الثلاثاء، 15 سبتمبر 2009

مش تمثليات .. لعلكم تعقلون




سلام عليكم




كل سنه وانتم طيبين يا جماعه رمضان فى اواخره واتمنى يكون كان رمضان سعيد ومبارك عليكم وتعيدوا على خير وربنا يعيد عليكم الايام الحلوه دي بالخير ان شاء الله



طيب انا بقى فى كلمتين واقفين فى زوري مش هارتاح الا لما اقولهم طبعا واكل دماغكم



ممكن حد يفهمنى ايه الى بيحصل ده فى رمضان فى الشوراع والمساجد والبيوت والهبل الى ماشي فى البلد ده




اليكم بعض المشاهد الى بتغيظني وتعليقى عليها






انتى بتروحي تصلي التراويح ؟


لا يا حاجه والله ما بينفعش معايا النظام ده عشان العيال انا لو صليتها فى البيت يبقى من الله

ليه بقى ان شاء الله وانتى وراكي ايه


يا حاجه ورايا كتير والله انا ساعات باجي بالليل ما اقدرش اصلي اعمل ايه يعنى

لا يعنى ايه تعملي ايه ؟دى سنه زي ما بتقدري تعملي شغل البيت والعيال تقدري تصليها


يا حاجه سنه مش فرض يعنى اذا كان الفرض لو انا تعبانه ممكن اصليه وانا قاعده

لا مش مهم شغل البيت المهم تصلي التراويح طبعا



منين جابت طبعا دي حد يقولي يا ناس






الاقي المحلات قافله لحد الساعه تسعه وعشره اصل عشان التراويح يا فندم



الله فى ايه



مين يقول كده ناجل الشغل ونفضل فاتحين محلاتنا لحد الفجر وفى وقت الشغل اصل احنا بنصلي


طيب ما الرسول صلى التراويح مره واحده بس فى جماعه وغير كده كان بيصليها لواحده



ما تصلوا فى بيوتكم اخر الليل لما تخلصوا شغلكم ومصالح الناس ؟؟!!



عمر بن الخطاب هو الى عملها فى جماعه طيب ماشي عمر بن الخطاب كان شعبه شبعان ومرتاح وزي الفل عقبالنا كده ان شاء الله



عمر بن الخطاب على عينى وراسي وحبيبى والله بس السنه هى سنة رسول الله مش صحابته الكرام



المشاهد المفزعه بقى
في
صلاة التراويح وصلاة التهجد



راحه تصلي ولابسه عبايه شيك اوي ولابسه نص كيلو دهب وميك اب على خفيف كده على اساس انها مش حاطه عيب دي راحه تصلي وريحة البرفان جايه اخر الشارع والعربيه والخدامه مافيش مانع



مش حقد يا جودعان والله لكن يعنى هي بقت كده ؟؟ نقلبها بقى تفاخر بالعربيات والخدمات واللبس والدهب ؟؟



مشهد اخر(يفقع برضه)



انتى بتصلي التراويح فين ؟؟


فى الجامع الفلاني



يا شيخه لا انا باروح الجامع العلاني اصل الجامع الفلاني ده بقى خنيق كده والناس الى فيه بقوا بيئه الجامع العلاني بقى هو الى ماشي اليومين دول



اه يا مرارتي الى شلتها من ست سنين ياني


ماشي اليومين دول ؟؟ قولوا انتم دول ايه ؟؟



المساجد

واه ثم اه ثم اه من المساجد وميكروفناتها الى ربنا مبارك فى عددها



صلاة العشاء والتراويح لحد الساعه 9


ودرس بعد الصلاه


وعلى الساعه واحده نبدأ صلاة التهجد بقىىىىىىىىى ايه هاتكفروا ده احنا فى رمضان مش هاتصلوا تهجد

ويادوب يبطلوا نص ساعه يتسحروا وجري على الميكروفونات تاااااني قرآن الفجر والادان الاول والادان التاااااني



اييييييه عشان الناس تقوم تصلي الفجر

لا اله الا الله

الناس الى بتصلي فى بيوتها تعمل ايه طيب تصلي ازاي ده احنا ما بنبقاش سامعين بعض فى البيت والله بدون مبالغه



لو ما كناش نقفل الشبابيك كلها بالازاز ما نسمعش بعض

نموت بقى نفطس عشان تستريحوا


ما حدش يقولي ما تنزلوا تصلوا



هو مين بنى ادم فاضي لدرجة انه يقضي فتره ما بعد الفطار كلها فى المسجد مين يقول كده

ده احنا كلنا مطحونين فى الدنيا فى اشغالنا وبيوتنا يعنى ما وصلناش من الرفاهيه لسه ان الشعب كله يتفرغ للعباده نص اليوم

ولو كان حد فينا فاضي كده ما يحرمش باقي الناس من حياتهم يا اخي تعبد براحتك انا ذنبي ايه


واحد شقيان طلعان عينه طول النهار من حقه يرتاح ماهو الشغل ده عباده والله


ولا يكلف الله نفسا الا وسعها انتم هاتخلوا الناس تكره نفسها ليه يا جدعان

ممكن يجيله يوم ويقوم الله برضه ويصلي ويتعبد وكل حاجه بس مش كل يوم كل واحد له ظروووووفه


لييييييييه تعملوا كده ليييييييه


هى تمثليات ؟؟ ده بينكم وبين ربنا والله




المشهد التالت

عزايم ايه وكحك ايه الى الناس شغالين فيه طول رمضان ده رمضان ده شهر عباده لازم الواحد يتفرغ للعباده


الله ؟؟!؟!؟!؟
هو يجرى ايه لو الواحد عمل عزومه بغرض افطار صائمين ... هو دي مش عباده ؟؟
هو يجرى ايه لو الواحد عمل كحك بغرض ادخال الفرحه والسرور على اهل البيت والعيال ... ما ينفعش تبقى عباده ؟؟؟
هى العباده مصحف وسجاده وسبحه بسسسسسسسسس


طب ازاي ؟؟ كان الكون يعمر ازاي

ما كان ربنا خلقلنا الاكل والشرب كده جاهزين بقى وهو قادر على كل شيء عشان نتفرغ بقى احنا للعباده

القرآن


جميل فل حاجه حلوه اوي اوي اننا نختم القرآن فى رمضان بس خد عندك الاتي:


يا انسه ممكن تجبيلى مقاس اصغر من ده



تقوم وتبصلي باعياء واستغلاس كده وهى بتقفل المصحف وبدون ما تتكلم تروح تجيب المقاس وترجع تاني تفتح المصحف وتقرا

ايييييييييه عايزه تلحق تختم المصحف فى رمضان


وشغلك يا هانم الى ائتمنك عليه صاحبه مش عباده ؟؟


وانتى قاعده تقري بالشكل ده وسط محل كبييييييييييير كده فاهمه ايه من الى انتى بتقريه

ولا هى ور ور ور ور وخلاص ولا ايه ؟؟؟

من فضلكم اقروا كل يوم صفحه واحده لا لا ايه واحده بس تدبروها واعقلوها ويا حلاوه لو تعملوا بها

ما يبقاش بنقرا واحنا كالحمار يحمل اسفارا وبس نسمع فى المكاتب والتليفونات انا خلصت كام جزء وختمت مرتين وختمت عشر مرات


الامام ابن حنبل بلغه ان احد تلامذته بيختم القرآن فى ليله



فبعت له وقاله اذهب واقرأ القرآن اليوم كأنك تقرأه علي



لما رجع تلميذه كان قرأ عشر اجزاء بس






فقاله ارجع واقراه كانك تقرأه على رسول الله صلى الله عليه وسلم



فرجع وقاله انه لم يكمل حتى جزء واحد




قاله اذهب اليوم واقرأه كما لو كنت تقرأه على الله عزو وجل


فرجع التلميذ وقاله باكيا انه ما كملش الفاتحه طول الليل ؟؟؟!!
تدبروا لعلكم تعقلون
ربنا بيقول ايه
انا انزلناه قرانا عربيا لعلكم تعقلون



تدبروا القرآن ارجوووووووكم وبلاش التمثليات والهبل الى شغال ده والله العظيم ما هو ده المقصود من العباده والتعبد ولا دي الطريقه الى المفروض نعيش بها فى رمضان






انا مش باقول ما تصلوش فى الجامع


لكن كمان مش كده الوضع كله مش صح


فكروا شويه من فضلكم قبل ما تسنوا سكاكينكم عليا


عارفه انى طولت عليكم بس عادي عادتي ولا هاشتريها



جبتوا لبس العيد ؟؟

هناك 46 تعليقًا:

Ahmed يقول...

تمثيليات
تقريبا هيا فعلا كده
تقريبا انها تحولت عشان تكون كده

زي بالظبط رمضان ماتحول عشان يبقى شهر الممثلين والأفلام والمسلسلات وموسم قلع الهدوم

حاجات كتير اتقلبت وصعب تتعدل تاني

تفتكري الجيل اللي هييجي كمان كام سنه, لما ننصحه ونقوله ان ده غلط, تقتكري هنقدر عليه؟
سؤال حقيقي اجابته بترعبني

احساس طفلة محبة للرومانسية بس واقعية يقول...

صح يا صبرنى الناس اللى عندها بعد الفطار فاضى وشغلها مش مسبب لها تعب دى تنزل تصلى وبميكرفونات بس بدون ازعاج للاخرين
وببساطة ممكن الانسان يصلى فى البيت فى اخر الليل وبهدوء ومنه لربنا

اتفاجئت لما عرفت ان دكتور الاسنان بيقفل طول اليوم وبيفتح بالليل
طيب لو واحدة ظروفها متسمحش تنزل بليل تفضل طول الشهر بالالم المميت دا

غير مصالح كتير بتتوقف ربنا الاعلم بظروف الناس اللى بتبقى محتاجة تخلص ورق ولا حاجة

حتى شهر رمضان اتحولت التصرفات فيه وبقى وقف للمصالح وتفاخر بالصلاه حتى الصوم بقى فى مشاكل وناس بتفطر عينى عينك كدا

ربنا يهدى الجميع
يارب تكونى بخير يا صبرنى
تقبلى مرورى

صبرني يارب يقول...

احمد ابو العلا

وليه ولادنا من دلوقتي حاول تنصح اي حد ولا تكلمه

واتفرج يا سلام على اراء الناس فى الموضوع الى انا كتبته ده اصبر بس

لنا الله

صبرني يارب يقول...

احساس طفله

وحشااااني يا جميل والله

اه دكتور الاسنان ده برضه من الحاجات الى الناس بتنقطنى فيها

بيقولك اصل ما ينفعش اشتغل وانا صايم

وكمان الى هاعالجه لحسن حاجه تروح جوفه

وايه يعنى طيب ؟؟

مش غصب عنه ؟؟

والمريض مش اصلا اصلا له رخصه ؟

صبرني يااااااااارب

نورتي يا جميل

mahasen saber يقول...

كلام موزون ومضبوط يا صبرنى فيما يخص الجوامع واليى بيحصل فيها بس نسيتى تقولى عن خناقات الستات فى الجوامع والمشاكل بسبب الاطفال وخلافه

انما موضوع صلاة التراويح فكلامك ماشى صح بس يا صبرنى ده شهر مبيجيش الا مره فى السنه يعنى لما الكل يجتمع على صلاة التراويح فيه جماعه خير برضه كفايه اننا اخيرا اتجمعنا على شئ كويس

ولاا ايه يا قمر..

ها الفطار خلاص هتفطرينى على ايه ..ثوانى وابقا عندك فى المنصوره

عاشقه وغلبانه يقول...

متفقه معاكي تماما وخصوصا في موضوع ختم القران
نفسي الناس تقرا سطر وتعمل بيه
احسن ماتختم من غير ماتركز في ولا كلمه

كل سنه وانتي طيبه
انا هاجيب لبس عيد
هيييييييييييييييييييييييييه

reem يقول...

كل سنة وانتى طيبة يا قمر

وعيد سعيد عليكى يارب

كلامك معقول جدا ولو انى عارفه زى ماقلتى ان مش الكل رأيه هايكون كدا

وبعدين طبعا لازم تعملى كحك وتدخلى البهجة على اسرتك
وطبعا اسرتك الكبيرة اللى هنا احنا لما ادخلتى علينا البهجة بالكحك بتاعك

ستيته حسب الله الحمش يقول...

خايفة انا عليكي قوي
واقفة تعدي البلاوي والبلاوي كتير
حتى لو شيلتي المرارة ده مش معناه انك تفتري كده
سيبك من الناس شوية وروحي شوفي صبصب شوية
مش قلت لك "تضلعي" نفسك شويتين
طيب انا رايحة "اضلع" نفسي يوم السبت
احجز لك معايا؟

nody يقول...

صبرنى
اسمحى لى اختلف معاكى

يعنى هو العيد لازم يجى بالكحك
طب ما نجيبه من برا
والوقت الى ها يروح فى عمايل الكحك نستفيد بيه فى عبادتنا
دا هما 30 يوم
لاقبلهم ولا بعدهم

وكمان العزومات الى عمال على بطال دى
والمبلاغات
الى بتحصل والبزخ
طب ايه رايك لو خلناهم عزومه واحده
والى نوفره نفطر بيه ناس غلابه
عمرهم ما هايقدروا يروحوا مءائد الافطار من التعفف
وبل الثواب ها يكونوا اتنين

اما باقى الى انتى كتباه
فاعندك حق
العمل عباده
زيه زى القراءان والتراويح

وبعدين انتى تقصدى مسجد السلاب؟
انا اسمع انه فيه حجات تنقط

صبرني يارب يقول...

محاسن صابر

ايووووه من هنا للسنه الجايه هافضل اقول
انا قلت لا للتراويح فى المساجد ؟؟

انا قلت ما تروحوش وما تتجمعوش؟؟

بس مش كدددده الى بيحصل ده استهبال

الى تروح تصلى رمضان كله وتجر وراها اورطه عيال ونصرخ ونصوت فى الجامع ونتشاكل تبقى قلة ادب يا محاسن

الى تتعطر وتتبرج وهى راحه الجامع تبقى قلة ادب

الى عاملينها عرض مستمر خارمين ودانا بميكروفنات المساجد برضه دي قلة ادب

نتجمع يا محاسن بقلب مؤمن مش تمثليات بنعملها على نفسنا قبل ما نمثل على بعض

والله انا شايفه واحده فاضيه وعندها وقت ماشي مافيش مانع

انما واحده تسيب بيتها الي محتاجها اكيد وواحد يسيب شغله وياجله ويعطل مصالح الناس اصل هانتجمع على الخير

لا يا جميل الشغل نفسه خير

واهتمامها ببيتها ويبقى فعلا مش ناقصه حاجه وجوزها راضي عنها ده برضه خير واهم خير

وبعد كده الى عايز يصلي يصلي ما قلناش حاجه

الفطار يا قمر دوسي بس على الزرار وقولي عايزه ايه يكون موجود
احلامك اوامر

صبرني يارب يقول...

عاشقه وغلبانه

انا جبته ولبسته وحياتك
ههههههههههه

منوره يا جميل

صبرني يارب يقول...

ريم

شكلها بترسم على طبق كحك
ههههههههههه

كل سنه وانتى بخير وسعاده يارب

صبرني يارب يقول...

ستيته

راحه فين والنبى

خدينى معاكي الهي يسترك ده انا هاين عليااطفش من الدنيا كلها فى العيد وما بعده

واه ثم اه ثم اه على الى بعد العيد

لما اشوفك هاقولك

والله يا ستيته انا بافكر اجيب مراره كاوتش صينى اكيد هايعملوها اشمعن هي

صبرني يارب يقول...

نودي

طبعا اسمحلك تختلفي معايا

ده يوم المنى
احنا نطول يا جميل

نيجى للي بعد كده بقى

اه لازم العيد يجى بالكحك

وما يجيش بالكحك ليه ؟؟

هو فيها حاجه لما يجى بالكحك

بصي يا نودي بكره لما يبقى عندك اولاد ان شاء الله هاتفكري فى الكحك

انا اشتريت جاهز مره عشان كنت حامل وتعبانه شويه وكانوا ولادي صغيرين

لكن ايه المشكله نعمل كحك وبعدين نعبد ربنا يعنى

نقدر نعمل كميات صغيره تاخد مننا لو عملنا كل الاصناف المتعارف عليها يوم واحد من الثلاثين يوم وفى اليوم ده كمان نصلي برضه ونصلي التراويح انشاله واحنا قاعدين الا يكون حد ركبته واجعاه زيي
ونقرا قرآن انشاله سوره واحده ولا صفحه واحده بس نتدبره

والله كل ده ينفع

وينفع نعزم اهلنا واصحابنا وننويها افطار صائم وناخد ثواب

تعزمي اهل جوزك بنيه صافيه وتقولي افطار صائم وصدقه وصله رحم وارضاء زوج كمان
شوفي بقى اعملي كده وانوي الحاجات دي وشوفي ده احسن ولا تقري جزء قرآن جايز انتى مش فاهمه نصه

تعزمي اهلك وتبريهم

وتعزمي اصاحبك ومعارفك وتعملي علاقات انسانيه محترمه
ولو انتى قاعده مع اصحابك قلتى كلمة حق لواحده فيهم تصلحيها على جوزها جايز يكون ثوابك اكتر من اي حاجه عملتيها


ولو ربنا مقدرك تعزمي كل الناس اعزمي مش قادره بلاش

ولو ربنا مقدر تتصدقي على الناس تصدقي والاقربون اولى بالمعروف

والوقت الى الى هايروح فى الكحك مش هايروح انوي بس انتي نية خير وانتى بتعملي الكحك وقولي العيال هايفرحوا وهما بيتفرجوا عليا وهادي لحماتي طبق عشان ما عملتش
وهادي لجارتي هديه محبه وهادي لماما تشوف شطارة بنتها وتفرح بيها
وانتى تلاقي الكحك عباده برضه


بالنسبه للمساجد انا ما باروحش مساجد الا قليل الحقيقه اللهم الا مسجد جنبنا لو كان عندي وقت

او لو اتزنقت فى صلاه وانا بره البيت

اما السلاب ومش عارفه ايه الى جنبه فانا باشوف رواده لما انزل اشتري حاجه من المشايه
وباشوف الازمه المروريه الى بتحصل ساعة خروج الناس من الصلاه

وباشوف عربيان الناس الى داخلين يصلوااااااااااا مركونه مخالف وساده الشارع ومعطله الشارع ومصالح الناس الى خارجين يقضوا مصالحهم ويشوفوا اكل عيشهم

مهززززله دي مش تعبدات

خليتنى رغيت كتير اوي يا نودي ايه ده بطلي رغي مش معقول كده
هههههههههههه

مصري جدا يقول...

ان جيتوا للحق صاصا على حق

شمس النهار يقول...

اكيد اكيد في مؤامره عليا في البلوجر انا كتبت تعليق قبل ده ومالاقيتوش اصلا

ماعلينا
هيروحوا من ربنا فينا

شوفي ياصبرني
هوني علي نفسك ياحبيبتي
انت شايله المراره كده هتطلع لك تاني وانت حره هتبقي مشكله

بالنسبه للجوامع انا بقالي سنين مابصليش في الجامع خالص
علشان نادي الاطفال الل بيكون موجود وبيطلعنا من روحانيات الصلاه وخشوعها
وبصليها في بيتي لا في مخدعي وافضل صلاه صلاة المراه في بيتها

وماحدش يقول لي اشمعنا

وبصراحه الموضوع بقي منظره
والشاطر اللي يطول اكتر ويكون صوته اعلي
وصدق الرسول الكريم الذي لم يكن ينطق عن الهوي

ان زمنا زمن التنطع في الدين

بالنسبه لعزومات رمضان

في عائلات مابيجتمعوش غير في رمضان
وصلة الرحم فرض
هنتعاقب عليها
والتراويح سنه
يعني هنتعاقب لو حرمنا الناس دي من انها تجتمع علشان نصلي التراويح
ياسيدي ماجتش من يوم وصليها بعد العزومه ماتخلص والناس تروح من بيتكم مبسوطه واهو تبقي صلي علي رواقه

اما موضوع الكحك ده الحقيقه انا كده كده بجيبه جاهز ورحم الله امرئا عرف قدر نفسه(وربنا يستر وتطلع الهمزه صح:):)

صبرننننننننييييييي

كبري دماغك علي الاخر
كل سنه وانت طيبه

MǿиY El-Shreef يقول...

ماشاء الله عليكي ياصبرني

بجد جبتيها صح انا مقتنعه بكلامك جدا جدا

نفسي الناس تفهم الدين صح والله

ربنا يجعلنا من الناس الي بتعبد بتتدبر

رمضان كريم ياجميل

صبرني يارب يقول...

مصري جدا

عمالين تخترعولي اسامي يا جودعان مش معقوله
ههههههههههه

بس كده طب قول اي حاجه ده انا باجي عندك اقول صفحتين تلاته يا راجل
ههههههههههه

نورت

صبرني يارب يقول...

موني الشريف

يارب يارب يارب يفهموا يارب يعقلوا ياااااااااارب

نورتي يا جميل

صبرني يارب يقول...

شمس النهار

وانا بطلت اروح من اول ما خلفت

روحت مره ومريم عمرها سنه وشويه كده وحررررررررمت

العزومات مش بس صلة رحم فى رمضان
ده افكار صائم كمان ودي من العبادات الى الرسول حث عليها فى رمضان فعلا

والكحك يا برنسيس اعملك انا يا جميل

والهمزه اعتقد انها امرء بس نسأل استاذ عمرو بقى يفتينا

اكيد البلوج ما استحملش نورك يا جميل بلع التعليق
ههههههههههه

نورتي يا قمر

عاشقه الرومانسيه يقول...

ليس العيد لمن لبس الجديد
ولكن العيد لمن أمن يوم الوعيد
ودى لانى لسه مش اشتريت لبس للعيد
باصبر نفسى يعنى
(:

والله ياصبصب البلاوى اكتر من كده بكتير
الحمد لله انك شيلتى المراره عقباااااااالى

صبرني يارب يقول...

بعد الشر عليكى يا اختي

خليها هاتنفعك يوم زنقه

ههههههههههههههه

mahasen saber يقول...

انا مقلتش كدا يا صبرنى مبقلش الست تسيب بيتها وتاخد عيالها وتروح تتفسح فى المسجد

ومبقلش ان الناس تروح تتبهرج

انما انا بقول اليى وقته يسمح ويروح المسجد بادبه يروح
ده شهر واحد فى السنه ومفيش حد هيبخل على نفسه بصلاة الجماعه فيه

ده اليى ااقصده
ودوست ومفيش حاجه طلعت

صبرني يارب يقول...

اوك يا محاسن

متفقين يا جميل هو انا قلت غير كده ؟

لا لازم تاخدي الكتالوج بقى عشان تدوسي على الزرار الصح
هههههههههه

نورتي يا قمر

أم مالك يقول...

ازيك ياصبرنى
عيد مبارك عليكى وعلى اسرتك
وعلى الله تروحى حتة انتى وستيتة
ومتاخدونيش معاكوا
اصل الواحد برضه على الاخر
تعليقاتك وصلت ومفهومة وماتزعلش حد
لان كل اللى قلتيه ريقنا نشف
بس مين اللى يسمع
خصوصا الستات وعيالهم والنزهة اللى رايحنها مش المسجد
ومعاكى كمان فى موضوع ختم القران
القصد التدبر وليس الور ور زى ماقلتى
انا متفقة معاكى بس زى ستيتة
خايفه عليكى خدى بالك من نفسك ياقمر
تحياتى

حنعيش يعنى حنعيش يقول...

اكسسوار ياختى حياتنا كلها اسسوار واكسسوار العبادات بيبرق قوى بيخطف العين بس اهى كلها يومين وادى دقنى لو شفتى حد فى الجامع ولمعة الاكسسوار تختفى ويرجع صدا الاخلاق من تانى
سؤال مين بيضحك على مين و لية ولحساب مين ؟؟؟؟؟؟؟؟؟؟؟ وعلى رأى توفيق الدقن استر ياااااااارب

آه من قلبي يقول...

عندك حق
وبعدين دة العالم كله اتغير
ورمضان مبقاش رمضان
والناس مبقوش الناس بتوع زمان
ولا المصرين بقوا الناس الجدعان الطيبين
سنة الحياة
كله بيتغير
اتمنى تشرفيني ف مدونتي المتواضعة

عاشقه وغلبانه يقول...

الجديد عندي وعند خيخه
ركزي معانا وماتوهيش في العيد والكحك والبسكوت ياروح قلبي

فشكووول يقول...

السلام عليكم صبرنى ياربى

تحياتى


عيد سعيد عليكم وعلى عائلتكم

كل عام وانتم بخير

يعيده الله عليكم بالخير واليمن والبركات

عمرو يقول...

طولتى أيه يا أم خالد ؟؟
ده كل اللى أنتى أتكلمتى فيه ده مايجيش جزء صغنون من التمثيليات و المسرحيات و الأفلام اللى بنشوفها فى رمضان !!
سلوكيات غريبه جدا بتظهر فجأه كده على الناس بدءا من تقواهم الشديه اللى ظهرت أعراضها عليهم فجأه و مرورا بعشرات الحركات اللى لا يرضى عنها المولى لحد ما توصل اٍن الواحد يكتشف أنه عايش فى تمثيليه طوييييييييله مليئه بالكوميديا السوداء و الله ..
أنا أكتر حاجه بتخنقنى بجد الموبايلات اللى بترن أثناء صلاة التراويح فى جيوب المصلين برنات ما أنزل الله بها من سلطان !!
و لك أن تتخيلى الشيخ محمد جبريل و هو بيدعوا و حالة خشوع عميقه تهيمن على كل الموجودين وراءه و فجأه يرن موبايل مصلى بصوت بنوته شخلوعه بتغنى : أنا قطه مغمضه !!
مما دفع الشيخ جبريل أنه يدعى على كل الموبايلات المفتوحه بالخراب و خلا كل من فى المسجد ضحكوا بصوت هالى ..
ربنا يهدى و يشفى البشر ..
سمعونا آمين ..
كل سنه و انتى طيبه ..

شمس النهار يقول...

صبرني
تسلمي ياجميله وتسلم ايدك

ده نورك

وواضح ان اللورد
موافق علي الهمزه الغلط


كل سنه وانت طيبه وبخير وصحه وسعاده

وعيد سعيد عليكي وعلي حبايبك

sab7al5air يقول...

سلام عليمك
انا اتفق معاك في كل القولتيه ربنا يهدينا يارب بس الحمد لله الوضع احسن هنا في السودان
تحياتي

تامر علي يقول...

كل عام وانتم بخير

عيد سعيد عليكم وعلى الأسرة الكريمة

تحياتي :)

صبرني يارب يقول...

ام مالك

الله يكرمك متشكره ليكى

لا ما تخافيش يا جميل عمر الشقي بقي انا ادها ان شاء الله

كل سنه وانتى طيبه يا جميل

صبرني يارب يقول...

حنعيش يعنى حنعيش

ايوووووووه اكسسوااااار فعلا هو ده

بيضحكوا على نفسهم اولا وعلى بعض ثانيا
انما علام الغيوب بقى ما يقدروش

كل سنه وانت طيب يا باشا

صبرني يارب يقول...

عاشقه وغلبانه

متابعه والله يا جميل

رغم التوهان والله

صبرني يارب يقول...

آه من قلبي

سنة الحياه نتغير

مش نتغبر

بس مش هانستسلم ونقول هو كده
عشان هو مش كده ابدا

نورتي يا جميل وان شاء الله هازورك

بس العيييييييد ونفوق بقى

صبرني يارب يقول...

استاذنا فشكول

يا لهوووووي مكسوفه مكسوفه مكسوفه

والله نفسي اجي مدونتك حتى اقولك كل سنه وانت طيب

معلش اعذرني يا فندم

حضرتك منور المدونه وصاحبتها ربنا يكرمك

كل سنه وانت بخير وهنا وسعاده يارب انت وكل عيلتك الكريمه

صبرني يارب يقول...

استاذ عمرو

ههههههههههههههههههه
حلوه حلوه حلوه

دعى على الموبيلات دي جامده جدا

هم يبكى وهم يضحك والله

نورت يا استاذنا كل سنه وانت طيب

صبرني يارب يقول...

شموووووووسه

على ايه يا جميل
ربنا يكرمك يا قمر وكل سنه وانتى بخير وسعاده يارب

ممكن بوسه ؟

صبرني يارب يقول...

تامر علي

متشكره اوي وكل سنه وانت طيب وبخير وسلام

صبرني يارب يقول...

صباح الخير

منوره طيب الحمد لله ان لسه ما وصلتش لحد عندكم

بس خدي بالك نعديكم بقى احنا قريبين
ههههههههههههههه

نورتي يا جميل

Soul.o0o.Whisper يقول...

احم ... احم
لا لسه يا شوشو والله

قلت بعد العيد بئا لما الدنيا تفضى و المحلات تنزل الجديد
أصلهم كلهم شغالين فى البقايا اللى عندهم لسه
هههههههههههههه


كل سنة و انتى طيبة يا جميل
و عيد سعيد عليكى و على العيلة كلها



دمتى بكل الخير

المـــفـــــــقــــــــوعـــــة مــرارتـهــا يقول...

كل سنة وانتي طيبة ياجميل
وربنا يارب يسعدك ويسعد ايامك دايما
ندعوكى لمشاركتنا في الكتابة داخل مجلة ميكانو الالكترونية ولينك المجلة هو
http://www.mikanoo.com/
ويمكنك ارسال مقالات علي ايميل المجلة وهو
info@mikanoo.com
مع تحياتي
سحر غريب

صبرني يارب يقول...

سول

اه هى فكره برضه الناس فى الشوارع مهبولين على الشرا فى كل حاجه

على اساس ان فى معركه حربيه فى العيد

صبرني يارب يقول...

مفقوعه

كل سنه وانتى طيبه يا جميل
ايه النور ده

ميكانوا حاضر هازورها ان شاء الله

انما الكتابه خليها شويه على ما افضى واروق حبه

شكرا يا جميل اوي على الدعوه