفه ومزغلله
ههههههههههههههههههههه
الموضوع ده حياه اغلب المتزوجين وكل واحد مننا هيلاقي روحه في جزء من الروايه

اعتقد ان الصدق منجي زي ماقولتي

تحياتي

الرابطة وبناء الأمة يقول...

السلام عليكم ورحمة الله وبركاته
نتقدم بدعوي لك أخي ( أختي ) المدون بمناقشة
محاكمة عادلة
مبارك بين التأييد والرفض
ملف يناقش ويحلل ويضع الحلول
رائيك يهمنا جدا
مع خالص تحياتنا الكتيبة السياسية

حواء يقول...

السلام عليكم
زي متوقعت تماما
كما تدين تدان
وعفوا تعف نسائكم
هو خان وكلم بنات وستات مش ولابد
وبالتالي هي كمان خانت وسمحت لواحد من الاول انه يبعتلها مسجات
بصرف النظر عن المشاكل اللي بينهم
لان المشاكل بين الزوجين مش مبرر للخيانه ابدا
اما بخصوص تعليق احمد علي داليا وافشاء الاسرار
فانا بقول نفس الكلام بالضبط اللي قالته صبرني لأحمد

صبرني يارب يقول...

الرابطه وبناء الامه

طب ينفع اصدر حكم اعدام وانا هنا لسه ؟؟؟

صبرني يارب يقول...

عاشقه وغلبانه

يا حبيتى انشاله تسلمي وتسلم عنيكى معلش بقى اصل انا رغايه انتوا عارفين

نورتي يا جميل

صبرني يارب يقول...

زوجه

ما زلت باكد على كل الناس ان ايمان هنا ما لحقتش تخون ولا تنيل

وبالنسبه لموضوع افشاء الاسرار الى تاعبه ناس كتير علقوا هنا او ليا شخصيا على الميل

باقول لعاااااشر مره هى فين الاسرار دي ؟؟؟

مش مطلوب من الشخص انه يكون منغلق على حاله عشان ما يبقاش بيفشي اسرار

وجميل اوي ان البنى ادم يتكلم لكن المهم بيتكلم يقول ايه والاهم لمين وامته وازاي

نورتي يا زوجه

تحبي اسلفك ساطور ؟؟؟